ដោយ ៖ ដែន ចែងចាំង

ភ្នំពេញ ៖ ប្លង់គោលនៃទីក្រុងជ្រៃធំ បាននិងកំពុងជិតទទួលបានការអនុម័តពីថ្នាក់ជាតិហើយ បន្ទាប់ពីពង្រាងនេះបានដាក់ឆ្លងមន្រ្តីជំនាញថ្នាក់ខេត្ត និងថ្នាក់ជាតិប៉ុន្មានលើ​ករួចហើយ។

អនុប្រធានមន្ទីររៀបចំដែនដីនគរូបនីយកម្ម និងសំណង់ខេត្តកណ្តាល លោកបណ្ឌិត វ៉ាន់ វ៉ាត បានថ្លែងឲ្យដឹងកាលពីសប្តាហ៍មុនថា ការងាររៀបចំប្លង់គោលក្រុងតាខ្មៅ និងក្រុងជ្រៃធំកំពុងប្រព្រឹត្តិទៅយ៉ាងរលូន និងកំពុងរង់ចាំការអនុម័តពីថ្នាក់ក្រសួង និងប្រមុខរដ្ឋាភិបាលកម្ពុជា។ លោកបន្តថា រដ្ឋាភិបាលនឹងរៀបចំតំបន់ជ្រៃធំ ស្ថិតក្នុងឃុំសំពៅពូន ស្រុកកោះធំ ខេត្តកណ្តាល ជាទីក្រុងថ្មីមួយនៅជាប់ព្រំប្រទល់ប្រទេសវៀតណាម។     លោកបន្តថា “ការបង្កើតទីក្រុងនៅតំបន់ជ្រៃធំ ដើម្បីពង្រីកការអភិវឌ្ឍន៍ ក៏ដូចជា ដើម្បីការពារបូរណភាពដែនដី និងដែនអធិបតេយ្យភាពកម្ពុជាផងដែរ”។

លោកបណ្ឌិត វ៉ាន់ វ៉ាត បានបន្តថា ការបង្កើតទីក្រុងកាន់តែច្រើនជារឿងល្អប្រសើរ ដើម្បីជំរុញការអភិវឌ្ឍ និងលើកកំពស់ជីវភាពរបស់ប្រជាពលរដ្ឋ ព្រោះនៅពេលមានការ​រៀបចំជាទីក្រុង នឹងមានការអភិវឌ្ឍនិងរៀបចំហេដ្ឋារចនាសម្ព័ន្ឋសមស្រប ដើម្បីក្លាយជាទីក្រុងមួយប្រកបដោយភាពស៊ីវិល័យ។

ប្រធានសមាគមអ្នកអភិវឌ្ឍន៍លំនៅដ្ឋានកម្ពុជា លោកឧកញ៉ា លី ហួរ បានថ្លែងឲ្យដឹងផងដែរថា លោកស្វាគមន៍នឹងផែនការបង្កើតទីក្រុងថ្មីៗរបស់រដ្ឋាភិបាលនៅតាមបណ្តា​ស្រុកនានា ព្រោះវានឹងជួយឲ្យតំបន់នោះមានភាពរីកចម្រើន ហើយនឹងទាក់ទាញការវិនិយោគកាន់តែច្រើនពីអ្នកវិនិយោគលំនៅដ្ឋាន ក៏ដូចជាមជ្ឈមណ្ឌលពាណិជ្ជកម្មនានា ដោយសារពេលរដ្ឋាភិបាលរៀបចំជាក្រុង នឹងមានការរៀបចំហេដ្ឋារចនាសម្ព័ន្ឋកាន់តែប្រសើរ ហើយវានឹងធ្វើឲ្យតំបន់នោះមានភាពទាក់ទាញ និងរីកចម្រើនលឿន។

សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួ​ង​មហាផ្ទៃបានបង្ហើបឲ្យដឹងពីរឿងនេះដោយសម្តេចបានថ្លែងថា ក្រសួងមហាផ្ទៃនឹងរៀប​ចំទីក្រុង នៅតាមទីប្រ​ជុំជនស្រុក និងបណ្តាឃុំដែលមានការរីកចម្រើននានាឲ្យក្លាយជាទីក្រុង ដើម្បីពង្រីកការអភិវឌ្ឍនៅតាមមូលដ្ឋាន ក៏ដូចជាដើម្បីទាក់ទាញការវិនិយោគ ព្រោះការរៀបចំជាទីក្រុង នឹងធ្វើឲ្យតំបន់នោះ កាន់តែមានភាពទាក់ទាញពីអ្នកវិនិយោគជាតិ និងអន្តរជាតិនានា។ សម្តេចបន្តថា “ការរៀបចំទីក្រុងនៅតាមបណ្តាស្រុក និងឃុំមួយចំនួន ក៏ជាការផ្តល់​សេវាដល់ប្រជាពលរដ្ឋឲ្យកាន់តែងាយស្រួល និងជម្រុញការអភិវឌ្ឍន៍នៅតាមមូលដ្ឋានកាន់តែឆាប់រហ័ស”៕

ដោយ ៖ គង់ សូរិយា

ភ្នំពេញ ៖ វិស័យសំខាន់ៗចំនួនបួន បាន និងកំពុងក្លាយជាកំលាំងចលករជម្រុញកំនើន​វិស័យអចលនទ្រព្យនៅកម្ពុជា ដោយក្នុងរយៈពេលជាងមួយទសវត្សរ៍ចុងក្រោយនេះ វិស័យសំណង់ និងអចលនទ្រព្យបានក្លាយជាមូលដ្ឋានគាំទ្រកំនើនសេដ្ឋកិច្ចដ៏រ៉ឹងមាំរបស់ប្រទេសនេះ។

លោក ច្រឹក សុខនីម អគ្គនាយកក្រុមហ៊ុន Century21 Mekong បានថ្លែងឲ្យដឹង​កាលពីពេលថ្មីៗនេះថា ការរីកចម្រើនវិស័យអចលនទ្រព្យនៅកម្ពុជា ដោយសារកត្តាមួយចំនួនដូចជា ទី១ ប្រទេសកម្ពុជាកំពុងអភិវឌ្ឍន៍ ដែលអ្នកអភិវឌ្ឍន៍អាចចាប់យកឳកាស និងអាចរកបាន​ប្រាក់ចំណេញច្រើន ទី២ ប្រទេសនេះមានប្រាក់ចំណេញខ្ពស់ ពីការវិនិយោគច្រើនជាងប្រទេសអភិវឌ្ឍន៍ហើយ ទី៣ កំនើនសេដ្ឋកិច្ច និងការកើនឡើងប្រាក់ចំណូលរបស់ប្រជាពលរដ្ឋ ជាចលករជួយជម្រុញវិស័យនេះកាន់តែមានភាពរ៉ឹងមាំ ទី៤ ការគាំទ្រពីវិស័យមីក្រូហិរញ្ញវត្ថុ និងធនាគារ។ លោកបន្តថា “ការវិនិយោគបន្ថែមពីអ្នកវិនិយោគបរទេសលើគំរោងនានា ដើម្បីពង្រីកមូលដ្ឋានអាជីវកម្មរបស់ពួកគេ (Investment Fund)”។

អ្នកនាង អាន សុធីតា នាយិកាប្រចាំប្រទេសនៃក្រុមហ៊ុនអចលនទ្រព្យលំដាប់ពិភព​លោក CBRE Cambodia បានលើកឡើងផងដែរថា កត្តាសន្តិភាព ស្ថិរភាពនយោបាយ និងកំនើនសេដ្ឋកិច្ចរ៉ឹងមាំ ជាមូលដ្ឋានដ៏សំខាន់ផងដែរ ក្នុងការទាក់ទាញការវិនិយោគពី​បរទេស ដែលបានធ្វើឲ្យកម្ពុជាផ្លាស់ប្តូរមុខមាត់ថ្មីលើឆាកអន្តរជាតិ ហើយកម្ពុជាស្ថិតក្នុង​ក្រសែភ្នែកឬគោលដៅរបស់អ្នកវិនិយោគអន្តរជាតិ។

មូលដ្ឋានច្បាប់វិនិយោគដ៏ល្អ ដែលអនុញ្ញាត្តឲ្យជនបរទេសមានសិទ្ឋធ្វើម្ចាស់ក្រុមហ៊ុន១០០ភាគរយនៅកម្ពុជា ការផ្ទេរសាច់ប្រាក់ចំណេញទៅបរទេសមិនមានការបង់ពន្ឋ ច្បាប់សហកម្មសិទ្ឋ ដែលអនុញ្ញាត្តឲ្យជនបរទេសមានសិទ្ឋទិញផ្ទះចាប់ពីជាន់ទី១ឡើងទៅ ជាដើម សុទ្ឋតែជាមូលដ្ឋានមិនអាចខ្វះបាន ក្នុងការគាំទ្រការរីកចម្រើននៃវិស័យនេះ៕

ដោយ ដែន ចែងចាំង

ភ្នំពេញ៖ សម្តេចតេជោហ៊ុន សែននាយករដ្ឋមន្រ្តីនៃកម្ពុជាបានជួយសម្រួលនិតិវិធីលើការបង់ពន្ឋអចលនវត្ថុពីការបង់ពន្ឋច្រើនដង មកបង់តែម្តងទោះបីជាមានការផ្ទេរកម្មសិទ្ឋអចលនវត្ថុច្រើនដងក្តី។

កន្លងមកមានបញ្ហានិតិវិធីលើបញ្ហានេះ ប៉ុន្តែបន្ទាប់ពីបានដឹងដំណឹងនេះសម្តេចតេជោបានចេញអនុក្រិត ដើម្បីសម្រួលនិតិវិធីលើបញ្ហានេះ ដោយឲ្យភ្នាក់ងារពន្ឋដាយកពន្ឋតែម្តង ទោះបីជាមានការផ្ទេរអចលនទ្រព្យច្រើនដងក៏ដោយ។

អភិបាលរាជធានីភ្នំពេញ លោកឃួង ស្រេងកាលពីសប្តាហ៍មុនបានបើកកិច្ចប្រជុំជាមួយមន្រ្តីជំនាញពន្ឋដា ដើម្បីផ្សព្វផ្សាយពីបញ្ហានេះ និងបានជំរុញឲ្យអាជ្ញាធរមូលដ្ឋាន​ផ្សព្វផ្សាយពីនិតិវិធីថ្មីនេះដល់ប្រជាពលរដ្ឋ ដើម្បីបញ្ចៀសការយយកពន្ឋច្រើនលើកលើករណីផ្ទេរកម្មសិទ្ឋអចលនវត្ថុពីម្ចាស់មួយទៅម្ចាស់មួយទៀត។លោកអភិបាលក្រុងក៏បាន​ព្រលានអាជ្ញាធរមូលដ្ឋាន កុំឲ្យមានការកេងប្រវញ្ច័បញ្ហានេះជាមួយប្រជាពលរដ្ឋ នៅពេល​អនុវត្តន៍ការងាររបស់ខ្លួន។

លោកបន្តថា “សម្តេចតេជោតែងតែយកចិត្តទុកដាក់ និងគិតគូរពីសុខទុក្ខប្រជាពល​រដ្ឋជាប្រចាំ ហើយការសម្រេចថ្មីនេះ ពិតជាបានជួយសម្រួលយ៉ាងច្រើនដល់ជីវភាពរបស់​ប្រជាពលរដ្ឋ”។

មន្រ្តីជាន់ខ្ពស់អគ្គនាយកដ្ឋានពន្ឋដាបានយល់ស្របលើបញ្ហានេះ ដោយលោកលើកឡើងថា ការជួយសម្របសម្រួល ដើម្បីកាត់បន្ថយនិតិវិធី និងការបង់ពន្ឋច្រើនលើកពី​សំណាក់សម្តេចតេជោហ៊ុន សែន ពិតជាការសម្រាលបន្ទុករបស់ប្រជាពលរដ្ឋ និងកាត់​បន្ថយភាពក្រីក្ររបស់ប្រជាពលរដ្ឋ៕