ដោយ ស៊ីវ ម៉េង

ភ្នំពេញ៖ ការមានលុយវិនិយោគមិនប្រាកដថា ទទួលបានផលចំណេញនោះទេ ប្រសិនជាការវិនិយោគនោះធ្វើឡើងដោយប្រថុយប្រថាន ហេតុនេះទាមទារឲ្យអ្នកវិនិយោគសិក្សាស៊ីជម្រៅ ទៅលើផ្នែកដែលខ្លួនចង់វិនិយោគសិន ទើបអាចបញ្ចៀសបាននូវហានិភ័យ។

ទាក់ទងនឹងបញ្ហានេះគេហទំព័រ Propertyarea.asia សូមលើកយកបទពិសោធន៍​របស់អ្នកជំនាញដើម្បីបង្ហាញនូវបទពិសោធន៍ និងឳកាសដើម្បីធ្វើឲ្យអ្នកវិនិយោគទទួ​ល​បានជោគជ័យ។

អ្នកនាងជិន ចាន់ឡែននាយិកាប្រតិបត្តិនៃក្រុមហ៊ុន FURI Real Estate បានមានប្រសាសន៍ឲ្យដឹងកាលពីចុងសប្តាហ៍មុនថា ការវិនិយោគអាចទទួលបានផលចំណេញ និងខាតជារឿងធម្មតា ហេតុនេះអ្នកខ្លះចង់វិនិយោគតែពួកគេមិនហ៊ានវិនិយោគ ដោយ​សារគិតថាទិញឬសាងសង់មិនចំណេញ មិនទាន់ទាញអតិថិជនជាដើម។ អ្វីពិសេ​សគឺមិនធ្វើឲ្យគំរោងរបស់ខ្លួនមិនឡើងថ្លៃ ឬឡើងថ្លៃយឺត។ ប៉ុន្តែដើម្បីបញ្ចៀសបញ្ហានេះបាន​អ្នកវិនិយោគគួរមើលទៅលើគំរោង ដែលខ្លួនបានទិញ​ថាមានការបំពាក់សម្ភារៈបរិក្ខា មានទីតាំងល្អឬទេ មានចំណតយានយន្តគ្រប់គ្រាន់ឬទេ?។

អ្នកមានបន្តថា “ខុនដូឬអាគារការិយាល័យ ដែលមានទីតាំងល្អ មានការបំពាក់បរិ ក្ខា​សមស្របតាមស្តង់ដាអន្តរជាតិ និងមានសេវាកម្មចម្រុះដូចជា អាគារ The PeAk គឺអច​លនទ្រព្យនៅក្នុងគំរោងនោះនឹង​ឡើងថ្លៃលឿន”។ អ្នកនាងបន្តថា “អ្នកខ្លះសាងសង់ការិ​យាល័យជួល តែមិនទាក់ទាញក្រុមហ៊ុនជួល គឺដោយសារការឌីសាញគំរោងមិនទាន់ទា​ញ មិនមានចំណតឡានសមស្រប នឹងធ្វើឲ្យការវិនិយោគនោះបរាជ័យ”។

អ្នកនាងជិន ចាន់ឡែនបានបន្តថា អ្នកខ្លះមិនហ៊ានទិញខុនដូនៅតំបន់កោះពេជ្រ ដោយគិតថាថ្លៃ និងបែរជាទៅទិញនៅតំបន់ទួលគោក។ យើងអាចសួរត្រលប់មកវិញថា តើតំបន់ទួលគោកមានជនបរទេសរស់នៅច្រើនឬទេ ការពិតតំបន់ទួលគោកមិនទាន់មា​ន​ជនបរទេសរស់នៅច្រើនទេ ហេតុនេះការទិញខុនដូនៅតំបន់នោះ អាចជួលមិនបាន និងមិនឡើងថ្លៃ។ លើសពីនេះអ្នកវិនិយោគក៏គួរសិក្សា ពីទំហំយូនីតខុនដូរបស់ខ្លួនមានទំ​ហំសមស្របឬទេ? មានស្តង់ដាឬទេផងដែរ។

អ្នកនាងបន្តថា អ្នកវិនិយោគក៏ត្រូវធ្វើការព្យាករណ៍ផងដែរថា តើមួយឆ្នាំឬពីរឆ្នាំយើ​ងអាចចំណេញបានប៉ុន្មានក្នុងមួយឆ្នាំ? ដូចជា គំរោង The PeAk ដែលមានសេវាកម្មចម្រុះទាំងផ្សារទំនើប ការិយាល័យកម្រិត A Plus, សណ្ឋាគារអន្តរជាតិលំដាប់ផ្កាយប្រាំ Shangri_La ជាដើម។

អ្នកនាងបន្តថា “អ្នកវិនិយោគក៏គួរសិក្សាពីទីតាំងរបស់ខ្លួនថាគួរវិនិ​យោគអ្វី ដែលស័ក្តិសមសម្រាប់ទីតាំងរបស់ខ្លួន មិនមែនឃើញគេសាងសង់ខុនដូ យើងសាងសង់ខុនដូ ឬគេសាងសង់អាគារការិយាល័យ យើងសាងសង់តាមគេ ខណៈទីតាំងរបស់យើងមិនមាន​តម្រូវការផ្នែកនោះនៅលើទីផ្សារនោះទេ៕

ដោយវត្ថា

ភ្នំពេញ៖ តាមរយៈការប្រៀបធៀប និងការចុះផ្សាយរបស់ គេហទំព័រអាគារខ្ពស់លើពិភពលោក SkyscraperCity.com បានអោយដឹងថា អគារភ្លោះមជ្ឈមណ្ឌលពាណិជ្ជកម្ម Thai Boon Roong របស់ប្រទេសកម្ពុជា ជាប់ជាអគារខ្ពស់នៅក្នុងតំបន់អាស៊ានក្នុងចំណោ​មអគារខ្ពស់កប់ពពកចំនួន៦ផ្សេងទៀត មកពីប្រទេសចំនួន៦នៅក្នុងតំបន់អាស៊ាន ហើយអគារទាំងនេះ នឹងក្លាយជាអគារខ្ពស់កប់ពពកនៅក្នុងតំបន់អាស៊ាន។

ទី ១ អគារ KL 118 ស្ថិតនៅក្នុងទីក្រុង Kuala Lumpure ប្រទេសម៉ាឡេស៊ី ដែលមានកំពស់រហូតដល់៦៤៤ម៉ែត្រ។ អគារនេះជាកម្មសិទ្ធិរបស់ក្រុមហ៊ុន Eduardo Segundo Hemadez ដែលកំពុងសាងសង់។ អគារនេះ នៅពេលសាងសង់បញ្ចប់ នឹងក្លាយជាអគារប្រើប្រាស់ចម្រុះ ។ តាមគម្រោងអគារនេះ នឹងសាងសង់បញ្ចប់នៅក្នុងឆ្នាំ ២០២០ខាងមុខ។

ទី២ អគារ G Land Super Tower ស្ថិតនៅក្នុងទីក្រុងបាងកក ប្រទេសថៃ ដែលទើបត្រូវបានស្នើរសុំសាងសង់ ដែមានកំពស់រហូតដល់៦១៥ម៉ែត្រ ជាកម្មសិទ្ធិរបស់ក្រុមហ៊ុន One by One ។ នៅពេលសាងសង់បញ្ចប់អគារនេះ ត្រូវបានគេប្រើប្រាស់រួម មានទាំងការិយាល័យធ្វើការ ផ្សារទំនើប និង សណ្ឋាគារជាដើម។

ទី៣ អាគារ Signature Tower មានកំពស់៥៩៣ស្ថិតនៅក្នុងទីក្រុង Jakarta ប្រទេសឥណ្ឌូនេស៊ី ដែលជាកម្មសិទ្ធិរបស់ក្រុមហ៊ុន Killer Zavatar ត្រូវបានស្នើរសុំសាងសង់រួចហើយ អាចគ្រោងនឹងសាងសង់នៅនៅក្នុងឆ្នាំ២០២០ខាងមុខនេះ។ នៅពេលសាងសង់បញ្ចប់អគារនេះ នឹងក្លាយជាអគារប្រើប្រាស់ចម្រុះ មានទាំងការិយាល័យធ្វើការ ផ្សារទំនើប សណ្ឋាគារ និង កន្លែងកម្សាន្តផ្សេងៗទៀត។

ទី៤ អគារ Thai Boon Roong Commercial Centre Twin Towers មានកម្ពស់ ៥៦១ ម៉ែត្រស្ថិតនៅក្នុងទីក្រុងភ្នំពេញប្រទេសកម្ពុជា កំពុងស្ថិតនៅក្នុងដំនើរការសាងសង់។ នៅពេលសាងសង់បញ្ចប់អគារនេះ នឹងក្លាយជាអគារប្រើប្រាសរួម មានទាំងការិយា​ល័យធ្វើការ ផ្សារទំនើប សណ្ឋាគារ និង កន្លែងកម្សាន្តផ្សេងៗទៀត។

ទី៥ អគារ Empire City Tower មានកំពស់៤៦២ ម៉ែត្រ ស្ថិតនៅក្នុងទីក្រុងហូរជីមីញប្រទេសវៀតណាមស្ថិតនៅក្នុងការស្នើរសុំការសាងសង់។ តាមគម្រោងអគារនេះ នឹងសាងសង់បញ្ចប់នៅក្នុងឆ្នាំ ២០២២ ។ តែយ៉ាងណាក៏ដោយ គេមិនទាន់ដឹងទេ អគារនេះ នៅពេលសាងសង់បញ្ចប់នឹងប្រើប្រាស់អ្វីនោះទេ។

ទី៦ អាគារ Vietinbank Tower 1 មានកំពស់ ៣៦៣ ម៉ែត្រស្ថិតនៅក្នុងទីក្រុងហាន់ណូយ ប្រទេសវៀតណាម។ អគារនេះត្រូវបានគេកំពុងសាងសង់ ហើយគ្រោងនឹងបញ្ចប់នៅក្នុងឆ្នាំ ២០១៩ ខាងមុខនេះ ។ តាមគម្រោង នៅពេលសាងសង់បញ្ចប់អគារនេះនឹងត្រូវប្រើប្រាស់ជាការិល័យធ្វើការ៕

ដោយ ដែន ចែងចាំង

ភ្នំពេញ៖ វគ្គបណ្តុះបណ្តាលពិសេសមួយនឹងត្រូវរៀបចំឡើង ដើម្បីផ្តល់ចំណេះដឹងទាក់ទងការសរសេរព៌តមានទិញ លក់ ជួលអចលនទ្រព្យ លើបណ្តាញទំនាក់ទំនងសង្គមឲ្យទទួលបានការចាប់អារម្មណ៍ និងអាចលក់អចលនទ្រព្យបានទទួលជោគជ័យ។

លោក យិន លាងគង់ ហៅ ស៊ីវ ម៉េង ស្ថាបនិក និងជាអគ្គនាយកនៃគេហទំព័រ Propertyarea.asia ដែលជាគេហទំព័រឈានមុខគេ ផ្នែកព៌តមានអចលនទ្រព្យនិង​សេដ្ឋ​កិច្ច នឹងបង្ហា​ញ​ជូនបទពទពិសោធន៍និងគន្លឹះជោគជ័យ ពីរបៀបសរសេអត្ថបទសម្រាប់គេហទំព័រ ឬលើបណ្តាញទំនាក់ទំនងសង្គមនានា ខណៈបច្ចុប្បន្នសកម្មភាពលក់អចលនទ្រព្យតាមបណ្តាញ ទំនាក់ទំនងសង្គមកំពុងមានការពេញនិយកយ៉ាងខ្លាំង។

លោកបានបន្តថា ក្រុមហ៊ុនលក់ដីឡូត៍ និងក្រុមហ៊ុនវិនិយោគលើវិស័យអចលនទ្រព្យជាទូទៅបានបង្កើតគេហទំព័ររបស់ខ្លួន លើបណ្តាញទំនាក់ទំនងសង្គម ដើម្បីលក់អចលនទ្រព្យរបស់ខ្លួន ប៉ុន្តែវិធីសាស្រ្តនៃការសរសេរ ដើម្បីបង្កើតឲ្យមានការចាប់អារម្ម​ណ៍ពីអតិថិជន និងអ្នកវិនិយោគបន្តហាក់នៅមានកម្រិត។ ពួកគេសរសេរព៌តមានបែបឆៅៗ សរសេ​រ​ព៌តមានមិនស៊ីជម្រៅ ទើបមិនសូវមានការចាប់អារម្មណ៍ ដោយសារពួកគេភាគច្រើនសរសេរតាមគ្នា និងខ្វះគំនិតច្នៃប្រឌិត។

ការសិក្សាតូចមួយធ្វើឡើង ដោយគេហទំព័រ Propertyarea.aisa ជាមួយអ្នកពាក់ព័ន្ឋក្នុងវិស័យនេះចំនួន២០០នាក់បានរកឃើញថា ៧០ភាគរយនៃអ្នកឆ្លើយតប ពួកគេបាននិយាយថា អ្នកលក់អចលនទ្រព្យផ្សេងៗ ពិសេសអ្នកលក់ដីឡូត៍បានសរសេរព៌តមានដដែលៗ និងគួរឲ្យធុញទ្រាន់ ជាជាងបង្ហាញការទទួលខុសត្រូវលើគំរោងរបស់ពួកគេ នាពេលអនាគត និងនរន្តរភាពរបស់អ្នកវិនិយោគលើគំរោងរបស់ខ្លួន។ ចំណែកអ្នកចូលរួមឆ្លើយសំណួរ១៧ភាគរយទៀតថា ពេញចិត្ត និង១៣ភាគរយហាក់អល់អែក។

លោកយិន លាងគង់បានបន្តថា “យើងបានដឹងពីចំណុចខ្វះខាតនេះ ហើយយើងនឹងបំពេញចន្លោះប្រហោងនេះ ដើម្បីអាចឲ្យលោកអ្នកផ្តល់ព៌ត​មានបានត្រឹមត្រូវ និងទាក់ទាញការចាប់អារម្មណ៍ និងដឹងពីនិន្នាការទីផ្សារ និងចំណង់ចំណូលចិត្តរបស់អតិថិជន”។

លោកបន្តថា ការសរសរព៌តមានក៏មិនពិបាកទេ អ្នកណាក៏អាចធ្វើបានដែរ តែការសរសេរព៌តមានឲ្យទទួលបានការចាប់អារម្មណ៍ រកបានមុំរឿងបានល្អ និងចាប់អារម្មណ៍ពិតជាមិនមែនជារឿងងាយស្រួលនោះទេ។លោកបន្តថា ហេតុនេះវគ្គបណ្តុះបណ្តាលនេះ យើងមិនត្រឹមតែផ្តល់នូវមូលដ្ឋានគ្រឹះនៃការសរសេរ ការវិភាគពីព៌តមានឲ្យបានគ្រប់ជ្រុងជ្រោយ និងវិធីសាស្រ្តនៃការសរសរ ដើម្បីលក់អចលនទ្រព្យឆាប់​ដាច់ប៉ុណ្ណោះទេ តែយើងនឹងផ្តល់គុណតម្លៃជាច្រើនទៀត ដើម្បីធានាថាព៌តមានទាក់ទងនឹងគំរោងអភិ​វឌ្ឍន៍នានា ដែលលោកអ្នកផ្សព្វផ្សាយចេញ ទទួលបានការចាប់អារម្មណ៍ពីអ្នកវិនិយោគជាតិ និងអន្តរជាតិ។

ក្នុងបទពិសោធន៍ក្នុងនាមជាអ្នកសារព៌តមានអាជីពរយៈពេល២០ឆ្នាំ លោកយិន លាងគង់ នឹងបង្ហាញនូវចំណេះដឹង និងឳកាសនៃការចែករំលែកនូវវិធីសាស្រ្តសរសេរ ការបង្កើតគំនិតច្នៃប្រឌិត ការវិភាគ និងចក្ខុវិស័យនាពេលអនាគត នៃវិស័យអចលនទ្រព្យសម្រាប់រយៈពេលវែងខាងមុខផងដែរ។

អ្នកចាប់អារម្មណ៍ចុះឈ្មោះចូលសិក្សាលើជំនាញនេះ អាចទាក់ទងមកលេខទូរស័ព្ទ០៨៦ ៤៨​ ៥៥ ​៦៦ ០៩៥ ៩៤៩៦៩៥។ វគ្គបណ្តុះបណ្តាលនេះនឹងធ្វើឡើងព្រឹកថ្ងៃអាទិត្យទី២៣ កញ្ញាខាងមុខនេះ ដោយការបណ្តុះបណ្តាលនឹងចាប់ផ្តើមពីម៉ោង៨ព្រឹក​ដល់ម៉ោង១២ថ្ងៃត្រង់ នៅភោជនីយដ្ឋានផាកកាហ្វេ ទល់មុខមន្ទីរពេទ្យកាល់ម៉ែត។

ជាមួយគ្នានេះ អគ្គនាយកក្រុមហ៊ុនមយូរ៉ាអចលនទ្រព្យលោកវេង ស៊ីគួរក៏នឹងចូលរួមបង្ហាញបទពិសោធន៍ និងឳកាសវិនិយោគលើវិស័យអចលនទ្រព្យ ដើម្បីបញ្ចៀសបាន​នូវហានិភ័យ និងទទួលបានផលចំណេញផងដែរ៕

ដោយ ស៊ីវ ម៉េង

ភ្នំពេញ៖ ស្របពេលគំរោងអភិវឌ្ឍន៍ធំៗជាច្រើនបានបង្ហាញជាបន្តបន្ទាប់ អ្នកជំនា​ញ​ផ្នែកអចលនទ្រព្យបានលើកឡើងថា បច្ចុប្បន្នមានការបំពុលព៌តមានជាច្រើន ពីអ្នកវិនិយោគមួយចំនួន ដើម្បីលក់គំរោងរបស់ពួកគេឆាប់ដាច់។

អ្នកវិភាគអចលនទ្រព្យ និងសេដ្ឋកិច្ចសង្គម លោក ង៉ែត ជូ បានថ្លែងឲ្យដឹងកាលពីពេលថ្មីៗនេះថា នៅក្នុងវិស័យនេះមានការបំពុលព៌តមានច្រើនទាក់ទងនឹងការបង្ហាញ ឬលើកឡើងពីគំរោងអភិវឌ្ឍន៍នានា តាមរយៈអ្នកវិនិយោគមួយចំនួននៅក្នុងវិស័យនេះដើម្បី ទាក់ទាញអតិថិជន ប្រយោជន៍ដើម្បីធ្វើឲ្យពួកគេលក់គំរោងរបស់ពួកគេឆាប់ដាច់។លោកបន្តថា “ហេតុនេះមុនសម្រេចចិត្តវិនិយោគ ខ្ញុំសុំឲ្យប្រជាពលរដ្ឋប្រមូលព៌តមានឲ្យបានច្បាស់លាស់ និងគ្រប់ជ្រុងជ្រោយជាមុនសិន មុននឹងធ្វើការសម្រេចចិត្តវិនិយោគដើម្បីកាត់បន្ថយហានិភ័យ”។

លោកបន្តថា “នៅពេលយើងមិនសូវស្វែងយល់សិក្សា​រៀនសូត្រ និងតាមដានព៌តមានជាក់លាក់ នឹងធ្វើឲ្យយើងវិនិយោគរបស់យើងមាន​ហានិភ័យខ្ពស់”។

លោកង៉ែត ជូបានបន្តថា ការសិក្សារៀនសូត្រ និងប្រមូលព៌តមានបានត្រឹមត្រូវ ជាមូលដ្ឋានដ៏សំខាន់ សម្រាប់ធ្វើការសម្រេចចិត្តបានត្រឹមត្រូវ និងអាចកាត់បន្ថយឬបញ្ចៀស​បាននូវហានិភ័យ ជាជាងយើងវិនិយោគបែបប្រថុយប្រថាន ព្រោះការវិនិយោគពឹងលើព្រេងសំណាង មិនមែនជាជម្រើសរបស់អ្នកវិនិយោគឆ្លាតវៃនោះឡើយ៕

ដោយ វុត្ថា

ភ្នំពេញ៖ មន្ត្រី​ជាន់ខ្ពស់នៃក្រសួងរៀបចំដែនដី​ នគរូបនីយកម្ម ​និង​សំណង់​បានអោយដឹងថារយៈពេល​៧​ខែឆ្នាំ​២០១៨នេះ មាន​ក្រុមហ៊ុន​ប្រកប​អាជីវកម្ម​សាងសង់​ និង​សិក្សា​​គម្រោង​ប្លង់​ស្ថាបត្យកម្ម​ បាន​មក​ចុះបញ្ជី​នៅ​ក្រសួង​រៀបចំ​ដែនដី​មាន​ចំនួន​២២២៨ ខណៈ​ក្រុមហ៊ុន​មាន​សុពលភាព​ចំនួន​១០៧២​ និង​មាន​កំណើន​ដល់​១៣១,៥៩%​បើ​ធៀប​ទៅ​នឹង​ឆ្នាំ​២០១៧​។

លោក ​ភឿង សុ​ភ័​ណ្ឌ រដ្ឋលេខាធិការ ក្រសួង​រៀបចំដែនដី​នគរូបនីយកម្ម​ និង​សំណ​ង់អោយដឹងថា ក្នុង​រយៈពេល​ដូចគ្នា​នៅ​ទូទាំង​ប្រទេស ​មាន​ក្រុមហ៊ុន​ប្រកប​អាជីវកម្ម​សាងសង់ ​និង​សិក្សា​គម្រោង​ប្លង់​ស្ថាបត្យកម្ម​ បាន​មក​ចុះបញ្ជី​នៅ​ក្រសួង​រៀបចំ​ដែនដី​នគរូបនីយកម្ម​ និង​សំណង់​មាន​ចំនួន​២២២៨​ក្រុមហ៊ុន​ ក្នុងនោះមាន​សុពលភាព​ចំនួន​១០៧២ ​ក្រុមហ៊ុន។ ក្នុងចំណោមក្រុមហ៊ុនបរទេសទាំងនោះ ក្រុមហ៊ុនច្រើនលំដាប់ទី១ គឺមកពី​ប្រទេសចិន​។

លោកបន្តថា “សន្ទុះ​នៃ​ការ​រីកចម្រើន ​ក្នុង​វិស័យ​ស្ថាបត្យកម្ម​សំណង់​នឹង​កកើត​នៅ​ក្នុង​ទីក្រុង​ថ្មីៗ​ដ៏​ច្រើន​នេះ ពិតជាឆ្លើយតបនឹង​សេចក្ដីត្រូវការ ​នូវ​បច្ចេកទេស​បច្ចេកវិទ្យា​ទំនើប ​និង​សម្ភារៈ​សំណង់​សម្បូរបែប ​ជា​កត្តា​ចាំបាច់​ដើម្បី​ធ្វើ​ឲ្យ​ប្រសើរ​ឡើង​នូវ​ផលិតភា​ព​ និង​គុណភាព​ការងារ​ ក្នុង​វិស័យ​ស្ថាបត្យកម្ម​សំណង់​ ដើម្បី​ឆ្លើយតប​ទៅ​នឹង​ស្តង់ដារ​ជាតិ​ និង​អន្ដរ​ជាពិសេស​ឆ្លើយតប​ទៅ​នឹង​ទីក្រុង​ឆ្លាត​វៃ​ (SMART CITY)។

លោកបណ្ឌិត គីម ហ៊ាង ប្រធាន​សមាគម​អ្នក​វាយតម្លៃ​អចលនវត្ថុកម្ពុជា បាន​អោយដឹងដែរថា​ សេដ្ឋកិច្ច​កម្ពុជា​មាន​កំណើន​ល្អ ​និង​ប្រជាពលរដ្ឋ​ពេញកម្លាំង​មានចំនួនច្រើន ​ហើយ​លក្ខខ័ណ្ឌនៃការ​អនុគ្រោះ​វិនិយោគ​របស់​កម្ពុជា ពិតមានបាន​បើក​ចំហរ​ដល់​អ្នក​វិនិយោគ​ ពោលគឺរដ្ឋាភិបាល​មានការ​យោគយល់ ​នឹង​ចង់​ឲ្យ​មាន​អ្នក​វិនិយោគ​ច្រើន​បង្កើត​ឲ្យ​ពលរដ្ឋ​ខ្មែរ​មានការ​ងារ​ធ្វើ​នៅ​ក្នុង​ស្រុក​។

លោក​ គី​ម​ ហ៊ាង ពន្យល់ថា ​ជា​ធម្មតា​កាលណា​មាន​កំណើន​សាងសង់​មាន​កាន់​តែច្រើន សេដ្ឋកិច្ច​កាន់តែ​រឹងមាំ ​ហើយ​ទាំង​អស់គ្នា​គួរតែ​សប្បាយចិត្ត ​ហើយ​ប្រទេស​ណា​គ្មាន​ការសាងសង់ ​គឺ​ប្រទេស​នោះ​មិន​មាន​ការ​រីកចម្រើន​ទេ ​ហើយ​ប្រទេស​កម្ពុជា​វិញ​សេដ្ឋកិច្ចជាតិ​ កំពុងតែ​មានការ​រីកចម្រើន​ និង​បន្ត​មាន​ភាពរឹងមាំ​៕