ដោយ ដែន ចែងចាំង
ភ្នំពេញ៖ ក្រុមហ៊ុនយក្សជប៉ុន A2A Town Cambodiaបានប្រកាសលក់ផ្ទះលំហែរកាយរបស់ខ្លួន ជាលំនៅដ្ឋានដែលស្ថិតនៅក្នុងរមណីយដ្ឋាន V Kirirom Pine Resort ស្ថិតក្នុងស្រុកភ្នំស្រួច ខេត្តកណ្តាល។
លោកបណ្ឌិតហេង វុទ្ឋីដៃគូវិនិយោគនៃក្រុមហ៊ុន A2A Town Cambodia បានថ្លែងក្នុងជំនួបធុរកិច្ច និងឳកាសវិនិយោគដែលប្រារពធ្វើនៅក្រុងភ្នំពេញ កាលពីល្ងាចថ្ងៃទី៣០ មិនាកន្លងមកថា ការវិនិយោគផ្ទះលំហែរកាយជាតម្រូវការចាំបាច់មួយ សម្រាប់ប្រជាពលរដ្ឋកម្ពុជានាពេលនេះ ដោយសារបច្ចុប្បន្នកម្ពុជាមានភាពរីកចម្រើនលើវិស័យសេដ្ឋកិច្ច ពិសេសការវិនិយោគពីបរទេស ក្រោមការដឹកនាំរបស់សម្តេចតេជោហ៊ុន សែននាយករដ្ឋមន្រ្តីកម្ពុជា។
លោកបន្តថា “កាលពីបែកពីរបបពុល ពតព្រឹកឡើងយើងសួរគ្នាថា មានអ្វីស៊ី តែឥឡូវពេលជុំគ្នាយើងសួរគ្នាថា មានអ្វីធ្វើឲ្យយើងស្គម”។
លោកបណ្ឌិត ហេង វុទ្ឋី បានបន្តថា ក្រុមហ៊ុន A2A TOWN Cambodia បានទទួលសិទ្ឋសម្បទាន ពីរដ្ឋាភិបាលលើផ្ទៃដី២០០០ហិកតា ដើម្បីអភិវឌ្ឍន៍ជារមណីយដ្ឋាន V Kirirom ដោយដំណាក់កាលទី១ ក្រុមហ៊ុនវិនិយោគលើផ្ទៃដូ៥០០ ហិកតា និងគ្រោងបោះទុនវិនិយោគ៥០០លានដុល្លារអាមេរិក។
ក្រុមហ៊ុនាំ A2A Town Cambodia បាននិងកំពុងវិនិយោគលើរមណីយដ្ឋាននេះ ដោយមានរៀបចំភោជនីយដ្ឋាន ទីលានបោះតង់ ដែលអាចផ្ទុកមនុស្សបាន២០០០នាក់ រៀបចំជាផ្ទះបែបខ្មែរ ផ្ទះប្រអប់ និងប្រភេទវីឡាជាច្រើនទៀត និងគ្រោងសាងសង់ទីលានវាយកូនហ្គោល ព្រលានយន្តហោះ ពិសេសក្រុមហ៊ុននេះបានបង្កើត វិទ្យាស្ថានបច្ចេកវិទ្យាគិរីរម្យ ដែលផ្តល់ការបណ្តុះបណ្តាលជំនាញព៌តមានវិទ្យាស្តង់ដាអន្តរជាតិ ព្រមទាំងផ្តល់អាហារូបករណ៍ ដល់និស្សិតអាចចូលសិក្សានៅទីនោះដោយឥតគិតថ្លៃ។
អគ្គនាយកក្រុមហ៊ុន A2A Town Cambodia លោក Takeshi Izuka បានថ្លែងថា លោកមានគោលដៅអភិវឌ្ឍន៍រមណីយដ្ឋាននេះ ឲ្យស័ក្តិសមជាទីក្រុងមួយនាពេលអនាគត និងក្លាយជាគោលដៅទេសចរណ៍ដ៏ទាក់ទាញ បន្ទាប់ពីខេត្តសៀមរាប ព្រោះរមណីយដ្ឋាននេះ មានលក្ខខ័ណ្ឌអាកាសធាតុល្អប្រសើរ មានដើមស្រស់ដ៏ស្រស់ស្អាត ហើយគោលដៅនៃការវិនិយោគរបស់យើង គឺមិនកាត់ដើមឈើទេ តែយើងរក្សាដើមឈើ និងគិតគូរដល់ការអភិរ័ក្សបរិស្ថានជាចម្បង។
លោកបន្តថា “យើងចង់ឲ្យប្រជាជនកម្ពុជា មានអារម្មណ៍ថា គិរីរម្យជាផ្ទះទីពីររបស់ពួកគេ”។
អគ្គលេខាធិការរងក្រុមប្រឹក្សាអភិវឌ្ឈន៍កម្ពុជា លោកជា វុទ្ឋីបានថ្លែងថា លោកគាំទ្រការវិនិយោគនេះ ដែលផ្តល់ផលប្រយោជន៍ដល់សេដ្ឋកិច្ច និងសង្គមកម្ពុជា ហើយរដ្ឋាភិបាលកំពុងធ្វើយ៉ាងណា ខិតខំទាក់ទាញអ្នកវិនិយោគជប៉ុនកាន់តែច្រើនថែមទៀតមកវិនិយោគនៅកម្ពុជា។ លោកបន្តថា ដោយសារកម្ពុជាមានច្បាប់វិនិយោគ បើកទូលាយជាងគេនៅក្នុងតំបន់ កម្ពុជាអាចទាក់ទាញបានអ្នកវិនិយោគជប៉ុន និងអ្នកវិនិយោគជាច្រើនទៀតឲ្យមកវិនិយោគនៅកម្ពុជា ដែលជាការជម្រុញកំនើនសេដ្ឋកិច្ចជាតិ ហើយរយៈពេលពីរបីឆ្នាំខាងមុខ សេដ្ឋកិច្ចកម្ពុជានឹងរក្សាបានកំនើន៧ភាគរយ នេះបើតាមការព្យាករណ៍របស់ក្រសួងសេដ្ឋកិច្ចនិងហិរញ្ញវត្ថុ។
លោកបន្តថា “ការវិនិយោគជប៉ុនមានសារៈសំខាន់ណាស់ ដើម្បីចូលរួមចំណែកអភិវឌ្ឍន៍សេដ្ឋកិច្ច និងសង្គមរបស់យើង”។លោកបន្តថា “អ្នកវិនិយោគជប៉ុនមិនត្រឹមតែយកទុនមកជាមួយទេ តែពួកគេយកបេះដូងមកជាមួយ ហើយពួកគេមិនបានចាត់ទុកអ្នកធ្វើការឲ្យខ្លួនជាកម្មករទេ តែជាប្រតិបត្តិកររបស់ខ្លួន”៕
