ដោយ: គង់ លាងហួរ
អន្តរជាតិ: មន្ត្រីយោធាកំពូលមួយរូបរបស់សហភាពអឺរ៉ុប (EU) បានលើកឡើងថា វាជារឿងសមហេតុផល ប្រសិនបើយើងបញ្ជូនកងទ័ពពីបណ្តាប្រទេសជាសមាជិកសហភាពអឺរ៉ុបទៅការពារតំបន់ Greenland របស់ប្រទេសដាណឺម៉ាក។

លោក Robert Brieger ប្រធានគណៈកម្មាធិការយោធាសហភាពអឺរ៉ុប ដែលជាស្ថាប័នយោធាជាន់ខ្ពស់បំផុតរបស់ EU បានថ្លែងប្រាប់កាសែតអាល្លឺម៉ង់ Welt am Sonntag ថា “បច្ចុប្បន្ន កងកម្លាំងអាមេរិកបានឈរជើងនៅក្នុងតំបន់ Greenland។ តាមទស្សនៈរបស់ខ្ញុំ វាជារឿងសមហេតុផលណាស់ដែលយើងត្រូវពិចារណាដាក់ទាហាន EU ឈរជើងនៅទីនោះដែរ”។

លោក Brieger បានបញ្ជាក់នៅក្នុងបទសម្ភាសន៍ថា “ការធ្វើបែបនោះនឹងបញ្ជូនសញ្ញាដ៏រឹងមាំមួយ ហើយអាចរួមចំណែកដល់ស្ថិរភាពនៅក្នុងតំបន់”។

ទោះ​បីជា​យ៉ាង​ណាក្តី លោក​បាន​បញ្ជាក់បន្ថែម​ថា​​ ទី​បំផុត នេះ​ជា​ការ​សម្រេច​ចិត្ត​ខាង​នយោបាយ​ ដែល​ផលប្រយោជន៍​ជា​ច្រើននឹងត្រូវ​បាន​គេយក​មក​គិតគូរពិចារណា។

ប្រធានាធិបតីអាមេរិក លោក Donald Trump បានប្រកាសម្តងហើយម្តងទៀតថា សហរដ្ឋអាមេរិកនឹងចូលកាន់កាប់តំបន់ Greenland ខណៈលោកមិនបានបដិសេធចំពោះលទ្ធភាពនៃការប្រើប្រាស់កម្លាំងយោធាដើម្បីសង្គ្រប់យកតំបន់ Greenland នោះទេ។

កាលពីថ្ងៃសៅរ៍សប្តាហ៍មុនលោក Trump បានថ្លែងប្រាប់ក្រុមអ្នកយកព័ត៌មាននៅលើយន្តហោះ Air Force One ថា “ខ្ញុំជឿថា ទីក្រុងវ៉ាស៊ីនតោននឹងទទួលបានតំបន់ Greenland ហើយប្រជាជនចំនួន៥៧.០០០នាក់នៅលើកោះនេះចង់នៅជាមួយយើង”។

ឆ្លើយតបនឹងការលើកឡើងបែបនេះរបស់លោក Trump នាយករដ្ឋមន្ត្រីដាណឺម៉ាកលោកស្រី Mette Frederiksen និងថ្នាក់ដឹកនាំកំពូលរបស់តំបន់ Greenland លោក Múte B. Egede បានទទូចថា “តំបន់ Greenland មិនមែនសម្រាប់ដាក់លក់ទេ ហើយប្រជាជននៅលើកោះនេះក៏មិនចង់ក្លាយជាជនជាតិអាមេរិកនោះដែរ”។

យ៉ាងណាមិញ កាលពីថ្ងៃព្រហស្បតិ៍ទី៣០ ខែមករាម្សិលមិញ ប្រទេសបារាំងបានចេញមុខច្រានចោលលទ្ធភាពនៃការបញ្ជូនកងទ័ពទៅកាន់តំបន់ Greenland ដែលជាកោះដ៏ធំបំផុតរបស់ពិភពលោក និងជាតំបន់ស្វយ័ត ដែលមានរដ្ឋាភិបាល និងសភាដាច់ដោយឡែក។

ថ្លែងនៅក្នុងសន្និសីទសារព័ត៌មានប្រចាំសប្តាហ៍ លោក Christophe Lemoine អ្នកនាំពាក្យរបស់ក្រសួងការបរទេសបារាំង បានឆ្លើយតបទៅនឹងសំណួររបស់សារពត៌មាន Anadolu ដោយបញ្ជាក់ថា គោលការណ៍នៃភាពមិនអាចរំលោភបាននៃព្រំដែន និងអធិបតេយ្យភាពនៅតែមានសុពលភាពនៅក្នុងទ្វីបអឺរ៉ុប។

លោកបានបន្ថែមទៀតថា ប្រធានាធិបតីបារាំងលោក Emmanuel Macron និងរដ្ឋមន្ត្រីការបរទេសលោក Jean-Noel Barrot បានរំលឹកឡើងវិញនូវគោលការណ៍នេះទៅកាន់សមភាគីដាណឺម៉ាក ក្នុងអំឡុងដំណើរទស្សនកិច្ចមកកាន់ទីក្រុងប៉ារីសកាលពីដើមសប្តាហ៍នេះ។

អ្នកនាំពាក្យរូបនេះ​បាន​សង្កត់ធ្ងន់​ថា “ការ​បញ្ជូន​យោធាទៅកាន់តំបន់ Greenland ជារឿងមិនអាចទៅរួចឡើយ។ បញ្ហាតែមួយគត់ ដែលស្ថិតក្នុងដៃរបស់យើង ជាការបញ្ជាក់ឡើងវិញនូវកាតព្វកិច្ចគោរពព្រំដែន និងអធិបតេយ្យភាពជាតិ”។

ដំបូងឡើយ នៅឆ្នាំ២០១៩ លោក Trump បានបង្ហាញចំណាប់អារម្មណ៍ ក្នុងការទិញយកដែនកោះ ដែលគ្របដណ្តប់ដោយទឹកកកភាគច្រើន និងមានប្រជាជនរស់នៅត្រឹមតែ៥៧.០០០នាក់ពីប្រទេសដាណឺម៉ាក ម្ដងរួចមកហើយ។ ប៉ុន្តែសំណើនេះត្រូវបានបដិសេធ ។

តើតំបន់ស្វយ័ត Greenland មានសក្តានុពលសំខាន់ៗអ្វីខ្លះ បានជាលោក Trump ប្រាថ្នាក្រសោបយក?។

ចំណាប់អារម្មណ៍របស់លោក Trump កើតចេញពីសារសំខាន់ជាយុទ្ធសាស្ត្រផ្នែកយោធារបស់ Greenland ។ បន្ថែមពីនេះ សហរដ្ឋអាមេរិកបានរក្សាមូលដ្ឋានទ័ពអាកាសអចិន្ត្រៃយ៍នៅទីនោះ ហើយកោះនេះ មានសារៈសំខាន់ខ្លាំងណាស់ សម្រាប់ការត្រួតពិនិត្យចលនាកងទ័ពជើងទឹករុស្ស៊ី ព្រោះតំបន់នេះស្ថិតនៅតាមបណ្តោយផ្លូវសំខាន់រវាងទ្វីបអឺរ៉ុប និងទ្វីបអាមេរិកខាងជើង។

ការពង្រីកវត្តមានយោធាអាមេរិកនៅតំបន់ Greenland រួមទាំងការដំឡើងប្រព័ន្ធរ៉ាដា នឹងពង្រឹងសន្តិសុខរបស់សហរដ្ឋអាមេរិក ដោយរារាំងមិនឱ្យមហាអំណាចផ្សេងទៀតទទួលបានឥទ្ធិពលនៅក្នុងតំបន់។

Greenland ជាតំបន់ភូមិសាស្ត្រមួយផ្នែកនៃអាមេរិកខាងជើង ដែលមានសក្តានុពលខ្លាំងណាស់សម្រាប់ផ្នែកសេដ្ឋកិច្ច។ តំបន់នេះ សម្បូរទៅដោយសារធាតុរ៉ែ ប្រេង និងឧស្ម័នធម្មជាតិ ដោយសារការអភិវឌ្ឍន៍នៅតំបន់នេះមានភាពយឺតយ៉ាវ ដោយសារតែក្ដីព្រួយបារម្ភអំពីបរិស្ថាន រួមទាំងការប្រឆាំងពីក្រុមជនជាតិដើមភាគតិច។

លោហៈធាតុសំខាន់ៗនៅលើដែនដីដ៏អស្ចារ្យនេះ រួមមានដូចជា លីចូម និងសារធាតុរ៉ែកម្រ ដែលមានវត្តមានយ៉ាងច្រើនក្រៃលែង និងចាំបាច់សម្រាប់ការប្រើប្រាស់នៅក្នុងឧស្សាហកម្មនានា ដូចជា រថយន្តអគ្គិសនី និងថាមពលកកើតឡើងវិញ ។

សេដ្ឋកិច្ចនៅតំបន់ Greenland នៅតែពឹងផ្អែកយ៉ាងខ្លាំងលើការនេសាទ ដែលគ្របដណ្តប់ចំនួនជាង៩៥ភាគរយនៃការនាំចេញទំនិញសរុបរបស់ខ្លួន និងការឧបត្ថម្ភធនប្រចាំឆ្នាំពីប្រទេសដាណឺម៉ាក ដែលគ្របដណ្តប់ប្រហែលពាក់កណ្តាលនៃកញ្ចប់ថវិកាសាធារណៈរបស់រដ្ឋាភិបាលដែនកោះនេះ។

ទោះបីជាមានធនធានធម្មជាតិសម្បូរបែបយ៉ាងណាក្តី ក៏តំបន់ Greenland នេះ ប្រឈមមុខនឹងបញ្ហាក្នុងការប្រើប្រាស់សក្តានុពលសេដ្ឋកិច្ចរបស់ខ្លួនឱ្យបានពេញលេញ ដោយសារតែបញ្ហាពាក់ព័ន្ធនឹងបទប្បញ្ញត្តិ និងបញ្ហាបរិស្ថាន៕ប្រភព: Anadolu Agency & Politico៕

ដោយៈ គង់ សូរិយា

    ភ្នំពេញៈ លោកប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំ ពិនិត្យលើវឌ្ឍនភាពការងារ នៃការសិក្សាសមិទ្ធិលទ្ធភាពខ្សែផ្លូវជាតិលេខ៧៨-៥ (ក្រុងបានលុង – កន្ទុយនាគ)។

កិច្ចប្រជុំនេះ ក៏បានពិភាក្សាពីខ្សែផ្លូវអាទិភាពមួយចំនួនទៀតក្នុងភូមិភាគឦសាន នៃព្រះរាជាណាចក្រកម្ពុជា ដើម្បីជំរុញការតភ្ជាប់បណ្តាញហេដ្ឋារចនាសម្ព័ន្ធក្នុងតំបន់ ក្នុងគោលដៅជំរុញកំណើតសេដ្ឋកិច្ច តាមរយៈវិស័យទេសចរណ៍ និងកសិឧស្សាហកម្មជាដើម។

កិច្ចប្រជុំនេះមានការចូលរួមពី ថ្នាក់ដឹកនាំដែលទទួលបន្ទុកការងារ និងមន្រ្តីជំនាញពាក់ព័ន្ធជាច្រើនរូបផងដែរ។

ការសាងសង់ផ្លូវទៅកាន់តំបន់កន្ទុយនាគ ជាការងារអាទិភាពមួយ​របស់រាជរដ្ឋាភិបាល តាមរយៈការវិភាជន៍កញ្ចប់ថវិកាជាតិ បូកជាមួយនឹងវិភាគទានរបស់ប្រជាពលរដ្ឋ ដែលបានចូលរួមជាមួយមូលនិធិរាជរដ្ឋាភិបាលកម្ពុជា ដើម្បីសាងសង់ផ្លូវស្ថិត នៅប្របខ្សែក្រវ៉ាត់ព្រំដែនជាមួយប្រទេសវៀតណាម ក្នុងន័យការពារអធិបតេយ្យ និងបូរណភាពដែនដីកម្ពុជា៕

ដោយ: គង់ លាងហួរ
អន្តរជាតិ: គម្រោងរថភ្លើងក្រោមដីតម្លៃ២០ពាន់លានដុល្លារអាមេរិកនៅកោះបាលីក៏ល្បីល្បាញរបស់ប្រទេសឥណ្ឌូនេស៊ីបានស្ថិតនៅក្នុងសភាពជាប់គាំង ខណៈស្ថានភាពចរាចរណ៍កាន់តែមានសភាពអាប់អួរទៅៗ ដោយសារភ្ញៀវទេសចរណ៍បរទេសបានសម្រុកមកកំសាន្តនៅលើកោះនេះកាន់តែច្រើន។

គម្រោងរថភ្លើងក្រោមដីនេះមានគោលដៅ ដើម្បីកាត់បន្ថយការកកស្ទះនៅភាគខាងត្បូងនៃកោះបាលី ក្រោមការបណ្តាក់ទុនរួមគ្នារវាងវិស័យឯកជនរបស់ប្រទេសឥណ្ឌូនេស៊ី និងក្រុមហ៊ុន China Railway Construction Corp. (CRCC) ដែលគ្រប់គ្រងដោយរដ្ឋអំណាចចិន។

ខ្សែរថភ្លើងក្រោមដីដំណាក់កាលដំបូងនឹងមានចម្ងាយចំនួន១៦គីឡូម៉ែត្រ ដោយតភ្ជាប់អាកាសយានដ្ឋាន Ngurah Rai ទៅកាន់តំបន់រមណីយដ្ឋានឆ្នេរសមុទ្រ Canggu ស្ថិតនៅភាគខាងត្បូងនៃកោះបាលី និងតំបន់ទេសចរណ៍ល្បីៗផ្សេងទៀតស្ថិតនៅឆ្នេរសមុទ្រភាគខាងលិច ដែលទាក់ទាញភ្ញៀវទេសចរណ៍ប្រមាណ១៥លាននាក់ទៅកាន់កោះបាលីជារៀងរាល់ឆ្នាំ។ គម្រោងដំណាក់កាលដំបូងនេះគ្រោងនឹងបញ្ចប់នៅឆ្នាំ២០២៨។

ទោះជាយ៉ាងណាក្តី លោក Luhut Pandjaitan អតីតរដ្ឋមន្ត្រីក្រសួងសម្របសម្រួលកិច្ចការដែនសមុទ្រ និងការវិនិយោគឥណ្ឌូនេស៊ី ធ្លាប់បានអះអាងថា គម្រោងសាងសង់រថភ្លើងក្រោមដីនេះកំពុងស្ថិតក្រោមការសិក្សាលទ្ធភាពនៅឡើយ។

លោក Pandjaitan បញ្ជាក់ថា នាពេលនេះ ឥណ្ឌូនេសុីនឹងផ្តោតលើការតភ្ជាប់អាកាសយានដ្ឋានទៅកាន់តំបន់សេដ្ឋកិច្ចពិសេស Serangan នៅតាមបណ្តោយឆ្នេរភាគអាគ្នេយ៍នៃកោះបាលី ដែលអ្នកអភិវឌ្ឍន៍ចិនគ្រោងនឹងសាងសង់រមណីយដ្ឋានទំហំ៤៨០ហិកតានៅទីនោះ រួមមានដូចជាទីលានវាយកូនហ្គោល និងសណ្ឋាគារប្រណីត។

ភាពមិនច្បាស់លាស់បានកើតមានឡើងបន្ថែមទៀត ដោយសារក្រសួងសម្របសម្រួលកិច្ចការសមុទ្រ និងវិនិយោគរបស់លោក Pandjaitan ត្រូវបានលុបចោលនៅថ្ងៃទី២០ ខែតុលាឆ្នាំ២០២៤។ បច្ចុប្បន្ននេះ លោក Pandjaitan មានតួនាទីត្រឹមតែជាទីប្រឹក្សាក្រោមរដ្ឋបាលថ្មីរបស់ប្រធានាធិបតីឥណ្ឌូនេស៊ីលោក Prabowo Subianto ។

ចំណែក​ លោកប្រធានាធិបតី Prabowo ​Subianto រហូត​មក​ទល់ពេល​នេះ​បាន​បង្ហាញ​ការ​ខ្នះខ្នែង​ក្នុង​ការ​អនុវត្ត​ន៍គោលនយោបាយ​​​ផ្តល់​អាហារ​ដោយ​ឥត​គិត​ថ្លៃ​ដល់​សិស្ស​សាលា និង​ការ​សាងសង់​លំនៅដ្ឋានសាធារណៈ​បន្ថែម​ទៀត។

លោក Prabowo មិន​ទាន់បានមានប្រសាសន៍អ្វីទាល់តែសោះអំពី​គម្រោង​រថភ្លើង​ក្រោម​ដី​របស់កោះ​បាលី​នៅ​ឡើយ​ទេ។

ដោយឡែក ក្រុមមន្ត្រីនៅក្រសួងដឹកជញ្ជូន និងក្រសួងវិនិយោគឥណ្ឌូនេស៊ីបានផ្តល់ចម្លើយមិនច្បាស់លាស់ នៅពេលសារពត៌មាន Nikkei Asia សាកសួរអំពីគម្រោងតម្លៃ២០ពាន់លានដុល្លារមួយនេះ។

អ្នកនាំពាក្យក្រសួងដឹកជញ្ជូនឥណ្ឌូនេស៊ី លោក Mohamad Risal Wasal បានអះអាងថា “យើងបានបង្ហាញគម្រោងនេះដល់បណ្តាវិនិយោគិនក្នុងស្រុក និងបរទេស”។ ចំណែក លោក Rosan Roeslani រដ្ឋមន្ត្រី​ក្រសួង​វិនិយោគ​ឥណ្ឌូនេស៊ីបាន​បន្ថែម​ថា “នេះមិន​មែន​ជា​រឿង​របស់​ខ្ញុំ​ទៀត​ទេ”៕ប្រភព: Nikkei Asia៕

ដោយៈ សហសេវិក

    អាមេរិកៈ ជាទ្វីបពោរពេញដោយភាពក្រីក្រ ទុរភឹក្ស និងអំពើពុករលួយរបស់មេដឹកនាំ។

    មេដឹកនាំអាមេរិក ដែលជាប្រធានាធិបតីទី៤៧របស់មហាអំណាចនេះ បានសួរសំណួរចំនួន៥ ទៅកាន់មេដឹកនាំបណ្តាប្រជាជាតិអាហ្រ្វិក ដើម្បីឲ្យពួកគេភ្ញាក់ពីដំណេក។

សំណួរទាំងនោះមានដូចជា

ទី១ បើក្រោយពីបានឯករាជ្យ៥០ឆ្នាំពួកអ្នកឯង មិនបានកសាងហេដ្ឋារចនាសម្ព័ន្ធ ជាតម្រូវការប្រើប្រាស់របស់ប្រជាពលរដ្ឋ​ តើអ្នកឯងសមជាមនុស្សទេ?

ទី២  បើអ្នកឯងអង្គុយលើមាស​ពេជ្រ​ ប្រេង​ អ៊ុយរ៉ាញូម​ ដែក​ ស្ព័ន​ ប្រាក់​ ម៉ាញេស្យូម​ ឧស្ម័នហ្គាស​ តែប្រជាជនអ្នកឯងនៅតែរកបាយហូបមិនបាន មានបញ្ហាសុខភាព និងគ្មានអ្វីទីពឹងសម្រាប់ការរស់នៅ​ មានតែប្រព័ន្ធអប់រំដ៏អន់​ តើអ្នកឯងនៅមានអារម្មណ៍ថាខ្លួនឯងជាមនុស្សទេ?

ទី៣ ដើម្បីក្រាញអំណាច​ អ្នកឯងទិញអាវុធពីបរទេសយកមកបាញ់សម្លាប់ប្រជាជនខ្លួន​ តើអ្នកឯងសមជាមនុស្សទេ?

ទី៤ បើអ្នកឯង ជាមេដឹកនាំបាញ់សម្លាប់ប្រជាជនខ្លួនឯងដូចសត្វធាតុ​ តើចង់ឱ្យនរណាគោរពប្រជាជនទាំងនោះ?

ទី៥ បើអ្នកឯងធ្វើជាចោរលួចប្លន់ធនធានប្រទេសជាតិខ្លួនឯង​ទាំងដែលជនរួមជាតិអ្នកឯង រស់នៅក្រីក្រតោកយ៉ាក​​ គ្មានអាហារគ្រប់គ្រាន់ចម្អែតក្រពះ តើអ្នកឯងសមជាមនុស្សទេ?

ប្រែសម្រួលដោយ​ ព្រះបិតុលា លីវប៉ី

ដោយ: គង់ លាងហួរ
អន្តរជាតិ: យោងតាមប្រភពមួយបានឱ្យដឹងថា រដ្ឋបាលទីក្រុងសុិនជិន(Shenzhen) របស់ប្រទេសចិននឹងអាចធ្វើកិច្ចអន្ដរាគមន៍ជួយសង្គ្រោះក្រុមហ៊ុន China Vanke ដោយអនុញ្ញាតឱ្យក្រុមហ៊ុនអភិវឌ្ឍន៍អចលនទ្រព្យចិនមួយនេះអាចដោះស្រាយបញ្ហាសាច់ប្រាក់។

ក្រុមហ៊ុន China Vanke មានទីស្នាក់ការកណ្តាលនៅទីក្រុងសុិនជិនក្នុងខេត្តក្វាងទុង និងធ្លាប់ជាប់ឈ្មោះជាក្រុមហ៊ុនអភិវឌ្ឍន៍អចលនទ្រព្យធំជាងគេបំផុតទី២របស់ប្រទេសចិន បើគិតពីការលក់អចលនទ្រព្យ។ នាពេលថ្មីៗនេះ ក្រុមហ៊ុន China Vanke បានសម្រេចតែងតាំងលោក Xin Jie ជាប្រធានថ្មីនៃក្រុមហ៊ុនរបស់ខ្លួន។

លោក Xin Jie ក៏មានតំណែងជាប្រធានក្រុមហ៊ុន Shenzhen Metro Group ឬ (SZMC) ដែលជាម្ចាស់ភាគហ៊ុនធំជាងគេរបស់ក្រុមហ៊ុន China Vanke ផងដែរ។នេះបើយោងតាមកាសែត South China Morning Post។

លោក Raymond Cheng នាយកគ្រប់គ្រងនៅក្រុមហ៊ុន CGS International បានមានប្រសាសន៍ឱ្យដឹងថា “ភាពរឹងមាំផ្នែកហិរញ្ញវត្ថុរបស់ម្ចាស់ភាគហ៊ុនដ៏ធំរូបនេះអាចជួយសង្គ្រោះស្រោចស្រង់ក្រុមហ៊ុនអភិវឌ្ឍន៍អចលនទ្រព្យ China Vanke”។

លោក Raymond Cheng បានចង្អុលបង្ហាញថា “ក្រុមហ៊ុន SZMC របស់លោក Xin Jie ត្រូវបានគាំទ្រដោយគណៈកម្មការត្រួតពិនិត្យ និងគ្រប់គ្រងទ្រព្យសកម្មរដ្ឋ ដែលចំណុះក្រោមរដ្ឋបាលទីក្រុងសុិនជិន។ គណៈកម្មការនេះមានចំនួនទ្រព្យសកម្មជាង៥ទ្រីលានយ័ន(ប្រហែល៦៨៩ពាន់លានដុល្លារ)”។

ចំណែកឯ ក្រុមហ៊ុន SZMC មានទំហំទ្រព្យសកម្មផ្ទាល់ខ្លួនចំនួន៨០០ពាន់លានយ័ន(ប្រហែល១១១,៥៧ពាន់លានដុល្លារអាមេរិក)។

លោក Cheng បានបន្ថែមថា “ការជួយសង្គ្រោះនេះអាចនាំឱ្យមានការផ្លាស់ប្តូរជាវិជ្ជមានចំនួន៣យ៉ាងសម្រាប់ក្រុមហ៊ុន Vanke”។

ចំណុចវិជ្ជមានទី១: ការជួយសង្គ្រោះនេះអាចនាំឱ្យស្ថាប័នហិរញ្ញវត្ថុនានាមានទំនុកចិត្តឡើងវិញក្នុងការផ្តល់ប្រាក់កម្ចីបន្ថែមទៀតដល់ក្រុមហ៊ុន Vanke។

ចំណុចវិជ្ជមានទី២: ក្រុមហ៊ុន Vanke អាចបន្ទាបអត្រានៃការបញ្ចុះតម្លៃលើការលក់អចលនទ្រព្យរបស់ខ្លួន ខណៈចំណុចវិជ្ជមានទី៣: ការជួយសង្គ្រោះនេះនឹងជំរុញឱ្យអ្នកទិញផ្ទះមានទំនុកចិត្តមកលើគម្រោងអភិវឌ្ឍន៍របស់ក្រុមហ៊ុន Vanke៕ប្រភព: SCMP៕