ដោយ: គង់ លាងហួរ
អន្តរជាតិ: ការ​លក់​អចលនទ្រព្យ​​នៅក្នុង​ទីក្រុង​ធំៗមួយ​ចំនួន​នៅប្រទេស​ចិន​ក្នុង​អំឡុង​ទិវា“សប្តាហ៍មាស”​រយៈពេលពេញ១សប្តាហ៍​បានកើនឡើង បន្ទាប់​ពី​ទីក្រុងប៉េកាំងបានបង្ហាញវិធានការ​​មួយ​ចំនួន​​ដើម្បី​ជំរុញ​ទីផ្សារអចលនទ្រព្យ។

ប៉ុន្តែ ក្រុមអ្នកវិភាគបានព្រមានថា វាជាការឆាប់ពេកហើយ ក្នុងការគិតថា ការ​កើនឡើងនៃការលក់​​​នេះជាសញ្ញានៃការស្ទុះងើបឡើងវិញយ៉ាងរឹងមាំនៃវិស័យអចលនទ្រព្យនៅប្រទេសចិន ខណៈទីផ្សារនៅតែត្រូវការវិធានការជំរុញបន្ថែមទៀតជាចាំបាច់។

នារយៈពេលប៉ុន្មានថ្ងៃ មុនពេលទិវាសប្តាហ៍មាស (Golden Week) ចាប់ផ្តើមចូលមកដល់នៅថ្ងៃទី១ ខែតុលា ទីក្រុងប៉េកាំងបានប្រកាសកាត់បន្ថយអត្រាការប្រាក់លើប្រាក់កម្ចីទិញផ្ទះដែលមានស្រាប់ ដើម្បីរក្សាស្ថិរភាពនៃការលក់ និងតម្លៃអចលនទ្រព្យនៅលើទីផ្សារ។

ទីផ្សារអចលនទ្រព្យរបស់ប្រទេសចិនបានដាំក្បាលចុះចាប់តាំងពីឆ្នាំ២០២១ បន្ទាប់ពីអ្នកអភិវឌ្ឍន៍ជាច្រើនបានខកខានទូទាត់សងបំណុលជាបន្តបន្ទាប់គ្នា ដោយបន្សល់ទុកឱ្យគម្រោងជាប់គាំង។ វិបត្តិនេះបានអូសទាញកំណើនសេដ្ឋកិច្ចចិន និងកាត់បន្ថយទំនុកចិត្តអ្នកទិញផ្ទះ។

ទូរទស្សន៍រដ្ឋចិន CCTV បានរាយការណ៍ថា ក្នុងអំឡុងពេលវិស្សមកាលរយៈពេល១សប្តាហ៍ពេញ ចំនួននៃការដើរមើលផ្ទះ(House visits) ដែលជាសូចនាករឆ្លុះបញ្ចាំងពីឆន្ទៈចង់ទិញផ្ទះ បានកើនឡើងយ៉ាងគំហុក ខណៈការលក់ផ្ទះនៅទីក្រុងជាច្រើនបានកើនឡើងក្នុងកម្រិតខុសៗគ្នា។

លោក Raymond Cheng អ្នកស្រាវជ្រាវផ្នែកអចលនទ្រព្យនៅក្រុមហ៊ុន CGS International Securities បានលើកឡើងថា “សន្ទុះនៃការលក់ជាសញ្ញាវិជ្ជមានសម្រាប់ទីក្រុងទាំងនេះ ហើយការលក់អចលនទ្រព្យនៅក្នុងទីក្រុងផ្សេងទៀត ក៏អាចងើបឡើងវិញក្នុងរយៈពេលដ៏ខ្លីនេះផងដែរ ដោយផ្អែកលើការគាំទ្រគោលនយោបាយដ៏រឹងមាំ និងភាពប្រសើរឡើងនៃទំនុកចិត្តទីផ្សារ”។

លោក Cheng បានរំពឹងទុកថា ការលក់អចលនទ្រព្យរបស់ប្រទេសចិនអាចនឹងបង្ហាញពីកំណើនវិជ្ជមាន នៅក្នុងត្រីមាសទី៤ចុងក្រោយនៃឆ្នាំនេះ។

ប៉ុន្តែ ក្រុមអ្នកវិភាគនៅធនាគារខ្នាតយក្សអាមេរិក J.P. Morgan បានព្រមានថា សន្ទុះនៅតែមានសភាពខ្សោយជាងពេល ដែលរដ្ឋាភិបាលចិនបានបើកដំណើរការសេដ្ឋកិច្ចរបស់ខ្លួនឡើងវិញនៅត្រីមាសទី១ ឆ្នាំ២០២៣ បន្ទាប់ពីជំងឺរាតត្បាតបានកន្លងផុតទៅ។

ក្រុមអ្នកវិភាគរបស់ធនាគារ J.P. Morgan បានផ្តល់ជាគំនិតយោបល់ថា ការលក់អចលនទ្រព្យនៅខែវិច្ឆិកាខាងមុខនឹងក្លាយជាគន្លឹះដ៏សំខាន់មួយ ដើម្បីកំណត់ដឹងថា តើទីផ្សារកំពុងធ្លាក់ចុះដល់បាតហើយឬនៅ?។

ពួកគេក៏បានអះអាងផងដែរថា ទីក្រុងតូចៗនៅប្រទេសចិនកំពុងជួបប្រទះវិបត្តិនៃការផ្គត់ផ្គង់អចលនទ្រព្យលើសតម្រូវការកាន់តែធ្ងន់ធ្ងរ ដោយសារតែការថយចុះនៃចំនួនប្រជាជន និងបញ្ហាសុខភាពផ្នែកហិរញ្ញវត្ថុរបស់រដ្ឋបាលក្នុងតំបន់នានា ហើយតម្រូវការផ្ទះនៅទីនោះមិនទាន់មានការកើនឡើងនៅឡើយទេ។

ចំណែក ក្រុមអ្នកវិភាគនៅធនាគារស្វីស UBS ប៉ាន់ប្រមាណថា ប្រទេសចិនត្រូវការទុនវិនិយោគចំនួន៣ទ្រីលានយ័ន (ប្រហែល៤២៧,៥០ពាន់លានដុល្លារ) ដើម្បីកាត់បន្ថយការផ្គត់ផ្គង់ផ្ទះលើសតម្រូវការនៅក្នុងទីក្រុងធំៗចំនួន៨០ ហើយចិនអាចបន្តពឹងផ្អែកលើធនាគារកណ្តាលរបស់ខ្លួនដើម្បីជួយសម្រួលដល់ដំណើរការស្តារឡើងវិញ។

ធនាគារ UBS រំពឹងថា ទិន្នន័យសេដ្ឋកិច្ចចុងក្រោយបង្អស់របស់ចិន នឹងបង្ហាញឲ្យឃើញពីការថយចុះនៃសន្ទុះនៅក្នុងចរន្តសេដ្ឋកិច្ចចិនជាបន្តទៀត ទោះបីជាការលក់អចលនទ្រព្យប្រចាំថ្ងៃនៅដើមខែតុលា និងការចំណាយរបស់ប្រជាជនចិនក្នុងទិវាសប្តាហ៍មាសមានភាពប្រសើរឡើងយ៉ាងណាក្តី៕ប្រភព:Reuters៕

ដោយ: គង់ លាងហួរ
អន្តរជាតិ: រដ្ឋាភិបាលហ្វីលីពីនបានសម្រេចដាក់ពន្ធអាករលើតម្លៃបន្ថែមចំនួន១២% លើសេវាកម្មឌីជីថលដែលផ្តល់ដោយក្រុមហ៊ុនបច្ចេកវិទ្យាយក្សដូចជាក្រុមហ៊ុន Amazon ក្រុមហ៊ុន Netflix ក្រុមហ៊ុន Disney និងក្រុមហ៊ុន Alphabet។

វិធានការនេះមានគោលបំណងការពារឧស្សាហកម្មក្នុងស្រុក និងធ្វើឱ្យមានការប្រកួតប្រជែងដោយស្មើភាពគ្នារវាងក្រុមហ៊ុនបរទេស និងក្រុមហ៊ុនហ្វីលីពីន។នេះបើយោងតាមការិយាល័យចំណូលផ្ទៃក្នុងរបស់ប្រទេសហ្វីលីពីន (BIR)។

ប្រធានាធិបតីហ្វីលីពីនលោក Ferdinand Marcos Jr បានចុះហត្ថលេខាលើច្បាប់មួយស្តីពីការដាក់ពន្ធអាករលើតម្លៃបន្ថែមលើក្រុមហ៊ុនផ្តល់សេវាឌីជីថលក្រៅប្រទេស ដូចជាសេវាស្ទ្រីម និងកម្មវិធី Software ដែលជួយមនុស្សស្វែងរកព័ត៌មានតាមអនឡាញ។

ការិយាល័យចំណូលផ្ទៃក្នុងរបស់ប្រទេសហ្វីលីពីន (BIR) បានអះអាងថា កន្លងមក រដ្ឋាភិបាលរបស់យើងតម្រូវឱ្យតែក្រុមហ៊ុនផ្តល់សេវាឌីជីថលក្នុងស្រុកប៉ុណ្ណោះ ត្រូវបង់ពន្ធអាករលើតម្លៃបន្ថែមចំនួន១២ភាគរយ។

លោក Romeo Lumagui អគ្គស្នងការនៃការិយាល័យ BIR បានបញ្ជាក់នៅក្នុងសេចក្តីថ្លែងការណ៍មួយថា ការយកពន្ធនឹងលើកកម្ពស់ការប្រកួតប្រជែងដោយស្មើភាពគ្នារវាងក្រុមហ៊ុនក្នុងស្រុក និងក្រុមហ៊ុនបរទេស ដែលកំពុងទទួលបានផលចំណេញពីអ្នកប្រើប្រាស់សេវាឌីជីថលនៅទូទាំងប្រទេសហ្វីលីពីន។

បណ្តាក្រុមហ៊ុនបច្ចេកវិទ្យាខ្នាតយក្សដូចជាក្រុមហ៊ុន Netflix ក្រុមហ៊ុន Disney ក្រុមហ៊ុន Google និងក្រុមហ៊ុន Amazon មិនបានធ្វើអត្ថាធិប្បាយណាមួយឡើយ។

ការិយាល័យទំនាក់ទំនងប្រធានាធិបតីបានកត់សម្គាល់ថា ប្រទេសហ្វីលីពីនគ្រោងប្រមូលពន្ធអាករលើតម្លៃបន្ថែម ឱ្យបានចំនួន១០៥ពាន់លានប៉េសូ (ប្រមាណ១,៩ពាន់លានដុល្លារ) រវាងពីឆ្នាំ២០២៥ដល់ឆ្នាំ២០២៩។

រដ្ឋាភិបាលរបស់លោកប្រធានាធិបតីហ្វីលីពីន Ferdinand Marcos Jr គ្រោងនឹងវិភាជន៍ប្រាក់ចំណូលចំនួន៥%ពីការប្រមូលពន្ធនេះដើម្បីផ្តល់មូលនិធិដល់គម្រោងឧស្សាហកម្មនវានុវត្តន៍៕ប្រភព: VNA៕

ដោយ: គង់ លាងហួរ
អន្តរជាតិ: គម្រោងផ្លូវរថភ្លើងល្បឿនលឿនពីភាគខាងជើងទៅកាន់ភាគខាងត្បូងនៃប្រទេសវៀតណាមគ្រោងពង្រីកឆ្លងកាត់ទីក្រុងហាណូយក្នុងចម្ងាយ២៧គីឡូម៉ែត្រ និងឆ្លងកាត់ទីក្រុងហូជីមិញក្នុងចម្ងាយ១៣គីឡូម៉ែត្រ។

យោងតាមសម្ព័ន្ធក្រុមប្រឹក្សាយោបល់រវាងក្រុមហ៊ុនវៀតណាម TEDI ក្រុមហ៊ុន TRICC និងក្រុមហ៊ុន TEDIS បានឱ្យដឹងថា ការសាងសង់ផ្លូវរថភ្លើងល្បឿនលឿននេះនឹងចាប់ផ្តើមចេញពីត្រង់ចំណុចស្ថានីយ៍ Ngoc Hoi ក្នុងសង្កាត់ Thanh Tri នៃទីក្រុងហាណូយ។

ស្ថានីយ៍ Ngoc Hoi នឹងបម្រើមុខងារជាមជ្ឈមណ្ឌលដឹកជញ្ជូនដ៏សំខាន់មួយ ដែលរួមមានស្ថានីយ៍អ្នកដំណើរ និងស្ថានីយ៍ដឹកជញ្ជូន រួមជាមួយនឹងឃ្លាំងសម្រាប់ផ្ទុក និងថែទាំរថភ្លើង។

ទីក្រុងហាណូយគ្រោងនឹងបែងចែកផ្ទៃដីប្រហែល២៥០ហិកតាសម្រាប់សាងសង់ស្ថានីយនេះ ដើម្បីច្របាច់បញ្ចូលគ្នានូវផ្លូវរថភ្លើងនៅក្នុងទីក្រុងចំនួន៣ខ្សែ និងផ្លូវរថភ្លើងថ្នាក់ជាតិចំនួន៤ខ្សែ ដើម្បីធានាការដឹកជញ្ជូនប្រកបដោយប្រសិទ្ធភាពសម្រាប់អ្នកដំណើរដែលជិះតាមរថភ្លើងល្បឿនលឿន។

នៅត្រឹមឆ្នាំ២០៥០ខាងមុខ ស្ថានីយ៍នេះត្រូវបានគេរំពឹងថា នឹងអាចផ្ទុកអ្នកដំណើរប្រចាំថ្ងៃចំនួន១៧០.០០០នាក់ ដោយក្នុងនោះ ក្រុមអ្នកជំនាញរំពឹងថា នឹងមានមនុស្សប្រមាណ៤៦.០០០នាក់ ឬស្មើនឹង២៧% ធ្វើដំណើរទៅកាន់តំបន់កណ្តាលទីក្រុង និងមានមនុស្សចំនួន១២៤.០០០នាក់ទៀត ឬស្មើនឹង៧៣% ធ្វើដំណើរទៅកាន់ស្រុក និងបណ្តាខេត្តដទៃ។

បណ្តាញផ្លូវ​រថភ្លើង​នេះនឹង​ឆ្លងកាត់ចូលទៅកាន់ទីក្រុង​ហូជីមិញក្នុងចម្ងាយ១៣គីឡូម៉ែត្រ ​បន្ទាប់​ពី​ឆ្លង​កាត់​ទន្លេ Dong Nai។ បន្ទាប់មក ខ្សែរថភ្លើងនេះនឹងឆ្លងកាត់ផ្លូវប្រសព្វជាមួយផ្លូវក្រវ៉ាត់ក្រុងលេខ៣ និងផ្លូវក្រវ៉ាត់ក្រុងលេខ២ មុនពេលឈានចូលទៅដល់ស្ថានីយ៍ Thu Thiem ស្ថិតនៅក្នុងទីក្រុង Thu Duc។

គម្រោងផ្លូវរថភ្លើងល្បឿនលឿនពីភាគខាងជើងទៅកាន់ភាគខាងត្បូងរបស់ប្រទេសវៀតណាមនឹងលាតសន្ធឹងប្រវែងសរុបប្រមាណ១.៥៤១គីឡូម៉ែត្រ ដោយតភ្ជាប់ទីក្រុង និងខេត្តចំនួន២០ តាមរយៈស្ថានីយចំនួន២៦ទីតាំង ដើម្បីជំរុញប្រសិទ្ធភាពដឹកជញ្ជូន និងកំណើនសេដ្ឋកិច្ចទូទាំងប្រទេស៕ប្រភព: Vnexpress៕

ដោយៈ គង់ សូរិយា

      ភ្នំពេញៈ ក្រសួងរៀបចំដែនដី នគរូបនីយកម្ម និងសំណង់ និងរដ្ឋបាលថ្នាក់ក្រោមជាតិ បេ្តជ្ញារួមគ្នាដើម្បីឆ្លើយតបទៅនឹងគោលការណ៍ទាំង៥ នៃច្បាប់សំណង់។

គោលការណ៍ទាំង៥ នៃច្បាប់សំណង់រួមមាន៖

– ការពារផលប្រយោជន៍សាធារណៈ និងសិទ្ធិបុគ្គល

– ប្រសិទ្ធភាព ចីរភាព និងបរិយាបន្ន

– រៀបចំដែនដី និងនគរូបនីយកម្ម

– អភិវឌ្ឍបៃតង ការពារធនធានធម្មជាតិ និងបរិស្ថាន

– រក្សា និងលើកកម្ពស់អត្តសញ្ញាណជាតិ។

ច្បាប់នេះមានគោលបំណងធានា៖

– គុណភាព សន្តិសុខ សុវត្ថិភាពសំណង់ ការពារទ្រព្យសម្បត្តិ និងសុខុមាលភាពរបស់ម្ចាស់សំណង់ អ្នកប្រើប្រាស់សំណង់ និងសាធារណជន។

– សោភ័ណភាព និងបរិស្ថានល្អ សម្រាប់ការរស់នៅប្រកប​ដោយចីរភាព សំដៅលើកកម្ពស់សុខុមាលភាព សាធារណៈ។

– គណនេយ្យភាព និងប្រសិទ្ធភាពក្នុងការប្រកបការងារ និងការប្រកបវិជ្ជាជីវៈក្នុងវិស័យសំណង់។

– ការបង្កើនការជឿទុកចិត្តរបស់វិនិយោគិន នៅក្នុងវិស័យសំ​ណង់ និងជំរុញទីផ្សារអចលនទ្រព្យ ប្រកបដោយប្រសិទ្ធភាពផ្នែកសេដ្ឋកិច្ច និងសង្គម៕

ដោយ: គង់ លាងហួរ
អន្តរជាតិ: តម្លៃហាងឆេងមាសបានធ្លាក់ថ្លៃចុះ ក្នុងការជួញដូរនៅព្រឹកថ្ងៃអង្គារនេះ ខណៈទិន្នន័យទីផ្សារការងារអាមេរិកបានជំរុញឱ្យក្រុមអ្នកវិនិយោគបន្ទាបការរំពឹងទុករបស់ពួកគេចំពោះការបញ្ចុះអត្រាការប្រាក់ក្នុងទ្រង់ទ្រាយធំរបស់ធនាគារកណ្ដាលអាមេរិក(Fed) នៅខែវិច្ឆិកាខាងមុខ។

តួយ៉ាង តម្លៃមាស Spot Gold បានស្ថិតនៅទ្រឹងត្រឹម២.៦៤៤ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានធ្លាក់ចុះ០,១៤ភាគរយដល់២៦៦២,២០ដុល្លារក្នុងមួយអោន គិតត្រឹមម៉ោង១០:៤៨នាទីព្រឹក។

គិតត្រឹមពេលបិទការជួញដូរកាលពីថ្ងៃច័ន្ទម្សិលមិញ តម្លៃមាស Spot Gold បានបិទនៅត្រឹម២៦៤៣,៥៨ដុល្លារក្នុងមួយអោន ខណៈតម្លៃមាស U.S. gold futures បានបិទនៅត្រឹម២.៦៦៦ដុល្លារក្នុងមួយអោន។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាស៨៦ភាគរយ ដែលធនាគារកណ្តាលអាមេរិក(Fed) អាចនឹងបញ្ចុះអត្រាការប្រាក់ចំនួន០,២៥ភាគរយបន្ថែមទៀតក្នុងកិច្ចប្រជុំគោលនយោបាយប្រចាំខែវិច្ឆិកាខាងមុខ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិក ធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានធ្លាក់ថ្លៃចុះមកនៅត្រឹម១០២,៤០ពិន្ទុនៅព្រឹកថ្ងៃអង្គារនេះ បន្ទាប់ពីបិទការជួញដូរត្រឹម១០២,៥៤ពិន្ទុកាលពីថ្ងៃច័ន្ទម្សិលមិញ។

តម្លៃលោហៈធាតុប្រាក់ Spot silver បានធ្លាក់ចុះ១,១២%ដល់៣១,៦៤ដុល្លារ ក្នុងមួយអោន ខណៈតម្លៃផ្លាទីន បានធ្លាក់ចុះ០,៩៨%ដល់៩៧៧,៤០ដុល្លារក្នុងមួយអោន ហើយតម្លៃ palladium បានធ្លាក់ចុះ២,០៣%ដល់១០០៥,៥០ដុល្លារក្នុងមួយអោន គិតត្រឹមម៉ោង១០:៥១នាទីព្រឹក៕