ដោយ៖ គង់ សូរិយា
ភ្នំពេញ៖ ក្រុមហ៊ុនផលិតរថយន្តយក្សរបស់កូរ៉េខាងត្បូង DAEHAN Auto Cambodia Co, Ltd នឹងធ្វើការដំឡើងរថយន្តនៅកម្ពុជា ក្នុងឆ្នាំ២០១៨ខាងមុខនេះ ដែលសមត្ថភាពផលិតរបស់ក្រុមហ៊ុននេះ អាចដំឡើងរថយន្តបានចំនួន២ម៉ឺនគ្រឿងក្នុងមួយឆ្នាំ។
ការដំឡើងរោងចក្រផលិតរថយន្តនេះ នឹងធ្វើឡើងនៅតំបន់សេដ្ឋកិច្ចពិសេសខេត្តស្វាយរៀង និងមានការចូលរួមពីលោកកែវ សុខឃាងប្រធាននាយកដ្ឋានគ្រប់គ្រងតំបន់រួចពន្ឋ នៃអគ្គនាយកដ្ឋានគយ និងរដ្ឋាករកម្ពុជា។ ក្រុមហ៊ុននេះនឹងផ្តល់ការងារដល់ប្រជាពលរដ្ឋបាន១០,០០០នាក់។
នៅពេលក្រុមហ៊ុននេះវិនិយោគនៅកម្ពុជា វាជាក្រុមហ៊ុនទី២ហើយ ដែលបានធ្វើការដំឡើងរថយន្តនៅកម្ពុជា និងទទួលបានការអនុញ្ញាត្តពីរាជរដ្ឋាភិបាលកម្ពុជា។
ការវិនិយោគបែបនេះ ឆ្លើយតបតាមគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥ ២០២៥ ជាគោលនយោបាយមួយជួយធ្វើពិពិធកម្មឧស្សាហកម្មកម្ពុជា ពីឧស្សាហកម្មតាមបែបអតិពលកម្ម ទៅជាឧស្សាហកម្មដែលប្រើប្រាស់កំលាំងពលកម្មជំនាញ។
លោកបណ្ឌិតម៉ី កល្យាណទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិបានថ្លែងថា កាវិនិយោគបែបនេះ ជាសញ្ញាល្អប្រសើរសម្រាប់គាំទ្រការរីកចម្រើននៃសេដ្ឋកិច្ចកម្ពុជា ហើយវាស្របតាមគោលនយោបាយអភិវឌ្ឍន៍ឧស្សាហកម្ម ដែលជាគោលនយោបាយរុញកម្ពុជា ទៅកាន់ដំណាក់កាលថ្មីមួយ នៃការអភិវឌ្ឍសេដ្ឋកិច្ចសង្គមរបស់ខ្លួន។
លោកបន្តថា “កំលាំងចលករដែលជំរុញកំនើនសេដ្ឋកិច្ចកម្ពុជា វាដូចជាមិនសូវមានថាមពលខ្លាំងទៀតទេ ហេតុនេះទើបរដ្ឋាភិបាលដាក់ចេញនូវគោលនយោបាយថ្មីនេះ ដើម្បីរុញសេដ្ឋកិច្ចកម្ពុជាទៅមួយគន្លាក់ទៀត”៕
