ដំណឹងរីករាយ! កម្ពុជានឹងមានផ្លូវរថភ្លើងលឿនពីភ្នំពេញទៅសៀមរាប – ប៉ោយប៉ែត និងពីភ្នំពេញទៅបាវិត

October 23, 2018

ដោយ រ៉ាវី

ភ្នំពេញ៖ ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូនលោកស៊ុន ចាន់ថុល បានបង្ហើបឲ្យដឹងថា នាពេលអនាគតកម្ពុជានឹងមានរថភ្លើងល្បឿនលឿនពីរាជធានីភ្នំពេញ ទៅកាន់ខេត្តសៀមរាប ប៉ោយប៉ែត និងពីភ្នំពេញទៅកាន់ក្រុងបាវិត ខេត្តស្វាយរៀង។

លោក ស៊ុន ចាន់ថុល បានបន្តឲ្យដឹងកាលពីពេលថ្មីៗនេះថា នៅពេលបច្ចុប្បន្ននេះមានក្រុមហ៊ុនឯកជន កំពុងតែសិក្សាទៅលើគម្រោវិនិយោគ ផ្លូវរថភ្លើងល្បឿនលឿនកម្រឹតស្តង់ដារអន្តរជាតិចំនួន2ខ្សែ ដោយខ្សែទី1 ចេញពីរាជធានីភ្នំពេញ ឆ្ពោះទៅកាន់ក្រុងសៀមរាប និងបន្តទៅដល់ព្រំដែនកម្ពុជា-ថៃ ដែលស្ថិតនៅក្រុងប៉ោយប៉ែត ខេត្តបន្ទាយមានជ័យ។ មួយខ្សែទៀតចេញពីរាជធានីភ្នំពេញ ឆ្ពោះទៅកាន់ព្រំដែនកម្ពុជា-វៀតណាម ដែលស្ថិតនៅក្រុងបាវិត ខេត្តស្វាយរៀង។

លោកបន្តទៀតថា បច្ចុប្បន្នផ្លូវរថភ្លើងនៅកម្ពុជា មិនអាចរត់ក្នុងល្បឿនលឿននៅឡើយទេ ដោយសារមិនទាន់ស្របតាមស្តង់ដារអន្តរជាតិ ពោលគឺប្រវែងទទឹងផ្លូវមានត្រឹមតែ១ម៉ែត្រ។ ប្រសិនបើចង់រត់ក្នុងល្បឿនលឿនត្រូវពង្រីកឲ្យបាន១.៤៣៥ម៉ែត្រទើបស្របតាមស្តង់ដារអន្តរជាតិ។ ដូច្នេះហើយទើបមានក្រុមហ៊ុនឯកជន ស្នើសុំសិក្សាផ្លូវរថភ្លើងល្បឿនលឿនពីភ្នំពេញទៅសៀមរាប ហើយបន្តទៅក្រុងប៉ោយប៉ែត និងទៅក្រុងបាវិត ដែលមានទទឹងផ្លូវប្រវែង១.៤៣៥ម៉ែត្រ។

ទោះជាយ៉ាងណាក្ដី រដ្ឋាភិបាលនៅមិនទាន់ឯកភាពនៅឡើយ ប៉ុន្តែប្រសិនក្រុមហ៊ុនឯកជនសាងសង់ផ្លូវដែកជាប្រភេទ BOT នោះប្រាកដជាឯកភាពមិនខាន។

រថភ្លើងនៅកម្ពុជានាពេលបច្ចុប្បន្ន មានលទ្ធភាពសាងសង់និងដាក់ឲ្យដំណើរការនូវផ្លូវនិងខ្សែរថភ្លើងត្រឹមល្បឿនមធ្យម ជាក់ស្តែងដូចជា ខ្សែរថភ្លើងពីរាជធានីភ្នំពេញទៅខេត្តព្រះសីហនុ មានល្បឿនត្រឹម60គីឡូម៉ែត្រក្នុងមួយម៉ោង។

ដោយឡែក សម្រាប់ផ្លូវរថភ្លើងល្បឿនលឿនចំនួន2ខ្សែ ពីភ្នំពេញឆ្ពោះទៅក្រុងសៀមរាប-ប៉ោយប៉ែត និងពីភ្នំពេញឆ្ពោះទៅក្រុងបាវិត គឺមានល្បឿន100-200គីឡូម៉ែត្រក្នុងមួយម៉ោង៕

អស្ចារ្យ! មហាយក្សចិនដាក់ប្រើប្រាស់ស្ពានដែលវែងជាងគេនៅលើពិភពលោក

October 23, 2018

0

ដោយ វុត្ថា

ភ្នំពេញ៖ មហាយក្សចិនបានសាងប្រវត្តិសាស្ត្រថ្មីមួយទៀត ដោយបានសម្ពោធដាក់អោយដំណើរជាផ្លូវការ នូវស្ពានឆ្លងកាត់សមុទ្រដែលវែងជាងគេបំផុត នៅលើពិភពលោក កាលពីពេលថ្មីៗនេះ ដោយស្ពាននេះតភ្ជាប់ពីទីក្រុងហុងកុង ម៉ាកាវ និង ចិនដីគោក។

ប្រធានធិបតីចិន លោក Xi Jinping បានប្រកាសដាក់អោយដំណើរការជាផ្លូវការនូវស្ពានដែលវែងជាងគេនេះ ដោយមានការចូលរួមពីមន្ត្រីជាន់ខ្ពស់ពីទីក្រុងហុងកុង និងម៉ាកាវផងដែរ ។

លោក Xi បានប្រកាសថា “ខ្ញុំសូមប្រកាសថា ស្ពានតភ្ជាប់ទីក្រុងហុងកុង ទីក្រុង Zhuhai និងទីក្រុងម៉ាកាវ ដាក់អោយដំណើរចាប់ពីពេលនេះតទៅ។

មន្ត្រីជាន់ខ្ពស់ទីក្រុងហុងកុង លោកស្រី Carrie Lam បានសម្តែងការអរគុណ ដល់ លោក Xi ដែលបានចូលរួមសម្ពោធដាក់អោយដំណើរនូវស្ពាននេះ ហើយបានកោតសរសើរចំពោះស្ពាននេះថាមានសារៈសំខាន់បំផុត។

ស្ពានដែលវែងជាងគេនៅលើពិភពលោកនេះ មានប្រវែង៥៥គីឡូម៉ែត្រ ត្រូវបានសេដ្ឋកិច្ចវិទូបានលើកថា នឹងអាចជួយជម្រុញអោយវិស័យសេដ្ឋកិច្ច កាន់តែរឹងមុំានៅក្នុងតំបន់ភូមិសាស្ត្រ និងនៅក្នុងពិភពលោករវាងទីក្រុងហុង និងចិនដីគោក។

មិនមែនមនុស្សគ្រប់គ្នាសុទ្ឋតែសប្បាយចិត្តនឹងសមិទ្ឋិផលដ៏អស្ចារ្យនេះទេ ដោយក្រុមអ្នករិះគន់បានលើកឡើងថា រដ្ឋាភិបាលចិនរបស់លោក Xi បានចំណាយលុយរាប់ពាន់លានដុល្លារ ក្នុងការសាងសង់ស្ពាននេះ គឺក្នុងគោលបំណងបញ្ចូលទីក្រុងហុងកុងទៅក្នុងរដ្ឋបាលរបស់ចិន ហើយអាចនឹងបាត់បង់នូវភាពឯករាជ្យ និងសេរីភាពរបស់ប្រជាជនដែលរស់នៅក្នុងទីក្រុងហុងកុង។

ស្ពាននេះបានចាប់ផ្តើមសាងសង់នៅក្នុងឆ្នាំ២០០៩ ហើយត្រូវបានពន្យាពេលមួយរយៈដោយសារតែកង្វះខាតថវិកា និងមានការស្លាប់កម្មករមួយចំនួន ខណៈកំពុងសាងសង់។

បើទោះបីមានការរិះគន់យ៉ាងណាក្តី ស្ពាននេះត្រូវបានគេមើលឃើញថានឹងបង្កើនពាណិជ្ឋកម្ម និងការកាត់បន្ថយពេលវេលាក្នុងធ្វើដំណើរឆ្លងកាត់ពីក្រុងហុង កុងមកចិនដីគោក៕

ទឹកប្រាក់ 30លានដុល្លារ ត្រូវបានបញ្ជាទិញក្នុងពិព័រណ៍អចលទ្រព្យកម្ពុជា រយៈពេល 2ថ្ងៃ

October 23, 2018

0

ដោយ ដែន ចែងចាំង

ភ្នំពេញ៖ ទឹកប្រាក់ជាង ៣០លានដុល្លារត្រូវបានចំណាយពីអ្នកវិនិយោគ ទិញគំរោងអចលនទ្រព្យនានា ក្នុងពិព៌ណអចលនទ្រព្យកម្ពុជាលើកទី៣ ដែលបានរៀបចំធ្វើរយៈពេលពីរថ្ងៃនៅសណ្ឋាគារនិងកាស៊ីណូហាហ្កាវើលដ៍។

ពិព័រណ៍អចលនទ្រព្យរបស់ Realestate.com.kh ក្នុងឆ្នាំនេះគឺជាព្រឹត្តិការណ៍ដ៏ធំបំផុតមួយនៅក្នុងប្រវត្តិសាស្ត្រកម្ពុជា។ ការប្រមូលផ្តុំអ្នកជំនាញ អាជីវកម្ម និងអតិថិជនដ៏ច្រើនសម្បើម គឺជាព្រឹត្តិការណ៍កាន់តែធំ និងល្អជាងឆ្នាំមុន ហើយទឹកប្រាក់រាប់លានដុល្លារបានចំណាយ សម្រាប់ ការទិញលក់អចលនទ្រព្យនៅកម្ពុជា។ ធ្វើនៅសណ្ឋាគារណាហ្គាវើលនៅថ្ងៃទី ១៩ និងថ្ងៃទី ២០ ខែតុលាឆ្នាំនេះ ពិព័រណ៍មានអ្នកតំណាងមកពីក្រុមហ៊ុនអភិវឌ្ឍន៍ក្នុងស្រុក និងអន្តរជាតិ ភាគីធនាគារ ក្រុមហ៊ុនសំណង់ ទីប្រឹក្សាច្បាប់ ក្រុមហ៊ុនបច្ចេកវិទ្យា អ្នកសេដ្ឋកិច្ច និងក្រុមហ៊ុនជាច្រើនទៀត។

លោក Tom O’Sullivan នាយកប្រតិបត្តិនៃក្រុមហ៊ុន Realestate.com.kh បាននិយាយថា មនុស្សជាង៤,០០០នាក់បានចុះឈ្មោះ ចូលរួមពិព័រណ៍នៅក្នុងឆ្នាំនេះហើយ យើងរំពឹងថានឹងទាក់ទាញវិនិយោគិន និងអ្នកទិញអចលនទ្រព្យយ៉ាងហោចណាស់ជាង ៥,០០០នាក់។លោកបន្តថា ភាពរីកចម្រើនយ៉ាងឆាប់រហ័ស គឺបានបង្ហាញឱកាសសម្រាប់ទីផ្សារអចលនទ្រព្យនៅកម្ពុជាដែលមិនធ្លាប់មានពីមុនមក។

ការតាំងពិព័រណ៍បានផ្តល់ឱ្យអ្នកចូលរួមនូវឱកាសវិនិយោគថ្មីៗ ជាមួយគម្រោង លំនៅដ្ឋាន បុរី ខុនដូ និងគម្រោងអភិវឌ្ឍន៍ចម្រុះ។ អ្នកទិញ និងវិនិយោគិនមក ពីក្នុងស្រុក និងក្រៅស្រុកបានជួបជុំគ្នា សម្រាប់ឱកាសល្អបំផុតក្នុងការទំនាក់ទំនងជាមួយគ្នា។

លោក Tom O’Sullivan បានមានប្រសាសន៍ថា “ឱកាសនេះបានជួយអ្នកគ្រប់គ្នាក្នុងវិស័យនេះឲ្យបានស្វែងយល់កាន់តែស៊ីជម្រៅពីកម្ពុជា។

នៅពេលអ្នកវិនិយោគបានមកដល់រាជធានីភ្នំពេញ ដើម្បីចូលរួមជាមួយពិព័រណ៍នេះ ពួកគេបានមើលឃើញពីភាពរីកចម្រើននៃហេដ្ឋារចនាសម្ព័ន្ធ ដែលកំពុងប្រែក្លាយកម្ពុជាទៅជា មជ្ឈមណ្ឌលសេដ្ឋកិច្ច។ កត្តានេះ នឹងផ្តល់ទំនុកចិត្តដល់វិនិយោគិន ឲ្យងាកមកវិនិយោគលើវិស័យអចលនទ្រព្យនៅកម្ពុជា។ ជាមួយគ្នានេះផងដែរទឹកប្រាក់សរុបដែលបានលក់នៅក្នុងកម្មវិធីពិព័រណ៍អចលនទ្រព្យ បានកើនឡើង១០លានដុល្លារ ធៀបនឹងឆ្នាំមុន។

កម្មវិធីនេះអាចដំណើរបានដោយមានការឧបត្ថម្ភធំ ដូចជា ក្រុមហ៊ុន Ezecom ដែលជាក្រុមហ៊ុន ផ្តល់សេវាអ៊ិនធើណេតឈានមុខគេនៅកម្ពុជា និងក្រុមហ៊ុន Belt Road Capital Management ជាអ្នកគ្រប់គ្រងលើការវិនិយោគឯកជន នៅក្នុងមហាអនុតំបន់ទន្លេមេគង្គ។

ក្រៅពីវេទិការទិញលក់អចលនទ្រព្យ វគ្គសិក្ខាសាលាអប់រំក៏បានដំណើរការដោយឥតគិតថ្លៃ ក្នុងរយៈពេល២ថ្ងៃកន្លងមកនេះ ដែលមានជាភាសាខ្មែរ អង់គ្លេស និងចិន។ ប្រធានបទសំខាន់ៗជាច្រើនរួមមាន៖ ដំបូន្មានពីការវិនិយោគអចលនទ្រព្យ ច្បាប់នៃកម្មសិទ្ធិ ពន្ធអចលនទ្រព្យ ការអភិវឌ្ឍហេដ្ឋារចនាសម្ព័ន្ធ ការប្រៀបធៀបទីផ្សារ និងទស្សនវិស័យនៃកំណើនសេដ្ឋកិច្ចរបស់កម្ពុជា។

ដៃគូផ្សាយសម្រាប់ការតាំងពិព័រណ៍ដ៏ធំនេះ មានដូចជា៖ គេហទំព័រ Propertyarea.asia គេហទំព័រ Fresh News គេហទំព័រ Eurocham ជាដើម៕

អ្នកវិនិយោគខុនដូអន្តរជាតិ ចូលមកកាន់ទីផ្សារកម្ពុជាកាន់តែច្រើន

October 23, 2018

0

ដោយ គង់ សូរិយា

ភ្នំពេញ៖ ស្របពេលនឹងកត្តាសុខសន្តិភាព កំនើនសេដ្ឋកិច្ចនិងស្ថិរភាពនយោបាយដែលកម្ពុជាសម្រេចបាន អ្នកវិនិយោគលើវិស័យខុនដូអន្តរជាតិ បានចូលមកកាន់ទីផ្សារកម្ពុជាកាន់តែច្រើន ដែលធ្វើឲ្យទីផ្សារនេះកាន់តែមានភាពទាក់ទាញ និងការប្រកួតប្រជែងកើនឡើង។

នាយិកាប្រចាំប្រទេសនៃក្រុមហ៊ុន CBRE Cambodia អ្នកនាង អាន សុធីតា បានមានប្រសាសន៍ឲ្យដឹងកាលពីសប្តាហ៍មុនថា កាលពីឆ្នាំ២០០៨ចំនួនខុនដូនៅកម្ពុជាមានតែ១៧៦យូនីតប៉ុណ្ណោះ ប៉ុន្តែបច្ចុប្បន្ននេះខុនដូចំនួន១២០០០យូនីតបានបញ្ចប់និងដាក់ចូលទីផ្សារ ខណៈគំរោងខុនដូជាច្រើនទៀតកំពុងសាងសង់ និងត្រៀមបញ្ចប់។អ្នកនាងបន្តថា កាលពីឆ្នាំ២០០៨ មានតែអ្នកវិនិយោគកូរ៉េប៉ុណ្ណោះ បានវិនិយោគសាងសង់ខុនដូលក់ តែបច្ចុប្បន្នអ្នកវិនិយោគជាច្រើនបានចូលមក ដូចជា អ្នកវិនិយោគចិន តៃវ៉ាន់ កូរ៉េ ជប៉ុន សឹង្ហុបុរីជាដើម។

អ្នកនាងបន្តថា ក្នុងចំណោមគំរោងវិនិយោគខុនដូនានា មានអ្នកវិនិយោគខ្មែរបានវិនិយោគក្នុងវិស័យនេះចំនួន២៣គំរោង និងអ្នកវិនិយោគអន្តរជាតិជាច្រើនសញ្ជាតិទៀត។

ច្បាប់សហកម្មសិទ្ឋដែលអនុញ្ញាត្តឲ្យជនបរទេស អាចមានសិទ្ឋកាន់កាប់ទិញលំនៅដ្ឋានចាប់ពីជាន់ទី១ឡើងទៅ ដែលបានអនុម័តកាលពីឆ្នាំ២០១០ក៏ជាផ្នែកមួយយ៉ាងសំខាន់ក្នុងការទាក់ទាញអ្នកវិនិយោគអន្តរជាតិ មកកាន់ប្រទេសកម្ពុជា។

យោងតាមការសិក្សារបស់ក្រុមហ៊ុន Vtrust Appraisal កាលពីដំណាច់ឆ្នាំ២០១៧បានរកឃើញថា ចំនួនខុនដូដែលនឹងផ្អត់ផ្គង់ចូលទីផ្សារនៅដំណាច់ឆ្នាំ២០២០ខាងមុខ នឹងកើនឡើងដល់ជាង៦០០០០យូនីត ក្នុងនោះខេត្តព្រះសីហនុមានប្រមាណជាង៥ពាន់យូនីតផងដែរ៕

ក្រុងតាខ្មៅបញ្ចប់ការរៀបចំប្លង់គោល ដើម្បីរៀបចំផែនការអភិវឌ្ឍន៍រួចហើយ

October 23, 2018

0

ដោយ ស៊ីវ ម៉េង

ភ្នំពេញ៖ អាជ្ញាធរខេត្តកណ្តាលបានរៀបចំប្លង់គោល ដើម្បីបើកផ្លូវក្នុងការរៀបចំផែនការអភិវឌ្ឍន៍ទីក្រុង ដែលស្ថិតនៅកៀករាជធានីភ្នំពេញជាងគេនេះរួចហើយ ដែលវាជាផែនទីបង្ហាញពីផែនការអភិវឌ្ឍន៍ច្បាស់លាស់មួយ។

យោងតាមលិខិត ដែលមានការចុះហត្ថលេខារបស់អភិបាលខេត្តកណ្តាលផ្ញើរជូនអភិបាលក្រុងតាខ្មៅ និងមេឃុំ ចៅសង្កាត់នានាក្នុងខេត្តកណ្តាលបានឲ្យដឹងថា សមិទ្ឋិផលជាប្រវត្តិសាស្ត្រ នៃប្លង់គោលប្រើប្រាស់ដីធ្លីក្នុងក្រុងតាខ្មៅ ខេត្តកណ្តាល ត្រូវបានក្រសួងរៀបចំដែនដី នគរូបនីយកម្ម និងសំណង់ ដាក់ឲ្យប្រើប្រាស់ជាផ្លូវការ ដោយសេចក្តីសម្រេចលេខ០២សសរ ចុះថ្ងៃទី៥ កក្កដា ឆ្នាំ២០១៨ ដើម្បីជួយគាំទ្រ និងជំរុញដល់ការ អភិវឌ្ឍសេដ្ឋកិច្ច សង្គម បរិស្ថាន និងកិច្ចធានាធនធានធម្មជាតិប្រកបដោយប្រសិទ្ឋិភាពនិរន្តរភាពសម្រាប់គ្រប់សម័យកាល។

លិខិតដដែលបានជំរុញឲ្យអាជ្ញាធរមូលដ្ឋាន ត្រូវអនុវត្តន៍ដោយសហការជាមួយមន្ទីររៀបចំដែនដី នគរូបនីយកម្ម និងសំណង់ និងអង្គភាពពាក់ព័ន្ឋលើចំណុចសំខាន់ៗរួមមាន ទី១ ធ្វើការផ្សព្វផ្សាយអំពីប្លង់គោលប្រើប្រាស់ដីធ្លី ក្រុងតាខ្មៅ ដល់មហាជន និងអ្នក ពាក់ព័ន្ឋឲ្យបានទូលំទូលាយ ទី២ លើកគំរោងនិងរៀបចំផែនការអភិវឌ្ឍនានាដោយយោងលើប្លង់គោលប្រើប្រាស់ដីធ្លីក្រុងជាគោលគ្រឹះ ។

ទី៣ ទប់ស្កាត់រាល់ការសាងសង់ និងអភិវ ឌ្ឍន៍ដី ដែលមិនគោរពតាមច្បាប់ និងផ្ទុយពីខ្លឹមសារប្លង់គោលប្រើប្រាស់ដីដែលបានកំណត់ ទី៤ បន្តកសាងផែនការប្រើប្រាស់ដីនៅតាមគ្រប់ឃុំ សង្កាត់ និងធ្វើការតាមដាន ត្រួតពិនិត្យ សិក្សា កែសម្រួល និងវាយតម្លៃប្រសិទ្ឋភាពនៃការអនុវត្តប្លង់គោលប្រើប្រាស់ដីក្រុងតាខ្មៅ និងទី៥ ត្រូវធ្វើបច្ចុប្បន្នភាពប្លង់គោលប្រើប្រាស់ដីក្រុងតាខ្មៅ ក្នុងរយៈពេល៥ឆ្នាំម្តង តាមករណីចាំបាច់នៃការអភិវឌ្ឍសេដ្ឋកិច្ច សង្គម។

លោកបណ្ឌិត វ៉ាន់ វ៉ាត អ្នកឯកទេសផ្នែកនគរូបនីយកម្ម និងជាអ្នកដឹកនាំការរៀបចំប្លង់គោលក្រុងតាខ្មៅ និងបណ្តាស្រុកនានាទូទាំងខេត្តកណ្តាលបានមានប្រសាសន៍ថា ប្លង់គោលអភិវឌ្ឍន៍និមួយៗពិតជាមានសារៈសំខាន់ណាស់ ព្រោះប្លង់គោលនិមួយៗបានកំណត់និយាមការណ៍ទំហំផ្លូវ ដើម្បីកំណត់ពីផែនការប្រើប្រាស់ដីធ្លី នៅក្នុងមូលដ្ឋានណាមួយមានភាពសមស្រប និងដើម្បីជំរុញការប្រើប្រាស់ដី និងការអភិវឌ្ឍប្រកបដោយនិរន្តរភាព។លោកបន្តថា ប្លង់គោលបានកំណត់តំបន់អភិវឌ្ឍន៍ផ្សេងៗគ្នា ដូចជា តំបន់សម្រាប់អភិវឌ្ឍន៍វិស័យឧស្សាហកម្ម តំបន់អភិវឌ្ឍន៍មជ្ឈមណ្ឌលពាណិជ្ជកម្ម និងតំបន់ធ្វើកសិកម្មជាដើម។

លោកបន្តថា “ប្លង់គោលអាចអនុវត្តន៍បាន ក៏ទាមទារឲ្យមានការចូលរួមពីប្រជាពលរដ្ឋ និងអាជ្ញាធរមូលដ្ឋាន ដើម្បីធ្វើឲ្យការងារនេះមានប្រសិទ្ឋភាពនិងទទួលបានជោគ ជ័យ”៕

ដំណឹងល្អ៖ រមណីយដ្ឋានភ្នំកំពង់ត្រាច នឹងរៀបចំឡើងវិញដើម្បីទាក់ទាញទេសចរណ៍

October 23, 2018

0

ដោយ គង់ សូរិយា

ភ្នំពេញ៖ រមណីយដ្ឋានភ្នំកំពង់ត្រាច ខេត្តកំពតនឹងត្រូវរៀបចំឡើងវិញ ដើម្បីបង្កើនភាពទាក់ទាញពីសំណាក់ភ្ញៀវទេសចរណ៍ជាតិ និងអន្តរជាតិទៅទស្សនារមណីយដ្ឋាន ស្ថិតក្នុងស្រុកកំពង់ត្រាច ដ៏ទាក់ទាញមួយនេះ។

អភិបាលខេត្តកំពតលោក ជាវ តាយ បានមានប្រសាសន៍ក្នុងកិច្ចប្រជុំជាមួយមន្ត្រីពាក់ព័ន្ឋកាលពីថ្ងៃទី២២ តុលាកន្លងមកថា ការអភិវឌ្ឍលើវិស័យទេសចរណ៍ គឺជាការងារចាំបាច់បំផុតសម្រាប់ប្រទេស ក៏ដូចជាខេត្តកំពត ព្រោះវិស័យនេះបានផលប្រយោជន៍ច្រើនដល់ប្រជាពលរដ្ឋក្នុងមូលដ្ឋាន និងបានឆ្លើងតបទៅនឹងកំណើនសេដ្ឋកិច្ច តាមរយៈការកៀងគរឲ្យមានកំណើនភ្ញៀវទេចរណ៍ មកលេងខេត្តកំពតកាន់ច្រើន កាត់បន្ថយបាននូវភាពក្រីក្រ។

លោកបន្តថា “សម្តេចតេជោបានមានប្រសាសន៍ហើយថា នៅក្នុងអាណត្តិទី៦នេះ គ្រប់ក្រសួង ស្ថាប័ន មន្ទីរ អង្គភាពនានា ត្រូវធ្វើឲ្យច្រើនជាងមុ ឲ្យល្អជាងមុន និងមានប្រសិទ្ធភាពជាងមុន ដូច្នេះក្នុងនាមរដ្ឋបាលខេត្តត្រូវជំរុញធ្វើយ៉ាងម៉េច ការស្នើសុំវិនិយោគឲ្យលេចចេញជារូបរាង។

ដើម្បីទាក់ទាញភ្ញៀវទេសឲ្យមកលេងខេត្ត យើងត្រូវតែមានតំបន់រមណីយដ្ឋានជាចាំបាច់ ពិសេសប្រទេសជាតិ មានសុខសន្តិភាព សេរីភាព និងការអភិវឌ្ឍន៍ប្រជាពលរដ្ឋមានជីវភាពធូរធារ គឺត្រូវការដើរកម្សាន្តច្រើនតម្រូវឲ្យមានរមណីយដ្ឋានច្រើនដែរ ដោយឡែកភ្ញៀវទេសចរអន្តរជាតិក៏ដូចគ្នានេះដែរ។

ប្រធានសមាគមទេសចរណ៍អាស៊ីប៉ាស៊ីហ្វិកលោកធួន ស៊ីណានបានមានប្រសាសន៍ថា រំណីយដ្ឋានភ្នំកំពង់ត្រាចពិតជាស្រស់ស្អាត និងមានភាពទាក់ទាញខ្លាំងណាស់ ហេតុនេះការរៀបចំសណ្តាប់ធ្នាប់របៀបរៀបរយ ពិសេសស្តង់ដាអនាម័យឲ្យបានល្អប្រសើរ នឹងធ្វើឲ្យរមណីយដ្ឋាននេះទាក់ទាញបាននូវភ្ញៀវទេសចរណ៍ជាតិ និងអន្តរជាតិបន្ថែមទៀត។លោកបន្តថា វាដូចជាពេជ្រដែលមិនទាន់កែច្នៃ ហើយតំបន់នេះជាតំបន់តភ្ជាប់ទៅកាន់រមណីយដ្ឋាននានាជាច្រើនទៀត ដែលស្ថិតក្នុងទឹកដីខេត្តកំពត ជាខេត្តដែលមានសក្តានុពលក្នុងវិស័យទេសចរណ៍។

លោកបន្តថា “កម្ពុជាមានរមណីយដ្ឋានទេសចរណ៍ធម្មជាតិច្រើនណាស់ តែការទា ញយកសក្តានុពលមកប្រើប្រាស់ នៅមានកម្រិតនៅឡើយ។

ខេត្តកំពតមានរមណីយដ្ឋានទេសចរណ៍វប្បធម៌ និងធម្មជាតិចំនួន១៨កន្លែង ដែលអាចឲ្យភ្ញៀវចូលទស្សនាកំសាន្តបាន៕

ក្រុមហ៊ុនយក្សចិនមួយ វិនិយោគសួនឧស្សាហកម្មថាមពលថ្មីនៅខេត្តព្រះសីហនុ

October 22, 2018

0

ដោយ គង់ សូរិយា

ភ្នំពេញ៖ សួនឧស្សាហកម្មថាមពលថ្មីមួយ នឹងជួយលើកកំពស់មុខមាត់ខេត្តព្រះសីហនុ ខណៈខេត្តនេះកំពុងប្រឈមការខ្វះខាតថាមពលអគ្គិសនី ដោយសារកំនើននៃការវិនិយោគលើវិស័យសំណង់ និងអចលនទ្រព្យ និងតំបន់ឧស្សាហកម្មនានា។

លោក ម៉ូ ហ្វេយ ប្រធានក្រុមប្រឹក្សាភិបាល ក្រុមហ៊ុនយុនណាន ហ៊ុយ ហ្គ្រុប ការចុះហត្ថលេខាលើអនុស្សារណៈវិនិយោគគំរោងនេះ កាលពីថ្ងៃទី២១ តុលាកន្លងមកថា គំរោងនេះ ជាជំហានដំបូងដ៏រឹងមាំ សម្រាប់យុទ្ធសាស្ត្រពង្រីកការអភិវឌ្ឍនៅក្រៅប្រទេសរបស់ក្រុមហ៊ុន។ ក្នុងនាមជាសហ គ្រាសល្បីឈ្មោះមួយនៅក្នុងខេត្តយូណាន នៃប្រទេសចិន ក្រុមហ៊ុន ដែលបានបង្កើតឡើងរយៈពេល២០ឆ្នាំ ហើយនើ បានពង្រីកសក្តានុពលរបស់ខ្លូន និងទទួលជោគជ័យលើវិស័យអចលនទ្រព្យ សណ្ឋាគារលំដាប់ខ្ពស់ ការកែច្នៃគ្រឿងម៉ាស៊ីន ផលិតផលលោហធាតុ ផលិតផលឧស្សាហកម្មវប្បធម៌ និងផលិតផលទាក់ទងនឹងការប្រើប្រាស់ថាមពលផ្សេង។

លោកបានបញ្ជាក់ថា “ក្រុមហ៊ុនបានមើលឃើញពីគុណសម្បត្តិភូមិសាស្ត្រ របស់ខេត្តព្រះសីហនុ ក្នុងតំបន់អាស៊ីអាគ្នេយ៍ និងអាស៊ីខាងត្បូង សម្រាប់ផ្សារភ្ជាប់ទៅកាន់ទីផ្សារអន្តរជាតិ បូករួមបរិបទផ្លូវច្បាប់ក្នុងប្រទេសកម្ពុជាផ្តល់អាទិភាព និងភាពងាយស្រួលម្រាប់ការវិនិយោគពីសំណាក់ក្រុមហ៊ុនចិនក្នុងខេត្តព្រះសីហនុ។ លោកបន្តថា “យើងនឹងប្រកាន់ខ្ជាប់នូវ ស្មារតីសហគ្រាស ដោយការគោរពសមភាព និងការជឿទុកចិត្តគ្នាទៅវិញទៅមក ក្នុងការអនុវត្តគោលនយោបាយឈ្នះ ឈ្នះ។ ក្រុមហ៊ុន នឹងពន្លឿនការសាងសង់ (សួនឧស្សាហកម្មថាមពលថ្មីក្នុងខេត្តព្រះសីហនុ) និងប្រែក្លាយតំបន់នេះ ជាតំបន់ឧស្សហកម្មគំរូមួយនៅក្នុងខេត្តខេត្តព្រះសីហនុ.

អភិបាលខេត្តព្រះសីហនុលោកយន្ត មីនបានថ្លែងថា ខេត្តព្រះសីហនុ ជាខេត្តដ៏មានសក្តានុពល មានការ អភិវឌ្ឍ មានកំពង់ផែទឹកជ្រៅធំ និងគោលដៅទេសចរណ៍ធំជាងគេទី២ ក្នុងប្រទេសកម្ពុជា ព្រមទាំងជាច្រកទ្វារ សម្រាប់ ភ្ជាប់ជំនួញក្រៅប្រទេសផងដែរ។ ខេត្តព្រះសីហនុ ជាខេត្តតែមួយគត់នៅក្នុងព្រះរាជាណាចក្រកម្ពុជា ដែលមានការដឹក ជញ្ជូន តាមផ្លូវអាកាស ផ្លូវដែក និងសមុទ្រ។

លោកបន្ដថា ចក្ខុវិស័យនៃតំបន់អភិវឌ្ឍថ្មី ខេត្តព្រះសីហនុ នឹងក្លាយជា”ទីក្រុងមួយ កំពង់ផែពីរ និងមជ្ឈមណ្ឌលពាណិជ្ជកម្មចំនួនបី” នៅតាមបណ្តោយឈូងសមុទ្រថៃ។ “ទីក្រុងមួយ” គឺថាបន្ទាប់ពីបង្កើតតំបន់អភិវឌ្ឍថ្មីរួច គឺនឹងមានទីក្រុងមួយ ដែលមានសហគ្រាសចំនួន៣០០ កម្មករនិយោជិត១០ម៉ឺននាក់ និងប្រជាជន២០ម៉ឺននាក់។ (កំពង់ផែពីរ) គឺមាន កំពង់ផែ និងព្រលានយន្តហោះ ដែលនឹងប្រែក្លាយជាតំបន់សេដ្ចកិច្ចពិសេស ដែលមានភាពប្រកួតប្រជែងក្នុងសង្វាក់ផលិតកម្ម។ (មជ្ឈមណ្ឌលចំនួនបី) គឺសំដៅទៅលើ ទី១ មជ្ឈមណ្ឌលសេដ្ឋកិច្ចថ្មី ទី២ ជាមជ្ឈមណ្ឌលដឹកជញ្ជូន ក្នុងតំបន់អាស៊ី អាគ្នេយ៍ និងទី៣ជាមជ្ឈមណ្ឌលបណ្តុះបណ្តាល និងទំនាក់ទំនង។

លោកបន្តថា “ក្នុងការគាំទ្រវិនិយោគិនបរទេសនៅកម្ពុជា រាល់វិនិយោគិននៅកម្ពុជា មិនថាជាតិសាសន៍ណាក៏ដោយ ក៏មានភាពស្មើភាពក្នុងផ្លូវច្បាប់ដែរ និងធានាថា មិនមានគោលនយោ បាយជាតិដាក់កំហិត ស្តីពីមូលធនវិនិយោគទុនបរទេស ការកំណត់តម្លៃ ឬការផ្ទេរថវិការទៅក្រៅទេស”៕

អ្នកវិនិយោគតៃវ៉ាន់ វិនិយោគលំនៅដ្ឋានតាមទស្សទាននៃការអភិវឌ្ឍថ្មីលើកដំបូងនៅកម្ពុជា

October 22, 2018

0

ដោយ ស៊ីវ ម៉េង

ភ្នំពេញ៖ អ្នកវិនិយោគតៃវ៉ាន់បានសម្រេចចិត្ត វិនិយោគលំនៅដ្ឋានប្រកបដោយការច្នៃប្រឌិត និងស្របតាមទស្សទាននៃការអភិវឌ្ឍថ្មីជាលើកដំបូងមួយ នៅក្នុងសង្កាត់កំពង់សំណាញ់ ក្រុងតាខ្មៅ ខេត្តកណ្តាល។

គំរោងនេះ ជាការវិនិយោគដោយក្រុមហ៊ុន DREAM HOME ដែលជាការសហការរួមគ្នារវាងអ្នកវិនិយោគក្នុងស្រុក និងវិនិយោគិនមកពីកោះតៃវ៉ាន់។

លោក គាម សៀកឡុង អគ្គនាយកក្រុមហ៊ុន Century21 Dream Property ដែលទទួលសិទ្ឋលក់ផ្តាច់មុខគំរោងនេះ បានមានប្រសាសន៍ឲ្យដឹងនារសៀលថ្ងៃទី២២ តុលានេះថា នេះជាគំរោងលំនៅដ្ឋានមួយដែលមានការរៀបចំ និងការដីសាញបែបថ្មី មានភាព ទំនើបទាន់សម័យ ដោយលំនៅដ្ឋានក្នុងគំរោងនេះជាគំរោងទី២ ដែលមានលំនៅដ្ឋានសរុបចំនួន២៦ ដែលអភិវឌ្ឍន៍ឡើងប្លែកពីគេនិងមានផាសុខភាព។ លោកបន្តថា គំរោងនេះបានសាងសង់កំពស់៣ជាន់ (រាប់ទាំងជាន់ផ្ទាល់ដី) ដោយជាន់ផ្ទាល់ដីជាចំណតយានយន្ត ជាន់ទី១ ជាចង្ក្រានបាយ និងបន្ទប់ទទួលភ្ញៀវ និងមានសួនច្បារកំសាន្ត និងជាន់ទី២ ជាបន្ទប់គេង។

លំនៅដ្ឋានក្នុងគំរោងនេះ លក់ចាប់ពីតម្លៃ៧៣,០០០ដុល្លារ ដល់ជាង៩០,០០០ដុល្លារអាមេរិក។

លោកគាម សៀកឡុងបានបន្តថា “គំរោងនេះផ្តល់ឲ្យអតិថិជននូវប្លង់រ៉ឹង ដែលអាចបង់រំលោះរហូតដល់២៥ឆ្នាំ ហើយរហូតមកទល់ពេលនេះការលក់ផ្ទះក្នុងគំរោងនេះសម្រេ

ចបានប្រមាណ៤០ភាគរយហើយ។លោកបន្តថា “ដោយសារវាជាការឌីសាញមានលក្ខ ណៈពិសេស និងមានទ្វារសុវត្ថិភាព ដែលមានតែម្ចាស់លំនៅដ្ឋានទើបអាចចេញចូលបាន ទើបយើងទទួលយកគំរោងនេះមកលក់ ហើយយើងរំពឹងថានឹងលក់អស់នៅពេលឆាប់ៗនេះ។

ដោយគិតពីផាសុខភាពដល់អ្នករស់នៅ ទើបអ្នកអភិវឌ្ឍន៍គមរោងនេះបានរក្សាទុកមុខផ្ទះមានទំហំធំ ដែលមានប្រវែងចាប់ពី៥ទៅ៦ម៉ែត្រ ដែលផ្តល់ឲ្យអ្នករស់នៅមានភាពងាយស្រួល និងមានផាសុខភាព។

លោក គាម សៀកឡុង បានបន្តថា លំនៅដ្ឋានក្នុងគំរោងនេះ បានសាងសង់បញ្ចប់ហើយ ហេតុនេះអ្នកមានបំណងជាវគំរោងនេះ អាចទិញរួចហើយចូលស្នាក់នៅបាន ដោយមិនចាំបាច់ចំណាយពេលរហូតផ្ទះសាងសង់ចប់នោះទេ។

លោកបន្តថា គ្រប់ទិសទាំងអស់នៅរាជធានីភ្នំពេញ សុទ្ឋតែមានការអភិវឌ្ឍយ៉ាងឆាប់រហ័ស ហេតុនេះទើបការអភិវឌ្ឍបានសាយភាយមកដល់ក្រុងតាខ្មៅ ដោយសារក្រុងតាខ្មៅមានទីតាំងនៅកៀករាជធានីភ្នំពេញ មានហេដ្ឋារចនាសម្ព័ន្ឋល្អប្រសើរ ពិសេសផ្លូវ៦០ម៉ែត្រឬមហាវិថីសម្តេចតេជោហ៊ុន សែនបានស្ថិតនៅក្បែរគ្នានេះ ដែលធ្វើឲ្យការធ្វើដំនើរចេញចូលរាជធានីភ្នំពេញមានភាពងាយស្រួល។

លោកបន្តថា ដោយទទួលបានជោគជ័យជាបន្តបន្ទាប់ចាប់ពីគំរោងទី១ ដល់ទី២នេះ នាពេលឆាប់ៗខាងមុខនេះ ក្រុមហ៊ុននឹងវិនិយោគគំរោងស្រដៀងគ្នានៅតំបន់នេះបន្តទៀត ដោយសារតំបន់នេះមានការអភិវឌ្ឍយ៉ាងឆាប់រហ័ស និងមានលក្ខខ័ណ្ឌសមស្របទាំងទីតាំង និងអាកាសធាតុល្អប្រសើរ៕

ស្វែងយល់ពីអាស៊ី៖ មហាយក្សចិនសាងសង់មជ្ឈមណ្ឌលពាណិជ្ជកម្មខ្ពស់កប់ពពកមួយទៀត

October 22, 2018

0

ដោយ វុត្ថា

ភ្នំពេញ៖ ប្រទេសចិនត្រូវបានគេមើលឃើញថា មានសេដ្ឋកិច្ចលូតលាស់ខ្លាំងស្ថិតលំដាប់ទី២ក្នុងពិភពលលោកបន្ទាប់ពីសហរដ្ឋអាមេរិក។ មិនត្រឹមតែប៉ុណ្ណោះ ហេដ្ឋារចនាសម្ព័ន្ធសំណង់អគារ ក៏មានការរីកចម្រើនខ្លាំងណាដែរ ជាពិសេសមួយរយៈពេលប៉ុន្មានឆ្នាំចុងក្រោយនេះ មានអគារខ្ពស់លូតលាស់យ៉ាងច្រើន នៅតាមបណ្តាខេត្តក្រុងសំខាន់នានានៅទាំងប្រទេសចិន។

គេហទំព័រ propertyarea.asia និងបន្តបង្ហាញជូនលោក អ្នកនៅអគារថ្មីមួយទៀតនៅក្នុងទីក្រុងណាននីង ប្រទេសចិន គឺអគារ Zifeng Tower ដែលគេចាត់ទុកថា ជាអគារខ្ពស់អស្ចារ្យ និងទាក់ទាញទេសចរណ៍ទាំងក្នុង និងក្រៅស្រុកទៅលេងកម្សាន្ត។

អគារ Zifeng Tower ឬ Greenland Center-Zifeng Tower ជាអតិតអគារ Nanjing Greenland Financial Center ដែលមានកម្ពស់ប្រមាណជា ៤៥០ម៉ែត្រ គឺជាអគារខ្ពស់កប់ពពកក្នុងទីក្រុងណាននីង ខេត្តJiangsu របស់ប្រទេសចិន។

មជ្ឈមណ្ឌលពាណិជ្ជកម្មខ្ពស់កប់ពកដែល មានកំពស់ ៦៦ជាន់នេះ ត្រូវបានចាប់ ផ្តើមសាងសង់នៅក្នុងឆ្នាំ២០០៥ និងបញ្ចប់កាលពីឆ្នាំ២០១០។ អគារនេះគឹសាងសង់ឡើងសម្រាប់ប្រើប្រាស់រួម ដោយរួមបញ្ចូលទាំងការិយាល័យជួល និងលក់ នៅជាប់ក្រោម។

ជាន់នៃអគារខាងលើបង្អស់ គឺជាសណ្ឋាគារ ភោជនីយដ្ឋាន និង កន្លែងទស្សនាទេសភាពទីក្រុង ។ កំពូលនៃអគារនេះ ត្រូវបានបែកចែក និងមានមុខងារទៅតាមផ្នែកនីមួយ។ អគារខ្ពស់កប់ពកនេះ គឺជាអគារខ្ពស់បំផុតនៅក្នុងទីក្រុងណាននីង និងខេត្តជាំងស៊ូ ហើយជាអគារខ្ពស់លំដាប់ទី៦ នៅក្នុងប្រទេសចិន និងជាអគារខ្ពស់លំដាប់ទី១៤ នៅលើពិភពលោក។

អគារដ៏អស្ចារ្យនេះ ត្រូវបានរចនាប្លង់ដោយ ក្រុមហ៊ុនល្បីល្បាញខាងសង់សាងអគារខ្ពស់នៅលើពិភពលោក Skidmore, Owings និង Merrill ដែលដឹកនាំដោយលោក Andrian Smith។

គំរោងដ៏អស្ចារ្យនេះ ត្រូវបានវិនិយោគដោយថវិកាខេត្ត ជាំងស៊ូ និងគ្រប់គ្រង់ដោយក្រុមហ៊ុន Greenland Group ដោយចំណាថវិកាសាសង់ចំនួន១៧៥លានដុល្លារសហរដ្ឋអាមេរិក៕

CDC អនុញ្ញាត្តឲ្យក្រុមហ៊ុនចំនួន៤ បោះទុនជិត ៣០លានដុល្លារសង់រោងចក្រនៅក្រុងព្រះសីហនុ

October 22, 2018

0

ដោយ វុត្ថា

ភ្នំពេញ៖ គណៈកម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា(CDC) បានសម្រេចចេញ “វិញ្ញាបនប័ត្រចុះបញ្ជីជាស្ថាពរ” ជូនដល់ក្រុមហ៊ុនចំនួន៤ ដែលមានទំហំទឹកប្រាក់ចំនួនជិត៣០លានដុល្លារ ដើម្បីបង្កើតរោងចក្រចក្រផលិតក្តារប៉ាកេ ក្តារបន្ទះនិងគ្រឿងសង្ហារឹម និងរោងចក្រផលិតកកាបូប និងវ៉ាលីសមានទីតាំងវិនិយោ គស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ ខេត្តព្រះសីហនុ។

ក្រុមហ៊ុនទាំងបួននោះមានដូចជា ទី១ ក្រុមហ៊ុន “INVISTA DECOR CO.,LTD”: គម្រោងបង្កើតរោងចក្រផលិតក្តារប៉ាកេ ក្តារបន្ទះ និងគ្រឿងសង្ហារឹម មានទុនវិនិយោគចំនួន១,៥លានដុល្លារអាមេរិក និងអាចបង្កើតការងារបានចំនួន១៣៥កន្លែង។ ទី២ ក្រុមហ៊ុន “GLORY ALLIANCE (CAMBODIA) CO.,LTD”: គម្រោងបង្កើតរោងចក្រផលិត កាបូប និងវ៉ាលិស មានទុនវិនិយោគប្រមាណ៥,៦៤លានដុល្លារអាមេរិក និងអាចបង្កើតការងារបានចំនួន៣៨០កន្លែង។

ទី៣ ក្រុមហ៊ុន “CAMBODIAN TROPIC FLOORING CO.,LTD”: គម្រោងបង្កើតរោងចក្រផលិតក្តារប៉ាកេ ក្តារបន្ទះ និងគ្រឿងសង្ហារឹម មានទុនវិនិយោគចំនួន ៦,៥លានដុល្លារអាមេរិក និងអាចបង្កើតការងារបានចំនួន៥៤០កន្លែង និង៤ក្រុមហ៊ុន “COUGAR WOOD INDUSTRY CO.,LTD”: គម្រោងបង្កើតរោងចក្រផលិតក្តារប៉ាកេ និងក្តារបន្ទះ មានទុនវិនិយោគប្រមាណ១៤,៩៥លានដុល្លារអាមេរិក និងអាចបង្កើតការងារបានចំនួន១៦២កន្លែង៕