CDC អនុម័តគំរោងវិនិយោគ៥មានទឹកប្រាក់ប្រមាណ២៣លានដុល្លារអាមេរិក

January 16, 2019

ដោយវុត្ថា
ភ្នំពេញ: ក្រុមប្រឹក្សាអភិវឌ្ឍន៍កម្ពុជា(CDC) តាមរយៈគណកម្មកាធិការវិនិយោគរបស់ខ្លួនបានអនុម័តគំរោងវិនិយោគចំនួន៥ ដែលមានទុកវិនិយោគប្រមាណ២៣លានដុល្លាអាមេរិក។

យោងតាមសេចក្តីប្រកាសព៌តមានរបស់ក្រុមប្រឹក្សាអភិវឌ្ឍន៍កម្ពុជា បានឲ្យដឹងកាលពីថ្ងៃទី១៥ មករាកន្លងមកថា តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនប័ត្រចុះបញ្ជីជាស្ថាពរ ជូនដល់ក្រុមហ៊ុនដូចខាងក្រោម ទី១-“GUOHUI LUGGAGE TRAVELING PRODUCTS (CAMBODIA) CO.,LTD.” គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិឃ្លាំងសម្បត្តិ ឃុំពត់សរ ស្រុកបាទី ខេត្តតាកែវ មានទុនវិនិយោគប្រមាណ៥,២៤លានដុល្លារអាមេរិក និងអាចបង្កើតការងារបានចំនួន ១.០៦៩កន្លែង។

ទី២-“GLOWING VALUE (CAMBODIA) BAG & LUGGAGE CO.,LTD.” គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិត្រពាំងឬស្សី ឃុំទំនប់ធំ ស្រុកពញាឮ ខេត្តកណ្តាល មានទុនវិនិយោគប្រមាណ ៤,១៨លានដុល្លារអាមេរិក និងអាចបង្កើតការងារបានចំនួន ២.១៦៨កន្លែង។ ទី៣-“PEEVI INDUSTRY (CAMBODIA) CO.,LTD.” គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិឃ្លាំងសម្បត្តិ ឃុំពត់សរ ស្រុកបាទី ខេត្តតាកែវ មានទុនវិនិយោគប្រមាណ៥,២៤លានដុល្លារអាមេរិក និងអាចបង្កើតការងារបានចំនួន ១.០៩៦កន្លែង។

ទី៤-“HILLTOP LUGGAGE (CAMBODIA) CO.,LTD.” គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅផ្លូវជាតិលេខ២១B ភូមិអន្លង់សាន ឃុំព្រែកស្តី ស្រុកកោះធំ ខេត្តកណ្តាល មានទុនវិនិយោគប្រមាណ៦,៤១លានដុល្លារអាមេរិក និងអាចបង្កើតការងារបានចំនួន១.៩៦៦កន្លែង និងទី៥-“EVER SUPRA GARMENT (CAMBODIA) CO.,LTD.” គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិព្រែកកំពឹស សង្កាត់ព្រែកកំពឹស ខណ្ឌដង្កោ រាជធានីភ្នំពេញ មានទុនវិនិយោគប្រមាណ៣,៧៤លានដុល្លារអាមេរិក និងអាចបង្កើតការងារបានចំនួន ២.១១១កន្លែង៕

រដ្ឋាភិបាលជំរុញលើកទឹកចិត្តឲ្យមានការវិនិយោគពីអ្នកធុរកិច្ចក្នុងស្រុកកាន់តែច្រើន

January 16, 2019

0

ដោយស៊ីវ ម៉េង
ភ្នំពេញ: មន្រ្តីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុបានថ្លែងថា រដ្ឋាភិបាលមានផែការជំរុញឲ្យមានការវិនិយោគ ពីអ្នកធុរកិច្ចក្នុងស្រុកឲ្យបានកាន់តែច្រើន ព្រោះការវិនិយោគនៅកម្ពុជាបច្ចុប្បន្នភាគច្រើនជាអ្នកវិនិយោគបរទេស។

រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុលោកវង្សី វិស្សុតបានថ្លែងក្នុងវេទិកា សាធារណៈស្តីពី ការគ្រប់គ្រងម៉ាក្រូសេដ្ឋកិច្ច និងថវិការឆ្នាំ២០១៩ កាលពីថ្ងៃទី១៥ ខែមករា ឆ្នាំ២០១៨កន្លងមកថា នៅក្នុងនីតិកាលទី៦នេះ រាជរដ្ឋាភិបាលនឹងបង្កើនការគ្រប់គ្រងលើវិស័យសេដ្ឋកិច្ចឲ្យកាន់តែមានតម្លាភាព ហើយទោះជាកម្ពុជាមានតែកំលាំងពលកម្មបម្រើក្នុងវិស័យការងារ គឺមិនគ្រប់គ្រាន់ឆ្លើយតបនឹងការរីកចម្រើននោះឡើយ ដូច្នេះយើងត្រូវជម្រុញការលើកទឹកចិត្ត ឲ្យមានអ្នកវិនិយោគទុនក្នុងស្រុក ចូលរួមវិនិយោគកាន់តែច្រើន ព្រោះបច្ចុប្បន្នការវិនិយោគក្នុងស្រុកភាគច្រើនជាជនបរទេស។

លោកបន្តថា “ក្នុងរយៈពេល៥ឆ្នាំក្នុងអណត្តិនេះ រាជរដ្ឋាភិបាលនឹងជម្រុញបង្កើនអ្នកវិនិយោគជាជនជាតិខ្មែរ នៅក្នុងស្រុកឲ្យកាន់តែច្រើន”។លោកបន្តថា “រដ្ឋាភិបាលបានត្រៀមនូវកញ្ចប់ថវិកាជាច្រើន ដើម្បីគាំទ្រវិស័យឯកជន ព្រោះបើសិនយើងត្រូវរៀបចំគោលនយោបាយបានត្រឹមត្រូវ នឹងមានផែនការច្បាស់លាស់”។

លោកវង្សី វិស្សុតបានបន្តថា ស្របពេលដែលបដិវត្តន៍ឧស្សាហកម្មទី៤ កំពុងបានដំណើរការ ដូច្នេះនៅក្នុងរយៈពេល១០ឆ្នាំនេះ រាជរដ្ឋាភិបាលមានផែនការរៀបចំផែនការយុទ្ធសាស្រ្តអភិវឌ្ឍន៍សេដ្ឋកិច្ចរយៈពេល១៥ឆ្នាំ ដែលបច្ចុប្បន្នបានកំពុងរៀបចំតាក់តែងឡើងនេះ ដោយបានអនុវត្តន៍តាមគោលនយោបាយបានត្រឹមត្រូវ សេដ្ឋកិច្ចកម្ពុជានឹងដើរលឿនទៅមុខជាមិនខាន។

លោកបន្តថា ការគ្រប់គ្រងម៉ាក្រូសេដ្ឋកិច្ច និងថវិកាឆ្នាំ២០១៩ រាជរដ្ឋាភិបាលបានបន្តយកចិត្តទុកដាក់លើវិស័យអទិភាពចំនួន៤ មនុស្ស ផ្លូវ ភ្លើង និងទឹក រួមជាមួយកិច្ចការមួយចំនួន ដែលឆ្លើយតបនឹងតម្រូវការចាំបាច់របស់កម្ពុជា នៅក្នុងដំណាក់កាលថ្មី ក្នុងក្របខណ្ឌថវិការឆ្នាំ២០១៩ ត្រូវបានរៀបចំដើម្បីឆ្លើយតបទៅនឹងកម្មវិធីគោលនយោបាយ និងយុទ្ធសាស្រ្តចតុកោណដំណាក់កាលទី៤ របស់រាជរដ្ឋាភិបាល គឺការឈរលើក្របខណ្ឌគោលនយោបាយម៉ាក្រូសេដ្ឋកិច្ច រួមជាមួយគោលការណ៍ពង្រីកការគ្រប់គ្រង់ថវិការផងដែរ។

ក្នុងជំនួបជាមួយអ្នកសារព៌តមាន សម្តេចតេជោហ៊ុន សែននាយករដ្ឋមន្រ្តីកម្ពុជាកាលពីថ្ងៃទី១១ មករាកន្លងមកនេះបានប្រកាសដាក់ចេញនូវយុទ្ឋនាការ ពង្រឹងឯករាជ្យភាពរបស់កម្ពុជា តាមរយៈការកែទម្រង់លើវិស័យសំខាន់ៗជាច្រើន ពិសេសសម្តេចបានជំរុញលើការបង្កើនមិត្ត ជាមួយបណ្តាប្រទេសនានានៅលើពិភពលោក។ សម្តេចបន្តថា ជាមួយគ្នានេះសម្តេចបានចុះហត្ថលេខា ដើម្បីដកចេញមន្រ្តីពីព្រំដែនទាំងអស់ ដោយទុកតែមន្រ្តីគយ និងអន្តោប្រវេសន៍ប៉ុណ្ណោះ ដើម្បីកាត់បន្ថយតម្លៃនៃការនាំចេញ និងជួយជំរុញលើកកំពស់ការធ្វើធុរកិច្ច ធ្វើយ៉ាងណាឲ្យអ្នកធុរកិច្ចក្នុងស្រុកចំណេញច្រើន។

សម្តេចបន្តថា “ការដាក់មន្រ្តីច្រើននៅតាមព្រំដែន មិនមែនជាដំណោះស្រាយទេ តែវាធ្វើឲ្យមានការបង្កើនការចំណាយក្នុងការនាំចេញ នាំចូល”។សម្តេចបន្តថា “សេដ្ឋកិច្ចកម្ពុជាមិនអាចពឹងលើវិស័យតែមួយទេ យើងមានវិស័យច្រើនដើម្បីទ្រទ្រង់កំនើនសេដ្ឋកិច្ចរបស់យើង យើងមិនអាចឲ្យគេខ្ទប់រន្ឋច្រមុះមួយហើយ យើងស្លាប់នោះទេ”៕

អភិបាលខេត្តព្រះសីហនុជម្រុញឲ្យក្រុមហ៊ុនវិនិយោគនៅកោះរ៉ុងសន្លឹមរៀបចំ អាងចម្រោះទឹកកខ្វក់

January 16, 2019

0

ដោយវត្ថា
ព្រះសីហនុៈ អភិបាលខេត្តព្រះសីហនុ លោកយន្ត មីនបានជំរុញឲ្យម្ចាស់ទីតាំងអាជីវកម្មទេសចរណ៍ទាំងអស់ ដែលកំពុងធ្វើប្រតិបត្តិការនៅតាមតំបន់ឆ្នេរកោះរ៉ុងសន្លឹម ត្រូវរៀបចំឲ្យមានអាងចម្រោះទឹកកខ្វក់ ឲ្យបានត្រឹមត្រូវជៀសវាងការបង្ហូរទឺកសំអុយចូលសមុទ្រនាំឲ្យប៉ះពាល់ដល់បរិស្ថាននិងសម្រស់ឆ្នេរខ្សាច់។

ក្នុងឳកាសព្រឹកទី១៤ ខែ មករា ឆ្នាំ២០១៩កន្លងមកនេះ អភិបាលខេត្តព្រះសីហនុ លោកយន្ត មីន បានដឹកនាំមន្ត្រីក្រោមឱវាទមួយចំនួន ធ្វើដំណើរទៅពិនិត្យមើលស្ថានភាពនៃការអភិវឌ្ឍនៅដែនកោះរ៉ុង។ គោលបំណងសំខាន់ នៃដំណើរចុះទៅកោះរ៉ុងនេះ ដើម្បីត្រួតពិនិត្យមើលស្ថានភាពជាក់ស្ដែង និងវឌ្ឍនភាពនៃដំណើរការអភិវឌ្ឍរបស់ក្រុមហ៊ុនទាំងឡាយនៅលើដែនដីកោះរ៉ុង បន្ទាប់ពីបានទទួលសិទ្ធវិនិយោគពីរាជរដ្ឋាភិបាល។
លោកបន្តថា “បញ្ហាទឹកកខ្វក់ គឺជាក្តីបារម្ភធំមួយគ្រា ដែលសន្ទុះនៃការអភិវឌ្ឍមានការកើតឡើងខ្លាំងនៅក្រុងព្រះសីនុ ក្នុងរយៈពេលបីឆ្នាំចុងក្រោយនេះ”។

ដើម្បីដោះស្រាយបញ្ហានេះលោកយន្ត មីនបានណែនាំអោយម្ចាស់ទីតាំងអាជីវកម្ម ផ្ទះសំណាក់ សណ្ឋាគារ បឹងហ្គាឡូ រីស្សត និងភោជនីយដ្ឋាននៅតាមឆ្នេរកោះនេះ អោយរួមគ្នាថែររក្សារបរិស្ថានអោយបានល្អ ក្នុងនោះលោកបានជំរុញអោយទីតាំងទាំងនោះ ត្រូវរៀបចំប្រព័ន្ធអាងចម្រោះទឹកកខ្វក់ អោយបានត្រឹមត្រូវ ដើម្បីចម្រោះទឹកកខ្វក់មុននឹងបង្ហូរចូលទៅក្នុងសមុទ្រ ធ្វើយ៉ាងណានាំគ្នាលើកកម្ពស់សោភ័ណ្ឌភាពនេះ ឆ្នេរនៅតំបន់ឆ្នេរកោះរ៉ុងនេះ ដើម្បីទាក់ទាញភ្ញៀវទេសចរមកកំសាន្តកាន់តែច្រើនថែមទៀត។

ពាក់ព័ន្ធនឹងបញ្ហាទឹកកខ្វក់នេះដែរ ដោយមានការគាំទ្រពីថ្នាក់ជាតិផងនោះ ស្ថានីយ៍បូមទឹកកខ្វក់ចំនួន៤ ទីតាំងនៅក្រុងព្រះសីហនុ បាននឹងកំពុងស្ថាបនា សំរាប់បូមចូលទៅស្ថានីយ៍ចំរោះធំមួយមានទំហំជាង១៦ហិចតា ដើម្បីធ្វើការចម្រោះជាតិពុលសិនមុនឹងបង្ហូរចូលទៅសមុទ្រ។

លោកយន្ត មីន បានបញ្ជាក់ថា អនាគតដ៏ខ្លីបញ្ហាគ្រប់គ្រងទឹកសំអុយនឹងត្រូវដោះបាន។ ជាដំណោះស្រាយចំពោះមុខបច្ចុប្បន្ននេះ អាជីវកម្មដ្ឋាននៅតំបន់ដីគោកនេះកំពុងរៀបចំធ្វើអាងចម្រោះទឹកកខ្វក់បានមួយចំនួនហើយ។ ដោយឡែកទីតាំងមួយចំនួនទៀតដែលមិនទាន់រៀបចំធ្វើអាងចម្រោះទឹកកខ្វក់ រដ្ឋបាលខេត្តកំពុងតែជំរុញអោយពួកគាត់ធ្វើអាងនេះផងដែរ។
បញ្ហាទឹកកខ្វក់ជាកង្វល់មួយរបស់រដ្ឋាភិបាល ដែលរដ្ឋាភិបាលកាលពីពេលថ្មីៗនេះបានប្រកាសចំណាយទឹកប្រាក់ជាច្រើនលានដុល្លារអាមេរិក ដើម្បីសាងសង់អាងប្រព្រឹត្តិកម្មទឹកកខ្វក់នៅក្រុងព្រះសីហនុ បន្ទាប់ពីមានកិច្ចប្រជុំអន្តរក្រសួងដឹកនាំដោយលោកឧបនាយរដ្ឋមន្រ្តីជា សុផារ៉ារដ្ឋមន្រ្តីក្រសួងរៀបចំដែនដី នគរូបនីយកម្មនិងសំណង់។

លោកថោង ខុនរដ្ឋមន្រ្តីក្រសួងទេសចរណ៍បានចាត់ទុកបញ្ហាទឹកកខ្វក់ ជាបញ្ហាប្រឈមមួយសម្រាប់ខេត្តព្រះសីហនុ ដោយសារខេត្តនេះមានការរីកចម្រើនលឿន ដែលធ្វើឲ្យមានកំណើនមនុស្ស ខណៈប្រព័ន្ឋហេដ្ឋារចនាសម្ព័ន្ឋនានា ពិសេសប្រព័ន្ឋចម្រោះទឹកកខ្វក់នៅតែជាបញ្ហា ប៉ុន្តែយ៉ាងណាក៏ដោយរដ្ឋាភិបាលបាននិងកំពុងយកចិត្តទុកដាក់លើបញ្ហានេះ។
លោកបន្តថា “យើងត្រូវតែរួមគ្នាគិត រួមគ្នាធ្វើ និងរួមគ្នាទទួលខុសត្រូវ”៕

ការនាំចូលសម្ភារៈសំណង់កើនឡើង ៥០ ភាគរយនៅក្នុងឆ្នាំ ២០១៨

January 15, 2019

0

ដោយវុត្ថា

ភ្នំពេញ៖ មន្ត្រីជាន់ខ្ពស់នៃក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា នៅក្នុងឆ្នាំ ២០១៨ កន្លងទៅនេះ ការនាំចូលសម្ភារៈសំណង មកពីក្រៅប្រទេស ដើម្បីផ្គត់ផ្គង់នៅក្នុងទីផ្សារសំណង់កម្ពុជាបានឡើង ៥០ ភាគរយបើធៀបនឹងឆ្នាំ ២០១៧ ។

លោក វង្សី វិសុទ្ធ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានឱ្យដឹងនៅក្នុងវេទិការម៉ាក្រូវសេដ្ឋកិច្ចកម្ពុជានៅថ្ងៃទី ១៥ ខែមករា ឆ្នាំ ២០១៩ នេះ ថា ការឡើងយ៉ាងច្រើនដូចនេះ ដោយសារតែមានការសាងសង់ផ្សារទំនើប អគារខុនដូ អគារការិយាល័យច្រើនក្នុងឆ្នាំ ២០១៨ កន្លងទៅនេះ ។

លោកបន្តថា ទុនវិយោគផ្ទាល់ពីក្រៅប្រទេសក្នុងវិស័យសំណង់នេះ បានកើឡើង ជាង ៣០ភាគរយ ព្រោះអ្នកវិនិយោគភាគច្រើនមានជំនឿទៅលើវិស័យនេះ ថាមានស្ថេរភាព មិនត្រឹមតែប៉ុណ្ណោះវិស័យនេះ បានជំរុញឱ្យសេដ្ឋកិច្ចជាតិមានការកើនឡើង និងរក្សាបានក្នុងរង្វង់ ៧ភាគរយ និងបន្តកំណើន ៧ភាគរយបន្ថែមទៀតក្នុងចំណោមវិស័យអទិភាពនានារបស់កម្ពុជា ដូចជា វិស័យកាត់ដេរ ការលក់ដុំ និងលក់រាយ ព្រមទាំងសណ្ឋាគារ និងភោជនីយដ្ឋាន។

រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុរូបនេះ បញ្ជាក់ទៀតថា វិស័យសំណង់នៅក្នុងប្រទេសកម្ពុជាគឺមានស្ថេរភាពល្អ មានលំនឹង និងបន្តមានស្ថេរភាពថែមទៀតសម្រាប់ឆ្នាំ ២០១៩នេះ តទៅ ដោយសារតែប្រទេសកម្ពុជារក្សាបាននូវសុវត្ថិភាព សន្តិសុខ សន្តិភាព និងបរិយាកាសនយោបាយល្អ ព្រមទាំងរដ្ឋាភិបាលផ្តល់នូវបរិយកាសល្អជូនដល់អ្នកវិនិយោគទាំងក្នុងស្រុក និងក្រៅស្រុក។

លោកបន្តទៀតថា សម្រាប់វិស័យអលនទ្រព្យក្នុងឆ្នាំ ២០១៨ វិញក៏មានស្ថានល្អផងដែរ ពោលកើនឡើង ៨.៨ភាគរយ ព្រោះមានតម្រូវការខ្ពស់ទាំងវិស័យខុនដូរដែលមានតម្លៃកម្រិតទាប មធ្យម និងខ្ពស់ ព្រមទាំងតម្រូវការការិយាល័យក្នុងទីផ្សារ នេះ សរបញ្ជាក់ថា វិស័យសំណង់ និងអលចនទ្រព្យនឹងនៅតែកើនឡើងទៅមុខ។

យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់បានឱ្យដឹងថា ទុនវិនិយោគក្នុងវិស័យសំណង់ឆ្នាំ២០១៨ សម្រេចបានទឹកប្រាក់ ៥៤០០លានដុល្លារ ខណៈឆ្នាំ២០១៧ទុនវិនិយោគក្នុងវិស័យនេះមានទំហំទឹកប្រាក់ ៦២០០លានដុល្លារ៕

Gov’t developing infrastructure for boost economic growth

January 15, 2019

0

By: Siv Meng

PHNOM PENH: Cambodian Prime Minister, Samdech Techo Hun Sen announced that there are 3 mega infrastructure projects will be built very soon while others plan to start after to boost economic growth.

Speaking at the groundbreaking 3rd Ring Road’s ceremony January 14, Prime Pinister told that a bridge connecting between Stung Trang district, Kampong Cham province to Kroch Chhmar district, Tbong Khmum province is now under construction.

He said government is now also studying and planning another bridge which is to connect from Kratie province to Kompong Thom by linking national road 7 and 6 and the government is looking for fund to build news road and bridge connecting from Koh Kong to Pursat provinces and head to Samlot district, Battambang province”.

“This project will be convenience for people in the northwestern for transporting and trading their products. When it is ready, people can save a lot time to reach Koh Kong because now people want to go to Koh kong, they need to drive down to Phnom Penh first”. He said.

Mr. Sun Chanthol, minister of Public Works and Transport Last week said a high-way connecting from Phnom Penh to Sihaknouk Ville is going to begin to construct at the first quarter this year.

“At the end of January, the Chinese company is shipping their machineries here while 200 Chinese experts have already arrived in Cambodia”. He said. “This high-way is to be built by China Road and Bridge Corporation”.

Va Sim Soriya, Ministry of Public Works and Transport’s spokesman said that it is a right time for Cambodia to invest larger amounts of money for the infrastructure sector to guarantee the national economic growth.

Mey Kalyan, a senior adviser to the government’s Supreme National Economic Council, said that the government‘s investment on infrastructure are absolutely right and necessary to promote the national economy.

“To have economic developments, the government has to build new more infrastructures to speed up our economic growth”. He added.

រដ្ឋមន្ត្រីក្រសួងកសិកម្ម ជំរុញឱ្យអ្នកវិនិយោគវិស័យកៅស៊ូ ស្នើសុំរាជរដ្ឋាភិបាលសម្រាលការយកពន្ធនាំចេញ

January 15, 2019

0

ជាការលើកទឹកចិត្ត និងចូលរួមចំណែកក្នុងការលើកកម្ពស់ការវិនិយោគវិស័យកៅស៊ូនៅកម្ពុជា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សុខុន បានជម្រុញឱ្យអគ្គនាយកដ្ឋានកៅស៊ូ រៀបចំឯកសារព្រាងច្បាប់ ដើម្បីស្នើទៅសម្តេចតេជោ ជួយសម្រួលលើកលែងដល់ការយកតម្លៃបង់ពន្ធកៅស៊ូនាំចេញ ហើយយកពន្ធគឺគិតក្នុងអត្រាមួយយ៉ាងទាបបំផុត។

ថ្លែងនៅក្នុង វេទិកាសាធារណៈជាមួយក្រុមហ៊ុនវិនិយោគសម្បទានដីសេដ្ឋកិច្ច លោក វេង សុខុន បានលើកឡើងថា ៖ អគ្គនាយកដ្ឋានកៅស៊ូ ត្រូវពិនិត្យឡើងវិញនូវការព្យួរទុក សេចក្តីព្រាងច្បាប់ស្តីពីកៅស៊ូមួយអន្លើរសិន ប្រសិនបើមិនមានការចាំបាច់នាពេលបច្ចុប្បន្ននោះទេ ហើយត្រូវរៀបចំសេចក្តីព្រាងជាថ្មីសំណើស្នើសំទៅសម្តេច តេជោ ដើម្បីពិនិត្យ និងសម្រេចឡើងវិញទាក់ទងទៅនឹងការយកតម្លៃបង់ពន្ធកៅស៊ូនាំចេញ ដោយគួរមិនយកការបង់ពន្ធ ចំពោះតំលៃកៅស៊ូ ក្រោម២០០០ដុល្លារអាមេរិក ហើយក្នុងករណីតម្លៃកៅស៊ូថ្លៃជាង ២០០០ដុល្លារអាមេរិក ត្រូវបង់ពន្ធចំនួន ១០០ដុល្លារអាមេរិក ។

លោកបានបន្តទៀតថា ៖ ក្នុងនាមក្រសួងកសិកម្ម រុក្ខាប្រមាញ់ និងនេសាទ មានជំនឿយ៉ាងមុតមាំថា លទ្ធផលដែលនឹងទទួលបានពីអង្គវេទិកានាពេលនេះ គឺជាយន្តការមួយនៃការអនុវត្តគោលនយោបាយ និងយុទ្ធសាស្ត្ររបស់រាជរដ្ឋាភិបាលក្នុងការលើកកម្ពស់ផលិតភាព ពិពិធភាវូបនីយកម្ម និងពាណិជ្ជូបនីយកម្មកសិកម្មឆ្លើយតបទៅនឹងសេចក្តីត្រូវការរបស់ប្រជាកសិករ និងធុរជនក្នុងវិស័យកសិកម្ម។

គួររំលឹកផងដែរថា កាលពីពេលកន្លងទៅនេះ ពាក់ព័ន្ធទៅនឹងវិស័យកៅស៊ូ ត្រូវបានបណ្តាអ្នកវិនិយោគនាំគ្នាសម្ដែងនូវក្ដីបារម្ភជាខ្លាំងពាក់ព័ន្ធទៅនឹងការធ្លាក់ចុះនូវតម្លៃនៃការនាំចេញ រហូតមានអ្នកខ្លះស្ទើរតែអស់ទឹកចិត្ត ហើយសម្រេចបោះបង់ចោលទុនវិនិយោគ ហើយងាកទៅបោះទុនលើវិស័យផ្សេង។

ដោយឡែកពេលនេះ ខណៈបើការដាក់សំណើរទៅកាន់ប្រមុខរាជរដ្ឋាភិបាលសុំឱ្យមានការជួយសម្រួលលើការលើកលែងការយកពន្ធនាំចេញ ឬយកពន្ធនៅក្នុងកម្រិតមួយទាប នោះវាអាចនឹងជំរុញ និងលើកទឹកចិត្តដល់បណ្តាអ្នកវិនិយោគកៅស៊ូក្នុងស្រុកជាក់ជាមិនខាន ៕

កម្ពុជានឹងមានមជ្ឈមណ្ឌលមន្ទីរពិសោធន៍ ឧស្សាហកម្ម ថ្នាក់ជាតិថ្មី ចំនួន ២ បន្ថែមទៀត

January 15, 2019

0

ជាការពង្រឹងស្តង់ដាគុណភាពផលិតផលទំនិញ គឺជាការតព្វកិច្ច របស់ក្រសួងឧស្សាហកម្ម និងសិប្បកម្ម សម្រាប់ការពារផលប្រយោជន៍សេដ្ឋកិច្ចជាតិ ដែលតម្រូវឱ្យផលិតផលខ្មែរ ហក់រំលងឱ្យបាននូវរបាំងបច្ចេកទេស ។ ដើម្បីសម្រេចបានគោលដៅ ក្នុងការធ្វើពិពិធកម្មទីផ្សារ ផលិតផលកម្ពុជា ទៅលើទីផ្សារក្នុងតំបន់ ក៏ដូចជាបណ្តាប្រទេសនានា លើពិភពលោក រាជរដ្ឋាភិបាលសម្រេចសាងសង់មជ្ឈមណ្ឌលមន្ទីរពិសោធន៍ ឧស្សាហកម្មថ្នាក់ជាតិថ្មី ចំនួន២អគារ ដែលមានលក្ខណៈទំនើបជាងមុន នឹងផ្តល់លទ្ធភាពខ្ពស់ជាងមុន ។

លោក ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម បានថ្លែងឱ្យដឹងនៅ ក្នុងពិធីបើកសន្និបាត បូកសរុបលទ្ធផលការងារ របស់ក្រសួងឧស្សាហកម្ម និងសិប្បកម្មឆ្នាំ២០១៨ និងលើកទិសដៅការងារឆ្នាំ២០១៩ នាទីស្តីការក្រសួង កាលពីព្រឹកថ្ងៃទី១៥ខែមករានេះថា ក្រសួងសេដ្ឋកិច្ច និងហិរញ្ញវត្ថុ បានផ្តល់តម្លៃដល់ការងារអភិវឌ្ឍន៍ ស្តង់ដា បានគាំទ្រដល់ដំណើរការសាងសង់មជ្ឈមណ្ឌលមន្ទីរពិសោធន៍ ឧស្សាហកម្មថ្នាក់ជាតិ ដើម្បីលើកកម្ពស់ គុណភាព និងសក្ដានុភាពផលិតផលកម្ពុជា ។

អគារពិសោធន៍នេះ អាចចំណាយលើការសាងសង់ប្រមាណជា៨លានដុល្លារអាមេរិក និងនៅមានឧបករណ៍ពិសោធន៍ជាច្រើនទៀត ដែលត្រូវបំពាក់ ដើម្បីបម្រើឱ្យសេវាក្នុងការពង្រឹងគុណភាពនាំចេញផលិតផលកម្ពុជាទៅក្រៅប្រទេស។ អគារនេះអាចនឹងចាប់ផ្តើមដំណើរការសាងសង់នៅដើមឆ្នាំ២០១៩នេះ នៅលើទឹកសង្កាត់ចក្រអង្រែ រាជធានីភ្នំពេញ។ យ៉ាងណាក៏ដោយ លោកក៏បានស្នើសុំឱ្យជួយផ្តល់បន្ថែម នូវធនធានមនុស្ស និងឧបករណ៍សម្ភារៈបច្ចេកទេសដល់មជ្ឈមណ្ឌលពិសោធន៍ឧស្សាហកម្មមួយនេះ។

ជាមួយគ្នានោះ លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និង ហិរញ្ញវត្ថុ ក៏បានវាយតម្លៃខ្ពស់ ចំពោះការប្រឹងប្រែងរបស់ថ្នាក់ដឹកនាំ មន្ត្រីរាជការ នៃក្រសួងឧស្សាហកម្ម និងសិប្បកម្ម នាពេលកន្លងមក និងបានចាត់ទុកវិស័យឧស្សាហកម្ម ជាកម្លាំងចលករមួយ ដែលមិនអាចខ្វះបាន ក្នុងការជម្រុញការអភិវឌ្ឍន៍សេដ្ឋកិច្ចជាតិ ប្រកបដោយបរិប័ន្ន និងភាពធន់។

ការអភិវឌ្ឍន៍វិស័យនេះ ជាឧបករណ៍គោលនយោបាយ ប្រុកបដោយប្រសិទ្ធភាព សម្រាប់ការតភ្ជាប់រវាងវិស័យសេដ្ឋកិច្ច សំខាន់ៗ ដែលជា ឃ្នាស់ ជំរុញកំណើន និងបង្កើតការងារបន្ថែម ក្នុងវិស័យកសិកម្ម ទេសចរណ៍ និងសេវាកម្ម ព្រមទាំងរួមចំណែក រំដោះអតិរេកពលកម្ម ពីវិស័យកសិកម្ម ដែលធ្វើឱ្យផលិតភាពសរុបកើនឡើង និងមានចំណូលខ្ពស់ជាងមុន។

លោកបានបញ្ជាក់ទៀតថា ៖ រាជរដ្ឋាភិបាលបានផ្តល់អទិភាពខ្ពស់ ក្នុងការជម្រុញការអភិវឌ្ឍន៍ វិស័យឧស្សាហកម្ម និងសិប្បកម្មកម្ពុជា ដោយបានដាក់ចេញ និងអនុវត្តនូវគោលនយោបាយអភិវឌ្ឍន៍វិស័យឧស្សាហកម្ម ២០១៥-២០២៥ សំដៅជំរុញការធ្វើពិពិធកម្មសេដ្ឋកិច្ច ការពង្រឹងភាពប្រកួតប្រជែង ការលើកកម្ពស់ផលិតភាព និងការលើកស្ទួយផលិតកម្មក្នុងស្រុក។

នៅក្នុងនោះ ក្នុងនាមក្រសួងសេដ្ឋកិច្ច និង ហិរញ្ញវត្ថុ បានត្រៀមខ្លួនរួចជាស្រេច ក្នុងការជួយគាំទ្រ និងលើកទឹកចិត្តជម្រុញដល់ក្រសួងឧស្សាហកម្ម និងសិប្បកម្ម លើកកម្ពស់កិច្ចសហការឱ្យបានជិតស្និទ្ធ ជាមួយក្រសួង ស្ថាប័ន និងដៃគូរពាក់ព័ន្ធនានា ក្នុងបុព្វហេតុកសាង និងអភិវឌ្ឍន៍សេដ្ឋកិច្ច សង្គមកម្ពុជា ឱ្យកាន់តែរីកចម្រើនទៅមុខជាលំដាប់៕

ស្ពានឆ្លងកាត់កោះអន្លង់ចិននៃផ្លូវក្រវ៉ាត់ក្រុងទី៣ជាស្ពានទី១មានទំហំធំជាងគេ

January 15, 2019

0

ដោយ គង់ សូរិយា

ភ្នំពេញ៖ ក្រៅពីស្ពានអាកាដសចំនួន៤ ដែលមានប្រវែង១០០០ម៉ែត្រ ស្ពានឆ្លងកាត់ទន្លេបាសាក់មួយទៀត នឹងត្រូវសាងសង់ឡើង ដោយវានឹងជាស្ពានមានទំហំធំជាងគេជាលើកដំបូងនៅកម្ពុជា។

ទេសរដ្ឋមន្ត្រី រដ្ឋមន្ត្រីក្រសួងសាធារណៈការនិងដឹកជញ្ជូន លោកស៊ុន ចាន់ថុលបានមានប្រសាសន៍ឲ្យដឹង ក្នុងពិធីបើកសម្ភោធការដ្ឋានសាងសង់ផ្លូវក្រវ៉ាត់ក្រុងទី៣កាលពីថ្ងៃទី១៤ មករាកន្លងមកថា គំរោងផ្លូវក្រវ៉ាត់ក្រុងទី៣ដែលមានប្រវែងសរុបជាង៥០គីឡូម៉ែត្រនេះមានស្ពានអាកាសចំនួន៥ គឺស្ពានអាកាសឆ្លងកាត់ផ្លូវជាតិលេខ៤ លេខ៣ ផ្លូវជាតិលេខ២ និងផ្លូវជាតិលេខ២១ ដែលមានប្រវែងសរុប១០០០ម៉ែត្រ និងស្ពានឆ្លងកាត់កោះអន្លង់ចិនពីរកន្លែង ដែលមានប្រវែងសរុប៩៩៦ម៉ែត្រ និងជាស្ពានមានទំហំធំជាងគេដោយមានទំហំទទឹងរហូតដល់២៥ម៉ែត្រ ក្នុងនោះស្ពានបាសាក់ខាងកើតមានប្រវែង៦៣០ម៉ែត្រ និងស្ពានបាសាក់ខាងលិចមានប្រវែង៣៦៦ម៉ែត្រ។

លោកបន្តថា “គំរោងផ្លូវក្រវ៉ាត់ក្រុងទី៣នេះចំណាយថវិកា២៧៣លានដុល្លារអាមេរិក ដែលជាថវិកាហិរញ្ញប្បទានសម្បទានពីរដ្ឋាភិបាលចិន និងថវិកាបដិភាគពីរដ្ឋាភិបាលមួយចំនួនទៀត។ ផ្លូវក្រវ៉ាត់ក្រុងទី៣នេះបានចាប់ផ្តើមពីខែធ្នូ ឆ្នាំ២០១៨ និងគ្រោងបញ្ចប់នៅខែធ្នូឆ្នាំ២០២១។

គំរោងផ្លូវក្រវ៉ាត់ក្រុងទី៣នេះ ជាផ្លូវបែបហាយវេមួយ ដែលមានសួនច្បារចំកណ្តាល មានផ្លូវសំរាប់ទោចក្រយានយន្ត ផ្លូវថ្មើជើង មានសួនច្បារចំកណ្តាល និងរថយន្តអាចបើកបរបានពីរគន្លងទៅ ពីរគន្លងមក។

សម្តេចតេជោហ៊ុន សែននាយករដ្ឋមន្ត្រីកម្ពុជា បានថ្លែងក្នុងពិធីបើកសម្ភោធផ្លូវដ៏សំខាន់នេះថា ផ្លូវក្រវ៉ាត់ក្រុងទី៣ជាផ្លូវដ៏សំខាន់ សម្រាប់សម្រួលការដឹកជញ្ជូន និងការតភ្ជាប់ដ៏សំខាន់រវាងរាជធានីភ្នំពេញ ទៅកាន់បណ្តាខេត្តនានា ពិសេសវាជាផ្លូវរួមចំណែកក្នុងការអភិវឌ្ឍសេដ្ឋកិច្ចជាតិ៕

រដ្ឋមន្ត្រីក្រសួងទេសចរណ៍អះអាងថាអ្នកវិនិយោគចិនធំៗគ្រោងអភិវឌ្ឍន៍គំរោងធំៗនៅកម្ពុជា

January 15, 2019

0

ដោយ វុត្ថា

ភ្នំពេញ៖ រដ្ឋមន្ត្រីក្រសួងទេសចរណ៍លោកថោង ខុនបានអះអាងថា ក្រុមប្រឹក្សាអភិវឌ្ឍពាណិជ្ជកម្មហុងកុង (Hong Kong Trade Development Council) និងវិនិយោគិនធំៗនៅហុងកុង ផ្តោតការយកចិត្តទុកដាក់ដល់ការវិនិយោគគំរោងទេសចរណ៍ធំៗនៅកម្ពុជា។

ចូលរួមក្នុងវេទិកាហិរញ្ញវត្ថុអាស៊ី (AFF-ASIAN Financial Forum) ដែលរៀបចំឡើងដោយតំបន់រដ្ឋបាលពិសេសហុងកុង (Hong Kong SAR of the PRC) កាលពីថ្ងៃទី១៤-១៥ ខែមករា ឆ្នាំ២០១៩ ដែលមានអ្នកចូលរួមប្រមាណ៣០០០នាក់ មកពីជាង៤០ប្រទេស (HKDTC-Hong Kong Trade Development Council) លោកថោង ខុន បានចូលរួមពិភាក្សាគ្នាក្រោមធានបទ ”បង្កើតអនាគតប្រកបដោយនិរន្តរភាព និងប្រកបដោយបរិយាប័ន្ន (Creating sustainable and inclusive future)” ដែលបានផ្តោតសំខាន់លើការរក្សាតុល្យភាពសេដ្ឋកិច្ចសកលលោក ក្នុងកាលៈទេសៈដែលមានភាពតានតឹងនៃសង្គ្រាមពាណិជ្ជកម្មរវាងចិន អាមេរិក បញ្ហាការចាកចេញពីសហគមន៍អឺរ៉ុបរបស់ចក្រភពអង់គ្លេស (Brexit) និងស្ថានភាពសេដ្ឋកិច្ចនៅអីរ៉ុប។ល។

ក្នុងដំណើរទស្សនកិច្ចនិងចូលរួមក្នុងកិច្ចប្រជុំនេះ រដ្ឋមន្ត្រីក្រសួងទេសចរណ៍ក៏បានចូលរួមជាអធិបតីជាមួយលោក Raymond YIP អនុប្រធានប្រត្តិបត្តិ HKTDC និងលោក ឧកញ៉ា Yum Sui Sang ប្រធានសមាគមធុរកិច្ចហុងកុងនៃកម្ពុជា (HK BAC – Hong Kong Business Association of Cambodia) ក្នុងវេទិកាស្តីពីឱកាសវិនិយោគទេសចរណ៍នៅកម្ពុជា ដែលរៀបចំឡើងដោយក្រសួងទេសចរណ៍ សហការយ៉ាងជិតស្និទ្ធិជាមួយក្រុមប្រឹក្សាអភិវឌ្ឍពាណិជ្ជកម្មហុងកុង (Hong Kong Trade Development Council) និងសមាគមធុរកិច្ចហុងកុងសម្រាប់កម្ពុជា (Hong Kong Business Association of Cambodia)ផងដែរ។

ក្នុងវេទិកានេះ លោកថោង ខុនបានថ្លែងថា កម្ពុជាមានគោលដៅទាក់ទាញភ្ញៀវទេសចរអន្តរជាតិឲ្យបាន៧លាននាក់ នៅឆ្នាំ២០២០ ក្នុងនោះភ្ញៀវទេសចរចិនមកកម្ពុជានឹងកើនឡើងដល់ប្រមាណ៣លាននាក់។ នាឱកាសនោះ លោករដ្ឋមន្ត្រីបានអំពាវនាវដល់វិនិយោគិន និងប្រតិបត្តិករទេសចរណ៍បរទេសទាំងអស់ ក៏ដូចជាវិនិយោគិនចិន និងហុងកុង ឲ្យមកបណ្តាក់ទុនវិនិយោគលើវិស័យទេសចរណ៍នៅកម្ពុជា ឲ្យកាន់តែច្រើនថែមទៀត ពិសេសលើការបង្កើតផលិតផលទេសចរណ៍ថ្មីៗ ដោយឈរលើគោលការណ៍ស្អាត បៃតង ការច្នៃប្រឌិត និងនិវានុវត្តន៍ក្នុងយុគ្គសម័យឌីជីថលណូបនីយកម្ម។

តាមរយៈការរៀបចំព្រឹត្តិការណ៍នេះ ដៃគូវិនិយោគក្នុងក្រុងហុងកុង បានបង្ហាញនូវការគាំទ្រ និងជឿជាក់លើការវិនិយោគលើគ្រប់វិស័យនៅកម្ពុជា ជាពិសេសវិស័យទេសចរណ៍ ដោយពួកគាត់បានសំដែងនូវឆន្ទៈពិតចេញពីបេះដូង លើស្ថានភាពរីកចំរើនរបស់កម្ពុជា សុខសន្តិភាព ស្ថិរភាពនយោបាយនៅកម្ពុជា ក្រោមការដឹកនាំរបស់សម្តេចតេជោនាយករដ្ឋមន្ត្រី និងបានសន្យាជួយសិក្សាលទ្ធភាព រៀបចំគម្រោងវិនិយោគពាក់ព័ន្ធ ពិសេសលើគំរោងអភិវឌ្ឍន៏តំបន់ទេសចរណ៍ថ្មីៗ ការអភិវឌ្ឍហេដ្ឋារចនាសម្ព័ន្ធទីក្រុងទេសចរណ៍ឆ្លាតវៃ (Smart City, Smart Tourism)។

កាលពីឆ្នាំ២០១៨កន្លងទៅនេះ កម្ពុជាទទួលបានភ្ញៀវទេសចរចិនប្រមាណ១,៦ លាននាក់ ក្នុងកំណើនប្រមាណ៧០% ក្នុងចំណោមទេសចរអន្តរជាតិសរុបប្រមាណ៦,២ លាននាក់ ដែលបានមកទស្សនាកម្ពុជា។ តាមការព្យាករណ៍ កម្ពុជាអាចនឹងទទួលបានភ្ញៀវទេសចរចិនប្រមាណ៣លាននាក់ នៅឆ្នាំ២០២០ ក្នុងចំណោមភ្ញៀវទេសចរអន្តរជាតិសរុបជាង៧លាននាក់៕

រដ្ឋាភិបាលដាក់ចេញនូវអនុសាសន៍ ៦ចំណុចមុនបើកការដ្ឋានសាងសង់ផ្លូវល្បឿនលឿនភ្នំពេញ ក្រុងព្រះសីហនុ

January 15, 2019

0

ដោយ វុត្ថា

ភ្នំពេញ៖ រដ្ឋាភិបាលបានដាក់ចេញអនុសាសន៍ និងតម្រូវឲ្យក្រុមហ៊ុនសាងសង់ផ្លូវល្បឿនលឿន អនុវត្តន៍តាមយន្តការការងារចំនួន៦ចំណុច ដើម្បីធ្វើឲ្យផ្លូវនេះជាផ្លូវដ៏ល្អ និងមានគុណភាព សុវត្ថិភាពខ្ពស់។

ផ្លូវល្បឿនលឿននេះ នឹងចាប់ផ្តើមពីភូមិសំរោង សង្កាត់សំរោងក្រោម ខណ្ឌពោធិសែនជ័យ រាជធានីភ្នំពេញ និងបញ្ចប់នៅភូមិ១ សង្កាត់៣ ក្រុងព្រះសីហនុ ខេត្តព្រះសីហនុ របស់ក្រុមហ៊ុន China Road and Bridge Corporation (Cambodia) ដែលសិក្សានិងរៀបចំរបាយការណ៍ដោយក្រុមហ៊ុនទីប្រឹក្សា SAWAC Consultant (Cambodia) Co., Ltd.។

កិច្ចប្រជុំអន្តរក្រសួងដែលដឹកនាំដោយលោកផៃ ប៊ុនឈឿន រដ្ឋលេខាធិការក្រសួងបរិស្ថាន ដែលផ្តោតលើការពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមពេញលេញ(ESIA) សម្រាប់គម្រោងសាងសង់ផ្លូវល្បឿនលឿនពីរាជធានីភ្នំពេញទៅខេត្តព្រះសីហនុ ដែលមានប្រវែង១៩០,០១៦គីឡូម៉ែត្រ។

ជាលទ្ធផលនៃកិច្ចប្រជុំនេះ បានផ្តល់អនុសាសន៍ចំនួន៦ចំណុចឲ្យក្រុមហ៊ុនសាងសង់គោរពតាមរួមមាន ទី១ គាំទ្រលើគម្រោងវិនិយោគនេះ ពីព្រោះគម្រោងនេះចូលរួមចំណែកអភិវឌ្ឍន៍សេដ្ឋកិច្ចប្រទេសជាតិ។ ទី២ ស្នើក្រុមការងារនាយកដ្ឋានវាយតម្លៃហេតុប៉ះពាល់បរិស្ថាន និងក្រុមហ៊ុនម្ចាស់គម្រោងធ្វើការជាមួយ អគ្គនាយកដ្ឋានរដ្ឋបាលការពារ និងអភិរក្សធម្មជាតិពាក់ព័ន្ធនឹងការប៉ះពាល់តំបន់ការពារដោយ គម្រោងនេះ ទី៣ ក្រុមហ៊ុនម្ចាស់គម្រោងត្រូវគ្រប់គ្រងសំណល់រឹង-រាវឱ្យបានត្រឹមត្រូវតាមលក្ខណៈបច្ចេកទេសនៅ តាមចំណតទាំង៤ នៃផ្លូវល្បឿនលឿន។

ទី៤. ស្នើក្រុមហ៊ុនម្ចាស់គម្រោងដាំដើមឈើអមសងខាងផ្លូវល្បឿនលឿន ទី៥. ស្នើក្រុមហ៊ុនម្ចាស់គម្រោងសិក្សាឡើងវិញអំពីការបង្កើនចំនួនស្ពានប្រអប់ ស្ពានអាកាស និងផ្លូវ ក្រោមដី សម្រាប់ប្រជាពលរដ្ឋប្រើប្រាស់ឆ្លងកាត់ និងទី៦. ក្រុមហ៊ុនម្ចាស់គម្រោងត្រូវធ្វើការកែសម្រួលរបាយការណ៍នេះ តាមរាល់មតិយោបល់ទាំងអស់របស់ ក្រុមការងារនាយកដ្ឋានជំនាញ តំណាងអគ្គនាយដ្ឋាននៃក្រសួងបរិស្ថាន និងតំណាងក្រសួង-ស្ថាប័ន ជំនាញពាក់ព័ន្ធ ដែលផ្តល់យោបល់ក្នុងអង្គប្រជុំ រួមទាំងបញ្ចូលទាំងមតិបូកសរុបរបស់ប្រធានអង្គប្រជុំ។

កិច្ចប្រជុំនេះមានការចូលរួមពីតំណាងអគ្គនាយកដ្ឋាន អគ្គលេខាធិការដ្ឋាន អគ្គាធិការដ្ឋាន ជំនួយការអមក្រសួង និងនាយកដ្ឋានពាក់ព័ន្ធនៃក្រសួងបរិស្ថាន តំណាងក្រសួងពាក់ព័ន្ធដូចជា ក្រសួង សាធារណការ និងដឹកជញ្ជូន ក្រសួងរៀបចំដែនដី នគរូបនីយកម្ម និងសំណង់ ក្រសួងធនធានទឹក និងឧតុនិយម ក្រសួងសេដ្ឋកិច្ច និងហិរញ្ញវត្ថុ ក្រសួងកសិកម្ម រុក្ខាប្រមាញ់ និងនេសាទ(រដ្ឋបាលព្រៃឈើ និងជលផល) ក្រសួងវប្បធម៌ និងវិចិត្រសិល្បៈ ក្រសួងការងារ និងបណ្តុះបណ្តាលវិជ្ជាជីវៈ ក្រុមប្រឹក្សាអភិវឌ្ឍន៍កម្ពុជា រដ្ឋបាលខេត្តព្រះសីហនុ រដ្ឋបាលខេត្តកំពង់ស្ពឺ រដ្ឋបាលខេត្តកណ្តាល រដ្ឋបាលរាជធានីភ្នំពេញ មន្ទីរបរិស្ថានខេត្តព្រះសីហនុ មន្ទីរបរិស្ថានខេត្តកំពង់ស្ពឺ មន្ទីរបរិស្ថានខេត្តកណ្តាល និងមន្ទីរបរិស្ថានរាជធានីភ្នំពេញ៕