ប្រព័ន្ឋបច្ចេកវិទ្យាក្នុងវិស័យធនាគារ ជួយជំរុញសកម្មភាពសេដ្ឋកិច្ច

October 12, 2017

ដោយ គង់ សូរិយា
ភ្នំពេញ៖ តើលោកអ្នកបានត្រៀមខ្លួន និងប្រើប្រាស់បច្ចេកវិទ្យាក្នុងការទូទាត់សាច់ប្រាក់តាមបច្ចេកវិទ្យាហើយឬនៅ ខណៈដែលបច្ចេកវិទ្យាកំពុងផ្លាស់ប្តូរការទូទាត់សាច់ប្រាក់តាមបែបប្រពៃណី មកប្រើប្រាស់បច្ចេកវិទ្យាដើម្បីទូទាត់សាច់ប្រាក់។

លោក ជា ផល្លារិន អគ្គនាយកគ្រឹះស្ថានមីក្រូហិរញ្ញវត្ថុអម្រិតបានថ្លែងឲ្យដឹងតាមទូរស័ព្ទនាល្ងាចថ្ងៃទី១១ តុលានេះថា កាលណាបច្ចេកវិទ្យារីកចម្រើន នឹងជួយដល់សេដ្ឋកិច្ចជាតិ ដោយការទូទាត់សាច់ប្រាក់សុទ្ឋ នឹងត្រូវជំនួសដោយការទូទាត់សាច់ប្រាក់តាមរយៈបច្ចេកវិទ្យា ដូចជា ទូរស័ព្ទដៃ ឬវីសាកាតជំនួសវិញ។លោកបន្តថា ប្រព័ន្ឋបច្ចេកវិទ្យា នឹងជួយបង្កើនសកម្មភាពសេដ្ឋកិច្ចជាងមុន ព្រោះការទូទាត់កាន់តែមានភាពងាយស្រួល។

លោកបន្តថា ប្រព័ន្ឋហិរញ្ញវត្ថុកម្ពុជាកំពុងតែវិវត្តន៍រីកចម្រើន និងផ្លាស់ប្តូរពីរបៀបទូទាត់តាមបែប្រពៃណី មកទូទាត់តាមបែបបច្ចេកវិទ្យា។

ប្រធានស្តីទីសមាគមធនាគារកម្ពុជា លោកឆារស៍ វ៉ាន់បានថ្លែងថា បច្ចុប្បន្នមានបច្ចេកវិទ្យាច្រើន កំពុងអនុវត្តន៍នៅក្នុងប្រព័ន្ឋហិរញ្ញវត្ថុកម្ពុជា ដែលបច្ចេកវិទ្យាខ្លះប្រើប្រាស់សម្រាប់ទូទាត់សាច់ប្រាក់តិច និងប្រព័ន្ឋខ្លះទូទាត់សាច់ប្រាក់ធំ ហើយការទូទាត់ខ្លះធ្វើឡើងតាមទូរស័ព្ទ ដោយប្រើប្រាស់ការទូទាត់តាមប្រព័ន្ឋ QR Code។លោកបន្តថា ប្រព័ន្ឋបច្ចេកវិទ្យាបានជួយសម្រួលជាច្រើន ដោយប្រជាពលរដ្ឋមិនចាំបាច់កាន់កាបូបប្រាក់ទៀតទេ ដោយពួកគេអាចទូទាត់សាច់ប្រាក់តាមទូរស័ព្ទបាន ដែលប្រព័ន្ឋបែបនេះកំពុងរីកចម្រើនខ្លាំងនៅប្រទេសចិន។

លោកបន្តថា បច្ចេកវិទ្យាកំពុងដើរតួនាទីកាន់តែសំខាន់ ក្នុងសេដ្ឋកិច្ចជាតិ ដោយជំរុញឲ្យមានកំណើនក្នុងសេដ្ឋកិច្ចរបស់យើង ដែលគាំទ្រដោយប្រព័ន្ឋបច្ចេកវិទ្យា។

លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិបានថ្លែងថា ប្រព័ន្ឋធនាគារនានានៅកម្ពុជាកាន់តែមានភាពរីកចម្រើន ដោយសារការនាំមកនូវបច្ចេកវិទ្យា ចំណេះដឹង និងបទពិសោធន៍ថ្មីៗពីអ្នកវិនិយោគ និងអ្នកជំនាញមកពីបរទេស ដែលផ្តល់ផលចំណេញដល់កម្ពុជាទាំងលើទុន និងចំនេះដឹង ដែលកម្ពុជាត្រូវរៀនសូត្របន្ថែមទៀត៕

ដំណាច់ត្រីមាសទី៣ ទុនវិនិយោគក្នុងវិស័យសំណង់មានទឹកប្រាក់ ៥៦៣៦លានដុល្លារ

October 11, 2017

0

ដោយ ដែន ចែងចាំង
ភ្នំពេញ៖ ការវិនិយោគក្នុងវិស័យសំណង់ និងអចលនទ្រព្យនៅតែមានសញ្ញាល្អប្រសើរ ដោយដំណាច់ត្រីមាសទី៣ឆ្នាំនេះ ទុនវិនិយោគក្នុងវិស័យនេះមានទំហំទឹកប្រាក់រហូតដល់ ៥៦៣៦លានដុល្លារអាមេរិក។

អនុរដ្ឋលេខាធិការក្រសួងរៀបចំដែនដី នគរូបនីយកម្មនិងសំណង់លោកឡៅ ទិព្វសីហាបានថ្លែងឲ្យដឹងនៅថ្ងៃទី១១ តុលានេះថា សមត្ថកិច្ច នៅតាមរាជធានី ខេត្តក្រុងទូទាំងប្រទេសបានអនុម័តគំរោងចំនួន២៥២២គម្រោង ដែលមានទុនទឹកប្រាក់៥៦៣៦លានដុល្លារអាមេរិក កើនឡើង២២ភាគរយធៀបរយៈពេលដូចគ្នាកាលពីឆ្នាំមុន។លោកបន្តថា គម្រោងអនុម័តឆ្នាំនេះភាគច្រើនជា គំរោងសាងសង់ខុនដូ លំនៅដ្ឋានជាលក្ខណៈបុរី រោងចក្រ សហគ្រាស សណ្ឋាគារ និងអាគារការិយាល័យជាដើម។

លោកបន្តថា “ការកើនឡើងនូវការវិនិយោគក្នុងវិស័យនេះ ដោយសារកត្តាសន្តិភាព ស្ថិរភាពនយោបាយ និងភាពអំណោយផលលើច្បាប់វិនិយោគ ដែលធ្វើឲ្យអ្នកវិនិយោគជាច្រើនបានសម្លឹងមកកម្ពុជា ហើយកម្ពុជាបាននិងកំពុងក្លាយជាទីផ្សារដ៏ទាក់ទាញមួយ។

យោងតាមរបាយការណ៍របស់ក្រសួងសេដ្ឋកិច្ច និងហិរញ្ញវត្ថុបានឲ្យដឹងថា ក្នុងរយៈពេល៧ឆ្នាំចុងក្រោយនេះ ក្រសួងសេដ្ឋកិច្ចបានអនម័តគម្រោងសរុប២១៣គម្រោង និងមានទឹកប្រាក់៣៣៧៥លានដុល្លារអាមេរិក៕

ក្រុមហ៊ុនមួយគ្រោងប្រែក្លាយផ្លូវ ១៧៤ សង្កាត់ចតុមុខ ទៅជាកន្លែងកំសាន្តនាពេលរាត្រី

October 11, 2017

0

ភ្នំពេញ៖ ជាផ្នែកមួយនៃការវិនិយោគ និងធ្វើពិធិធកម្មផលិតផលទេសចរណ៍ ក្រុមហ៊ុន Sabay Sabay Street គ្រោងធ្វើការអភិវឌ្ឍប្រែក្លាយផ្លូវ១៧៤ ស្ថិតនៅក្នុងសង្កាត់ចតុមុខទៅជាកន្លែងកំសាន្តដ៏ប្រណីតនាពេលរាត្រី ដើម្បីទទួលស្វាគមនភ្ញៀវទេសចរជាតិ និងអន្តរជាតិមកកំសាន្តនៅរាជធានីភ្នំពេញ។

នាយកប្រតិបត្តិក្រុមហ៊ុន Sabay Sabay Street លោក Dwight Hayden បានថ្លែងឲ្យដឹងកាលពីល្ងាចថ្ងៃម្សិលម៉ិញនេះថា ក្រុមហ៊ុន Sabay Sabay Street បានបោះទុនវិនិយោគនៅតំបន់នេះ ប្រមាណជាជាង៣ឆ្នាំហើយ ក្នុងនោះមានដូចជាសណ្ឋាគារ បាឌីស្គូ និងកន្លែងកំសាន្តផ្សេងៗជាច្រើន ដើម្បីស្វាគមនអតិថិជនភ្ញៀវជាតិ និងអន្តរជាតិមកកំសាន្តសប្បាយ ដើម្បីបន្ធូអារម្មណ៍។

លោកបន្តថា ក្រុមហ៊ុន Sabay Sabay Street នឹងពង្រីកការអភិវឌ្ឍតំបន់នេះ អោយក្លាយជាកន្លែងកំសាន្តដ៏ប្រណីតមួយ ដូចបណ្តាប្រទេសដទៃទៀត ដើម្បីទាក់ទាញភ្ញៀវទេសចរអន្តរជាតិមកកំសាន្តកម្ពុជា អោយកាន់តែច្រើន ក្នុងន័យរួមចំណែកជាមួយរាជរដ្ឋាភិបាលកម្ពុជា ដើម្បីអភិវឌ្ឍន៍ប្រែក្លាយជាគោលដៅទេសចរណ៍ដ៏ទាក់ទាញសម្រាប់ភ្ញៀវបរទេស។

លោក Robert Schmalohr ស្ថាបនិកក្រុមហ៊ុន Sabay Sabay Street បានថ្លែងអំណរគុណចំពោះរាជរដ្ឋាភិបាលកម្ពុជា ដែលបានផ្តល់ឱកាសអោយក្រុមហ៊ុនរបស់លោក ធ្វើការវិនិយោគនៅលើទឹកដីកម្ពុជា ហើយលោកប្តេជ្ញាចិត្តអភិវឌ្ឍន៍ប្រែក្លាយកន្លែងនេះ ក្លាយជាកន្លែងកំសាន្តដ៍ទាក់ទាញមួយនៅក្នុងតំបន់អាស៊ាន។

រាជរដ្ឋាភិបាលកម្ពុជា បានផ្តល់ផ្តល់ឱកាសអោយក្រុមហ៊ុនបរទេសជាច្រើន មកវិនិយោគនៅប្រទេសកម្ពុជាលើវិស័យទេសចរណ៍ ហើយភាគច្រើនក្រុមហ៊ុនបរទេសទាំងនោះវិនិយោគលើសណ្ឋាគារ ភោជនីយដ្ឋាន និងកន្លែងៗកំសាន្ត។សម្រាប់ការអនុញ្ញាតអោយក្រុមហ៊ុនបរទេសវិនិយោគនេះ ក្នុងគោលដៅប្រក្លាយក្លាយប្រទេសកម្ពុជាអោយក្លាយជាគោលដៅទេសចរណ៍ដ៍ទាក់ទាញបំផុត។

ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី បានស្វាគមន៍គំរោងនេះ ដោយលោកចាត់ទុកថា វាជាផលិតផលទេសចរណ៍ថ្មីមួយ សម្រាប់រាជធានីភ្នំពេញ ខណៈបច្ចុប្បន្ននៅរាជធានីភ្នំពេញមានកន្លែងកំសាន្តនៅមានកម្រិត ហេតុនេះការវិនិយោគពីវិស័យឯកជនមានសារៈសំខាន់ណាស់ ដើម្បីទាក់ទាញភ្ញៀវទេសចរណ៍ ក៏ដូចជាបង្កើតឲ្យមានកន្លែងកំសាន្តនាពេលរាត្រីឲ្យបានច្រើន។

លោកបន្តថា “កម្ពុជាមានសក្តានុពលលើវិស័យទេសចរណ៍វប្បធ៌ម និងធម្មជាតិច្រើនណាស់ ប៉ុន្តែទាមទារឲ្យមានការវិនិយោគរមណីយដ្ឋានកែច្នៃ និងផលិតផលទេសចរណ៍ជាច្រើនទៀត ទើបយើងទាក់ទាញឲ្យភ្ញៀវស្នាក់នៅបានយូរ និងចំណាយប្រាក់ច្រើន”៕

ចង់បើកក្រុមហ៊ុនទេសចរណ៍មួយត្រូវការលក្ខខ័ណ្ឌអ្វីខ្លះ?

October 11, 2017

0

ការបើកក្រុមហ៊ុនមួយ ជារឿងសាមញ្ញ ប៉ុន្តែតើមាននិតិវិធីនិងលក្ខខ័ណ្ឌតម្រូវអ្វីខ្លះ ជារឿងកាន់តែចាំបាច់ ដើម្បីឲ្យអ្នកមានបំណងបើកក្រុមហ៊ុនផ្តល់សេវាកម្មជាភ្នាក់ងារទេសចរណ៍បានដឹង និងរៀបចំឯកសារស្នើសុំទៅក្រសួង និងស្ថាប័នពាក់ព័ន្ឋ។

ការផ្តល់អាជ្ញាប័ណ្ណទេសចរណ៍ដល់ការីទេសចរណ៍ និងភ្នាក់ងារទេសចរណ៍ និងអាជ្ញាបណ្ណទេសចរណ៍សម្រាប់ការីទេសចរណ៍ និងភ្នាក់ងារទេសចរណ៍ត្រូវបានបែងចែកជា ០៤ប្រភេទ ដូចជា ទី១ អាជ្ញាបណ្ណទេសចរណ៍ ផ្តល់ដល់ការីទេសចរណ៍ដែលនាំភ្ញៀវទេសចរ ទៅកម្សាន្តក្រៅព្រះរាជាណាចក្រកម្ពុជា (Outbound Tour Operators) ទី២ អាជ្ញាបណ្ណទេសចរណ៍ ផ្តល់ដល់ការីទេសចរណ៍ដែលនាំភ្ញៀវទេសចរចូលមកកម្សាន្តក្នុងព្រះរាជាណាចក្រកម្ពុជា (Inbound Tour Operators) ទី៣ អាជ្ញាបណ្ណទេសចរណ៍ ផ្តល់ដល់ការីទេសចរណ៍ដែលនាំភ្ញៀវទេសចរ កម្សាន្តក្នុងព្រះរាជាណាចក្រកម្ពុជា (Domestic Tour Operators) និងទី៤អាជ្ញាបណ្ណទេសចរណ៍ ផ្តល់ដល់ភ្នាក់ងារទេសចរណ៍ (Travel Agent)។

យោងតាមឯកសាររបស់ក្រសួងទេសចរណ៍បានឲ្យដឹងថា បុគ្គលដែលមានបំណងប្រកបអាជីវកម្មការីទេសចរណ៍ និងភ្នាក់ងារទេសចរណ៍ ឬបើកសាខាត្រូវបំពេញសំណុំបែបបទរួមទាំងឯកសារសំអាង និងព័ត៌មានមួយចំនួនដូចខាងក្រោម ដូចជា ត្រូវមានវិញ្ញាបនបត្របញ្ជាក់ពីការចុះឈ្មោះក្នុងបញ្ជីពាណិជ្ជកម្ម ។មានប្រាក់តម្កល់ធានាអាជីវកម្មពីធានា ដែលទទួលស្គាល់ដោយក្រសួងទេសចរណ៍។

ឯកសារដដែលបានបន្តឲ្យដឹងថា អ្នកដែលមានបំណងបើកក្រុមហ៊ុនផ្តល់សេវាកម្ម ក្នុងវិស័យនេះក៏ត្រូវមានឯកសារមួយចំនួនផងដែរ ដូចជា ទី១ លិខិតបញ្ជាក់ទីស្នាក់ការ ឬកិច្ចសន្យាជួលផ្ទះកិច្ចសន្យារបស់ប្រតិបត្តិករទេសចរណ៍ក្នុងការប្រកបអាជីវកម្ម ទី២ អត្តសញ្ញាណប័ណ្ណសញ្ជាតិខ្មែរ ឬលិខិតឆ្លងដែន (សម្រាប់ជនបរទេស) ទី៣ រូបថតម្ចាស់អាជ្ញាបណ្ណទេសចរណ៍ (៤x៦) ចំនួន ០៣សន្លឹក។

បុគ្គលដែលស្នើសុំបន្តអាជ្ញាបណ្ណទេសចរណ៍សម្រាប់ការីទេសចរណ៍ និងភ្នាក់ងារទេសចរណ៍ (រួមទាំងសាខា) ត្រូវបំពេញសំណុំបែបបទរួមទាំងឯកសារសំអាង និងព័ត៌មានមួយចំនួនដូចជា ទី១ ត្រូវមានប្រាក់តម្កល់ធានាអាជីវកម្មពីធានាការដែលទទួលស្គាល់ដោយក្រសួងទេសចរណ៍ ទី២ អាជ្ញាបណ្ណទេសចរណ៍ច្បាប់ដើម ទី៣ របាយការណ៍សកម្មភាពអាជីវកម្មឆ្នាំមុន ទី៤ កិច្ចសន្យារបស់ប្រតិបត្តិករទេសចរណ៍ក្នុងការប្រកបអាជីវកម្ម ទី៥ រូបថតម្ចាស់អាជ្ញាបណ្ណទេសចរណ៍ (៤x៦) ចំនួន០៣សន្លឹក។

ប្រាក់តម្កល់ធានាការប្រកបអាជីវកម្មការីទេសចរណ៍ និងភ្នាក់ងារទេសចរណ៍ ត្រូវបានកំណត់ទៅតាមវិសាលភាព និងទំហំអាជីវកម្មដូចជា អាជ្ញាបណ្ណទេសចរណ៍ ផ្តល់ដល់ការីទេសចរណ៍ ដែលនាំភ្ញៀវទេសចរទៅកម្សាន្តក្រៅព្រះរាជាណាចក្រកម្ពុជា (Outbound Tour Operators) ត្រូវតម្កល់ប្រាក់៧,០០០ដុល្លារអាមេរិក។ អាជ្ញាបណ្ណទេសចរណ៍ ផ្តល់ដល់ការីទេសចរណ៍ដែលនាំភ្ញៀវទេសចរចូលមកកម្សាន្តក្នុងព្រះរាជាណាចក្រកម្ពុជា (Inbound Tour Operators) ត្រូវតម្កល់ប្រាក់ ៥,០០០ដុល្លារអាមេរិក។ អាជ្ញាបណ្ណទេសចរណ៍ ផ្តល់ដល់ការីទេសចរណ៍ដែលនាំភ្ញៀវទេសចរ កម្សាន្តក្នុងព្រះរាជាណាចក្រកម្ពុជា (Domestic Tour Operators) ត្រូវតម្កល់ប្រាក់ ៥,០០០ដុល្លារអាមេរិក។ អាជ្ញាបណ្ណទេសចរណ៍ ផ្តល់ដល់ភ្នាក់ងារទេសចរណ៍ (Travel Agent) ត្រូវតម្កល់ប្រាក់២,០០០ដុល្លារអាមេរិក៕

ទិញផ្ទះដូចម្តេចដើម្បីចំណេញបានច្រើន?

October 11, 2017

0

ចង់ដឹងឬទេថា តើទិញផ្ទះយ៉ាងដូចម្តេច ដើម្បីវិនិយោគយកប្រាក់ចំណេញមកវិញបានឆាប់រហ័ស និងលក់ដាច់លឿន។

ឥឡូវនេះវេបសាយ www.propertyarea.asia បានក្លាយជាអ្នកប្រឹក្សាយោបល់ជាមួយអ្នកបានហើយ តាមរយៈការបង្ហាញចំណេះដឹង និងវិធីសាស្ត្រសម្បូរបែប និងប្រកបដោយជំនាញច្បាស់លាស់ ដើម្បីអាចឲ្យលោកអ្នក យកទៅអនុវត្តន៍បានមានប្រសិទ្ឋិភាពខ្ពស់ ដែលផ្ដល់កិច្ចសម្ភាសដោយលោក ច្រឹក សុខនីម អគ្គនាយកក្រុមហ៊ុន Century21 Mekong។

ទិញផ្ទះដែលទើបសាងសង់?

ហេតុអ្វី លោកអ្នក ត្រូវទិញផ្ទះទើបនឹងសាងសង់ ព្រោះម្ចាស់គំរោងខ្លះពួកគេ មិនសូវមានទុនច្រើនសម្រាប់បង្វិលទេ។ ទើបផ្ទះពួកគេត្រូវការទុន ដើម្បីសាងសង់គំរោងលំនៅដ្ឋានរបស់ពួកគេ ហេតុនេះដំណាក់កាលដំបូងផ្ទះរបស់ពួកគេមានតម្លៃធូរថ្លៃជាងផ្ទះធ្វើរួចហើយ ឬធ្វើជិតរួច។

ធម្មតាផ្ទះតែងតែឡើងថ្លៃ

មិនថាតែអ្នកវិនិយោគមានប្រាក់តិច ឬមានប្រាក់ច្រើនទេ តែងតែលក់ផ្ទះរបស់ខ្លួនឡើងថ្លៃ តាមដំណាក់កាលនៅពេលផ្ទះរបស់ ពួកគេសាងសង់បានកាន់តែច្រើន។ ហេតុនេះការទិញគំរោងតំបូង លោក អ្នកអាចចំណេញចន្លោះពី១០ទៅ២០ភាគរយនៃតំលៃលំនៅដ្ឋានរបស់ខ្លួន។

ទិញផ្ទះដែលអ្នកស្រលាញ់

ធម្មតាផ្ទះដែលអ្នកស្រលាញ់ ក៏អាចអ្នកដទៃស្រលាញ់ ព្រោះជាផ្ទះអាចប្រកបអាជីវកម្មបាន ឬជាផ្ទះដែលស្ថិតនៅទីតាំងមិនសូវអ៊ូអរ ដែលជាការនិយមរបស់មនុស្សដែលនិយមភាពស្ងប់ស្ងាត់ និងមិនមានបំណងចង់ធ្វើអាជីវកម្មអ្វីមួយ។

គិតពីហុងស៊ុយ

ជំនឿហុង ស៊ុយមានសារៈសំខាន់ណាស់ ក្នុងផ្នត់គំនិតជនជាតិចិន និងជនជាតិខ្មែរផងដែរ ព្រោះផ្ទះបែរមុខទៅទិសខាងលិច ជាផ្ទះមិនសូវមានការពេញនិយមទេ។ ពិសេសផ្ទះលែងមានលូនៅចំពីមុខ ឬពីចំហៀង មិនសូវទទួលបានការចាប់អារម្មណ៍ពីអ្នកទិញឡើយ ព្រោះពួកគេមានជំនឿថា មិនសូវមានសិរីសួស្តី និងសុខមាលភាពក្នុងការរស់នៅ។

ទិញផ្ទះអាចរកស៊ីបាន

តាមធម្មតាផ្ទះនៅខាងមុខ អាចរកស៊ីបានតែងមានតំលៃខ្ពស់ជាងគេបន្តិច ប៉ុន្តែក៏ជាផ្ទះឡើងថ្លៃលឿនជាងគេ និងចំណេញច្រើនជាងគេផងដែរ ព្រោះផ្ទះប្រកបអាជីវកម្មបាន ជាប្រភេទផ្ទះដែលមានមនុស្សច្រើនឆ្លងកាត់ និងងាយទទួលបានការចាប់អារម្មណ៍។

កេរ្ត៍ឈ្មោះបុរី ឬគុណភាពសំណង់

អ្នកត្រូវប្រាកដថា បុរីដែលអ្នកបានទិញជាបុរីមិនមានបញ្ហា និងតែងតែផ្តល់ទំនុកចិត្តដល់អតិថិជន លើគុណភាពសំណង់របស់ផ្ទះនិមួយៗ ព្រោះការទិញផ្ទះឬគំរោងលំនៅដ្ឋាន ដែលមិនបានគិតគូរម៉ត់ចត់ពីគុណភាពសំណង់ ធ្វើឲ្យអ្នកត្រូវជួបផលវិបាកជាច្រើន លើការជួសជុលមិនចេះចប់មិនចេះហើយ និងពិបាកក្នុងការលក់ ឬស្វែងរកអតិថិជនផងដែរ ប្រសិនជាទិញប៉ះចំលំនៅដ្ឋានបែបនេះ៕

បណ្ឌិត រស់ ចន្ត្រាបុត្រ៖ កម្ពុជា ជាទឹកដីនៃស្នាមញញឹម មិនមែនជារបស់ថៃទេ

October 11, 2017

0

ភ្នំពេញ៖ ខ្មែរញញឹមជាមួយកែវភ្នែក ស្នាមញញឹមនេះ បានដក់ជាប់លើផ្ទៃមុខខ្មែរពីធម្មជាតិ ហើយវប្បធម៌ ប្រវត្តិសាស្ត្រកាលពី ១០០ឆ្នាំមុនបានកត់ត្រា និងចាប់ផ្តើមនូវសម្បត្តិមរតករស់ មិនអាចកាត់ថ្លៃបាននេះ។

ជាអ្នកសិក្សាស្រាវជ្រាវពីវប្បធម៌ អរិយធ៌ម ប្រវត្តិសាស្ត្រកម្ពុជាជាច្រើន លោកសាស្ត្រាចារ្យបណ្ឌិត រស់ ចន្ត្រាបុត្រ បានលើកឡើងពីប្រវត្តិសាស្ត្រ និងតម្លៃនៃស្នាមញញឹមរបស់ខ្មែរកាលពីចុងសប្តាហ៍មុនថា អ្នកប្រាជ្ញាបារាំងបានចាប់ផ្តើមហៅ «កម្ពុជា ជាទឹកដីនៃស្នាមញញឹម» កាលពី១០០ឆ្នាំមុន។ បន្ទាប់ពីអ្នកប្រាជ្ញារូបនោះ មកសិក្សាស្រាវជ្រាវពីវប្បធ៌ម ចម្លាក់យើង ដោយបានរកឃើញស្នាមញញឹមនៃអប្សរា និងស្នាមញញឹមរបស់ព្រះពោធិសាត់ នៃប្រាសាទបាយ័ន ព្រមទាំងចម្លាក់បដិមានៃព្រះបាទជ័យវរ្ម័នទី៧ ជាស្នាមញញឹមបង្ហាញពីសេចក្តីស្ងប់ និងប្រាស់ចាកអំពើបាប។

ចំណុចពិសេសរបស់ខ្មែរ មុននិយាយតែងតែញញឹម និងញញឹមសិនមុននិយាយ ប៉ុន្តែពួកសៀម បានយកស្នាមញញឹមនេះថាជារបស់ខ្លួន សូម្បីក្រុមហ៊ុនអាកាសចរណ៍របស់ពួកគេក៏បានយកឈ្មោះ «Smiles» ដែលខ្មែរត្រូវតែដណ្តើមយកមកវិញ ដើម្បីកុំឲ្យគេយកទៅថាជារបស់គេ។ លោកសាស្ត្រាចារ្យបញ្ជាក់។

ក្នុងន័យសន្តិភាព ស្នាមញញឹម មិនត្រឹមមានតម្លស ក្នុងការបន្សាបនូវកំហឹងនោះទេ តែវាជាសម្បត្តិវប្បធម៌ដ៏មានតម្លសមួយ ដែលមិនអាចកាត់ថ្លៃបាន។

លោកសាស្ត្រាចារ្យ រស់ ចន្ត្រាបុត្រ បានគាំទ្រនូវការលើកឡើងនេះ ដោយលោកបានមានប្រសាសន៍ថា “ស្នាមញញឹមរបស់ប្រជាជនកម្ពុជា ជាសម្បត្តិវប្បធ៌មមួយ និងមានសក្តានុពលក្នុងការទាក់ទាញទេសចរណ៍ និងទាក់ទាញការវិនិយោគផងដែរ និងផ្តល់ផលប្រយោជន៍ជាច្រើនដល់ប្រជាជាតិនេះ។ លោកបន្តថា “អតីតព្រះបរមរតនកោដិ លោកជោគជ័យក្នុងនយោបាយការបរទេសរបស់លោក ដោយសារស្នាមញញឹមដ៏ស្រស់ស្រាយរបស់លោក អ្នកបានស្គាល់ព្រះអង្គតែងតែលង់នឹងស្នាមញញឹមព្រះអង្គ។

ភស្តុតាងរឹងមាំលើសបីនេះទៀត គឺអ្នកនិពន្ធប្រវត្តិសាស្ត្រដ៏ល្បាញល្បី Charles Meyer ទីប្រឹក្សាអតីតសម្តេចព្រះបរមរតនកោដិ នរោត្តមសីហនុ ក៏បានលើកឡើងពីតម្លស និងអត្តសញ្ញាណរបស់ជនជាតិខ្មែរ ក្នុងសៀវភៅរបស់លោក ក្រោមចំណងជើងថា “ក្រោយស្នាមញញឹមរបស់ខ្មែរ” ផងដែរ។

ឆ្លុះបង្ហាញពីភាពស្រស់បំព្រងអតីតកាល និងកាលប្រវត្តិ ព្រមទាំងប្រវត្តិសាស្ត្រដ៏វែងអន្លាយរបស់កម្ពុជា អ្នកនិពន្ធរូបនេះ បានលើកឡើងនូវអត្តសញ្ញាណមួយក្នុងអត្តសញ្ញាណរបស់ខ្មែរ នៅក្នុងសៀវភៅរបស់លោកថា វាមានលក្ខណៈទន់ភ្លន់មួយពីធម្មជាតិ ក្នុងការទទួលរាក់ទាក់របស់ជនជាតិនេះ។ រឿងព្រេងរបស់ខ្មែរទាំង អស់សម្បូរទៅដោយរឿង របស់អ្នកនាំសាររបស់អាទិទេពទាំងឡាយ ដែលចុះមកល្បងពិសោធន៍សេចក្តីសប្បុរស របស់មនុស្សលោកច្រើនណាស់។

រឿងព្រេងមួយ ក្នុងចំណោមរឿងព្រេងដ៏គួរឲ្យរីករាយបាននិទានថា ព្រះវិស្ណុ ដែលកាឡាខ្លួនមានវ័យក្មេង និងរូបសម្រស់ល្អស្អាតម្នាក់បានដើរគោះទ្វារទាំងអស់ក្នុងភូមិខ្មែរមួយ ដោយគ្មានអ្នកណាម្នាក់ព្រមបើកទ្វារឡើយ មុនពេលបុរសនោះ ត្រូវបានទាក់ទាញដោយសំឡេងច្រៀងមួយ ដែលលាន់លឺចេញពីផ្ទះក្រខ្សត់ជាងគេបំផុត។ យុវកញ្ញាម្នាក់បានទទួលបុរសនោះដោយញញឹមញញែម ហើយបានរៀបចំបាយទឹកឲ្យបុរសនោះហូប និងអនុញ្ញាតឲ្យស្នាក់នៅមួយយប់។

រឿងព្រេងដែលគេមិនសូវបានលឺ ហើយត្រូវបានលោក Charles Meyerយកមកនិទានឡើងវិញនេះ ជាការបង្ហាញពីសម្រស់ ប្រវត្តិសាស្ត្រ និងភាពរុងរឿងរបស់កម្ពុជា ពិសេសស្នាមញញឹមរបស់ប្រជាជាតិនេះ។

ក្នុងជំពូកទី២នៃសៀវភៅ “ក្រោយស្នាមញញឹមរលត់ទៅ” ដដែលនេះលោកCharles Meyer បានលើកឡើងជាទល្ហីករណ៍បន្ត ដោយសង្កត់ធ្ងន់នូវតម្លៃនៃប្រជាជាតិនេះទៀតថា នៅក្នុងសតវត្សរ៍ថ្មី អ្នកដំណើរមកពីបញ្ចឹមប្រទេសបានចារិកក្នុងលកបត្រ ដែលបញ្ជាក់ពីលក្ខណៈរបស់ជនជាតិខ្មែរ ដោយពាក្យសាម ញ្ញៗថា “ជាប្រជាជនដែលមានអារម្មណ៍រីករាយ និងញញឹមញញែម គួរសម ទៀងត្រង់និងរាក់ទាក់ ស្លូតបូត និងស្រលាញ់សន្តិភាព”៕

ទីផ្សារអចលនទ្រព្យងាកមកកាន់ក្រុមអតិថិជនថ្មី

October 11, 2017

0

ដោយ គង់ សូរិយា

ភ្នំពេញ៖ អ្នកវិនិយោគ និងអ្នកជំនាញបានទទួលស្គាល់ស្របគ្នាថា ទីផ្សារលំនៅដ្ឋានបានងាកចេញបន្តិច ពីអចលនទ្រព្យមានតម្លៃខ្ពស់ មកកាន់ទីផ្សារសម្រាប់ប្រជាពលរដ្ឋមានប្រាក់ចំណូលមធ្យម និងចំណូលទាប។

អ្នកនាង អាន សុធីតា នាយិកាក្រុមហ៊ុន CBRE Cambodia បានថ្លែងឲ្យដឹងកាលពីពេលថ្មីៗនេះថា ការលក់លំនៅដ្ឋាន និងខុនដូដែលមានភាពប្រណីត និងមានតម្លៃខ្ពស់ហាក់មានល្បឿនយឺតបន្តិច ប៉ុន្តែលំនៅដ្ឋានដែលមានតម្លៃសមរម្យសម្រាប់ប្រជាជនមានប្រាក់ចំណូលមធ្យម និងចំណូលទាបមានភាពល្អប្រសើរ ដោយសារប្រជាជន ស្ថិតក្នុងក្រុមនេះមានចំនួនច្រើន ធៀបនឹងក្រុមប្រជាជនដែលមានជីវភាពខ្ពស់។

អ្នកនាងបន្តថា “ពេលខ្ញុំជួបអ្នកវិនិយោគ និងពិគ្រោះយោបល់ជាមួយពួកគេ ខ្ញុំតែងប្រាប់ពួកគេគួរផ្តោតការវិនិយោគ ដោយផ្តោតលើអតិថិជនប្រភេទនេះ។ អ្នកនាងបន្ថែមថា “នេះជាមូលដ្ឋានទីផ្សារធំ និងជាទីផ្សារពិតប្រាកដ ហើយការវិនិយោគលើប្រជាជនផ្នែកនេះ នឹងទទួលបានជោគជ័យ។

លោក មាស ង៉ែតវាស នាអគ្គនាយកក្រុមហ៊ុន FURI NAKI ដែលបាននិងកំពុងបោះទុន ១០លានដុល្លារ សាងសង់គំរោង RAVANA ស្ថិតនៅតាមបណ្តោយផ្លូវជាតិលេខ២ ក្បែរផ្លូវ៦០ម៉ែត្របានថ្លែងថា ការសម្រេចចិត្តវិនិយោគលើគំរោងលំនៅដ្ឋានមានតម្លៃទាប ចន្លោះពី ៣៥០០០ ទៅ ៦០០០០ដុល្លារ ដោយសារលោកមើលឃើញកំណើនប្រាក់ចំណូលរបស់ប្រជាពលរដ្ឋ និងកំណើនសេដ្ឋកិច្ចរបស់ប្រទេសនៅតែមានភាពរឹងមាំ។

លោកបន្តថា “ការផ្តោតលើប្រជាជនមានជីវភាពមធ្យម ជារឿងត្រឹមត្រូវដោយសារខ្ញុំគិតថាវាជាទីផ្សារធំ ព្រោះប្រជាជនស្ថិតក្នុងក្រុមនេះមានចំនួនច្រើន ហើយបើពួកគេមានប្រាក់ខែត្រឹម ៥០០ទៅ ៦០០ដុល្លារ ក្នុងមួយខែពួកគេអាចមានលទ្ឋភាពទិញលំនៅដ្ឋានបែបនេះបានហើយ។

ប្រធានសមាគមអ្នកអភិវឌ្ឍន៍លំនៅដ្ឋានកម្ពុជា លោកឧកញ៉ា លី ហួរ បានថ្លែងលើកឡើងស្រដៀងគ្នាថា ការលក់លំនៅដ្ឋានមានតម្លៃខ្ពស់វាហាក់មានភាពយឺតយ៉ាវបន្តិច ប៉ុន្តែលំនៅដ្ឋានដែលមានតម្លៃមធ្យម មានការលក់ដាច់លឿនជាក់ស្តែងគំរោងរបស់លោក ដែលមានផ្ទះជាង២០០ ជាគំរោងផ្តោតលើប្រជាជនមានជីវភាពមធ្យម និងទាបលក់ដាច់អស់ក្នុងរយៈពេលតែមួយខែ សម្រាប់គំរោងថ្មីរបស់លោក ដែលស្ថិតនៅតាមផ្លូវជាតិលេខ៦អា។

លោកបន្តថា “ខ្ញុំគិតថាទីផ្សារបានចាប់ផ្តើមប្រែប្រួលហើយ តែអចលនទ្រ ព្យក្នុងតំលៃនេះ ពិបាករកភាពចំណេញបន្តិច។លោកបន្តថា “ការអភិវឌ្ឍន៍លំនៅដ្ឋានក៏អាស្រ័យតាមទីតាំងផងដែរ ព្រោះទីតាំងស្ថិតនៅតំបន់ពាណិជ្ជកម្មរសរវើក ដីមានតំលៃថ្លៃ ក៏យើងមិនអាចសាងសង់និងលក់ក្នុងតំលៃទាបដែរ ព្រោះមិនអាចរកផលចំណេញបាន”៕

រដ្ឋាភិបាលចំណាយប្រាក់ជាង ១២លានដុល្លារ ជួយស្ត្រីសម្រាលកូនក្នុងមួយឆ្នាំ

October 10, 2017

0

ដោយ គង់ សូរិយា

ភ្នំពេញ៖ រដ្ឋាភិបាលកម្ពុជាគ្រោងចំណាយប្រាក់ ១២,១លានដុល្លារ ដើម្បីជួយស្ត្រីក្នុង វិស័យពីរដែលត្រូវសម្រាលកូន ដើម្បីសម្រួលដល់ជីវភាពរបស់ពួកគេ ដែលជាផ្នែកមួយ នៃសំណាញ់សុវត្ថិភាពសង្គមដែលរដ្ឋាភិបាលកំពុងដាក់ចេញ។

សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានឲ្យដឹងថា គោលនយោនបាយជាតិគាំពារសង្គម ដែលរាជរដ្ឋាភិបាល បានពិនិត្យទៅលើលទ្ធភាពថវិការដ្ឋ ឥឡូវនេះស្ត្រីដែល ស្ថិតនៅក្នុងក្របខណ្ឌរដ្ឋផ្នែកស៊ីវិល និងកងកម្លាំងប្រដាប់អាវុធសរុប ៩២,១៩៨នាក់ ក្នុង នោះរដ្ឋបាលស៊ីវិលមាន ៨២,៥១៧នាក់។

នៅរដ្ឋបាលកណ្តាលមាន ១៦,៥០៣នាក់ និងជំនាញថ្នាក់ក្រោមជាតិ និងមន្ទីរជំនាញនានា ៦៦,៦១៤នាក់ នគរបាល ៣៨៧៥នាក់ និងយោធា ៥៨០៦នាក់។ បើគិតពីលទ្ធភាពនៃអ្នកមានកូន គឺមិនមានកូនទាំងអស់នោះទេ គឺគិតតែក្នុងវ័យដែលត្រូវមានកូនតែប៉ុណ្ណោះ គឺមានប្រមាណ ១០ភាគរយ ហើយសម្រាប់គំរោង ចំណាយរបស់រាជរដ្ឋាភិបាល ចាប់ពីឆ្នាំ២០១៨តទៅ រាជរដ្ឋាភិបាលនឹងប្រើប្រាស់ថវិកា ប្រមាណ ២,១លានដុល្លារ សម្រាប់ចំណាយទៅលើស្ត្រីសម្រាលកូនជាមន្ត្រីរាជការ សម្រាប់ផ្នែកកម្មករទាំងក្នុងប្រព័ន្ធ និងក្រៅប្រព័ន្ធអស់ប្រមាណ១០លានដុល្លារ។

លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សា សេដ្ឋកិច្ចជាតិបានថ្លែង ថា នេះជាការយកចិត្តទុកដាក់របស់រដ្ឋាភិបាល ទៅលើប្រជាពរដ្ឋពិសេសស្ត្រីក្នុងផ្នែកទាំង ពីរនេះ ដែលនេះជាសំណាញ់សុវត្ថិភាពសង្គម ដែលរដ្ឋាភិបាលបាននិងកំពុងយកចិត្ត ទុក ដាក់ ហើយនេះជាគោលនយោបាយដ៏ត្រឹមត្រូវក្នុងការគាំពារសង្គម ប៉ុន្តែការចំណាយនេះ ក៏ជាសម្ពាធរបស់រដ្ឋាភិបាលដែលត្រូវពង្រីកទំហំនៃការចំណាយ។

លោកបណ្ឌិតបានបន្តថា ទោះជាយ៉ាងណាតាមរយៈ ការកែទំរង់ប្រព័ន្ឋពន្ឋដារបស់រដ្ឋាភិបាល រដ្ឋាភិបាលបានប្រ មូលថវិកាបានច្រើនជាងមុន ដើម្បីប្រើប្រាស់ក្នុងការចំណាយលើប្រាក់ខែរបស់មន្ត្រីរាជការ និងការវិនិយោគសាធារណៈផ្សេង។

លោកបន្តថា “នៅពេលប្រទេសមានការរីកចំរើន រដ្ឋាភិបាលត្រូវពង្រីកកិច្ចគាំ ពារសង្គ មពិតជារឿងត្រឹមត្រូវ និងចាំបាច់ ដើម្បីសម្រេចបានសង្គមមួយមានសុខមាលភាពល្អ និង ប្រជាជនរស់នៅប្រកបដោយភាពស៊ីវិល័យ”៕

លោកជំទាវ លឹម ឈីវហូរ ប្រាប់ពីវិធីសន្សំប្រាក់ដើម្បីវិនិយោគ

October 10, 2017

0

ដោយគង់ សូរិយា

ភ្នំពេញ៖ ការធ្វើអ្នកមានមិនមែនជារឿងសាមញ្ញពេកនោះទេ ប៉ុន្តែក៏មិនពិបាករហូតធ្វើមិនបាននោះដែរ ប្រសិនជាយើងចេះវិធីគ្រប់គ្រងសាច់ប្រាក់ និងមានយុទ្ឋសាស្ត្រច្បាស់លាស់។ តើឧកញ៉ាធំៗនៅកម្ពុជា ដែលមានប្រាក់រាប់រយលានដុល្លារ មានវិធីសន្សំប្រាក់យ៉ាងដូចម្តេច? លោកជំទាវ លឹម ឈីវហូរ អគ្គនាយកក្រុមហ៊ុនអ៊ែតវូដ អគ្គនាកតំបន់សេដ្ឋកិច្ចពិសេសភ្នំពេញ និងក្រុមហ៊ុនជាច្រើនទៀតបានប្រាប់វិធីសាស្ត្រ ដើម្បីឲ្យប្រជាពលរដ្ឋអាចសន្សំប្រាក់បានដើម្បីវិនិយោគ។

លោកជំទាវបានមានប្រសាសន៍ឲ្យដឹងនៅពេលថ្មីៗនេះថា គ្មានអ្នកណាម្នាក់ កើតមានមានប្រាក់នោះទេ ដូច្នេះដើម្បីក្លាយជាអ្នកមានបាន គឺមានតែការសន្សំប្រាក់ប៉ុណ្ណោះ ឧទាហរណ៍ ពីរនាក់ប្តីប្រពន្ឋមានប្រាក់ខែចូលគ្នាបាន៥០០ទៅ១០០០ដុល្លារ ពួកគេអាចសន្សំសំចៃ និងដកប្រាក់ខ្លះទិញផ្ទះឬទិញដី ដើម្បីវិនិយោគឬសម្រាប់រស់នៅ ព្រោះសម័យនេះផ្ទះមានលក់បង់រំលោះ ហេតុនេះយើងបានបង់រំលោះបានងាយស្រួល។

លោកជំទាវបានបន្តថា “បើយើងសន្សំប្រាក់ និងបង់រំលោះផ្ទះក្នុងរយៈពេល៥ទៅ១០ឆ្នាំក្រោយ ផ្ទះនឹងឡើងថ្លៃ ពេលនោះយើងអាចមានលុយទាំងដុំកាន់ហើយ។លោកជំទាវបានបន្តថា” ប្អូនៗអាចចាយវាយ និងសន្សំដោយអត់ធ្មត់បន្តិច នឹងទទួលបានលុយហើយ ហើយ១០ឆ្នាំក្រោយ យើងអាចមានលុយដើម្បីវិនិយោគហើយ។

លោកជំទាវបានបន្តថា តាមការសិក្សារបស់ក្រុមហ៊ុនរបស់លោកជំទាវបានរកឃើញថា វិស័យសំណង់ និងអចលនទ្រព្យនៅបន្តរីកចំរើនរយៈពេលវែងបន្ថែមទៀត ដោយសារការរីកចំរើនសេដ្ឋកិច្ចសង្គម កំណើប្រជាសាស្ត្រ ហើយអ្នកវិនិយោកអន្តរជាតិជាច្រើន បាននិងកំពុងចូលមកកាន់ទីផ្សារកម្ពុជាកាន់តែច្រើននាពេលខាងមុខ ពិសេសអ្នកវិនិយោគមកពីប្រទេសចិន៕

រដ្ឋាភិបាលនឹងបង្កើតកន្លែងធ្វើលិខិតឆ្លងដែនពីរកន្លែងទៀត

October 10, 2017

0

ដោយ គង់ សូរិយា
ភ្នំពេញ៖ រដ្ឋាភិបាលកម្ពុជា កំពុងតែធ្វើការសិក្សា ក្នុងការរៀបចំកន្លែងធ្វើលិខិតឆ្លងដែន២កន្លែង ក្នុងខេត្តបាត់ដំបង និងស្ថិតនៅក្រុងប៉ោយប៉ែត ខេត្តបន្ទាយមានជ័យ។

ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សម្តេចក្រឡាហោម ស ខេង បានថ្លែងក្នុងសិក្ខាសិលា ពិគ្រោះយោបល់ថ្នាក់ជាតិ កតិកាសញ្ញាជាសកលស្ដីពីទេសន្តរប្រវេសន៍ប្រកបដោយសុវត្ថិភាព នៅព្រឹកថ្ងៃទី១០តុលានេះថា ក្នុងគោលដៅកាត់់បន្ថយចំនួនពលករខុសច្បាប់ទៅបរទេស ជាពិសេសប្រទេសថៃ និងជួយសម្រួលភាពងាយស្រួលដល់ប្រជាជននោះ កម្ពុជាកំពុងតែសិក្សា បង្កើតកន្លែងធ្វើលិខិតឆ្លងដែន និងទិដ្ឋិការ ក្នុងខេត្តបាត់ដំបង និងក្រុងប៉ោយប៉ែតខេត្តបន្ទាយមានជ័យ ភាគពាយ័ព្យនៃប្រទេសកម្ពុជា។

ក្នុងគោលដៅកាត់បន្ថយពលករចំណាកស្រុកខុសច្បាប់ សម្តេចក្រឡាហោមស ខេង នឹងជំរុញឲ្យមានការបិទច្រករបៀងតាមព្រំដែនផងដែរ ព្រោះសម្ដេចបានចាត់ទុកថា ច្រករបៀងនេះជាច្រកវាងរបស់ប្រជាជន ដែលគ្មានឯកសារផ្លូវច្បាប់ត្រឹមត្រូវ ដើម្បីទៅធ្វើការនៅបរទេស ព្រោះច្រករបៀងនេះគ្មានការពិនិត្យបានត្រឹមត្រូវនោះទេ។ សម្ដេចបញ្ជាក់ថា “ការបិទច្រករបៀងនានា នឹងជួយកាត់បន្ថយការឆ្លងដែនទៅធ្វើការដោយខុសច្បាប់ ដោយប្រជាជនទាំងអស់ ត្រូវតែឆ្លងកាត់តាមច្រកព្រំដែនអន្តរជាតិ ដោយមានឯកសារផ្លូវច្បាប់ត្រឹមត្រូវ។

ដើម្បីទប់ពីបញ្ហាការឆ្លងដែនទៅធ្វើការដោយខុសច្បាប់នេះ ត្រូវតែមានការសហការចូលរួម ពីសំណាក់មន្ត្រីពាក់ព័ន្ធទាំងអស់ទើបអាចធ្វើទៅរួច ព្រោះបច្ចុប្បន្នជាមធ្យមអាជ្ញាធរប្រទេសថៃ ចាប់បញ្ជូនពលករខ្មែរខុសច្បាប់ ប្រមាណជា១០០នាក់ក្នុងមួយថ្ងៃ។នេះបើតាមការបញ្ជាក់របស់សម្តេចស ខេង៕