ដោយ: គង់ លាងហួរ
អន្តរជាតិ: តម្លៃហាងឆេងមាសបានធ្លាក់ថ្លៃចុះក្នុងការជួញដូរនៅព្រឹកថ្ងៃពុធនេះ ក្រោយពីបានស្ទុះងើបឡើងវិញដល់តម្លៃជាង២.៩១៧ដុល្លារក្នុងមួយអោនគិតត្រឹមពេលបិទការជួញដូរកាលពីថ្ងៃអង្គារម្សិលមិញ ដោយសារការធ្លាក់ថ្លៃចុះនៃប្រាក់ដុល្លារអាមេរិក។

តួយ៉ាង តម្លៃមាស Spot Gold បានធ្លាក់ចុះ០,១៥ភាគរយដល់២.៩១៣ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានធ្លាក់ចុះ០,០២ភាគរយដល់២៩១៩,៩០ដុល្លារក្នុងមួយអោនគិតត្រឹមម៉ោង១០:៤៨នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៩៥ភាគរយ ដែលធនាគារកណ្តាលអាមេរិក (Fed) នឹងបន្តរក្សាទុកអត្រាការប្រាក់របស់ខ្លួនឱ្យនៅថេរដដែលក្នុងកិច្ចប្រជុំគោលនយោបាយនៅថ្ងៃទី១៩ ខែមីនានេះ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានបន្តធ្លាក់ថ្លៃចុះដល់១០៥,៦៩ពិន្ទុនៅព្រឹកថ្ងៃពុធនេះ បន្ទាប់ពីបានបិទការជួញដូរត្រឹម១០៥,៧៤ពិន្ទុកាលពីថ្ងៃអង្គារម្សិលមិញ។

ចំណែក តម្លៃលោហៈធាតុប្រាក់ Spot silver បានងើបឡើង០,៤៩ភាគរយដល់៣២,៥៤ដុល្លារក្នុងមួយអោន ខណៈតម្លៃផ្លាទីនបានងើបឡើង០,០៥ភាគរយដល់៩៧២,៤០ដុល្លារក្នុងមួយអោន ហើយតម្លៃ palladium បានងើបឡើង០,៣៧ភាគរយដល់៩៥៩,៥០ដុល្លារក្នុងមួយអោនគិតត្រឹមម៉ោង១០:៥២នាទីព្រឹក៕

(ភ្នំពេញ)៖ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅព្រឹកថ្ងៃទី៥ ខែមីនា ឆ្នាំ២០២៥នេះ បានអញ្ជើញសំណេះសំណាលសួរសុខទុក្ខ និងចែកអំណោយមនុស្សធម៌ សម្រាលការលំបាករបស់ប្រជាជនងាយរងគ្រោះបំផុតចំនួន ២,២៥០គ្រួសារ នៅក្នុងស្រុកបន្ទាយអំពិល ស្រុកចុងកាល់ និងក្រុងសំរោង ខេត្ដឧត្ដរមានជ័យ។

ក្នុងពិធីសំណេះសំណាលសួរសុខទុក្ខ និងចែកអំណោយជូនប្រជាពលរដ្ឋខាងលើនេះ អ្នកម្ដាយមនុស្សធម៌ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន បានបង្ហាញនូវអារម្មណ៍នឹករលឹក ប្រកបដោយក្ដីអាណិតស្រលាញ់ ជាពន់ពេក ចំពោះលោកតា លោកយាយ អុំ ពូ មីង កូនក្មួយ ដែលធ្វើឱ្យប្រជាពលរដ្ឋរំភើបចិត្ដ ព្រោះតែទឹកចិត្ដព្រហ្មវិហារធម៌ របស់អ្នកម្ដាយមនុស្សធម៌នៅកម្ពុជា។

ក្នុងពិធីជួបសំណេះសំណាល សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ក៏បាននាំយកនូវព្រះរាជសវនីយ៍របស់ ព្រះមហាក្សត្រី នរោត្ដម មុនិនាថ សីហនុ ព្រះវររាជមាតាជាតិខ្មែរ ព្រះប្រធានកិត្ដិយសកាកបាទក្រហមកម្ពុជា ដែលបានផ្ដាំផ្ញើសួរសុខទុក្ខ ក្តីនឹករលឹកដ៏ជ្រាលជ្រៅចំពោះប្រជានុរាស្ត្រ ជាកូន ចៅ ចៅទួត របស់ព្រះអង្គ។

ជាមួយគ្នានេះ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន បានប្រសាសន៍ប្រកបដោយសេចក្ដីសណ្ដោះប្រណីពោរពេញដោយក្ដីស្រលាញ់ និងភាពកក់ក្ដៅជាមួយប្រជាពលរដ្ឋ។

ការសំណេះសំណាលប្រកបដោយអត្ថន័យ ចេញពីបេះដូងរបស់អ្នកម្ដាយមនុស្សធម៌ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន បានធ្វើឱ្យប្រជាពលរដ្ឋរំភើបយ៉ាងខ្លាំង ព្រោះតែការបង្ហាញវត្តមានរបស់មាតាមនុស្សធម៌ ជាញឹកញាប់ជាមួយប្រជាពលរស់នៅតាមបន្ទាត់ព្រំដែន ដែលធ្វើឲ្យប្រជាពលរដ្ឋទទួលបានក្ដីស្រលាញ់ អាណិត មេតា្ដ ជួយយកអាសារ និងយកចិត្ដទុកដាក់ខ្ពស់ពីសំណាក់ថ្នាក់ដឹកនាំរហូតមក ពិសេសវត្ដមានរបស់សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា នៅថ្ងៃនេះ។

ក្នុងឱកាសនោះប្រជាពលរដ្ឋដែលទទួលបានការជួយសម្រាលការលំបាកពីអ្នកម្ដាយមនុស្សធម៌មនុស្ស បានលើកដៃប្រណម បួងសួងដល់វត្ថុស័ក្កសិទ្ធក្នុងលោក សូមជួយតាមថែរក្សាអ្នកម្ដាយមនុស្សធម៌ជាទីគោរពស្រលាញ់ដ៏ខ្ពង់ខ្ពស់ និងជាអ្នកមានគុណដ៏មហាសាល មានសុខភាពល្អ បរិបូរណ៌ បន្ដដឹកនាំការងារមនុស្សធម៌ ជួយសង្គ្រោះ និងសម្រាលការលំបាកដល់ប្រជាជនដែលងាយរងគ្រោះបំផុតគ្រប់រូបភាពនៅកម្ពុជា ដោយមិនប្រកាន់ពណ៌សម្បុល ពូជសាសន៍ និងនិន្នាការនយោបាយអ្វីទាំងអស់ ។

គួររម្លឹកថា កាកបាទក្រហមកម្ពុជា ដែលដឹកនាំដ៏ឈ្លាសវៃ និងរឹងមាំ របស់សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន បានធ្វើឱ្យមជ្ឈដ្ឋានជាតិ និងអន្ដរជាតិ មានការស្ងប់ស្ងែងពី ការលះបង់ និងគិតគូរគ្រប់ជ្រកល្ហក ពិសេសរាល់ជនងាយរងគ្រោះបំផុត ដូចជា លោកតា លោកយាយ ចាស់ជរាឥតទីពឹង ក្មេងកំព្រារ ស្ដ្រីមេម៉ាយកូនច្រើន ដែលងាយរងបំផុតនេះ អ្នកម្ដាយមនុស្សធម៌ តែងតែចុះជួយសម្រាលការលំបាកភ្លាមដោយមិនបង្អង់យូរ ទោះនៅតំបន់ទីជនបទដាច់ស្រាយាលដូចម្ដេចក្ដី ជាក់ស្ដែងដូចថ្ងៃនេះ គឺអ្នកម្ដាយមនុស្សធម៌ បានធ្វើដំណើរសែនឆ្ងាយពីរាជធានីភ្នំពេញ មកជួបសំណេះសំណាល ដើម្បីដឹងពីសុខទុក្ខដោយផ្ទាល់របស់កូនចៅប្រជាពលរដ្ឋរស់នៅតាមបន្ទាត់ព្រំដែន ក្នុងខេត្ដឧត្ដរមានជ័យ។

សម្រាប់អំណោយមនុស្សធម៌ ដែលទទួលបានពីការជួយរបស់សប្បុរសជនពីគ្រប់មជ្ឈដ្ឋាន ក្នុងឱកាសប្រារព្ធពិធិខួបកាកបាទក្រហម និងអឌ្ឍចន្ទក្រហម ៨ឧសភា បានយកមកចែកជូនប្រជាពលរដ្ឋងាយរងគ្រោះនៅថ្ងៃនេះរួមមាន៖ អង្ករ៣០គីឡូក្រាម, មី១កេស, ត្រីខ ១យួរ (១យូរស្មើនឹង ១០កំប៉ុង), ទឹកស៊ីអ៊ីវ ១យូរ(១យួរស្មើនឹង៦ដប), ប្រេងឆា១ដបចំណុះ ១.៩លីត្រ, សាប៊ូកក់សក់ ១ដបធំ, ស្ករស ១គីឡូក្រាម, ឃីត១ (មានសារុង ក្រមា មុង ភួយ), នំប័ងបាក់យ៉ុង ១ដើម, ទឹកបរិសុទ្ធ ១ដប និងថវិកា ២ម៉ឺនរៀល៕

ដោយៈ និស្ស័យ

    ភ្នំពេញៈ រដ្ឋលេខាធិការ ក្រសួងសាធារណការ និងដឹកជញ្ជូន លោកហេង ណនបានទទួលជួបសម្តែងការគួរសម និងពិភាក្សាការងារជាមួយគណៈប្រតិភូធុរកិច្ចជប៉ុន ដឹកនាំដោយ លោក WAKABAYASHI KOHEI ប្រធានអង្គការពាណិជ្ជកម្មក្រៅស្រុកជប៉ុន (JETRO) ប្រចាំនៅរាជធានីភ្នំពេញ។

ជំនួបនាឱកាសនេះ គឺដើម្បីស្វែងយល់អំពីបរិបទ ឡូជីស្ទីកនៅកម្ពុជា និងស្វែងយល់ពីឱកាសវិនិយោគ លើវិស័យដឹកជញ្ជូន និងឡូជីស្ទីក ព្រមទាំងធ្វើការណែនាំអំពីសមាសភាពធុរកិច្ចជប៉ុន ប្រមាណ៥០រូបមកពីក្រុមហ៊ុនចំនួន៤០។

ថ្លែងនាឱកាសនោះ លោករដ្ឋលេខាធិការ បានជម្រាបជូនគណៈប្រតិភូធុរកិច្ចជប៉ុន អំពីការអនុវត្តគោលនយោបាយ និងសមិទ្ធផលសំខាន់ៗក្នុងវិស័យដឹកជញ្ជូន និងឡូជីស្ទីកនៅកម្ពុជាសម្រាប់រាជរដ្ឋាភិបាល នីតិកាលទី៧ បាននិងកំពុងអនុវត្តយុទ្ធសាស្ត្រ បញ្ចកោណដំណាក់កាលទី១ ដើម្បីសម្រេចចក្ខុវិស័យ ប្រែក្លាយកម្ពុជាជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០៕

ដោយៈ គង់ សូរិយា

    កោះកុងៈ ឱខេត្តកោះកុង ស្ថិតក្នុងចិត្តខ្ញុំ បាននិងកំពុងក្លាយពីខេត្តដាច់ស្រយាល មកជាខេត្តដែលមានការអភិវឌ្ឍយ៉ាងឆាប់រហ័ស ក្រោមការដឹកនាំដោយរាជរដ្ឋាភិបាលកម្ពុជា។

    ជាមួយនឹងសក្តានុពលលើវិស័យជាច្រើន រួមមាន ទេសចរណ៍ កសិកម្ម ឧស្សាហកម្ម ធនធានធម្មជាតិ នេសាទ វារីវប្បកម្ម ខេត្តនេះបាននិងកំពុងលេចត្រដែតឡើង ជាខេត្តមានសក្តានុពល និងទាក់ទាញអ្នកធុរកិច្ចក្នុងស្រុក និងអ្នកធុរកិច្ចមកពីបណ្តាប្រទេសនានា។

ការតភ្ជាប់ហេដ្ឋារចនាសម្ព័ន្ឋផ្លូវអាកាស

    ជាលើកទី១ ដែលខេត្តមួយនេះ មានព្រលានយន្តហោះអន្តរជាតិ ដែលបោទុនវិនិយោគដោយក្រុមហ៊ុនUDG Development ដោយបានចំណាយទុនប្រមាណ២០០លានដុល្លារ សាងសង់ព្រលានយន្តហោះតារាសាគរ ដែលអាចចុះចតយន្តហោះខ្នាតមធ្យមបាន។

    កាលពីពេលថ្មីៗនេះ ព្រលានយន្តហោះនេះ បានទទួលការចុះចតយន្តហោះបែបCharter Flightក្នុងស្រុកជាលើក ដំបូងពីសំណាក់ក្រុមហ៊ុនអាកាសចរណ៍ក្នុងស្រុក Cambodia Angkor Airជាមួយការស្វាគមន៍ដ៏គួរឲ្យរំភើបមួយពីសំណាក់អភិបាលខេត្ត លោកជំទាវមិថុនា ភូថង លោកបណ្ឌិតម៉ៅ ហាវណ្ណាល់ រដ្ឋមន្រ្តីប្រតិភូអមនាយករដ្ឋមន្រ្តី ទទួលបន្ទុករដ្ឋលេខាធិការដ្ឋាន អាកាសចរណ៍ស៊ីវិល និងមន្រ្តីពាក់ព័ន្ឋជាច្រើន។

ការបញ្ចប់ការកែលម្អរ និងលើកកំពស់ផ្លូវជាតិលេខ៤៨

    ផ្លូវជាតិលេខ៤៨ បាននិងកំពុងសាងសង់យ៉ាងសកម្ម ដើម្បីសម្រួលការធ្វើចរាចរណ៍ របស់អ្នកធ្វើដំណើរជាតិ និងអន្តរជាតិ ហើយ​ប្រសិនជាគ្មានការប្រែប្រួលទេនោះ ផ្លូវជាតិដ៏សំខាន់នេះ នឹងបញ្ចប់ការស្ថាបនានៅឆ្នាំ២០២៥នេះ។

    ការចាប់ផ្តើមនូវផ្លូវល្បឿនលឿនភ្នំពេញ ព្រះសីហនុ ជាផ្លូវល្បឿនលឿនទី១នៅកម្ពុជា បានជួយសម្រួលលំហូរចរាចរណ៍ និងរយៈពេលនៃការធ្វើដំណើរពីរាជធានីភ្នំពេញ ទៅកាន់ខេត្តកោះកុងកាន់តែ ចំណា​យរយៈពេលខ្លីជាងមុន។

ផ្លូវតភ្ជាបតំបន់ភូមិភាគពាយ័ព្យមកកាន់តំបន់ឆ្នេរជាលើកដំបូង

    ផ្លូវជាតិលេខ១០ ជាផ្លូវប្រវត្តិសាស្រ្ត ដែលអ្នភូមិភាគពាយ័ព្យអាចធ្វើដំណើរទៅលេងទឹកសមុទ្រ មិនចាំបាច់ឆ្លងកាត់រាជធានីភ្នំពេញ។ ផ្លូវដែលស្ថាបនា និងសាងសង់ឡើងកាន់ជ្រលងភ្នំ ជ្រោះជ្រងជ្រលងដងអូរនេះ មិនត្រឹមតែលើកកំពស់ការធ្វើសមាហរកម្ម ផ្ទៃក្នុងប្រទេសប៉ុណ្ណោះទេ ប៉ុន្តែវាក៏ធ្វើសមាហរណកម្មសេដ្ឋកិច្ចផ្ទៃក្នុងកម្ពុជា ជាមួយប្រទេសក្នុងតំបន់ តាមរយៈការដឹកជញ្ជូនកសិផល ពីខេត្តភូមិភាគពាយ័ព្យដ៏សម្បូរភោគទ្រព្យផ្នែកកសិកម្ម មកកាន់កំពង់ផែនៅតំបន់តារាសាគរ ដើម្បីដឹកជញ្ជូនទៅកាន់ប្រទេសទី៣ផងដែរ។

    លើសពីនេះ ផ្លូវជាតិលេខ១០ ក៏នឹងជួយទាក់ទាញភ្ញៀវទេសច​រណ៍ជាតិ អន្តរជាតិមកមើលទេសភាព ងូតទឹកជ្រោះ និងគយគន់ធម្មជាតិដ៏ស្រស់ត្រកាលនៅតាមដងផ្លូវនេះផងដែរ។

ការសាងសង់ផ្លូវជិះកង់តភ្ជាប់តំបន់K4

    រាជរដ្ឋាភិបាល ក្រោមគំនិតផ្តួចផ្តើមរបស់លោកឧបនាយករដ្ឋមន្រ្តីសាយ សំអាល់រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់បាន និងកំពុងគូសវាសពីការសាងសង់ផ្លូវជិះកង់ តភ្ជាប់ខេត្តតំបន់ឆ្នេរទាំងបួនរបស់កម្ពុជា រួមមាន ខេត្តព្រះសីហនុ(កំពង់សោម) កំពត កែប និងខេត្តកោះកុង ដែលគំរោងនេះអាចនឹងលេចរូបរាងនៅក្នុងអាណត្តិទី៧របស់រាជរដ្ឋាភិបាល ក្រោមការដឹកនាំរបស់សម្តេចមហាបវរធិបតីហ៊ុន ម៉ាណែតនាយករដ្ឋមន្រ្តីនៃកម្ពុជា។

    តំបន់K4 ត្រូវបានប្រសិទ្ឋនាមដោយប្រតិបត្តិករ ក្នុងវិស័យទេ​ស​ចរណ៍ ដោយហៅខេត្តជាប់តំបន់ឆ្នេរជាតំបន់K4 ព្រោះខេត្តទាំងនោះផ្តើមដោយអក្សរK ដូចជា ខេត្តកោះកុង កែប កំពត និងខេត្តកំពង់សោម(បច្ចុប្បន្នខេត្តព្រះសីហនុ)។

ការរីកចម្រើនវិស័យទេសចរណ៍

    ជាមួយនឹងសម្បត្តិធនធានធម្មជាតិដ៏សម្បូរបែប និងមិនអាចកាត់ថ្លៃបាន ខេត្តនេះមានរមណីយដ្ឋានទេសចរណ៍ធម្មជាតិ ដូចជា ព្រែក ដងអូរ ទឹកធ្លាក់ ទឹកជ្រោះ ជ្រលងភ្នំ និងរមណីយដ្ឋានធម្មជាតិជាច្រើនកន្លែងទៀតដូចជា ត្រពាំងរូង ជីផាត តាតៃ អណ្តូងទឹក កោះស្តេច កោះកុងក្រៅ ឃុនឆាង ឃុនផែន និងតំបន់អារ៉ែងជាដើម។

    លើសពីធនធានធម្មជាតិ ដែលមានស្រាប់ ខេត្តកោះកុងក៏ទាក់ទាញបាននូវអ្នកវិនិយោគក្នុងស្រុក សាងសង់រមណីយដ្ឋានបែបកែច្នៃជាច្រើនផងដែរ ដែលតំបន់រមណីយដ្ឋានទាំងនោះ មាននៅក្នុងក្រុងខេមរៈភូមិន្ទ តំបន់តារាសាគរ តំបន់កោះស្តេច តំបន់ឆ្នេរនេសាទ ក្នុងស្រុកស្រែអំបិលជាដើម។

ការរីកចម្រើនវិស័យឧស្សាហកម្ម

    ដោយសារ មានព្រំប្រទល់ជាប់ជាមួយប្រទេសថៃ ងាយតភ្ជាប់ជាមួយកំពង់ផែ ខេត្តព្រះសីហនុ កំពង់ផែនៅតំបន់តារាសាគរ និងហេដ្ឋារចនាសម្ព័ន្ឋផ្លូវគោក ខេត្តកោះកុង បានទាក់ទាញអ្នកវិនិយោគធំៗ បោះទុនបង្កើត តំបន់សេដ្ឋកិច្ចពិសេសមួយចំនួនផងដែរ។

    តំបន់សេដ្ឋកិច្ចពិសេសទាំងនោះ ស្ថិតនៅតំបន់ព្រំប្រទល់ ព្រំដែនចាំយាម ខេត្តកោះកុង ជាប់ព្រំប្រទល់ជាមួយប្រទេសថៃ និងតំបន់សេដ្ឋកិច្ចពិសេស ដែលវិនិយោគដោយអ្នកឧកញ៉ាគិត ម៉េង ប្រធានក្រុមប្រឹក្សាភិបាលក្រុមហ៊ុនរ៉ូយ៉ាល់គ្រុបជាដើម៕

ដោយៈ គង់ សូរិយា

    ភ្នំពេញៈ លោកប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន អញ្ជើញដឹកនាំកិច្ចប្រជុំពិភាក្សា ដើម្បីកំណត់ទីតាំងសាងសង់ស្ថានីយច្រកទ្វារព្រំដែនអន្តរជាតិ៤កន្លែង របស់គម្រោងជំរុញការតភ្ជាប់ហេដ្ឋារចនាសម្ព័ន្ធច្រកទ្វារព្រំដែន (3CEP) ក្នុងក្របខ័ណ្ឌហិរញ្ញប្បទានធនាគារវិនិយោគហេដ្ឋារចនាសម្ព័ន្ធអាស៊ី(AIIB)។

គំរោងនេះ ក្នុងក្នុងផែនការជំរុញការតភ្ជាប់ហេដ្ឋារចនាសម្ព័ន្ធច្រកទ្វារព្រំដែន (3CEP) ក្នុងក្របខ័ណ្ឌហិរញ្ញប្បទានធនាគារវិនិយោគហេដ្ឋារចនាសម្ព័ន្ធអាស៊ី (AIIB) ដោយមានការអញ្ជើញចូលរួមពីមន្រ្តីពាក់ព័ន្ធមួយចំនួនផងដែរ។

កិច្ចប្រជុំនេះធ្វើឡើងក្នុងគោលបំណង ដើម្បីពិនិត្យរបាយការណ៍បឋម និងពិនិត្យពិភាក្សាកំណត់ទីតាំង និងជំរុញការងារបន្តអនុវត្តរបស់គម្រោងសាងសង់ អគារស្ថានីយច្រកទ្វារព្រំដែន ឱ្យប្រព្រឹត្តទៅបានដោយរលូន និងទទួលបានជោគជ័យ ដែលទាមទារឱ្យមានការបង្កើតក្រុមការងារបច្ចេកទេសចំពោះកិច្ច ដើម្បីចុះសិក្សាស្រាវជ្រាវបន្ថែមអំពីស្ថានភាពទីតាំង ទំហំដីត្រូវការ និងការកាន់កាប់ ស្ថានភាពភូមិសាស្រ្ត ការពិនិត្យមើលលទ្ធភាព និងដីត្រៀមសម្រាប់ការសាងសង់ វិធានការត្រៀមបម្រុងទុកដីសម្រាប់ការចរចារ និងដោះស្រាយផលប៉ះពាល់ ។ល។

ទីតាំងច្រកកទ្វារអន្តរជាតិចំនួន៤កន្លែង រួមមាន ត្រពាំងស្រែ ភ្នំដិន ត្រពាំងផ្លុង និងអូរយ៉ាដាវ នៅខេត្តក្រចេះ តាកែវ ត្បូងឃ្មុំ និងរតនគិរី៕

ដោយៈ គង់ សូរិយា

    ភ្នំពេញៈ មន្រ្តីជាន់ខ្ពស់នៃរាជរដ្ឋាភិបាលកម្ពុជា បានជំនួបពិភា​ក្សាការងារ និងស្តាប់បទបង្ហាញអំពីការសិក្សា សមិទ្ធិលទ្ធភាពគម្រោង “សួនកែច្នៃកាកសំណល់នៅរាជធានីភ្នំពេញ-ការជ្រើសរើសបច្ចេកវិទ្យា សម្រាប់ប្រព្រឹត្តកម្មសំណល់រឹងក្នុងទីក្រុង និងការផលិតថាមពល”។

ព័ត៌មាននេះ ត្រូវបានលើកឡើងដោយលោកស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា(ក.អ.ក.) ក្នុងពេលអនុញ្ញាតជូនគណៈប្រតិភូក្រុមហ៊ុន Vinci Construction និងក្រុមហ៊ុន Sage Engineering ដឹកនាំដោយលោក Thomas CHAUVEAU នាយកគ្រប់គ្រងផ្នែកប្រតិបត្តិការថាមពល និងអាជីវកម្មថ្មីៗ នៃក្រុមហ៊ុន Vinci Construction ចូលជួបសម្តែងការគួរសម និងពិភាក្សាការងារ។

ជំនួបនារសៀលនេះ ត្រូវបានរៀបចំឡើងក្នុងគោលបំណង ដើម្បីធ្វើបទបង្ហាញជូន លោកឧបនាយករដ្ឋមន្ត្រី អំពីរបាយការណ៍នៃការសិក្សាសមិទ្ធិលទ្ធភាពគម្រោង “សួនកែច្នៃកាកសំណល់នៅរាជធានីភ្នំពេ​ញ- ការជ្រើសរើសបច្ចេកវិទ្យា សម្រាប់ប្រព្រឹត្តកម្មសំណល់រឹងក្នុងទីក្រុង និងការផលិតថាមពល” ដែលត្រូវបានសហការសិក្សាដោយអ្នកជំនាញពីក្រុមហ៊ុន Vinci Construction និងក្រុមហ៊ុន Sage Engineering។

តាមរយៈបទបង្ហាញនេះដែរ អ្នកជំនាញបានជម្រាបអំពីព័ត៌មាន ជាអាទិ៍៖ ទិន្នន័យពាក់ព័ន្ធដែលប្រមូលបាន បច្ចុប្បន្នភាពនៃការសិក្សាគម្រោង និងបច្ចេកវិទ្យាពាក់ព័ន្ធនានា សម្រាប់ការធ្វើប្រព្រឹត្តកម្មសំណល់រឹង និងបំប្លែងជាថាមពលសម្រាប់ប្រើប្រាស់បន្ត។

ក្រុមហ៊ុនទាំងពីរ បានសហការសិក្សាគម្រោងនេះ ឡើងជាមួយវត្ថុបំណង រួមមាន៖ (១)បង្កើតថាមពលស្អាត និងតម្លៃសមរម្យ ដោយបំប្លែងកាកសំណល់ទៅជាអគ្គិសនី (២) បង្កើនអាយុកាលនៃទីលានចាក់សំរាម (៣) លើកកម្ពស់សុខភាព និងសុខុមាលភាពរបស់ប្រជាពលរដ្ឋ (៤) លើកកម្ពស់វិស័យឧស្សាហកម្ម នវានុវត្តន៍ និងហេដ្ឋារចនាសម្ព័ន្ធពាក់ព័ន្ធ តាមរយៈការសាងសង់ រោងចក្រកែច្នៃកាកសំណ​ល់រឹង ជាមួយនឹងបច្ចេកវិទ្យាចុងក្រោយ និង(៥) ពង្រឹងការគ្រប់គ្រងថ្លៃដើមក្នុងការកែច្នៃកាកសំណល់ក្នុងទីក្រុង៕

ដោយៈ គង់ ម៉ាណា

    ភ្នំពេញៈ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា រាជរដ្ឋាភិបាលកម្ពុជា បាននិងកំពុងគិតគូរបន្តជួយដល់វិស័យអាកាសចរណ៍បន្ថែមទៀត តាមរយៈការអនុគ្រោះផ្សេងៗ រួមមានអនុគ្រោះពន្ធជាដើម ដើម្បីឱ្យក្រុមអាកាសចរណ៍មានលទ្ធភាព ហោះហើរដឹកជញ្ជូនដំណើរមកកាន់កម្ពុជាកាន់តែច្រើន។

ការបញ្ជាក់ពីការគិតគូរដល់វិស័យអាកាសចរណ៍នេះ ធ្វើឡើងក្នុងឱកាសសម្តេចអញ្ជើញជាអធិបតីភាព ក្នុងពិធីបើកសន្និសីទចក្ខុវិស័យប្រទេសកម្ពុជា ឆ្នាំ២០២៥ ស្ដីពី “យុទ្ធសាស្ដ្រកំណើនថ្មីរបស់កម្ពុជា៖ អាទិភាព សម្រាប់ការអភិវឌ្ឍប្រកបដោយគុណភាព និងនិរន្ដរជាតិ” របស់វិទ្យាស្ថានបណ្ដុះបណ្ដាល និងស្រាវជ្រាវដើម្បីអភិវឌ្ឍន៍កម្ពុជា (CDRI)។

សម្តេចបានបញ្ជាក់ថា “កាលពីសប្តាហ៍មុន ខ្ញុំទើបជាមួយវិស័យទេ​សចរណ៍ ហើយអំបាញ់មិញខ្ញុំបានជជែកជាមួយ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន អំពីវិស័យអាកាសចរណ៍ [ក្រុមហ៊ុនអាកាចរណ៍ របស់យើង”។ សម្តេចបន្តថា “យើងត្រូវថែមអ្វីទៀតជួយគាត់ ក្រុមហ៊ុនអាកាសចរណ៍ ទម្លាក់ពន្ធកាត់ទុក ទម្លាក់អ្វីទៀត ដើម្បីជួយគាត់ក្នុងរយៈពេលមួយ ដើម្បីឱ្យគាត់ហោះបានប្រមូលទេសចរមក នេះយើងត្រូវជួបជាប្រចាំ ដើម្បីបម្រូលទិន្នន័យ មានបញ្ហាយើងដោះស្រាយ”។

វិបត្តិនៃជំងឺកូវីដ១៩ បានធ្វើឱ្យវិស័យអាកាសចរណ៍រងគ្រោះយ៉ាងខ្លាំង ដោយសារគ្មានការហោះហើរ។ ដើម្បីដោះស្រាយការលំបាកនេះ រាជរដ្ឋាភិបាលកម្ពុជា បានដាក់ចេញជាបន្តបន្ទាប់ នូវការអនុគ្រោះផ្សេងៗ រួមទាំងផ្នែកពន្ធផងដែរ។

កាលពីខែកញ្ញា ឆ្នាំ២០២៤ រាជរដ្ឋាភិបាលកម្ពុជា បានប្រកាសបន្តអនុគ្រោះពន្ធកាត់ទុក និងអាករពិសេស ចំពោះក្រុមហ៊ុនអាកាសចរណ៍ រហូតដល់ឆ្នាំ២០២៧។

ក្រសួងសេដ្ឋកិច្ចតាមរយៈលិខិតរបស់ខ្លួនបញ្ជាក់ថា ក្នុងគោលបំណងជួយសម្រាលបន្ទុក របស់ក្រុមហ៊ុនអាកាសចរណ៍ ចំពោះការជួលយន្តហោះ ពីក្រុមហ៊ុនក្រៅប្រទេស ក៏ដូចជាដើម្បីជួយសម្រាលបន្ទុក របស់ប្រជាពលរដ្ឋ ក្នុងការធ្វើដំណើរតាមផ្លូវអាកាស ក្រសួងសេដ្ឋកិច្ច និងហិរញ្ញវត្ថុ សូមធ្វើការណែនាំ អំពីការអនុវត្តពន្ធកាត់ទុក និងអាករពិសេស ដូចខាងក្រោម៖ ១៖ បន្ថយអត្រាពន្ធកាត់ទុកពី១៤ភាគរយមកត្រឹម១០ភាគរយ ចំពោះការជួលយន្តហោះ ពីក្រៅប្រទេសមកប្រកបអាជីវកម្ម របស់ក្រុមហ៊ុនអាកាសចរណ៍ក្នុងស្រុក។ ២៖ បន្ថយអត្រាអាករពិសេសពី១០ភាគរយ មកត្រឹម៥ភាគរយចំពោះសេវាដឹកជញ្ជូនអ្នកដំណើរ តាមផ្លូវអាកាស ដោយពុំគិតថាការដឹកជញ្ជូនអ្នកដំណើរធ្វើឡើង ដោយក្រុមហ៊ុនអាកាសចរណ៍ក្នុងស្រុក ឬក្រុមហ៊ុនអាកាសចរណ៍បរទេសឡើយ។

៣ ការអនុគ្រោះដូចមានចែងក្នុងចំណុចទី១ និងចំណុចទី២ ខាងលើនេះ មានរយៈពេល ៣ឆ្នាំ គិតចាប់ពីថ្ងៃទី១ ខែមិថុនា ឆ្នាំ២០២៤ ដល់ ថ្ងៃទី៣១ ខែឧសភា ឆ្នាំ២០២៧៕