ដោយស៊ីវ ម៉េង

ភ្នំពេញ: ស្របពេលធនាគារជាតិនៃកម្ពុជា បានប្រកាសអនុញ្ញាត្តិឲ្យមានការធ្វើចរាចរណ៍ប្រាក់យ័នរបស់ចិន ក្នុងការទូទាត់ពាណិជ្ជកម្មសេដ្ឋវិទូនានា បានសម្តែងការប្រុងប្រយ័ត្នទាក់ទងនឹងបញ្ហានេះ ដោយមានលើកឡើងនូវទស្សនខុសៗគ្នាសម្រាប់ការពិចារណា។

លោកបណ្ឌិតម៉ី កល្យាណទីប្រឹក្សាឧត្តមក្រុមប្រឹក្សាសេដ្ឋកិច្ចជាតិ បានថ្លែងឲ្យដឹងតាមទូរស័ព្ទនាល្ងាចថ្ងៃទី៣០ តុលានេះថា ប្រវត្តិសាស្រ្តខ្មែរក្រោយសង្រ្គាម កម្ពុជាបានចាយរូបិយប័ណ្ណច្រើនដូចជាមាស ប្រាក់ លុយបាត និងក្រោយមកយើងប្រើប្រាស់ប្រាក់ដុល្លារយ៉ាងទូលំទូលាយ ប៉ុន្តែអ្វីដែលលោកយល់គឺថា សម្រាប់រយៈពេលមធ្យម និងរយៈពេលវែង កម្ពុជាគួរប្រើប្រាស់រូបិយប័ណ្ណជាតិ។

លោកបន្តថា “ក្នុងពេលយើងកំពុងជំរុញការប្រើប្រាស់ប្រាក់រៀល ក្នុងសេដ្ឋកិច្ចជាតិ បើយើងប្រើប្រាស់លុយយ័នមួយទៀត វានឹងអាចធ្វើឲ្យមានភាពស្មុគ្រស្មាញទៅវិញ”។លោកបន្តថា “សម្រាប់ការយល់ឃើញរបស់ខ្ញុំ គឺយើងគួរបង្កើនការប្រើប្រាស់រូបិយប័ណ្ណជាតិ”។

លើកឡើងនិងពន្យល់ពីដំណើរការនេះ លោកបណ្ឌិតហុង វណ្ណៈអ្នកស្រាវជ្រាវសេដ្ឋកិច្ចនៃរាជបណ្ឌិតសភាកម្ពុជាបានមានប្រសាសន៍ឲ្យដឹងថា ដោយសារចិនបានបោះទុនវិនិយោគច្រើននៅកម្ពុជា និងចិនតែងមានមហិច្ឆតា ដើម្បីចរាចរលុយរបស់ខ្លួនទៅកាន់តំបន់ និងពិភពលោកឲ្យបានទូលំទូលាយ តែមិនទាន់អាចធ្វើបាននៅឡើយ ទើបចិនអាចយកកម្ពុជាសម្រាប់ការចេញដំណើរមុន នៅក្នុងការចរាចររូបិយប័ណ្ណរបស់ខ្លួន។

លោកបន្តថាប្រសិនជាការចរាចរលុយយ័នសម្រាប់ទំនាក់ទំនងពាណិជ្ជកម្ម នាំចេញនាំចូលរវាងតែកម្ពុជា ចិន អ្វីជាការបារម្ភគឺនៅត្រង់ថា លុយចិនមិនទាន់មានស្ថិរភាពនៅឡើយ ធផបនឹងដុល្លារដែលមានការប្រើប្រាស់នៅជុំវិញពិភពលោក។

លោកបន្តថា “ពីមុនកម្ពុជាប្រឹងទប់ស្កាត់អតិផរណារវាងប្រាក់ដុល្លារ និងប្រាក់រៀល តែបើយើងចាយលុយចិនមួយទៀត យើងត្រូវរកវិធីទប់អតិផរណាជាមួយលុយចិនមួយទៀត”។លោកបន្តថា “ផ្ទុយទៅវិញ បើការចរាចរលុយយ័នរបស់ចិនអនុញ្ញាត្តឲ្យមានចរាចរណ៍ទូលំទូលាយនៅកម្ពុជា ដូចដុល្លារតើវាអាចមានផលប៉ះពាល់សេដ្ឋកិច្ចកម្រិតណា យើងទាមទារឲ្យមានសូចនាករជាច្រើន ដើម្បីវាស់វែង”។

លោកបណ្ឌិតហុង វណ្ណៈបានបន្តថា បើការចរាចរលុយយ័នទូលំទូលាយ ដូចដុល្លារ ហើយបើប្រជាជននឹងប្រើប្រាស់លុយយ័នច្រើន គាត់លែងចង់ចាយលុយរៀលរបស់ជាតិនោះជាបញ្ហាមួយទៀត ដែលអាចបណ្តាលឲ្យមានវិបត្តិលុយរៀល។ហេតុនេះបើយើងគ្រប់គ្រងមិនបាន វាអាចនឹងមានអតិផរណារវាងលុយដុល្លារនិងលុយរៀល និងលុយរៀល និងលុយយ័ន។

លោកបន្តថា “យ៉ាងណាខ្ញុំគិតថាអ្នកជំនាញសេដ្ឋកិច្ចនៃធនាគារជាតិ និងក្រសួងសេដ្ឋកិច្ច និងហិរញ្ញវត្ថុពិតជាបានសិក្សាពីផលប៉ះពាល់ និងផលចំណេញពីការប្រើប្រាស់លុយយ័នហើយ”។

ទេសាភិបាលរងធនាគារជាតិនៃកម្ពុជា លោកស៊ុំ សន្និសីទបានមានប្រសាសន៍ក្នុងវេទិកាមួយទាក់ទង នឹងការប្រើប្រាស់ប្រាក់យ័នកាលពីពេលថ្មីៗនេះថា កន្លងមកធនាគារជាតិនៃកម្ពុជាបានអនុញ្ញាត្តឲ្យធនាគារចំនួន២ ធ្វើជាធនាគារផាត់ទាត់ប្រាក់យ័ន គឺធនាគារBOC និងធនាគារICBC និងធនាគារពាណិជ្ជ១៣ផ្សេងទៀតធ្វើប្រតិបត្តិការប្រាក់យ័ន។

តាមរយៈការដាក់ឲ្យដំណើរការនេះ វិនិយោគិន ពាណិជ្ជករ និងអ្នកទទួលចំណូលជាប្រាក់យ័ន អាចទូទាត់ ខ្ចី និងដាក់ប្រាក់បញ្ញើរជាប្រាក់យ័ន ក្នុងប្រព័ន្ឋធនាគារដែលអនុញ្ញាត្តឲ្យធនាគារជាតិនៃកម្ពុជា អាចគ្រប់គ្រងចរាចរប្រាក់យ័នបានល្អប្រសើរ និងរួមចំណែកជំរុញកំនើនពាណិជ្ជកម្ម ការវិនិយោគ និងទេសចរណ៍មកពីប្រទេសចិនអាចចាយប្រាក់យ័ននៅកម្ពុជាបាន។

លោកស៊ុំ សន្និសីទបានគាំទ្រការប្រើប្រាស់ប្រាក់យ័ននៅកម្ពុជា តាមរយៈប្រព័ន្ឋធនាគារ ដើម្បីសម្រួលពាណិជ្ជកម្មទ្វេរភាគី ការវិនិយោគ និងទេសចរណ៍ជាដើម។

លោកចាន់ សុផលនាយកមជ្ឈមណ្ឌលសិក្សាការអភិវឌ្ឍន៍បានមានប្រសាសន៍ថា លំហូរប្រាក់យ័នមកកម្ពុជា ជាសញ្ញាវិជ្ជមានក្នុងការជំរុញកំនើនសេដ្ឋកិច្ចកម្ពុជា ដោយលោកគិតថាវាផ្តល់ភាពងាយស្រួលដល់ភ្ញៀវទេសចរណ៍ចិន មកទស្សនា និងវិនិយោគនៅកម្ពុជា។

លោកបន្តថា“ការទូទាត់ប្រាក់យ័ន មិនមានបញ្ហាអ្វីឡើយនៅក្នុងសេដ្ឋកិច្ចកម្ពុជា តែមានតែចំណេញដល់សេដ្ឋកិច្ច”។

ប្រធាននាយកប្រតិបត្តិធនាគារអេស៊ីលីដាលោកអ៊ិន ចាន់នីបានគាំទ្រការប្រើប្រាស់ប្រាក់យ័ននៅកម្ពុជាផងដែរ ដោយលោកបានថ្លែងថា កន្លងមកធនាគារជាតិនៃកម្ពុជា មិនដែលបានហាមឃាត់ការចរាចរណ៍ ឬការទូទាត់ប្រាក់យ័ននៅកម្ពុជានោះទេ ហេតុនេះ ការចរាចរប្រាក់យ័ន មិនមែនជារឿងថ្មីនោះឡើយ ផ្ទុយទៅវិញការដាក់ឲ្យចរាចរប្រាក់យ័នកាន់តែទូលំទូលាយវាផ្តល់នូវផលចំណេញ និងជម្រើសកាន់តែសម្បូរបែបក្នុងការទូទាត់ពាណិជ្ជកម្មនានា។

លោកបន្តថា “ពីមុនការធ្វើពាណិជ្ជកម្មកម្ពុជាចិន ប្រើប្រាស់ប្រាក់ដុល្លារ តែពេលនេះអាចប្រើប្រាស់ប្រាក់យ័នបានហើយ”។លោកបន្តថា “ការចាយប្រាក់យ័នដើម្បីទិញទំនិញប្រើប្រាស់ ក៏មិនមានការហាមឃាត់ដែរ មានន័យថាអ្នកកាន់ប្រាក់យ័នអាចទិញកាហ្វេនិងបង់ប្រាក់សណ្ឋាគារជាដើម”៕

ដោយគង់ សូរិយា

ភ្នំពេញ: ជន្ទល់សំខាន់ៗដែលជាកំលាំងជំរុញកំនើនសេដ្ឋកិច្ចកម្ពុជា នៅតែមានកំនើនជាវិជ្ជមានសម្រាប់ឆ្នាំ២០១៩ខាងមុខនេះ។

យោងលើរបាយការណ៍ក្រសួងសេដ្ឋកិច្ច និងហិរញ្ញវត្ថុដែលPropertyarea.asia ទទួលបាននាថ្ងៃទី៣០ តុលានេះបានឲ្យដឹងថា វិស័យឧស្សាហកម្ម នឹងបន្តរក្សាភាពរឹងមាំ ក្នុងអត្រាកំណើនប្រចាំឆ្នាំ១០ភាគរយ នៅឆ្នាំ២០១៩ខាងមុខនេះ ដែលគាំទ្រដោយភាពរឹងមាំ នៃវិស័យសំណង់វិស័យកាត់ដេរ និងវិស័យកម្មាន្តសាលមិនមែនកាត់ដេរ។

បើយោងតាមសេចក្តីព្រាងច្បាប់ ថវិកាឆ្នាំ២០១៩ របស់ក្រសួងសេដ្ឋកិច្ច និងហិរញ្ញវត្ថុ បានបង្ហាញឲ្យដឹងថា នៅក្នុងឆ្នាំ២០១៩ ខាងមុខនេះ តាមការព្យាកណ៍កំណើននៃវិស័យឧស្សាហកម្មនៅបន្តរក្សាភាពរឹងមាំ ក្នុងអត្រាកំណើនប្រចាំឆ្នាំក្នុងរង្វង់១០ភាគរយ ដែលគាំទ្រដោយភាពរឹងមាំនៃវិស័យសំណង់ ការបន្តកំណើននៃវិស័យកាត់ដេរ សន្ទុះកំណើនខ្ពស់នៃវិស័យកម្មាន្តសាលមិនមែនកាត់ដេរ ទាំងសម្រាប់នាំចេញ និងបម្រើទីផ្សារក្នុងស្រុក។

របាយការណ៍ដដែលបានបង្ហាញថា ក្រៅពីវិស័យឧស្សាហកម្ម អនុវិស័យសំណង់គាំទ្រដោយសន្ទុះកំណើននៃសំណង់ថ្លៃមធ្យម និងសមរម្យ តាមការអភិវឌ្ឍន៍លំនៅដ្ឋានតម្លៃសមរម្យ និងភាពជឿជាក់បានចំពោះការវិនិយោគនៅកម្ពុជា ដោយជួយប៉ះប៉ូវការធ្លាក់ចុះនៃសំណង់ថ្លៃខ្ពស់មួយផ្នែក។ ចំណែកវិស័យកាត់ដេរនៅបន្តកំណើនប្រហាក់ប្រហែលឆ្នាំមុន គឺដោយសារភាពល្អប្រសើរ នៃស្ថានភាពសេដ្ឋកិច្ចពិភពលោក ជាពិសេសសេដ្ឋកិច្ចនៃប្រទេសបណ្តាដៃគូពាណិជ្ជកម្មរបស់កម្ពុជា។

ចំណែកអនុវិស័យមិនមែនឧស្សាហកម្មកាត់ដេរវិញ ដូចជា ម្ហូបអាហារ ភេសជ្ជៈ ឧស្សាហកម្មតម្លើងយានយន្ត គ្រឿងបង្គុំ អេឡិចត្រូនិច គ្រឿងបន្លាស់ គ្រឿងសង្ហារឹម កង់ និងស៊ីម៉ង់ត៍ជាដើម ដែលសម្រាប់បម្រើឲ្យទីផ្សារនាំចេញ និងតម្រូវការទីផ្សារក្នុងស្រុក នឹងមានសន្ទុះកំណើនខ្ពស់ ក្នុងការពង្រីកការវិនយោគដែលមានស្រាប់ និងសម្រាប់ការវិនិយោគថ្មីៗផងដែរ។

កាលពីឆ្នាំមុន វិស័យឧស្សាហកម្មបានក្លាយជាវិស័យនាំមុខគេ ដែលផ្តល់ផលចំណូលទុនជាតិសរុប (ផសស) ពោលគឺអនុវិស័យសំណង់ បានបន្តភាពរឹងមាំ ទោះបីមានការថមថយបន្តិចបន្តួច តាមរយៈនៃការសម្លឹងរកទីផ្សារមានតម្លៃបន្ថែមទាប ខណៈដែលអនុវិស័យកាត់ដេរកំពុងថមថយកំណើន ក្នុងនោះកំណើននេះនឹងបន្តធ្លាក់ចុះបន្តិចបន្ទួចទៀត នៅក្នុងប៉ុន្មានឆ្នាំខាងមុខ គឺបានកើតឡើងនៃការបាត់បង់ភាពប្រកួតប្រជែង តែទោះបីយ៉ាងណាអនុវិស័យមិនមែនកាត់ដេរ នឹងបន្តរក្សាកំណើនខ្ពស់ ដែលបម្រើឲ្យការនាំចេញ និងតម្រូវការក្នុងស្រុក៕

ដោយ : ស៊ីវ ម៉េង
ភ្នំពេញ : អភិបាលខេត្ដព្រះសីហនុ លោក យន្ត មីន បានអះអាងថា វិនិយោគ គឺបានផ្តល់ផលប្រយោជន៍ជាច្រើន ដោយបានជួយលើកស្ទួយសេដ្ឋកិច្ចគ្រួសាររបស់ប្រជាពលរដ្ឋ មានការអភិវឌ្ឍហេដ្ឋារចនាសម្ព័ន្ធ និងសេដ្ឋកិច្ចសង្គមជាតិឲ្យមានល្បឿនលូតលា​ស់លឿន។

ខេត្ដព្រះសីហនុរយៈពេលជាងពីរឆ្នាំចុងក្រោយនេះ មានការវិនិយោគជាច្រើនមក លើគម្រោងធំសំខាន់ៗ រួមមាន ទី១ វិនិយោគ និងអភិវឌ្ឍន៍ឧស្សាហកម្មវាយណភ័ណ្ឌ។ ទី២ ការអភិវឌ្ឍលើវិស័យសំណង់ និងអចលនទ្រព្យ។ និងទី៣ វិនិយោគលើគម្រោងសណ្ឋាគារ និងវិស័យទេសចរណ៍។
អភិបាលខេត្តព្រះសីហនុ លោក យន្ត មីន បានថ្លែងថា “ការវិនិយោគរបស់ក្រុមហ៊ុនជាតិ-អន្ដរជាតិ ស្របច្បាប់ទាំងអស់ ដែលមានបំណងមកដាក់ទុនវិនិយោគរកស៊ី នៅខេត្ដជាប់មាត់សមុទ្រមួយនេះ ត្រូវបានស្វាគមន៍”។លោកបញ្ជាក់ថា “រដ្ឋបាលខេត្តស្វាគមន៍ចំពោះអ្នកវិនិយោគ ឬក្រុមហ៊ុនវិនិយោគទាំងអស់ មិនថាមកពីប្រទេស ចិន អឺរ៉ុប អាមេរិក ឬអាហ្វ្រិក ជាដើម។ល។ ឲ្យតែគោរពទៅតាមច្បាប់របស់ព្រះរាជាណាចក្រកម្ពុជា”។
រយៈកាលជាង២ឆ្នាំចុងក្រោយនេះ ខេត្តព្រះសីហនុ បានក្លាយទៅជាគោលដៅយ៉ាងសំខាន់របស់អ្នកវិនិយោគមកពីតំបន់ផ្សេងៗ ពិសេសប្រទេសចិន ហើយសព្វថ្ងៃនេះ បាននិងកំពុងធ្វើឲ្យខេត្តព្រះសីហនុ មានការអភិវឌ្ឍយ៉ាងលឿនទៅមុខ។ ការវិនិយោគ បានផ្តល់ផល ប្រយោជន៍ជាច្រើនសម្រាប់សង្គមជាតិ ដូចជា បង្កើតការងារឲ្យប្រជាពល​រដ្ឋ កាត់បន្ថយចំណាកស្រុកដោយគ្រោះថ្នាក់ ចំណូល ពន្ធរដ្ឋ ធ្វើឲ្យកើនឡើងនូវហេដ្ឋារចនាសម្ព័នផ្សេងៗជាច្រើន។ ជាក់ស្ដែងការវិនិយោគនៅខេត្ដព្រះសីហនុ មានអគារខ្ពស់ៗ ប្រមាណជិត២០០អគារ ដែលកាលពីមុន ខេត្ដនេះមានតែអាគារខ្ពស់តែមួយគត់ គឺសណ្ឋាគារ៧ជាន់ (សណ្ឋាគារឯករាជ្យ)។

ខេត្ដព្រះសីហនុ ត្រូវបានរាជរដ្ឋាភិបាលកម្ពុជា ចាត់ទុកជាប៉ូលសេដ្ឋកិច្ចមួយ ក្នុងចំណោមប៉ូល សេដ្ឋកិច្ចទាំងបី រាជធានីភ្នំពេញ ខេត្ដសៀមរាប និងខេត្ដព្រះសីហនុ ដោយប្រកាសប្រែក្លាយខេត្ដនេះទៅជាតំបន់សេដ្ឋកិច្ច ពិសេសគំរូពហុបំណងតែមួយគត់ ក្នុងប្រទេសកម្ពុជា ដែលសក្ដានុពលសំខាន់ៗ មានលក្ខណៈពិសេសៗដូចជា -ផ្ទៃដីនៅធំ ទូលាយសម្រាប់ការវិនិយោគរោងចក្រសហគ្រាសផ្សេងៗ។ល។
មានប្រព័ន្ធគម​នាគម​ន៍​​សម្បូរបែប សម្រាប់ការធ្វើដំណើរ សេវាកម្មដឹកជញ្ជូនទំនិញ តាមផ្លូវគោក ទឹក (កំពង់ផែសមុទ្រទឹកជ្រៅ) ដែក និងផ្លូវអាកាស។ វិស័យឧស្សាហកម្ម មានតំបន់សេដ្ឋកិច្ចពិសេសចំនួន៤កន្លែង មានរោងចក្រសហគ្រាសប្រមាណជិត៧០០កន្លែង។
វិស័យទេសចរណ៍ មានឆ្នេរសមុទ្រស្អាត ជាងគេលើពិភពលោក ប្រវែងជាង១៧៥គីឡូម៉ែត្រ មានកោះតូចធំចំនួន៣២។ ម្យ៉ាងវិញទៀតអ្វីដែលសំខាន់បំផុតនោះ គឺប្រទេសកម្ពុជាមានសុខសន្ដិភាពពេញលេញ ការអនុវត្ដច្បាប់បានល្អប្រសើរ៕