ដោយ: គង់ លាងហួរ

អន្តរជាតិ: រថភ្លើងដើរដោយថាមពលអគ្គីសនី ដំបូងបង្អស់របស់ក្រុមហ៊ុនយក្ស Tesla ឈ្មោះ “Giga Train” បានបង្ហាញវត្តមានរបស់ខ្លួន ជាលើកដំបូងនៅក្នុងប្រទេសអាល្លឺម៉ង់។

រថភ្លើង Giga Train បានសាកល្បងដឹកអ្នកដំណើរពីស្ថានីយ៍ Erkner ទៅកាន់ស្ថានីយ៍ Tesla Sud មានទីតាំងនៅរោងចក្រផលិតកម្មរបស់ក្រុមហ៊ុន Tesla ស្ថិតនៅចម្ងាយប្រហែល៣២គីឡូម៉ែត្រ ពីភាគអាគ្នេយ៍នៃទីក្រុងប៊ែរឡាំង។

បច្ចុប្បន្ន រថភ្លើងនេះអាចដឹកជញ្ជូនអ្នកដំណើរ បានចំនួន៥០០នាក់ក្នុងមួយជើង ដោយរួមមានកៅអីចំនួន១២០ កន្លែងសម្រាប់ដាក់កង់ និងប្រព័ន្ធព័ត៌មាន សម្រាប់អ្នកធ្វើដំណើរនៅលើរថភ្លើង។

រថភ្លើង Giga Train ត្រូវបានគេរំពឹងថា នឹងដឹកជញ្ជូនបុគ្គ លិករបស់ក្រុមហ៊ុនTesla ចំនួន៤.៥០០នាក់ទៅ និងមកពីរោងចក្រ ដោយផ្អែកលើវេនធ្វើការចំនួន៣ ដោយវេននីមួយៗមានរយៈពេល៨ម៉ោង។

លោកស្រី Theresa Eggler អ្នកគ្រប់គ្រងគម្រោងនៅក្រុមហ៊ុន Tesla បានបញ្ជាក់ប្រាប់សារព័ត៌មានអាល្លឺម៉ង់ rbb24 ថា “យើងពិតជារីករាយជាពិសេស ព្រោះនៅពេលនេះ រថភ្លើង​របស់ Tesla ដើរដោយថាមពលអគ្គិសនី ស្របតាមបេសកកម្មនៃក្រុមហ៊ុនរបស់យើង ដើម្បីពន្លឿនទៅកាន់ថាមពលកកើតឡើងវិញ”។

ការដាក់ឱ្យដំណើរការរថភ្លើងអគ្គិសនី ជាជម្រើសដ៏ល្អសម្រាប់បុគ្គលិក និងសាធារណជនទូទៅ ក្នុងការប្រើប្រាស់ជម្រើសនៃការដឹកជញ្ជូនបៃតង ដើម្បីសន្សំសំចៃហ្គាស និងការថែទាំរថយន្ត និងការបំភាយឧស្ម័នជាតិពុល ពីយានយន្តផ្ទាល់ខ្លួន។

លោកស្រី Eggler បានថ្លែងប្រាប់សារពត៌មាន rbb24 បន្ថែមទៀតថា រថភ្លើងនេះត្រូវបានគេរំពឹងថា នឹងជួយកាត់បន្ថយការបំពុលឧស្ម័នកាបូន ឌីអុកស៊ីតចំនួន៥០តោន បើប្រៀបធៀបទៅនឹងរថភ្លើងផ្សេងទៀត ហើយនេះជាជ័យជម្នះដ៏ធំមួយសម្រាប់បរិស្ថាន៕ប្រភព: Yahoo Tech៕

ដោយ: គង់ លាងហួរ

អន្តរជាតិ: អាកាសយានដ្ឋានអន្តរជាតិ Osaka Kansai (KIX) ឬហៅថាKanku ស្ថិតក្នុងចំណោមអាកាសយានដ្ឋាន ខ្នាតធំបំផុ​តក្នុងប្រទេសជប៉ុន ដោយមានទីតាំងនៅតំបន់ Greater Osaka។

Kanku ត្រូវបានសាងសង់ឡើង នៅលើកោះសិប្បនិម្មិតមួយ នៅឆកសមុទ្រអូសាកា(Osaka Bay) និងមានទីតាំងនៅជិតទីក្រុង Kyoto និងទីក្រុងKobe។ អាកាសយានដ្ឋាននេះ មានប្រវត្តិគួរឱ្យចាប់អារម្មណ៍ និងជាសំណង់វិស្វកម្មដ៏អស្ចារ្យ។

អាកាសយានដ្ឋានអន្តរជាតិ Osaka Kansai ត្រូវបានបើកដំណើរការនៅថ្ងៃទី៤ ខែកញ្ញា ឆ្នាំ១៩៩៤ ក្នុងទុនវិនិយោគប្រ​ហែ​ល២០ពាន់លានដុល្លារ ហើយបច្ចុប្បន្ន Osaka Kansai ជាព្រ​លានយន្តហោះមមាញឹកបំផុតទី៣ នៅក្នុងប្រទេសជប៉ុន។ ព្រលាន​យន្តហោះ​នេះ អាច​ដំណើរការ​ដោយ​សេរី២៤ម៉ោង ​ក្នុង​មួយថ្ងៃ ដោយសារមានទីតាំង​នៅ​លើឆកសមុទ្រ។

ការស្ថាបនាបាន​ចំណាយ​ពេល​៧​ឆ្នាំ​ បន្ទាប់ពីបើកការដ្ឋានដំបូង​នៅ​ឆ្នាំ​១៩៨៧។

យោងតាមសារពត៌មាន ​​Aerotime បានឱ្យដឹងថា អាកាសយានដ្ឋាន កំពុងលិចទៅក្នុងទឹក ក្នុងកម្រិតប្រកាសអាសន្ន ខណៈក្រុមអ្នកជំនាញមួយចំនួនជឿជាក់ថា អាកាសយានដ្ឋាន  អាចនឹងលិច ទៅក្នុងទឹកទាំងស្រុងនៅឆ្នាំ២០៥៦។

ដើម្បីស្ថាបនាអាកាសយានដ្ឋាននេះឡើង ក្រុមវិស្វករបានបង្ហូរទឹករាប់លានលីត្រ ចេញពីស្រទាប់ដីឥដ្ឋទន់ មានជម្រៅ២០ម៉ែត្រ នៅក្នុងឆកសមុទ្រ។ បន្ទាប់មក ក្រុមវិស្វករបានសាងសង់ជញ្ជាំងសមុទ្រ ដើម្បី​ទប់ស្កាត់ទឹក​សមុទ្រ ​មិនឱ្យទន្ទ្រានទន្ទ្រាន​មកលើផ្ទៃដី។

ក្រុមវិស្វករបានចាក់ដីខ្សាច់ ជម្រៅ៥ហ្វីត(១,៥២ម៉ែត្រ)នៅលើស្រទាប់ដីឥដ្ឋបាតសមុទ្រ។ បន្ទាប់មក បំពង់ទុយោបញ្ឈរចំនួន២,២លានដើម មានអង្កត់ផ្ចិត១៦អ៊ីង ត្រូវបានរុញចូលទៅក្នុងដី ដើម្បីពង្រឹងគ្រឹះឱ្យមានសុវត្ថិភាព។

បច្ចុប្បន្ន ជប៉ុនកំពុងរៀបចំដំណើរការជួសជុល និងពង្រីកស្ថានីយលេខ១(Terminal 1) ក្នុងគោលបំណងពង្រីកសមត្ថភាពទទួលជើងហោះហើរអន្តរជាតិ និងកែលម្អបទពិសោធន៍អ្នកដំណើរ។ នៅពេលការពង្រីកត្រូវបានបញ្ចប់រួចរាល់ នៅឆ្នាំ២០២៦ អាកាសយានដ្ឋានអន្តរជាតិ Osaka Kansai នឹងអាចផ្ទុកអ្នកដំណើរបាន៤០លាននាក់ក្នុងមួយឆ្នាំ៕ ប្រភព: Simple Flying៕

ដោយៈ ច្រាយ ចំណាន

ប្រទេសចិនៈ ប្រទេសចិនបានរៀបចំ ពិព័រណ៍អន្តរជាតិក្រុងសៀមិន ក្នុងព្រឹត្តិការណ៍ពិព័រណ៍ CIFIT លើកទី២៤ ដែលព្រឹត្តិការណ៍នេះ មានការចូលរួមពីឥស្សរជនសំខាន់ៗ ពីប្រមា​ណ៣០ប្រទសជុំវិញពិភពលោក។

គណៈប្រតិភូកម្ពុជា ដឹកនាំដោយលោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី៨ ខែកញ្ញា ឆ្នាំ២០២៤ បានចុះទស្សនកិច្ចមជ្ឈមណ្ឌលសន្និបាត និងពិព័រណ៍អន្តរជាតិក្រុងសៀមិន (Xiamen International Convention and Exhibition Center) ក្រោយបានចូលរួម “ពិព័រណ៍អន្តរជាតិចិនលើកទី២៤ សម្រាប់ការវិនិយោគ និងពាណិជ្ជកម្ម” (The 24th China International Fair for Investment and Trade) ឬ (CIFIT លើកទី២៤) ដែលរៀបចំឡើងនៅទីក្រុងសៀមិន ខេត្តហ្វូជៀន សាធារណរដ្ឋប្រជាមានិតចិន។