ដោយ: គង់ លាងហួរ

អន្តរជាតិ: រដ្ឋាភិបាលវៀតណាមបានប៉ាន់ស្មានថា ការសាងសង់ផ្លូវដែកថ្មីមួយ តភ្ជាប់រវាងវៀតណាម ជាមួយខេត្តយូណាន របស់ប្រទេសចិន ត្រូវការទុនវិនិយោគចំនួន១៧៩ទ្រីលានដុង(ប្រហែល៧,២ពាន់លានដុល្លារ)។

ទីភ្នាក់ងារសារព័ត៌មានរដ្ឋវៀតណាម VNA បានរាយការ​ណ៍ថា ផ្លូវរថភ្លើងប្រវែង៤២៧គីឡូម៉ែត្រនេះ នឹងធ្វើដំណើរពីខេត្តLao Cai ជាប់ព្រំដែនខេត្តយូណានរបស់ចិន ឆ្លងកាត់រដ្ឋធានីហាណូយ និងទីក្រុងកំពង់ផែ Haiphong ទៅកាន់ទីក្រុង Ha Long។

វៀតណាមបាន និងកំពុងខិតខំធ្វើឱ្យប្រសើរឡើងនូវប្រព័​ន្ធផ្លូវដែក ដែលមានអាយុកាលចំណាស់របស់ខ្លួន រួមទាំងផែន​ការសាងសង់ផ្លូវរថភ្លើងល្បឿនលឿន ដែលរត់តាមបណ្តោយប្រទេសវៀតណាម និងខ្សែរថភ្លើង តភ្ជាប់ជាមួយប្រទេសចិន ដែលជាដៃគូពាណិជ្ជកម្មដ៏ធំបំផុតរបស់ខ្លួន។

ទីភ្នាក់ងារសារព័ត៌មាន VNA បានរបាយការណ៍ថា អាជ្ញាធរផ្លូវដែកវៀតណាម បានដាក់ស្នើផែនការសាងសង់ផ្លូវរថភ្លើង ពីទីក្រុង Lao Cai ទៅទីក្រុង Ha Long ទៅកាន់ក្រសួងដឹកជញ្ជូនដើម្បីត្រួតពិនិត្យ និងអនុម័ត។

ការសាងសង់ផ្លូវដែកនេះ ត្រូវបានគេរំពឹងថា នឹងចាប់ផ្តើមដំណើរការនៅក្នុងឆ្នាំ២០៣០ ហើយតម្រូវការដឹកជញ្ជូនតាមបណ្តោយផ្លូវដែកនេះ ត្រូវបានប៉ាន់ប្រមាណថា នឹងមានអ្នកដំណើរចំនួន៨,៣លាននាក់ និងទំនិញចំនួន១៧,៥លានតោនក្នុងមួយឆ្នាំនៅឆ្នាំ២០៥០។

កន្លងមក រដ្ឋាភិបាលវៀតណាម បានស្វែងរកជំនួយផ្នែកបច្ចេកវិទ្យាពីប្រទេសចិន ក្នុងការអភិវឌ្ឍន៍ផ្លូវដែកតភ្ជាប់រវាងប្រទេសទាំង២ និងធ្វើឱ្យប្រសើរឡើង នូវផ្លូវរថភ្លើងដែលមានអាយុកាលចំណាស់។

បណ្តាប្រទេសជិតខាងទាំង២ បានបង្ហាញចំណាប់អារម្ម​ណ៍ ក្នុងការជំរុញការតភ្ជាប់ផ្លូវដែក ហើយថ្នាក់ដឹកនាំកំពូលចិន និងវៀតណាម ក៏បានចុះហត្ថលេខា លើកិច្ចព្រមព្រៀងស្តីពីកិច្ចសហប្រតិបត្តិការផ្លូវដែក ក្នុងដំណើរទស្សនកិច្ចនាពេលថ្មីៗនេះ ទៅកាន់ប្រទេសរបស់គ្នាទៅវិញទៅមកផងដែរ៕ ប្រភព: Reuters៕

ដោយ: គង់ លាងហួរ
អន្តរជាតិ: តម្លៃហាងឆេងមាសបានធ្លាក់ថ្លៃចុះ ក្នុងការជួញដូរនៅព្រឹកថ្ងៃពុធនេះ ខណៈប្រាក់ដុល្លារអាមេរិកបានស្ទុះងើបឡើងថ្លៃ ដោយសារគោលនយោបាយពន្ធ និងការរឹតបន្តឹងលើជនអន្តោប្រវេសន៍របស់លោកដូណាល់ត្រាំត្រូវបានគេរំពឹងថា នឹងបង្កើនអតិផរណា ប្រសិនបើលោកជាប់ឆ្នោតជាប្រធានាធិបតីអាមេរិកម្តងទៀត។

តួយ៉ាង តម្លៃមាស Spot Gold បានធ្លាក់ចុះ០,១៣ភាគរយដល់២៧៤៤,៧៩ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានធ្លាក់ចុះ០,១៤ភាគរយដល់២.៧៥៦ដុល្លារក្នុងមួយអោន គិតត្រឹមម៉ោង១០:៤៧នាទីព្រឹក។

គិតត្រឹមពេលបិទការជួញដូរកាលពីថ្ងៃអង្គារម្សិលមិញ តម្លៃមាស Spot Gold បានបិទនៅត្រឹម២៧៤៨,៣៨ដុល្លារក្នុងមួយអោន ខណៈតម្លៃមាស U.S. gold futures បានបិទនៅត្រឹម២៧៥៩,៨០ដុល្លារក្នុងមួយអោន។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាស៨៩ភាគរយ ដែលធនាគារកណ្តាលអាមេរិក(Fed) អាចនឹងបញ្ចុះអត្រាការប្រាក់ចំនួន០,២៥ភាគរយបន្ថែមទៀតក្នុងកិច្ចប្រជុំកំណត់គោលនយោបាយនាខែវិច្ឆិកាខាងមុខ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិក ធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានងើបឡើងថ្លៃដល់១០៤,១៣ពិន្ទុគិតត្រឹមម៉ោង១០:៥០នាទីព្រឹកនេះ បន្ទាប់ពីបិទការជួញដូរត្រឹម១០៤,០៨ពិន្ទុកាលពីថ្ងៃអង្គារម្សិលមិញ។

តម្លៃលោហៈធាតុប្រាក់ Spot silver បានធ្លាក់ចុះ០,៦%ដល់៣៤,៨៣ដុល្លារ ក្នុងមួយអោន ខណៈតម្លៃផ្លាទីនបានងើបឡើង០,១៩%ដល់១០៤៣,៤០ដុល្លារក្នុងមួយអោន ហើយតម្លៃ palladium បានធ្លាក់ចុះ០,១៨%ដល់១០៧៩,៥០ដុល្លារក្នុងមួយអោន គិតត្រឹមម៉ោង១០:៥០នាទីព្រឹក៕

ដោយៈគង់ សូរិយា

       បាត់ដំបងៈ ផែនការស្តារឡើងវិញ និងសាងសង់ព្រលានយន្តហោះក្រុងបាត់ដំបង ស្ថិតនៅក្នុងសភាពមិនច្បាស់លាស់ ដែលរហូតមកទល់ពេលនេះ មិនទាន់មានក្រុមហ៊ុនណាមួយចុះសិក្សានៅឡើយទេ។

អ្នកនាំពាក្យនិងជាអនុរដ្ឋលេខាធិការ នៃរដ្ឋលេខាធិការដ្ឋាន​អាកាសចរណ៍ស៊ីវិល លោកស៊ីន ចាន់សិរីវុត្ថាបានមានប្រ​សាសន៍ឲ្យដឹងកាលពីពេលថ្មីៗនេះថា ស្ថានភាពនាពេលបច្ចុ​ប្បន្ន យើងមិនអាចនិយាយបាននៅឡើយ ពីផែនការសាងសង់ព្រលានយន្តហោះនេះ ព្រោះអ្វីៗអាចចំណាយពេលយូរ។

លោកបន្តថា “មិនមានព័ត៌មានច្បាស់លាស់ ឬវឌ្ឈនភាពណាមួយអំពីផែនការសាងសង់ ព្រលានយន្តហោះនេះនៅឡើយទេ”។ លោកបន្ថែមថា “រហូតមកទល់ពេលនេះ យើងមិនទាន់មានក្រុមហ៊ុនណាមួយ បានចាប់អារម្មណ៍វិនិយោគព្រលានយន្តហោះនេះនោញះទេ”។

យោងតាមផែនការមេរបស់រដ្ឋាភិបាលបានបង្ហាញថា រដ្ឋាភិបាលមានបំណងសស្តារ និងសាងសង់ព្រលានយន្តហោះនៅតាមបណ្តាខេត្តមួយចំនួន រួមមាន ខេត្តព្រះវិហារ បាត់ដំបង ស្ទឹងត្រែង មណ្ឌលគិរី ប៉ោយប៉ែតជាដើម។

        ប្រធានសមាគមសហគ្រិន សារព័ត៌មានសេដ្ឋកិច្ចកម្ពុជា(CEMEA) លោកយិន លាងគង់ បានមានប្រសាសន៍ថា ការសាងសង់ព្រលានយន្តហោះមួយ មិនដូចការសាងសង់ផ្ទះនោះទេ វាត្រូវការទំហំដើមទុន ឬទុនវិនិយោគធំណាស់ ទើបអាចសាងសង់ និងដំណើរការបាន។

លោកបន្តថា “អ្វីដែលត្រូវសិក្សា គឺតម្រូវការ និងការផ្គត់ផ្គង់ ព្រោះក្រុមហ៊ុនណាក៏ដោយ គេគិតពីសក្តានុពលទីផ្សារនិងផលចំណេញ ព្រោះពួកគេត្រូវការផលចំណេញ”។ លោកបន្ថែ​មថា “ប្រសិនជាមានផលចំណេញ និងមានតម្រូវការច្រើន ច្បា​ស់ណាស់ នឹងមានក្រុមហ៊ុនរាប់រយតម្រង់ជួរ ដើម្បីដេញ ថ្លៃសាងសង់គំរោងព្រលានយន្តហោះរបស់យើង”។

លោកយិន លាងគង់បានបន្តថា មិនថាខេត្តបាត់ដំបង ឬមណ្ឌលគិរីទេ ទោះវាស្ថិតក្នុងផែនការអាទិភាព របស់រដ្ឋាភិបាលក្តី ប៉ុន្តែប្រសិនជាការសិក្សាពីសក្តានុពល មិនរកឃើញផលចំណេញទេ ក្រុមហ៊ុនឯកជននឹងមិនវិនិយោគនោះទេ លើកលែងតែរដ្ឋាភិបាល ចំណាយសាងសង់ដោយខ្លួនឯង ដើម្បីពង្រីកសក្តានុពល និងការអភិវឌ្ឍសេដ្ឋកិច្ចនៅតំបន់នោះ”៕

ដោយៈ គង់ សូរិយា

       ភ្នំពេញៈរដ្ឋលេខាធិការក្រសួងសាធារណការ និងដឹកជញ្ជូន លោកសួង ហេង បានអញ្ជើញដឹកនាំកិច្ចប្រជុំពិនិត្យ ពិភាក្សាលើគម្រោងសិក្សាផ្លូវតភ្ជាប់ផ្នែកខាងកើត នៃគម្រោងស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា)។

កិច្ចប្រជុំនេះ មានការចូលរួមពីថ្នាក់ដឹកនាំ តំណាងរដ្ឋបាលរាជធានីភ្នំពេញ តំណាងអគ្គនាយកដ្ឋានដោះស្រាយផលប៉ះពាល់ ក្រសួងសេដ្ឋកិច្ច និងហិរញ្ញវត្ថុ តំណាងក្រុមហ៊ុនShanghai Construction Group Co., Ltd ក្រុមការងារជំនាញបច្ចេកទេស និងភាគីពាក់ព័ន្ធផងដែរ។

កិច្ចប្រជុំនេះរៀបចំឡើង ដើម្បីពិនិត្យកំណត់ខ្សែអ័ក្ស និងគំនូសប្លង់បច្ចេកទេស នៃគម្រោងផ្លូវតភ្ជាប់ពីគម្រោងស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) ផ្នែកខាងកើត ទៅផ្លូវជាតិលេខ១ ស្ថិតនៅសង្កាត់ព្រែកប្រា ខណ្ឌច្បារអំពៅ រាជធានីភ្នំពេញ ធ្វើយ៉ាងណាឱ្យខ្សែផ្លូវថ្មីនេះ មានផលប៉ះពាល់តិច ស្របតាមលក្ខណៈបច្ចេកទេស និងមានផលចំណេញខ្ពស់។

អង្គប្រជុំបានឯកភាពគ្នាលើជម្រើសខ្សែផ្លូវ១ ក្នុងចំណោមជម្រើស២ខ្សែផ្លូវ ដែលក្រុមហ៊ុនបានសិក្សា ដោយផ្អែកលើទិដ្ឋ​ភាពបច្ចេកទេស សេដ្ឋកិច្ច និងនយោបាយ ។

ជាមួយគ្នានេះ លោករដ្ឋលេខាធិការ បានណែនាំដល់ភាគីពាក់ព័ន្ធ ធ្វើការផ្តល់ព័ត៌មានបន្ថែមទៀត ដើម្បីក្រុមហ៊ុនមានមូលដ្ឋានបញ្ចប់របាយការណ៍ តាមការណែនាំរបស់អង្គប្រជុំ និងដាក់លទ្ធផលរបាយការណ៍ នៃការសិក្សាជូនថ្នាក់ដឹកនាំពិនិត្យសម្រេចឱ្យបានឆាប់។

គម្រោងផ្លូវតភ្ជាប់ផ្នែកខាងកើត នៃគម្រោងស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) ទៅផ្លូវជាតិលេខ១នេះ បានសិក្សាលើផ្លូវចំនួន២ខ្សែជាជម្រើស ក្នុងនោះជម្រើសផ្លូវទី១ មានប្រវែង១,៥៩៥គ.ម និងជម្រើសផ្លូវទី២ មានប្រវែង ១,៤៩០គ.ម ខ្សែផ្លូវទាំងពីរនេះ តភ្ជាប់ពីស្ពាន នៅក្នុងភូមិ​សាស្រ្តសង្កាត់ព្រែកប្រា ខណ្ឌច្បារអំពៅ ទៅកាន់ផ្លូវជាតិលេខ១ សង្កាត់វាលស្បូវ ខណ្ឌច្បារអំពៅ៕

ដោយ: គង់ លាងហួរ

ភ្នំពេញ: លោក កែវ រតនៈ រដ្ឋមន្ត្រីក្រសួងរ៉ែ និងថាមពលបានថ្លែងប្រាប់ទីភ្នាក់ងារសារពត៌មាន Reuters ថា កម្ពុជាគ្រោងបង្កើនសមត្ថភាពរបស់ខ្លួន ក្នុងការនាំចូលថាមពលស្អាតពីបណ្តាប្រទេសជិតខាងរួមមាន ប្រទេសឡាវ វៀតណាម និងថៃឱ្យបានចំនួនជាង៦០០មេហ្គាវ៉ាត់។

ចំនួនខាងលើនេះ មានការកើនឡើងជាង៥០ភាគរយ បើ ធៀបនឹងកិច្ចព្រមព្រៀង ដែលត្រូវបានឯកភាពគ្នានាពេលថ្មីៗនេះ។

លោក កែវ រតនៈ បានបញ្ជាក់ថា ចំណាត់ការនេះបានបង្ហាញពីសក្ដានុពល ក្នុងការជំរុញការតភ្ជាប់ថាមពលអាស៊ាន និងបានផ្តល់នូវជម្រើសបន្ថែមទៀត ដើម្បីធ្វើពិពិធកម្មការផ្គត់ផ្គង់ថាមពល ខណៈទិន្នផលវារីអគ្គិសនី មានការប្រែប្រួលដោ​យ​សារតែកត្តាអាកាសធាតុ។

លោករដ្ឋមន្ត្រីបានបន្តថា “ការនាំចូលថាមពលនឹងបំពេញបន្ថែមការផ្គត់ផ្គង់ថាមពល។ ប៉ុន្តែថាមពលភាគច្រើនសម្រាប់ប្រើប្រាស់នៅកម្ពុជា នឹងនៅតែមានប្រភពចេញពីការផលិត ក្នុងស្រុកដដែល”។

នាពេលថ្មីៗនេះ ប្រទេសកម្ពុជាបានអនុម័ត គម្រោងថាមព​លក្នុងស្រុកចំនួន២៣គម្រោង ស្ថិតក្រោមដើមទុនវិនិយោគសរុបចំនួន៥,៧ពាន់លានដុល្លារអាមេរិក។

លោកកែវ រតនៈបានបង្ហើបឱ្យដឹងទៀតថា កម្ពុជាគ្រោងនាំចូលថាមពលពន្លឺព្រះអាទិត្យ និងថាមពលវារីអគ្គិសនីចំនួន៣០០មេហ្គាវ៉ាត់ ពីប្រទេសឡាវ ចាប់ពីឆ្នាំ២០២៦តទៅ។ ជាមួយគ្នានេះ កម្ពុជាកំពុងស្ថិតក្នុងដំណាក់កាលចុងក្រោយ នៃការអនុម័តកិច្ចព្រមព្រៀង នាំចូលថាមពលពីប្រទេសវៀតណាម និងអាចនាំចូលថាមពលចំនួន១០០មេហ្កាវ៉ាត់បន្ថែមទៀត ពីប្រទេសថៃ។

លោកបានបន្តថា “ការនាំចូលថាមពលពីប្រទេសវៀតណាម នឹងចាប់ផ្តើមឱ្យបានឆាប់ តាមដែលអាចធ្វើទៅបាន ដោយ​សារតែកម្ពុជា និងវៀតណាម បានបញ្ចប់ការពិភាក្សាលើកិច្ចព្រមព្រៀងរួចហើយ ហើយយើងកំពុងរង់ចាំការអនុម័តចុងក្រោយពីរដ្ឋាភិបាល”។

លោក កែវ រតនៈ រំពឹងថា ការតភ្ជាប់បណ្តាញថាមពលក្នុងតំបន់ នឹងក្លាយទៅជាការពិតនៅឆ្នាំ២០៣៥ ដោយបន្ថែមថា គោលនយោបាយថាមពលរបស់កម្ពុជា ជាឧទាហរណ៍មួយអំពីរបៀបទាញយកអត្ថប្រយោជន៍ពីការតភ្ជាប់ថាមពល៕ប្រភព: Reuters៕