ភ្នំពេញ÷ បើមិនមានអ្វីប្រែប្រួលនោះទេ រាជរដ្ឋាភិបាលកម្ពុជា និងថៃ បានឯកភាពគ្នាក្នុងការឈានទៅចុះហត្ថលេខារួមគ្នាលើកិច្ចព្រមព្រៀងដឹកជញ្ជូនឆ្លងដែនតាមរថភ្លើងនៅចុងឆ្នាំ២០១៨ ខាងមុខនេះ ដើម្បីអាចបើកដំណើរការធ្វើចរាចរណ៍ឆ្លងកាត់ប្រទេសទាំងពីរនៅដើមឆ្នាំ២០១៩ខាងមុខ។

លោក លី បូរិន អ្នកនាំពាក្យក្រសួងសាធារណការ និងដឹកជញ្ជូនបានបញ្ជាក់ឱ្យដឹងថា តាមរយៈកិច្ចប្រជុំផ្លូវដែកសិង្ហបុរី គុនមិញនៅប្រទេសម៉ាឡេស៊ីកាលពីពេលថ្មីៗនេះថា រាជរដ្ឋាភិ បាលកម្ពុជា-ថៃ បានបញ្ជាក់ដូចគ្នាថា ភាគីទាំងពីរបានបញ្ជូនកិច្ចព្រមព្រៀងស្តីពីការដឹកជញ្ជូន ឆ្លងដែនតាមផ្លូវដែកទៅកាន់ក្រសួងការបរទេសរៀងៗខ្លួនរួចរាល់ហើយ។ ប៉ុន្តែខាងភាគីថៃថា នៅរង់ចាំសភាអនុម័តបន្ថែមទៀតទើបអាចឈានទៅចុះហត្ថលេខារួមគ្នាដោយនាយករដ្ឋមន្រ្តីនៃប្រទេសទំាងពីរនៅចុងឆ្នាំ២០១៨នេះ។

លោកបានបន្ដថា នៅក្នុងអំឡុងពេលចុះហត្ថលេខានេះដែរ ភាគីថៃក៏នឹងផ្តល់ជំនួយក្បាលរថភ្លើងចំនួន១គ្រឿងរួមទំាងទូរថភ្លើងចំនួន៤ទូ ដើម្បីបង្ហាញពីការរឹតចំណងមិត្តភាពរវាងប្រទេសទំាងពីរឱ្យកាន់តែស្អិតល្មួត ព្រមទាំងបើក ដំណើរការសេវាដឹកជញ្ជូនទំនិញ និងមនុស្សឆ្លងដែនរវាងប្រទេសទំាងពីរឱ្យកាន់តែមានភាពរលូនដើម្បីបម្រើដល់វិស័យសេដ្ឋកិច្ចជាតិ។

លោកបានបន្ដទៀតថា នៅពេលដែលភាគីទាំងពីរ កម្ពុជា-ថៃ បានចុះហត្ថលេខា ហើយនោះ កម្ពុជាក៏គ្រោងនឹងចុះហត្ថលេខាជាមួយបណ្តាប្រទេសមួយចំនួនទៀត ដើម្បីអាចបើកដំណើរការឆ្លងកាត់រួមគ្នាជាមួយបណ្តាប្រទេសមួយចំនួនក្នុងគម្រោងដឹកជញ្ជូនផ្លូវដែកប្រទេសសិង្ហបុរី គុនមិញនៃសាធារណរដ្ឋប្រជាមានិតចិន។

លោកបានលើកឡើងទៀតថា គម្រោងភ្ជាប់សេវាដឹកជញ្ជូនទំនិញនិងមនុស្សតាមផ្លូវដែករវាងកម្ពុជា-ថៃនេះ ពិតជាមានសារៈសំខាន់ណាស់ ដើម្បីកាត់បន្ថយការខូចខាតផ្លូវជាតិ និងគ្រោះហានិភ័យផ្សេងៗទៀត ស្របពេលដែលផ្លូវដែកដឹកជញ្ជូនទំនិញបានច្រើន សេវាមានតម្លៃថោក និងចំណេញថវិកាថែមទៀត។

សូមបញ្ជាក់ថា ការឈានទៅភ្ជាប់សេវាដឹកជញ្ជូនផ្លូវដែករវាងកម្ពុជា-ថៃ និងបណ្តាប្រទេសមួយចំនួនទៀតក្នុងតំបន់នេះ បន្ទាប់ពីកម្ពុជាបានកែលម្អរផ្លូវដែករបស់ខ្លួន ស្របតាម ស្តង់ដារ ដើម្បីបម្រើសេវាដឹកជញ្ជូនឆ្លងដែនអន្តរជាតិ៕

ដោយវុត្ថា

       ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគដែលមានទឹកប្រាក់សរុបចំនួន ៣៥០០លានដុល្លារអាមេរិក ស្មើនឹងគំរោងសរុបចំនួន១០៦គម្រោង ក្នុងនោះមានគម្រោងថ្មីចំនួន ៩៧ និងគម្រោងពង្រីកផលិតកម្មចំនួន៩ និងអាចបង្កើតការងារបានចំនួនប្រមាណជិត ១០ម៉ឺនកន្លែង។

តួលេខវិនិយោគនៅកម្ពុជាក្នុងឆមាសទី១ ឆ្នាំ២០១៨ ប្រៀបធៀបនឹងឆមាសទី១ ឆ្នាំ២០១៧ មានការកើនឡើងចំនួន១៩គម្រោង ខណៈពេលដែលទំហំទុនវិនិយោគមានការកើនឡើងចំនួន១៤ភាគរយ ជាពិសេសការវិនិយោគលើវិស័យកសិកម្មនិងកសិ-ឧស្សាហកម្ម មានការកើនឡើងខ្លាំងរហូតដល់ទៅ៧៧ភាគរយ។ ជាមួយគ្នានេះការវិនិ​យោគក្នុងវិស័យឧស្សាហកម្ម និងកម្មន្តសាលមានការកើនទ្បើង២២ភាគរយ ក្នុងនោះគម្រោងរោងចក្រកាត់ដេរសម្លៀកបំពាក់ មានការកើនទ្បើងចំនួន៨គម្រោង ដែលកើនពី១៥គម្រោ​ងក្នុងឆមាសទី១ ឆ្នាំ២០១៧ មក២៣គម្រោងក្នុងឆមាសទី១ ឆ្នាំ២០១៨។ ​

តួលេខវិនិយោគនេះបានបង្ហាញឱ្យឃើញនូវនិន្នាការ នៃការវិនិយោគដែលមានការកើនឡើងនៅក្នុងឆមាសទី១ ឆ្នាំ២០១៨នេះ ដោយមិនមានសញ្ញានៃការរារែក ឬការបង្អែរបង្អង់ក្នុងការបណ្តាក់ទុនវិនិយោគឡើយ៕

ដោយគង់ សូរិយា

       ភ្នំពេញ៖ បន្ទាប់ពីការបោះឆ្នោតបានបញ្ចប់ និងកម្ពុជាត្រៀមរៀបចំរដ្ឋាភិបាលថ្មី ថ្នាក់ដឹកនាំក្រុមហ៊ុនវិនិយោគធំៗ របស់ប្រទេសចិនចំនួន៧០រូប បានមកស្វែងយល់និងរកឳកាសវិនិយោគនៅកម្ពុជា។

ក្នុងជំនួបជាមួយសម្តេចតេជោហ៊ុន សែននាយករដ្ឋមន្រ្តីកម្ពុជា ក្រុមប្រតិភូចិនជាន់​ខ្ពស់ដឹកនាំដោយលោកឧកញ៉ាពុង ឃាវសែប្រធានសមាគមសម្ព័ន្ឋខ្មែរ ចិននាព្រឹកថ្ងៃទី២៨ សីហានេះ ក្រុមថ្នាក់ដឹកនាំក្រុមហ៊ុនដែលភាគច្រើន ជាក្រុមហ៊ុនវិនិយោគលើវិស័យអ​ចលនទ្រព្យ ហិរញ្ញវត្ថុ ដឹកជញ្ជូន  ដែកថែប ឧស្សាហកម្ម បច្ចេកវិទ្យាជាដើមបានអះអាងថា ពួកគេមានទំនុកចិត្តលើកម្ពុជាក្រោមការដឹកនាំរបស់សម្តេចតេជោ ដែលបានធ្វើឲ្យមានស្ថិរភាពនយោបាយ កំនើនសេដ្ឋកិច្ច និងបានរៀបចំច្បាប់ល្អៗ សម្រាប់ទាក់ទា ញនិងផ្តល់ទំនុកចិត្តដល់អ្នកវិនិយោគ។

សម្តេចតេជោហ៊ុន សែននាយករដ្ឋមន្រ្តីកម្ពុជាបានថ្លែងថា កម្ពុជាស្វាគមន៍អ្នកវិនិយោគបរទេសទាំងអស់ មិនថាអ្នកវិនិយោគតូចឬធំនោះទេ ពោលគឺក្រុមហ៊ុនមកមុនទទួលបានគំរោងវិនិយោគមុន។ សម្តេចបន្តថា វិស័យអាទិភាពដែលរាជរដ្ឋាភិបាលបាននិងកំពុងបន្តយកចិត្តទុកដាក់នោះ គឺមនុស្ស ផ្លូវ ភ្លើងនិងទឹក ដែលវិស័យទាំងនេះទោះបីអភិវឌ្ឍន៍២០ទៅ៣០ឆ្នាំទៀតក្តី ក៏មិនគ្រប់គ្រាន់សម្រាប់កម្ពុជាឡើយ។

លើសពីនេះសម្តេចតេជោបានណែនាំ ដល់អ្នកវិនិយោគចិនសម្លឹងមើលវិស័យទេ​សចរណ៍ផងដែរ ត្បិតវិស័យនេះកំពុងមានភាពល្អប្រសើរ ពិសេសបច្ចុប្បន្នកម្ពុជាទទួលបានអ្នកវិនិយោគចិនកាន់តែច្រើន បន្ទាប់ពីប្រទេសទាំងពីរមានការតភ្ជាប់ផ្នែកអាកាសចរ​ណ៍កាន់តែច្រើនពីមួយឆ្នាំទៅមួយឆ្នាំ៕

ដោយ : ដែន ចែងចាំង
ភ្នំពេញ : ស្របពេលការវិនិយោគលើបណ្តាញថាមពលអគ្គិសនីកើនឡើង ការអភិវឌ្ឍវិស័យអគ្គិសនី នៅខេត្តកណ្តាលទាំងវិស័យរដ្ឋ និងវិស័យឯកជនបានគ្រប់ដណ្តប់លើភូមិចំនួន១០១០ភូមិ ស្មើនឹងប្រមាណ៩៩ភាគរយ នៃភូមិទូទំាងខេត្តកណ្តាល។
ប្រធានមន្ទីររ៉ែ និងថាមពល ខេត្តកណ្តាល លោក យិន រដ្ឋា បានមានប្រសាសន៍ឲ្យ​ដឹងនៅថ្ងៃទី២៨ ខែសីហា ឆ្នាំ ២០១៨ នេះថា ការអភិវឌ្ឍគោលនយោបាយវិស័យអគ្គិសនី របស់រាជរដ្ឋាភិបាលកម្ពុជា គឺធ្វើយ៉ាងជម្រុញឲ្យអគ្គិសនីមានស្ថិរភាព គុណភាព សុវត្ថិភាព នឹងមានអគ្គិសនីគ្របដណ្តប់ទូទាំងប្រទេស ហើយមានតម្លៃទាប និងគោរពឲ្យបាននូវ​ផលប៉ះពាល់បរិស្ថាន។ បច្ចុប្បន្នវិស័យនេះ គឺជាវិស័យមួយជោគជ័យរបស់រដ្ឋាភិបាល កម្ពុជា ក្នុងការជម្រុញឲ្យប្រជាពលរដ្ឋទទួលបានអគ្គិសនីប្រើប្រាស់។

លោកបន្តថា ចក្ខុវិស័យនៃវិស័យថាមពលរបស់រាជរដ្ឋាភិបាលកម្ពុជា ជាពិសេសការផ្តោតយកចិត្តទុកដាក់ លើការកែលម្អការផ្គត់ផ្គង់អគ្គិសនី រដ្ឋាភិបាលកំពុងខិតខំធ្វើយ៉ាងណាលើកកម្ពស់សមធម៌ ក្នុងការទទួលសេវាផ្គត់ផ្គង់អគ្គិសនី របស់ប្រជាពលរដ្ឋនៅតាមតំបន់ជនបទ ដោយជំរុញតំបន់ទាំងនោះឲ្យមានអគ្គិសនីប្រើប្រាស់ និងមានតម្លៃប្រហាក់ប្រហែលទីក្រុង។ ជាក់ស្តែងខេត្តកណ្តាល បានជម្រុញការអភិវឌ្ឍន៍អគ្គិសនីដែល​បានចែកចាយដល់៩៩% នៃភូមិទាំងអស់នៅទូទំាងខេត្ត និងបានបញ្ចុះថ្លៃអគ្គិសនី៧៧០រៀល ក្នុងមួយគីឡូវ៉ាត់ម៉ោង មកនៅត្រឹម៦១០រៀល ក្នុងមួយគីឡូវ៉ាត់វិញ។
ការអភិវឌ្ឍវិស័យអគ្គិសនី គិតមកដល់ឆ្នាំ២០១៨នេះ កម្ពុជាមានខ្សែបញ្ជូនសម្រា​ប់ការផ្គត់ផ្គង់គ្របដណ្តប់៨២ភាគរយ នៃភូមិនៅទូទាំងប្រទេស និងគ្របដណ្តប់ខ្នងផ្ទះប្រជាជនបានចំនួនជិត៧០ភាគរយ៕

ដោយ​វុត្ថា
​
​ភ្នំពេញ​៖​ ​ជា​ការ​បោះ​ជំ​ហ៊ាន​ទៅមុខ​ដោយ​វិជ្ជមាន​មួយទៀត​ ​គឺ​ប្រទេស​កម្ពុជា​នឹង​មាន​កំពង់ផែ​ ​Electronic​ ​Data​ ​Intercharge​ ​ថ្មី​មួយ​នា​ឆ្នាំ២០២១ខាងមុខ​ ​ដោយ​គ្រោង​បោះទុន​វិនិយោគ១៤លាន​ដុល្លារ​អាមេរិក​។​
​
​ក្នុង​ជំនួប​រវាង​លោក​ទេស​រដ្ឋមន្ត្រី​ ​ស៊ុន​ ​ចាន់​ថុល​ ​រដ្ឋ​មន្រី្ត​ក្រសួងសាធារណការ​ ​និង​ដឹកជញ្ជូន​ ​ជាមួយ​ក្រុមការងារ​បេសកកម្ម​របស់​អង្គការ​ ​JICA​ ​ដឹកនាំ​ដោយ​លោក​បណ្ឌិត​ ​Masahiko​ ​FURUICHI​ ​ទីប្រឹក្សា​ជាន់ខ្ពស់​ផ្នែក​ដឹកជញ្ជូន​កាលពី​ថ្ងៃទី២៧​ ​សីហា​កន្លងមក​ ​លោក​បណ្ឌិត​ ​FURUICHI​ ​បាន​ជម្រាប​ជូន​លោក​ទេស​រដ្ឋមន្ត្រី​ ​ស្តីអំពី​វឌ្ឍនភាព​ ​និង​ផែនការ​សម្រាប់​ ​គម្រោង​ ​”​ស្ទង់មតិ​លើ​ប្លង់​រចនា​គោល​ទាក់ទង​នឹង​កិច្ច​ព្រមព្រៀង​ជំនួយឥតសំណង​សម្រាប់​ប្រព័ន្ធ​កំពង់ផែ​ ​EDI​”​ ​ដែល​គាំទ្រ​ដោយ​អង្គការ​ ​JICA​។​

លោក​ទេស​រដ្ឋមន្រ្តី​ស៊ុន​ ​ចាន់​ថុល​ ​បាន​ថ្លែងអំណរគុណ​យ៉ាង​ជ្រាលជ្រៅ​ចំពោះ​កិច្ច​សហប្រតិបត្តិ​ការ​ ​និង​ការ​គាំទ្រ​របស់​អង្គការ​ ​JICA​ ​លើ​គំនិត​ផ្តួចផ្តើម​ស្តី​ពី​ ​ប្រព័ន្ធ​កំពង់ផែEDI​ ​នេះ​។​ ​លោក​បាន​ជំរុញ​លើកទឹកចិត្ត​ ​ឱ្យ​ក្រុមការងារ​ដែល​បំពេញបេសកកម្ម​នេះ​សហការ​ថែមទៀត​ជាមួយ​ក្រសួង​ ​កំពង់ផែ​ស្វយ័ត​ក្រុងភ្នំពេញ​ ​កំពង់ផែ​ស្វយ័ត​ក្រុង​ព្រះសីហនុ​ ​ភ្នាក់ងារ​នាវាចរ​កម្ពុជា​ ​(​កាំសាប​)​ ​អគ្គនាយក​ដ្ឋាន​ដឹកជញ្ជូន​ផ្លូវទឹក​ ​ផ្លូវ​សមុទ្រ​ ​និង​កំពង់ផែ​។​

លោក​រដ្ឋមន្ត្រី​ ​ក៏បាន​ស្នើ​ឱ្យ​អង្គការ​ ​JICA​ ​ផ្តល់​ការ​គាំទ្រ​លើ​ការអនុវត្ត​គម្រោង​ធ្វើ​ឱ្យ​ប្រសើរ​ឡើង​ ​ដល់​ការ​កកស្ទះ​ចរាចរណ៍​(​ចំណុច​កដប​)​ ​នៅ​ផ្លូវជាតិ​លេខ១​ ​ដោយ​ការពង្រីក​ផ្លូវ​នៅក្នុង​តំបន់​សំ​ខាន់​ៗ​ ​មួយចំនួន​ព្រមទាំង​ផ្តល់​ការ​គាំទ្រ​ ​សម្រាប់​គម្រោង​ស្ពាន​អាកាស​នៅ​តំបន់​ស្ទឹង​បត់​ ​ដើម្បី​ភ្ជាប់​ទៅកាន់​ផ្លូវជាតិ​លេខ៥ផង​ដែរ​៕​

ដោយគង់ សូរិយា

       ភ្នំពេញ៖ ទំនិញល្បីៗ ហាងល្បីៗប្រមាណ៣០០ហើយ បានចូលមកកាន់ទីផ្សារកម្ពុជា ប៉ុន្តែក៏មានផលិតផលល្បីៗមួយចំនួនបានចាកចេញទៅវិញផងដែរ ដោយសារផលិត​ផលរបស់ពួកគេមិនសមស្របនឹងបរិបទសង្គម និងសេដ្ឋកិច្ចកម្ពុជា។

អ្នកនាងអាន សុធីតានាយិកាប្រចាំប្រទេសនៃក្រុមហ៊ុន CBRE Cambodiaបានថ្លែងឲ្យដឹងកាលពីពេលថ្មីៗនេះថា កាលពីឆ្នាំមុនផលិតផលម៉ាកល្បីៗចំនួន២៤បានចូលមកកាន់ទីផ្សារកម្ពុជា ក្នុងនោះចំនួន៥បានចាកចេញទៅវិញ ដោយ​សារផលិតផលរបស់ពួកគេមិនស្របនឹងស្ថានភាព និងបរិបទកម្ពុជា។អ្នកនាងបន្តថា ការ​ចូលមកដល់នៃផលិតផលល្បីៗនៅក្នុងទីផ្សារកម្ពុជា ដោយសារពួកគេមើលឃើញអំណា​ចនៃការទិញកើនឡើង ស្របពេលសេដ្ឋកិច្ចកម្ពុជាបន្តរីកចម្រើនដោយរ៉ឹងមាំ។

អ្នកនាងបន្តថា “ទោះជាយ៉ាងណាយើងមើលឃើញថា ផលិតផលដែលលក់ដាច់​ច្រើនជាងគេ ជាលិតផលចំណីអាហារ ភេសជ្ជៈ និងសេវាកម្មកំសាន្ត ដែលបំរើការកំសាន្តសប្បាយរបស់ប្រជាពលរដ្ឋ”។អ្នកនាងបន្តថា “ទំហំផ្សារទំនើបធៀបនឹងមនុស្សម្នាក់នៅកម្ពុ​ជាបច្ចុប្បន្ន នៅទីក្រុងភ្នំពេញមានទំហំធំជាងប្រទេសវៀតណាម ប៉ុន្តែតូចជាងប្រទេស​ថៃនៅឡើយ”។

អ្នកនាងអាន សុធីតាបានបន្តថា កំនើននៃការផ្គត់ផ្គង់ផ្សារទំនើបឆ្នាំនេះ ពិតជាមាន​ទំហំធំ ដែលគិតពីដើមរហូតមកទល់ពេលនេះ ទំហំផ្សារទំនើបកើនជាង៤០ម៉ឺនម៉ែត្រការ៉េហើយ ស្របពេលទំហំនៃការផ្គត់ផ្គង់នៃឆ្នាំនេះកើនខ្ពស់ ហើយបើការផ្គត់ផ្គង់ហក់ឡើងខ្ពស់បន្ថែមទៀត ទំហំនៃការផ្គត់ផ្គង់អាចមានបញ្ហា។

អគ្គនាយកក្រុមហ៊ុន World Bridge Land Group លោកឧកញ៉ាសៀ រិទ្ឋីបានមាន​ប្រសាសន៍ថា ផលិតផលល្បីៗមិនទាន់សមស្របនឹងទីផ្សារកម្ពុជានៅឡើយទេ វាត្រូវការ​រយៈពេល៥ទៅ១០ឆ្នាំទៀត ព្រោះអ្នកមានក្នុងស្រុកទោះបីពួកគេដឹងថាផលិតនោះជាផលិ​តផលសុទ្ឋ១០០ភាគរយក៏ដោយ ក៏ពួកគេមិនទិញក្នុងស្រុកដែរ ពួកគេនៅតែហោះទៅទិញទំនិញនៅបរទេស។លោកបន្តថា និន្នាការបែបនេះមិនមែនកើតមានតែនៅកម្ពុជាទេ តែនៅប្រទេសវៀតណាមក៏មានសភាពបែបនេះ ព្រោះអ្នកមានធនធាននៅវៀតណាមនៅតែពេញនិយមទិញទំនិញនៅបរទេសផងដែរ។

លោកបន្តថា “ទោះជាយ៉ាងណាផលិតផលម៉ាកប្រេនដ៏ៗទាំងនោះ ពួកគេចូលមកដោយមិនព្រួយបារម្ភនោះទេ ព្រោះអ្វីសំខាន់គឺការពង្រីកម៉ាក និងទីផ្សារផលិតផលរបស់ពួកគេ”៕