តើកំណើននៃការផ្គត់ផ្គង់ខុនដូនៅទីក្រុងតូក្យូក្នុងឆ្នាំ២០២៥ អាចធ្វើឱ្យតម្លៃលក់ធ្លាក់ចុះឬយ៉ាងណា?

ដោយ: គង់ លាងហួរ
តូក្យូ: យោងតាមការព្យាករណ៍របស់ស្ថាប័នជំនាញមួយបានឱ្យដឹងថា ចំនួនខុនដូថ្មីនៅទីក្រុងតូក្យូនៃប្រទេសជប៉ុននឹងកើនឡើងនៅឆ្នាំ២០២៥នេះ ជាលើកដំបូងក្នុងរយៈពេល៤ឆ្នាំកន្លងទៅ។

ប៉ុន្តែ ទីផ្សារនៅតែត្រូវបានគេរំពឹងថា នឹងមានភាពតានតឹង។នេះបើយោងតាមការដកស្រង់ចុះផ្សាយដោយសារពត៌មាន Nikkei Asia។

វិទ្យាស្ថានសេដ្ឋកិច្ចអចលនទ្រព្យ(Real Estate Economic Institute) ដែលមានមូលដ្ឋាននៅទីក្រុងតូក្យូបានគូសបញ្ជាក់ក្នុងរបាយការណ៍មួយថា ការផ្គត់ផ្គង់ខុនដូថ្មីនៅទីក្រុងតូក្យូនឹងកើនឡើងចំនួន២៦.០០០យូនីតនៅឆ្នាំ២០២៥ កើនឡើង១៣%ធៀបនឹងឆ្នាំ២០២៤។

កាលពីឆ្នាំ២០២៤ អ្នកអភិវឌ្ឍន៍បានសាងសង់ខុនដូថ្មីប្រមាណ២៣.០០០យូនីតនៅទីក្រុងតូក្យូ ធ្លាក់ចុះ១៤,៤%ធៀបនឹងឆ្នាំ២០២៣ ហើយចំនួននេះជាកម្រិតទាបមិនធ្លាប់មានឡើយ គិតចាប់តាំងពីទិន្នន័យទាំងនេះត្រូវបានប្រមូលចងក្រងឡើងដំបូងនៅឆ្នាំ១៩៧៣។

កង្វះនៃការសាងសង់ខុនដូថ្មីនៅក្នុងទីក្រុងតូក្យូ មួយផ្នែកបណ្តាលមកពីបណ្តាអ្នកអភិវឌ្ឍន៍អចលនទ្រព្យសម្រេចចិត្តធ្វើការរឹតបន្តឹងការផ្គត់ផ្គង់។

លោក Takuya Sumida អ្នកគ្រប់គ្រងជាន់ខ្ពស់នៃក្រុមហ៊ុនអាជីវកម្មខុនដូ Daiwa House Industry បានលើកឡើងថា “ យូនីតខុនដូជាច្រើនកំពុងត្រូវបានលក់ចេញ បន្ទាប់ពីបញ្ចប់ការសាងសង់ ជំនួសឱ្យគោលបំណងនៃការលក់ចេញមុនពេលបញ្ចប់ការសាងសង់ ឬហៅថា (Pre-sale)”។

ខុនដូនៅក្នុងសង្កាត់ទាំង២៣ស្ថិតនៅចំកណ្តាលទីក្រុងតូក្យូ ត្រូវបានដាក់លក់ក្នុងតម្លៃជាមធ្យមចំនួន១១២,៨លានយ៉េន (ប្រហែល៧១៨.០០០ដុល្លារ)ក្នុងមួយយូនីត ចាប់ពីខែមករាដល់ខែវិច្ឆិកា ឆ្នាំ២០២៤កន្លងទៅ។

កាលពីឆ្នាំ២០២៣ តម្លៃខុនដូជាមធ្យមនៅទីក្រុងតូក្យូបានកើនឡើងដល់ចំនួន១០០លានយ៉េនក្នុងមួយយូនីត ហើយតម្លៃខុនដូនៅឆ្នាំ២០២៥ ត្រូវបានព្យាករណ៍ថា អាចនឹងកើនឡើងក្នុងកម្រិតស្រដៀងគ្នានេះ។

ក្នុងរយៈពេល៥ឆ្នាំកន្លងមក តម្លៃខុនដូជាមធ្យម ដែលទើបនឹងសាងសង់ថ្មីក្នុងសង្កាត់ទាំង២៣នៃទីក្រុងតូក្យូ បានហក់ឡើងថ្លៃប្រហែល៦០ភាគរយ ខណៈគេមិនទាន់សង្កេតឃើញមានសញ្ញាណាមួយបង្ហាញថា តម្រូវការនឹងធ្លាក់ចុះនោះទេ៕ប្រភព: Nikkei Asia៕

ដោយៈ គង់ សូរិយា

    ភ្នំពេញៈ ឧបនាយករដ្ឋមន្រ្តី លោកសាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់បានជួបជាមួយថ្នាក់ដឹកនាំសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា(CVEA)។

    ក្នុងជំនួបកាលពីថ្ងៃទី៨ មករាកន្លងមកនេះ លោកឧបនាយករដ្ឋមន្រ្តីបានលើកឡើងថា ក្រសួងរៀបចំដែនដី នគរូបនីយកម្ម និងសំណង់ បានសម្រេចផ្តល់ទិន្នន័យ ​ជូនទៅសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ដើម្បីធ្វើការ​វាយតម្លៃ​អចលនទ្រព្យឱ្យមានសង្គតភាពនិងជាក់ស្តែង ជាឧត្តមប្រយោជន៍​របស់អតិថិជន និងសេដ្ឋកិច្ចកម្ពុជា៕

ដោយ: គង់ លាងហួរ
អន្តរជាតិ: ផែនការប្រកបដោយមហិច្ឆិតារបស់តំបន់រដ្ឋបាលពិសេសទីក្រុងហុងកុងលើការសាងសង់កោះសិប្បនិមិត្តចំនួន៣ ក្រោមទុនវិនិយោគប្រមាណ៧៤,៦ពាន់លានដុល្លារអាមេរិក អាចនឹងត្រូវពន្យារពេលបន្ថែមទៀត។

ការព្រួយបារម្ភនេះកើតឡើង បន្ទាប់ពីមន្ត្រីទទួលបន្ទុកលើការអភិវឌ្ឍន៍បានបដិសេធមិនបញ្ជាក់ពីកាលបរិច្ឆេទចាប់ផ្តើមការងារចាក់បំពេញដីទៅក្នុងសមុទ្រ ស្របពេលឱនភាពថវិកាកើនឡើង។

ថ្មីៗនេះ ក្រោយពីអាជ្ញាធរហិរញ្ញវត្ថុហុងកុងបានព្រមានពីការរឹតបន្តឹងការចំណាយនាពេលខាងមុខ លេខាធិការទទួលបន្ទុកលើការអភិវឌ្ឍន៍លោកស្រី Linn Hon-ho បានអះអាងថា គម្រោងមួយចំនួនដូចជា កោះសិប្បនិម្មិត Northern Metropolis ដែលគ្រោងសាងសង់នៅតាមបណ្តោយព្រំដែនគួរតែត្រូវបានផ្តល់អាទិភាព។

ដើមឡើយ រដ្ឋបាលទីក្រុងហុងកុងសង្ឃឹមថា នឹងចាប់ផ្តើមចាក់បំពេញផ្ទៃដីទំហំ១ពាន់ហិកតានៅជាប់កោះ Kau Yi Chau ក្នុងឆ្នាំ២០២៧។ ប៉ុន្តែ កាលពីថ្ងៃអង្គារ ទី៧ ខែមករា លោកស្រី Linn Hon-ho បានបដិសេធមិនបញ្ជាក់ឱ្យបានច្បាស់់ពីកាលបរិច្ឆេទចាប់ផ្តើមនោះទេ។

លោកស្រី​ Linn បាន​មានប្រសាសន៍ឱ្យដឹងក្នុង​អំឡុងពេល​ជួប​ជាមួយក្រុមអ្នក​សារព័ត៌មាន​​ថា​ “យើង​មិន​ចាំ​បាច់​កំណត់​កាលបរិច្ឆេទ​ពិត​ប្រាកដ​សម្រាប់​ការ​ចាប់​ផ្តើម​ការងារ​ឥឡូវ​នេះ​ទេ។ អ្វីដែលសំខាន់បំផុត យើងត្រូវរៀបចំឱ្យបានល្អ”។

លោកស្រីបានសង្កត់ធ្ងន់ថា រដ្ឋបាល​ហុងកុងនឹង​បន្ត​ត្រៀមរៀបចំ​​ការងារ​ចាក់បំពេញដីនេះ​ ដោយ​កត់សម្គាល់​ថា​ នីតិវិធីច្បាប់នៃការ​ដាក់​របាយការណ៍​ស្តីពីការវាយតម្លៃ​ផលប៉ះពាល់​លើបរិស្ថាន​កំពុង​តែដំណើរការ​។

លោកស្រីបន្ថែមថា “នៅពេលយើងរៀបចំបានល្អប្រសើរ រដ្ឋបាលហុងកុងអាចបន្តដំណើរទៅមុខ។ បន្ទាប់មក យើងនឹងពិចារណាពីបរិយាកាសសេដ្ឋកិច្ច និងស្ថានភាពហិរញ្ញវត្ថុនៅពេលនោះ ដើម្បីសម្រេចចិត្តថា តើគម្រោងនេះគួរអនុវត្តន៍នៅពេលណា និងអនុវត្តន៍ដោយរបៀបណា?”៕ប្រភព: SCMP៕

ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃបន្តិចក្នុងការជួញដូរនៅព្រឹកថ្ងៃព្រហស្បតិ៍នេះ ខណៈធនាគារកណ្តាលអាមេរិកអាចប្រកាន់គោលជំហរប្រកបដោយការប្រុងប្រយ័ត្នចំពោះការកំណត់ដាក់ចេញនូវទិសដៅអត្រាការប្រាក់របស់ខ្លួននៅឆ្នាំ២០២៥នេះ។

តួយ៉ាង តម្លៃមាស Spot Gold បានស្ថិតនៅទ្រឹងត្រឹមជាង២.៦៦១ដុល្លារក្នុងមួយអោន។ ទោះជាយ៉ាងនេះក្តី តម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,២២ភាគរយដល់២៦៧៨,៤០ដុល្លារក្នុងមួយអោនគិតត្រឹមម៉ោង១០:៣៩នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៩៥,២ភាគរយ ដែលធនាគារកណ្តាលអាមេរិក (Fed) នឹងរក្សាទុកអត្រាការប្រាក់របស់ខ្លួនឱ្យនៅថេរដដែលក្នុងកិច្ចប្រជុំគោលនយោបាយនៅថ្ងៃទី២៩ ខែមករានេះ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានធ្លាក់ថ្លៃចុះមកនៅត្រឹម១០៨,៩៥ពិន្ទុនៅព្រឹកថ្ងៃព្រហស្បតិ៍នេះ បន្ទាប់ពីបានបិទការជួញដូរត្រឹម១០៩,០៩ពិន្ទុកាលពីថ្ងៃពុធម្សិលមិញ។

ចំណែក តម្លៃលោហៈធាតុប្រាក់ Spot silver បានងើបឡើង០,២៦ភាគរយដល់៣០,៧៧ដុល្លារក្នុងមួយអោន ខណៈតម្លៃផ្លាទីនបានងើបឡើង០,១៨ភាគរយដល់៩៨៥,៥ដុល្លារក្នុងមួយអោន ហើយតម្លៃ palladium បានងើបឡើង០,៣៩ភាគរយដល់៩៣២ដុល្លារក្នុងមួយអោនគិតត្រឹមម៉ោង១០:៤៣នាទីព្រឹក៕

ដោយ: គង់ លាងហួរ
អន្តរជាតិ: ការស្ទង់មតិរបស់វេទិកា Agoda បានបង្ហាញពីនិន្នាការសំខាន់ៗនៅក្នុងចំណោមភ្ញៀវទេសចរណ៍អាស៊ាននៅឆ្នាំ២០២៥ ដោយផ្តោតលើការសម្រាកលំហែកាយ ការធ្វើដំណើរបែបគ្រួសារ និងការប្រើប្រាស់បច្ចេកវិទ្យាដើម្បីធ្វើផែនការ និងកក់ដំណើរកំសាន្ដ។

Agoda បានរកឃើញថា អ្នកដំណើរជូនជាតិឥណ្ឌូនេស៊ីចំនួន៥៨ភាគរយមានគម្រោងធ្វើដំណើរជាមួយមនុស្សជាទីស្រលាញ់របស់ពួកគេនៅឆ្នាំនេះ ដែលជាអត្រាខ្ពស់បំផុតនៅតំបន់អាស៊ាន។

ចំណែក នៅប្រទេសវៀតណាម ចំនួន៣៩ភាគរយនៃអ្នកឆ្លើយសំណួរបានបង្ហាញពីគោលបំណងដើរលេងកំសាន្តជាមួយក្រុមគ្រួសារ ខណៈចំនួន៦៥% នៃអ្នកធ្វើដំណើរជនជាតិវៀតណាមបានផ្តល់អាទិភាពដល់ការសម្រាកលំហែកាយ។

ដោយឡែក ការស្ទង់មតិខាងលើបានបង្ហាញទៀតថា ប្រជាជនសិង្ហបុរីចំនួន៨៧ភាគរយ បានលើកឡើងថា ការសំរាកលំហែជាហេតុផលចម្បងសម្រាប់ការធ្វើដំណើររបស់ពួកគេ។

រីឯ ប្រទេសហ្វីលីពីននាំមុខគេផ្នែកទេសចរណ៍ ដែលផ្សារភ្ជាប់ជាមួយក្រុមអ្នកធ្វើការលើផ្នែកឌីជីថល ដោយអ្នកឆ្លើយសំណួរម្នាក់ក្នុងចំណោមអ្នកឆ្លើយសំណួរចំនួន១៤នាក់រំពឹងថា នឹងធ្វើការពីចម្ងាយ នៅពេលធ្វើដំណើរកំសាន្ត។

បច្ចេកវិទ្យាក៏បានដើរតួនាទីយ៉ាងសំខាន់ផងដែរក្នុងការរៀបចំផែនការធ្វើដំណើរ ដោយប្រជាជនវៀតណាមចំនួន៧៨ភាគរយ គ្រោងនឹងប្រើប្រាស់កម្មវិធី App នានាសម្រាប់កក់ដំណើរកំសាន្តរបស់ពួកគេនៅក្រៅប្រទេស។

នៅទូទាំងតំបន់ ប្រព័ន្ធផ្សព្វផ្សាយសង្គមបានបន្តជំរុញការរៀបចំផែនការធ្វើដំណើរ ខណៈប្រជាជនម៉ាឡេស៊ី និងឥណ្ឌូនេស៊ី ទទួលរងឥទ្ធិពលបំផុតពីវេទិកាសង្គមដូចជា Instagram ជាដើម៕ប្រភព: Vnexpress៕

ដោយ: គង់ លាងហួរ
អន្តរជាតិ: តម្លៃអាផាតមុិននៅតាមបណ្តោយខ្សែរថភ្លើងក្រោមដីក្នុងទីក្រុងហូជីមិញ ប្រទេសវៀតណាម បានហក់ឡើងថ្លៃយ៉ាងគំហុកចន្លោះពី១៥ភាគរយទៅ៤០ភាគរយ ដោយសារការបើកដាក់ឱ្យដំណើរការខ្សែរថភ្លើងថ្មីបានជំរុញឱ្យតម្រូវការកើនឡើង។

កាលពី២សប្តាហ៍មុន លោក Minh Toan ដែលជាអតិថិជនមួយរូបក្នុងចំណោមអតិថិជនជាច្រើនរូបផ្សេងទៀតបានទិញអាផាតមិន ដែលមានបន្ទប់គេងចំនួន២បន្ទប់ ស្ថិតនៅចម្ងាយប្រមាណ៨០០ម៉ែត្រពីខ្សែរថភ្លើងក្រោមដី Ben Thanh-Suoi Tien ក្នុងទីក្រុងហូជីមិញ។

ប៉ុន្តែ លោកបានសម្តែងការសោកស្តាយយ៉ាងខ្លាំង ព្រោះថា តម្លៃអាផាតមុិននៅទីនោះបានហក់ឡើងថ្លៃចំនួន១៦ភាគរយ ចាប់តាំងពីដើមឆ្នាំ២០២៤មក។

លោកមានប្រសាសន៍ឱ្យដឹងបន្តថា “ខ្ញុំគួរតែសម្រេចចិត្ដទិញឱ្យបានលឿនជាងនេះ។ ប៉ុន្តែ ខ្ញុំទើបតែបានទិញនៅពេលនេះ ដោយរំពឹងថា អាផាតមុិននឹងបន្តហក់ឡើងថ្លៃបន្ថែមទៀត ព្រោះខ្សែរថភ្លើងក្រោមដីបានចាប់ផ្តើមដំណើរការហើយ”។

អាផាតមុិនដែលលោក Minh Toan បានទិញកាលពី២សប្តាហ៍មុន មានតម្លៃចំនួន៧១លានដុង(ប្រហែល២.៨០០ដុល្លារអាមេរិក) ក្នុងមួយម៉ែត្រការ៉េ បើធៀបនឹងតម្លៃត្រឹមតែ៦១លានដុងក្នុងមួយម៉ែត្រការ៉េកាលពីខែមករាដើមឆ្នាំមុន។

លោក Vo Hong Thang អគ្គនាយករងនៃក្រុមហ៊ុនប្រឹក្សាអចលនទ្រព្យ DKRA Group បានលើកឡើងថា “ការកសាងហេដ្ឋារចនាសម្ព័ន្ធដឹកជញ្ជូនបានដើរតួយ៉ាងសំខាន់ក្នុងការអភិវឌ្ឍន៍ទីក្រុង និងការជំរុញឱ្យតម្លៃអចលនទ្រព្យហក់់ឡើងថ្លៃ”។

លោកបន្ថែមថា “រថភ្លើងក្រោមដីជួយបង្កើនការតភ្ជាប់ កាត់បន្ថយការកកស្ទះចរាចរណ៍ និងផ្តល់នូវជម្រើសធ្វើដំណើរប្រកបដោយសុវត្ថិភាព។ កត្តាទាំងនេះបានជំរុញតម្លៃអចលនទ្រព្យនៅតាមបណ្តោយផ្លូវរថភ្លើង”។

លោក Troy Griffiths អគ្គនាយករងនៃក្រុមហ៊ុនប្រឹក្សាអចលនទ្រព្យ Savills Vietnam បានព្យាករណ៍ថា “តម្លៃអចលនទ្រព្យប្រណីតនៅតាមបណ្តោយស្ថានីយ៍រថភ្លើងធំៗនឹងកើនឡើងចន្លោះពី១០ភាគរយទៅ១៥ភាគរយនៅឆ្នាំ២០២៥នេះ”។

លោក Dinh Minh Tuan នាយកប្រចាំតំបន់ភាគខាងត្បូងនៃវេទិកាចុះបញ្ជីអចលនទ្រព្យ Batdongsan បានលើកឡើងថា ការផ្តោតរបស់អ្នកអភិវឌ្ឍន៍លើផ្នែកអាផាតមុិនតម្លៃខ្ពស់ រួមជាមួយនឹងការបើកសម្ពោធដាក់ឱ្យដំណើរការខ្សែរថភ្លើងក្រោមដី បានជំរុញឱ្យតម្លៃអាផាតមុិនជាមធ្យមមានការកើនឡើង។

លោកបានបន្ថែមថា “ការរួមបញ្ចូលគ្នានៃកត្តាជាច្រើនដូចជា ខ្សែរថភ្លើងក្រោមដី ការធ្វើឱ្យប្រសើរឡើងនូវហេដ្ឋារចនាសម្ព័ន្ធ និងការកើនឡើងនៃគម្រោងលំដាប់ខ្ពស់ បានជំរុញឱ្យគម្រោងអាផាតមុិននៅជិតផ្លូវរថភ្លើងក្លាយជាចំណុចចាប់អារម្មណ៍របស់អ្នកទិញ”៕ប្រភព: Vnexpress៕

ធនាគារ ឈីហ្វ ឈានចូលឆ្នាំ២០២៥ ជាមួយនឹងការប្តេជ្ញាចិត្តជាថ្មីចំពោះទំនុកចិត្ត វិជ្ជាជីវៈ ក្រមសីលធម៌ និងទំនាក់ទំនងល្អជាមួយអតិថិជនជាកត្តាជំរុញដ៏សំខាន់សម្រាប់បន្តភាពជោគជ័យរបស់ខ្លួន។        បណ្ឌិត សឿង ម៉ូរ៉ារិទ្ធ ប្រធាន​នាយក​ប្រតិបត្តិ​នៃ​ធនាគារ ឈីហ្វ ជឿជាក់ថាគោលការណ៍ទាំងនេះ ដែលជាចំណុចស្នូលនៃប្រតិបត្តិការរបស់ខ្លួននឹងជួយបន្តនាំផ្លូវដល់ធនាគារក្នុងបរិយាកាសហិរញ្ញវត្ថុដែលមានការបម្រែបម្រួលយ៉ាងលឿន និងជំរុញឱ្យមានការរីកចម្រើនបន្ថែមទៀត។

បណ្ឌិត សឿង ម៉ូរ៉ារិទ្ធ មានជំនឿចិត្តថា គុណតម្លៃស្នូល និងវិធីសាស្រ្តអាជីវកម្មរបស់ធនាគារ នឹងបន្តពង្រឹងស្ថាប័នមួយនេះសម្រាប់ច្រើនឆ្នាំទៅមុខទៀត។ លោកបណ្ឌិតបានមានប្រសាសន៍ថា ៖«ទំនុកចិត្ត វិជ្ជាជីវៈ និងក្រមសីលធម៌ គឺជាសសរស្តម្ភដែលនាំយើងឱ្យឆ្លងកាត់គ្រប់ដំណាក់កាលនៃការរីកចម្រើន ហើយនឹងក្លាយជាមូលដ្ឋានគ្រឹះសម្រាប់ភាពជោគជ័យរបស់យើងនៅឆ្នាំ២០២៥ និងឆ្នាំបន្តបន្ទាប់»។ លោកបណ្ឌិតបន្ថែមថា ៖«យើងមានក្រុមការងាររឹងមាំ វិធីសាស្រ្តប្រកបដោយភាពច្នៃប្រឌិត និងគំរូអាជីវកម្មល្អ ដើម្បីបំពេញតម្រូវការអតិថិជនរបស់យើង សម្រាប់ទាំងពេលបច្ចុប្បន្ន និងអនាគត»។

ការប្តេជ្ញាចិត្តរបស់ធនាគារចំពោះការអនុវត្តក្រមសីលធម៌នេះ គឺត្រូវបានឆ្លុះបញ្ចាំងនៅក្នុងយុទ្ធសាស្ត្ររបស់ខ្លួនក្នុងការធ្វើអាជីវកម្ម។ ដូចដែលបណ្ឌិត សឿង ម៉ូរ៉ារិទ្ធ បានលើកឡើង «ធនាគារ ឈីហ្វមានការប្តេជ្ញាចិត្តខ្ពស់ ដោយផ្តោតសំខាន់លើភាពស្មោះត្រង់ និងយុទ្ធសាស្រ្តអាជីវកម្មរយៈពេលវែងជាងគិតលើផលចំណេញក្នុងរយៈពេលខ្លី។ យើងផ្តោតលើការកសាងទំនាក់ទំនងដ៏រឹងមាំ សុចរិតភាព និងប្រកបដោយនិរន្តរភាពជាមួយអតិថិជន ហើយវិធីសាស្រ្តប្រកបដោយក្រមសីលធម៌ចំពោះអាជីវកម្មគឺធានាថា យើងនឹងបន្តបម្រើអតិថិជនប្រកបដោយប្រសិទ្ធភាព»។

កំណើន និងការពង្រីកវិសាលភាព៖ មូលដ្ឋានគ្រឹះដ៏រឹងមាំសម្រាប់ពេលអនាគត

ធនាគារ ឈីហ្វ បានចាប់ផ្តើមប្រតិបត្តិការរបស់ខ្លួនក្នុងខែធ្នូ ឆ្នាំ២០១៣ ហើយមកដល់ឆ្នាំ២០២៥ នេះទ្រព្យសកម្មសរុបរបស់ធនាគារបានកើនឡើងគួរឱ្យកត់សម្គាល់ ជាមួយនឹងការកើនឡើងនៃកម្លាំងការងារ និងអតិថិជន។ ធនាគារ ឈីហ្វ ទទួលបានការរីកចម្រើនយ៉ាងខ្លាំង ចាប់តាំងពីត្រូវបានបង្កើតឡើងមក ជាមួយនឹង ដើមទុនចុះបញ្ជីដំបូងចំនួន ១០ លានដុល្លារ ដោយវិវត្តន៍ពីធនាគារឯកទេស ទៅជាធនាគារពាណិជ្ជពេញលេញនៅឆ្នាំ២០១៨។ វឌ្ឍនភាពនេះត្រូវបានមើលឃើញតាមរយៈការកើនឡើងគួរឱ្យកត់សម្គាល់នៃប្រាក់បញ្ញើសរុបដែលលើសពី ១៨៨ លានដុល្លារ និងទ្រព្យសកម្មសរុបលើសពី ២៧៨ លានដុល្លារគិតត្រឹមខែធ្នូ ឆ្នាំ២០២៤។ ធនាគារ ឈីហ្វ សម្រេចបានតាមផែនការប្រតិបត្តិការរបស់ខ្លួនសម្រាប់ឆ្នាំ ២០២៤ និងឆ្នាំសារពើពន្ធខាងមុខ ដែលជំរុញដោយភាពជឿនលឿនផ្នែកឌីជីថល បទប្បញ្ញត្តិល្អ និង     គំនិតផ្តួចផ្តើមជាយុទ្ធសាស្ត្រក្នុងការផ្សព្វផ្សាយ។ បណ្ឌិត សឿង ម៉ូរ៉ារិទ្ធ បានចាត់ទុកភាពជោគជ័យរបស់ធនាគារទៅនឹងទស្សនសាជីវកម្មរបស់ខ្លួនគឺ “The Chief Way” ដែលផ្តល់អាទិភាពដល់ទំនុកចិត្តលើគ្នាទៅវិញទៅមក និងភាពជាដៃគូជាមួយអតិថិជន។ លោកបណ្ឌិតបានសង្កត់ធ្ងន់ថា ៖«យើងផ្ដោតលើការកសាងទំនាក់ទំនងល្អរយៈពេលវែង ដោយផ្អែកលើទំនុកចិត្ត។ វិធីសាស្រ្តរបស់យើងត្រូវបានរួមបញ្ចូលនៅក្នុងវិជ្ជាជីវៈ និងភាពស្មោះត្រង់ ហើយជឿជាក់ថា នេះគឺជាគន្លឹះនៃភាពរីកចម្រើនរួមគ្នាទាំងធនាគារ និងអតិថិជន»។

នៅឆ្នាំ២០២៥ នេះ ធនាគារ ឈីហ្វ នឹងបន្តការពង្រីកវិសាលភាពរបស់ខ្លួនជាមួយនឹងការបើកដំណើរការអភិវឌ្ឍថ្មី ដែលទីស្នាក់ការកណ្តាលថ្មីគឺនៅក្នុង Chief Tower មានទីតាំងនៅតាមបណ្ដោយមហាវិថីព្រះមុនីវង្ស កែងនឹងផ្លូវ ៣២២ សង្កាត់បឹងកេងកង១ ខណ្ឌបឹងកេងកង ក្នុងរាជធានីភ្នំពេញ។ អគារស្នាក់ការកណ្តាលថ្មីនេះ ត្រូវបានកំណត់ថា ជាផ្នែកដ៏សំខាន់មួយនៃការរីកចម្រើនជាយុទ្ធសាស្រ្តរបស់ធនាគារ។     ទីតាំងនេះស្ថិតនៅតំបន់ពាណិជ្ជកម្មដ៏សំខាន់ ទីស្នាក់ការកណ្តាលរបស់ធនាគារ ឈីហ្វ នៅក្នុងអគារ Chief Tower នឹងផ្តល់នូវភាពងាយស្រួលកាន់តែប្រសើរ សម្រាប់ទាំងអតិថិជន និងដៃគូ ខណៈដែលនឹងបង្កើនវត្តមានរបស់ធនាគារនៅក្នុងតំបន់ពាណិជ្ជកម្មដ៏លេចធ្លោមួយនៅក្នុងទីក្រុង។ បណ្ឌិត សឿង ម៉ូរ៉ារិទ្ធ បានលើកឡើងពីសារៈសំខាន់នៃការអភិវឌ្ឍថ្មីនេះ ដោយមានប្រសាសន៍ថា៖« ទីស្នាក់ការកណ្តាលថ្មីរបស់យើងមិនមែនគ្រាន់តែជានិមិត្តរូបនៃការរីកចម្រើនរបស់យើងប៉ុណ្ណោះទេ ប៉ុន្តែជាសក្ខីភាពមួយបង្ហាញពីការប្តេជ្ញាចិត្តរបស់យើងចំពោះនវានុវត្តន៍ ទំនុកចិត្ត និងឧត្តមភាពសេវាកម្ម»។

ការយកចិត្តទុកដាក់បន្តរបស់ធនាគារលើតម្រូវការរបស់អតិថិជន គឺបង្ហាញឱ្យឃើញនៅក្នុងផ្នែកសេវាកម្មដែលបំពេញបន្ថែមដល់វត្តមានរបស់ខ្លួន រួមទាំងកម្មវិធីប្រាក់កម្ចីខ្នាតតូចបែបឌីជីថលដ៏លេចធ្លោរ “Chief Easy” និងភាពជាដៃគូជាមួយប្រព័ន្ធទូទាត់ឌីជីថលដូចជា ប្រព័ន្ធទូទាត់បាគងរបស់ធនាគារជាតិនៃកម្ពុជា CSS និងKHQR ជាដើម។  Chief Easy អនុញ្ញាតឱ្យអតិថិជនស្នើសុំប្រាក់កម្ចីបានរហូតដល់ ៥០០០ ដុល្លារ ដោយមិនត្រូវការទ្រព្យបញ្ចាំតាមរយៈទូរស័ព្ទដៃ ហើយទទួលបានការឆ្លើយតបក្នុងរយៈពេល ២៤ ម៉ោងនៅថ្ងៃធ្វើការ។ គំនិតផ្តួចផ្តើមនេះគាំទ្រដល់បរិយាប័ន្នហិរញ្ញវត្ថុដោយផ្តល់នូវភាពងាយស្រួលក្នុងការទទួលបានឥណទានផ្លូវការទៅតាមគោលបំណងផ្ទាល់ខ្លួន។ កម្មវិធី Chief Mobile 3.0 ដែលត្រូវបានធ្វើបច្ចុប្បន្នភាព ត្រូវបានរចនាឡើងដើម្បីបង្កើនបទពិសោធន៍របស់អ្នកប្រើប្រាស់ ដោយផ្តល់នូវការប្រើប្រាស់កាន់តែងាយស្រួលសម្រាប់តម្រូវការសេវាកម្មធនាគារឌីជីថល។

ធនាគារ ឈីហ្វ គ្រោងបន្តពង្រីកបណ្តាញសាខាបន្ថែមទៀតនៅក្នុងតំបន់ដែលមានសក្ដានុពលខ្ពស់ក្នុងរាជធានីភ្នំពេញ និងទីរួមខេត្តសំខាន់ៗ។ យុទ្ធសាស្រ្តនេះ រួមជាមួយនឹងការខិតខំប្រឹងប្រែងចំពោះការផ្លាស់ប្ដូរឌីជីថល ដែលជួយដល់ធនាគារ ក្នុងការបំពេញតម្រូវការអតិថិជនឲ្យកាន់តែល្អបន្ថែមទៀត និងពង្រឹងការប្តេជ្ញាចិត្តរបស់ខ្លួនចំពោះបរិយាប័ន្ន​ហិរញ្ញវត្ថុនៅក្នុងព្រះរាជាណាចក្រកម្ពុជា។

រក្សាភាពស្មោះត្រង់ជាតម្លៃស្នូល ចំពោះបញ្ហាប្រឈម

ភាពធន់ និងកំណើនជាលំដាប់របស់ធនាគារ ឈីហ្វ ក៏កើតឡើងដោយសារតែគោលនយោបាយគ្រប់គ្រងហានិភ័យដ៏រឹងមាំរបស់ខ្លួនផងដែរ។ បណ្ឌិត សឿង ម៉ូរ៉ារិទ្ធ បានសង្កត់ធ្ងន់ថា ធនាគារតែងតែផ្តល់អាទិភាពដល់ការគ្រប់គ្រងហានិភ័យ និងសុចរិតភាពដោយធានាថា រាល់ការសម្រេចចិត្តគឺស្របតាមចក្ខុវិស័យ    រយៈពេលវែងរបស់ខ្លួន និងជាមួយបេសកកម្មរបស់ខ្លួន ក្នុងការក្លាយជាដៃគូហិរញ្ញវត្ថុដែលមានទំនុកចិត្តនៅក្នុងព្រះរាជាណាចក្រកម្ពុជា និងតំបន់អាស៊ាន។ លោកមានប្រសាសន៍ថា ៖ «យើងផ្តោតលើការគ្រប់គ្រងហានិភ័យដោយប្រុងប្រយ័ត្ន និងជាមធ្យោបាយដែលគាំទ្រដល់កំណើនប្រកបដោយនិរន្តរភាព សម្រាប់អតិថិជន និងអាជីវកម្ម។ វិធីសាស្រ្តនេះបានជួយឱ្យយើងរក្សាស្ថិរភាពនៅក្នុងវិស័យហិរញ្ញវត្ថុដែលកំពុងវិវឌ្ឍន៍យ៉ាងឆាប់រហ័សនេះ»។

ខណៈពេលដែលធនាគារ ឈីហ្វ ឈានចូលដល់ឆ្នាំ២០២៥ ការបន្តផ្តោតលើការទំនុកចិត្ត វិជ្ជាជីវៈ ក្រមសីលធម៌ ទំនាក់ទំនងប្រកបដោយសុចរិតភាព និងនវានុវត្តន៍ ធ្វើឱ្យយើងឈរលើទីតាំងដ៏ល្អមួយសម្រាប់អភិវឌ្ឍខ្លួនបន្ថែមទៀត។ ដោយមានការគាំទ្រឥតងាករេរបស់អតិថិជន បុគ្គលិកប្រកបដោយសមត្ថភាព និងការគាំទ្រផ្នែកច្បាប់យ៉ាងរឹងមាំពីធនាគារជាតិនៃកម្ពុជា បណ្ឌិត សឿង ម៉ូរ៉ារិទ្ធ មានទំនុកចិត្តថា ធនាគារនឹងមិនត្រឹមតែសម្រេចបានតាមគោលដៅប៉ុណ្ណោះទេ ប៉ុន្តែអាចលើសពីគោលដៅរបស់ខ្លួនក្នុងឆ្នាំខាងមុខ។ លោកថ្លែងថា ៖«យើងឈានចូលដល់ឆ្នាំ២០២៥ ជាមួយនឹងចក្ខុវិស័យច្បាស់លាស់៖ ដើម្បីបន្តធ្វើជាដៃគូហិរញ្ញវត្ថុដែលទំនុកចិត្តសម្រាប់អតិថិជន រក្សាស្តង់ដារក្រមសីលធម៌ខ្ពស់បំផុត និងរួមចំណែកដល់កំណើនហិរញ្ញវត្ថុ និងសេដ្ឋកិច្ចរបស់ប្រទេសកម្ពុជា»។

ជាមួយនឹងការបើកដំណើរការទីស្នាក់ការកណ្តាលនៅក្នុង Chief Tower នាពេលខាងមុខនេះ និងការបន្តការប្តេជ្ញាចិត្តរបស់ខ្លួនចំពោះការអនុវត្តធុរកិច្ចប្រកបដោយក្រមសីលធម៌ធនាគារ ឈីហ្វ បានកំណត់សម្រាប់ភាពជោគជ័យជា បន្តនៅក្នុងវិស័យហិរញ្ញវត្ថុដែលមានការប្រកួតប្រជែង និងផ្លាស់ប្តូរជានិច្ច។ ធនាគារនៅតែផ្តោតលើការកសាងទំនាក់ទំនងរយៈពេលវែងដោយសុចរិតភាព និងការជំរុញទំនុកចិត្ត ដែលជាធាតុផ្សំដ៏សំខាន់សម្រាប់កំណើនប្រកបដោយនិរន្តរភាព និងវិបុលភាពនៅកម្ពុជា។

ក្នុងឱកាសចូលឆ្នាំថ្មី ឆ្នាំសកល ២០២៥ នេះ បណ្ឌិត សឿង ម៉ូរ៉ារិទ្ធ សូមថ្លែងអំណរគុណយ៉ាងជ្រាលជ្រៅចំពោះការគាំទ្ររបស់រាជរដ្ឋាភិបាលកម្ពុជា ជាពិសេសធនាគារជាតិនៃកម្ពុជា (NBC) អគ្គនាយកដ្ឋានពន្ធដារ (GDT) និងអាជ្ញាធរពាក់ព័ន្ធគ្រប់លំដាប់ថ្នាក់ក៏ដូចជាដៃគូអាជីវកម្មរបស់ធនាគារ និងអតិថិជនទាំងអស់៕