ដោយ: គង់ លាងហួរ

អន្តរជាតិ: យោងតាមប្រភពពីខាងរដ្ឋាភិបាលវៀតណាមបានទម្លាយឱ្យដឹងថា ប្រទេសវៀតណាមកំពុងសិក្សារៀនសូត្រពីប្រទេសចិន ដើម្បីអភិវឌ្ឍន៍បណ្តាញផ្លូវដែក ល្បឿនលឿនដំបូងបំផុតរបស់ខ្លួន។ នេះបើយោងតាមការចុះផ្សាយដោយ​សារពត៌មាន Reuters។

យោងតាមប្រព័ន្ធផ្សព្វផ្សាយបានឱ្យដឹងថា ប្រទេសវៀតណាម គ្រោងនឹងសាងសង់ប្រព័ន្ធ រថភ្លើងល្បឿនលឿនប្រវែង១.៥៤៥គីឡូម៉ែត្រ ជាមួយនឹងតម្លៃទុនវិនិយោគប្រមាណ៧២ពាន់លានដុល្លារ ឬស្មើនឹងចំនួន១៧% នៃផលទុនជាតិសរុប(GDP) ។

រដ្ឋបាលទីក្រុងហាណូយបានអះអាងថា “ឧស្សាហកម្មផ្លូវដែករបស់ប្រទេសចិន មានការអភិវឌ្ឍន៍ជឿនលឿនបំផុត នៅលើពិភពលោក។ ហេតុនេះ វៀតណាមនឹងរៀនសូត្រពីបទពិសោ​ធន៍របស់ចិន ជាពិសេសទាក់ទងនឹងបច្ចេកវិទ្យា ការគ្រប់គ្រងហិរញ្ញវត្ថុ និងជំនាញផ្នែកគ្រប់គ្រងផ្លូវដែក”។

គោលបំណងនេះ ត្រូវបានលាតត្រដាងឱ្យដឹង បន្ទាប់ពីរដ្ឋមន្ត្រីក្រសួងផែនការ និងវិនិយោគវៀតណាម លោក Nguyen Chi Dung បានបំពេញទស្សនកិច្ច ទៅកាន់ប្រទេសចិន ដោយលោកបានជួបពិភាក្សា ការងារជាមួយក្រុមមន្ត្រី និងថ្នាក់ដឹកនាំប្រតិបត្តិរបស់ក្រុមហ៊ុនផ្លូវដែកចិន។

ជាមួយគ្នានេះ ប្រទេសវៀតណាម និងចិនក៏ធ្លាប់បានចុះហត្ថលេខា លើកិច្ចព្រមព្រៀងសហប្រតិបត្តិការជាច្រើនផងដែរ រួមទាំងផ្លូវដែក ក្នុងអំឡុងដំណើរទស្សនកិច្ចរបស់ប្រធានាធិបតីចិនលោក ស៊ី ជីនពីង ទៅកាន់ទីក្រុងហាណូយ កាលពីខែធ្នូ ឆ្នាំ២០២៣កន្លងទៅ។

គិតមកទល់ពេលនេះ ប្រទេសវៀតណាម មានភាពយឺតយ៉ាវខ្លាំង នៅក្នុងការអភិវឌ្ឍន៍ប្រព័ន្ធ ផ្លូវដែកល្បឿនលឿន ទោះបីជាផែនការយុទ្ធសាស្ត្រ ត្រូវបានត្រៀមដាក់ឱ្យអនុវត្តន៍អស់ជាច្រើនឆ្នាំមកហើយយ៉ាងណាក្តី៕ប្រភព: Reuters ៕

ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃតិចតួច ឬអាចនិយាយថា ស្ថិតក្នុងសភាពទ្រឹងនៅព្រឹកថ្ងៃអង្គារនេះ ខណៈក្រុមអ្នកវិនិយោគបានប្រកាន់ជំហរប្រុងប្រយ័ត្ន មុនពេលចេញផ្សាយនូវទិន្នន័យសេដ្ឋកិច្ចរបស់សហរដ្ឋអាមេរិកនាពេលខាងមុខ ដែលអាចជះឥទ្ធិពលដល់គោលនយោបាយអត្រាការប្រាក់របស់ធនាគារកណ្តាលអាមេរិក។

តួយ៉ាង តម្លៃមាស Spot Gold បានងើបឡើងត្រឹមតែ០,០៣ភាគរយដល់២៦៣៩,៧៣ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,១២ភាគរយដល់២៦៦១,៦០ដុល្លារក្នុងមួយអោន គិតត្រឹមម៉ោង១០:៣៩នាទីព្រឹក។

គិតត្រឹមពេលបិទការជួញដូរកាលពីថ្ងៃច័ន្ទម្សិលមិញ តម្លៃមាស Spot Gold បានបិទនៅត្រឹម២៦៣៨,៩៣ដុល្លារក្នុងមួយអោន ខណៈតម្លៃមាស U.S. gold futures បានបិទនៅត្រឹម២៦៥៨,៥០ដុល្លារក្នុងមួយអោន។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៧៥ភាគរយ ដែលធនាគារកណ្តាលអាមេរិក(Fed) អាចទម្លាក់អត្រាការប្រាក់ចំនួន០,២៥ភាគរយបន្ថែមទៀតក្នុងកិច្ចប្រជុំនៅថ្ងៃទី១៨ ខែធ្នូនេះ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានងើបឡើងថ្លៃដល់១០៦,៥៣ពិន្ទុនៅព្រឹកថ្ងៃអង្គារនេះ បន្ទាប់ពីបានបិទការជួញដូរក្នុងរង្វង់១០៦,៤៥ពិន្ទុកាលពីថ្ងៃច័ន្ទម្សិលមិញ។

តម្លៃលោហៈធាតុប្រាក់ Spot silver បានងើបឡើង០,៦៥%ដល់៣១,០៦ដុល្លារ ក្នុងមួយអោន ខណៈតម្លៃផ្លាទីនបានធ្លាក់ចុះ០,២%ដល់៩៤៨,៥ដុល្លារក្នុងមួយអោន ហើយតម្លៃ palladium បានធ្លាក់ចុះ០,៦២%ដល់៩៨៩ដុល្លារក្នុងមួយអោនគិតត្រឹមម៉ោង១០:៤២នាទីព្រឹក៕

ដោយៈ និស្ស័យ

       ភ្នំពេញៈ អគ្គលេខាធិការរងគណៈកម្មាធិការវិនិយោគកម្ពុជា លោកសួន សុផល បានដឹកនាំសហការី ទទួលជួបពិភាក្សាការងារជាមួយ លោក Liuhao Ran ប្រធានផ្នែកអភិវឌ្ឍន៍នៃក្រុមហ៊ុន Windey Energy Technology Group Co., Ltd. ដែលមានមូលដ្ឋាននៅខេត្តZhejiang សាធារណរដ្ឋប្រជាមានិតចិន។

ជំនួបនេះធ្វើឡើង ក្នុងគោលបំណងពិគ្រោះយោបល់ លើកាលានុវត្តភាពវិនិយោគ លើគម្រោងថាមពលអគ្គិសនីកកើតឡើងវិញ។

ក្នុងជំនួបនេះ លោកសូន សុផល បានគូសរំលេចអំពីកិច្ចខិតខំប្រឹងប្រែង របស់ថ្នាក់ដឹកនាំកំពូល នៃប្រទេសទាំងពីរក្នុងការពង្រឹងមិត្តភាពដែកថែប និងលើកកម្ពស់កិច្ចសហប្រតិបត្តិការភាពជាដៃគូយុទ្ធសាស្ត្រ ដើម្បីធ្វើឱ្យកាន់តែស៊ីជម្រៅកិច្ចសហប្រតិបត្តិការត្បូងពេជ្រ និងជំរុញការកសាងសហគមន៍វាស​នារួមកម្ពុជា-ចិនក្នុងយុគសម័យថ្មី។

ក្នុងស្មារតីនេះ ការចូលរួមចំណែក នៃរំហូរវិនិយោគផ្ទាល់ពីប្រទេសចិន បានដើរតួនាទីដ៏សំខាន់ ក្នុងការដុសខាត់កិច្ចសហប្រតិបត្តិការត្បូងពេជ្រ ឱ្យកាន់តែភ្លឺចែងចាំងមួយកម្រិតបន្ថែមទៀត។

លោកសួន សុផល បានលើកទឹកចិត្តឱ្យសមភាគីបន្តពិគ្រោះយោបល់ជាមួយក្រសួងរ៉ែ និងថាមពលកម្ពុជាក្នុងគោ​លដៅសិក្សាសមិទ្ធិលទ្ធភាព និងទទួលបានគោលការណ៍ជាលក្ខណៈបច្ចេកទេស ​ពីក្រសួងជំនាញ ហើយក្រុមប្រឹក្សាអភិវឌ្ឍន៍កម្ពុជា បើកទ្វារចំហស្វាគមន៍ជានិច្ច ក្នុងការរង់ចាំផ្តល់កិច្ចសម្រួល និងការលើកទឹកចិត្តនានាស្របតាមច្បាប់ និងប្បញ្ញត្តិជាធរមាន។

លោក Liuhao Ran ប្រធានផ្នែកអភិវឌ្ឍន៍នៃក្រុមហ៊ុន Windey Energy Technology Group Co., Ltd. បានសម្តែងនូវការកត់សម្គាល់ អំពីថាមភាពរបស់កម្ពុជា ក្នុងការពង្រឹងបន្ថែមនូវទំនាក់ទំនងមិត្តភាពដែកថែប រវាងកម្ពុជា-ចិន ព្រមទាំងភាពសកម្មក្នុងក្របខ័ណ្ឌ នៃកិច្ចសហប្រតិបត្តិការ ក្រោមគំនិតផ្តួចផ្តើមផ្លូវ និងខ្សែក្រវាត់ ហើយលោកជឿជាក់ថា ការវិនិយោគផ្ទាល់ពីប្រទេសចិន ពិតជាបានជះផលវិជ្ជមាន លើកិច្ចសហប្រតិបត្តិការត្បូងពេជ្រប្រាកដមែន។

លោកបានទទួលយកអនុសាសន៍ ណែនាំរបស់ លោកអគ្គលេខាធិការរង និងបានបង្ហាញសុទិដ្ឋិនិយមថា Windey Energy Technology Group Co., Ltd. នឹងអាចមាន​ឱកាសបណ្តាក់ទុនវិនិយោគនៅកម្ពុជា លើវិស័យថាមពលស្អាតនាពេលខាងមុខ៕

ដោយ: គង់ លាងហួរ

អន្តរជាតិ: យោងតាមរបាយការណ៍ថ្មីរបស់អង្គការសហប្រជាជាតិ(UN) បានឱ្យដឹងថា ប្រជាជនចំនួនជាង១ពាន់លាននាក់នៅលើពិភពលោក កំពុងធ្លាក់ខ្លួនរស់នៅក្នុងភាពក្រីក្រធ្ងន់ធ្ងរ ដោយចំនួនជិតពាក់កណ្តាល នៃប្រជាជនទាំងនោះរស់នៅក្នុងបណ្តាប្រទេសកំពុងជួបប្រទះសង្គ្រាម។

តួយ៉ាង យោងតាមការស្រាវជ្រាវរបស់ស្ថាប័ន UN នៅទូទាំងប្រទេសចំនួន១១២ និងប្រជាជនចំនួន៦,៣ពាន់លាននាក់បានបង្ហាញថា មនុស្សចំនួន១,១ពាន់លាននាក់ បានជួបប្រទះភាពក្រីក្រ ដោយក្នុងនោះមនុស្សចំនួន៤៥៥លាននាក់ រស់នៅក្រោមស្រមោលសង្គ្រាម។

ការស្រាវជ្រាវបានបង្ហាញទៀតថា មនុស្សប្រហែល៥៨៤លាននាក់ ដែលមានអាយុក្រោម១៨ឆ្នាំ កំពុងជួបប្រទះភាពក្រីក្រខ្លាំង ដែលស្មើនឹងចំនួន២៧,៩ភាគរយ នៃកុមារនៅទូទាំងពិភពលោក បើប្រៀបធៀបនឹងចំនួន១៣,៥ភាគរយ នៃមនុស្សពេញវ័យ។

ម្យ៉ាងទៀត ចំនួន៨៣,២ភាគរយ នៃប្រជាជនក្រីក្របំផុតរបស់ពិភពលោក កំពុងរស់នៅក្នុងអនុតំបន់ សាហារ៉ាអាហ្វ្រិក និងតំបន់អាស៊ីខាងត្បូង។

ក្នុងចំណោមនោះ ប្រទេសឥណ្ឌាជាប្រទេស ដែលមានប្រជាជនក្រីក្របំផុតច្រើន ជាងគេចំនួន២៣៤លាននាក់បើប្រៀបធៀបនឹងចំនួនប្រជាជនឥណ្ឌា សរុបប្រមាណ១,៤ពាន់លាននាក់ តាមពីក្រោយដោយប្រទេសប៉ាគីស្ថាន អេត្យូពី នីហ្សេរីយ៉ា និងសាធារណរដ្ឋប្រជាធិបតេយ្យកុងហ្គោ។

បណ្តាប្រទេសទាំង៥នេះ រួមគ្នាគ្របដណ្តប់ចំនួនជិតពាក់កណ្តាល នៃប្រជាជនក្រីក្រចំនួន១,១ពាន់លាននាក់ នៅទូទាំងពិភពលោក។

វឌ្ឍនភាពក្នុងការកាត់បន្ថយភាពក្រីក្រ បានជាប់គាំងស្រ​ប​ពេលកំណើនសេដ្ឋកិច្ចសកលធ្លាក់ចុះ រួមទាំងការថយក្រោ​យដោយសារវិបត្តិជំងឺរាតត្បាត។  អត្រានៃភាពក្រីក្រក្នុងបណ្តាប្រទេស ដែលមានប្រាក់ចំណូលទាប មានកម្រិតខ្ពស់ជាងមុនពេលផ្ទុះជំងឺរាតត្បាត។

ដោយឡែក ធនាគារពិភពលោកបានព្យាករណ៍ថា មនុស្សចំនួន៦២២លាននាក់ ឬស្មើនឹង៧,៣ភាគរយ នៃចំនួនប្រជាជនរបស់ពិភពលោក នឹងរស់នៅក្នុងភាពក្រីក្រខ្លាំងនៅឆ្នាំ២០៣០​។ ការណ៍នេះមានន័យថា មនុស្សប្រហែល៦៩លាននាក់ត្រូវបានគេព្យាករណ៍ថា នឹងរួចផុតពីភាពក្រីក្រខ្លាំង នៅចន្លោះឆ្នាំ២០២៤ និងឆ្នាំ២០៣០ បើធៀបនឹងមនុស្សប្រហែល១៥០លាននាក់ ដែលបានរួចផុតភាពក្រីក្រខ្លាំងរវាងឆ្នាំ២០១៣ និងឆ្នាំ២០១៩។

លើសពីនេះ មនុស្សចំនួន៣,៤ពាន់លាននាក់ ឬស្មើនឹងជិត៤០ភាគរយ នៃចំនួនប្រជាជនសរុប នៅលើពិភពលោកត្រូវបានព្យាករណ៍ថា នឹងរកប្រាក់ចំណូលបានតិចជាង៦,៨៥ដុល្លារអាមេរិកក្នុងមួយថ្ងៃ។

ធនាគារពិភពលោកបានព្រមានថា “ប្រសិនបើកំណើនសេដ្ឋកិច្ចសកលបន្តធ្លាក់ចុះ នោះពិភពលោកនឹងចំណាយពេលរាប់ទសវត្សរ៍ ដើម្បីលុបបំបាត់ភាពក្រីក្រខ្លាំង និងចំណា​យពេលជាង១សតវត្សរ៍ ដើម្បីជួយមនុស្សឱ្យរកប្រាក់ចំណូលបានលើសពី៦,៨៥ដុល្លារក្នុងមួយថ្ងៃ ដើម្បីចាកចេញពីបន្ទាត់នៃភាពក្រីក្រ”។

ធនាគារពិភពលោកបានផ្តល់អនុសាសន៍បន្ថែមថា “ការកែលម្អប្រាក់ចំណូល ក្នុងវិស័យកម្លាំងពលកម្ម តាមរយៈការបង្កើតការងារកាន់តែច្រើន និងកាន់តែប្រសើរ និងការវិនិយោគលើវិស័យអប់រំ ហេដ្ឋារចនាសម្ព័ន្ធ និងសេវាមូលដ្ឋាននឹងមានសារៈសំខាន់ ដើម្បីជួយដល់ប្រជាជន ដែលរស់នៅក្នុងភាពក្រីក្រឱ្យទទួលបានអត្ថប្រយោជន៍កាន់តែច្រើន និងចូលរួមចំណែ​កដល់កំណើនសេដ្ឋកិច្ច និងលើកកម្ពស់ភាពធន់”៕ប្រភព: Al Jazeera & World Bank៕

ដោយៈ គង់ សូរិយា

       ភ្នំពេញៈ  សម្តេចតេជោហ៊ុន សែន ប្រធាន​គណបក្ស​ប្រជាជន​កម្ពុជា និង​ជា​ប្រធាន​ព្រឹទ្ធសភា​ ​បាន​ទៅ​ដល់​ប្រទេស​ចិន​ហើយ​កាលពី​ថ្ងៃ​ច័ន្ទ ដើម្បី​បំពេញ​ទស្សន​កិច្ច​ជា​ផ្លូវការ​នៅ​សាធារណរដ្ឋ​ប្រជាមានិត​ចិន។

ក្នុងដំណើរទស្សនកិច្ចកម្រិតខ្ពស់នេះ សម្តេចបាន​ជួប​ជាមួយ​ប្រធានាធិបតី​ចិន លោក ស៊ី ជីនពីង ដើម្បី​ពង្រឹង​ចំណង​មិត្តភាព​ដែក​ថែប​រវាង​ប្រទេស​ទាំង​ពីរ។

នេះ​ជា​ដំណើរ​ទស្សនកិច្ច​ផ្លូវការ ​លើក​ទី​មួយ​របស់​សម្តេច ក្នុង​នាម​ប្រធាន​ព្រឹទ្ធសភា​កម្ពុជា ដែល​ធ្វើ​ឡើង​តប​តាម​ការ​អញ្ជើញ​ របស់​របស់​គណបក្ស​កុម្មុយនីស្ត​ចិន ហើយ​គ្រោង​នឹង​បញ្ចប់​នៅ​ថ្ងៃ​ទី៤ ខែ​ធ្នូ​នេះ។

យោងតាម​ក្រសួង​ការបរទេស​ និងសហប្រតិបត្តិការអន្តរជាតិបានឲ្យដឹងថា ក្នុងដំណើរទស្សនកិច្ចនេះ សម្តេចតេជោហ៊ុន សែន គ្រោង​នឹង​ជួប​ជាមួយ​លោក ស៊ី ជីនពីង​ ប្រធានា​ធិបតី​ចិន និង​ជា​អគ្គលេខាធិការ​បក្សកុម្មុយនីស្ត​ចិន ហើយ​ក៏​នឹង​មាន​ជំនួប​ដោយ​ឡែក​ពី​គ្នា​ផង​ដែរ ​ជា​មួយ លោក វ៉ាង ហ៊ូនឹង ប្រធាន​គណៈកម្មាធិការ​ជាតិ ​នៃ​សភា​ប្រឹក្សា​នយោបាយ​ប្រជាជន​ចិន និង លោកចាវ ឡីជី ប្រធាន​គណៈកម្មាធិការ​អចិន្ត្រៃយ៍ ​នៃ​សភា​តំណាង​ប្រជាជន​ចិន ។

ក្រសួង​ការបរទេសបានឲ្យដឹង ​កាល​ពី​ថ្ងៃ​ទី៣០ ខែ​វិច្ឆិកា​ថា ដំណើរ​ទស្សនកិច្ច​របស់​សម្តេចតេជោហ៊ុន សែន ទៅ​កាន់​ប្រទេស​ចិន ក្នុង​នាម​ជា​ប្រធាន​ព្រឹទ្ធសភា “នឹង​ផ្តល់​កម្លាំង​ចលករ​ថ្មី ​ដល់​ការ​ពង្រឹង​ចំណង​មិត្តភាព​ដែក​ថែប លើក​កម្ពស់​កិច្ច​សហប្រតិបត្តិការ ​ជាដៃ​គូ​យុទ្ធសាស្ត្រ​គ្រប់​ជ្រុង​ជ្រោយ​ សំដៅ​ធ្វើ​ឱ្យ​កាន់​តែ​ស៊ី​ជម្រៅ ​នូវ​កិច្ច​សហប្រតិបត្តិការ​ត្បូង​ពេជ្រ  និង​ជំរុញ​ទៅ​មុខ​បន្ថែម​ទៀត ​នូវ​ការ​កសាង​សហគមន៍​វាសនា​រួម​កម្ពុជា-ចិន ​ដែល​មាន​កម្រិត​ខ្ពស់ និង​ស្តង់ដារ​ខ្ពស់​ក្នុង​យុគ​សម័យ​ថ្មី។

ប្រធាន​វិទ្យាស្ថាន​ទំនាក់​ទំនង​អន្តរជាតិ​ នៃ​រាជបណ្ឌិត្យ​សភា​កម្ពុជា ​លោកបណ្ឌិតគិន ភា បានយល់​ឃើញ​ថា ដំណើរ​ទស្សនកិច្ច​នេះ ​មាន​សារៈ​សំខាន់​ខ្លាំង​ណាស់ ​ក្នុង​ធ្វើ​ឲ្យ​ស៊ី​ជម្រៅ និង​ពង្រឹង​ទំនាក់​ទំនង​ទ្វេភាគី ​រវាង​ប្រទេស​ទាំង​ពីរ ដែល​មក​ទល់​ពេល​នេះ ​បាន​ក្លាយ​ជា​ដៃគូ​យុទ្ធសាស្ត្រ​គ្រប់​ជ្រុង​ជ្រោយ​រួច​ហើយ។

លោក​ថ្លែង​ថា ដំណើរ​ទស្សនកិច្ច​នេះ បាន​បង្ហាញ​ពី​គោល​នយោបាយ​ការបរទេស ​ឥត​ប្រែប្រួល​របស់​កម្ពុជា ​ចំពោះ​ចិន ទោះ​បី​ជា​សម្ដេច​តេជោ ហ៊ុន សែន មិន​ស្ថិត​នៅ​ក្នុង​អំណាច​នីតិប្រតិបត្តិ​តទៅ​ទៀត​ក្ដី ប៉ុន្តែ​សម្តេចនៅ​តែ​ជា​ប្រធាន​គណបក្ស​កាន់​អំណាច ដែល​ជា​គណបក្ស​កាច់​ចង្កូត​កម្ពុជា ​អស់​រយៈ​ពេល​ជាង​៤​ទសវត្សរ៍​មក​ហើយ។

លោក​បញ្ជាក់ថា “ចិន​នៅ​តែ​ជា​ដៃគូ​ដ៏​សំខាន់ និង​ចាំបាច់​ខ្លាំង​ណាស់​សម្រាប់​កម្ពុជា ទាំង​ផ្នែក​នយោបាយ យុទ្ធសាស្ត្រ និង សេដ្ឋកិច្ច”។ លោកបន្ថែមថា “សម្រាប់​ចិន កម្ពុជា​នៅ​តែ​ជា​ប្រទេស​គាំទ្រ​ឥត​ងាក​រេ ទៅ​លើ​គោលនយោបាយ​ចិន​តែ​មួយ ក៏ដូចជា​ទៅ​លើ​គំនិត​ផ្ដួច​ផ្ដើម​ និង​យុទ្ធសាស្ត្រ​សាកល​នានា​របស់​ចិន”។

លោក​បន្ត​ថា “កម្ពុជា​ និង​ចិន​អាច​រួម​បញ្ចូល​គ្នា​នូវ​គោលនយោបាយ​រៀងៗ​ខ្លួន ដើម្បី​គាំទ្រ​គ្នា​ទៅ​វិញ​ទៅ​មក និង​ដើម្បី​ការ​អភិវឌ្ឍ”៕