​ដោយស៊ីវ ម៉េង
ភ្នំពេញ: រដ្ឋាភិបាលបាននិងកំពុងសកម្មជាងមុន ក្នុងការកសាងហេដ្ឋារចនាសម្ព័ន្ឋ​នានា ដើម្បីជំរុញនិងពន្លឿនកំណើនសេដ្ឋកិច្ចបន្ថែមទៀត ខណៈហេដ្ឋារចនាសម្ព័ន្ឋជាបញ្ហាប្រឈមមួយក្នុងការអភិវឌ្ឍន៍សេដ្ឋកិច្ចជាតិ។

សម្តេចតេជោហ៊ុន សែននាយករដ្ឋមន្រ្តីកម្ពុជា បានប្រកាសបង្ហើបពីគំរោងសាងសង់ហេដ្ឋារចនាសម្ព័នធំៗចំនួន៣ទៀតនាពេលឆាប់ៗនេះ ក្នុងពិធីសម្ភោធបើកការដ្ឋាន​សាងសង់ផ្លូវក្រវ៉ាត់ក្រុងទី៣នាព្រឹកថ្ងៃទី១៤ មករាកន្លងមកនេះ។

សម្តេចតេជោហ៊ុន សែនបានថ្លែងថា បច្ចុ​ប្បន្នរដ្ឋាភិបាលបាន និងកំពុងសាងសង់ស្ពានភ្ជាប់រវាងស្រុកស្ទឹងត្រង់ ក្នុងខេត្តកំពង់ចាម តភ្ជាប់ទៅកាន់ស្រុកក្រូចឆ្មារនៃខេត្តត្បូងឃ្មុំ ដែលបាននិងកំពុងសាងសង់ ហើយជា​មួយនេះ យើងកំពុងសិក្សានិងគ្រោងសាងសង់ស្ពាននៅទីរួមខេត្តក្រចេះ ដើម្បីតភ្ជាប់រវាងខេត្តក្រចេះទៅកាន់ខេត្តកំពង់ធំ តាមរយៈការតភ្ជាប់រវាងផ្លូវជាតិលេខ៧និងផ្លូវជាតិលេខ៦។

សម្តេចបន្តថា ជាមួយគ្នានេះរដ្ឋាភិបាលកំពុងស្វែងរកថវិកា​ ដើម្បីសាងសង់ស្ពានភ្ជាប់រវាងខេត្តកោះកុង និងខេត្តពោធិសាត់ផងដែរ តាមរយៈការសាងសង់ផ្លូវភ្ជាប់ពីខេត្តកោះកុង ឆ្លងកាត់ខេត្តពោធិសាត់ មកកាន់ស្រុកសំឡូត ក្នុងខេត្តបាត់ដំបងនាពេលខាងមុខផងដែរ ដើម្បីសម្រួលការដឹកជញ្ជូន និងពាណិជ្ជកម្ម ព្រោះប្រជាជននាភូ​មិភាគពាយ័ព្យនាពេលបច្ចុប្បន្ននេះ ចង់ទៅកាន់ខេត្តកោះកុង ត្រូវមកកាន់រាជធានីភ្នំពេញ ហើយទើបចេញពីរាជធានីភ្នំពេញ ទៅខេត្តកោះកុង ហេតុនេះនៅពេល​មានផ្លូវនេះ ប្រជាជនមិនចាំបាច់ចំណាយពេលវេលាធ្វើដំណើរវាងឆ្ងាយទៀតនោះទេ។

ជាមួយគ្នានេះកាលពីសប្តាហ៍មុន លោកទេសរដ្ឋមន្រ្តីស៊ុន ចាន់ថុលរដ្ឋមន្រ្តីក្រសួង​សាធារណៈការនិងដឹកជញ្ជូនបានឲ្យដឹងថា ការសាងសង់ផ្លូវល្បឿនលឿនភ្នំពេញ ព្រះសី​ហនុនឹងចាប់ផ្តើមនៅត្រីមាសទី១ឆ្នាំនេះ ខណៈក្រុមហ៊ុនចិននឹងដឹកជញ្ជូនគ្រឿងចក្រមក​ដល់កម្ពុជានៅចុងខែមករានេះ ហើយអ្នកជំនាញចិនប្រមាណ២០០នាក់ បានមកដល់កម្ពុជារួចហើយ។
ផ្លូវល្បឿនលឿនភ្នំពេញ ក្រុងព្រះសីហនុ ដែលបាននិងកំពុងត្រៀមសាងសង់នាពេលឆាប់ៗខាងមុខនេះ នឹងសាងសង់ដោយក្រុមហ៊ុនChina Road and Bridge Corporation ដែល​ចំណាយ​ថវិកា​ប្រមាណ១៩០០​លាន​ដុល្លារអាមេរិក។

ជាមួយគ្នានេះក្រុមហ៊ុន Yunnan Investment Holdings Ltdរបស់ប្រទេចិនក៏បានទទួលសម្បទានពីរដ្ឋាភិបាល ដើម្បីសាងសង់ព្រលានយន្តហោះអន្តរជាតថ្មី ក្នុងខេត្តសៀមរាប ដែលគ្រោងវិនិយោគទឹកប្រាក់៩០០លានដុល្លារអាមេរិក។

អ្នកនាំពាក្យក្រសួងក្រសួងសាធារណៈការនិងដឹកជញ្ជូនលោកវ៉ា ស៊ីមសូរិយាបាន​ថ្លែងថា កម្ពុជាដល់ពេលត្រួវវិនិយោគទឹកប្រាក់កាន់តែច្រើន និងមានទំហំធំៗ ដើម្បីកសា​ងហេដ្ឋារចនាសម្ពន្ឋ សំដៅជំរុញកំនើនសេដ្ឋកិច្ចជាតិ ព្រោះដើម្បីអភិវឌ្ឍន៍សេដ្ឋកិច្ច រដ្ឋាភិ​បាលត្រូវបង្កើនការវិនិយោគលើហេដ្ឋារចនាសម្ព័ន្ឋ។

សេដ្ឋវិទូម៉ី កល្យាណទីប្រឹក្សាជាន់ខ្ពស់ នៃឧត្តមក្រុមប្រឹក្សាសេដ្ឋកិច្ចជាតិបានថ្លែងថា ការវិនិយោគលើហេដ្ឋារចនាសម្ព័ន្ឋរបស់រដ្ឋាភិបាលជារឿងត្រឹមត្រូវ និងចាំបាច់មួយ ដើម្បីជំរុញការអភិវឌ្ឍសេដ្ឋកិច្ចជាតិ ព្រោះហេដ្ឋារចនាសម្ព័ន្ឋជាបញ្ហាប្រឈមមួយក្នុងចំ ណោមបញ្ហាប្រឈមជាច្រើនក្នុងការអភិវឌ្ឍជាតិ ប៉ុន្តែរដ្ឋាភិបាលបាននិងកំពុងយកចិត្តទុកដាក់លើបញ្ហានេះហើយ តែយ៉ាងណាក៏ដោយវាត្រូវការពេលវេលា ព្រោះផ្លូវឬស្ពាន​មិនអាចសាងសង់បញ្ចប់រយៈពេលខ្លីទេ។

លោកបន្តថា “ដើម្បីអភិវឌ្ឍន៍សេដ្ឋកិច្ច កម្ពុជាត្រូវការសាងសង់ហេដ្ឋារចនាសម្ព័ន្ឋថ្មី កសាងកាន់តែច្រើន កាន់តែប្រសើរដើម្បីជំរុញល្បឿនកំនើនសេដ្ឋកិច្ចរបស់យើង”៕

ដោយវុត្ថា
ខេត្តព្រះសីហនុ: ក្រុមហ៊ុនចិនធំៗចំនួន៨ទៀត បានកំពុងសិក្សានិងបង្ហាញបំណងវិនិយោគនៅខេត្តព្រះសីហនុ ដែលជាខេត្តមានការរីកចម្រើន និងមានសក្តានុពលសេដ្ឋកិច្ចមួយនេះ។

ក្នុងជំនួបពិភាក្សាការងារជាមួយលោក យន្ត មីន អភិបាលខេត្តព្រះសីហនុកាលពីចុងសប្តាហ៍មុន លោក LUO ZHUOWEI នាយករងមជ្ឈមណ្ឌលជំរុញការវិនិយោគ នៃសាធារណរដ្ឋប្រជាមានិតចិនឲ្យដឹងថា ក្រុមហ៊ុនមានបទពិសោធន៍ជាច្រើនឆ្នាំ ក្នុងការ គ្រប់​គ្រង ទឹកស្អាត កាកសំណល់ សំរាម ទឹកកខ្វក់ និងសន្តិសុខ។ ហើយក្រុមហ៊ុនចង់មកធ្វើការវិនិយោគក្នុងខេត្តព្រះសីហនុ ដែលជាខេត្តមួយស្ថិតក្នុងចំណោមតំបន់ នៃគោលនយោបាយផ្លូវមួយ ខ្សែក្រវាត់មួយរបស់ប្រធានាធិបតីចិន។

លោក យន្ត មីន អភិបាលខេត្តព្រះសីហនុ បានស្វាគមន៍ក្រុមហ៊ុនទាំង៨នេះ ដែលមានគោលបំណងចង់ មកវិនិយោគនៅខេត្តព្រះសីហនុ ស្របពេលដែលខេត្តព្រះសីហនុ កំពុងត្រូវបានអភិវឌ្ឍន៍យ៉ាងគំហុក។ ម្យ៉ាងទៀតការអភិវឌ្ឍរមែងមានផលប៉ះពាល់ផ្នែកបរិស្ថាន អនាម័យមួយចំនួនផងដែរ ហេតុនេះក្រុមហ៊ុនត្រូវគោរពតាមគោលការណ៍ច្បាប់ នៃព្រះរាជាណាចក្រកម្ពុជា។

លោកបន្តថា ក្នុងរយៈពេល២ឆ្នាំនេះ មានក្រុមហ៊ុនបរទេសជាច្រើនបានមកធ្វើវិនិយោគនៅខេត្តព្រះសីហនុ ទន្ទឹមនោះក៏មានក្រុមហ៊ុនមួយចំនួនបាននឹងកំពុងសិក្សាស្វែងយល់លើគម្រោងហេដ្ឋារចនាសម្ព័ន្ធ ផ្លូវថ្នល់ លូ បរិស្ថានជាដើម ក្នុងចំណោមក្រុមហ៊ុនទាំងនោះភាគច្រើន គឺមកពីប្រទេសចិន”។

លោកយន្ត មីនបានបន្តថា រដ្ឋបាលខេត្តនឹងស្វាគមន៍គ្រប់ក្រុមហ៊ុនទាំងអស់ ដែលមានគោលបំណងមកវិនិយោគនៅក្នុងខេត្តព្រះសីហនុ មិនថាការវិនិយោគ លើអគារពា​ណិជ្ជកម្ម សណ្ឋាគារ ខុនដូ រោងចក្រ សហគ្រាស ឬហេដ្ឋារចនាសម្ព័ន្ធ នានាក្នុងខេត្ត រដ្ឋបាលខេត្តនឹងទទួលស្វាគមន៍ និងជួយសម្របសម្រួល ដើម្បីឱ្យដំណើរការវិនិយោគនៅខេត្តនេះប្រព្រឹត្តទៅដោយរលូន និងមានសន្ទុះកើនឡើង ចូលរួមចំណែកកាត់បន្ថយភាពក្រីក្ររបស់ប្រជាពលរដ្ឋកម្ពុជា។ តាមរយៈការវិនិយោគ ទាំងនេះ ធ្វើឱ្យខេត្តព្រះសីហនុ មានការរីកចម្រើនយ៉ាងលឿនស្ទើរមិននឹកស្មានដល់ ធ្វើឱ្យអ្វីៗមានការប្រែប្រួលនាពេលបច្ចុប្បន្ន និងទៅអនាគត៕

ដោយ វុត្ថា

ភ្នំពេញ៖ សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា បាន​មានប្រសាសន៍ថា កម្ពុជា​ធ្វើ​សេដ្ឋកិច្ច មិន​ពឹងផ្អែក​តែ​លើ​វិស័យ​តែមួយ​មុខ​នោះទេ គឺ​កម្ពុជា​ធ្វើ​សេដ្ឋកិច្ច​ពឹង ផ្អែកលើ​វិស័យ​ជាច្រើន ដូច្នេះ​កម្ពុជា​មិនអាច​ស្លាប់​នោះទេ ប្រសិនបើ​បរទេស​ណា​បិទ​វិស័យ​ណាមួយ​នោះ ព្រោះ​កម្ពុជា​នៅតែមាន​វិស័យផ្សេងៗទៀត​ដើម្បី​ទ្រទ្រង់​សេដ្ឋកិច្ចជាតិ។

សម្តេច​តេ​ជោ​បាន​ថ្លែង​ក្នុង​ពិធី​ចូលរួម បើក​ការដ្ឋាន​សាងសង់​ផ្លូវ​ក្រវ៉ាត់​ក្រុង​ទី៣ នា​ព្រឹក​ថ្ងៃទី១៤ មករា​នេះ​បន្តថា “សម្តេច​បាន​ដឹកនាំ​សេដ្ឋកិច្ច​នេះ លំបាកលំបិន​ខ្លាំងណាស់ មិនបាច់​នរណា​មក​បង្រៀន​សម្តេច​នោះដែរ បើ​សេដ្ឋកិច្ចកម្ពុជា​ដឹកនាំ​តាមរបៀប​ខ្ជិលច្រអូស​រាជរដ្ឋាភិបាល មិន​សល់​ថវិកា​សម្រាប់​បើកប្រាក់​ខែ​ជូន​មន្ត្រី​នោះឡើយ។

ជាមួយគ្នា​នោះ សម្តេច​តេ​ជោ​ក៏បាន​អំពាវនាវ​ឱ្យ​បញ្ឈប់​នូវ​កា​រលង​ល្បែង ដក​ការអនុគ្រោះ​ពន្ធ​ពី​កម្ពុជា​ល្មម​នឹង​បញ្ឈប់​ផងដែរ ហើយ​នៅលើ​ពិភពលោក​នេះ​គឺ​គេ​ធុញទ្រាន់​ខ្លាំងណាស់​ទៅហើយ សម្រាប់​សម្តេច​គឺជា​មេដឹកនាំ​មួយរូប​ដែល​បាន​ឆ្លងកាត់​ការ ដឹកនាំ​ប្រទេស​កម្ពុជា ស្រប​ពេលដែល​បរទេស​ហ៊ុំព័ទ្ធ ទាំង​នយោបាយ ហ៊ុំព័ទ្ធ​ទាំង​សេដ្ឋកិច្ច រហូត​ចម្លង​ប្រជាជន​កម្ពុជា ដែលមាន​ចំនួន​ជាង៥លាន​នាក់ ឡើង​រហូតមកដល់១៦លាន​នាក់​ក្នុងពេល​បច្ចុប្បន្ននេះ។

សម្តេច​ថា  “ពិត​ហើយ​យើង​មិន​ចង់​ធ្វើ​សត្រូវ​ជាមួយ​អ្នកណា​ទាំងអស់ យើង​ចង់​ពង្រីក​មិត្ត​ភ​ក្ភិ​នៅលើ​ពិភពលោក ក៏ប៉ុន្តែ​សូម​មិត្ត​ភ​ក្ភិ​ស្គាល់គ្នា​ឱ្យ​ច្បាស់ កុំឱ្យ​លុះ​ទៅដោយ​ការប្រព្រឹត្ត​នូវ​កំហុស​ដែល​យក​ប្រជាជន១៦លាន​នាក់ ទៅ​បម្រើឱ្យ​គោលដៅ​នយោបាយ​របស់ខ្លួន ក្នុងការ​បំផ្លិចបំផ្លាញ​កម្ពុជា​នោះ។

សម្តេច​បន្តថា​ថា “មិនអាច​យក​អធិបតេយ្យភាព ឯករាជ្យភាព​របស់​ក​ម្ពុ​ជា ទៅ​ដោះដូរ​ជាមួយ​ជំនួយ​របស់​បរទេស​ណា​មួយ​នោះទេ។ បើ​កម្ពុជា មិនអាច​អនុវត្តន៍​ច្បាប់​ខ្លួនឯងបាន ក៏​មិនចាំបាច់​ថា​មានឈ្មោះ​ជា​រដ្ឋ អធិបតេយ្យ​នោះទេ ហើយ​មិនចាំបាច់​មានឈ្មោះ​ជា​សមាជិក​អង្គការសហប្រជាជាតិ​នោះដែរ។

លើសពីនេះ​សម្តេច​តេ​ជោ ហ៊ុនសែន ក៏បាន​ជំរុញឱ្យមាន​ការប្រជុំ​ធ្វើ​កិច្ចការ​កំណែទម្រង់សេដ្ឋកិច្ច​ផ្ទៃក្នុង​ឱ្យ​កាន់តែ​លឿន​ផងដែរ ហើយ​ក្នុងឱកាស​មុន​ក៏បាន​ផ្តាំ​ទៅ​អ្នក​វិនិយោគិន​ទាំងឡាយ និង​អ្នកធ្វើ​ធុរកិច្ច​ទាំងឡាយ​នៅពេល​ខាងមុខ នឹងមាន​ការដាក់ចេញ​វិធានការណ៍ កាត់បន្ថយ​ការចំណាយ​ទាំង​ផ្លូវការ និង​មិន​ផ្លូវការ​របស់​អ្នកវិនិយោគ ដើម្បី​ឲ្យ​អ្នកវិនិយោគ​ទាំងនោះ មានឱកាស​កាន់តែខ្លាំង សម្រាប់​ការប្រកួតប្រជែង ទៅលើ​វិស័យសេដ្ឋកិច្ច បម្រើឱ្យ​ការប្រើប្រាស់​ក្នុងស្រុក​កាត់បន្ថយ​ការនាំ​ចូល និង​ជំរុញ​ការចេញ​ផងដែរ៕

​ដោយគង់ សូរិយា
​ព្រះសីហនុៈ ក្រុមហ៊ុនចិនដ៏ធំមួយឈ្មោះZ Qបានប្រកាសវិនិយោគរមណីយដ្ឋាន និងមជ្ឈ​មណ្ឌលពាណិជ្ជកម្មឆ្នេរមាស ឆ្នេរប្រាក់នៅតំបន់រាម ក្នុងខេត្តព្រះសីហនុ ស្ថិតនៅលើផ្ទៃដីជាង៦២ហិកតា។

លោកបណ្ឌិតទេសរដ្ឋមន្រ្តីញឹម វណ្ណដា អនុប្រធានទី១នៃគណកម្មាធិការជាតិគ្រប់​គ្រងគ្រោះមហន្តរាយបានមានប្រសាសន៍ ក្នុងពិធីបើកការដ្ឋានសាងសង់គំរោងខាងលើកាលពីចុងសប្តាហ៍នេះថា ខេត្តព្រះសីហនុ គឺជាប៉ូលនៃសេដ្ឋកិច្ចដ៏សំខាន់របស់កម្ពុជា ហើយថា ខេត្តជាប់មាត់សមុទ្រមួយនេះបាន និងកំពុងក្លាយជាទីតាំងទេសចរណ៍ដ៏ទាក់ទាញសម្រាប់ភ្ញៀវជាតិ អន្តរជាតិមកកម្សាន្ត ដែលចាំបាច់ត្រូវតែមានការអភិវឌ្ឍនូវរាល់ហេដ្ឋារចនាសម្ព័ន្ធនានា ដើម្បីឆ្លើយតបទៅនឹងនិន្នាការកើនឡើងនៃវិស័យសេដ្ឋកិច្ច និងទេសចរណ៍របស់ប្រទេស ហើយយើងត្រូវសម្រេចឲ្យបានគោលដៅទេសចរណ៍ប្រក​បដោយស្ថេរភាព។

លោកបន្តថា “វិស័យទេសចរណ៍ជាវិស័យអាទិភាព និងជាមាសបៃតង ដោយហេតុថា វិស័យនេះផ្ដល់កាលានុវត្តភាពការងារបន្ថែម និងរួមចំណែកដល់ការលើកកម្ពស់កម្រិតជីវភាពរស់នៅរបស់ប្រជាជន និងកាត់បន្ថយភាពក្រីក្រ តាមរយៈការបង្កើនប្រាក់ចំណូល រួមនិងការទាក់ទាញការវិនិយោគពីបរទេស”។

រាជរដ្ឋាភិបាលកម្ពុជាបានផ្ដល់សិទ្ធិទៅឲ្យក្រុមហ៊ុនZ.Q អន្ដរជាតិ នូវផ្ទៃដីទំហំ ៦២,៨៥ ហិចតា ស្ថិតក្នុងភូមិស្មាច់ដែង ឃុំរាម ខេត្តព្រះសីហនុ ដើម្បីធ្វើការអភិវឌ្ឍន៍ប្រែក្លាយទៅជាទីក្រុងរណបដ៍ស្រស់បំព្រង របស់ខេត្ត ខេត្តព្រះសីហនុជាប់មាត់សមុទ្រមួយនេះនៅថ្ងៃអនាគត ដែលមានឈ្មោះថា តំបន់អភិវឌ្ឍន៍ឆ្នេរមាស ឆ្នេរប្រាក់ ហើយការប្រារព្ធ ពិធីបញ្ចុះបឋមសិលាបើកការដ្ឋានជាផ្លូវការ ដើម្បីដំណើរការសាសង់គម្រោងមួយនេះ បានធ្វើឡើងកាលពីរសៀលថ្ងៃទី១៣ ខែមករា ឆ្នាំ២០១៩កន្លងមកនេះ។

លោកទេសរដ្ឋមន្រ្ដី ញឹម វណ្ណដា បានលើកទឹកចិត្តដល់វិនិយោគិនក្នុង និង ក្រៅប្រទេសឲ្យបណ្តាក់ទុននៅកម្ពុជា ឲ្យកាន់តែច្រើនឡើងថែមទៀត ដើម្បីបានជាការរួមចំណែក ដល់ការអភិវឌ្ឍប្រទេសកម្ពុជា ខណៈដែលកម្ពុជាមានបរិយាកាសនៃការវិនិយោគយ៉ាងល្អប្រសើរ រួមនិងកត្តានៃសន្តិភាព និងសន្តិសុខល្អថែមទៀតនោះវិនិយោគិននឹងអាចរកប្រាក់ចំណេញបានច្រើនពីអាជីវកម្មរបស់ខ្លួន ហើយក៏ជាការរួមចំណែកក្នុងការផ្តល់ការងារជូនពល រដ្ឋខ្មែរធ្វើនៅក្នុងស្រុក ជាជាងការធ្វើចំណាកស្រុកទៅធ្វើការនៅក្រៅប្រទេស៕