ដោយគង់ សូរិយា

       ភ្នំពេញ៖ មជ្ឈមណ្ឌលហិរញ្ញវត្ថុជប៉ុន ដែលជាការិយាល័យកណ្តាល​ធនាគារស្ថាបនា បានវិនិយោគទឹកប្រាក់រហូតដល់៦០លានដុល្លារអាមេរិក ដើម្បីសង់អាគា​រកំពស់២២ជាន់ ស្ថិតនៅលើមហាវិថីព្រះនរោត្តម។

ធនាគារស្ថាបនាជាបុត្រសម្ព័ន្ឋរបស់ធនាគារ MARUHAN ដែលធនាគារនេះ បានទិញមីក្រូហិរញ្ញវត្ថុស្ថាបនាកាលពីឆ្នាំមុន។

ក្នុងជំនួបជាមួយសម្តេចតេជោ ហ៊ុន សែននាយករដ្ឋមន្រ្តីកម្ពុជាកាលពីចុងឆ្នាំមុន លោក Han Chang Wooប្រធាននិងជាអគ្គនាយកប្រតិបត្តិក្រុមហ៊ុន MARUHAN បានថ្លែងថា ថ្មីៗនេះក្រុមហ៊ុន MARUHAN បានទិញយកស្ថាប័នមីក្រូហិរញ្ញវត្ថុរបស់កម្ពុជា ឈ្មោះស្ថាបនា ដែលបច្ចុប្បន្ននេះប្តូរពីមីក្រូហិរញ្ញវត្ថុ ទៅជាធនាគារស្ថាបនាវិញ ដែលមានអ្នកបច្ចេកទេស និងអ្នកទទួលខុសត្រូវ មកពីប្រទេ​សជប៉ុនផង និងនៅកម្ពុជាផង។

លោកបន្តថា “ក្រុមហ៊ុនមានគម្រោងសាងសង់ អគារទីស្នាក់ការកណ្តាលស្ថិតនៅ ផ្លូវនរោត្តមរាជធានីភ្នំពេញ នៅឆ្នាំ២០១៨ខាងមុខនេះ ហើយគ្រោងបញ្ចប់នៅឆ្នាំ២០២០ខាងមុខ ដោយអាគារនេះមានកម្ពស់២២ជាន់”។លោកបន្តថា សព្វថ្ងៃនេះធនាគារនៅកម្ពុជា ទឹកប្រាក់ប្រមាណ១២០លានដុល្លារអាមេរិក ដែលមានសាខា១៦៨កន្លែងនៅទូទាំងប្រទេស មានបុគ្គលិក៤,៣០០នាក់ ស្មើនឹង១៥ភាគរយនៃបុគ្គលិកបម្រើការងារ នៅក្នុងវិស័យធនាគារក្នុងប្រទេសកម្ពុជា”។

បច្ចុប្បន្ននេះមានក្រុមហ៊ុនជប៉ុនជាង២៥០ ដែលមានជំនឿចិត្តក្នុងការប ណ្តាក់ទុនវិនិយោគរកស៊ីនៅកម្ពុជា ។

លោក Han Chang Woo បានថ្លែងថា “១០ឆ្នាំកន្លងទៅនេះ កម្ពុជាមានការរីកចម្រើនយ៉ាងលឿននេះ គឺដោយសារភាពប៉ិនប្រសព្វ និងឈ្លាសសវៃរបស់សម្តេចតេជោ ក្នុងការដឹកនាំប្រទេស”។

នាយករដ្ឋមន្រ្តីកម្ពុជាសម្តេចតេជោ ហ៊ុន សែនបានមានប្រសាសន៍ថា ការរីកចំរើនរបស់កម្ពុជា គឺដោយសារនយោបាយរបស់កម្ពុជា ពិសេសការបើកចំហរលើគ្រប់វិស័យ នៃសេដ្ឋកិច្ចជាតិរួមទាំងការអនុញ្ញាត ឲ្យវិនិយោគិនបរទេសអាច​មកវិនិយោគផ្ទាល់១០០ភាគរយនៅកម្ពុជា។ សម្តេចតេជោបានជំរុញឲ្យ​លោក Han Chang Woo បន្តវិនិយោគនៅកម្ពុជា ហើយបន្តចូលរួមជួយក្នុងវិស័យសង្គម ជាពិសេសវិស័យកីឡា ដោយសារកម្ពុជានឹងធ្វើជាម្ចាស់ផ្ទះក្នុងរៀបចំកីឡាស៊ីហ្គេម នៅឆ្នាំ២០២៣ខាងមុខនេះ៕

ដោយ រ៉ាវី

ភ្នំពេញ៖ ស្ថិតនៅក្នុងបរិបទនៃភាពពុះកញ្ជ្រោល លើការវិនិយោគក្នុងវិស័យអចលនទ្រព្យនាពេលបច្ចុប្បន្ននេះ គេសង្កេតឃើញថាវិស័យនេះមានការរីកដុះដា​លគ្រប់ទីកន្លែង ជាពេលដែលអ្នកមានធនធានបានវិនិយោគលើផ្នែកផ្សេងៗក្នុងវិស័យនេះ ដូចជាទិញផ្ទះ ទិញដី ទិញខុនដូទុកលក់យកចំណេញជាដើម។

អ្នកវិនិយោគមានក្ដីរំពឹងទទួលបានភាគលាភ និងប្រាក់ចំណេញនៅថ្ងៃអនាគត ខណៈដែលអ្នកវិនិយោគមួយចំនួន បានធ្វើឡើងទាំងភាពប្រថុយប្រថាន។ ចង់ដឹងទេថា តើគួរសិក្សា និងពឹងផ្អែកទៅលើចំណុចគន្លឹះអ្វីខ្លះ ទើបអាចទទួលបានប្រាក់ចំណេញពីការវិនិយោគ និងគេចផុតពីការខាតបង់ ? សូមស្វែងយល់នូវគន្លឹះខ្លីៗ តែមានប្រយោជន៍ដូចខាងក្រោមជាមួយគេហទំព័រអចលនទ្រ ព្យ និងសេដ្ឋកិច្ចឈានមុខគេនៅកម្ពុជា www.propertyarea.asia។

-​សិក្សា​ទៅលើ​ទីតាំង មិនថាលោកអ្នកទិញ​លំនៅ​ឋាន​សម្រាប់​ស្នាក់​នៅ  ឬទិញសម្រាប់ការវិនិយោគបន្តនោះទេ ចំណុចដែលគួរពិចារណាមុនគេនោះ គឺគួរតែ​សិក្សា​ឱ្យ​បាន​លម្អិត​អំពី​ទីតាំង​ជា​មុន​សិន។ ត្រូវដឹងពីព័ត៌មាននានា​ឱ្យ​បាន​ច្រើន​បំផុត ​ដូច​ជា បរិយាកាស​ទូទៅ កត្តាប្រជាសាស្រ្ត និងកម្រិតជីវភាពក្នុងតំបន់ ភាព​ងាយស្រួល​ក្នុង​ការ​ធ្វើ​ដំណើរ ជាពិសេស ​សេវា​សាធារណៈ ដូច​ជា​ សាលារៀន មន្ទីរពេទ្យ ធនាគារ ជាដើម។

-​ប្រៀបធៀប​ព័ត៌មាន នៅពេល​បាន​សិក្សា​លម្អិត និង​ទទួល​បាន​ព័ត៌មានពាក់ព័ន្ធទាំងអស់ ដូចបានរៀបរាប់ខាង​នេះហើយ លោកអ្នក ​អាច​យក​ព័ត៌មាន​ទាំងនោះ​ទៅពិចារណា​ ដោយធ្វើការប្រៀបធៀបគ្នាជាមួយទីតាំងផ្សេងទៀត ដែ​លស្ថិតនៅក្នុងជម្រើសរបស់លោកអ្នកថា តើតំបន់ ឬទីតាំង​ណាមួយ ​ដែល​មានភាពទាក់ទាញ​ មានការ​ចាប់អារម្មណ៍​ច្រើន​ជាង ដោយដោយសំអាងទៅលើចំណង់​ចំណូលចិត្ត​របស់​ខ្លួន​ផ្ទាល់ ដែលជាចំណុច​សំខាន់។

– ភាពចាំបាច់​នៃ​ការ​ទិញ​លំនៅ​ដ្ឋាន  ការ​ទិញ​​លំនៅដ្ឋាន​សម្រាប់វិនិយោគដើម្បីទទួលបានចំណេញ ប្រសិនបើលោកអ្នកមានធនធានគ្រប់គ្រាន់ លើការទិញទុកវិនិយោគនោះ ដូចជា មិនសូវបញ្ហានោះទេ ប៉ុន្តែបើចំពោះអ្នកវិនិយោគដោយការបង់រំលស់ ឬពឹងផ្អែកទៅលើកម្ចីពីស្ថាប័នហិរញ្ញវត្ថុ គួរតែ​គិត​ឱ្យ​បាន​ដិត​ដល់​ ដែលវាអាចជាពី​បញ្ហាហានិភ័យខ្ពស់ និងអាចកើតមានជាយថាហេតុដោយប្រការណាមួយ។

ដូច្នេះលោក អ្នកគួរតែមានការត្រៀមទុក នូវដំណោះស្រាយលើផ្នែកហិរញ្ញវត្ថុឱ្យបានរួចរាល់ជាស្រេច។​ចំណុច​សំខាន់ និងចាំបាច់មួយចំណុចទៀត គឺប្រភពចំណូលដែលត្រៀមបង់រំលស់ប្រកបដោយស្ថិរភាព។

-​ពិគ្រោះ​យោបល់​ជាមួយអ្នកជំនាញ ដើម្បីជួយ​ឱ្យ​ការ​ទិញសម្រាប់វិនិយោ​គរបស់លោក អ្នកអាចមានភាពរលូនទៅបាន លោក អ្នកគួរ​តែរក​អ្នកជំនាញផ្នែកវិស័យនេះ ដើម្បី​ជួយ​ផ្តល់​ជាយោបល់មុនពេលសម្រេចចិត្តទិញ ពីព្រោះ​ថាការសុំពិគ្រោះពីសំណាក់អ្នកជំនាញ ក្រៅពី​អាច​ជួយ​កាត់​បន្ថយ​ហានិភ័យ​ហើយ​នោះ ថែម​ទាំង​ធ្វើ​ឱ្យ​ការ​ទិញ​ ​លក់​លំនៅ​ដ្ឋានរបស់លោក អ្នក​មានភាព​ជឿជាក់​ និងប្រាកដថាការសម្រេចចិត្ត មិនត្រូវធ្វើឡើងទាំងភាពប្រថុយប្រថាននោះទេ៕

ដោយគង់ សូរិយា

       ភ្នំពេញ៖ បន្ទាប់ពីគំរោងផ្លូវក្រវ៉ាត់ក្រុងទី៣ត្រូវបានគូសវាស និងទទួលបានហិរញ្ញប្បទានសម្រាប់ដំណើរការសាងសង់ រដ្ឋាភិបាលតាមរយៈក្រសួងសាធារណៈការ និងដឹកជញ្ជូន កំពុងសិក្សាលទ្ឋភាពសាងសង់ផ្លូវក្រវ៉ាត់ក្រុងទី៤មួយទៀត ដើម្បីសម្រួលការដឹកជញ្ជូននូវតំបន់ជាយក្រុងភ្នំពេញ។

អ្នកនាំពាក្យក្រសួងសាធារណៈការ និងដឹកជញ្ជូនលោក វ៉ាស៊ីម សូរិយា បានមានប្រ​សាសន៍ឲ្យដឹងកាលពីចុងសប្តាហ៍មុនថា ការសាងសង់ផ្លូវក្រវ៉ាត់ក្រុងទី៣នឹងចាប់ផ្តើមឆាប់ៗនេះ ដោយផ្លូវនេះចាកចេញពីតំបន់ទំនប់កប់ស្រូវ មកបញ្ចប់នូវទីតាំងកំពង់ផែស្វ័យត្ន​ភ្នំពេញ និងផ្លូវក្រវ៉ាត់ក្រុងទី៤នឹងចាប់ផ្តើមចេញពីកំពង់ផែនេះ ឆ្ពោះទៅកាន់ស្ពានព្រែកតាមាក់ ដោយឆ្លងកាត់ស្រុកល្វាឯម និងស្រុកខ្សាច់កណ្តាល ខេត្តកណ្តាល។

លោកបន្តថា តាមគំរោងផ្លូវនេះ អាចវាងចេញពីកំពង់ផែភ្នំពេញ ឆ្ពោះមកកាន់គំរោងស្ពានក្តីតាកុយ ឆ្ពោះទៅតំបន់អរិយក្សត្រ ប៉ុន្តែអាចមានលទ្ឋភាពមួយទៀត គឺការ​សា​ងសង់ស្ពានកាត់ទន្លេនៅស្រុកកៀនស្វាយមួយទៀត ឆ្ពោះទៅកាន់ស្រុកខ្សាច់កណ្តាល។ លោកបន្តថា ទោះជាយ៉ាងណាផែ​នការលំអិត ទាក់ទងគំរោងផ្លូវខ្សែក្រវ៉ាត់ក្រុងទី៤ មិនទាន់មានសិក្សាលំអិតនៅឡើយទេ។

ផ្លូវក្រវ៉ាត់ក្រុងទី៤ នឹងរត់មកប្រសព្វគ្នាជាមួយផ្លូវជាតិលេខ៨សព្វថ្ងៃនេះផងដែរ។

ដើមឡើយផ្លូវក្រវ៉ាត់ក្រុងទី១ ជាផ្លូវលខ២៧១សព្វថ្ងៃនេះ ប៉ុន្តែដោយសាររាជធានីភ្នំពេញមានការអភិវឌ្ឍន៍យ៉ាងឆាប់រហ័ស ទើបផ្លូវក្រវ៉ាត់ក្រុងទី២បានសាងសង់ឡើងហើ​យបានបញ្ចប់កាលពីប៉ុ​ន្មានឆ្នាំមុន។ ហេតុនេះការសាងសង់ផ្លូវក្រវ៉ាត់ក្រុងទី៣ នឹងមិនគ្រប់គ្រាន់ទេ សម្រាប់ផែនការតភ្ជាប់និងសម្រួលការដឹកជញ្ជូន។

សម្តេចតេជោហ៊ុន សែននាយករដ្ឋមន្រ្តីនៃព្រះរាជាណាចក្រកម្ពុជាធ្លាប់បានមានប្រ​សាសន៍រួចហើយថា ដើម្បីធ្វើឲ្យខ្សែសង្វាក់ដឹកជញ្ជូន និងតភ្ជាប់ផ្លូវក្រវ៉ាត់ក្រុង រដ្ឋាភិបាល​នឹងសាងសង់ស្ពានពីក្តីតាកុយ ឆ្ពោះទៅតំបន់អរិយក្សត្រ និងស្ពានពីតំបន់ជ្រោយចង្វារទៅកាន់តំបន់ស្វាយជ្រុំនាពេ​លខាងមុខនេះ៕

ដោយ វុត្ថា

ភ្នំពេញៈ អ្នកជំនាញទីផ្សារសម្ភារៈសំណង់នៅក្នុងប្រទេសកម្ពុជាបានអោយដឹងថា ការប្រើប្រើសសម្ភារៈ គ្រឿងសំណង់ផ្សេងៗកំពុងមានការកើនឡើងខ្ពស់គួរអោយកត់សម្គាល់ក្នុងរយៈពេលប៉ុន្មានឆ្នាំចុងក្រោយនេះ ខណៈ ស្ថេរភាពនយោបាយ សេដ្ឋកិច្ចក្នុងប្រទេសមានស្ថានភាពល្អ និង វិស័យសំណង់ក្នុងប្រទេសកម្ពុជា ក៏កំពុងមាន ការរីកលូតលាស់ខ្លាំងទាំងនៅក្នុងទីប្រជុំជន និងជនបទ។

ថ្លែងនៅក្នុងពិធីសម្ពោធម៉ាក់សញ្ញាផលិតផលសម្ភារៈសំណង់ MC ពីប្រទេសម៉ាឡេស៊ីនៅថ្ងៃទី ១៨ ខែសីហានេះ នៅសណ្ឋាគារមួយនៅក្នុងទីក្រុងភ្នំពេញ លោក ហ៊ួត ជា អគ្គនាយកក្រុមហ៊ុន ហ៊ួត ជា បានអោយដឹងថា ប្រទេសកម្ពុជានៅពេលនេះ មានស្ថេរភាពនយោបាយ មានសេដ្ឋកិច្ចល្អ កំណើនការសាងសង់ច្រើននៅក្នុងប្រទេស កម្ពុជា ក៏សម្ភារៈគ្រឿងសំណង់ក៏កំពុងមានតម្រូវការការខ្លាំងណាស់ផងដែរ។

លោកបន្តថា ដោយមើលឃើញពីតម្រូវការទីផ្សារខ្ពស់នេះ ហើយទើបក្រុមហ៊ុនរបស់លោកបន្តនាំយកគ្រឿងសំណង់មក ពីក្រៅប្រទេសមកផ្គត់ផ្គង់នៅក្នុងទីផ្សារកម្ពុជា។

លោកបញ្ជាក់ថា សម្រាប់ទីផ្សារគ្រឿងសំណង់នៅតែបន្តបោះជំហ៊ានទៅមុខឥតឈប់ឈរ ដោយក្នុងនោះ ក្រុមហ៊ុយរបស់លោកទាំង ២៣ សាខានៅទូទាំងប្រទេសនៅតែដំណើរការ និងមានការបញ្ជាទិញពីអតិថិជនជាច្រើន ពុំមានអ្វីប្រែប្រួលនោះទេ។

លោកអគ្គនាយកក្រុមហ៊ុន ហួតជា រូបនេះ បានញ្ជាក់ទៀតថា ការផ្គត់ផ្គន់ទីផ្សារសម្ភរៈគ្រឿងសំណង់មិនមានអ្វីខ្វះខាតនោះទេ តែអ្វីដែលខ្វះខាតគឺការទទួលខុសត្រូវពីម្ចាស់ក្រុមហ៊ុនផ្គត់ផ្គង់ទៅវិញទេ ដូច្នេះហើយបានជាក្រុមហ៊ុនរបស់លោក បាននាំចូលតែសម្ភារៈសំណង់ណាដែលមានគុណភាព និងធនាដល់ការប្រើប្រាស់រយៈពេលវែង ។
តែយ៉ាងណាទន្ទឹមនឹងការរីកចម្រើនទីផ្សារសម្ភារៈសំណង់យ៉ាងណាក្តី ក៏ការប្រកួតប្រជែងក្នុងវិស័យនេះនៅតែមានខ្លាំងណាស់ដែរទាំងនៅក្នុងស្រុក និងក្រៅស្រុក ដែលតម្រូវអោយក្រុមហ៊ុនផ្គត់ផ្គង់សម្ភារៈសំណង់នីមួយៗមានការធានាដល់ផលិតផលអោយមានគុណភាព និងស្តង់ស្តារខ្ពស់ផ្គត់ផ្គង់ជូនដល់អតិថិជនរបស់ខ្លួន។

របាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បង្ហាញថា ក្នុងរយៈពេល ០៦ខែ ដើមឆ្នាំ២០១៨ ក្រសួងបានផ្ដល់លិខិតអនុញ្ញាតសាងសង់បានចំនួន ១ ៦៤៣ គម្រោង មានផ្ទៃក្រឡាសំណង់សរុប ៥ ៣៥២ ៤២២ ម៉ែត្រការ៉េ មានតម្លៃវិនិយោគប៉ាន់ស្មាន ២ ១៥៣ ២១១ ១១៨ ដុល្លារសហរដ្ឋអាមេរិក ក្នុងនោះ ទុនវិនិយោគមកពីបរទេសចំនួន ៨ ប្រទេស មាន ២១ គម្រោង មានផ្ទៃក្រឡាសំណង់សរុប ៩២៨ ២៦៧ ម៉ែត្រការ៉េ មានតម្លៃប៉ាន់ស្មាន ៣៩៤ ៣៣២ ៣០០ ដុល្លារ។

វិស័យសំណង់ផ្ដល់ការងារ ដល់អ្នកជំនាញ និងកម្មករ ប្រមាណ ១៨ ម៉ឺននាក់ក្នុងមួយថ្ងៃនៅតាមការដ្ឋានសំណង់នៅទូទាំងប្រទេសព្រមទាំងទទួលបានប្រាក់ឈ្នួលពី ៤០០ដុល្លារ ទៅ ២ ៥០០ដុល្លារ ក្នុងមួយខែ។ នេះ សបញ្ជាក់នូវជំនឿជឿជាក់ និងសុទិដ្ឋិនិយម របស់វិនិយោគិន ក៏ដូចជាប្រជាពលរដ្ឋ មកលើសុខសន្តិភាព ស្ថិរភាពនយោបាយ និងការអភិវឌ្ឍន៍នៅកម្ពុជាក្នុងគ្រប់កាលទេសៈ ទាំងអស់៕

ដោយគង់ សូរិយា

       ភ្នំពេញ៖ ផ្លូវក្រវ៉ាត់ក្រុងទី៣នឹងសាងសង់នាពេលឆាប់ៗខាងមុខនេះ បន្ទាប់ពីរដ្ឋាភិបាលចិន បានប្រកាសផ្តល់ហិរញ្ញប្បទានសម្បទាន ចំនួន២៥៩លានដុល្លារអាមេរិក ប៉ុន្តែ​ផ្លូវដ៏សំខាន់នេះមានចំណុចគួរឲ្យចាប់អារម្មណ៍ជាច្រើន។

បើយោងតាមអ្នកនាំពាក្យក្រសួងសាធារណៈការ និងដឹកជញ្ជូនលោកវ៉ាស៊ីម សូរិយាបានមានប្រសាសន៍ឲ្យដឹងនាព្រឹកថ្ងៃទី១៨ សីហានេះថា ផ្លូវខ្សែក្រវ៉ាត់ក្រុងទី៣នេះនឹង​សាងសង់ចេញពីចំណុចតំបន់ទំនប់កប់ស្រូវ និងត្រូវសាងសង់ស្ពានអាកាសចំនួន៥ មុនពេលផ្លូវនេះមកបញ្ចប់នៅកំពង់ផែភ្នំពេញ ស្ថិតនៅក្នុងស្រុកកៀនស្វាយ ខេត្តកណ្តាល។លោកបន្តថា ស្ពានអាកាសចំនួន៥នឹងសាងសង់នៅលើគំរោងនេះ ដូចជាស្ពានអាកា​សឆ្លងកាត់ផ្លូវជាតិលេខ៤ ផ្លូវលេខ៣ ផ្លូវជាតិលេខ២១ ផ្លូវជាតិលេខ២ និងផ្លូវលេខ១១០ និងមានស្ពានឆ្លងទន្លេវែងមួយទៀត ឆ្លងកាត់នៅតំបន់កោះអន្លង់ចិន មកកាន់ឃុំឈើទាល ក្នុងស្រុកកៀនស្វាយ ខេត្តកណ្តាល។

លោកបន្តថា “ការបើកការដ្ឋានសាងសង់ផ្លូវក្រវ៉ាត់ក្រុងទី៣នេះ នឹងចាប់ផ្តើមឆាប់ៗ​ខាងមុខនេះហើយ”។លោកបន្តថា “វាជាផ្លូវដ៏សំខាន់មួយដើម្បីសម្រួលការដឹកជញ្ជូន វាងរាជធានីភ្នំពេញ និងរួមចំណែកលើកកំពស់ការកសាងសេដ្ឋកិច្ចសង្គម”។

ជាមួយគ្នានេះ រដ្ឋាភិបាលនឹងកសាងផ្លូវក្រវ៉ាត់ក្រុងទី៤ នាពេលខាងមុខផងដែរ ដែល PROPERTYAREA.ASIA នឹងបង្ហាញជូននូវគំរោងនេះនាពេលខាងមុខនេះ។

លោកវ៉ាស៊ីម សូរិយាបានបន្តឲ្យដឹងទៀតថា ជាមួយនឹងផែនការអភិវឌ្ឍន៍ប្រទេស រដ្ឋាភិបាលត្រូវវិនិយោគកាន់តែច្រើន ដើម្បីកសាងហេដ្ឋារចនាសម្ព័ន្ឋ ព្រោះបើសិនជាចង់ជំ​រុញសេដ្ឋកិច្ចជាតិរីកចម្រើនបន្ថែមទៀត ត្រូវតែកសាងហេដ្ឋារចនាសម្ព័​ន្ឋសមស្រប ដើម្បីបង្កើតតម្លៃបន្ថែម និងកាត់បន្ថយតម្លៃនៃការដឹកជញ្ជូននៅកម្ពុជា ព្រោះតម្លៃនៃការដឹកជញ្ជូនរបស់យើងមានតម្លៃថ្លៃ ធៀបនឹងបណ្តាប្រទេសដទៃជាសមាជិកសហគមន៍សេដ្ឋកិច្ចអាស៊ាន។

លោកបណ្ឌិតម៉ី កល្យាណទីប្រឹក្សាឧត្តមក្រុមប្រឹក្សាសេដ្ឋកិច្ចជាតិបានថ្លែងថា ការកសាងហេដ្ឋារចនាសម្ព័ន្ឋត្រូវការរយៈពេលវែង មិនមែនធ្វើបានមួយខែឬមួយថ្ងៃទេ ហេតុនេះរដ្ឋាភិបាលគួរពន្លឿនការវិនិយោគក្នុងវិស័យនេះ ព្រោះវាជាវិស័យប្រឈមធំមួយក្នុង​សេដ្ឋកិច្ចកម្ពុជា។

លោកបន្តថា “ទោះជាយ៉ាងណាខ្ញុំសង្កេតឃើញថា រដ្ឋាភិបាលបាន​និងកំពុងយកចិត្តទុកដាក់កសាងហេដ្ឋារចនាសម្ព័ន្ឋហើយ តែនៅក្នុងល្បឿនយឺតៗមួយ”។

សម្តេចតេជោហ៊ុន សែននាយករដ្ឋមន្រ្តីកម្ពុជាធ្លាប់បានប្រកាសជារឿយៗថា គោ​ល​នយោបាយរបស់សម្តេចដាក់ចេញតាំងពីទសវត្សរ៍៩០ រហូតមកទល់ពេលនេះនៅ​តែសមស្រប នឹងស្ថានភាពសេដ្ឋកិច្ចសង្គមកម្ពុជា នោះគឺការអភិវឌ្ឍទឹក ភ្លើង ផ្លូវ និងមនុស្ស៕