ដោយ វុត្ថា

ភ្នំពេញ៖ ដោយសារក្រុងភ្នំពេញរីកចម្រើនយ៉ាងឆាប់រហ័ស ពិសេសវត្តមានអាគារខ្ពស់កំពុងលូតទៅលើមេឃរាល់ថ្ងៃ បានធ្វើឲ្យក្រុមប្រឹក្សាពាណិជ្ជកម្មអឺរ៉ុប (Eurocham)​ ចាប់អារម្មណ៍ និងចាប់ផ្តើមរៀបចំសន្និសីទជាលើកដំបូងនៅកម្ពុជា នៅសប្តាហ៍ក្រោយនេះ។

EuroCham នឹងរៀបចំវេទិកាអគារខ្ពស់ជាលើកដំបូងនៅកម្ពុជា នាថ្ងៃទី ២៦ ខែមិថុនា ឆ្នាំ ២០១៨ សប្តាហ៍ក្រោយនេះ នៅសណ្ឋាគារ Sofitel រាជធានីភ្នំពេញ ដោយសហការជាមួយក្រុមប្រឹក្សាអគារខ្ពស់ និងលំនៅដ្ឋានប្រជុំជន (CTBUS)។

វេទិការនេះ នឹងមានការចូលរួមពីអ្នកជំនា្ញអន្តរជាតិ ដែលមានការយល់ដឹងច្រើនលើផ្នែកសំណង់ស្ថាបត្យកម្ម និងវិស្វកម្ម។ នេះគឺជាឱកាសដ៏កម្រមួយ ដើម្បីទទួលបាននូវទិដ្ឋភាពស៊ីជម្រៅអំពីការរចនា និងការសាងសង់អាគារខ្ពស់ៗ និងផលប៉ះពាល់លើបរិយា​កាសទីក្រុង។

ជាមួយគ្នានេះ ក៏មានសំណួរ និងចម្លើយ នៅក្នុងវគ្គនីមួយៗផងដែរ ដែលអាចផ្តល់វាឱកាសជាច្រើន សម្រាប់អ្នកចូលរួមក្នុងការចោទសួរ និងពិភាក្សាអំពីអនាគតនៃអគារខ្ពស់កប់ពពកនៅកម្ពុជា៕

ដោយ ដែន ចែងចាំង

ភ្នំពេញ៖ រដ្ឋាភិបាលកម្ពុជាបានចាប់ផ្តើមដាក់ចេញនូវគោលនយោបាយលើកទឹកចិត្ត កំណត់ហេដ្ឋារចនាសម្ព័ន្ឋនិងតម្លៃលំនៅដ្ឋានសមរម្យ សម្រាប់អ្នកអភិវឌ្ឍន៍នានា។

អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការអន្តរក្រសួង សម្រាប់ការអភិវឌ្ឍលំនៅដ្ឋានតម្លៃសមរម្យឯកឧត្តម រស់ សីលវ៉ាបានមាន​ប្រសាសន៍ឲ្យដឹងកាលពីដើមសប្តាហ៍នេះថា គោលបំណងនៃគោលនយោបាយស្តីពី ការលើកទឹកចិត្ត និងការបង្កើតកម្មវិធីជាតិ សម្រាប់ការអភិវឌ្ឍលំនៅឋានតម្លៃសមរម្យ របស់ប្រមុខរាជរដ្ឋាភិបាលសម្តេចតេជោនាយករដ្ឋមន្ត្រី គឺបានគិតគូរក្នុងការរួមចំណែកលើកកម្ពស់សុខុមាលភាព និងសេចក្តីថ្លៃថ្នូររបស់ប្រជាជនកម្ពុជាជាទូទៅ និងជាពិសេសក្រុមគ្រួសារមានប្រាក់ចំណូលទាប និងមធ្យមព្រមទាំងគ្រួសារងាយរងគ្រោះ តាមរយៈការបង្កើតកាលានុវត្តភាពថ្មីមួយ។

លោកបន្តថា “ការដាក់ចេញនូវគោលនយោបាយនេះ គឺសំដៅរួមចំណែកទ្រទ្រង់ដល់សកម្ម​ភាពនៃវិស័យសំណង់ និងអចលនទ្រព្យ ដែលជាចន្ទល់កំណើនសេដ្ឋកិច្ច ព្រមទាំងក្លាយជាផ្នែកមួយនៃប្រព័ន្ធសន្ដិសុខសង្គម និងជាឧបករណ៍គោលនយោបាយសម្រា​ប់គាំទ្រការអនុវត្ដយុទ្ធសាស្រ្ដអភិវឌ្ឍប្រទេសរយៈពេលវែង”។

លោករស់ សីលវ៉ាបានបន្តថា ក្នុងន័យនេះ រាជរដ្ឋាភិបាលបានដាក់ចេញនូវយន្តការអន្តរាគមន៍ក្នុងនោះ រួមមាន កញ្ចប់វិធានការលើកទឹកចិត្ដផ្នែកសារពើពន្ធ ផ្នែកហេដ្ឋារចនាសម្ព័ន្ធ តាមរយៈការវិនិយោគសាធារណៈ និងផ្នែកនិយតកម្ម និងការជូនដំណឹងដល់ក្រុមហ៊ុន សហគ្រាស និងអ្នកវិនិយោគទាំងអស់ ដាក់សំណើទស្សនទានគម្រោងអភិវឌ្ឍន៍ លំនៅឋានតម្លៃសមរម្យជាផ្លូវការ ចាប់ពីថ្ងៃទី២០ ខែមិថុនា ឆ្នាំ២០១៨ រហូតដល់ថ្ងៃទី២០ ខែកក្កដាឆ្នាំ២០១៨ខាងមុខនេះ។

ប្រធានអង្គភាព ភាពជាដៃគូររវាងរដ្ឋ និងឯកជនថ្នាក់កណ្តាល នៃក្រសួងសេដ្ឋកិច្ចនិងហិរញ្ញវត្ថុ លោកសំ វង្សី បានមានប្រសាសន៍ឲ្យដឹងសិក្ខាសាលាផ្សព្វផ្សា​យស្តីពី ការដាក់សំណើរគម្រោងអភិវឌ្ឍលំនៅឋានតម្លៃសមរម្យ នៅថ្ងៃទី២០ ខែមិថុនា ឆ្នាំ២០១៨នេះថា ដើម្បីជៀសវាងការរៀបចំឯកសារគំរោងមិនត្រឹមត្រូវ និងការជៀសវាងការខាតពេលវេលា នៅក្នុងដំណាក់កាលនៃការរៀបចំឯកសារ គឺត្រូវបង្ហាញសមត្ថភាពអ្នកសំណើរគម្រោង មានលក្ខណៈគ្រប់គ្រាន់ដើម្បីអភិវឌ្ឍន៍ រួមមានឯកសារទស្សនទាន បញ្ជីគម្រោ​ងសក្តានុពល គម្រោងលំអិតលើផ្នែកបច្ចេកទេស និង ព៌តមានលំអិតអំពីគម្រោង មុននឹងចាប់ផ្តើមសាងសង់គម្រោងនោះឡើង ។

លោកបន្តថា “ក្រុមហ៊ុននោះត្រូវជានីតិបុគ្គល ដែលបានចុះបញ្ជីរនៅកម្ពុជា នឹងត្រូវអនុញ្ញាត្តិសាងសង់លំនៅឋានយ៉ាងតិច១០០ឯកតាឡើង ត្រូវមានទីធ្លា និងបរិស្ថានល្អត្រឹមត្រូវ មានទីផ្សារ ឬមជ្ឍមណ្ឌលផ្សេងៗ”។្ឋាភិបាលកម្ពុជាបានចាប់ផ្តើមកំណត់តម្លៃ និងហេដ្ឋារចនាសម្ព័ន្ឋសមស្របមួយ សម្រាប់គំរោងលំនៅដ្ឋានដែលផ្តោតលើប្រជាជនមានជីវភាពមធ្យម និងក លោកបន្តថា “គម្រោងអភិវឌ្ឍលំនៅឋានតម្លៃសមរម្យ ដែលមានលំនៅដ្ឋានចាប់ពី១០០ឯកតា ត្រូវមានទីតាំងចម្ងាយ២០គីឡូ​ម៉ែត្រពីរាជធានី ក្រុងនឹងត្រូវលក់ក្នុងតម្លៃចន្លោះពី១៥,០០០ដុល្លារ ទៅដល់៣០,០០០ដុល្លារងាមេរិក៕

ដោយ វុត្ថា

ភ្នំពេញ៖ ថ្នាក់ដឹកនាំក្រុមហ៊ុនផ្លូវដែកដ៏ធំរបស់ចិន នៃក្រុមហ៊ុន China Railway 19th Bureau Group បានចាប់ផ្តើមមើលឃើញកាលានុវត្តន៍ភាពនៅកម្ពុជា ដោយបាន​បង្ហាញចំណាប់អារម្មណ៍វិនិយោគលើវិស័យគមនាមន៍ ជាពិសេសផ្លូវដែក និងហេដ្ឋារចនាសម្ព័ន្ធថ្មីៗ ដើម្បីចូលរួមអភិវឌ្ឍន៍ប្រទេសនេះ ស្របតាមយុទ្ធសាស្ត្រផ្លូវមួយ ខ្សែក្រវាត់មួយ ដែលផ្តួចផ្តើមដោយរដ្ឋាភិបាលចិន។

លោក Gong Jiangang នាយកចាត់ចែងក្រុមហ៊ុន China Railway 19th Bureau Group របស់ចិនបានថ្លែងក្នុងជំនួបជាមួយរដ្ឋមន្រ្តីក្រសួងពាណិជ្ជកម្មកម្ពុជាកាលពីថ្ងៃទី២១ មិថុនាកន្លងមកថា ក្រុមហ៊ុន China Railway 19th Bureau Group ដែលមានឯកទេសផ្នែកវិស័យវិស្វកម្ម និងសំណង់ខ្នាតធំ ហើយបច្ចុប្បន្នក្រុមហ៊ុនកំពុងធ្វើប្រតិបត្តិការសាងសង់ផ្លូវដែក និងសំណង់ធារាសាស្ត្រ នៅតាមប្រទេសក្នុងទ្វីបអាហ្វ្រិក និងអាស៊ាន។

លោកបន្តថា “កម្ពុជាគឺជាទីផ្សារសំខាន់មួយ ហើយលោកសង្ឃឹមថា នឹងទទួលបានការគាំទ្រពីក្រសួងពាណិជ្ជកម្ម និងរាជរដ្ឋាភិបាលកម្ពុជា លើគម្រោងសាងសង់ផ្លូវដែក និងហេដ្ឋារចនាសម្ព័ន្ធផ្សេងៗ”។

លោកប៉ាន សូរស័ក្តិ បានសម្តែងការស្វាគមន៍ ចំពោះគម្រោងវិនិយោគរបស់ក្រុមហ៊ុន China Railway 19th Bureau Group និងបានជម្រាបជូន លោក គ័ង ជានកាង អំពីស្ថានភាពវិស័យគមនាគមន៍នៅកម្ពុជា និងតម្រូវការហេដ្ឋារចនាសម្ព័ន្ធចាំបាច់មួយចំនួនរបស់រាជរដ្ឋាភិបាលកម្ពុជា ដើម្បីបម្រើការអភិវឌ្ឍវិស័យពាណិជ្ជកម្ម និងការដឹកជញ្ជូ​នក្នុងនោះក៏មានផ្លូវដែក និងផ្លូវល្បឿនលឿនផងដែរ ហើយនេះគឺជាឱកាសល្អសម្រាប់ក្រុមហ៊ុន ក្នុងការហក់ចូលទីផ្សារកម្ពុជា។

លោករដ្ឋមន្រ្តីបានស្នើលោក គ័ង ជានកាង បញ្ជូនក្រុមការងារ ដើម្បីធ្វើការសិក្សាអំពីស្ថានភាពផ្លូវដែក និងផ្លូវថ្នល់នៅក្នុងប្រទេសកម្ពុជាឲ្យបានច្បាស់លាស់ ដើម្បីចងក្រងរបាយការណ៍ និងដាក់សំណើវិនិយោគជាផ្លូវការជូនរាជរដ្ឋាភិបាលកម្ពុជា ហើយក្រសួងពាណិជ្ជកម្ម នឹងរង់ចាំផ្តល់ការគាំទ្រ និងកិច្ចសហការគ្រប់ពេលវេលា។

នៅក្នុងប្រទេសកម្ពុជា វិស័យគមនាមន៍ និងហេដ្ឋារចនាសម្ព័ន្ធ គឺជាសរសៃឈាមសេដ្ឋកិច្ចជាតិ សម្រាប់បម្រើការអភិវឌ្ឍវិស័យពាណិជ្ជកម្ម កសិកម្ម ឧស្សាហកម្ម និងទេសចរណ៍។ តាមរយៈកិច្ចប្រឹងប្រែងរបស់រាជរដ្ឋាភិបាល បណ្តាញគមនាមន៍ជាច្រើន កំពុងត្រូវបានស្ថាបនា ជួសជុល និងដាក់ឲ្យដំណើរការឡើងវិញជាបន្តបន្ទាប់ផងដែរ។ នៅក្នុងពេលឆាប់ៗខាងមុខនេះ រាជរដ្ឋាភិបាលនឹងដាក់ឲ្យដំណើរការជាផ្លូវការ នូវផ្លូវដែកដែលតភ្ជាប់ពីក្រុងសិរីសោភ័ណ នៃខេត្តបន្ទាយមានជ័យ ទៅកាន់ទីក្រុងបាងកកនៃប្រ​ទេ​សថៃ ព្រមទាំងបើកការដ្ឋានសាងសង់ផ្លូវល្បឿនលឿន ដែលតភ្ជាប់រាជធានីភ្នំពេញទៅក្រុងព្រះសីហនុថែមទៀត៕

ដោយគង់ សូរិយា
​ភ្នំពេញ: ដំណឹងល្អមកដល់ហើយ សម្រាប់អ្នកមានបំណងសិក្សាលើជំនាញអច​ល​នវត្ថុកម្ពុជា ដោយមជ្ឈមណ្ឌលអចលនវត្ថុកម្ពុជា នឹងចាប់ផ្តើមបើកដំណើរការនៅពេល ឆាប់ៗខាងមុខនេះ។

​ប្រធានក្រុមប្រឹក្សាភិបាលនៃមជ្ឈមណ្ឌលអចលនវត្ថុកម្ពុជា លោកឃាង ពុទ្ឋីបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី២២ មិថុនានេះថា មជ្ឈមណ្ឌលអចលនវត្ថុកម្ពុជាបានទទួលអាជ្ញាប័ណ្ណពីក្រសួងការងារ និងបណ្តុះបណ្តាលវិជ្ជាជីវៈរួចហើយ និងចា ប់ផ្តើមបើកដំណើរការបណ្តុះបណ្តាល នៅកំឡុងខែកញ្ញាខាងមុខនេះ។ មជ្ឈមណ្ឌលនេះនឹងបើកនៅក្នុងគំរោងONE Park នៃPhnom Penh City Centerហើយការចុះឈ្មោះចូលរៀន នឹងចាប់ផ្តើមពីនៅកំឡុងខែសីហាខាងមុខនេះ។

​លោកបន្តថា“គោលដៅនៃការបើកមជ្ឈមណ្ឌលនេះ ដើម្បីបំពេញតម្រូវការធនធា​នមនុស្សក្នុងវិស័យអចលនវត្ថុកម្ពុជា ព្រោះបច្ចុប្បន្នមានគំរោងជាច្រើនបានកើតឡើង ហើ​យត្រូវការធនធានមនុស្ស ដែលយើងមិនទាន់បំពេញបាននៅឡើយ”។លោកបន្តថា “ទោះ​បីជាមានអ្នកជំនាញពីក្រៅប្រទេស មកធ្វើការក៏ដោយ ក៏មិនទាន់បំពេញបាននូវតម្រូវការធនធានមនុស្សក្នុងវិស័យនេះទេ ដោយសារមានគំរោងផ្សារទំនើបធំៗ ខុនដូ និងអាផាតម៉ិនជាច្រើនបាននិងកំពុងសាងសង់”។

​លោកឃាង ពុទ្ឋីបានបន្តថា កម្មវិធីសិក្សាកំពុងត្រូវបានរៀបចំឡើង ដោយយើងបានសិក្សាស្រាវជ្រាវ និងដកស្រង់យកកម្មវិធីសិក្សាល្អៗពីជប៉ុន កូរ៉េ សាំងហ្កាពួរជាដើមយកមកច្របាច់បញ្ចូលគ្នា ជាមួយកម្មវិធីដែលយើងបានរៀបចំខ្លួនឯង ដើម្បីធ្វើយ៉ាងណាឲ្យកម្មវិធីសិក្សារបស់យើងមានស្តង់ដាអន្តរជាតិ។

លោកបន្តថា ដោយសារសាលានេះបង្កើតដោយអ្នកជំនាញអចលនវត្ថុក្នុងស្រុក គ្រូបង្រៀនភាគច្រើននឹងជាគ្រូខ្មែរ ដែលមានបទពិសោ​ធន៍យូរឆ្នាំក្នុងវិស័យនេះ និងជាអ្នកកំពុងអនុវត្តន៍ការងារផ្ទាល់ និងគ្រូបរទេសដែលមានបទពិសោធន៍ខ្ពស់។

​ជាមួយនឹងកម្មវិធីបណ្តុះបណ្តាល ដែលបាននិងកំពុងរៀបចំយ៉ាងសម្រិតសម្រាំង លោកឃាង ពុទ្ឋីបានអះអាងថា តម្លៃសិក្សាក្នុងការសិក្សានេះ នឹងមានភាពស្រម្យ និងមាន​អាហារូបករណ៍សម្រាប់សិស្សានុសិស្សក្រីក្រ ដែលមានបំណងចង់សិក្សា តាមរយៈការសហការជាមួយអ្នកអភិវឌ្ឍន៍នានា ដើម្បីផ្តល់អាហារូបករណ៍នេះ។
កម្មវិធីសិក្សានៅមជ្ឈមណ្ឌលអចលនវត្ថុកម្ពុជា នឹងមានរយៈពេលចាប់ពី១សប្តាហ៍ ដល់មួយខែ អាស្រ័យលើជំនាញនិមួយៗ នៃកម្មវិធីសិក្សាជាក់ស្តែង។

លោកឃាង ពុទ្ឋីបានបន្តថា លោកហ៊ានអះអាងថា និស្សិតឬសិក្ខាកាមដែលបញ្ចប់​ការសិក្សានៅក្នុងមជ្ឈមណ្ឌលនេះ នឹងទទួលបានការងារធ្វើពិតប្រាកដ ដោយសាររហូតមកទល់ពេលនេះ តម្រូវការធនធានមនុស្សក្នុងវិស័យនេះកំពុងកើនឡើងជាប្រចាំ៕