ដោយ: គង់ លាងហួរ
អន្តរជាតិ: យោងតាមការស្ទង់មតិថ្មីមួយបានរកឃើញថា តម្លៃផ្ទះថ្មីជាមធ្យមនៅតំបន់កណ្តាលទីក្រុងតូក្យូរបស់ប្រទេសជប៉ុនបានកើនឡើង២,៤ភាគរយនៅក្នុងខែកុម្ភៈឆ្នាំ២០២៥ ដល់ទំហំទឹកប្រាក់ចំនួន៧៨,៥៩លានយ៉េនក្នុងមួយយូនីត (ប្រហែល៥៣៤.០០០ដុល្លារ)។

ការស្ទង់មតិនេះត្រូវបានធ្វើឡើងដោយក្រុមហ៊ុនប្រឹក្សាផ្នែកអចលនទ្រព្យ Tokyo Kantei ទៅលើផ្ទះទោលថ្មី(Detached house) ដែលស្ថិតលើទំហំផ្ទៃដីចន្លោះពី៥០ម៉ែត្រការ៉េទៅ១០០ម៉ែត្រការ៉េក្នុងសង្កាត់ចំនួន២៣ របស់ទីក្រុងតូក្យូ។

ជាមួយគ្នានេះ តម្លៃផ្ទះទោលថ្មីជាមធ្យមនៅទូទាំងទីក្រុងតូក្យូបានកើនឡើង១,៥ភាគរយនៅក្នុងខែកុម្ភៈបើធៀបនឹងខែមករា ដល់ទំហំទឹកប្រាក់ចំនួន៦៨,៦៥លានយ៉េនក្នុងមួយយូនីត(ប្រហែល៤៦៥.៩៧២ដុល្លារអាមេរិក)។

យោងតាមអ្នកជំនាញមួយរូបនៅក្រុមហ៊ុន Tokyo Kantei បានអះអាងថា “ខណៈតម្លៃខុនដូកើនឡើងខ្ពស់កប់ពពក គ្រួសារដែលមានជីវភាពធូរធារបានងាកមកជ្រើសរើសទិញផ្ទះទោលនៅក្នុងតំបន់ ដែលមានមធ្យោបាយធ្វើដំណើរងាយស្រួល”។

ស្របពេលមានការកើនឡើងនៃតម្លៃសម្ភារៈសំណង់ និងតម្លៃកម្លាំងពលកម្ម បណ្តាអ្នកអភិវឌ្ឍន៍លំនៅដ្ឋានរបស់ប្រទេសជប៉ុនកំពុងកាត់បន្ថយការផ្គត់ផ្គង់គម្រោងរបស់ខ្លួននៅតាមទីតាំងមួយចំនួន។នេះបើយោងតាមការចុះផ្សាយដោយទីភ្នាក់ងារសារព័ត៌មាន Nikkei Asia។

ការណ៍នេះបាននាំឱ្យការផ្គត់ផ្គង់ផ្ទះទោលថ្មីនៅទូទាំងទីក្រុងតូក្យូដាំក្បាលចុះ២៤ភាគរយនៅក្នុងខែកុម្ភៈ ឆ្នាំ២០២៥ បើប្រៀបធៀបនឹងឆ្នាំមុន។

តម្លៃផ្ទះជាមធ្យមនៅក្នុងខេត្ត Kanagawa នៅជាប់នឹងទីក្រុងតូក្យូមានទំហំទឹកប្រាក់ចំនួន៤៩,៥៤លានយ៉េនក្នុងមួយយូនីតកាលពីខែកុម្ភៈ ដោយកើនឡើង០,២ភាគរយ បើធៀបនឹងខែមករា។

ជាមួយគ្នានេះ តម្លៃផ្ទះជាមធ្យមនៅក្នុងខេត្ត Saitama កាលពីខែកុម្ភៈបានកើនឡើង០,៨ភាគរយដល់ទំហំទឹកប្រាក់ចំនួន៤៤,១៦លានយ៉េនក្នុងមួយយូនីត៕ប្រភព: Nikkei Asia៕

ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃក្នុងការជួញដូរនៅព្រឹកថ្ងៃពុធនេះ ខណៈភាពតានតឹងពាណិជ្ជកម្មរវាងសហរដ្ឋអាមេរិក និងប្រទេសចិនបានជំរុញឱ្យតម្រូវការមាសកើនឡើង។

តួយ៉ាង តម្លៃមាស Spot Gold បានងើបឡើង០,០៦ភាគរយដល់២៩១៧,៧៣ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,១២ភាគរយដល់២៩២៤,៤០ដុល្លារក្នុងមួយអោនគិតត្រឹមម៉ោង១០:៤៩នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៩៦ភាគរយ ដែលធនាគារកណ្តាលអាមេរិក (Fed) នឹងបន្តរក្សាទុកអត្រាការប្រាក់របស់ខ្លួនឱ្យនៅថេរដដែលក្នុងកិច្ចប្រជុំគោលនយោបាយនៅថ្ងៃទី១៩ ខែមីនានេះ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានងើបឡើងថ្លៃដល់១០៣,៥៩ពិន្ទុនៅព្រឹកថ្ងៃពុធនេះ បន្ទាប់ពីបានបិទការជួញដូរត្រឹម១០៣,២៩ពិន្ទុកាលពីថ្ងៃអង្គារម្សិលមិញ។

ចំណែក តម្លៃលោហៈធាតុប្រាក់ Spot silver បានងើបឡើង០,៦ភាគរយដល់៣៣,៣៤ដុល្លារក្នុងមួយអោន ខណៈតម្លៃផ្លាទីនបានកើនឡើង១,១៩ភាគរយដល់៩៩១,៣០ដុល្លារក្នុងមួយអោន ហើយតម្លៃ palladium បានងើបឡើង០,១៩ភាគរយដល់៩៥១ដុល្លារក្នុងមួយអោនគិតត្រឹមម៉ោង១០:៥១នាទីព្រឹក៕

ដោយ: គង់ លាងហួរ
អន្តរជាតិ: យោងតាមកាសែត South China Morning Post បានរាយការណ៍ឱ្យដឹងថា តម្លៃជួលលំនៅដ្ឋាននៅក្នុងប្រទេសចិនបានដាំក្បាលចុះ ដោយសារការចាកចេញរបស់បណ្តាក្រុមហ៊ុនអន្តរជាតិ និងជនបរទេស។

តួយ៉ាង តម្លៃជួលផ្ទះល្វែងជាមធ្យមនៅតំបន់ពាណិជ្ជកម្មកណ្តាល(CBD)របស់ទីក្រុងប៉េកាំង បានដាំក្បាលចុះ១៧ភាគរយនៅក្នុងខែកុម្ភៈ ឆ្នាំ២០២៥ ធៀបនឹងឆ្នាំមុន មកនៅត្រឹមតម្លៃចំនួន១១.៣៨៥យ័ន(ប្រហែល១.៧៥០ដុល្លារអាមេរិក)ក្នុងមួយម៉ែត្រការ៉េក្នុងមួយខែ។

ជាមួយគ្នានេះ កាលពីខែកុម្ភៈ តម្លៃជួលផ្ទះល្វែងជាមធ្យមនៅក្នុងតំបន់ Dawanglu និងតំបន់ Jianguomen Wai នៃទីក្រុងប៉េកាំង បានធ្លាក់ចុះក្នុងអត្រា៦ភាគរយដូចគ្នា។ នេះ​បើ​យោង​តាម​ទិន្នន័យ​ ដែលចងក្រង​ឡើងដោយ​ទីភ្នាក់ងារអចលនទ្រព្យ Beike របស់ក្រុមហ៊ុន KE Holdings។

ចំណែក តម្លៃជួលផ្ទះល្វែងជាមធ្យមនៅក្នុងតំបន់ Lujiazui ស្ថិតនៅសង្កាត់ Pudong ដែលជាមជ្ឈមណ្ឌលហិរញ្ញវត្ថុដ៏ល្បីល្បាញរបស់ទីក្រុងសៀងហៃបានធ្លាក់ចុះ៨ភាគរយ ខណៈតម្លៃជួលផ្ទះនៅក្បែរវិហារបុរាណ Jingan បានដាំក្បាលចុះ១៣ភាគរយកាលពីខែកុម្ភៈ។

លោក Lu Wenxi អ្នកវិភាគនៅក្រុមហ៊ុន Centaline Property បានអះអាងថា “ការធ្លាក់ចុះនៃតម្លៃជួលផ្ទះនៅតំបន់ទាំងនេះមិនមែនទើបតែកើតឡើងនាពេលថ្មីៗនេះទេ។ប៉ុន្តែ តម្លៃជួលបានធ្លាក់ចុះ គិតចាប់តាំងពីការបិទខ្ទប់ប្រទេសចិន ដោយសារជំងឺរាតត្បាតកាលពីប៉ុន្មានឆ្នាំមុន”។

លោក Lu បានអះអាងឱ្យដឹងបន្ថែមថា “ជាធម្មតា កាលពីមុន អាផាតមុិនសម្រាប់ជួល ដែលមានតម្លៃចន្លោះពី១២.០០០យ័នទៅ១៣.០០០យ័នក្នុងមួយខែ នឹងអាចស្វែងរកអ្នកជួលបានក្នុងរយៈពេលត្រឹមតែ៣ខែប៉ុណ្ណោះ”។

ប៉ុន្តែ អ្នកវិភាគនៅក្រុមហ៊ុន Centaline Property រូបនេះបានគូសបញ្ជាក់ថា “ក្នុងពេលបច្ចុប្បន្ន គេត្រូវចំណាយពេលយូរជាងនេះទម្រាំអាចស្វែងរកអតិថិជនបាន”៕ប្រភព: SCMP៕

ដោយៈ គង់ សូរិយា

    ភ្នំពេញៈ លោកជា វុទ្ធី អគ្គលេខាធិការគណៈកម្មាធិការវិនិយោគកម្ពុជា និងសហការីបានទទួលជួបពិភាក្សាការងារ ជាមួយគណៈប្រ​តិភូវិនិយោគចិនចំនួន១៩ក្រុមហ៊ុន ដឹកនាំដោយលោក Liu Yong (លាវ យ៉ុង) ប្រធានសមាគមអ្នកវិនិយោគវ័យក្មេង នៅខេត្តអ៊ីនណាន ទីក្រុងឃុនមីង ដើម្បីសិក្សាពីឱកាស និងកាលានុវត្តន៍ភាពវិនិយោគនៅកម្ពុជា។

ជំនួបនេះ មានការសម្របសម្រួលពីអ្នកឧកញ៉ា លី ឃុនថៃ ប្រធានសមាគមស្បែកជើងកម្ពុជា។

ក្រុមហ៊ុនទាំង១៩នេះ មានសកម្មភាពវិនិយោគក្នុងវិស័យកសិកម្មសុខាភិបាល សំណង់និងអចលនទ្រព្យ បច្ចេកវិទ្យា ថាមពល បោះពុម្ពនិងវេចខ្ចប់ ម្ហូបអាហារ សណ្ឋាគារ និងបដិសណ្ឋារកិច្ច ការគ្រប់គ្រងធុរកិច្ច ការផ្តល់សេវាប្រឹក្សាផ្នែកច្បាប់ លក់និងសេវាថែទាំរថយន្ត និងការបណ្តុះបណ្តាលវិជ្ជាជីវៈ។

សមាគមអ្នកវិនិយោគវ័យក្មេង នៅខេត្តអ៊ីនណាន មានសមាជិកសរុបចំនួនប្រមាណ១.៥០០សហគ្រាស ដែលមានមុខសញ្ញាអាជីវកម្មក្នុងវិស័យផ្សេងៗពីគ្នា ហើយសហគ្រាសទាំងនោះ កំពុងមានបំណងពង្រីកការវិនិយោគរបស់ខ្លួននៅក្រៅប្រទេស ជាពិសេសនៅកម្ពុជា។

ក្នុងជំនួបនោះ លោកជា វុទ្ឋីបានលើកទ្បើងពីចំណងមិត្តភាពដ៏ជិតស្និទ្ធ និងយូរអង្វែងរវាងកម្ពុជា និងចិនដោយរដ្ឋាភិបាលចិនតែងតែជួយឧបត្ថម្ភគាំទ្រ ដល់ការអភិវឌ្ឍន៍សង្គមសេដ្ឋកិច្ចកម្ពុជា។ រីឯក្នុងក្របខណ្ឌកិច្ចសហប្រតិបត្តិការ ក្នុងការជំរុញការវិនិយោគ កន្លងមកថ្មីៗនេះ កម្ពុជា និងចិន បានចុះអនុស្សារណៈនៃការយោគយល់គ្នាមួយចំនួន ដូចជា “ច្រករបៀងឧស្សាហកម្ម និងបច្ចេកវិទ្យា” “ច្រករបៀងមច្ឆា និងអង្ករ” និង “ហេដ្ឋារចនាសម្ព័ន្ធសេដ្ឋកិច្ចឌីជីថល” ជាដើម។

លោកអគ្គលេខាធិការក៏បានគូសបញ្ជាក់ ពីស្ថានភាពវិនិយោគនៅកម្ពុជាដែលមានកំណើន ពីមួយឆ្នាំទៅមួយឆ្នាំ ជាពិសេសប្រភពទុនវិនិយោគមកពីប្រទេសចិន បានឈរនៅលំដាប់លេខរៀងទីមួយ ឬទី២ជាបន្តបន្ទាប់ក្នុងរយៈពេលជាង១ទសវត្សរ៍ចុងក្រោយនេះ។

ជាក់ស្តែងនៅក្នុងឆ្នាំ២០២៤ ការវិនិយោគមកពីប្រទេសចិនបានរួមចំណែកដល់ទៅប្រមាណ៥០% នៃទុនវិនិយោគសរុប។ ទន្ទឹមនឹងនេះ លោកបានធ្វើការកត់សម្គាល់ឃើញថា មានក្រុមហ៊ុនចិនធំៗជាច្រើន បានមកបណ្តាក់ទុនវិនិយោគនៅកម្ពុជា នៅក្នុងការអភិវឌ្ឍតំបន់សេដ្ឋកិច្ចពិសេស និងការវិនិយោគក្នុងកន្សោមឧស្សាហកម្មថ្មីៗ ដូចជាការផលិតសំបកកង់រថយន្ត ការផ្គុំដំទ្បើងបរិក្ខារអេទ្បិចត្រូនិក  ការកែច្នៃជ័រកៅស៊ូ…។ល។

មួយវិញទៀត លោកជា វុទ្ឋីបានជម្រាបជូនអំពីការគាំទ្រ និងការលើកទឹកចិត្តនានារបស់រាជរដ្ឋាភិបាល លើគម្រោងវិនិយោគក្នុងវិស័យស្វាយចន្ទីនៅកម្ពុជា ជាពិសេសគំនិតផ្ដួចផ្ដើមដ៏ខ្ពង់ខ្ពស់ របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងការបង្កើតសួនឧស្សាហកម្មស្វាយចន្ទី ដែលនឹងជួយបង្កើនភាពអំណោយផលនៃបរិយាកាសធុរកិច្ច ក្នុងវិស័យអាទិភាពនេះនៅកម្ពុជា។

លោកអគ្គលេខាធិការក៏បានបង្ហាញជូន ពីខ្សែច្រវាក់តម្លៃនៃឧស្សាហកម្មស្វាយចន្ទីដែលរាប់ចាប់តាំងពីផ្នែកខាងលើ (upstream) ជាពិសេស ពាក់ព័ន្ធនឹងការប្រមូលទិញ ទីលានសម្ងួត និងឃ្លាំងស្តុកទុកគ្រាប់ស្វាយចន្ទី។

ក្នុងន័យនេះ លោកអគ្គលេខាធិការបានស្នើឱ្យគណៈប្រតិភូមេត្តាពិនិត្យលទ្ធភាពចូលរួមវិនិយោគ ក្នុងផ្នែកណាមួយនៃខ្សែច្រវាក់តម្លៃនៃឧស្សាហកម្មស្វាយចន្ទីនៅកម្ពុជា ឬក៏ពិចារណាបណ្តាក់ទុនវិនិយោគក្នុងវិស័យកផ្សេងទៀត ដូចជាការកែច្នៃកសិផល ពិសេស ស្រូវ និងការកែច្នៃជ័រកៅស៊ូសម្រាប់ផ្គត់ផ្គង់ដល់ឧស្សាហកម្មក្នុងស្រុក។

ជាការឆ្លើយតប លោក Liu Yong បានបង្ហាញចំណាប់អារម្មណ៍ក្នុងការសិក្សា និងស្វែងរកអ្នកផ្គត់ផ្គង់ស្វាយចន្ទី ដែលមានស្រាប់ដើម្បីធ្វើការនាំចេញ។

លោកបានមានប្រសាសន៍ថា នាពេលកន្លងមក លោកបានធ្វើការស្វែងរកអ្នកផ្គត់ផ្គង់ស្វាយចន្ទី ប៉ុន្តែលោកមិនស្គាល់ពីប្រភព និងបណ្តាញច្បាស់លាស់ ហើយឆ្លៀតក្នុងឱកាសនេះ និងតាមរយៈជំនួបលើកនេះ លោកសង្ឃឹមថាឯកឧត្តមអគ្គលេខាធិការ នឹងចង្អុលបង្ហាញពីប្រភពច្បាស់លាស់ ដើម្បីបង្កើននូវទំនុកចិត្តរបស់លោកបន្ថែមទៀត។

បន្ថែមពីនេះ គណៈប្រតិភូដទៃទៀត ក៏បានធ្វើការណែនាំពីសាវ​តាររបស់ក្រុមហ៊ុននីមួយៗ និងបានបង្ហាញចំណាប់អារម្មណ៍ចំពោះការមកបណ្តាក់ទុនវិនិយោគនៅកម្ពុជាជាខ្លាំង។

ដោយៈ និស្ស័យ

    ព្រះសីហនុៈ អនុគណៈកម្មាធិការ​វិនិយោគ ខេត្តព្រះសីហនុ ដឹក​នាំដោយលោកឡុង ឌីម៉ង់ អភិបាលរងខេត្តព្រះសីហនុ និងមន្រ្តីជំនា​ញបានចុះពិនិត្យទីតាំង ស្នើសុំបង្កើតរោងចក្រផលិតគ្រឿងសង្ហារិមនៅក្រុងកំពង់សោម។

ទីតាំងនេះ ស្ថិតនៅសង្កាត់អូរឧកញ៉ាហេង ក្រុងកំពង់សោម ខេត្តព្រះសីហនុ។

ក្នុងឱកាសនោះ លោកអភិបាលរង បានធ្វើការណែនាំដល់អ្នកវិនិយោគឱ្យសហការជាមួយអាជ្ញាធរពាក់ព័ន្ធ ដើម្បីបំពេញលក្ខខណ្ឌនានាដែលច្បាប់បានកំណត់ និងបានពិនិត្យលទ្ធភាព ជួយសម្របសម្រួលនីតិវិធីមួយចំនួន ដែលស្ថិតនៅក្នុងដែនសមត្ថកិច្ច របស់អនុគណៈកម្មាធិការវិនិយោគខេត្ត ដើម្បីកាត់បន្ថយរយៈពេលរង់ចាំច្បាប់ អនុញ្ញាតរបស់ក្រុមហ៊ុន។

ជាមួយគ្នានេះ លោកអភិបាលរងក៏បានស្នើដល់ វិនិយោគិនត្រូវអនុវត្តន៍ តាមការណែនាំរបស់មន្ទីរអង្គភាពជំនាញ និងគោរពច្បាប់ គត្តិយុត្តនានារបស់កម្ពុជា និងត្រូវធ្វើយ៉ាងណាផ្តល់អាទិភាពការងារដល់ប្រជាពលរដ្ឋមូលដ្ឋាន។

តាមរបាយការណ៍របស់ម្ចាស់សំណើ បានឱ្យដឹងថា​រោងចក្រផលិតគ្រឿងសង្ហាររឹម នឹងមានតម្រូវការកម្លាំងពលកម្មប្រមាណ៨០ នាក់ និងមានទិសដៅផលិត និងផ្គត់ផ្គង់តម្រូវការក្រៅប្រទេសផងដែរ។

ឆ្លៀតក្នុងឱកាសនេះ លោកអភិបាលរងបានចុះពិនិត្យដំណើររោងចក្រផលិតអឹកថ្នាំគូសគំនូរ និងរោងចក្រផលិតស៊ុមរូបថត ដែលទទួលបានការផ្តល់ការលើកទឹកចិត្ត ពីអនុគណៈកម្មាធិការវិនិយោគខេត្ត ក្នុងយន្តការតាមដានថែទាំសម្របសម្រួល ជូនអ្នកវិនិយោគ ដើម្បីស្តាប់ និងប្រមូលធាតុចូលពីវិនិយោគិនផ្ទាល់ អំពីបញ្ហាប្រឈម និងសំណូមពរនានាផងដែរ៕

ដោយ: គង់ លាងហួរ
អន្តរជាតិ: កាសែត Bloomberg បានចុះផ្សាយថា តម្រូវការជួលការិយាល័យនៅសង្កាត់ Manhattan ដ៏ល្បីល្បាញនៅទីក្រុងញូវយ៉ករបស់សហរដ្ឋអាមេរិកមានស្ថានភាពយ៉ាងល្អប្រសើរបំផុតនៅចន្លោះពីខែមករារហូតដល់ខែកុម្ភៈ ឆ្នាំ២០២៥។

យោងតាមក្រុមហ៊ុនប្រឹក្សាអចលនទ្រព្យ CBRE បានឱ្យដឹងថា នៅក្នុងរយៈពេល២ខែដំបូងដើមឆ្នាំនេះ ការជួលការិយាល័យសរុបនៅសង្កាត់ Manhattan មានទំហំផ្ទៃក្រឡាចំនួន៥,១៣លានហ្វីតការ៉េ (ប្រហែល៤៧៦.៦០០ម៉ែត្រការ៉េ)។ នេះជាចំនួនច្រើនបំផុតមិនធ្លាប់មានចាប់តាំងពីឆ្នាំ២០១៤មក។

ការកើនឡើងនៃការជួលនេះបានជួយកាត់បន្ថយអត្រាការិយាល័យទំនេរនៅក្នុងទីក្រុងញូវយ៉កមកនៅត្រឹមចំនួន១៨,៤ភាគរយក្នុងខែកុម្ភៈ ឆ្នាំ២០២៥។ ចំនួននេះមានការធ្លាក់ចុះ០,១ភាគរយបើប្រៀបធៀបនឹងខែមករា។

ទិន្នន័យវិជ្ជមានទាំងនេះបាននិងកំពុងផ្តល់សន្ទុះថ្មីមួយក្នុងការជំរុញឱ្យទីផ្សារអចលនទ្រព្យការិយាល័យនៅទីក្រុងញូវយ៉កស្ទុះងើបឡើងវិញ បន្ទាប់ពីបានទទួលរងផលប៉ះពាល់ធ្ងន់ធ្ងរ ដោយសារជំងឺរាតត្បាត។

សុទិដ្ឋិនិយមបានកើតមានឡើង ខណៈបណ្តាក្រុមហ៊ុនធំៗនៅទីក្រុងញូវយ៉ក ដូចជា ធនាគារ JPMorgan Chase និងក្រុមហ៊ុន Major League Baseball បានជំរុញឱ្យបុគ្គលិករបស់ខ្លួនត្រឡប់មកបំពេញការងារនៅការិយាល័យវិញ ចំនួន៥ថ្ងៃក្នុងមួយសប្តាហ៍។បណ្តាក្រុមហ៊ុនទាំង២នេះក៏កំពុងស្វែងរកជួលបន្ទប់ការិយាល័យបន្ថែមផងដែរ។

យោងតាមការស្ទង់មតិរបស់ស្ថាប័ន Bloomberg Intelligence បានបង្ហាញឱ្យដឹងថា ចំនួនប្រមាណ៤១ភាគរយនៃនិយោជកនៅក្នុងទីក្រុងញូវយ៉កកំពុងរៀបចំផែនការក្នុងការពង្រីកការិយាល័យរបស់ពួកគេ៕ប្រភព: Bloomberg៕