ដោយ វុត្ថា

ភ្នំពេញ៖ រដ្ឋលេខាធិការក្រសួងនគរូបនីយកម្ម រៀបចំដែនដី និងសំណង់ បញ្ជាក់ថា ពាក់ព័ន្ធនឹងវិស័យស្ថាបត្យកម្មនេះ គោលនយោបាយរបស់រាជរដ្ឋាភិបាលកម្ពុជា ជម្រុញឲ្យវិស័យឯកជន និងរដ្ឋធ្វើការជាមួយគ្នា ជជែកពិភាក្សាស្វែងរកគន្លឹះអភិវឌ្ឍ ដើម្បីពង្រីកទីក្រុងឆ្លាតវៃ និងការពង្រីកសុខុដុមរមណីយកម្ម ឈានទៅរកការរីកចម្រើន ។

ឯកឧត្តម ភឿង សោភ័ណ្ឌ រដ្ឋលេខាធិការក្រសួងនគរូបនីយកម្ម រៀបចំដែនដី និងសំណង់ និងជាអគ្គលេខាធិការ គណៈស្ថាបត្យករកម្ពុជា បានថ្លែងលើកឡើង ក្នុងពិធីតាំងពិព័រណ៌វិស័យស្ថាបត្យកម្ម និងសម្ភារៈសំណង់ខ្នាតអន្តរជាតិ នៅ មជ្ឈមណ្ឌលសន្និបាតពិព័រណ៍កោះពេជ្រ ថ្ងៃទី១២ ខែកញ្ញា ឆ្នាំ២០១៨ នេះថា រាជរដ្ឋាភិបាលកម្ពុជាបានខិតខំប្រឹងប្រែងក្នុងការអនុវត្តន៍គោលនយោបាយអភិវឌ្ឍនវិស័យអចលនទ្រព្យ ស្របពេលដែលប្រទេសកម្ពុជាមានស្ថិរភាពនយោបាយ ការបង្រួបបង្រួមជាតិ និងមានសុខសន្តិភាពសណ្តាប់ ដូច្នេះការអភិវឌ្ឍន៍លើវិស័យសំណង់ ស្ថាបត្យកម្ម អចលនទ្រព្យ ហេដ្ឋារចនាសម្ព័ន្ធ និងការបង្កើតទីក្រុងថ្មីៗ គឺបានកំពុងពង្រីកសុខុដុមរមណីយកម្ម ឈានទៅរកការរីកចម្រើន ឆ្ពោះទៅរកទីក្រុងឆ្លាតវៃផងដែរ ។

ឯកឧត្តម រដ្ឋលេខាធិការ បន្តថា ប្រវត្តិនៃការសាងសង់ទីក្រុងខ្មែរយើងធ្លាប់ស្ថាបនាទីក្រុងឆ្លាតវែ តាំងពីសតវត្សរ៍ទី១២មកម្លេះ ក្នុងនោះទីក្រុងបានស្រូបយកគ្រប់វិស័យទាំងអស់ ដោយក្លាយជាចរន្តរតភ្ជាប់យ៉ាងសំខាន់ ដូច្នេះទើបរដ្ឋាភិបាលកម្ពុជា បានដាក់ចេញនូវគោលនយោបាយជម្រុញឲ្យវិស័យឯកជន និងរដ្ឋ ធ្វើការជាមួយគ្នា ជជែកពិភាក្សាស្វែងរកគន្លឹះអភិវឌ្ឍ ដើម្បីពង្រីកទីក្រុងឆ្លាត និងការពង្រីកសុខុដុមរមណីយកម្មឈានទៅរកការរីកចម្រើន ។

នៅក្នុងឱកាសតាំងពិរព័ណ៌នេះ លោក Vincent Low ប្រធានគ្រប់គ្រង់ក្រុមហ៊ុន តៃ ស៊ិន បានលើកឡើងផងដែរ ថា បច្ចុប្បន្នពិភពលោកមានការវិវត្តន៍លើផ្នែកអចលនទ្រព្យយ៉ាងខ្លាំង ជាពិសេសប្រទេសកម្ពុជាផ្ទាល់ កំពុងជម្រុញអភិវឌ្ឍ នៅលើផ្នែកយ៉ាងខ្លាំងផងដែរ ក្នុងនោះសម្រាប់ តៃ ស៊ិន ដែលជាក្រុមហ៊ុន ផ្គង់ផ្គង់ខ្សែភ្លើង កំពុងមានការប្រកួតប្រជែងយ៉ាងខ្លាំង ដោយមានខ្សែភ្លើងគ្រប់ម៉ាក ជាខ្សែភ្លើងមានស្តង់ដារ ដែលប្រទេសកម្ពុជាកំពុងនិយមប្រើប្រាស់ ។ លោកបញ្ជាក់ថា ការផ្តល់នូវផលិតផលដែលមានស្តង់ដារ ក្នុងការអភិវឌ្ឍន៍វិស័យសំណង់ នឹងជួយឲ្យកម្ពុជាមានការអភិវឌ្ឍវិស័យសំណង់ប្រកបដោយស្តង់ដារខ្ពស់ និងឈានទៅប្រកួតប្រជែងទីក្រុងឆ្លាតវៃផងដែរ ។

ពាក់ព័ន្ធការតាំងពិព័រណ៍ លោក Andrew Siow នាយកក្រុមហ៊ុន ABM Tarsus Events Group បានបញ្ជាក់ ឲ្យដឹងថា ការរៀបចំតាំងពិព័រណ៍ផ្នែកស្ថាបត្យកម្មអាការ និងសំណង់ខ្នាតអន្តរជាតិ ធំបំផុតនៅកម្ពុជា គឺបានផ្តោតការយកចិត្តទុកដាក់អំពីគំនិតច្នៃប្រឌិត និងការរចនា និងការបង្ហាញទស្សនៈវិស័យទីក្រុង វៃឆ្លាត ដែលមានក្រុមហ៊ុនជាតិ អន្តរជាតិ ជាង៣៥០ក្រុមហ៊ុន បានចូលរួម និងមានផលិតផលនាំមកចំនួន២៣ប្រទេស នឹងមានអ្នកចូលរួមប្រមាណជាង១ម៉ឺនអ្នកផងដែរ ៕

ដោយវុត្ថា

​ភ្នំពេញ៖ ក្រសួងរៀបចំដែនដី នគរូបនីយកម្ម និងសំណង់បានដាក់ឲ្យប្រើតែសន្លឹកបណ្ណថ្មីដែលមានឈ្មោះថា “វិញ្ញាបនបត្រសម្គាល់ម្ចាស់អចលនវត្ថុ” សម្រាប់ចុះបញ្ជីដីធ្លីដែ​លមានលក្ខណៈដាច់ដោយដុំការចុះបញ្ជីដីធ្លីជាលក្ខណៈប្រព័ន្ធ ចាប់ពីឆ្នាំ២០១៩ តទៅ។

ដើម្បីសម្រួលដល់ការយល់កាន់តែច្បាស់ស្តីពី ការចុះបញ្ជីបញ្ជីដីធ្លីជាលក្ខណៈប្រ​ព័​ន្ធ គេហទំព័រ Propertyarea.asia  សូមលើកយកគន្លឹះខ្លះនៃការចុះបញ្ជីនេះមាន៥ដំណាក់កាលដូចខាងក្រោមនេះ។

ដំណាក់កាលទី ១៖ អំពីការរៀបចំ

អភិបាលខេត្ត ក្រុងជាអ្នកប្រកាសតំបន់ ដែលក្រុមមន្ត្រីចុះបញ្ជីដីធ្លី ត្រូវកំណត់វាស់វែងព្រំដី និងវិនិច្ឆ័យ។ ក្រោយពីការកំណត់រួចមក អភិបាលខេត្តត្រូវធ្វើការប្រជុំវិនិច្ឆ័យដោយផ្តល់ព័ត៌មាន មកអាជ្ញាធរមូលដ្ឋានយ៉ាងតិច១៥ ថ្ងៃ និងសាធារណៈជនយ៉ាងតិច៧ ថ្ងៃមុនការប្រជុំ។ កិច្ចប្រជុំផ្សព្វផ្សាយត្រូវធ្វើឡើងក្នុងតំបន់ ធ្វើការវិនិច្ឆ័យដែលមានលក្ខណៈជាប្រព័ន្ធ (មាត្រា៦ នៃអនុក្រឹត្យស្តីពីនីតិវិធីនៃការកសាងប្លង់សុរិយោដី និងសៀវភៅគោលបញ្ជី)។

ដំណាក់កាលទី ២៖ អំពីប្រតិបត្តិការបច្ចេកទេស

១ ការងារវាល៖ ក្រុមមន្ត្រីចុះបញ្ជីដីធ្លីធ្វើការកំណត់ព្រំដី វាសវែងក្បាលដី និងធ្វើការវិនិច្ឆ័យទៅលើឯកសារ និងភ័ស្តតាងផ្សេងៗជាលក្ខណៈរូបជាលាយលក្ខណ៍អក្សរ ឬ ចម្លើយផ្ទាល់មាត់ទាក់ទងនឹងព្រំដី។

២ ការងារនៅការិយាល័យ ប្រសិនបើមិនមានទំនាស់ ក្នុងការកំណត់ព្រំដីនោះទេ ទិន្នន័យដែលប្រមូលបានត្រូវបញ្ចូលក្នុងកុំព្យូទ័រ ដើម្បីកសាងប្លង់សុរិយោដី បញ្ជីឈ្មោះម្ចាស់ដី និងសៀវភៅគោលបញ្ជីដីធ្លី។

ដំណាក់កាលទី ៣៖ ការបិតផ្សាយជាសាធារណៈនូវឯកសារនៃការវិនិច្ឆ័យ

អាជ្ញាធរខេត្តក្រុង ត្រូវប្រកាសផ្សាយជាសាធារណៈ អំពីឯកសារនៃការវិនិច្ឆ័យទាំងអស់រយៈពេល៣០ថ្ងៃ ដើម្បីអោយបុគ្គលពាក់ព័ន្ធទាំងអស់ធ្វើការពិនិត្យឬតវ៉ា។ ប្រសិនបើគ្មានទំនាស់ទេ គណៈកម្មការរដ្ឋបាលត្រូវផ្តល់ការយល់ព្រម លើឯកសារនៃការវិនិច្ឆ័យទាំងនោះ ។ បន្ទាប់មកទៀត គណៈកម្មការរដ្ឋបាលត្រូវបញ្ចូនឯកសារ នៃការវិនិច្ឆ័យទៅរដ្ឋបាលសុរិយោដីថ្នាក់ខេត្ត ក្រុង ដើម្បីត្រួតពិនិត្យលក្ខណៈបច្ចេកទេស និងចុះហត្ថលេខាទទួលស្គាល់។

ប្រសិនបើមានការជំទាស់ ឬការតវ៉ាសាមីជន អាចដាក់ពាក្យបណ្តឹងទៅគណៈកម្មការសុរិយោដី ដើម្បីដោះស្រាយតាមនីតិវិធីដែលបានកំណត់។

ដំណាក់កាលទី ៤៖ អំពីការសម្រេចលើឯកសារ

ក្រោយពីផុតរយៈពេលបិទផ្សាយជាសាធារណៈ អភិបាលខេត្តក្រុង និងរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ចុះហត្ថលេខាសម្តេចលើឯកសារនៃការវិនិច្ឆ័យ ហើយឯកសារនោះនឹងចាត់ទុកជាឯកសារផ្លូវការតាមច្បាប់។

ដំណាក់កាលទី ៥៖ អំពីការចេញប័ណ្ណ

នៅពេលដែលនីតិវិធី នៃការវិនិច្ឆ័យត្រូវបានបញ្ចប់ជាស្ថាពរ ឯកសារនៃការវិនិច្ឆ័យ និងឯកសាររណបពាក់ព័ន្ធទាំងអស់ ត្រូវបានបញ្ជូនទៅរដ្ឋបាលសុរិយោដី ដើម្បីចុះបញ្ជី ចេញប័ណ្ណ៕

ដោយ ស៊ីវ ម៉េង

       ភ្នំពេញ៖ ជាមួយនឹងជោគជ័យក្នុងការអភិវឌ្ឍន៍បុរី លោកឧកញ៉ាលី ហួរអគ្គ​នាយកក្រុមហ៊ុនលី ហួរគ្រុបបាននិងកំពុងឈានទៅប្រឡូក ក្នុងទីផ្សារខុនដូវិញ​ម្ត ង បន្ទាប់ពីលោកមើលឃើញថា តម្រូវការក្នុងវិស័យនេះបានកើនឡើង។

លោកឧកញ៉ាលី ហួរដែលជាប្រធានសមាគមអ្នកអភិវឌ្ឍន៍លំនៅដ្ឋានកម្ពុជា និងជាអគ្គនាយកបុរីវិមានភ្នំពេញបានថ្លែង គេហទំព័រ propertyarea.asia ដឹង កាលពីពេលថ្មីៗនេះថា លោកមានគម្រោងវិនិយោគលើការសាងសង់ខុនដូសម្រាប់លក់នៅពេលឆាប់ៗខាងមុខនេះ ព្រោះទីតាំងដីនៃគម្រោងនេះ មានភាពសមស្របសម្រា​ប់សាងសង់ខុនដូ។លោកបន្តថា គម្រោងនេះមិនត្រឹមតែមានខុនដូមួយមុខនោះទេ ប៉ុន្តែក៏មានមជ្ឈមណ្ឌលពាណិជ្ជកម្មដូចជា ផ្សារទំនើប និងការិយាល័យផងដែរ។

ទោះជាយ៉ាងណារហូតមកទល់ពេលនេះ លោកមិនទាន់បញ្ជាក់ថាគំរោងខុនដូ និងមជ្ឈមណ្ឌលពាណិជ្ជកម្មរបស់លោក ចាប់ផ្តើមនៅពេលណានៅឡើយទេ។

លោកបានសម្តែងសុទិដ្ឋិនិយមថា “ខ្ញុំជឿជាក់ថាគម្រោងនេះនឹងទទួលជោ​គជ័យ ដោយសារនា​ពេលអនាគតប្រជាពលរដ្ឋរស់នៅខុនដូកាន់តែច្រើន ស្របពេលទីក្រុងកាន់តែមា​នភាពចង្អៀត”។

យោងតាមការសិក្សារបស់ក្រុមហ៊ុន Urban Loft Solution បានរកឃើញថា នៅឆ្នាំ២០៣៥ខាងមុខ ប្រជាជននៅទីក្រុងភ្នំពេញនឹងកើនដល់៤លាននាក់ ពេល​នោះប្រជាជន នឹងសម្រេចចិត្តរស់នៅតាមខុនដូកាន់តែច្រើន ដោយសារកំនើនយានយន្ត ការកកស្ទះចរាចរណ៍ និងលំនៅដ្ឋានតម្លៃសមរម្យមានចម្ងាយឆ្ងាយពី​ទីក្រុង។ ហេតុផលមួយទៀត គឺប្រព័ន្ឋបច្ចេកវិទ្យានឹងជួយសម្រួលដល់ជីវភាព​រស់​នៅរស់នៅរបស់ប្រជាជនក្នុងទីក្រុង៕