ដោយ គង់ សូរិយា

ភ្នំពេញ៖  សមាគម​អ្នកជំនាញ​អចលនទ្រព្យ​កម្ពុជា និង​ក្រុមហ៊ុន​ប​ចេ្ច​ក​វិទ្យា​ដែល​ផ្តោត​លើ​សេវាកម្ម​បែប​អន្តរការី​រវាង​អ្នក​អភិវឌ្ឍន៍ និង​ភ្នាក់ងារ​ទិញ​លក់​អចលនទ្រព្យ PropEast  ដែលមាន​មូលដ្ឋាន​នៅ​ប្រទេស​សឹង្ហ​បុរី បាន​ចុះ​កិច្ចព្រមព្រៀង​ជា​ដៃគូ​យុទ្ធសាស្ត្រ ដើម្បី​ជំរុញ​ការរីកចំរើន​លើ​វិស័យ​អចលនទ្រព្យ និង​លើកទឹកចិត្ត​ដល់​លំហូរ​អ្នកវិនិយោគទុន​បន្ថែម​ទៀត។

លោក ឃាង ពុ​ទ្ធី ប្រធាន​សមាគម​អ្នកជំនាញ​អចលនទ្រព្យ​កម្ពុជា បាន​មានប្រសាសន៍ប្រាប់​ទូរទស្សន៍​ព័ត​មាន​កាលពី​ថក​ងៃ​ទី២៨ វិច្ឆិកា​កន្លងមក​ថា គោលបំណង​នៃ​កិច្ចព្រមព្រៀង​នេះ ដើម្បី​ធ្វើការ​ផ្សព្វផ្សាយ​ដល់​សមាជិក​ឲ្យ​ស្គាល់​អំពី ការសម្រេចចិត្ត​ឈាន​ជើង​ចូលមក​ប្រទេស​កម្ពុជា​របស់​ក្រុមហ៊ុន​ប្រូ​ប​អ៊ី​ស ក្នុង​ការបម្រើ​សេវាកម្ម​ទំរង់​កម្មវិធី​ទូរស័ព្ទដៃ​ទំនើប​ដំបូង​ដែលជា​សេវាកម្ម​ទិញ​លក់​រវាង​អ្នក​អភិវឌ្ឍន៍ និង​ភ្នាក់ងារ​ទិញ​លក់​អចលនទ្រព្យ​នៅ​កម្ពុជា។

លោក​បាន​បន្តថា បន្ទាប់ពី​ចុះ​កិច្ចព្រមព្រៀង​រវាង​សមាគម និង​ក្រុមហ៊ុន PropEast នឹង​ព្យាយាម​ជួយ​សមាគម​អ្នកជំនាញ​អចលនទ្រព្យ ក្នុងការ​ជំរុញ​ការផ្សព្វផ្សាយ​ដល់​ម្ចាស់​គម្រោង​អភិវឌ្ឍន៍​នានា ឲ្យ​យល់​ពី​សារៈសំខាន់​នៃ​សេវាកម្ម និង​ព្យាយាម​ពន្យល់​ដល់ទី​ភ្នាក់ងារ​អចលនវត្ថុ​នៅក្នុង​ប្រទេស​កម្ពុជា​ដទៃ​ផ្សេងទៀត ឲ្យ​ស្វែងយល់​អំពី​សារៈសំខាន់ និង​ឈានទៅ​ប្រើប្រាស់​ធ្វើការ​សហការ​ជាមួយគ្នា។

ជាមួយគ្នានេះ លោក DATO Dr.JAY HO អគ្គនាយក​ក្រុមហ៊ុន PropEast បាន​មានប្រសាសន៍​ឲ្យ​ដឹងផង​ដែរ​ថា ក្រុមហ៊ុន​លោក​បាន​បង្កើតឡើង​តាំងពី​ឆ្នាំ២០១៧ ។ ទំរង់​កម្មវិធី​ទូរស័ព្ទដៃ​ទំនើប​ដំបូង គឺ​ផ្តោតទៅលើ​ការងារ​គ្រប់គ្រង​ផ្នែក​អ​ច លន​ទ្រព្យ និង​ការដឹកជញ្ជូន​អចលនទ្រព្យ​ដល់​អ្នកវិនិយោគទុន។ បច្ចុប្បន្ននេះ PropEast មាន​ការិយាល័យ​នៅ​ប្រទេស​កម្ពុជា និង​ម៉ាឡេស៊ី ហើយ​កំពុងតែ​រៀបចំ​ចូល​ប្រទេស​ថៃឡង់​ដ និង​វៀតណាម​ដែរ ក្នុង​ទស្សនៈវិស័យ​ដើម្បី​បង្កើតជា​បណ្តាញ​ទីផ្សារ​អចលនទ្រព្យ​នៅ​អាស៊ាន​ជាមួយនឹង​ទំរង់​កម្មវិធី​ទូរស័ព្ទដៃ​ទំនើប​ដំបូង។

លោក​បញ្ជាក់ទៀតថា ក្រុមហ៊ុន​លោក​បាន​អភិវឌ្ឍន៍​ការងារ លើ​ការគ្រប់គ្រង​ផ្នែក​អចលនទ្រព្យ និង​ទំរង់ការ​ដឹកជញ្ជូន​អចលនទ្រព្យ​ជា​លើកដំបូង​លើ​ពិភពលោក ដើម្បី​បំរើ​អ្នកវិនិយោគទុន​អចលនទ្រព្យ​ក្នុង​តំបន់ នៅពេល​មាន​ប្រតិបត្តិការ ផ្ទេរ ប្រគល់​អង្គភាព ការត្រួតពិនិត្យ​អង្គភាព គ្រឿង​សង្ហា​រឹម សំរាប់​ជួល និង​ជុស​ជួល តាម​បណ្តាញ​យើង ជាមួយ​អ្នកផ្តល់​សេវា​ប្រកបដោយ​វិជ្ជាជីវៈ។

សមាគម​អ្នកជំនាញ​អចលនទ្រព្យ​កម្ពុជា ទើបបាន​បើក​ដំនើរការ​ប៉ុន្តែ​មាន​សមាជិក​កើនឡើង​រហូតដល់​ចំនួន៩៥ក្រុមហ៊ុន៕

ដោយស៊ីវ ម៉េង

ភ្នំពេញ: គំរោងសាងសង់ផ្លូវល្បឿនលឿនជាលើកដំបូង ក្នុងប្រវត្តិសាស្រ្តកម្ពុជាទំនងជាត្រូវពន្យាពេល បន្ទាប់ពីការប្រកាសគំរោងនេះនឹងចាប់ផ្តើមសាងសង់នៅកំឡូងខែវិច្ឆិកាឆ្នាំនេះ។

អ្នកនាំពាក្យក្រសួងសាធារណៈការ និងដឹកជញ្ជូនលោកនូ វឌ្ឈនៈបានមានប្រសា សន៍ឲ្យដឹងតាមទូរស័ព្ទ នាព្រឹកថ្ងៃទី២៨ វិច្ឆិកានេះថា លោកមិនទាន់មានព៌តមានទាក់ទងនឹងការចាប់ផ្តើមសាងសង់ផ្លូវ ប្រវែងប្រមាណ១៩០គីឡូម៉ែត្រនេះនៅឡើយទេ។

បើតាមលោកវ៉ាស៊ីម សូរិយាអ្នកនាំពាក្យក្រសួងនេះធ្លាប់បានឲ្យដឹងផងដែរ
ថា “តាមគំរោងផ្លូវនេះនឹងសាងសង់ នៅស្របតាមផ្លូវជាតិលេខ៤ ទាំងសងខាង ប៉ុន្តែភាគច្រើនស្ថិតនៅខាងឆ្វេងដៃនៃផ្លូវជាតិលេខ៤ ជាតំបន់ដែលផ្លូវ៤គន្លងនេះនឹងឆ្លងកាត់”។លោកបន្តថា “គិតពីពេលនេះតទៅ ការសាងសង់ផ្លូវល្បឿនលឿន ក៏ដូចជាសាងសង់ហេដ្ឋារចនាសម្ព័ន្ឋនានាជារឿងចាំបាច់ ដើម្បីបង្កើនសន្ទុះសេដ្ឋកិច្ចជាតិ”។

តាមឯកសារដែលទទួលបាន នៅក្នុងពិធីចុះហត្ថលេខារវាងលោកទេសរដ្ឋមន្រ្តីស៊ុន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូនជាមួយលោកLiu Gitaoប្រធានក្រុមហ៊ុនសំណង់គមនាគមន៍ចិន ក្នុងកំឡុងដំណើរទស្សនកិច្ចរបស់នាយករដ្ឋមន្រ្តីចិន លោកលី ខឺឈាងមកកម្ពុជាកាលពីឆ្នាំមុនបានឲ្យដឹងថា ផ្លូវល្បឿនលឿននេះ មានប្រវែង១៩០,៦៣គីឡូម៉ែត្រ និងមានទទឹងផ្លូវទំហំ២៤ម៉ែត្រ និងធ្វើឡើងក្រោមរូបភាពBOT។ ផ្លូវនេះជាប្រភេទផ្លូវមានសួនច្បារកណ្តាល និងរបាំងសងខាងផ្លូវ និងមានទីតាំងសម្រាប់ឈប់សម្រាកផងដែរ។

លោកវ៉ា ស៊ីមសូរិយាបានបន្តឲ្យដឹងថា ការសាងសង់ផ្លូវល្បឿនលឿននេះ នឹងមានទីតាំងចំណុចឆ្លងកាត់ប្រមាណ១០កន្លែង ជាផ្លូវដែលលោកគិតថានឹងជួយដល់សេដ្ឋកិច្ចជាតិ ព្រមទាំងកាត់បន្ថយគ្រោះថ្នាក់ចរាចរណ៍ និងធ្វើឲ្យតម្លៃនៃការដឹកជញ្ជូនរបស់កម្ពុជាធ្លាក់ចុះផងដែរ។លោកបន្តថា តាមគំរោងការសាងសង់ផ្លូវនេះ គ្រោងចំណាយរយៈពេល៤ឆ្នាំ ទើបបញ្ចប់ការសាងសង់ ហេតុនេះ យើងរំពឹងថា ការសាងសង់នឹងអាចធ្វើឡើងឆាប់ៗនេះ។

ក្រោយការសាងសង់ផ្លូវល្បឿនលឿននេះបញ្ចប់ ផ្លូវនេះនឹងជួយសម្រួលការធ្វើដំណើរទៅខេត្តព្រះសីហនុកាន់តែខ្លី ជួយសម្រួលដល់ការដឹកជញ្ជូនទំនិញ ធ្វើឲ្យសេដ្ឋកិច្ចជាតិ មានការរីកចម្រើនកាន់តែល្អប្រសើរថែមទៀត។

រដ្ឋាភិបាលបានដាក់ខេត្តព្រះសីហនុទាំងមូល ជាតំបន់ឧស្សាហកម្ម នៅក្នុង គោលនយោបាយអភិវឌ្ឍន៍វិស័យឧស្សាហកម្ម ឆ្នាំ២០១៥ ២០១៥ ដែលជាគោលនយោបាយមួយត្រូវបានអនុម័ត និងដាក់ឲ្យប្រើប្រាស់ជាផ្លូវការនៅខែតុលា ឆ្នាំ២០១៦កន្លងមកនេះ។

ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិលោកបណ្ឌិតម៉ី កល្យាណបានថ្លែងថា បញ្ហាប្រឈមក្នុងសេដ្ឋកិច្ចរបស់យើង គឺការដឹកជញ្ជូនមានតម្លៃថ្លៃ ដោយសារកង្វះហេដ្ឋារចនាសម្ព័ន្ឋ ដែលរដ្ឋាភិបាលបាននិងកំពុងគិតគូវិនិយោគ ប៉ុន្តែការសាងសង់អ្វីមួយ វាមិនចំណាយពេលមួយថ្ងៃឬមួយឆ្នាំទេ ហេតុនេះរដ្ឋាភិបាលគួរពន្លឿនការវិនិយោគលើផ្លូវល្បឿនលឿន និងហេដ្ឋារចនាសម្ព័ន្ឋដទៃទៀត។

លោកបន្តថា “ការសាងសង់ផ្លូវល្បឿនលឿន ឬហេដ្ឋារចនាសម្ព័ន្ឋនានា ជាការបង្កើនកំណើនសេដ្ឋកិច្ចជាតិ ព្រោះបើចង់ជំរុញកំនើនសេដ្ឋកិច្ចជាតិ ត្រូវតែវិនិយោគលើហេដ្ឋារចនាសម្ព័ន្ឋ”៕

ដោយ ស៊ីវ ម៉េង

ភ្នំពេញ៖ សម្តេច​តេ​ជោ​ហ៊ុន សែន​នាយករដ្ឋមន្ត្រី​កម្ពុជា​បាន​បង្ហើប​ពី​គំរោង​ព្រលានយន្តហោះ​ថ្មី​នៅ​រាជធានី​ភ្នំពេញ និង​ខេត្តសៀមរាប ជាមួយ​កំនើន​ទស​ចរណ៍​កើនឡើង​មិន​នឹង​ស្មាន​ដល់។

សម្តេច​បាន​មានប្រសាសន៍​ក្នុងជំនួប​ជាមួយ​កម្មករ និយោជិត​ប្រមាណ២ម៉ឺន​នាក់​នៅ​ស្រុក​កណ្តាលស្ទឹង ខេត្តកណ្តាល នា​ព្រឹក​ថ្ងៃទី២៨ វិច្ឆិកា​នេះ​ថា ក្នុងជំនួប​ជាមួយ​ក្រុមហ៊ុន​បារាំង ដែល​កំពុង​គ្រប់គ្រង​ព្រលានយន្តហោះ​អន្តរជាតិ​ភ្នំពេញ ក្រុមហ៊ុន​នេះ​បានបង្ហាញ​ពី​ការមិន​នឹកស្មាន​ចំពោះ​កំនើន​ទេសចរណ៍​នៅ​កម្ពុជា ហើយ​គាំទ្រ​ដល់​ការបង្កើត​ព្រលានយន្តហោះ​ភ្នំពេញ និង​ព្រលានយន្តហោះ​ក្នុង​ខេត្តសៀមរាប។

សម្តេច​បន្តថា “ជាមួយគ្នានេះ​ព្រលានយន្តហោះ​ខេត្ត​ព្រះសីហនុ នឹងត្រូវ​ពង្រីក​បន្ថែម ដែល​អាច​ទទួលបាន​ភ្ញៀវ​ទេសចរណ៍​ប្រមាណ៣លាន​នាក់​នៅ​ថ្ងៃ​ខាងមុខ។

លោក​ពេជ្រ សុ​ប៉ុន​តារា​ប្រធាន​ផ្នែក​បង្កើន​ជើងហោះហើរ​នៃ​ក្រុមហ៊ុន​អាកាសយានដ្ឋាន​អន្តរជាតិ​ភ្នំពេញ បាន​មានប្រសាសន៍​ឲ្យ​ដឹង​កាលពីពេលថ្មីៗនេះ​ថា ព្រលានយន្តហោះ​កងកេង ក្រុងព្រះសីហនុ​នឹងត្រូវ​ពង្រីក​ផ្លូវ​រត់​ប្រវែង១០០០ម៉ែត្រ​ទៀត ដែល​ធ្វើ​ឲ្យ​ព្រលាន​នេះ​មាន​ប្រវែង​ផ្លូវ​រត់ ស្មើនឹង​ព្រលានយន្តហោះ​ភ្នំពេញ​សព្វថ្ងៃ។ លោក​បន្តថា ក្រោយ​ការពង្រីក​ព្រលាន​កងកេង ក្រុងព្រះសីហនុ​នឹង​អាច​ចុះចត​យន្តហោះ ដែល​អាច​ផ្ទុក​អ្នកដំណើរ​បាន​ប្រមាណ៤០០នាក់។

លោក​បន្តថា “ជាមួយគ្នានេះ​ក្រុមហ៊ុន​បាន​សិក្សា និង​ធ្លាប់​បានផ្តល់​អនុសាសន៍​ឲ្យ​រដ្ឋាភិបាល​សាងសង់​ព្រលានយន្តហោះ​ក្នុងស្រុក​ចំនួន​បី​ទៀត​ផងដែរ គឺ​នៅ​ខេត្តស្ទឹងត្រែង បាត់ដំបង និង​ខេត្តព្រះវិហារ ប៉ុន្តែ​ការសម្រេចចិត្ត​យ៉ាងណា ជាការ​សម្រេច​របស់រ​ដ្ឋា​ភិ​បាល​កម្ពុជា៕

ដោយ គង់ សូរិយា

ភ្នំពេញ៖ មន្ត្រីជាន់ខ្ពស់​ក្រសួង​រៀបចំ​ដែនដី នគរូបនីយកម្ម​និង​សំណង់​បាន​ថ្លែងថា ការរីកចម្រើន​សេដ្ឋកិច្ច​បាន​ជួយ​ធ្វើ​ឲ្យ​តម្លៃ​ដីធ្លី​កើនឡើង​នៅ​កម្ពុជា និង​បន្ត​កើនឡើង​រយៈពេល​វែង​បន្តទៀត។

រដ្ឋលេខាធិការ​ក្រសួង​រៀបចំ​ដែនដី នគរូបនីយកម្ម និង​សំណង់​លោក ​ប៉ែន សុផល ​បាន​មានប្រសាសន៍​ក្នុង​ពិធី​បើក​សិក្ខាសាលា​ស្តីពី ការផ្សព្វផ្សាយ​ប្លង់គោល​ប្រើប្រាស់​ដី​ក្រុងកែប និង​ក្រុង​កំពត​សម្រាប់​ការគ្រប់គ្រង និង​អភិវឌ្ឍន៍​តំបន់ឆ្នេរ​កម្ពុជា​ប្រកបដោយ​ចីរភាព ដែល​បាន​រៀបចំឡើង​នៅ​ថ្ងៃទី ២៧ ខែវិច្ឆិកា ឆ្នាំ២០១៨កន្លងមក​ថា ឆ្លងកាត់​យុទ្ធសាស្ត្រ​ចតុកោណ​របស់​ប្រមុខ​រាជរដ្ឋាភិបាល​ជាច្រើន​ដំណាក់ កម្ពុ​ជាមាន​ភាព​រីកចម្រើន និង​អភិវឌ្ឍន៍​លើ​គ្រប់​វិស័យ និង​ថា​កំណើន​នៃ​តម្លៃ​ដីធ្លី​ក្នុង​ទំហំ​មួយ​ការ​រ៉េ អាច​បញ្ជាក់​អំពី​កំណើនសេដ្ឋកិច្ច​របស់​ក​ម្ពុ​ជា នាពេល​បច្ចុប្បន្ន​បាន។

លោក​បន្តថា “គោលនយោបាយ​ជាតិ​ស្តីពី​ការរៀបចំ​ដែនដី​កម្ពុជា គឺ​ដើម្បី​ធានា​ការគ្រប់គ្រង ការអភិវឌ្ឍន៍ និង​ការប្រើប្រាស់​ដី​និង​ធនធានធម្មជាតិ​ឲ្យ​មាន​ប្រសិទ្ធភាព ចីរភាព និង​តុល្យភាព។លោក​បន្តថា “កម្ពុជា​បានកំណត់​ប៉ូល​អភិវឌ្ឍន៍​ជាតិ​របស់ខ្លួន​ទី១ រាជធានី​ភ្នំពេញ ទី២ ខេត្តសៀមរាប(ប៉ូល​បីតិ​ក​ភ័​ណ្ឌ​ជាតិ  និង​ប៉ូល​ទី៣តំបន់ឆ្នេរ​សមុទ្រ​កម្ពុជា ដែលមាន​ខេត្ត​ជាប់​សមុទ្រ​ទាំង​បួន។

លោក​ប៉ែន សុផល​បាន​បន្តថា បច្ចុប្បន្ន​ប៉ូល​ទាំងបី​នេះ​កំពុង​រីកចម្រើន​ខ្លាំង ហើយ​ក្រសួង​បាន​ចាត់ទុកថា ខេត្ត​ព្រះសីហនុ​ដែល​កំពុងមាន​ការអភិវឌ្ឍ​យ៉ាងគំហុក ជា​តំបន់​ក្បាល​នាគ​នៃ​កម្ពុជា។ រាជធានី​ភ្នំពេញ​ជា​ខ្លួន​នាគ និង​កន្ទុយ​នាគ នៅ​ភូមិភាគ​ឦ​សាន្ត​នៃ​ប្រទេស ដែលជា​ប៉ូល​អភិវឌ្ឍ​ន៍ទី៤ ដែលមាន​កំណត់​នៅក្នុង​គោលនយោបាយ​ជាតិ​ស្តីពី ការរៀបចំ​ដែនដី​ផងដែរ ហើយ​ប៉ូល​ទី៤នេះ ជា​ប៉ូល កសិឧស្សាហកម្ម និង​ទេសចរណ៍​បែប​ធនធានធម្មជាតិ។

លោក​បន្តថា ដោយឡែក​តម្លៃ​ដីធ្លី នៅក្នុង​តំបន់​ប៉ូល​ទាំងបី​ដែល​កំពុងតែ​រីកចម្រើន​នាពេល​បច្ចុប្បន្ន ដូចជា​នៅ​ភ្នំពេញ សៀមរាប និង​ខេត្ត​តាម​ជាប់​ឆ្នេរសមុទ្រ អាច​លក់បាន​មួយ​ការ៉េ អាច​ដល់​រយ​ដុល្លារ រាប់ពាន់​ដុល្លារ។ ក្នុងតម្លៃ​នេះ​បើ​ប្រៀបធៀប​ទៅនឹង​តម្លៃ​ដីធ្លី​កាលពី​ឆ្នាំ១៩៧៩ វា​ខុសគ្នា​រាប់រយ រាប់ពាន់​ដង ដែល​នេះ​បញ្ជាក់ថា សេដ្ឋកិច្ចកម្ពុជា​កំពុងតែ​កើនឡើង​ខ្លាំង។

លោក​បញ្ជាក់ថា “តំបន់ឆ្នេរ​មាន​តួនាទី​សំខាន់ នៅក្នុង​អ​ក្ស័​នៃ​ការអភិវឌ្ឍ​របស់​ប្រទេស​ទាំង​នៅ​ក្របខ័ណ្ឌ​អន្តរជាតិ ក្របខ័ណ្ឌ​តំបន់ និង​ក្របខ័ណ្ឌ​ជាតិ។

ក្នុងជំនួប​ជាមួយ​លោក​ឧបនាយករដ្ឋមន្ត្រី គាត ឈន់​ប្រធានកិត្តិយស​ឧ​ត្ត​ម​ក្រុមប្រឹក្សា​សេដ្ឋកិច្ចជាតិ​នា​ព្រឹក ថ្ងៃទី២៧ វិច្ឆិកា​នេះ លោកស្រី Sunniya Durrani-Jamal នាយិកា​ធនាគារអភិវឌ្ឍន៍អាស៊ី​ប្រចាំ​កម្ពុជា​បាន​ថ្លែងថា ធនាគារ​នេះ​បាន​កំពុង​ធ្វើ​កិច្ចសហប្រតិបត្តិការ និង​កំពុង​ចូលរួម​ជួយ​កម្ពុជា ដើម្បី​ធ្វើ​ឲ្យ​សម្រេច​ចក្ខុវិស័យ​កម្ពុជា ក្លាយជា​ប្រទេស​មាន​ប្រាក់ចំណូល​ខ្ពស់​នៅ​ឆ្នាំ២០៥០ ក្នុងទិសដៅ​ជម្រុញ​អភិវឌ្ឍន៍​កម្ពុជា ឲ្យ​ទទួលបាន​កា​រីកចម្រើន​យ៉ាង​ឆាប់រហ័ស។

លោកស្រី​បាន​បន្តថា “សេដ្ឋកិច្ចកម្ពុជា​ត្រូវបាន​រំពឹងថា នឹង​រក្សា​កំណើនសេដ្ឋកិច្ច​រយៈពេល​វែង​ប្រកបដោយ​ចីរភាព​ក្នុង​រង្វង់៧ភាគរយ ក្នុងមួយឆ្នាំៗ និង​បាន​កាត់បន្ថយ​ភាពក្រីក្រ​បាន​លើស១ភាគរយ​ក្នុង​មួយឆ្នាំ​ផងដែរ៕

ដោយ រ៉ាវី

ភ្នំពេញ៖ ក្រុម​អ្នកជំនាញ​ផ្នែក​អចលនទ្រព្យ​បាន​អះអាងថា តម្លៃ​ដីធ្លី​នៅ​ឆ្នាំ២០១៩ខាងមុខ​នៅតែមាន​ភាពល្អប្រសើរ និង​សម្រេចបាន​កំនើន​បន្ថែមទៀត ប៉ុន្តែ​របាយ​នៃ​កំនើន​នឹង​កើន​ខុសគ្នា​អាស្រ័យ​តាម​តំបន់​និមួយ។

លោក​ច្រឹ​ក សុខ​នី​ម អគ្គនាយក​ក្រុមហ៊ុន Century21 Mekong ដែលជា​អ្នកជំនាញ និង​មានបទពិសោធន៍​ច្រើន​នៅក្នុង​វិស័យនេះ បាន​មានប្រសាសន៍​ឲ្យ​ដឹង​តាម​ទូរស័ព្ទ​នា​ព្រឹក​ថ្ងៃទី២៨ វិច្ឆិកា​នេះ​ថា វិស័យ​ដីធ្លី​មិន​ថា​នៅពេល​បច្ចុប្បន្ន ក៏ដូចជា​ពេលអនាគត​នោះទេ ស​ន្ទ​ស្សន៍​នៃ​តម្លៃ​គឺ​នៅតែមាន​កំណើន​ជានិច្ច ដែល​វា​មិនទាន់មាន​សញ្ញា​អវិជ្ជមាន​ណាមួយ​បង្ហាញ​នៅឡើយ​នោះទេ។

លោក​បន្តថា “ជាក់ស្ដែង​នៅពេល​បច្ចុប្បន្ននេះ​យើង​ឃើញស្រាប់​ហើយ​ថា ចំពោះ​តម្លៃ​ដីធ្លី គឺ​កំពុង​តែមាន​កំណើន​ជា​បន្តបន្ទាប់ ដែល​ក្នុងនោះ​រាប់ទាំង​ដី​នៅក្នុង​តំបន់​ក្រុង ក៏ដូចជា​នៅ​ជាយក្រុង ហើយ​នៅតាម​បណ្តា​ខេត្ត​សក្ដានុពល​មួយចំនួន ក៏​កំពុង​កើនឡើង​យ៉ាងគំហុក​ផងដែរ ដូចជា ខេត្ត​ព្រះសីហនុ កំពត កោះកុង បាត់ដំបង និង​ក្រុង​ប៉ោយប៉ែត ជាដើម»។

លោក​ច្រឹ​ក សុខ​នី​ម​បាន​បន្តទៀតថា ប្រសិនបើ​កម្ពុជា​នៅតែ​អាច​រក្សាបាន​នូវ​ស្ថិរភាព​សេដ្ឋកិច្ច និង​នយោបាយ​ដូច​ពេល​បច្ចុប្បន្ននេះ សម្រាប់៥-១០ ឆ្នាំ​ខាងមុខ​ទៀត តម្លៃ​ដី​នៅតែ​បន្ត​កើនឡើង ដែល​គិត​ជា​មធ្យម​អាច​ក្នុង​រង្វង់​ជាង១០ភាគរយ ហើយ​ចំពោះ​ដី​ដែល​ស្ថិតក្នុង​តំបន់​ពាណិជ្ជកម្ម​ពិសេស ដូចជា​តំបន់​ទីប្រជុំជន​ក្នុង​ខេត្ត ឬ​ក្នុង​ក្រុង គឺអាច​មាន​កំណើន​តម្លៃ​ខ្ពស់​ជាងនេះទៅទៀត។

លើកឡើង​ស្រ​ដ​ផង​គ្នា​នេះ អ្នកនាង អាន សុធី​តា នាយិកា​ប្រចាំ​ប្រទេស ក្រុមហ៊ុន​អចលនទ្រព្យ​លំដាប់​អន្តរជាតិ​CBRE Cambodia បានបង្ហាញ​ពី​ភាព​សុទិដ្ឋិនិយម​ទៅលើ​វិស័យ​ដីធ្លី​សម្រាប់​ឆ្នាំ២១០៩ ផងដែរ​ថា យើង​ពិត​ជាមាន​មោទនភាព​រួចមកហើយ ដែល​ក្នុង​រយៈពេល១០ឆ្នាំ​កន្លងទៅ តម្លៃ​ដីធ្លី​បាន​កើនឡើង​រហូតដល់២២៥ភាគរយ ពោលគឺ​កាលពី​អំឡុង​ឆ្នាំ២០០៨ តម្លៃ​ដី​ដែល​អាច​លក់បាន​ខ្ពស់​ជាងគេ​ត្រឹម២៨០០ដុល្លារ​ក្នុង​មួយ​ម៉ែត្រការ៉េ​ប៉ុណ្ណោះ ប៉ុន្តែ​នៅត្រឹម​ឆ្នាំ២០១៨នេះ តម្លៃ​ដី​ដែល​ខ្ព​ស់ន​បាន​ឡើង​រហូតដល់៦៥០០ដុល្លារ​ក្នុង​មួយ​ម៉ែត្រការ៉េ ហើយ​វា​នឹង​បន្ត​កើនឡើ់ង​ខ្ពស់​ជាងនេះទៀត​នៅពេល​ខាងមុខនេះ។

អ្នកនាង​បាន​បន្តថា “បើ​យើង​ធ្វើការ​ព្យាករណ៍​ទៅ​ថ្ងៃ​អនាគត ក្នុង​ចន្លោះ​ចាប់ពី៥-១០ឆ្នាំ​ខាងមុខ​ទៀត តម្លៃ​ដី​នៅ​កម្ពុជា​នៅតែមាន​ការកើនឡើង​ខ្ពស់​ដដែល ដែល​អាច​ក្នុង​ចន្លោះ​ជាង៧ភាគរយ​ឡើងទៅ។ អ្នកនាង​បន្តថា “ចំពោះ​កំណើន៧ភាគរយ​នេះ​មិនមែន​មានន័យថា ជា​អត្រា​នៃ​កំណើនថេរ​ប្រចាំឆ្នាំ​នោះទេ ប៉ុន្តែ​វា​អាចមាន​ឆ្នាំ​ខ្លះ​ឡើង​បាន៥ភាគរយ ឆ្នាំ​ខ្លះ​ឡើង​បាន៧ភាគរយ ហើយ​ឆ្នាំ​ខ្លះ​ឡើង​បាន​ត្រឹម៣ភាគរយ​ជាដើម ដែល​ការព្យាករណ៍​ចេញ​ជា​តូរ​លេខ​នេះ ក៏​ព្រោះ​យើង​សម្អាង​ទៅលើ​ភាពជាក់ស្ដែង​នែ​តម្រូវការ​ទីផ្សារ​អចលនទ្រព្យ​នាពេល​បច្ចុប្បន្ន​នៅ​កម្ពុជា ធៀប​ទៅនឹង​ប្រទេសជិតខាង​ក្នុង​តំបន់ ជាពិសេស​ប្រទេស​ថៃ ដែល​កំពុងមាន​លំហូរ​វិនិយោគ​យ៉ាងគំហុក ពី​សំណាក់​អ្នកវិនិយោគ​ក្នុងស្រុក ក៏ដូចជា​ជនបរទេស ជាពិសេស​ជនជាតិ​ចិន​ជាដើម។

ជាមួយគ្នានេះ អ្នកនាង អាន សុធី​តា ក៏បាន​បញ្ជាក់​ឱ្យដឹង​ផងដែរ​ថា ហេតុផល​មួយចំនួនទៀត ដែលជា​កក្តា​ជំរុញ​ឱ្យ​វិស័យ​ដីធ្លី​កាន់តែ​ឡើង​តម្លៃ​ខ្លាំង ក៏​អាច​បណ្តា​មកពី​ដំណើរការ​វិវឌ្ឍន៍​សេដ្ឋកិច្ចជាតិ ជាពិសេស​ការរីកចម្រើន​ប្រព័ន្ធ​ហេដ្ឋារចនាសម្ព័ន្ធ​តែម្ដង៕