ដោយ រ៉ាវី
ភ្នំពេញ៖ ខេត្តកំពង់ស្ពឺមិនស្ថិតនៅក្នុងសភាពវាលស្រែបែកក្រហែងទៀតទេ ខេត្តនេះកំពុងក្លាយជាតំបន់សេដ្ឋកិច្ចពិសេស និងតំបន់ឧស្សាហកម្ម ដោយយ៉ាងហោចណាស់៨០ភាគរយ នៃគំរោងវិនិយោគសរុបត្រូវបានកាន់កាប់ដោយអ្នកវិនិយោគជនជាតិចិន។
អភិបាល នៃគណៈអភិបាលខេត្តកំពង់ស្ពឺលោក វ៉ី សំណាងបានថ្លែងឲ្យដឹងកាលពីរសៀលថ្ងៃទី15 ខែមីនានេះថា លោក វ៉ី សំណាង នៅពេលបច្ចុប្បន្ននេះបើគេនិយាយពីតំបន់សេដ្ឋកិច្ចពិសេស ត្រូវបានគេសម្លឹកឆ្ពោះទៅកាន់ទឹកដីខេត្តកំពង់ស្ពឺ តាមបណ្តោយផ្លូវជាតិលេខ៤ ដែលមានទីតាំងនៅមិនឆ្ងាយពីតំបន់មជ្ឈមណ្ឌលពាណិជ្ជកម្មរាជធានីភ្នំពេញ ដ្បិតទីនេះក្រៅពីមានភូមិសាស្ត្រល្អនិងអំណោយផលលើការដឹកជញ្ជូន វានៅមានភាពល្អប្រសើរជាច្រើនទៀត វិសាសលភាពទីតាំងមានភាពធំទូលាយ តម្លៃអចលនទ្រព្យនៅមានកម្រិតទាប ជាពិសេសភាពសម្បូរបែបនៃកម្លាំងពលកម្ម ដែលភាគច្រើនជាប្រជាជនដែលកំពុងរស់នៅក្នុងតំបន់ស្រាប់ ។
លោកបន្តថា នៅពេលបច្ចុប្បន្ននេះ ខេត្តកំពង់ស្ពឺ បាននិងកំពុងពង្រីកវិសាលភាពផ្នែកសេដ្ឋកិច្ច បានកាន់តែប្រសើរជាងមុន ពោលគឺមានការរីកចម្រើនយ៉ាងខ្លាំងទៅលើការវិនិយោគក្នុងរូបភាពជារោងចក្រ សហគ្រាសធំៗ ដែលសរុបមានចំនួន១៣០ទីតាំង (រោងចក្រស្បែកជើង និងរោងចក្រកាត់ដេរសំលៀកបំពាក់) ។ ដោយឡែកសម្រាប់សិប្បកម្មខ្នាតមធ្យម និងក្រោមមធ្យមនៅតាមមូលដ្ឋានជាលក្ខណៈគ្រួសារផ្សេងៗ មានរហូតដល់ប្រមាណ៤៦០០មូលដ្ឋាន ដែលអាចអនុគ្រោះ និងផ្តល់ការងារជូនប្រជាកម្មករក្របខណ្ឌបានប្រមាណ៩១០០០នាក់ និងក្រៅក្របខណ្ឌបានប្រមាណជិត៤០,០០០នាក់។
លោកបានសម្ដែងការសាទរផងដែរថា ជាមួយនឹងកំណើននៃចំនួនរោងចក្រ សហគ្រាស ក៏ដូចជាសិប្បកម្មនានា ដែលកំពុងមានសកម្មភាពនាពេលបច្ចុ ប្បន្ននេះ វាពិតជាមានសារសំខាន់បំផុត ក្នុងការចូលរួមចំណែកលើកកម្ពស់សេដ្ឋកិច្ចជាតិ ក៏ដូចជាផ្តល់ចំណូលដល់ប្រជាពលរដ្ឋក្នុងតំបន់ និងអ្នកចំណាកស្រុកមកពីតាមបណ្តាខេត្តផ្សេងៗផងដែរ ដែលយ៉ាងហោយណាស់សម្រាប់កម្មករក្របខណ្ឌ យ៉ាងហោចណាស់អាចទទួលបានចំណូលប្រចាំខែ មិនក្រោម១៧០ដុល្លារនោះទេ ខណៈដែលកម្មករជំនាញមួយចំនួន ដែលកំពុងបម្រើការងារនៅក្នុងរោងចក្រមួយចំនួនស្ថិតក្នុងក្រុងច្បារមន អាចមានលទ្ធភាពទទួលបានចំណូលចាប់ពី៦០០ទៅ៧០០ដុល្លារក្នុងមួយខែ។
ដោយឡែកចំពោះកម្មករក្រៅក្របខណ្ឌវិញ អាចទទួលបានចំណូលអាស្រ័យទៅតាមលទ្ធភាព និងសកម្មភាពព្យាយាមរបស់ខ្លួន ដែលបម្រើការងារនៅតាមបណ្តាសិប្បកម្មនានា ហើយក៏មានអ្នកខ្លះ អាចរកចំណូលបានតាមរយៈការដោះដូរកម្លាំងកាយដោយការបេះផ្លែស្វាយ និងធ្វើការនៅក្នុងសិប្បកម្មស្ករអំពៅជាដើម។
ជាមួយគ្នានេះ លោក វ៉ី សំណាង ក៏បានបញ្ជាក់ផងដែរថា ក្នុងនាមលោកជាអជ្ញាធរ និងជាអភិបាលនៅក្នុងខេត្តកំពង់ស្ពឺ លោកបានបង្ហាញពីកិច្ចស្វាគមន៍យ៉ាងកក់ក្ដៅ ចំពោះបណ្តាអ្នកវិនិយោគគ្រប់ជាតិសាសន៍ទាំងអស់ ដែលមានបំណងមកបណ្តាក់ទុន ដោយដាក់ទីតាំងនៅក្នុងខេត្តកំពង់ស្ពឺ យ៉ាងរីករាយ ជាមួយនឹងការយកចិត្តទុកដាក់ ក្នុងការចូលរួមចំណែកសម្រួល ផ្តល់សេវាសាធារណៈងាយស្រួលផងដែរ។
ខេត្តកំពង់ស្ពឺបច្ចុប្បន្នបានតភ្ជាប់គ្នាជាមួយរាជធានីភ្នំពេញរួចហើយ នៅតាមបណ្តោយផ្លូវជាតិលេខ។
រាជរដ្ឋាភិបាលបានរៀបចំ តំបន់តាមផ្លូវជាតិលេខ៤ពីរាជធានីភ្នំពេញ ទៅកាន់ខេត្តព្រះសីហនុ ជាតំបន់ឧស្សាហកម្មនៅឆ្នាំ២០២៥ខាងមុខនេះ។
លោកលាងគង់ យិន ស្ថាបនិកគេហទំព័រ Propertyarea.asia បានថ្លែងថា ការរីកចម្រើនតំបន់នៅតាមបណ្តោយផ្លូវជាតិលេខ៤ មិនមែនជារឿងចម្លែកទេ ព្រោះនេះជាច្រកទ្វារដ៏សំខាន់ ក្នុងការតភ្ជាប់ការដឹកជញ្ជូនទំនិញទៅកាន់កំពង់ផែទឹកជ្រៅតែមួយគត់នៅខេត្តព្រះសីហនុ និងកត្តាមួយទៀត គឺខេត្តនេះជាខេត្តមានសណ្ឋានដីល្អ មិនប្រឈមមុខនឹងការលិចទឹក និងមានកំលាំងពលកម្មច្រើន។
លោកបន្តថា “ខេត្តកំពង់ស្ពឺក៏ជាទីតាំងមានអំណោយផល សំរាប់រៀបចំតំបន់សេដ្ឋកិច្ចពិសេស តំបន់ឧស្សាហកម្ម ព្រោះគោលនយោបាយនាពេលអនាគតរបស់រដ្ឋាភិបាល នឹងជម្រុញឲ្យរោងចក្រ សហគ្រាសនានាចាកចេញពីរាជធានីទៅកាន់បណ្តាខេត្តនានា ហើយខេត្តទទួលឥទ្ឋិពលមុនគេគឺខេត្តកំពង់ស្ពឺនេះហើយ។
លោកបន្តថា ខេត្តកំពង់ស្ពឺក៏ស្ថិតនៅជិតរាជធានីភ្នំពេញ ដូច្នេះវាងាយនឹងទទួលឥទ្ឋិពលនៃការរីកចម្រើនសេដ្ឋកិច្ច សង្គមពីរាជធានីរបស់ប្រទេស៕
