ដោយៈ ម៉ាណា

   ភ្នំពេញៈ លោកតូច ចាន់កុសល រដ្ឋលេខាធិការ ក្រសួងសាធារណការ និងដឹកជញ្ជូន អញ្ជើញជាអធិបតីកិច្ចប្រជុំពិនិត្យ និងពិភាក្សាលើសេចក្តីព្រាងរបាយការណ៍ចុងក្រោយ (Draft Final Report) នៃគម្រោងធ្វើឱ្យប្រសើរឡើងវិញ កំណាត់ផ្លូវជាតិលេខ១ និងសាងសង់ស្ពានឆ្លងកាត់ទន្លេមេគង្គ។

កិច្ចប្រជុំនេះមានមានការអញ្ជើញចូលរួមពី ថ្នាក់ដឹកនាំ និងមន្ត្រីបច្ចេកទេស នៃក្រសួងសាធារណការ និងដឹកជញ្ជូន តំណាងអគ្គនាយកដ្ឋានសហប្រតិបត្តិការអន្តរជាតិ និងគ្រប់គ្រងបំណុល និងអគ្គនាយកដ្ឋានដោះស្រាយផលប៉ះពាល់ ដោយសារគម្រោងអភិវឌ្ឍន៍ នៃក្រសួងសេដ្ឋកិច្ច និងហិរញ្ញវត្ថុ តំណាងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) ប្រចាំកម្ពុជា តំណាងក្រសួងធនធានទឹក និងឧតុនិយម តំណាងរដ្ឋបាលរាជធានីភ្នំពេញ តំណាងរដ្ឋបាលខេត្តកណ្តាល តំណាងមន្ទីរសាធារណការ និងដឹកជញ្ជូន រាជធានីភ្នំពេញ និងខេត្តកណ្តាល អាជ្ញាធរក្រុង-ស្រុក-ខណ្ឌពាក់ព័ន្ធ ព្រមទាំងក្រុមការងារសិក្សាគម្រោង នៃក្រុមហ៊ុនទីប្រឹក្សាបច្ចេកទេសJICA។

គម្រោងដ៏មានសារសំខាន់នេះ មានគោលដៅលើកកម្ពស់ប្រសិទ្ធភាពនៃការដឹកជញ្ជូន និងសម្រួលការធ្វើចរាចរណ៍តាមរបៀងសេដ្ឋកិច្ចភាគខាងត្បូង ដោយគ្របដណ្តប់លើ៖១. ការប្រែក្លាយ និងពង្រីកផ្លូវជាតិលេខ១ (ប្រវែងសរុប៥៣គ.ម): ពង្រីកពី២ ទៅ៦គន្លង និង៤គន្លង តាមផ្នែកជាក់ស្តែង រួមទាំងការសាងសង់ផ្លូវអាកាស(Viaduct​)​នៅចំណុចប្រជុំជន/ផ្សារសំខាន់ៗ ដើម្បីដោះស្រាយបញ្ហាកកស្ទះ។

២. ការសាងសង់ស្ពានឆ្លងកាត់ទន្លេមេគង្គ (តភ្ជាប់ផ្លូវក្រវ៉ាត់ក្រុងទី២): ប្រភេទស្ពាន Extradosed Bridge តភ្ជាប់រវាងរាជធានីភ្នំពេញ និងតំបន់អរិយក្សត្រ ព្រមទាំងផ្លូវតភ្ជាប់សំខាន់ៗ។

ជាលទ្ធផលនៃកិច្ចប្រជុំ អង្គប្រជុំទាំងមូលបានចូលរួមផ្តល់យោប​ល់ និងពិភាក្សាយ៉ាងផុលផុស លើទិដ្ឋភាពបច្ចេកទេស ផលប៉ះពាល់ បណ្តាញហេដ្ឋារចនាសម្ព័ន្ធក្រោមដី និងផែនការអនុវត្តគម្រោង។

ជាមួយគ្នានេះ សមាជិកអង្គប្រជុំទាំងអស់បានសម្តែងនូវការសាទរ និងវាយតម្លៃខ្ពស់ចំពោះលទ្ធផល នៃសិក្សាយ៉ាងលម្អិត និងស៊ីជម្រៅរបស់ក្រុមការងារសិក្សាគម្រោង នៃក្រុមហ៊ុនទីប្រឹក្សាបច្ចេកទេស JICA ដែលជាជំហានដ៏មានសារសំខាន់ ឈានទៅរកការអនុវត្តគម្រោងជាផ្លូវការ ដើម្បីបម្រើផលប្រយោជន៍សេដ្ឋកិច្ច និងការធ្វើដំណើ​ររបស់ប្រជាពលរដ្ឋ ឱ្យកាន់តែមានភាពងាយស្រួល និងសុវត្ថិភាព៕

ដោយៈ ចំណាន

ភ្នំពេញៈ លោកជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា និងសហការី បានទទួលជួបពិភា​ក្សា និងពិសារអាហារការងារថ្ងៃត្រង់ ជាមួយគណៈប្រតិភូមកពីតំបន់ស្វយ័តក្វាងស៊ីនៃសាធារណរដ្ឋប្រជាមានិតចិន ដឹកនាំដោយលោក ថាង ឆាយចុង (Tang Caizong) តំណាងផ្នែកកំណែទម្រង់ និងការអភិវឌ្ឍតំបន់ស្វយ័តក្វាងស៊ី។

ជាកិច្ចចាប់ផ្តើម លោកអគ្គលេខាធិការបានស្វាគមន៍ យ៉ាងកក់ក្តៅជូនចំពោះគណៈប្រតិភូ និងបានសម្តែងនូវសេចក្តីសោមនស្សរីករាយបំផុតដែលលោក ថាង ឆាយចុង បានដឹកនាំគណៈប្រតិភូមកជួបពិភាក្សាការងារនាពេលនេះ។

បន្ថែមលើការកត់សម្គាល់ ពីបរិស្ថានវិនិយោគនៅកម្ពុជា កំណើនវិនិយោគចិននៅកម្ពុជា និងទំហំពាណិជ្ជកម្មកម្ពុជា-ចិន ឯកឧត្តមអគ្គលេខាធិការក៏បានលើកទ្បើង ពីការគិតគូររបស់រាជរដ្ឋាភិបាលក្នុងការលើកកម្ពស់វិស័យបច្ចេកវិទ្យាឌីជីថល ពិសេសបច្ចេកវិទ្យាបញ្ញាសិប្បនិមិ្មត ដែលបាននិងកំពុងតែមានការរីកចម្រើនយ៉ាងឆាប់រហ័ស និងមានសារសំខាន់សម្រាប់បរិការណ៍សកល នាពេលបច្ចុប្បន្នក្នុងការគាំទ្រដល់ការអភិវឌ្ឍសង្គម សេដ្ឋកិច្ច ទាំងក្នុងវិស័យកសិកម្ម និងឧស្សាហកម្ម និងវិស័យផ្សេងៗទៀត។

ជាមួយគ្នានេះ លោកអគ្គលេខាធិការបានវាយតម្លៃខ្ពស់ ចំពោះតួនាទីរបស់តំបន់ស្វយ័តក្វាងស៊ី ក្នុងការតភ្ជាប់កិច្ចសហប្រតិបត្តិការបច្ចេកវិទ្យារវាងប្រទេសចិន និងអាស៊ាន ដោយកំពុងផ្តោតលើការអភិវឌ្ឍប្រព័ន្ធអេកូបញ្ញាសិប្បនិម្មិត និងសេដ្ឋកិច្ចឌីជីថល។

ជាមួយគ្នានេះ លោក ថាង ឆាយចុង បានបង្ហាញពីការជំរុញកិច្ចសហប្រតិបត្តិការលើវិស័យសេដ្ឋកិច្ចឌីជីថល និងការអភិវឌ្ឍឧស្សាហកម្មបញ្ញាសិប្បនិម្មិត ដែលលោកគ្រោងនឹងជំរុញ ឱ្យមានមជ្ឈមណ្ឌលកិច្ចសហប្រតិបត្តិការបច្ចេកវិទ្យា បញ្ញាសិប្បនិមិ្មតកម្ពុជា-ចិន និងផ្តល់ការបណ្តុះបណ្តាលដល់ប្រជាជនកម្ពុជា លើជំនាញបញ្ញាសិប្បនិម្មិត ។

បន្ថែមពីនេះ លោកក៏មានបំណងលើកកម្ពស់ការវិនិយោគ និងស្វែងរកកាលានុវត្តភាព ពង្រីកកិច្ចសហប្រតិបត្តិការ នាពេលអនាគតរវាងតំបន់ស្វ័យតក្វាងស៊ី និងព្រះរាជាណាចក្រកម្ពុជា ដើម្បីរួមចំណែកពង្រឹងទំនាក់ទំងភាពជាដៃគូ និងជំរុញការអភិវឌ្ឍសេដ្ឋកិច្ចឌីជីថល និងការវិនិយោគរវាងភាគីទាំងពីរផងដែរ។

លោកជា វុទ្ធីបានបង្ហាញនូវសុទិដ្ឋិនិយម និងក្តីសង្ឃឹមយ៉ាងមុតមាំថា តាមរយៈជំនួបពិភាក្សាលើកនេះ មជ្ឈមណ្ឌលកិច្ចសហប្រតិបត្តិការបច្ចេកវិទ្យាបញ្ញាសិប្បនិមិ្មតកម្ពុជា-ចិន នឹងអាចលេចចេញជារូបរាងនាពេលឆាប់ៗខាងមុខនេះ ដើម្បីជាថ្នាលឱ្យប្រជាជនកម្ពុជាមានឱកាសក្នុងការអភិវឌ្ឍសមត្ថភាពរបស់ខ្លួន និងចាប់យកចំណេះ និងជំនាញថ្មីៗពាក់ព័ន្ធនឹងបច្ចេកវិទ្យាឌីជីថល ពិសេស បច្ចេកវិទ្យាបញ្ញាសិប្បនិម្មិតនេះ ព្រមទាំងរួមចំណែកដល់ការអភិវឌ្ឍ ធនធានមនុស្សនៅកម្ពុជា៕

ដោយៈ ចំណាន

   ភ្នំពេញៈ គម្រោងសាងសង់ស្ពានឆ្លងទន្លេបាសាក់ ចាក់អង្រែក្រោម-ព្រែកប្រា សម្រេចបាន៨២%ហើយ គិតត្រឹមពាក់កណ្ដាលខែសីហា ឆ្នាំ២០២៦នេះ ជាល្បឿនលឿនជាងផែនការគ្រោងទុក។

ព័ត៌មាននេះត្រូវបានបង្ហាញក្នុងឱកាស លោកប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូនបានអញ្ជើញពិនិត្យវឌ្ឈនភាពនៃការសាងសង់ស្ពានកាលពីថ្ងៃទី១៩ សីហាកន្លងមកនេះ។

ស្ពានចាក់អង្រែក្រោម-ព្រែកប្រា សម្ពោធបើកការដ្ឋានសាងសង់កាលពីព្រឹកថ្ងៃទី១៩ ខែកុម្ភៈ ឆ្នាំ២០២៤ ក្រោមអធិបតីភាពដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងឯកឧត្តម វ៉ាង វិនធៀន អតីតឯកអគ្គរដ្ឋទូតចិនប្រចាំកម្ពុជា។

តាមប្រតិទិនដំណើរការស្ថាបនា មិនមានភាពយឺតយ៉ាវជាងកម្មវិធីការងារដែលគ្រោងទុកទេ ដោយគ្រោងបញ្ចប់នៅពាក់កណ្ដាល ឆ្នាំ២០២៧ខាងមុខ។

បន្ថែមលើការងារស្ពាន បច្ចុប្បន្នយើងកំពុងគិតគូរពីការតភ្ជាប់គម្រោងសាងសង់ស្ពានឆ្លងកាត់ ទន្លេបាសាក់(ចាក់អង្រែក្រោម-ព្រែកប្រា) ត្រើយខាងកើត ភ្ជាប់ទៅផ្លូវជាតិលេខ១ ។

យោងតាមការណែនាំដ៏ខ្ពង់ខ្ពស់ របស់សម្តេចធិបតីនាយករដ្ឋមន្រ្តី ក្នុងពេលសម្ពោធ បើកការដ្ឋានសាងសង់ស្ពាន ឆ្លងកាត់ទន្លេបាសាក់(ចាក់អង្រែក្រោម-ព្រែកប្រា) កាលពីថ្ងៃទី១៩ខែកុម្ភៈ ឆ្នាំ២០២៤ បានជំរុញឱ្យក្រសួងសាធារណការ និងដឹកជញ្ជូន និងរដ្ឋបាលរាជធានីភ្នំពេញ សិក្សាដើម្បីស្វែងរកតម្រាយផ្លូវ តភ្ជាប់ទៅផ្លូវជាតិលេខ១ ដើម្បីបង្កើនប្រសិទ្ធភាពនៃការតភ្ជាប់រំហូរចរាចរណ៍ និងប្រទាក់ក្រឡាគ្នារវាងផ្នែកខាងលិច និងខាងកើតនៃស្ពាន។

ផ្នែកពាក់ព័ន្ធបានចុះពិនិត្យសិក្សារួមគ្នាជាបន្តបន្ទាប់ រវាងក្រសួង ស្ថាប័ន អាជ្ញាធរមូលដ្ឋាន និងក្រុមហ៊ុនប៉េងហួតគ្រុប និងដោយមានការឯកភាពពីថ្នាក់ដឹកនាំ បានឯកភាពយកតម្រាយគន្លងផ្លូវចាស់ ប្រវែង ៤ ៩០០ម. ភ្ជាប់ទៅផ្លូវជាតិលេខ១ និងភ្ជាប់ទៅគម្រោងស្ពានទន្លេមេគង្គកោះនរាដែលកំពុងសិក្សាផងដែរ។

តម្រាយគន្លងផ្លូវប្រវែង៤៩០០ម.នេះ ផ្លូវដែលមានស្រាប់សាងសង់ដោយក្រុមហ៊ុនប៉េងហួតគ្រុប មានប្រវែង៣៣០៩ម. នៅខ្វះតែប្រវែង១៥៩១ម. ប៉ុណ្ណោះ ដែលរាជរដ្ឋាភិបាលត្រូវសាងសង់បន្តដើម្បីតភ្ជាប់ទៅផ្លូវជាតិលេខ១ ដោយពង្រីកទទឹងផ្លូវប្រវែង១៦ម. កាត់បន្ថយផលប៉ះពាល់។ ការសាងសង់កំណាត់ផ្លូវតភ្ជាប់នេះ នឹងផ្តល់ប្រយោជន៍នៃការធ្វើដំណើរងាយស្រួលជាងមុន មិនកកស្ទះ និងមានសុវត្ថិភាព ព្រមទាំងបញ្ចៀសការលិចលង់ ក្នុងរដូវវស្សាតាមរយៈការសាងសង់ស្ថានីយបូមមួយកន្លែង៕

ដោយៈ ចំណាន

   ភ្នំពេញៈ កម្ពុជាកំពុងជំរុញការផ្លាស់ប្តូរវិស័យកសិកម្ម ពីការផលិតបែបមូលដ្ឋានទៅរកផលិតកម្មពាណិជ្ជកម្ម ការកែច្នៃក្នុងស្រុក និងការនាំចេញផលិតផលមានតម្លៃបន្ថែមខ្ពស់។

កម្មវិធីនេះទទួលបានការគាំទ្រពីអឺរ៉ុប ដែលផ្តោតជាពិសេសលើខ្សែច្រវាក់តម្លៃស្វាយចន្ទី និងម្រេច ដើម្បីពង្រីកលទ្ធភាពចូលទៅកាន់ទីផ្សារតំបន់ និងទីផ្សារអឺរ៉ុបដែលមានតម្លៃខ្ពស់។

ទិសដៅនេះត្រូវបានរំលេច ក្នុងបេសកកម្មជាន់ខ្ពស់រួមគ្នារវាងកម្ពុជា និងក្រុមអឺរ៉ុប (Team Europe) ទៅកាន់ខេត្តត្បូងឃ្មុំ ក្រចេះ និងស្ទឹងត្រែង កាលពីថ្ងៃទី១៧-១៨ ខែសីហា ដឹកនាំដោយលោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងលោក Igor Driesmans ឯកអគ្គរដ្ឋទូតសហភាពអឺរ៉ុបប្រចាំកម្ពុជា។

លោកឌិត ទីណា បានឱ្យដឹងថា កម្ពុជាកំពុងផ្លាស់ប្តូរមុខមាត់វិស័យកសិកម្ម ដោយប្តូរពីការធ្វើកសិកម្មបែបគ្រួសារ ទៅជាការផលិតបែបពាណិជ្ជកម្ម តាមរយៈសហគមន៍កសិកម្មទំនើប (MACs) និងផលិតកម្មកសិកម្មតាមកិច្ចសន្យា។

លោកបញ្ជាក់ថា ការរៀបចំចងក្រងកសិករក្នុងស្រុក នឹងជួយឱ្យពួកគេអាចផ្គត់ផ្គង់ កសិផលបានទៀងទាត់ និងមានស្ថិរភាពដល់រោងចក្រកែច្នៃ ខណៈកិច្ចសហការជាមួយសហភាពអឺរ៉ុប និងដៃគូនានា កំពុងលើកកម្ពស់ស្តង់ដារ សុវត្ថិភាពចំណីអាហារ និរន្តរភាពនិងសមត្ថភាពប្រកួតប្រជែង សម្រាប់ដំណាំសំខាន់ៗ ដូចជា ស្វាយចន្ទី និងម្រេច”។

ជាមួយគ្នានេះ លោក gor Driesmans បានឱ្យដឹងថា តាមរយៈយុទ្ធសាស្ត្រច្រកទ្វារសកល (Global Gateway) ក្រុមអឺរ៉ុបកំពុងវិនិយោគលើជំនាញបច្ចេកទេស សុវត្ថិភាពចំណីអាហារ និងប្រព័ន្ធកែច្នៃ ដើម្បីជំរុញខ្សែច្រវាក់តម្លៃស្វាយចន្ទី និងម្រេចកម្ពុជា។

លោកបញ្ជាក់ថា “កត្តានេះជួយអាជីវកម្មកសិកម្ម ក្នុងស្រុកអាចបង្កើតផលិតផល ដែលមានតម្លៃបន្ថែមខ្ពស់នៅក្នុងប្រទេស និងពង្រីកខ្លួនទៅកាន់ទីផ្សារនាំចេញតម្លៃខ្ពស់”។

បេសកកម្មជាន់ខ្ពស់រួមគ្នារវាងកម្ពុជា និងក្រុមអឺរ៉ុប (Team Europe) បានធ្វើដំណើរទៅកាន់ខេត្តត្បូងឃ្មុំ ក្រចេះ និងស្ទឹងត្រែង កាលពីថ្ងៃទី១៧-១៨ ខែសីហា ដឹកនាំដោយលោកឌិត ទីណា រដ្ឋមន្ត្រីក្រសួងកសិកម្ម និងលោកIgor Driesmans ឯកអគ្គរដ្ឋទូតសហភាពអឺរ៉ុបប្រចាំកម្ពុជា។ រូបថត សហការី។

កម្មវិធីសំខាន់មួយក្នុងការគាំទ្រទិសដៅនេះ គឺភាពជាដៃគូរវាងសហភាពអឺរ៉ុប អាល្លឺម៉ង់ និងកម្ពុជាសម្រាប់វិស័យកសិកម្ម និងប្រព័ន្ធស្បៀងអាហារប្រកបដោយចីរភាព (CAPSAFE) ដែលមានថវិកាសរុប២៤,៣លានអឺរ៉ូ សម្រាប់អនុវត្តពីឆ្នាំ២០២៤ ដល់ឆ្នាំ២០២៩។

CAPSAFE គ្រោងគាំទ្រកសិករចំនួន៦០០០នាក់ ពង្រឹងសហគមន៍កសិកម្ម និងសហគ្រាសធុនតូច និងមធ្យមចំនួន៤០ ព្រមទាំងជំរុញការកែច្នៃក្នុងស្រុក ការវិនិយោគ និងការត្រៀមខ្លួនសម្រាប់ការនាំចេញទៅទីផ្សារតំបន់ និងអឺរ៉ុប។ កម្មវិធីនេះក៏ផ្តោតលើការពង្រឹងប្រព័ន្ធសុវត្ថិភាពចំណីអាហារ និងអនាម័យ និងភូតគាមអនាម័យផងដែរ៕