ភ្នំពេញ៖ ការសាងសង់វិមានឈ្នះ ឈ្នះ បានបញ្ចប់និងត្រៀមសម្ភោធនៅដំណាច់ឆ្នាំនេះ ជាសំណង់ប្រវត្តិសាស្ត្រមួយ ដែលវាជានិម្មិតរូបបញ្ចប់នូវយុគសម័យដ៏ខ្មៅងងឹតរបស់កម្ពុជា។
ការបញ្ចប់នូវទឹកភ្នែក គំនរឆ្អឹងរាប់លានរាយប៉ាយទូទាំងប្រទេស ជារឿងរីករាយមួយ ដើម្បីនាំមកនូវសន្តិភាពសម្រាប់ប្រជាជាតិកម្ពុជា។
វិមានឈ្នះ ឈ្នះ
វិមានដែលតំណាងឲ្យសុខសន្តិភាព និងការបញ្ចប់សង្គ្រាមនៅកម្ពុជាបានសាងសង់លើផ្ទៃដី១៥ហិកតា កំពស់៤៥ម៉ែត្រ ដែលជាការរំលឹកទៅដល់ថ្ងៃទី២៩ ខែ ធ្នូ ឆ្នាំ១៩៩៨កម្ពុជាបញ្ចប់សង្គ្រាមស៊ីវិល និងទទួលបានសន្តិភាព ទាំងស្រុង។
វិមាននេះបានរៀបចំចម្លាក់ស្តីពីការចងចាំ ឆ្ពោះទៅការផ្តួលរំលំរបបប៉ុល ពតនិងចម្លាក់ស្តីពីដំណើរជាតិកម្ពុជា នាទសវត្សរ៍ឆ្នាំ១៩៨០ និងដើមទសវត្សរ៍ទី៩០ ដាក់បង្ហាញនៅជាន់ផ្ទាល់ដីខាងក្រៅវិមាន។
គោលបំណងនៃការកសាងវិមានឈ្នះ ឈ្នះ
យោងតាមឯកសាររបស់ក្រសួងការពារជាតិ និងអ្នកដឹកនាំកសាងវិមាននេះបានឲ្យដឹងថា ការកសាងវិមានឈ្នះ ឈ្នះមានគោលបំណងចម្បងសំខាន់ៗចំនួនបី ដូចជា ទី១ គឺជាការរំឭកដឹងគុណនិងចង់បង្ហាញនូវ គុណតម្លៃនៃនយោបាយឈ្នះ ឈ្នះ ថាតើអ្វីទៅជានយោបាយឈ្នះ ឈ្នះ? តើនយោបាយឈ្នះ ឈ្នះ មានការអនុវត្ដន៍និងដំណើរការបែបណា? នៅទីណា? អ្នកណាខ្លះ? មានបញ្ហាប្រឈម ពុះពារក្នុងការឆ្លងកាត់ នៅក្នុងដំណាក់កាលនៃការដាក់ចេញសម្រាប់ការអនុវត្តន៍នយោបាយឈ្នះ ឈ្នះតាមរបៀបណា? តើការបានដាក់ចេញនូវគោលគំនិតនយោបាយឈ្នះ ឈ្នះ ដោយសម្ដេចតេជោ ហ៊ុន សែន បានដោះស្រាយ ពុះពារ ដឹកនាំក្នុងដំណាក់កាលនីមួយៗបែបណា? ពីព្រោះនេះមិនមែនជាសុបិន្ដ ស្រមៃ និងកាន់តែមិនមែនជាការជួយជ្រោមជ្រែងឬឧបត្ថម្ភណាមួយពីបរទេស ក្រៅពីជាតិខ្មែរខ្លួនឯងគឺខុសអំពី ក្នុងអំឡុងកាលដែលមានបេសកកម្មអ៊ុនតាក់កន្លងមកនៅក្នុងកម្ពុជារបស់យើង ។
ទី២ ក្រៅពីការសម្ដែងនូវភាពកតញ្ញូ ការដឹងរំឭកគុណតម្លៃនៃនយោបាយឈ្នះ ឈ្នះ និងអ្នកដឹកនាំដែលបានបង្កើត គឺជាការរៀបចំទីតាំងដែលបង្ហាញនូវសមិទ្ធផលទទួលដោយសន្ដិភាព និងការអភិវឌ្ឍន៍ក្នុងមាតុភូមិកម្ពុជារបស់យើង ជាពិសេសបំផុតក្នុងរយៈពេលតែ២០ឆ្នាំក្រោយនយោបាយឈ្នះ ឈ្នះ បានបញ្ចប់សង្គ្រាមទាំងស្រុងនិងបានទទួលសន្ដិភាព។ ន័យនេះចង់បញ្ជាក់ថា សមិទ្ធផលនិងការអភិវឌ្ឍន៍ទាំងអស់បានមកពីណា? ចេញមកពីនរណាឲ្យពិតប្រាកដ? លទ្ធផលដែលកំពុងមានជាក់ស្ដែងនេះ គឺជាតឹកតាង មិនអាចនរណាម្នាក់មិនទទួលស្គាល់ ឬបំភ្លៃជាដាច់ខាតនូវសច្ចភាពនៃការវិវឌ្ឍន៍បែបនេះ។
ដូច្នេះក៏មានន័យអំពីភាពសុខដុមរមណីយកម្ម របស់សង្គមកម្ពុជាក្នុងដំណាក់កាលនេះនិងជាដំណាក់កាលដែលយើងឲ្យឈ្នោះថា សម័យកាលតេជោសែនក៏ថាបាន ហើយភស្ដុតាងទាំងអស់នេះតើមានពិតឬទេ? វិស័យនានាដែលមាន តើពិតប្រាកដឬទេ? ទាំងវិស័យសេដ្ឋកិច្ច សង្គម កិច្ចការបរទេស ការពារជាតិ អប់រំ វប្បធម៌ កសិកម្ម សំណង់ កីឡា…ន័យចំណុចទី២នេះគឺសំដៅទៅលើការបង្ហាញនូវសុខដុមភាពនៃសង្គមកម្ពុជាដោយលទ្ធផលនៃនយោបាយឈ្នះ ឈ្នះ។
ទី៣ គោលបំណងដ៏សំខាន់គឺជាការចែករំលែក ការផ្ដល់នូវការសិក្សាជាទីកន្លែងមួយ ដែលអាចធ្វើជាមជ្ឈមណ្ឌលស្រាវជ្រាវឈ្វេងយល់ និងខិតខំបង្កើតនូវចក្ខុវិស័យក្នុងការបន្ដស្ថានភាពដែលមានបែបនេះតទៅអនាគត។ ដូច្នេះដើម្បីចែករំលែកធ្វើជាមូលដ្ឋានឲ្យការងាយយល់ ងាយចាំ ងាយឃើញ ងាយធ្វើការវិភាគនិងក្នុងការចែករំលែកបន្ដគឺជាការរៀបចំ ស្ថាបនាកសាងរូបចម្លាក់ និមិត្តសញ្ញា ស្ថាបត្យកម្ម ទម្រង់រូបរាងនិងទីកន្លែងទាំងអស់នេះឲ្យមានភាពសាមញ្ញ និងមានភាពទាក់ទាញនិងឲ្យមានស្ថានភាពដែលកន្ទ្រាក់អារម្មណ៍ គំនិត ជាពិសេសនៅក្នុងសម័យឌីជីថល ឬសម័យដែលត្រូវការពេលវេលាខ្លីសម្រាប់បង្កើនប្រសិទ្ធិភាពការងារនេះ។
ដូចនេះការរៀបចំភូមិសាស្ដ្រនៅទីនេះ ទោះបីមានទំហំតូចល្មម ប៉ុន្ដែមានទីកន្លែងសម្រាប់បង្ហាញអំពីសុខដុមសង្គម ទីកន្លែងដែលមានអាគារនិងតម្កល់ នូវតឹកតាងពិតប្រាកដ ជាសក្ខីកម្មនៃអ្វីដែលធ្លាប់ប្រើប្រាស់ ធ្លាប់មាន ទាំងរូបភាពនិងគំនូរ រូបថត សម្ភារៈរហូត ដល់គ្រឿងយោធបករណ៍នានានិងមានទីកន្លែងគួបផ្សំទៅដោយធម្មជាតិដែលជាអត្តសញ្ញាណទាំងដើមឈើ ដើមផ្កានិងការបំបែកឯកត្ដកម្មកម្ពុជាក្នុងពិភពលោក ដូចជា ក្រម៉ាវែងជាងគេ ទូកវែងជាងគេ ការរាំម៉ាឌីស្សុន ច្រើនជាងគេ នំអន្សមដែលធំជាងគេ ។ល។ នេះគឺជាគោលបំណងសាមញ្ញនៃការកសាងវិមានឈ្នះ ឈ្នះ ប៉ុន្ដែចេញពីភាពសាមញ្ញទាំងបីនេះ ពិតណាស់អាចផ្ដល់ឲ្យមនុស្សគ្រប់មជ្ឈដ្ឋានទាំងអ្នកចេះដឹងជ្រៅជ្រះ អ្នកប្រវត្តិសាស្ដ្រ ប្រជាជនសាមញ្ញ ពាណិជ្ជករ ទេសចរ ក្នុងនិងក្រៅប្រទេសនិងជាតិសាសន៍ដ៏ទៃផងដែរ ។ យើងមានទីកន្លែងមួយដែលក្លាយជាអត្ដសញ្ញាណនៃប្រវត្តិសាស្ដ្រស្ដីអំពី ការបញ្ចប់សង្គ្រាមទទួលបានសន្ដិភាព សម្រេចបាននូវសមិទ្ធផលអភិវឌ្ឍន៍សង្គម និងអាចនិយាយថា មិនធ្លាប់មាននៅទីកន្លែងបែបនេះ។
យើងមានអាគារធំៗទំនើប យើងមានគ្រឹះស្ថាននានា និងទីកន្លែងដែលបំពាក់ទៅដោយភាពស្រស់បំព្រងឆើតឆាយ ប៉ុន្ដែនៅទីនេះពិតជាទីឋានមួយដែលមានលក្ខណៈខុសពីកន្លែងទាំងអស់នេះ ហើយជាទីបំពេញនៃចន្លោះប្រហោងមួយនៃប្រវត្តិសាស្ដ្រដើម្បីឲ្យកាន់តែជាក់ស្ដែងឡើង និងមានភស្ដុតាងពិតប្រាកដសម្រាប់មនុស្សជាតិទាំង ក្នុងនិងក្រៅប្រទេសតទៅអនាគតផងដែរ។ ច្បាស់ណាស់ថា មហិច្ចតាដ៏ធំចេញពីភាពសាមញ្ញនេះពិតជាមិនទាន់គ្រប់គ្រាន់ ដូច្នេះព្រឹត្ដិការណ៍ថ្ងៃទី២៩ ដែលជាទិវាខួប២០ឆ្នាំនៃទិវានយោបាយ ឈ្នះ ឈ្នះ និងការសម្ពោធវិមានឈ្នះ ឈ្នះ ក្នុងដំណាក់កាលមួយនេះ គឺនឹងបើកសគរាជថ្មី ទំព័រប្រវត្តិសាស្ដ្រថ្មីសម្រាប់ជាតិយើង សម្រាប់មនុស្សគ្រប់គ្នាគ្រប់ទីកន្លែងទទួលបន្ថែមទៀតជាមួយសមិទ្ធផលដ៏ច្រើនដែលយើងបានទទួលរួចមកហើយ។
សូមចូលរួមចំណែកដើម្បីកសាងបន្ដទៀត និងអធិដ្ឋានរួមគ្នាឲ្យសន្ដិភាពនៅលើទឹកដីរបស់យើងបានឋិតឋេរចីរកាល ជាមួយអត្ដសញ្ញាណ និងព្រលឹងនយោបាយឈ្នះ ឈ្នះដែលមាននេះ៕
