ដោយ ដួង ចន្រ្ទា

ភ្នំពេញ៖ រាជរដ្ឋាភិបាលជប៉ុន បានផ្តល់ហិរញ្ញប្បទាន២៨៤០លានដុល្លារអា​មេរិក គិតពីទសវត្សរ៍ទី៩០ រហូតដល់ដំណាច់ឆ្នាំមុន និងគ្រោងផ្តល់ហិរញ្ញប្បទានសរុបប្រមាណ១៦៨លានដុល្លារអាមេរិក ដើម្បីអភិវឌ្ឈន៍កម្ពុជា។

យោងតាមរបាយការណ៍របស់ស្ថានទូតជប៉ុនប្រចាំកម្ពុជា ដែលបានបង្ហា​ញកាលពីពេលថ្មីៗនេះបានឲ្យដឹងថា នៅក្នុងនាមប្រទេសជាមិត្ត ប្រទេសជប៉ុន នឹងជួយពន្លឿន ការកាត់បន្ថយនូវភាពក្រីក្រនៅកម្ពុជា និងគាំទ្រដល់កិច្ចខិតខំប្រឹងប្រែងរបស់រាជរដ្ឋាភិបាល ដើម្បីសម្រេចគោលដៅ ក្លាយជាប្រទេសមានចំណូ​លមធ្យមកម្រិតខ្ពស់នៅឆ្នាំ២០៣០ ការបន្តផ្តល់ហិរញ្ញប្បទានដ៏សន្ធឹកសន្ធាប់នេះ គឺបានបង្ហាញនូវការប្តេជ្ញាចិត្តរបស់ប្រទេសទាំងពីរ ក្នុងការពង្រីកភាពជាដៃគូយុទ្ធសាស្រ្ត ស្របតាមការសម្រេចរបស់ប្រមុខរាជរដ្ឋាភិបាល នៃប្រទេសទាំងពីរ ក្នុងនោះបើគិតត្រឹមឆ្នាំ២០១៧ភាគីជប៉ុន បានបើកផ្តល់ហិរញ្ញប្បទានសរុប ប្រមាណជា២.៨៤០លានដុល្លារអាមេរិក សម្រាប់អភិវឌ្ឍន៍វិស័យអទិភាពខាងលើនៅកម្ពុជារួចហើយ។

នៅក្នុងកិច្ចប្រជុំពិគ្រោះយោបល់កម្រិតនយោបាយស្តីពី ហិរញ្ញប្បទានស​ហប្រតិបត្តិការអភិវឌ្ឍន៍ផ្លូវការ រវាងរាជរដ្ឋាភិបាលកម្ពុជា និងរាជរដ្ឋាភិបាលជប៉ុន នៅក្រុមប្រឹក្សាអភិវឌ្ឍន៍កម្ពុជា ដែលរាជរដ្ឋាភិបាលកម្ពុជាតំណាងដោយ លោកឈៀង យ៉ាណារ៉ា រដ្ឋមន្ត្រីប្រតិភូអមនាយ​ករដ្ឋមន្រ្តី និងភាគីជប៉ុនតំណាងដោយ លោក Hidehisa HORINOUCHI ឯកអគ្គរាជទូតជប៉ុនប្រចាំនៅកម្ពុជា ភាគីទាំងពីរបានពិភាក្សា ការផ្លាស់ប្តូរយោបល់ រួមគ្នាលើវឌ្ឍនភាព ក៏ដូចជាបញ្ហាប្រឈម ក្នុងការអនុវត្តន៍គម្រោងសហប្រតិបត្តិការកន្លងមក និងការបន្តការពង្រីកប្រសិទ្ធភាព នៃការអនុវត្តន៍គម្រោងទៅពេលអនាគត ដោយភាគីទាំងពីក៏បានឯកភាពពង្រីងកិច្ចសហប្រតិបត្តិការ តាមរយៈការ អនុវត្តន៍គោលនយោបាល គឺផ្តោតទៅលើការងារអទិភាពចំនួន៣រួមមាន ការគាំទ្រអភិវឌ្ឍន៍វិស័យឧស្សាហកម្ម ការលើកកម្ពស់គុណភាពនៃការរស់នៅរបស់ប្រជាជន និងការគាំទ្រដល់ការអភិវឌ្ឍន៍សង្គម ដើម្បីឆ្លើយតបទៅនឹងតម្រូវការរបស់រាជរដ្ឋាភិបាល។

លោកឯកអគ្គរដ្ឋទូតជប៉ុនបានឲ្យដឹងថា “រាជរដ្ឋាភិបាលជប៉ុន គ្រោងផ្តល់ហិរញ្ញប្បទាន សរុបប្រមាណ១៦៨លានដុល្លារអាមេរិក ដើម្បីបន្តអនុវត្តគម្រោងអទិភាពជាច្រើន ក្នុងការចូលរួមចំណែកជាមួយរាជរដ្ឋាភិបាលកម្ពុជា ធ្វើ ឲ្យបានសម្រេចតាមវឌ្ឍនភាពអភិវឌ្ឍន៍”។ លោកបន្តថា ការផ្តល់ហិរញ្ញប្បទានទៅពេលអនាគត នឹងមានការកើនឡើងជាបន្តបន្ទាប់ តាមរយៈការអនុវត្តគម្រោងថ្មីៗទៅតាមប្រមុខរាជរដ្ឋាភិបាលទាំងពីរបានឯកភាពគ្នា បន្ទាប់ពីដំណើរទស្សនកិច្ច ជាផ្លូវការរបស់សម្តេចតេជោ ហ៊ុន សែន នាយករដ្ឋមន្រ្តី នៅប្រទេសជប៉ុន ដែលរួមមាន គម្រោងអភិវឌ្ឍន៍ប្រព័ន្ធដឹកជញ្ជូន និងចរាចរក្នុងក្រុង គម្រោងធ្វើឲ្យប្រសើប្រព័ន្ធភស្តុភាកម្មនៅកម្ពុជា និងការអភិវឌ្ឍន៍ធនធានមនុស្ស ដើម្បីបម្រើវិស័យ ឧស្សាហកម្ម “។

នៅក្នុងឆ្នាំ២០១៧រាដ្ឋាភិបាល ប្រទេសទាំងពីរបានចុះហត្ថលេខា លើឯកសារផ្តល់ហិរញ្ញប្បទានចំនួន២ គឺគម្រោងអភិវឌ្ឍន៍ផែរកុងតីន័រថ្មី គម្រោងធ្វើឲ្យប្រសើរឡើងនៃមន្ទីរពេទ្យបង្អែកខេត្តបាត់ដំបង។ គម្រោងអាហារូបករណ៍អភិវឌ្ឍន៍ធនធានមនុស្ស គម្រោងពង្រីកប្រព័ន្ធទឹកស្អាតក្នុងខេត្តកំពង់ធំ គម្រោងធ្វើឲ្យប្រសើឡើងនូវកំណាត់ផ្លូវជាតិលេខ៥ខាងត្បូង ក្នុងជំហានទី២ គម្រោងសាងសង់ស្ពានបន្ទាន់ នៅតំបន់រងគ្រោះដោយសារទឹកជំនន់ និងគម្រោងសាងសង់វិទ្យាស្ថានគរុគោសល្យនៅភ្នំពេញ និងបាត់ដំបង សរុបជាទឹកប្រាក់ប្រមាណ៤៥២លា​ន​ដុល្លារ៕

ដោង គង់ សូរិយា

ភ្នំពេញ​៖ ប្រជាជនកម្ពុជាទំនងជាមិនសូវត្អូញត្អែរ ពីតម្លៃអគ្គិសនីទៀតនោះទេ ខណៈអាជ្ញាធរអគ្គិសនីកម្ពុជាគ្រោងបន្ថយថ្លៃលក់អគ្គិសនីថ្មី នៅតាមបណ្តាខេត្តចំនួន១៤ ជាតំបន់ដែលកំពុងចែកចាយអគ្គិសនីនៅក្រៅទីរួមខេត្ត សម្រាប់ ឆ្នាំនេះ។

យោងតាមប្រកាសក្រសួងរ៉ែ និងថាមពល ស្តីពីការកែសម្រួលយុទ្ធសាស្រ្តបន្ថយអត្រា និងគម្លាតថ្លៃលក់អគ្គិសនីនៅកម្ពុជាសម្រាប់ការអនុវត្តន៍ ឆ្នាំ២០១៧-២០២០ និងយោងតាមការពិនិត្យវិភាគថ្លៃអគ្គិសនីចែកចាយ ដែលបានធ្វើការគណនា ក្នុងផែនការយុទ្ធសាស្រ្តកាត់បន្ថយថ្លៃសម្រាប់ខួបនៃឆ្នាំ២០១៨  និងយោ​​ងតាមអនុក្រិត្យស្តីពី គោលការណ៍វាយតម្លៃភាពត្រឹមត្រូវ នៃការចំណាយក្នុងអាជីវកម្មអគ្គិសនី និងបទប្បញ្ញត្តិស្តីពី គោលការណ៍កំណត់ថ្លៃលក់អគ្គិសនីកម្ពុជា ដែលគេហទំព័រអចលនទ្រព្យ និងសេដ្ឋកិច្ចឈានមុខគេ Propertyarea.asia ទើប​ទទួលបាននាព្រឹកថ្ងៃទី៩ កុម្ភៈនេះបានឲ្យដឹងថា អាជ្ញាធរអគ្គិសនីកម្ពុជាគ្រោងបន្ថយថ្លៃលក់អគ្គិសនី នៅក្នុងខេត្តចំនួន១៤ សម្រាប់តំបន់ដែលកំពុងចែកចាយអគ្គិសនីនៅក្រៅទីរួមខេត្ត គឺចាប់ពីដើមខែមេសា ឆ្នាំ២០១៨នេះ។

ខេត្តទាំង១៤ ដែលគ្រោងបន្ថយថ្លៃលក់អគ្គិសនី រួមមាន ទីរួមខេត្តកំពង់ស្ពឺ ខេត្តព្រះសីហនុ តាកែវ កំពត បាត់ដំបង បន្ទាយមានជ័យ សៀមរាប ព្រៃវែង កំពង់ចាម ត្បូងឃ្មុំ ក្រចេះ ស្ទឹងត្រែង មណ្ឌលគីរី និងខេត្តរតនគីរី។ សម្រាប់លំនៅដ្ឋានពលរដ្ឋកម្ពុជា ដែលរស់នៅក្រៅទីរួមខេត្តខាងលើ អាជ្ញាធរអគ្គិសនី​បានកំណត់ថា ប្រជាពលរដ្ឋប្រើប្រាស់មិនលើសពី១០គីឡូវ៉ាត់ម៉ោងក្នុងមួយខែ គឺលក់ក្នុងតំលៃ៤៨០រៀល ក្នុងមួយគីឡូវ៉ាត់ម៉ោង។

ប្រជាពលរដ្ឋប្រើប្រាស់ចាប់ពី១១គីឡូ ដល់៥០គីឡូវ៉ាត់ម៉ោងក្នុង១ខែ ក្នុងតម្លៃ៦១០រៀល ក្នុង១គឺឡូវ៉ាត់ម៉ោង។ ចំណែកប្រជាពលរដ្ឋប្រើលើសពី៥១គីឡូ ក្នុងមួយខែឡើងទៅ គឺបានចុះពី៧៩០រៀល មកនៅ៧៧០រៀល ក្នុង១គីឡូវ៉ាត់ម៉ោងក្នុងមួយខែវិញ។

ដោយឡែកអតិថិជនទូទាត់ដោយថវិការដ្ឋ និងលំនៅដ្ឋានរស់នៅជនបរទេ​សគ្រប់ទំហំប្រើប្រាស់មានតម្លៃចាប់ពី៧៩០រៀល មកនៅ៧៧០រៀលក្នុងគីឡូវ៉ាត់ម៉ោង និងការបូមទឹកកសិកម្មនៅពេលយប់ ពីម៉ោង៩យប់ដល់៧ព្រឹក ក្នុង១គីឡូ​វ៉ាត់ម៉ោងតម្លៃ៤៨០រៀលផងដែរ។

សេចក្តីជូនដំណឹងដដែលបានឲ្យដឹងថា ចំណែកគម្រោងបន្ថយថ្លៃអគ្គិសនី នៅក្នុងតំបន់ចែកចាយភ្នំពេញ និងក្រុងតាខ្មៅវិញ អាជ្ញាធរអគ្គិសនីបានធ្វើការកំណត់ថា អត្រាប្រើមិនលើស៥០គឺឡូវ៉ាត់ម៉ោងក្នុង១ខែ គឺរក្សាក្នុងតម្លៃ៦១០រៀលក្នុង១គីឡូវ៉ាត់ម៉ោង។ ការប្រើប្រាស់លើសពី៥០ ទៅដល់២០០គឺឡូវ៉ាត់ម៉ោងតម្លៃ៧២០រៀល ក្នុងគីឡូវ៉ាត់ម៉ោង និងការប្រើប្រាស់លើស២០០គឺឡូវ៉ាត់ម៉ោង បានចុះពីតម្លៃ៧៧០រៀល មកនៅ៧៥០រៀល ក្នុងគីឡូវ៉ាត់ម៉ោងវិញ។

សម្រាប់ការអនុវត្តនិតិវិធីកំណត់របស់ច្បាប់ អគ្គិសនីកម្ពុជាសូមដាក់បន្ថយថ្លៃលក់អគ្គិសនីនេះ នឹងធ្វើការពិគ្រោះយោបល់ជាសាធារណៈ ជាមួយគ្រប់អ្នកពាក់ព័ន្ធទាំងអស់ ទាំងក្រសួង ស្ថាប័នរាជរដ្ឋាភិបាល អាជ្ញាធរមូលដ្នាន និងអ្នកប្រើប្រាស់អគ្គិសនី ដែលស្ថិតនៅក្នុងខេត្តទាំង១៤ ចាប់ពីការជូនដំណឹងនេះ រហូតដល់ថ្ងៃទី២៨ ខែកុម្ភៈ ឆ្នាំ២០១៨ ហើយបន្ទាប់ពីការពិគ្រោះយោបល់រួច ឯកសារថ្លៃលក់អគ្គិសនីថ្មីនេះ នឹងត្រូវចាត់ទុកឆ្លងកាត់ពិគ្រោះយោបល់រួច ហើយអាជ្ញាធរអគ្គិសនី កម្ពុជា នឹងធ្វើការពិនិត្យ និងអនុម័តថ្លៃលក់អគ្គិសនីនេះ ទៅតាមការកំណត់របស់ច្បាប់ស្តីពីអគ្គិសនីកម្ពុជា ៕

ដោយ ដួង ចន្រ្ទា

ភ្នំពេញ៖ អ្នកវិនិយោគកូរ៉េបានឈរចំណាត់ថ្នាក់ទី៥ នៅកម្ពុជាក្នុងរយៈពេល៥ឆ្នាំចុងក្រោយនេះ ជាប្រទេសមួយដែលបានវិនិយោគច្រើន ក្នុងចំណោមអ្នកវិនិយោគបរទេសនៅកម្ពុជា។

រដ្ឋមន្រ្តីប្រតិភូអមនាយករដ្ឋមន្រ្តី និងជាអគ្គលេខាធិការក្រុមប្រឹក្សាអភិវឌ្ឍ​ន៍កម្ពុជា លោកសុខ ចិន្តាសោភា បានថ្លែងក្នុងកិច្ចប្រជុំលើកទី២ នៃគណៈកម្មការចម្រុះកម្ពុជា-កូរ៉េ ជាមួយលោក Yun Kang-hyeon អនុរដ្ឋមន្រ្តីក្រសួងការបរទេសសាធារណរដ្ឋកូរ៉េនាព្រឹកថ្ងៃទី៩ កុម្ភៈនេះ។ ភាគីទាំងពីរបានបានពិភាគ្សាផ្តោតលើការត្រួតពិនិត្យរួមគ្នាលើវឌ្ឍនភាព នៃការអនុវត្តការងារ ដែលភាគីតទាំងពីរបានឯកភាពគ្នា ក្នុងកិច្ចប្រជុំលើកទីមួយកន្លងមកនេះ និងបានពិភាក្សាបន្ថែមលើ ប្រធានបទសំខាន់ៗ រួមមាន ទំនាក់ទំនងទ្វេភាគីកម្ពុជា-កូរ៉េ កិច្ចសហប្រតិបត្តិការសេដ្ឋកិច្ចកម្ពុជា-កូរ៉េ ក្នុងក្របខណ្ឌនៃគោលនយោបាយភាគខាងត្បូងថ្មី ក្នុងគោ​ល​បំណងលើកកម្ពស់ ទំនាក់ទំនងរវាងអាស៊ាន និងកូរ៉េឲ្យកាន់តែមានភាពជិត ស្និទ្ធបន្ថែមទៀត។

កិច្ចប្រជុំនេះ ក៏បានពិភាក្សាទាក់ទងពាណិជ្ជកម្ម និងវិនិយោគ កិច្ចសហប្រតិបត្តិការការអភិវឌ្ឍន៍ កិច្ចសហប្រតិបត្តិការសេដ្ឋកិច្ចក្នុងតំបន់ និងពហុភាគីក្នុងក្របខណ្ឌអាស៊ាន-កូរ៉េ អាស៊ានបូក៣។ កិច្ចប្រជុំកំពូលអាស៊ីបូព៌ា កិច្ចសហប្រតិបត្តិការហិរញ្ញវត្ថុ កិច្ចសហប្រតិបត្តិការស្តីពី E-government និងកិច្ចព្រមព្រៀ​ងស្តីពីជៀសវាងការយកពន្ធត្រួតស៊ីគ្នាផងដែរ។

រហូតមកទល់ពេលនេះកូរ៉េ បានវិនិយោគប្រមាណ២០៨គម្រោង ដោយមានទុនវិនិយោគសរុប៤៧០០លានដុល្លារអាមេរិក ជាចំនួនកើនឡើងជាលំដាប់ ជាពិសេសនៅក្នុងឆ្នាំ២០១៧ កន្លងមកនេះ អ្នកវិនិយោគទុនកូរ៉េបានបោះទុនវិនិយោគនៅកម្ពុជា មានចំនួនរហូតដល់២០២លានដុល្លារអាមេរិក។

លោកសុខ ចិន្តាសោភា បានថ្លែងអំណរគុណដល់សាធារណៈកូរ៉េ ដែលជានិច្ចកាលបានផ្តល់ហិរញ្ញប្បទានសហប្រតិបត្តិការ និងជំនួយបច្ចេកទេសផ្សេងៗដល់កម្ពុជា ជាពិសេសដល់អ្នកវិនិយោគទុនកូរ៉េ ដែលបានវិនិយោគនៅកម្ពុជា ដែ​លជាការផ្តល់ទំនុកចិត្តដល់រាជរដ្ឋាភិបាលកម្ពុជា និងសូមគាំទ្រចំពោះការដាក់ចេញគោលនយោបាយភាគខាងត្បូងថ្មី របស់សាធារណៈរដ្ឋកូរ៉េ។

លោកបន្តថា “គោលនយោបាយថ្មីមួយនេះ នឹងក្លាយជាចលករយ៉ាងសំ​ខាន់ ដើម្បីជម្រុញកិច្ចសហប្រតិបត្តិការក្នុងតំបន់ និងទ្វេភាគី ជាពិសេសការជម្រុញទាក់ទាញអ្នកវិនិយោគកូរ៉េ ឲ្យបណ្តាកទុករកស៊ីកាន់តែច្រើនថែមទៀត”៕

ដោយ វុត្ថា

ភ្ណំពេញ៖ នៅព្រឹកថ្ងៃសុក្រនេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអញ្ជើញបើកការដ្ឋានសាងសង់ស្ពានឆ្លងកាត់ទន្លេមេគង្គថ្មីមួយទៀត (ស្ពានមិត្តភាពកម្ពុជា-ចិនស្ទឹងត្រង់ក្រូចឆ្មា) ដែលបានតភ្ជាប់ទឹកដីនៃខេត្តកំពង់ចាម ទៅកាន់ទឹកដីនៃខេត្តត្បូងឃ្មុំ។

គម្រោងសាងសង់ស្ពាននេះ គ្រោងចំណាយថវិកាសរុបជិត ៥៧លានដុល្លារអាមេរិក ដែលជាហិរញ្ញប្បទានសម្បទានពីរដ្ឋាភិបាលចិន រួមជាមួយថវិកា​បដិភាគ របស់រាជរដ្ឋាភិបាលកម្ពុជា សម្រាប់ដោះស្រាយផលប៉ះពាល់ និងបោសសំអាតយុទ្ធភ័ណ្ឌមិនទាន់ផ្ទុះ។

ស្ពានមិត្តភាពកម្ពុជា-ចិនស្ទឹងត្រង់ក្រូចឆ្មា នេះនឹងចាប់ផ្តើមពីត្រើយខាងលិច ស្ថិតនៅត្រង់ចំណុចភូមិបឹងដែង ឃុំព្រែកកក់ ស្រុកស្ទឹងត្រង់ ខេត្តកំពង់ចាម ឆ្លងកាត់ទន្លេមេគង្គ ទៅត្រើយខាងកើត ស្ថិតនៅភូមិក្តុលលើ ឃុំទ្រា ស្រុកក្រូចឆ្មារ ខេត្តត្បូងឃ្មុំ។

យោតាមការបញ្ជាក់របស់សម្តេចតេជោនាយករដ្ឋមន្ត្រី ស្ពាននេះមានប្រវែងសរុប ១,១៣១ម៉ែត្រ និងទទឹង ១៣.៥០ម៉ែត្រ ជាប្រភេទស្ពានបេតុងសរសៃដែក៕

ដោយ​ ដួង ចន្រ្ទា
​ភ្នំពេញ៖ ក្នុងគោលដៅអភិរក្សធនធានធម្មជាតិ និងជីវចម្រុះ រដ្ឋាភិបាលកម្ពុជាបានសម្រេចដាក់កោះចំនួន៧ ជាតំបន់ឧទ្យានជាតិ ដែលចុះហត្ថលេខាដោយ​សម្តេចតេជោហ៊ុន សែននាយករដ្ឋមន្រ្តីកម្ពុជានាថ្ងៃទី៨ កុម្ភៈនេះ។

​កោះចំនួន៧ ដែលត្រូវបានដាក់បញ្ចូល ក្នុងតំបន់ឧទ្យានជាតិនោះ រួមមាន កោះរ៉ុង កោះរ៉ុងសន្លឹម កោះកូន កោះតូច កោះតាទៀនម កោះម្នាស់ក្រៅ កោះម្នាស់ក្នុង និងដែនសមុទ្រជុំវិញ ដែលមានផ្ទៃក្រឡាសរុបទំហំជាង៥ម៉ឺនហិកតា។

​គោលដៅនៃការអភិរក្សនេះ ដើម្បីចូលរួមអភិរក្ស និងការពារសោភ័ណភាព ចម្រុះបស់កោះទាំងនោះ ជីវៈចម្រុះលើកោះ និងដែនសមុទ្រជុំវិញ ពិសេសធនធា​នធម្មជាតិ ប្រកបដោយនិរន្តរភាព។ ការអភិរក្សនេះ ក៏មានគោលដៅកាត់បន្ថយ ការឡើងកំដៅផែនដី ក៏ដូចជា ព្រមទាំងលើកកំពស់ការចូលរួមរបស់សហគមន៍មូលដ្ឋាន ដើម្បីចូលរួមថែររក្សា និងអភិរក្ស ដោយប្រើប្រាស់ធនធានធម្មជាតិទាំងនេះ ប្រកបដោយនិរន្តរភាព។
​លោកហូ​ វណ្ឌីទីប្រឹក្សាសមាគមទីភ្នាក់ងារទេសចរណ៍កម្ពុជាតែងតែអំពាវ​នាវឲ្យមានការថែរទាំ និងអភិរក្សធនធានធម្មជាតិទាំងនោះ ដើម្បីថែររក្សានិរន្តរភាពបរិស្ថាន ដោយធ្វើយ៉ាងណាត្រូវធ្វើការអភិរក្ស និងអភិវឌ្ឍន៍ត្រូវដើរទន្ទឹមគ្នា ព្រោះប្រសិនជាមិនមានការគ្រប់គ្រងច្បាស់លាស់ និងមានការបំពុលបរិស្ថាននឹង ធ្វើឲ្យធនធានធម្មជាតិទាំងនោះ ប្រឈមនឹងការបំផ្លិចបំផ្លាញ ហើយនៅពេលធន​ធានធម្មជាតិរងការបំផ្លាញ អ្វីៗទាំងអស់នឹងរងការបំផ្លាញ។

​លោកបន្តថា “ដើម្បីថែររក្សា និងធានានិរន្តរភាពទេសចរណ៍ ការថែររក្សាបរិស្ថានមាន​សារៈសំខាន់ណាស់ ដើម្បីអភិវឌ្ឍន៍វិស័យនេះបានជោគជ័យ និងទទួ​ល​បានផលប្រយោជន៍ទាំងអស់គ្នា”៕

E-3B3A63DD3F21.jpeg” alt=”” width=”688″ height=”960″ class=”alignnone size-full wp-image-3305″ />