ដោយគង់ សូរិយា

ភ្នំពេញ៖ ក្រុមហ៊ុនកូរ៉េមួយគ្រោងចំណាយទឹកប្រាក់២០លានដុល្លារអាមេរិក ដើម្បី​សាងសង់រោងចក្រផលិតដ្រូននៅកម្ពុជា នៅឆ្នាំ២០១៩ខាងមុខនេះ និងយកកម្ពុជាជាមូលដ្ឋានផលិតដើម្បីនាំចេញទៅកាន់ប្រទេសជិតខាង។

អគ្គនាយកក្រុមហ៊ុន S.D.I Air Co,Ltd លោក Chung IL Nyung បានមានប្រសាស ន៍ឲ្យដឹងកាលពីថ្ងៃទី២៥ មិថុនាកន្លងមកថា ក្រុមហ៊ុនលោកបានចាប់ផ្តើមផលិតដ្រូនជាច្រើន​ប្រភេទនៅប្រទេសកូរ៉េកាលពីជាង១ឆ្នាំមុន និងបាននាំចេញទៅលក់នៅប្រទេសរុស្ស៊ី ហើយគ្រោងនាំយកមកលក់នៅប្រទេសកម្ពុជានៅក្នុងឆ្នាំនេះ។ លោកបន្តថា ទន្ទឹមនឹ​ងការនាំចូលដ្រូនផលិតរួច ក្រុមហ៊ុនគ្រោងនឹងបង្កើតរោងចក្រផលិតដ្រូននៅកម្ពុជានៅឆ្នាំក្រោយ ដែលមានទីតាំងនៅក្នុងខេត្តកំពង់ស្ពឺ ឬនៅក្នុងខេត្តកំពង់ចាម។

លោកបន្តថា យើងនឹងយកប្រទេសកម្ពុជា ជាមូលដ្ឋានផលិតកម្ម និងធ្វើការនាំចេ ញទៅកាន់ប្រទេសក្នុងតំបន់ ព្រោះកម្ពុជាមានភាពអំណោយផលក្នុងការវិនិយោគ ពិសេ​សរដ្ឋាភិបាលកម្ពុជា បានផ្តល់ភាពងាយស្រួលច្រើនក្នុងការវិនិយោគនៅកម្ពុជា។លោកបន្តថា វានឹងជារោងចក្រធំមួយ ដែលនឹងមិនត្រឹមផលិតដ្រូននោះទេ ប៉ុន្តែនឹងជួយបណ្តុះបណ្តាលធនធានមនុស្សរបស់កម្ពុជាផងដែរ។

ដ្រូនដែលផលិតដោយក្រុមហ៊ុន S.D.I Air Co, Ltd មានច្រើនប្រភេទ ដូចជាដ្រូន សំរាប់បាញ់ពន្លត់អគ្គិភ័យ ដ្រូនសំរាប់ជួយសម្រួលការងារក្នុងវិស័យឧស្សាហកម្ម និងដ្រូនសំរាប់ជួយសំរួលការងារក្នុងវិស័យកសិកម្ម។

លោក Chung IL Nyung បានបន្តថា ដោយសារប្រទេសកម្ពុជាមានភាពអំណោយ​ផលសំរាប់វិស័យកសិកម្ម លោកជឿជាក់ថា ទីផ្សារកម្ពុជាមានភាពអំណោយផលសំរាប់​ផលិតផលរបស់លោក ពិសេសការប្រើប្រាស់ដ្រូន សម្រាប់បាញ់ថ្នាំកសិកម្មដែលផ្តល់ផលចំណេ​ញ​ច្រើនទាំងពេលវេលា ទាំងសុខភាព និងមិនប្រើប្រាស់កំលាំងពលកម្មច្រើននោះទេ។លោកបន្តថា​ ការបាញ់ថ្នាំកសិកម្មតាមបែបប្រពៃណី បានធ្វើឲ្យជាតិថ្នាំជ្រាបចូលក្នុងខ្លួន​មនុស្ស ដែលធ្វើឲ្យពុល និងសុខភាពទ្រុឌទ្រោម ប៉ុន្តែការប្រើប្រាស់ដ្រូនមិនប៉ះពាល់សុខភាពនោះទេ ហើយចំណាយពេលវេលាខ្លី និងមិនខាតបង់កំលាំងពលកម្ម ព្រោះដ្រូនមួយ​អាចជំនួសកំលាំងមនុស្សបាន១០០នាក់៕

ដោយ គង់ សូរិយា

ភ្នំពេញ៖ ប្រទេសកម្ពុជាកំពុងធ្វើឲ្យផ្អើលពិភពលោកម្តងទៀតហើយ តាមរយៈការស្ថាបនាទូក”ង”វែងជាងគេលំដាប់ពិភពលោក នៅខេត្តព្រៃវែងធ្វើឡើងដើម្បីបំបែកកំណត់ត្រាពិភពលោក។

កាលពីចុងសប្តាហ៍មុន កម្មវិធីបើកសាច់ទូកកំណាត់ចុងក្រោយបានធ្វើឡើងហើយក្រោមវត្តមាន លោកស្បោង សារ៉ាត ប្រធានក្រុមប្រឹក្សាខេត្តព្រៃវែង និងលោកងិន បាណាល់ អនុប្រធានគណៈកម្មការផលិតទូក “ង”វែងជាងគេ។ មកដល់ពេលនេះ ធ្វើបានជាង៧០ភាគរយហើយ។ កំណាក់ក្រោយនេះ គឺធ្វើសាច់ទូកផ្នែកកណ្តាលតែម្តង។

លោកងិន ងិនបាណាល់បានឲ្យដឹងកាលពីសប្តាហ៍មុននេះថា ការបើកសាច់ទូកលើកនេះ ជាកំណាត់ចុងក្រោយហើយ ពោលគឺការធ្វើទូកនេះ ត្រូវបានរៀបពិធីបើកសាច់ទូកផ្នែកខាងក្បាល និងកន្ទុយទូកមុន។ ផ្នែកទាំងពីរនេះបានធ្វើរួចរាល់ហើយ នៅពេលកំណាត់ទីបីចុងក្រោយធ្វើបានរួចរាល់ រូបរាងទូកនឹងចេញជាផ្លូវការ ហើយនឹងដាក់ដំណើរការសាកល្បង។

តាមការបញ្ជាក់ពីប្រភពខាងលើបានឲ្យដឹងថា ទំហំទូកនេះមានការប្រែប្រួលខុសពីការគ្រោងទុកបន្តិច ព្រោះបើតាមការគ្រោងទុក ទូកវែងជាងគេលើពិភពលោកនេះ មានប្រវែង៨៥,៥ម៉ែត្រ ទទឹង១,៥៥ម៉ែត្រ ដាក់ចំណុះទូកបាន១៧៩នាក់។ ក្បាលទូកឆ្លាក់ចេញជាក្បាលនាគ កន្ទុយឆ្លាក់ចេញជាកន្ទុយហង្ស។ ប៉ុន្តែតាមសភាពជាក់ស្តែងក្រោយ ពេលបើកសាច់ទូកទំហំទូក អាចធំជាងការគ្រោងទុកទៅទៀត។

សហភាពសហព័ន្ឋយុវជនកម្ពុជាខេត្តព្រៃវែងផលិតទូក”ង”បញ្ជាក់ថា គោលបំណ​ងនៃការកសាងទូកវែងជាងគេលើពិភពលោកនេះ ដើម្បីបំបែកឯតទគ្គកម្មកំណត់ត្រាពិភពលោក និងដើម្បីរំលឹកឡើងវិញនូវស្នាព្រះហស្ថរបស់ព្រះមហាក្សត្រខ្មែរ គ្រប់ជំនាន់ក្នុងការប្រើប្រាស់ទូក ជាមធ្យោបាយមួយក្នុងការការពារទឹកដី។

ការផលិតទូកនេះ ដើម្បីបង្ហាញពីប្រវត្តិដ៏យូរលង់នៃការផលិត និងការប្រើប្រាស់ទូករបស់ខ្មែរតាំងពីសម័យបុរាណ និងជួយលើកតម្កើងកិត្យានុភាពជាតិ ដោយបង្ហាញឲ្យពិភពលោកទាំងមូលបានដឹងកាន់តែច្បាស់ថា កម្ពុជាអាចបង្កើតស្នាដៃដ៏អស្ចារ្យមួយបាន​ មិនត្រឹមតែកសាងប្រាសាទ ដ៏អស្ចារ្យរបស់មហាវីរក្សត្រជំនាន់មុនទេ ប៉ុន្តែកូនខ្មែរជំនាន់ក្រោយក៏អាចសាងបានភាពអស្ចារ្យរបស់ខ្លួនដោយឡែកផងដែរ៕

ដោយ ដួង ចន្រ្ទា

ភ្នំពេញ៖ ដំណឹងល្អសម្រាប់អ្នកដាំក្រូចថ្លុងកោះទ្រង់ ដែលស្ថិតក្នុងភូមិសាស្រ្តខេត្តក្រចេះ បន្ទាប់ពីក្រសួងពាណិជ្ជកម្ម បានប្រកាសដាក់ឲ្យប្រើប្រាស់ជាផ្លូវការនូវម៉ាកសម្គា​ល់ភូមិសាស្ត្រទំនិញចំពោះ«ក្រូចថ្លុងកោះទ្រង់» ដែលជាផ្លែឈើហូបធម្មជាតិដ៏ពេញនិយម មានឱជារសឆ្ងាញ់ពិសា។

រដ្ឋមន្រ្តីក្រសួងពាណិជ្ជកម្ម លោកប៉ាន សូរស័ក្តិនៅថ្ងៃទី២៥ មិថុនានេះបានអញ្ជើញ​ប្រកាសដាក់ក្រូចថ្លុងកោះទ្រង់ ជាផលិតផលសម្គាល់ភូមិសាស្រ្ត ដែលនឹងផ្តល់អត្ថប្រយោជន៍ច្រើន ដល់ប្រជាសហគមន៍ទេសចរណ៍ ស្ថិតនៅស្របតាមបណ្តោយដងទន្លេមេគង្គនេះ។

លោកប៉ាន សូរស័ក្តិបានលើកឡើងពីអត្ថប្រ​យោ​ជន៍ នៃម៉ាកសម្គាល់ភូមិសាស្ត្រទំនិញ ដែលឧបករណ៍ទីផ្សាដ៏រមានសក្តានុពល និងប្រសិទ្ធភាពខ្ពស់ ដើម្បីអភិវឌ្ឍន៍វិស័យសេដ្ឋកិច្ច ហើយការដាក់ឲ្យប្រើប្រាស់ម៉ាកសម្គាល់ភូមិសាស្ត្រទំនិញថ្មីថ្ងៃនេះ នឹងជួយបង្កើតឱកាសការងារ និងបង្កើនប្រាក់ចំណូលជូនប្រជាជនមូលដ្ឋាន ព្រមទាំងទាំងលើកកម្ពស់វិស័យទេសចរណ៍ជាតិថែមទៀត។

អភិបាលខេត្តក្រចេះ លោកវ៉ា ថនបានជំរុញឲ្យសមាគមក្រូចថ្លុងកោះទ្រង់ ទប់ស្កាត់ការក្លែងបន្លំអត្តសញ្ញាណ និងប្រភពដើមរបស់ផលិតផលក្រូចថ្លុងកោះទ្រង់ ព្រមទាំងជួយទាក់ទាញលំហូ​រ​ភ្ញៀវទេសចរជាតិ និងអន្តរជាតិ មកកម្សាន្តកាន់តែច្រើននៅក្នុងខេត្តក្រចេះ ជាពិសេសទឹកដីកោះទ្រង់។ លោកបានសំណូមពរដល់ប្រជាកសិករ បង្កើនការដាំដំណាំក្រូចថ្លុង និងចូលរួមជាសមាជិកសមាគម អ្នកដាំក្រូចថ្លុងកោះទ្រុង ដើម្បីទទួលបាននូវបានអត្ថប្រយោជន៍ផ្សេងៗសម្រាប់ខ្លួនឯង និងក្រុមគួសារ។

កោះទ្រង់បច្ចុប្បន្ន មានប្រជាពលរដ្ឋដាំក្រូចថ្លុងសរុបមានចំនួន៣៣១គ្រួសារ ក្នុងនោះចំនួន១៥៥គ្រួសារបានចូលជាសមាជិកសមាគមក្រូចថ្លុងកោះទ្រង់។ តាមរយៈសមាជិ​កភាពនេះ បានធ្វើឲ្យពួកប្រជាកសិកររីករាយជាមួយទិន្នផល ប្រចាំឆ្នាំយ៉ាងតិច១០០ផ្លែ ក្នុងមួយដើម ក្នុងចំណោមដើមក្រូចថ្លុងដែលផ្តល់ទិន្នផលចំនួន២,៤៧៤ដើម ក្នុងចំណោ​មដើមក្រូចថ្លុងសរុប១៣,៧៩០ដើម ដែលបានដាំនៅក្នុងខេត្តស្ថិតនៅក្នុងតំបន់ភូមិភាគឥសាន្តនេះ៕

ដោយ ៖ វុត្ថា

ភ្នំពេញ ៖ កំពង់ផែពហុបំណង និងជាកំពង់ផែទឹកជ្រៅលើកដំបូងក្នុងប្រវត្តិសាស្រ្ត​កម្ពុជា​បានចាប់ផ្តើមបើកសម្ភោធហើយ ដែលវានឹងក្លាយជាផ្នែកមួយជួយជំរុញ​វិស័យដឹកជញ្ជូន និងការតភ្ជាប់កម្ពុជាទៅកាន់ពិភពលោកកាន់តែឆ្ងាយជាងមុន។

សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា  រួមជាមួយនឹងលោក បេសសូ ខេនអ៊ិឈិ ភារធារីស្តីទីនៃ​ស្ថានទូតជប៉ុនប្រចាំកម្ពុជា បានអញ្ជើញជា អធិបតីសម្ពោធចំណតផែពហុបំណង នៃកំពង់ផែស្វយ័តក្រុងព្រះសីហនុ។ កំពង់ផែពហុបំណងដែលបានកសាងនៅ​កំពង់ផែ​ស្វយ័តក្រុងព្រះសីហនុនេះគិតជាទឹកប្រាក់ប្រមាណ ៧៤លានដុល្លារអាមេរិក។ កំពង់ផែនេះ ត្រូវបានបង្កើតឡើងក្នុងគោលបំណងដើម្បីបំរើ និងឆ្លើយតបទៅ​នឹង​កំណើនសេដ្ឋកិច្ចជាតិ ព្រមទាំងឆ្លងកាត់ទំនិ​ញដែលកើនឡើងកាន់តែច្រើនឡើង ពីមួយឆ្នាំទៅមួយឆ្នាំឥតឈប់ឈរ។

ចំណតផែពហុបំណង ដែលសម្ពោធដាក់ឲ្យប្រើប្រាស់នេះ រួមមានដូចជា ចំណតផែ​ទំនិញរាយប្រវែង ៣៣០ ម៉ែត្រជម្រៅទឹក ១៣,៥ម៉ែត្រ, ចំណតផែមូលដ្ឋាន​ផ្គត់ផ្គង់​ភស្តុភារសម្រាប់ការរុករកប្រេងប្រវែង២០០ម៉ែត្រ ជម្រៅទឹក៧,៥ម៉ែត្រ និងការផ្គត់ផ្គង់​នាវាសណ្តោង (Tugboat) ក្រោមហិរញ្ញប្បទានសម្បទានមានទឹក ប្រាក់សរុបចំនួន​ប្រមាណ ៧៤លានដុល្លារអាមេរិក ពីរដ្ឋាភិបាលជប៉ុន តាមរយៈទីភ្នាក់ងារ​សហប្រតិបត្តិការ អអន្តរជាតិជប៉ុន (JICA) ក្នុងក្របខណ្ឌនៃការអនុវត្តគម្រោង អភិវឌ្ឍន៍​ចំណតផែពហុបំណងកំពង់ផែក្រុងព្រះសីហនុ រួមជាមួយថវិកាបដិភាគរបស់​រាជរដ្ឋាភិបាល សម្រាប់ទទួលបន្ទុកលើការបង់ពន្ធ និងអាករផ្សេងៗ។

សម្តេច តេជោ ហ៊ុន សែន  បានសម្តែងភាពរីករាយដែលបានអញ្ជើញមកចូលរួមក្នុង​ពិធីសម្ពោធចំណតផែពហុបំ ណងនៃកំពង់ផែស្វយ័តក្រុងព្រះសីហនុនាពេលនេះ។សម្តេ​ចតេជោ បានថ្លែងអំណរគុណចំពោះរដ្ឋាភិបាលជប៉ុន តាមរយៈទីភ្នាក់ងារ​សហប្រតិបត្តិការអន្តរជាតិជប៉ុន (JICA) ក្នុងការផ្តល់ហិរញ្ញប្បទានសម្បទាន​សាងសង់​​ចំណតចំណតផែពហុបំណងនៃកំពង់ផែស្វយ័តក្រុងព្រះសីហនុ ក្នុងការ​បំរើដល់វិស័យសេដ្ឋកិច្ច ពាណិជ្ជកម្ម ក្នុងការដឹកជញ្ជូនទំនិញចេញចូលផ្សេងៗ។

ចំណតផែនេះ  ជាច្រកទ្វារសេដ្ឋកិច្ចជាតិមួយ ដ៏សំខាន់សម្រាប់ដោះដូរផលិតផល​កសិកម្មនិងកសិ-ឧស្សាហកម្មរបស់កម្ពុជា ទៅកាន់ទីផ្សារពិភពលោកដោយបាន​តភ្ជាប់​ទៅនឹងផ្លូវជាតិលេខ២ លេខ៣ និងលេខ៤ ព្រមទាំងផ្លូវរថភ្លើង និងជាពិសេស​ផ្លូវល្បឿន លឿន ភ្នំពេញ-ព្រះសីហនុ ដែលគ្រោងនឹងបើក ការដ្ឋានសាងសង់ក្នុង​ពេលឆាប់ៗខាងមុខនេះ។

សម្តេចតេជោ បានរំលឹកថា កាលពីមុនកំពង់ផែក្រុងព្រះសីហនុនេះ អាចមាន​សមត្ថភាព​ដឹកទំនិញបានត្រឹមតែ១ម៉ឺនតោនតែប៉ុណ្ណោះ ក៏ប៉ុន្តែពេលនេះកំពង់ផែយើង​អាច​ដឹកទំនិញបានរហូដល់ទៅ ៥ម៉ឹនតោន  ដែលមានជម្រៅទឹករហូរទៅ១៤ម៉ែត្រ។ ការបង្កើតចំណតកំពង់ផែនេះគឺកើតឡើងបន្ទាប់មានការចុះ ហត្ថលេខារវាងសម្តេច តេជោ ហ៊ុន សែន ប្រមុខរាជរដ្ឋាភិបាលកម្ពុជាជាមួយរដ្ឋាភិបាលជប៉ុន ក្នុងការការ​អភិវឌ្ឍក្នុងកំពង់ផែនេះ លើគម្រោងទឹកប្រាក់ប្រមាណ២០៣លានដុល្លារអាមេរិក។

លោក បេសសូ ខេនអ៊ិឈិ ភារធារីស្តីទីនៃស្ថានទូតជប៉ុនប្រចាំកម្ពុជាបានមាន​ប្រសាសន៍​ថា កំពង់ផែទឹកជ្រៅនេះ នឹងជំរុញការលើកកំពស់ពាណិជ្ជកម្មរបស់​កម្ពុជា​មួយ​បណ្តាប្រទេសក្នុងតំបន់ និងក្រៅតំបន់ ដែលជាផ្នែកមួយជួយជម្រុញដល់កំនើន​សេដ្ឋកិច្ច​កម្ពុជា ហើយរដ្ឋាភិបាលជប៉ុននឹងបន្តគាំទ្រកម្ពុជា ក្នុងការអភិវឌ្ឍន៍សេដ្ឋកិច្ច​សង្គម និងធ្វើឲ្យទំនាក់ទំនងមិត្តភាព និងកិច្ចសហប្រតិបត្តិការរវាងប្រជាជន និងប្រទេសទាំងពីរកាន់តែមានភាពប្រសើរឡើងថែមទៀត៕

ដោយ : សូរិយា

ភ្នំពេញ : នៅត្រឹមរយៈពេល៥ខែ ដើមឆ្នាំ២០១៨ នេះ អគ្គនាយកដ្ឋានពន្ធដារ ប្រមូលចំណូលពន្ធ-អាករគ្រប់ប្រភេទ បានចំនួនជាង ៤ពាន់ប៊ីលានរៀល ស្មើនឹងប្រមាណជាង ១,000 លានដុល្លារអាមេរិក ស្មើនឹងអត្រា ៥៤,២៣% នៃផែនការកំណត់ដោយច្បាប់ ។

នៅក្នុងកិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែឧសភា ឆ្នាំ២០១៨ ព្រមទាំងទិសដៅសម្រាប់អនុវត្តន៍បន្ត ដែលប្រារព្វធ្វើនៅសាលាពន្ធដារជាតិ ថ្ងៃទី២២ ខែឧសភា ឆ្នាំ២០១៨ ម្សិលមិញនេះ លោក គង់ វិបុល ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារបានថ្លែងឲ្យដឹងថា នេះគឺជាលទ្ធផលប្រមូលចំណូលពន្ធរបស់អគ្គនាយកដ្ឋានពន្ធដារ ទទួលបានចំណូលពន្ធ-អាករគ្រប់ប្រភេទ ដែលប្រមូលបានតាមប្រព័ន្ធគ្រប់គ្រងទិន្នន័យចំណូលអនឡាញ Online មានចំនួនជាង ៥៣៧ប៊ីលានរៀល ត្រូវប្រមាណជាង ១៣៤លានដុល្លារអាមេរិក ស្មើជិត៧% នៃផែនការច្បាប់ឆ្នាំ២០១៨ ក្នុងនោះបើប្រៀបធៀបទៅនឹងចំណូលខែឧសភា ឆ្នាំ២០១៧ ការប្រមូលចំណូលពន្ធអាករគ្រប់ប្រភេទ ក្នុងខែឧសភា ឆ្នាំ២០១៨នេះ បានកើនឡើងជិត ៦៦ ប៊ីលានរៀល ត្រូវប្រមាណជាង ១៦លានដុល្លារអាមេរិក គឺស្មើជិត ១៤% ។

ពាក់ព័ន្ធនឹងការប្រមូលចំណូលនេះ បើគិតក្នុងរយៈពេល ៥ខែ ដើមឆ្នាំ២០១៨ អគ្គនាយកដ្ឋានពន្ធដារ ប្រមូលចំណូលពន្ធ-អាករបានជាង ៤ពាន់ប៊ីលានរៀល ត្រូវប្រមាណជាង ១ពាន់លានដុល្លារអាមេរិក ឬស្មើជាង ៥៤% ក្នុងនោះបើប្រៀបធៀបនឹងរយៈពេល ៥ខែ ដើមឆ្នាំ២០១៧ ឃើញថាការប្រមូលពន្ធ-អាករគ្រប់ប្រភេទ ក្នុងរយៈពេល៥ខែ ឆ្នាំ២០១៨ នេះ កើនឡើងជាង ៤៥២ប៊ីលានរៀល ត្រូវប្រមាណ ១១៣លានដុល្លារអាមេរិក ស្មើជាង ១២% ទាក់ទិននិងការប្រមូលពន្ធនេះ អគ្គនាយកដ្ឋានពន្ធដាររំពឹងថា ចំណូលពន្ធ-អាករគ្រប់ប្រភេទសម្រាប់ឆ្នាំ២០១៨ អាចប្រមូលបានគ្រប់ផែនការកំណត់ដោយច្បាប់។

ដើម្បីជម្រុញប្រមូលពន្ធឲ្យកាន់តែមានប្រសិទ្ធភាព លោក គង់ វិបុល បានដាក់ចេញនូវវិធានការមួយចំនួនដូចជាបន្តអនុវត្តប្រកបដោយប្រសិទ្ធភាពខ្ពស់ថែមទៀត សម្រាប់ឆ្នាំចុងក្រោយនេះ ការគ្រោងដាក់ឱ្យដំណើរការនូវប្រព័ន្ធ ផ្សាយបន្ត ផ្ទាល់នៃកិច្ចប្រជុំ ដែលផ្តល់លទ្ធភាពដល់ថ្នាក់់ដឹកនាំ ដើម្បីទទួលបានព័ត៌មានផ្ទាល់ ការពង្រឹងតាមដានសហគ្រាសទាំងឡាយ ដែលប្រើប្រាស់រូបភាពមានអ្នកឈរឈ្មោះជំនួស និងជម្រុញការចុះបញ្ជីបន្ថែម ការបន្តពង្រឹងចាត់វិធានការ ចំពោះការគេចវេះពន្ធគ្រប់រូបភាព ការធ្វើឱ្យប្រសើរឡើងថែមទៀត លើការបង្វិលសងអាករលើតម្លៃបន្ថែមជូនស្ថានទូត អង្គការអន្តរជាតិ ក៏ដូចជាសហគ្រាសនានា ការសហការជាមួយអគ្គនាយកដ្ឋានគោលនយោបាយ និងស្ថាប័នពាក់ព័ន្ធ ដើម្បីរៀបចំយុទ្ធសាស្ត្រកែទម្រង់ពន្ធដារ ការបន្តកែទម្រង់ធនធានមនុស្ស ជម្រុញការធ្វើទំនើបកម្មប្រព័ន្ធព័ត៌មានវិទ្យា ការធ្វើបច្ចុប្បន្នភាពព័ត៌មានអចលនទ្រព្យនៅរាជធានីភ្នំពេញ និងតាមតំបន់ដែលជាកម្មវត្ថុនៃពន្ធលើអចលនទ្រព្យ ការបន្ត ខិតខំប្រមូលបំណុលពន្ធដែលនៅរ៉ាំរ៉ៃជាយូរឆ្នាំ និងពង្រឹងការយកចិត្តទុកដាក់ក្នុងការធ្វើសវនកម្ម ចំពោះសហគ្រាសធំៗ ដែលមានហានិភ័យខ្ពស់ក្នុងការបាត់បង់ចំណូលពន្ធជាដើម ។
គួរកត់សម្គាល់ផងដែរថា សម្រាប់ការប្រមូលចំណូលពន្ធ-អាករនូវគ្រប់ប្រភេទ គឺជាចំណូលយ៉ាងសំខាន់សម្រាប់ការបែងចែកចំណាយត្រឡប់របស់រាជរដ្ឋាភិបាលកម្ពុជា ដែលប្រាប់បានទៅនឹងសរសរស្តមដ៏រឹងមាំមិនអាចខ្វះបាននោះឡើយ ៕