ដោយ: គង់ លាងហួរ
អន្តរជាតិ: ទីលានប្រណាំងសេះតែមួយគត់របស់ប្រទេសសិង្ហបុរីបានបិទទ្វារជាស្ថាពរ បន្ទាប់ពីមានប្រវត្តិសាស្ត្រនៃការបើកដំណើរការអស់រយៈពេលជាង១៨០ឆ្នាំកន្លងមក ខណៈទីលាននេះនឹងត្រូវបានប្រគល់ជូនរដ្ឋាភិបាលវិញ ដើម្បីសាងសង់លំនៅដ្ឋាន និងការប្រើប្រាស់ផ្សេងៗទៀត។

កាលពីថ្ងៃទី៥ ខែតុលា ជាថ្ងៃដែលក្លឹប Singapore Turf Club របស់សិង្ហបុរី បានរៀបចំការប្រណាំងសេះជាលើកចុងក្រោយរបស់ខ្លួននៅចំពោះមុខទស្សនជនចំនួន១០.០០០នាក់ មុនពេលក្លឹបប្រគល់ទីលានទំហំ១២០ហិកតានេះទៅឱ្យរដ្ឋាភិបាលសម្រាប់ការអភិវឌ្ឍន៍ឡើងវិញនៅឆ្នាំ២០២៧។

ក្លឹបខាងលើជាទីលានប្រណាំងតែមួយគត់របស់មជ្ឈមណ្ឌលហិរញ្ញវត្ថុលំដាប់ពិភពលោកដែលខ្វះខាតដីធ្លីសម្រាប់ការអភិវឌ្ឍន៍មួយនេះ។

ការ​ប្រណាំង​សេះ​ក្នុង​ប្រទេស​សិង្ហបុរី​មាន​ប្រវត្តិ​ដ៏​យូរ​លង់​ចាប់តាំងពីសម័យ​អាណានិគម​។ យោងតាមក្លឹបបានឱ្យដឹងថា ការប្រណាំងសេះលើកដំបូងនៅឆ្នាំ១៨៤៣ ត្រូវបានធ្វើឡើងដើម្បីប្រារព្ធខួបលើកទី២៤ របស់សិង្ហបុរី ដែលស្ថិតនៅក្រោមការគ្រប់គ្រងរបស់អាណានិគមអង់គ្លេស។

ដី​នេះ​នឹង​ត្រូវ​បានប្រគល់​ឱ្យរដ្ឋាភិបាល​វិញដើម្បី​បំពេញ​តម្រូវការ​លំនៅដ្ឋាន ទីធ្លាលំហែ​កាយ និង​ការ​កម្សាន្ត​នានា ខណៈ​ចំនួន​ប្រជាជន​រស់នៅប្រទេសដ៏តូចមួយនេះមានការកើន​ឡើង។ ប្រទេសសិង្ហបុរីមានទំហំផ្ទៃក្រឡាតូចជាងទីក្រុងញូវយ៉ក និងមានប្រជាជនចំនួន៦លាននាក់។

ក្លឹប Singapore Turf Club បានរាយការណ៍ថា ការចូលរួមទស្សនាការប្រណាំងសេះបានថយចុះក្នុងរយៈពេលមួយទសវត្សរ៍កន្លងមកនេះ។

ជាក់ស្ដែង ការប្រណាំងម្តងៗធ្លាប់ទទួលបានអ្នកចូលរួមទស្សនាជាមធ្យមចំនួន១១.០០០នាក់ក្នុងឆ្នាំ២០១០។ ប៉ុន្តែ ចំនួនអ្នកទស្សនាបានធ្លាក់ចុះមកនៅត្រឹម៦.០០០នាក់ក្នុងឆ្នាំ២០១៩ និង២៦០០នាក់ នៅពេលដែលទីលានប្រណាំងបានបើកដំណើរឡើងវិញ បន្ទាប់ពីជំងឺរាតត្បាត។ទីលាននេះ​អាច​ផ្ទុក​អ្នក​ទស្សនា​បាន​ចំនួន៣០.០០០នាក់៕ប្រភព: Reuters ៕

ដោយ: គង់ លាងហួរ
អន្តរជាតិ: ភាពរឹងមាំនៃតម្លៃរូបិយប័ណ្ណក្នុងស្រុក“ប្រាក់រីងហ្គីត” និងការបើកជើងហោះហើរត្រង់អន្តរជាតិកាន់តែច្រើន បានលើកទឹកចិត្តឱ្យប្រជាជនម៉ាឡេស៊ីជាច្រើនធ្វើដំណើរទៅក្រៅប្រទេស ជាពិសេសទៅកាន់បណ្តាប្រទេសនៃតំបន់អាស៊ីបូព៌ា។

លោកស្រី Kathryn Lee ប្រធានសមាគមទីភ្នាក់ងារទេសចរណ៍ និងការធ្វើដំណើរម៉ាឡេសុី (Matta) បានលើកឡើងថា ចំនួនប្រជាជនម៉ាឡេស៊ី ដែលមានបំណងធ្វើដំណើរទៅក្រៅប្រទេសមានការកើនឡើង ចាប់តាំងពីយុទ្ធនាការរឹតបន្តឹងជំងឺកូវីដ-១៩បានបិទបញ្ចប់កាលពីប៉ុន្មានឆ្នាំមុន។

លោកស្រីបន្តថា “នេះជារឿងវិជ្ជមានសម្រាប់ប្រជាជនម៉ាឡេស៊ី ដែលកំពុងទន្ទឹងរង់ចាំឱកាសធ្វើដំណើរកំសាន្តទៅក្រៅប្រទេសម្តងទៀត ខណៈទីភ្នាក់ងារទេសចរណ៍នានាអះអាងថា ការកក់ដំណើរកំសាន្តទៅកាន់គោលដៅទេសចរណ៍ក្រៅប្រទេសមានការកើនឡើងចន្លោះពី៥០% ទៅ៦០%”។

លោកស្រី Lee បានបញ្ជាក់ឱ្យដឹងបន្ថែមទៀតថា គោលដៅទេសចរណ៍បរទេសពេញនិយមសម្រាប់ប្រជាជនម៉ាឡេស៊ី រួមមាន បណ្តាប្រទេសនៃតំបន់អាស៊ីបូព៌ា ដូចជាប្រទេសជប៉ុន និងប្រទេសចិន ព្រមទាំងបណ្តាប្រទេសនៅតំបន់អឺរ៉ុបផងដែរ។

ទោះបីជាយ៉ាងណាក្តី លោកស្រីក៏មិនភ្លេចគូសបញ្ជាក់ផងដែរថា “ប្រជាជនក្នុងស្រុកមួយចំនួនបានជ្រើសរើសផ្អាកការធ្វើដំណើររបស់ពួកគេទៅកាន់បណ្តាប្រទេសនៅតំបន់អឺរ៉ុប និងតំបន់មជ្ឈិមបូព៌ា ដោយសារជម្លោះរវាងប្រទេសអុីរ៉ង់ និងប្រទេសអុីស្រាអែល”។

យោងតាមសារពត៌មាន Bernama បានរាយការណ៍ថា នាយករដ្ឋមន្រ្តីម៉ាឡេសុីលោក Anwar Ibrahim បានអះអាងថា ប្រាក់រីងហ្គីតពុំទាន់ហក់ឡើងដល់តម្លៃមួយសមស្របនៅឡើយទេ ទោះបីជាមានការងើបឡើងថ្លៃធៀបនឹងប្រាក់ដុល្លារអាមេរិកនាពេលថ្មីៗនេះយ៉ាងណាក្តី ហើយប្រាក់រីងហ្គីតកំពុងក្លាយជារូបិយប័ណ្ណដែលមានដំណើរការធន់បំផុតនៅតំបន់អាស៊ាន។

យ៉ាងណាមិញ ការងើបឡើងថ្លៃខ្ពស់ពេកនៃតម្លៃប្រាក់រីងហ្គីតអាចបង្កើនការព្រួយបារម្ភក្នុងចំណោមបណ្តាក្រុមហ៊ុននាំចេញទំនិញទៅក្រៅប្រទេស ដោយសារសេដ្ឋកិច្ចម៉ាឡេសុីត្រូវបានជំរុញជាចម្បងដោយការនាំចេញ៕ប្រភព: The Nation៕

ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃក្នុងការជួញដូរនៅព្រឹកថ្ងៃព្រហស្បតិ៍នេះ ខណៈប្រាក់ដុល្លារអាមេរិកបានធ្លាក់ថ្លៃចុះបន្តិច មុនពេលចេញផ្សាយទិន្នន័យសន្ទស្សន៍តម្លៃទំនិញប្រើប្រាស់របស់សហរដ្ឋអាមេរិក(CPI)នៅត្រឹមម៉ោងសកល 1230 GMT។

តួយ៉ាង តម្លៃមាស Spot Gold បានងើបឡើង០,១៦ភាគរយដល់២៦១១,៨៨ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,២០ភាគរយដល់២៦៣១,២០ដុល្លារក្នុងមួយអោន គិតត្រឹមម៉ោង១០:៤៦នាទីព្រឹក។

គិតត្រឹមពេលបិទការជួញដូរកាលពីថ្ងៃពុធម្សិលមិញ តម្លៃមាស Spot Gold បានបិទនៅត្រឹម២៦០៧,៧៧ដុល្លារក្នុងមួយអោន ខណៈតម្លៃមាស U.S. gold futures បានបិទនៅត្រឹម២.៦២៦ដុល្លារក្នុងមួយអោន។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាស៨១,២ភាគរយ ដែលធនាគារកណ្តាលអាមេរិក(Fed) អាចនឹងបញ្ចុះអត្រាការប្រាក់ចំនួន០,២៥ភាគរយបន្ថែមទៀតក្នុងកិច្ចប្រជុំកំណត់គោលនយោបាយនៅខែវិច្ឆិកាខាងមុខ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិក ធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានធ្លាក់ថ្លៃចុះបន្តិចមកនៅត្រឹម១០២,៨៦ពិន្ទុ នៅព្រឹកថ្ងៃព្រហស្បតិ៍នេះ បន្ទាប់ពីបិទការជួញដូរត្រឹម១០២,៩៣ពិន្ទុកាលពីថ្ងៃពុធម្សិលមិញ។

តម្លៃលោហៈធាតុប្រាក់ Spot silver បានងើបឡើង០,៤១%ដល់៣០,៨០ដុល្លារ ក្នុងមួយអោន ខណៈតម្លៃផ្លាទីន បានងើបឡើង១,១៨%ដល់៩៦៨,៦០ដុល្លារក្នុងមួយអោន ហើយតម្លៃ palladium បានងើបឡើង១,៤%ដល់១០៥៧,៥០ដុល្លារក្នុងមួយអោន គិតត្រឹមម៉ោង១០:៤៧នាទីព្រឹក៕

ដោយៈ គង់ សូរិយា

      ប្រទេសឡាវៈ នាយករដ្ឋមន្ត្រីកម្ពុជា និងថៃ ឯកភាពបន្តពង្រឹង និងពង្រីកកិច្ចសហប្រតិបត្តិការទ្វេរភាគី ឱ្យកាន់តែខ្លាំងក្លាទៀត។

ការលើកឡើងបែបនេះ ក្នុងពេលសម្តេចមហាបវរធិបតីនាយករដ្ឋមន្ត្រី បានជួបពិភាក្សាទ្វេភាគីជាមួយ លោកជំទាវ ផេថងថាន ស៊ីណាវ៉ាត់ត្រា នាយករដ្ឋមន្ត្រីថៃ ក្នុងឱកាសនៃការចូលរួមកិច្ចប្រជុំកំពូលអាស៊ាន លើកទី៤៤ និង ៤៥ និងកិច្ចប្រជុំកំពូលពាក់ព័ន្ធ ពីថ្ងៃទី៩ ដល់ថ្ងៃទី ១១ ខែតុលា ឆ្នាំ២០២៤ នៅរដ្ឋធានីវៀងចន្ទន៍ នៃសាធារណរដ្ឋប្រជាធិបតេយ្យប្រជាមានិតឡាវ។

ក្នុងឱកាសនៃជំនួប លោកជំទាវ នាយករដ្ឋមន្រ្តីថៃ បានថ្លែងអំណរគុណ សម្ដេចបវរធិបតី ដែលបានផ្ញើសារអបអរសាទ​រលោកជំទាវ មុនគេបង្អស់នៅពេលដែលលោកជំទាវ ត្រូវបានជ្រើសតាំងជានាយករដ្ឋមន្រ្តី។

លោកជំទាវ នាយករដ្ឋមន្រ្តី បានកត់សម្គាល់ដោយក្តីរីក​រាយនូវភាពរីកចម្រើនថែមទៀតនៃទំនាក់ទំនង និងកិច្ចសហប្រតិបត្តិការ រវាងប្រទេសទាំងពីរ បន្ទាប់ពីដំណើរទស្សនកិច្ចផ្លូវការ របស់សម្ដេចបវរធិបតីនៅប្រទេសថៃ កាលពីខែកុម្ភៈឆ្នាំ ២០២៤។

ជាការឆ្លើយតប សម្ដេចបវរធិបតី បានវាយតម្លៃខ្ពស់ចំពោះ​វឌ្ឍនភាពនៃទំនាក់ទំនងកម្ពុជា-ថៃ ដែលត្រូវបានដំឡើងដល់កម្រិតភាពជាដៃគូយុទ្ធសាស្ត្រ ក្នុងឆ្នាំ២០២៤នេះ។

សម្តេចបវរធិបតី និងលោកជំទាវនាយករដ្ឋមន្រ្តី បានពិភា​ក្សាអំពីការបន្តពង្រឹង និងពង្រីកកិច្ចសហប្រតិបត្តិការទ្វេរភាគី រួមមាន៖ ការចាប់ផ្ដើមឡើងវិញ នូវកិច្ចប្រជុំយន្តការទ្វេភាគីមួយចំនួន ការសិក្សាអំពីលទ្ធភាព នៃការបង្កើតតំបន់សេដ្ឋកិច្ចពិសេសបំពេញគ្នាទៅវិញទៅមក ការតភ្ជាប់រវាងប្រជាជននិងប្រជាជន វិស័យទេសចរណ៍ វិស័យការពារជាតិ និងសន្តិសុខ ជាដើម។

ថ្នាក់ដឹកនាំទាំងពីរបានឯកភាព បន្តពង្រឹងនិងពង្រីកកិច្ចសហប្រតិបត្តិការទ្វេរភាគី ឱ្យកាន់តែខ្លាំងក្លា និងប្រគល់ជូនក្រសួងការបរទេសនៃប្រទេសទាំងពីរ ដើម្បីសម្របសម្រួលកិច្ចពិភាក្សាបន្ត ពាក់ព័ន្ធនឹងប្រធានបទខាងលើ ព្រមទាំងរៀបចំឱ្យមានសកម្មភាពមួយចំនួន ដើម្បីអបអរសាទរខួបលើកទី ៧៥ នៃទំនាក់ទំនងការទូតកម្ពុជា-ថៃ នាឆ្នាំ២០២៥៕

ដោយ: គង់ លាងហួរ
អន្តរជាតិ: ក្រុមហ៊ុនរដ្ឋកូរ៉េខាងត្បូង Korea Overseas Infrastructure and Urban Development គ្រោងសាងសង់គម្រោងលំនៅដ្ឋានដ៏ធំមួយនៅទីក្រុងឆ្លាតវៃ New Clark City របស់ប្រទេសហ្វីលីពីនក្រោមទុនវិនិយោគជិត១៥៨លានដុល្លារអាមេរិក។

នៅខាងក្រៅវេទិកាធុរកិច្ចហ្វីលីពីន-កូរ៉េកាលពីថ្ងៃច័ន្ទដើមសប្តាហ៍នេះ លោក Joshua M. Bingcang ប្រធានអាជ្ញាធរបំប្លែង និងអភិវឌ្ឍន៍មូលដ្ឋាន (BCDA) បានអះអាងថា ស្ថាប័នរបស់លោកបានចុះហត្ថលេខាលើអនុស្សរណៈនៃការយោគយល់គ្នាជាមួយក្រុមហ៊ុនកូរ៉េដើម្បីអភិវឌ្ឍន៍គម្រោងលំនៅដ្ឋាន។

លោក Bingcang បានមានប្រសាសន៍ឱ្យដឹងបន្តថា “នេះជាអ្វី ដែលយើងបានទទួលស្វាគមន៍បំផុត ព្រោះនេះជាលំហូរវិនិយោគផ្ទាល់ពីបរទេស(FDI) ហើយនេះពុំមែនជាជំនួយអភិវឌ្ឍន៍ផ្លូវការ(ODA)នោះទេ”។

លោកបន្ថែមថា “លំហូរ FDI នឹងដោះស្រាយតម្រូវការលំនៅដ្ឋាននៅក្នុងទីក្រុង New Clark City ព្រោះរឿងនេះធ្លាប់ជាកង្វល់ក្នុងចំណោមបុគ្គលរបស់ស្ថាប័នរដ្ឋាភិបាល ដែលត្រូវបានស្នើសុំឱ្យផ្លាស់ទីលំនៅទៅកាន់ទីក្រុងថ្មី”។

នៅក្រោមអនុស្សរណៈនៃការយោគយល់គ្នា (MoU) នេះ ក្រុមហ៊ុន Korea Overseas Infrastructure and Urban Development គ្រោងនឹងសាងសង់លំនៅដ្ឋានចំនួន៣.០០០យូនីតដំបូងនៅក្នុងទីក្រុង New Clark City ដើម្បីផ្គត់ផ្គង់ដល់តម្រូវការរបស់បុគ្គលមកពីស្ថាប័នរដ្ឋាភិបាល និងកម្មករដែលមានប្រាក់ឈ្នួលអប្បបរមា។

ចំណែក ការកំណត់តម្លៃជួលលំនៅដ្ឋានប្រចាំខែកំពុងត្រូវបានពិចារណាក្នុងតម្លៃចន្លោះ​ពី៥.០០០ប៉េសូទៅដល់៧.០០០ប៉េសូ(ប្រហែល៨៨ដុល្លារទៅ១២៣ដុល្លារ) ក្នុងមួយខែ។

លោក​ Bingcang បាន​បង្ហើបឱ្យដឹងថា គម្រោង​លំនៅដ្ឋាន​ដ៏​ធំ​នេះ​នឹង​លាតសន្ធឹងនៅ​លើ​ផ្ទៃដីទំហំ៥ហិកតា ហើយ​គម្រោងនេះនឹង​ចាប់ផ្តើម​បើកការដ្ឋានសាងសង់​ឱ្យបានមុន​ដំណាច់​ឆ្នាំ​២០២៤។

លោកអះអាងថា គម្រោង​ទំហំ៥ហិកតា​នេះនឹង​ទទួលបានទុន​វិនិយោគ​ប្រហែល៩ពាន់​លាន​ប៉េសូ ហើយជាការពិតណាស់ គម្រោងនេះនឹងផ្តល់អត្ថប្រយោជន៍ដោយប្រយោល ដូចជាការបង្កើតឱកាសការងារក្នុងកំឡុងពេលនៃការសាងសង់ ការផ្ទេរបច្ចេកវិទ្យា ក៏ដូចជាការជះឥទ្ធិពលវិជ្ជមានលើសេដ្ឋកិច្ចក្នុងស្រុក”៕ប្រភព: Business World Online៕

ដោយ: គង់ លាងហួរ
អន្តរជាតិ: ការសាងសង់រដ្ឋធានីថ្មី Nusantara របស់ប្រទេសឥណ្ឌូនេស៊ី បាននិងកំពុងទទួលរងនូវការរិះគន់យ៉ាងខ្លាំងពីក្រុមអ្នកវិភាគ ព្រោះពួកគេភ័យខ្លាចថា គម្រោងខ្នាតយក្សនេះត្រូវបានសាងសង់ឡើងសម្រាប់តែក្រុមអ្នកមានប៉ុណ្ណោះ និងគ្មានបរិយាបន្ននោះឡើយ។

លោក Nirwono Joga អ្នកជំនាញផ្នែករៀបចំផែនការទីក្រុងមួយរូបបានលើកឡើងថា ការអភិវឌ្ឍន៍រដ្ឋធានីថ្មីរបស់ឥណ្ឌូនេសុី បានធ្វើឱ្យគោលការណ៍រៀបចំផែនការទីក្រុងសំខាន់ៗដើរថយក្រោយ ដោយផ្តល់អាទិភាពតែលើការបើកការដ្ឋានសាងសង់មន្ទីរពេទ្យលំដាប់អន្តរជាតិ និងសាលារៀនឯកជន។ ប៉ុន្តែ រដ្ឋធានីថ្មីបានផាត់ចោលនូវការសាងសង់ហេដ្ឋារចនាសម្ព័ន្ធសាធារណៈជាច្រើន។

លោក Nirwono បានបន្តថា “រដ្ឋាភិបាល​ប្រញាប់ប្រញាល់ពេកក្នុង​ការ​ចង់បង្ហាញ​លទ្ធផលឱ្យគេបានឃើញ។ ប៉ុន្តែ​ តើ​នឹង​មាន​អ្វី​កើត​ឡើង​ ប្រសិនបើពុំមាន​នរណា​ម្នាក់​ប្រើ​ប្រាស់​មន្ទីរពេទ្យ ឬសាលារៀនលំដាប់​អន្តរជាតិ​ទាំង​អស់នោះ?”។

អ្នកជំនាញរៀបចំផែនការទីក្រុងរូបនេះអះអាងថា “ពួកគេប្រញាប់ប្រញាល់បើកការដ្ឋានសាងសង់ហេដ្ឋារចនាសម្ព័ន្ធគ្រប់បែបយ៉ាង។ ប៉ុន្តែ ប្រសិនបើគ្មាននរណាម្នាក់ប្រើប្រាស់សេវាកម្មទាំងនេះទេនោះ ការណ៍នេះនឹងជះផលអវិជ្ជមានទៅលើពួកគេវិញ”។

គិតមកទល់ពេលនេះ មន្ទីរពេទ្យចំនួន៤ទីតាំង កំពុងត្រូវបានសាងសង់ឡើងនៅក្នុងទីក្រុង Nusantara ដោយក្នុងនោះរួមមានមន្ទីរពេទ្យឯកជនចំនួន៣ ហើយសាលារៀនឯកជនលំដាប់អន្តរជាតិយ៉ាងតិចចំនួន៤ ត្រូវបានចាប់ផ្តើមបើកការដ្ឋានសាងសង់។

ជាក់ស្ដែង សាលារៀនលំដាប់អន្តរជាតិឈ្មោះ “Al Azhar Summarecon Nusantara” ដែលជាសាលាឯកជនមួយ គ្រោងនឹងបើកទ្វារទទួលសិស្សចូលសិក្សានៅក្នុងឆ្នាំ២០២៥ខាងមុខ។

លោក Nirwono បានអះអាងថា ការអភិវឌ្ឍន៍យ៉ាងលឿនឆាប់រហ័សបែបនេះក៏បានបង្កឱ្យមានវិសមភាពសង្គមផងដែរ។ លោកចង្អុលបង្ហាញថា កម្មករជាច្រើននាក់ ដែលបានធ្វើការនៅទីក្រុង Nusantaraអស់ជាច្រើនខែ ចុងក្រោយត្រូវបានទុកចោលឱ្យរស់នៅក្នុងអគារលំនៅដ្ឋានរួមនៅតំបន់ជាយក្រុង។

លោក​បាន​បន្ថែម​ថា​ “នេះ​ជា​បញ្ហា​ ដែល​អាជ្ញាធរ​គ្រប់គ្រងរដ្ឋធានី​ថ្មីនឹង​ត្រូវ​ប្រឈម​មុខ​”។ លោកព្រមាន​ថា​ ការ​ដោះស្រាយ​ការកើនឡើងនៃវិសមភាព​សង្គម​ នឹង​ដាក់​បន្ទុក​ផ្នែកហិរញ្ញវត្ថុ​កាន់តែ​ធ្ងន់​ធ្ងរលើរដ្ឋាភិបាលឥណ្ឌូនេស៊ី”។

លើសពីនេះ ចាប់តាំងពីគម្រោងទីក្រុង Nusantara ស្ថិតនៅក្នុងខេត្ត East Kalimantan ត្រូវបានចាប់ផ្តើមបើកការដ្ឋានសាងសង់ គេពុំសង្កេតឃើញមានដើមទុនវិនិយោគហូរចូលទៅកាន់តំបន់ភាគខាងកើតនៃប្រទេសឥណ្ឌូនេស៊ីផ្សេងទៀត ដូចជាខេត្ត Sulawesi និងខេត្ត Papua នោះទេ៕ប្រភព: The Star៕