ដោយ​ វុត្ថា

ភ្នំពេញ៖ អនុស្សរណៈយោគយល់ចំនួន១២ មានតម្លៃសរុបជាង ៨០លានដុល្លារសហរដ្ឋអាមេរិក ត្រូវបានចុះហត្ថលេខា កាលពីថ្ងៃទី១៣ ខែកញ្ញា ឆ្នាំ២០១៨នេះ នៅក្នុងវេទិកាវិនិយោគ ធុរកិច្ច និងទេសចរណ៍ នៃពិព័រណ៍ពាណិជ្ជកម្មចិន-អាស៊ាន លើកទី១៥ ដែលរៀបចំឡើងដោយក្រសួងពាណិជ្ជកម្មកម្ពុជា សហការជាមួយលេខាធិការដ្ឋានពិព័រណ៍ចិន-អាស៊ាន។

អនុស្សរណៈទាំងនេះ គ្របដណ្តប់កិច្ចសហប្រតិបត្តិការលើវិស័យសំខាន់ៗ រាប់តាំងពីការធ្វើធុរកិច្ច-ពាណិជ្ជកម្ម, ការបណ្តុះបណ្តាលធនធានមនុស្សផ្នែកមគ្គុទេសក៍ (អ្នកនាំភ្ញៀវទេសចរ) និងផ្នែកវិស្វកម្ម (ផ្លូវដែកល្បឿនលឿន, ទំនប់វារីអគ្គិសនី និងប្រពន្ធ័ធារាសាស្ត្រ), ការស្ថាបនាផ្លូវយន្តហោះ, ការបង្កើតមហាវិទ្យាល័យស្រាវជ្រាវឧស្សាហកម្ម និងការកសាងមជ្ឈមណ្ឌលបណ្តុះបណ្តាលទេសចរណ៍ Sino-ASEAN។

លោកឈួន ដារ៉ា រដ្ឋលេខាធិការក្រសួងពាណិជ្ជកម្មបានគូសបញ្ជាក់ថា ព្រឹត្តិការណ៍ថ្ងៃនេះ ឆ្លុះបង្ហាញពីការប្តេជ្ញាចិត្តរបស់កម្ពុជា ក្នុងការចូលរួមកសាង «វិថីសូត្រសមុទ្រ សតវត្សរ៍ទី២១» និងគាំទ្រការអនុវត្ត «ផ្លូវ និងខ្សែក្រវាត់» ដើម្បីជំរុញការធ្វើសមាហរណកម្មសេដ្ឋកិច្ចទៅក្នុងតំបន់ តាមរយៈវិស័យពាណិជ្ជកម្ម វិនិយោគ និងទេសចរណ៍ នៅក្នុងទីក្រុងណាននីងដ៏ស្រស់ឆើតឆាយនៃខេត្តក្វាងស៊ី។

ទន្ទឹមគ្នានេះ លោកស្រី.យ៉ាន ហ្ស៊ីចាន់ (Yan Zhichan) អនុប្រធាននៃរដ្ឋាភិបាលតំបន់ស្វ័យតខេត្តក្វាងស៊ី បានគូសបញ្ជាក់ពីវឌ្ឍនភាពនៃកិច្ចសហប្រតិបត្តិការ រវាងខេត្តក្វាងស៊ី និងកម្ពុជា នៅលើវិស័យសេដ្ឋកិច្ច និងពាណិជ្ជកម្ម និងបានបង្ហាញជំនឿថា ពិធីចុះអនុស្សរណៈថ្ងៃនេះ នឹងជួយពង្រឹងកិច្ចសហប្រតិបត្តិការគ្រប់ជ្រុងជ្រោយ ដើម្បីឈានទៅកសាងវិថីសូត្រសមុទ្រ ដែលជាគំនិតផ្តួចផ្តើមដ៏មានសារៈសំខាន់បំផុតមួយ ក្នុងការអភិវឌ្ឍសេដ្ឋកិច្ច និងវប្បធម៌បែបទំនើប រវាងប្រទេសចិន និងពិភពលោក ជាពិសេសអាស៊ាន។

គួររំលឹកថា រៀងរាល់ព្រឹត្តិការណ៍ពិពរ័ណ៍ចិន-អាស៊ាន តែងមានពិធីចុះហត្ថលេខាលើគម្រោងវិនិយោគ និងអនុស្សរណៈជាច្រើន រវាងវិនិយោគិន និងពាណិជ្ជករកម្ពុជា-ចិន។ ខណៈដែលកិច្ចសហប្រតិបត្តិការប្រទេសទាំងពីរ ត្រូវបានពង្រឹង និងពង្រីកជាបន្តបន្ទាប់នោះ គេសង្កេតឃើញមានគម្រោងវិនិយោគធំៗជាច្រើនរបស់ក្រុមហ៊ុនចិន បានមកអនុវត្តន៍នៅក្នុងប្រទេសកម្ពុជា មានដូចជា៖ គម្រោងសាងសង់ស្ពានឆ្លងទន្លេមេគង្គ គម្រោងសាងសង់តំបន់សេដ្ឋកិច្ចពិសេសក្រុងព្រះសីហនុ គម្រោងសាងសង់ផ្លូវល្បឿនលឿន គម្រោងសាងសង់ទំនប់វារីអគ្គីសនី និងគម្រោងសាងសង់ហេដ្ឋារចនាសម្ព័ន្ធដទៃផ្សេងៗទៀត ដែលទាំងអស់នេះ សុទ្ធតែបង្ហាញឱ្យឃើញអំពីភាពស៊ីសង្វាក់គ្នា នៃគោលនយោបាយប្រទេសទាំងពីរ ដោយឈរលើកិច្ចសហប្រតិបត្តិការឈ្នះ-ឈ្នះ ដើម្បីតភ្ជាប់សមាហរណកម្មសេដ្ឋកិច្ច ទៅក្នុងពិភពលោក៕

ដោយ ស៊ីវ ម៉េង

       ភ្នំពេញ៖ ការគ្រប់គ្រងក្រុមហ៊ុនមួយមិនប្រាកដស្រួលទេ ចុះទម្រាំគ្រប់គ្រងក្រុមហ៊ុនច្រើនក្នុងពេលតែមួយ ពិតជាកាន់តែពិបាក ហេតុនេះការមានវិធីសាស្រ្ត គ្រប់គ្រងច្បាស់លាស់ ត្រឹមត្រូវ ពិតជាមានសារៈសំខាន់ណាស់។

លោកឧកញ៉ាលី ហួរអគ្គនាយកក្រុមហ៊ុនលី ហួរគ្រុបដែលមានក្រុមហ៊ុនចំ​នួន៨ជាបុត្រសម្ព័ន្ឋ បានចែករំលែកនូវវិធីសាស្រ្តគ្រប់គ្រងក្រុមហ៊ុនច្រើន ក្នុងពេ​ល​​តែមួយជាមួយគេហទំព័រ Propertyarea.asia កាលពីពេលថ្មីៗនេះថា មុនពង្រីក​ក្រុមហ៊ុន យើងត្រូវសិក្សាពីទីផ្សារថាតើផ្នែកអ្វីមានសក្តានុពល មិនមែនយើងចេះតែពង្រីកនោះទេ ហើយអ្វីចាំបាច់ត្រូវមានធនធានមនុស្សល្អ ពិនិត្យសក្តានុពល​នៅក្នុងតំបន់ សិក្សាពីដៃគូប្រកួតប្រជែងពីផលិតផលឲ្យអស់ ទើបយើងឈានទៅពង្រីកក្រុមហ៊ុនថ្មី។

លោកបន្តថា “ការគ្រប់គ្រងមនុស្សពិបាកផុតលេខហើយ គ្មានអ្វីពិបាកជាង គ្រប់គ្រងមនុស្សទេ ហេតុនេះអ្វីសំខាន់គឺគ្រប់គ្រងមនុស្សឲ្យបានល្អ ព្រោះបើយើ​ងគ្រប់គ្រងបានហើយ អ្វីៗវានឹងរលូន ដើរទៅមុខទន្ទឹមគ្នា”។លោកបន្តថា “កត្តាសំខា​ន់មួយទៀត គឺគ្រប់គ្រង អប់រំ បណ្តុះបណ្តាល នោះជាកត្តាសំខាន់បំផុត”។

លោកឧកញ៉ាលី ហួរបានបន្តថា រឿងសំខាន់មួយទៀត យើងត្រូវធ្វើឲ្យបុគ្គ​លិកទាំងអស់ធ្វើការចេញពីចិត្ត ចេញពីបេះដូង មិនមែនធ្វើការដោយខ្លាចអំណា​ចរបស់យើង បើបែបនេះយើងមិនរីកចម្រើនទេ។ តែយើងត្រូវឲ្យគេយល់ពីបញ្ហា

ចាត់ទុកក្រុមហ៊ុនរបស់ពួកគេធ្វើការ ជាក្រុមហ៊ុនរបស់ខ្លួន។ លោកបន្តថា យើងត្រូវឲ្យគេមានអារម្មណ៍ថា បាត់បងអ្វីមួយជារបស់ក្រុមហ៊ុន ឬខូចខាតអ្វីមួយរបស់​ក្រុមហ៊ុន ដូចជាការខូចខាតឬបាត់បង់របស់ខ្លួន នេះពិតជាសំខាន់ណាស់។ ហេតុ​នេះហើយ ទើបក្រុមហ៊ុនលី ហួរគ្រុបតែងធ្វើមហាសន្និបាតប្រចាំឆ្នាំ ដើម្បីឲ្យបុគ្គ​លិកលើកឡើងពីបញ្ហារបស់ពួកគេ យើងដោះស្រាយជូនពួកគេ និងលើកទឹកចិត្ត​ដល់អ្នកធ្វើការងារបានល្អ។

លោកឧកញ៉ាបានបន្តថា “ខ្ញុំតែងតែលើកទឹកចិត្តពួកគេដោយផ្តល់រង្វាន់ជាការដំឡើងប្រាក់ខែ ជារង្វាន់លើកទឹកចិត្ត ផ្តល់ភាពកក់ក្តៅជូនពួកគេ ដើម្បីឲ្យពួកគេយល់ថា ក្រុមហ៊ុនដែលពួកគេធ្វើការ ជាក្រុមហ៊ុនរបស់ខ្លួន”៕

ដោយ វុត្ថា

ភ្នំពេញ៖ គណៈប្រតិភូអង្គភាពស្រាវជ្រាវម៉ាក្រូសេដ្ឋកិច្ចអាស៊ានបូក៣ រួមជាមួយភាគីកម្ពុជា ធ្វើការព្យាករណ៍ដូចគ្នាថា ក្នុងឆ្នាំ២០១៨ នេះ កម្ពុជានឹងសម្រេចបានកំណើនសេដ្ឋកិច្ចខ្ពស់ ក្នុងរង្វង់អត្រា ៧,២% ក្នុងនោះចំណូលជាមធ្យមរបស់ប្រជាជនម្នាក់ៗ កើនឡើងប្រហាក់ប្រហែល ១.៥០០ ដុល្លារអាមេរិកផងដែរ។

លោកស្រីបណ្ឌិត Junhong Chang ប្រធានអង្គភាពស្រាវជ្រាវម៉ាក្រូសេដ្ឋកិច្ចអាស៊ានបូក ៣ (ARMO) បានលើកឡើងនៅក្នុងជំនួបពិភាក្សាការងារជាមួយ លោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ នៅថ្ងៃទី១២ ខែកញ្ញា ឆ្នាំ២០១៨ ថា គោលបំណងនៃដំណើរទស្សនកិច្ចការងារលើកនេះ គឺជួបពិភាក្សាជាមួយស្ថាប័នរដ្ឋ និងវិស័យឯកជនពាក់ព័ន្ធ សំដៅប្រមូលទិន្នន័យ និងព័ត៌មានបន្ថែម ដើម្បីជាមូលដ្ឋានសម្រាប់ការវាយតម្លៃពីនិន្នាការ និងការវិវត្តថ្មីៗនៃស្ថានភាពសេដ្ឋកិច្ច និងហិរញ្ញវត្ថុរបស់កម្ពុជា ដែលជាផ្នែកមួយនៃបេសកកម្មការងាររបស់ AMRO ក្នុងការអង្កេតតាមដានស្ថានភាពម៉ាក្រូសេដ្ឋកិច្ចរបស់ប្រទេសសមាជិកអាស៊ានបូក ៣ ។

ចំពោះការវាយតម្លៃពីស្ថានភាពម៉ាក្រូសេដ្ឋកិច្ចរបស់កម្ពុជា ភាគីទាំងពីរមានការយល់ឃើញដូចគ្នាថា ក្នុងឆ្នាំ២០១៨ នេះ កម្ពុជានឹងសម្រេចបានកំណើនសេដ្ឋកិច្ចខ្ពស់លើសការគ្រោងទុក គឺក្នុងរង្វង់អត្រា ៧,២% ក្នុងនោះចំណូលជាមធ្យមរបស់ប្រជាជនម្នាក់ៗ កើនឡើងស្ទើរតែស្មើដល់ ១.៥០០ ដុល្លារអាមេរិក ជាមួយអត្រាអតិផរណាទាបប្រមាណ ៣% ក្នុង មួយឆ្នាំ គឺស្របពេលដែលសមតុល្យពាណិជ្ជកម្មមានភាពរឹងមាំ និងស្ថានភាពហិរញ្ញវត្ថុល្អប្រសើរ ។ ចំណែកការវិនិយោគផ្ទាល់ពីបរទេសក៏សង្កេតឃើញបន្តកើនឡើង ស្របពេលដែលកម្ពុជារក្សាបាននូវស្ថានភាពបំណុលល្អប្រសើរ និងស្ថានភាពហិរញ្ញវត្ថុសាធារណៈរឹងមាំប្រកបដោយការប្រុងប្រយ័ត្នខ្ពស់ ដោយផ្តោតសំខាន់លើការអភិវឌ្ឍហេដ្ឋារចនាសម្ព័ន្ធរូបវ័ន្ត និងបង្កើនចំណាយលើសេវាសង្គមសំខាន់ៗ ដូចជាសុខាភិបាល និងអប់រំជាដើម ។ តែទោះបីយ៉ាងណាសេដ្ឋកិច្ចកម្ពុជាក៏នឹងប្រឈមផងដែរ ទៅនឹងហានិភ័យនៃកត្តាខាងក្រៅមួយចំនួន ខណៈដែលបញ្ហាប្រឈមក្នុងស្រុកកំពុងបន្តដោះស្រាយ ដើម្បីជំរុញភាពប្រកួតប្រជែងរបស់កម្ពុជា និងជំរុញល្បឿននៃការធ្វើពិពិធកម្មសេដ្ឋកិច្ចឱ្យកាន់តែឆាប់រហ័ស ។

លោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ក៏បានលើកឡើង អំពីរការបន្តរក្សាបាននូវកំណើនសេដ្ឋកិច្ចខ្ពស់ប្រកបដោយចីរភាព សំដៅសម្រេចបាននូវគោលដៅក្នុងការប្រែក្លាយកម្ពុជាឱ្យទៅជាប្រទេសចំណូលមធ្យមកំរិតខ្ពស់ក្នុងឆ្នាំ ២០៣០ និងប្រទេសចំណូលខ្ពស់ក្នុងឆ្នាំ២០៥០ ក្នុងនោះរាជរដ្ឋាភិបាលកម្ពុជា នីតិកាលទី៦ នៃរដ្ឋសភា បានរៀបចំ និងដាក់ចេញនូវឯកសារគោលនយោបាយយុទ្ធសាស្រ្តចតុកោណដំណាក់កាលទី៤ ដែលមិនត្រឹមតែសម្រាប់ដោះស្រាយនូវបញ្ហាប្រឈមខាងលើនោះទេ គឺថែមទាំងត្រៀមខ្លួនសម្រាប់បដិវត្តន៍ឧស្សាហកម្មជំនាន់ទី៤ និងសេដ្ឋកិច្ចឌីជីថល ដែលជានិន្នាការថ្មីនៃសេដ្ឋកិច្ចសកលលោកផងដែរ ។

លោកឧបនាយករដ្ឋមន្រ្តី បានស្នើសុំ AMRO បន្តផ្តល់ជំនួយបច្ចេកទេសដល់កម្ពុជា តាមរយៈការជួយបណ្តុះបណ្តាលសេដ្ឋវិទូកម្ពុជា នៅ AMRO និងសុំ AMRO ពិនិត្យលទ្ធភាព បន្តជ្រើសរើសសេដ្ឋវិទូកម្ពុជា ទៅហ្វឺកហាត់ការងារនៅក្នុង AMRO បន្ថែមទៀត ។ ជាការឆ្លើយតប លោកស្រី Junhong Chang ក៏បានសំដែងនូវការគាំទ្រខ្ពស់ចំពោះការស្នើសុំរបស់ក្រសួងសេដ្ឋកិច្ច និងហិរញ្ញវត្ថុ លើការបណ្តុះបណ្តាលសមត្ថភាព និងធនធានមនុស្សរបស់កម្ពុជា៕

ដោយ : វុត្ថា
ភ្នំពេញ ៖ ក្រុមហ៊ុនស៊ាងហៃគួស៊ីគ្រុប (Sang Hai Guo Zhou Group) គ្រោងបោះទុន២០០លានដុល្លារវិនិយោគនៅក្នុងប្រទេសកម្ពុជា លើវិស័យហេដ្ឋារចនាសម្ព័ន្ធ ផ្លុវ ថ្នល់ អគារពាណិជ្ជកម្ម និង អចលនទ្រព្យជាដើមនៅក្នុងប្រទេសម្ពុជា។

លោក កឺ ឈួនបាវ (Mr.Ge Chuanbao) នាយកប្រតិបត្តិក្រុមហ៊ុន Sang Hai Guo Zhou Group បានថ្លែងនៅក្នុងជំនួបពិក្សាការជាមួយសម្ដេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា ថា មិនត្រឹមតែបុណ្ណោះ នៅក្នុងដំណើរទស្សនកិច្ចរបស់លោក រួមជាមួយគណប្រតិភូមកកាន់ប្រទេសកម្ពុជានៅពេលនេះ គឺដើម្បីលើកកម្ពស់ទំនាក់ទំនងមិត្តភាពកម្ពុជា -ចិន និងស្វែងរកឪកាសវិនិយោគផ្សេងទៀត និងលើកម្ពស់គោលនយោបាយយុទ្ធសាស្រ្តផ្លូវមួយ និងខ្សែក្រវ៉ាតមួយរបស់ចិននៅក្នុងប្រទេសកម្ពុជាផងដែរ។

លោកបន្តថា នៅពេលខាងមុខដ៏ខ្លីនេះ ក្រុមហ៊ុន Sang Hai Guo Zhou Group គ្រោងនឹងចុះហត្ថលេខាយោគយល់(MOU) ជាមួយក្រុមហ៊ុន Chai Chai Investment Group ដែលស្ថិននៅក្នុងតំបន់សេដ្ឋកិច្ចពិសេស Poipet Onion ដើម្បីចាប់ផ្តើមវិនិយោគនៅក្នុងប្រទេសកម្ពុជា ។
ជាការឆ្លើយតប សម្ដេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា បានសម្តែងការស្វែងគមន៍ចំពោះ លោក កឺ ឈួនបាវ (Mr.Ge Chuanbao) នាយកប្រតិបត្តិក្រុមហ៊ុន Sang Hai Guo Zhou Group ដែលមានបំណងវិនិយោគនៅក្នុងប្រទេសកម្ពុជា ។ សម្តេចបន្តថា ប្រទេសកម្ពុជា-ចិន គឺជាមិត្តនិងមានទំនាក់ទំនងល្អ ហើយបានជួយគ្នាទៅវិញទៅមកគ្រប់កាលៈទេសៈ ហើយគោលដៅសំខាន់របស់កម្ពុជា គឺប្រមូលគៀងគរអ្នកវិនិយោគិនបរទេសអោយមកវិនិយោគនៅក្នុងប្រទេសដើម្បីងអភិវឌ្ឍន៍សេដ្ឋកិច្ចរបស់ប្រទេសកម្ពុជាអោយមានការរីកចម្រើន។
លោក កឺ ឈួនបាវ បន្តថា នៅពេលដែលលោកត្រឡប់ទៅកាន់ប្រទេសចិនវិញ នឹងប្រកាសគៀងគរអ្នកវិនិយោគិនចិនផ្សេងទៀតអោយមកវិនិយោគនៅក្នុងប្រទេសកម្ពុជា។ ជាមួយគ្នានេះ លោក កឺ ឈួនបានអោយដឹងទៀតថាក្រុមហ៊ុន របស់លោក បានដាក់ទុនវិយោគនៅក្នុងបណ្តាប្រទេសផ្សេងទៀតជាច្រើននៅក្នុងតំបន់អាស៊ានមានដូចជា ប្រទេសសឹង្ហបុរី និងប្រទេសថៃ ដែលមានទំហំទឹកប្រាក់វិនិយោគរហូតដល់ ១.៦ពាន់លានដុល្លារដោយផ្តោតលើហេដ្ឋារចនាសម្ព័ន្ធ ស្ពាន ផ្លូវ ថ្នល់ អគារពាណិជ្ជកម្ម និងអចលនទ្រព្យជាដើម។
បន្ថែមពីននេះ លោក កឺ ឈួនបាវ បានចាត់ទុកថា ប្រទេសកម្ពុជា គឺជាគោលដ៏សំខាន់ក្នុងការបោះទុនវិនិយោគរបស់លោក នៅកម្ពុជា ដើម្បីផ្តល់ផលប្រយោជន៍ជាច្រើនដល់ប្រទេសកម្ពុជា ដូចជាផ្តល់ការងារធ្វើជូនដល់ប្រទេសកម្ពុជា បង្កើនប្រាក់ចំណូលចូលពន្ធដារ ដែលជាប្រាក់ចំណូលរបស់ជាតិក្នុងការអភិវឌ្ឍន៍ប្រទេសកម្ពុជាអោយមានការរីកចម្រើន៕

ដោយ រ៉ាវី
ភ្នំពេញ៖ បន្ទាប់ពីក្រុងព្រះសីហនុ ដែលត្រូវបានជនជាតិចិនសម្រុកធ្វើការវិនិយោគយ៉ាងគំហុកទៅលើវិស័យអចលនទ្រព្យ ដែលជំរុញតម្លៃដីធ្លីហក់ឡើងខ្ពស់នោះ ពេលនេះងាកមកខេត្តកំពតឯណេះវិញ ចំពោះតម្លៃដីក៏មានការកើនឡើងខ្លាំងមិនចាញ់គ្នានោះទេ ជាពិសេស ដីដែលស្ថិតនៅក្នុងតំបន់គម្រោងអភិវឌ្ឍន៍របស់រាជរដ្ឋាភិបាលតែម្ដង ដូចជាគម្រោងសាងសង់មណ្ឌលពាណិជ្ជកម្មអន្តរជាតិ និងគម្រោងសាងសង់កំពង់ផែទឹកជ្រៅអន្តរជាតិជាដើម ។

បច្ចុប្បន្នតម្លៃដីនៅខេត្តកំពត ក៏កំពុងមានសន្ទុះឡើងខ្លាំងដែរហើយ ដោយសារខេត្តនេះមានទីតាំងនៅជាប់សមុទ្រ មានសក្តានុពលក្នុងវិស័យទេសចរណ៍ និងមានសក្តានុពលក្នុងការធ្វើកំពង់ផែដឹកជញ្ជូនទំនិញតាមសមុទ្រផងដែរ។

លោក គឺ ប្រាសិទ្ធិ ដែលជាឈ្មួញរកស៊ីលើវិស័យដីធ្លីបានមានប្រសាសន៍ថា បច្ចុប្បន្នតម្លៃដីនៅខេត្តនេះ កំពុងមានសន្ទុះឡើងខ្លាំងមែន ពិសេសដីដែលស្ថិតនៅចំណុចសំខាន់ៗមួយចំនួន ដូចជាដីនៅតំបន់ដងព្រែក នៅជាប់តំបន់ឆ្នេរ និងនៅតំបន់កម្សាន្តមួយចំនួនទៀត។

លោកបានបន្តទៀតថា សម្រាប់ដីដែលស្ថិតនៅតំបន់កំពង់បាយដែលមានសក្តានុពលខ្លាំងខាងវិស័យទេសចរណ៍ និងដីនៅតាមសងខាងផ្លូវជាតិ ឆ្លងកាត់ពីខេត្តកំពតមកខេត្តព្រះសីហនុតែម្តង កំពុងតែបន្តឡើងតម្លៃ ដែលកាលពីឆ្នាំមុន មានតម្លៃប្រមាណជា 25ទៅ30ដុល្លារប៉ុណ្ណោះក្នុងមួយម៉ែត្រការ៉េ ប៉ុន្តែមកទល់បច្ចុប្បន្នដីនៅតំបន់នោះមានសន្ទុះឡើងយ៉ាងខ្លាំងក្នុងមួយម៉ែត្រការ៉េ តម្លៃដល់ទៅជាង130-150 ដុល្លារឯណោះ។

អ្វីដែលធ្វើឱ្យដីនៅតំបន់នោះឡើងថ្លៃខ្ពស់ ដោយសារជនបរទេស ចូលមករស់នៅទីនោះកាន់តែច្រើនឡើងៗ មកបើកធ្វើអាជីវកម្មផ្សេងៗ ពិសេសធ្វើជាភោជនីយដ្ឋានលក់ទំនិញម្ហូបអាហារជូនភ្ញៀវទេសចរបរទេសដូចគ្នា។

មួយវិញទៀតវិនិយោគិនក៏កំពុងឈានជើងទៅទីនោះ ដើម្បីទិញដីទ្រង់ទ្រង់ធំទុកធ្វើវិនិយោគថែមទៀតផងដែរ។ ដោយឡែកដីនៅតាមបណ្តោយផ្លូវជាតិ ពីទីរួមខេត្តកំពត ឆ្ពោះទៅតំបន់កែប នៅមានតម្លៃទាបនៅឡើយ ដោយក្នុងមួយម៉ែត្រការ៉េ ត្រឹម150 ដុល្លារ ខណៈដែលតម្លៃដីដែលស្ថិតនៅតំបន់កម្សាន្តភ្នំដូង និងតំបន់ក្បែរគម្រោងសាងសង់កំពង់ផែទឹកជ្រៅខ្នាតអន្តរជាតិ ឡើងខ្ពស់រហូតដល់ជាង300ដុល្លារក្នុងមួយម៉ែត្រការ៉េ។

ស្រដៀងគ្នាទៅនឹងការលើកឡើងខាងលើនេះ អ្នកស្រី តាំង ហួរ អគ្គនាយិកាក្រុមហ៊ុន  AMATAK Property Service Co, Ltd  ក៏បានទទួលស្គាល់ដែរថាតម្លៃដីនៅខេត្តកំពត កំពុងមានសន្ទុះកើនឡើងបណ្តើរៗហើយ ស្របពេលដែលរដ្ឋាភិបាលប្រកាសសាងសង់កំពង់ផែអន្តរជាតិជម្រៅទឹកជ្រៅ នឹងពង្រីកផ្លូវជាតិលេខ3 ពីភ្នំពេញទៅខេត្តកំពត។

លោកស្រីថានៅពេលដែលហេដ្ឋារចនាសម្ពន្ឋនេះសាងសង់រួច តម្លៃដីនៅទីនោះនឹងកាន់តែឡើងថ្លៃខ្ពស់ឡើងៗ ដូចទៅនឹងខេត្តព្រះសីហនុដែរ ដោយសារតម្លៃដីនៅខេត្តនោះឡើងថ្លៃខ្ពស់រួចទៅហើយ ដូច្នេះអ្នកវិនិយោគនឹងងាកទៅរកតំបន់ណា ដែលមានទីតាំងភូមិសាស្រ្តប្រហាក់ប្រហែលគ្នា ពិសេសខេត្តកំពត ដែលមានទីតាំងជាប់មាត់សមុទ្រដូចទៅខេត្តព្រះសីហនុដែរ។

យ៉ាងណាក៏ដោយលោកស្រីក៏បានព្រមានផងដែរថា ចំពោះវិនិយោគដើម្បីទទួលបានចំណេញ សម្រាប់ឈ្មួញ ក៏ដូចជាប្រជាពលរដ្ឋ ត្រូវធ្វើការពិចារណាឱ្យបានច្បាស់លាស់ មុននឹងសម្រេចចិត្តទិញដី ដែលគួរមើលទីតាំងភូមិសាស្រ្ត ពិនិត្យមើលឯកសារឱ្យបានត្រឹមត្រូវតាមផ្លូវច្បាប់ ជៀសវាងហានិភ័យកើតឡើងក្រោយពេលទិញរួច។

គួរបញ្ជាក់ថា រាជរដ្ឋាភិបាលក៏បានប្រកាសដែរថា គម្រោងពង្រីកផ្លូវជាតិលេខ3 ចាប់ពីរង្វង់មូលចោមចៅក្នុងភូមិសាស្រ្តរាជធានីភ្នំពេញ ឆ្ពោះទៅទីរួមខេត្តកំពត និងចាប់ផ្តើមសាងសង់នៅដើមខែឧសភាខាងមុខនេះ ក្រោមកម្ចីសម្បទាន 215 លានដុល្លារពីប្រទេសចិន ដើម្បីសម្រួលដល់ការតភ្ជាប់រវាងប្រទេសទាំងមូល។

គម្រោងនេះត្រូវបានបែងចែកជាពីរកំណាត់ គឺកំណាត់ផ្លូវចោមចៅ-បែកគូស និង កំណាត់ផ្លូវបែកគូស-កំពត ដែលផ្លូវចោមចៅ-បែកគូសនឹងសាងសង់ជាផ្លូវបួនគន្លង (2ទៅ 2មក) ដោយមានទទឹងសរុប 24.5 ម៉ែត្រ ខណៈដែលគម្រោងសាងសង់កំពង់ផែទឹកជ្រៅអន្តរជាតិរបស់ក្រុមហ៊ុនទ្រីភាពគ្រុប សហការជាមួយក្រុមហ៊ុនចិន គ្រោងសាងសង់នៅពេលឆាប់ៗខាងមុខផងដែរ ៕

ដោយ វុត្ថា

វេទិកាសេដ្ឋកិច្ចពិភពលោក លើកទី២៧ នៅដែលកំពុងរៀបចំធ្វើឡើងនៅក្នុងទីក្រុងហាណូយ ប្រទេសវៀតណានៅក្នុងឆ្នាំនេះ គឺផ្តោតសំខាន់លើការពិភាក្សាអំពីកាលានុវត្តភាព និងបញ្ហាប្រឈម ដែលបណ្តាលមកពីបដិវត្តឧស្សាហកម្មជំនាន់ទីបួន ព្រមទាំងរិះរកមធ្យោបាយដើម្បីប្រើប្រាស់នវានុវត្តន៍ និងកិច្ចសហការរវាងរដ្ឋ និងឯកជន ដើម្បីទប់ទល់នឹងបញ្ហាប្រឈមទាំងនោះ។

នៅក្នុងវេទិកាសេដ្ឋកិច្ចពិភពលោក ក៏បានផ្តោតលើប្រធានបទ «យុវជន បច្ចេកវិទ្យា និងកំណើន ការធានាពីគុណប្រយោជន៍ផ្នែកប្រជាសាស្រ្តនិងឌីជីថល របស់អាស៊ាន» ដែលបានចូលរួមពីបណ្តាមេដឹកនាំ និងផ្នែកធុរកិច្ច អ្នកសេដ្ឋកិច្ច និងម្ចាស់ក្រុមហ៊ុនធំៗលើពិភពលោកជាច្រើនរូបផងដែរ។

ប្រមុខដឹកនាំទាំងអស់ បានចាត់ទុកការរួមសហការគ្នារវាងវិស័យឯកជន ជាមួយនឹងរដ្ឋាភិបាលគឺជារឿងចាំបាច់បំផុតដើម្បីជំរុញពាណិជ្ជកម្ម និងកំណើនសេដ្ឋកិច្ច ជាពិសេសគឺរួមគ្នាយកចិត្តទុកដាក់ចំពោះការបណ្តុះបណ្តាលជំនាញបច្ចេកវិទ្យាដែលជាសេចក្តីត្រូវការចាំបាច់បំផុតនៅក្នុងសម័យឌីជីថល ដែលជាមូលដ្ឋានដ៏សំខាន់សម្រាប់ទ្រទ្រង់ខឿនសេដ្ឋកិច្ចប្រកបដោយចីរភាព។

សព្វថ្ងៃនេះ ពលរដ្ឋជាពិសេសយុវជនកំពុងប្រើប្រាស់ Smart phone, និងបច្ចេកវិទ្យាថ្មីៗ រួមទាំងការធ្វើពាណិជ្ជកម្ម និងលក់ទំនិញអនឡាញតាមប្រព័ន្ឋអេឡិកត្រូនិក និងការប្រើប្រាស់បច្ចេកវិទ្យាគ្រប់គ្រងហិរញ្ញវត្ថុតាមធនាគារ និងទូរទាត់តាមប្រព័ន្ឋវ័យឆ្លាតនានា ព្រមទាំងការប្រើប្រាស់បច្ចេកវិទ្យាដើម្បីទប់ស្កាត់អំពើភេរវកម្មផ្សេងៗ ដែលបានជួយបង្កើតការងារនិងមុខរបរបានយ៉ាងច្រើន ហើយទន្ទឹមនឹងនេះ គឺកំពុងជួយពន្លឿនដល់សមាហរណកម្មក្នុងតំបន់ ព្រមទាំងជំរុញឲ្យមានទំនាក់ទំនងរវាងពលរដ្ឋ និងពលរដ្ឋកាន់តែប្រសើរឡើងទៀតផងដែរ៕