ដោយ: គង់ លាងហួរ
អន្តរជាតិ: ក្រុមហ៊ុន Ho Bee Land របស់មហាសេដ្ឋីសិង្ហបុរីលោក Chua Thian Poh គ្រោងបោះទុនទិញយកក្រុមហ៊ុនអភិវឌ្ឍន៍អចលនទ្រព្យអូស្ត្រាលី AVJennings ក្នុងតម្លៃ៣៩១លានដុល្លារអូស្រ្តាលី (ប្រហែល២៤២លានដុល្លារអាមេរិក)។

ក្រុមហ៊ុន Ho Bee Land បានដេញថ្លៃភាគហ៊ុនរបស់ក្រុមហ៊ុនអូស្ត្រាលី AVJennings ក្នុងតម្លៃចំនួន០,៧០ដុល្លារអូស្ត្រាលីក្នុងមួយហ៊ុន ដែលខ្ពស់ជាងការដេញថ្លៃចំនួន០,៦៧ដុល្លារអូស្ត្រាលីក្នុងមួយហ៊ុន ពីសំណាក់ក្រុមហ៊ុនអភិវឌ្ឍន៍អចលនទ្រព្យអាមេរិក Proprium Capital Partners។

ក្រុមហ៊ុន Ho Bee Land បានគូសបញ្ជាក់ឱ្យដឹងនៅក្នុងសេចក្តីថ្លែងការណ៍មួយថា “ការដាក់សំណើរដេញថ្លៃនាពេលនេះជាឱកាសដ៏ល្អមួយសម្រាប់ក្រុមហ៊ុនរបស់យើងក្នុងការបង្កើនទំហំវិនិយោគ និងផលបត្ររបស់ខ្លួននៅក្នុងប្រទេសអូស្ត្រាលី”។

សេចក្តីថ្លែងការណ៍បានបន្ថែមថា ការច្របាច់បញ្ចូលគ្នារវាងក្រុមហ៊ុនអចលនទ្រព្យអូស្ត្រាលី និងសិង្ហបុរី នឹងជួយសម្រេចបាននូវស្ថានភាពហិរញ្ញវត្ថុកាន់តែរឹងមាំ ព្រមទាំងបង្កើនសក្តានុពលក្នុងការស្វែងរកប្រាក់ចំណូល និងពង្រឹងសមត្ថភាពប្រកួតប្រជែងនៅក្នុងទីផ្សារក្នុងស្រុក។

បច្ចុប្បន្ន ក្រុមហ៊ុនសិង្ហបុរី Ho Bee Land បានកាន់កាប់ចំណែកភាគហ៊ុនចំនួន៥,៤៩ភាគរយនៃក្រុមហ៊ុនអូស្ត្រាលី AVJennings រួចមកហើយ ខណៈដែលពេលនេះ ក្រុមហ៊ុន Ho Bee Land គ្រោងទិញយកភាគហ៊ុនទាំងអស់ពីក្រុមហ៊ុន AVJennings។

យោងតាមទស្សនាវដ្ដី Forbes បានឱ្យដឹងថា ក្រុមហ៊ុន Ho Bee Land មានទំហំផលបត្រអចលនទ្រព្យតម្លៃ៧ពាន់លានដុល្លារសិង្ហបុរី(ប្រហែល៥,១ពាន់លានដុល្លារអាមេរិក) ដូចជាអគារការិយាល័យនៅក្នុងប្រទេសសិង្ហបុរី និងទីក្រុងឡុងដ៍ ព្រមទាំងគម្រោងលំនៅដ្ឋាននៅក្នុងប្រទេសអូស្ត្រាលីផងដែរ៕ប្រភព: Vnexpress៕

ដោយ: គង់ លាងហួរ
អន្តរជាតិ: អ្នកវិភាគមួយរូបបានលើកឡើងថា ប្រទេសវៀតណាមមានសក្តានុពលក្នុងការប្រែក្លាយខ្លួនជាមជ្ឈមណ្ឌលហិរញ្ញវត្ថុអន្តរជាតិ ស្រដៀងទៅនឹងប្រទេសស្វីស ប្រទេសសិង្ហបុរី និងប្រទេសអេមីរ៉ាត់អារ៉ាប់រួម។

លោក Roger Leitner ប្រធាន និងជានាយកប្រតិបត្តិនៃសភាពាណិជ្ជកម្មអាស៊ី-ស្វីសបានអះអាងថា វៀតណាមអាចសម្រេចបានគោលដៅនេះ តាមរយៈការបើកចំហទីផ្សាររបស់ខ្លួនដល់ស្ថាប័នហិរញ្ញវត្ថុនានានៅលើពិភពលោក ដើម្បីចូលរួមដល់ការអភិវឌ្ឍន៍ទីផ្សារទ្រព្យសកម្មឌីជីថល និងជំរុញកិច្ចសហប្រតិបត្តិការជាមួយធនាគារឯកជនក្នុងស្រុក។

ការ​អត្ថាធិប្បាយ​នេះ​បាន​ធ្វើ​ឡើង​ក្នុង​អំឡុង​កិច្ច​ពិភាក្សា​ស្តីអំពី​ការ​វិនិយោគ​បច្ចេកវិទ្យា​ជាន់ខ្ពស់​នៅក្នុងប្រទេស​វៀតណាម​ ដែល​បានរៀបចំ​ឡើងនៅ​ទីក្រុង Davos ប្រទេស​ស្វីស និងជា​ផ្នែក​មួយ​នៃ​វេទិកា​សេដ្ឋកិច្ច​ពិភពលោក​។ ការពិភាក្សានេះបានទទួលការចូលរួមពីអ្នកតំណាងក្រុមហ៊ុនជាង៣០ស្ថាប័នមកពីជុំវិញពិភពលោក។

ផែនការរបស់ប្រទេសវៀតណាមក្នុងការបង្កើតមជ្ឈមណ្ឌលហិរញ្ញវត្ថុអន្តរជាតិនៅក្នុងទីក្រុងហូជីមិញ និងទីក្រុងដាណាង (Da Nang) នៅឆ្នាំ២០២៥ ក្លាយជាប្រធានបទដ៏សំខាន់មួយក្នុងចំណោមប្រធានបទផ្សេងទៀតក្នុងកិច្ចពិភាក្សាខាងលើ។ ផែនការនេះមានគោលបំណងដាក់ប្រទេសវៀតណាមជាគោលដៅហិរញ្ញវត្ថុឈានមុខគេមួយក្នុងតំបន់ និងសកលលោក។

លោក Nguyen Chi Dung រដ្ឋមន្ត្រីក្រសួងផែនការ និងវិនិយោគបានសង្កត់ធ្ងន់លើការប្តេជ្ញាចិត្តរបស់វៀតណាមក្នុងការបង្កើតមជ្ឈមណ្ឌលហិរញ្ញវត្ថុស្របតាមស្តង់ដារពិភពលោក និងមានសមត្ថភាពប្រកួតប្រជែងកាន់តែខ្ពស់។

លោក​ Nguyen បាន​ថ្លែង​ថា​ “យើង​មាន​គោលបំណង​ផ្តល់​ជូននូវ​អ្វី​ទាំងអស់ ដែល​ក្រុមអ្នក​វិនិយោគ​ត្រូវ​ការ​ ឱ្យលើសពីអ្វីដែលប្រទេស​វៀតណាម​មាន​”។

ក្រសួងបានស្នើឱ្យមានការសាកល្បងសកម្មភាពបច្ចេកវិទ្យាហិរញ្ញវត្ថុ (fintech) រួមទាំងទ្រព្យសកម្មឌីជីថល និងការជួញដូររូបិយបណ្ណគ្រីបតូ នៅក្នុងមជ្ឈមណ្ឌលហិរញ្ញវត្ថុនានាដូចជាទីក្រុងហូជីមិញ និងទីក្រុងដាណាង។

ជាមួយគ្នានេះ រដ្ឋាភិបាលវៀតណាមបានកំណត់យកវិស័យវិទ្យាសាស្ត្រ និងបច្ចេកវិទ្យាជាកត្តាជំរុញដ៏សំខាន់នៃគោលដៅកំណើនសេដ្ឋកិច្ចរបស់ប្រទេសវៀតណាមក្នុងរយៈពេលប៉ុន្មានឆ្នាំខាងមុខ។

លោក Truong Gia Binh ប្រធានក្រុមហ៊ុនបច្ចេកវិទ្យាខ្នាតយក្សរបស់វៀតណាម FPT បានមានប្រសាសន៍ឱ្យដឹងថា ប្រទេសនេះនឹងសម្រេចបាននូវគោលដៅរបស់ខ្លួន ដោយបង្កើនការប្រើប្រាស់បច្ចេកវិទ្យាបញ្ញាសិប្បនិម្មិត (AI) ការផ្លាស់ប្តូរឌីជីថល បន្ទះឈីប និងការអប់រំ។

លោក Binh បានបន្ថែមថា វៀតណាមមានសក្តានុពលក្នុងការរីកចម្រើនផ្នែកបច្ចេកវិទ្យា ដោយលោកបានលើកឡើងពីការសម្រេចចិត្តនាពេលថ្មីៗនេះរបស់ក្រុមហ៊ុនខ្នាតយក្សសហរដ្ឋអាមេរិក Nvidia ក្នុងការបោះទុនវិនិយោគនៅក្នុងប្រទេសវៀតណាម។

ជាក់ស្ដែង ក្រោយពីបានទិញយកក្រុមហ៊ុន VinBrain ដែលជាបុត្រសម្ព័ន្ធមួយរបស់ក្រុមហ៊ុនវៀតណាម Vingroup រួចមក ក្រុមហ៊ុនអាមេរិក Nvidia គ្រោងនឹងបង្កើតមជ្ឈមណ្ឌលសិក្សាស្រាវជ្រាវ និងការអភិវឌ្ឍន៍ AI និងបង្កើតមជ្ឈមណ្ឌលទិន្នន័យនៅក្នុងប្រទេសវៀតណាម។

ជាមួយគ្នានេះ ក្រុមហ៊ុនបារាំង Schneider Electric ដែលមានឯកទេសខាងស្វ័យប្រវត្តិកម្មឌីជីថលក៏បានបង្ហាញចំណាប់អារម្មណ៍ក្នុងការសហការជាមួយក្រុមហ៊ុន Nvidia ដើម្បីបង្កើតមជ្ឈមណ្ឌលទិន្នន័យនៅក្នុងប្រទេសវៀតណាមផងដែរ៕ប្រភព: Vnexpress៕

ដោយ: គង់ លាងហួរ
អន្តរជាតិ: ប្រទេសឥណ្ឌា និងប្រទេសជប៉ុន គ្រោងនឹងដាក់ឱ្យប្រើប្រាស់នូវរថភ្លើងល្បឿនលឿនប្រភេទ Shinkansen សេរ៊ីថ្មីចុងក្រោយបង្អស់ឈ្មោះ “E10” ក្នុងពេលដំណាលគ្នានៅចន្លោះឆ្នាំ២០២៩ ឬឆ្នាំ២០៣០ខាងមុខ។

គម្រោងដាក់ឱ្យប្រើប្រាស់រថភ្លើង Shinkansen E10 នេះសរបង្ហាញឱ្យឃើញពីការបោះជំហានឆ្ពោះទៅមុខយ៉ាងលឿនរបស់ឥណ្ឌានៅក្នុងវិស័យបច្ចេកវិទ្យារថភ្លើងល្បឿនលឿន។

ការអភិវឌ្ឍន៍ជាយុទ្ធសាស្ត្រនេះក៏បង្ហាញពីកិច្ចសហការយ៉ាងស៊ីជម្រៅរវាងប្រទេសឥណ្ឌា និងជប៉ុន នៅក្នុងគម្រោងរថភ្លើងល្បឿនលឿនតភ្ជាប់រវាងទីក្រុង Ahmedabad និងទីក្រុងបុមបៃ ដែលជាគម្រោងប្រកបដោយមហិច្ឆិតារបស់រដ្ឋាភិបាលឥណ្ឌា។

ដើមឡើយ ប្រទេសឥណ្ឌាគ្រោងអភិវឌ្ឍន៍រថភ្លើង Shinkansen សេរ៊ី E5 ដែលមានល្បឿនអតិបរមាចំនួន៣២០គីឡូម៉ែត្រក្នុងមួយម៉ោង។ប៉ុន្តែ ក្រោយមក រដ្ឋាភិបាលឥណ្ឌាបានឯកភាពចំពោះការសិក្សាដាក់ឱ្យប្រើប្រាស់រថភ្លើង Shinkansen សេរ៊ី E10 ដែលមានល្បឿនអតិបរមាចំនួន៤០០គីឡូម៉ែត្រក្នុងមួយម៉ោង។

រថភ្លើងល្បឿនលឿន Shinkansen ស៊េរី E5 ជារថភ្លើងរបស់ប្រទេសជប៉ុន ដែលដំណើរការដោយក្រុមហ៊ុន East Japan Railway Company ដោយបានរត់នៅលើផ្លូវដែក“Tohoku Shinkansen” ចាប់តាំងពីថ្ងៃទី៥ ខែមីនា ឆ្នាំ២០១១។

ជាមួយគ្នានេះ ការបង្ហាញឆន្ទៈរបស់ប្រទេសជប៉ុនក្នុងការដាក់ឱ្យប្រើប្រាស់ Shinkansen សេរ៊ី E10 ក្នុងពេលដំណាលគ្នាជាមួយប្រទេសឥណ្ឌា សរបង្ហាញពីការផ្លាស់ប្តូរជាប្រវត្តិសាស្ត្រក្នុងនវានុវត្តន៍នៃផ្លូវដែកល្បឿនលឿន។

ឥណ្ឌាត្រូវបានគេរំពឹងថា នឹងទទួលបានរថភ្លើង Shinkansen សេរ៊ី E10 ចំនួន២គ្រឿង។ សមិទ្ធិផលនេះជាការបោះជំហានយ៉ាងធំមិនធ្លាប់មានពីមុនមកសម្រាប់ឥណ្ឌា និងបង្ហាញពីកិច្ចសហការកាន់តែស៊ីជម្រៅរវាងឥណ្ឌា និងជប៉ុនក្នុងការធ្វើសមាហរណកម្មផ្នែកបច្ចេកវិទ្យាផ្លូវដែកទំនើប៕ប្រភព: Business Standard៕

ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃក្នុងការជួញដូរនៅព្រឹកថ្ងៃសុក្រនេះ ខណៈប្រាក់ដុល្លារអាមេរិកបានធ្លាក់ថ្លៃចុះវិញ បន្ទាប់ពីប្រធានាធិបតីអាមេរិកលោក ដូណាល់ ត្រាំ បានបន្ទន់គោលជំហរចំពោះការយកពន្ធលើទំនិញរបស់ប្រទេសចិន។

តួយ៉ាង តម្លៃមាស Spot Gold បានងើបឡើង០,៦៧ភាគរយដល់ជាង២.៧៧២ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,៥២ភាគរយដល់២៧៧៩,៤០ដុល្លារក្នុងមួយអោនគិតត្រឹមម៉ោង១០:៣៩នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៤៥,២ភាគរយ ដែលធនាគារកណ្តាលអាមេរិក (Fed) នឹងអាចបញ្ចុះអត្រាការប្រាក់របស់ខ្លួនចំនួន០,២៥ភាគរយក្នុងកិច្ចប្រជុំគោលនយោបាយនៅថ្ងៃទី១៨ ខែមិថុនាខាងមុខ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានធ្លាក់ថ្លៃចុះដល់១០៧,៨៤ពិន្ទុនៅព្រឹកថ្ងៃសុក្រនេះ បន្ទាប់ពីបានបិទការជួញដូរត្រឹម១០៨,០៥ពិន្ទុកាលពីថ្ងៃព្រហស្បតិ៍ម្សិលមិញ។

ចំណែក តម្លៃលោហៈធាតុប្រាក់ Spot silver បានងើបឡើង១,១៩ភាគរយដល់៣១,២១ដុល្លារក្នុងមួយអោន ខណៈតម្លៃផ្លាទីនបានងើបឡើង០,៨១ភាគរយដល់៩៧៨,៣ដុល្លារក្នុងមួយអោន ហើយតម្លៃ palladium បានងើបឡើង០,៩១ភាគរយដល់១.០២៨ដុល្លារក្នុងមួយអោនគិតត្រឹមម៉ោង១០:៤២នាទីព្រឹក៕

ដោយៈ ច្រាយ ចំណាន

    ព្រះសីហនុៈ គម្រោងវិនិយោគ និងធុរកិច្ច៤២ទៀត ក្រោមទុនវិនិយោគ៥៦៤ លានដុល្លារអាមេរិក ក្នុងខេត្តព្រះសីហនុ ទទួលបានការលើកទឹកចិត្តពិសេស។

ព័ត៌មាននេះត្រូវបានលើកឡើងកាលពីថ្ងៃទី២៣ មករា ឆ្នាំ២០២៥ ក្រោមការដឹកនាំកិច្ចប្រជុំស្តីពី ការវាយតម្លៃ​លើការស្នើសុំការលើកទឹកចិត្ត និងអនុគ្រោះនានាក្រោមវិសាលភាពរបស់ “កម្មវិធីពិសេសជំរុញការវិនិយោគ ក្នុងខេត្តព្រះសីហនុ ឆ្នាំ២០២៤” ក្រោមអធិបតីភាព លោកបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារជំរុញការវិនិយោគខេត្តព្រះសីហនុ ដោយមានការអញ្ជើញចូលរួមពីតំណាងក្រសួង ស្ថាប័នពាក់ព័ន្ធ នៅទីស្តីការក្រសួងសេដ្ឋកិច្ច​​ និងហិរញ្ញវត្ថុ។

អភិបាលរងខេត្តព្រះសីហនុ លោកឡុង ឌីម៉ង់បានលើកឡើងថា ចាប់ពីត្រីមាសទី៤ នៃឆ្នាំ២០២៤ ពោលគឺដើមអាណត្តិដឹកនាំរបស់រាជរដ្ឋាភិបាលកម្ពុជា នីតិកាលទី៧នៃរដ្ឋសភា ដែលមានសម្ដេចធិបតី ហ៊ុន ម៉ាណែត ជានាយករដ្ឋមន្ត្រី យើងឃើញមានកំណើនគួរកត់សម្គាល់ពីវិនិយោគិនក្នុងស្រុក និងបរទេស ដែលជាសញ្ញាណវិជ្ជមានចំពោះបរិយាកាសវិនិយោគនៅកម្ពុជា និងខេត្តព្រះសីហនុ និយាយជារួម និងដោយឡែក។

ជាលទ្ធផល អង្គប្រជុំបានសម្រេចជាគោលការណ៍ ផ្តល់ការលើកទឹកចិត្តពិសេស ចំនួន៤២គម្រោង ក្នុងនោះ គម្រោងពាក់ព័ន្ធនឹងអគារជាប់គាំងចំនួន១៥ គម្រោងថ្មីចំនួន១២ ការពង្រីកគម្រោងចំនួន៣ និង គម្រោងពុំពាក់ព័ន្ធនឹងអគារជាប់គាំង១២គម្រោង ដែលមានទុនវិនិយោគសរុប៥៦៥លានដុល្លារអាមេរិក និងអាចបង្កើតការងារប្រមាណ ៧.៣០៨កន្លែង មានជាអាទិ៍៖ គម្រោងភណ្ឌាគារគយមានដែនកំណត់គម្រោងផ្ទះលំហែនៅកោះរ៉ុងសន្លឹម។ គម្រោងរមនីយដ្ឋាន អេកូកសិទេសចរណ៍ គម្រោងសួនឧស្សាហកម្ម គម្រោងសណ្ឋាគារ និង គម្រោងអគារពហុមុខងារ ។

លោកបណ្ឌិតសភាចារ្យ ប្រធានក្រុមការងារ បានវាយតម្លៃខ្ពស់ចំពោះការចូលរួម ការគាំទ្រ ការប្តេជ្ញា និង ឆន្ទៈខ្ពស់របស់ក្រុមការងារ និង ក្រសួងស្ថាប័នពាក់ព័ន្ធ ជាពិសេសអាជ្ញាធរមូលដ្ឋាន គឺរដ្ឋបាលខេត្តព្រះសីហនុ បានរួមគ្នាជាធ្លុងមួយ ក្រោមការដឹកនាំ និងដំបូលតែមួយរបស់ សម្តេចធិបតីនាយករដ្ឋមន្រ្តី ក្នុងការបំពេញភារកិច្ច ដោយមានកិច្ចសហការ និង ការទទួលខុសត្រូវខ្ពស់ ស្របតាមអភិក្រម “ជវភាពនៃប្រព័ន្ធតួអង្គតែមួយ” ពិសេសការធ្វើដំណើរឆ្ពោះទៅរកភាពជាម្ចាស់ និងការបំពេញមុខងារជារដ្ឋបាលពិសេស ក្នុងការគ្រប់គ្រងរដ្ឋបាលតំបន់សេដ្ឋកិច្ចគំរូពហុបំណង៕

ដោយៈ គង់ សូរិយា

ភ្នំពេញៈ អគ្គលេខាធិការដ្ឋាននៃគណៈកម្មាធិការជាតិគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជា បានប្រារពពិធីប្រកាសនិ ងប្រគល់ជ័យលាភី កម្មវិធីប្រកួតប្រជែងស្នាដៃ រចនាគម្រោងប្លង់នគរូបនីយកម្ម តំបន់ឆ្នេរសមុទ្រកម្ពុជាក្រោមប្រធានបទ “កម្ពុជាមាតុភូមិខ្ញុំ ទីក្រុងខ្ញុំ ឆ្នេរសមុទ្រខ្ញុំ ក្នុងបេះដូងខ្ញុំ”។

ពិធីនេះក៏បានប្រកាសការប្រឡងប្រណាំងឆ្នេរខ្សាច់ កម្សាន្តស្អាតលើកទី៥ និងព្រែកកម្សាន្តស្អាតលើកទី២ ឆ្នាំ២០២៤។

លោកឧបនាយករដ្ឋមន្រ្តីសាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា កិច្ចការនេះជាការចូលរួមចំណែកដ៏ប្រពៃបំផុត ជាពន្លកសង្គមថ្មី ជាអ្នកបន្តវេន ក្នុងការរួមគិត ក្នុងដំណើរកសាង និងអភិវឌ្ឍមាតុភូមិកម្ពុជា របស់យើង ឱ្យបានរៀបរយ ខ្ជាប់ខ្ជួន ស្របតាមអនុសាសន៍ដឹកនាំដ៏ត្រឹមត្រូវ ប្រកបដោយគតិបណ្ឌិតរបស់ សម្តេចមហាបវរធិបតីហ៊ុន ម៉ាណែតនាយករដ្ឋមន្ត្រីនៃកម្ពុជា។

លោកបបញ្ជាក់ថា “ទន្ទឹមនេះ ខ្ញុំសូមគាំទ្រលើកទឹកចិត្ត ដល់ថ្នាក់ដឹកនាំគ្រប់ស្ថាប័នពាក់ព័ន្ធ និងសហការីទាំងអស់ បន្តចូលរួមចលនារៀបចំ របៀងសេដ្ឋកិច្ចរបស់ខេត្តតាមបណ្តោយឆ្នេរសមុទ្រ ឱ្យបានសកម្ម ដោយសហការជាមួយគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា មិនមែនត្រឹមការអភិវឌ្ឍតាមសក្តានុពល របស់ឆ្នេរតែម្យ៉ាងនោះទេ គឺក្រុង-ខេត្តជារួម ដើម្បីបង្កើតបរិយាកាស និងលក្ខខណ្ឌប្រកប ដោយផ្តើមចេញពីការគិតគូរ រៀបចំជាទស្សនីយភាព ឬបទពិសោធន៍ថ្មីនិងប្លែក ដើម្បីពង្រីកសក្តានុពលទេសចរណ៍ ប្រចាំទីតាំងរបស់ខ្លួនឱ្យកាន់តែល្អប្រសើរ ទាក់ទាញចំណាប់អារម្មណ៍ជាងមុន មានជម្រើស និងរសនិយមសម្បូរបែប សម្រាប់ភ្ញៀវទេសចរមកលម្ហែកម្សាន្ត”។

បន្ថែមលើកត្តាសុខសន្តិភាព ជាលក្ខខណ្ឌមូលដ្ឋានដែលមាននាពេលបច្ចុប្បន្ន សូមបន្តគាំទ្រដល់ការគិតគូរពង្រឹងសុវត្ថិភាព សុខុមាលភាព រួមមាន បញ្ហាសំណល់រឹង-រាវ អនាម័យ សណ្តាប់ធ្នាប់ របៀបរៀបរយ បន្តថែទាំ និងពង្រឹងគុណភាពសេវាកម្មចាំបាច់ មានជាអាទិ៍ ទីកន្លែងស្នាក់នៅក្នុងតម្លៃសមរម្យ ម្ហូបអាហារប្រកបដោយ​ឱជារសមានអនាម័យ  សេវាអ៉ីនធើណេតល្អ ដោយចាត់ទុកកិច្ចការទាំងនេះ ជាការងារចាំបាច់ត្រូវគិតគូរ បំពេញបន្ថែមជាប្រចាំ សំដៅលើកកម្ពស់ខឿនសេដ្ឋកិច្ចតាមតំបន់ឆ្នេរ បង្កើតឱកាសការងារ បង្កើនប្រាក់ចំណូល ជាគុណតម្លៃនៃការរៀបចំសង្គម ទៅអនាគតមួយឆ្ពោះទៅមុខ ក្រោមមាគ៌ាដឹកនាំដ៏ត្រឹមត្រូវ៕