ដោយ: គង់ លាងហួរ
អន្តរជាតិ: នាយករដ្ឋមន្ត្រីវៀតណាមលោក Pham Minh Chinh បានអះអាងថា ទីក្រុងហូជីមិញត្រូវការដើមទុនចំនួន២០០ពាន់លានដុល្លារ ក្នុងរយៈពេល៥ឆ្នាំខាងមុខដើម្បីបោះទុនវិនិយោគលើហេដ្ឋារចនាសម្ព័ន្ធ និងការអភិវឌ្ឍន៍ទីក្រុង។

ផែនការអភិវឌ្ឍន៍នេះបានគូសបញ្ជាក់អំពីគម្រោងសំខាន់ៗ ដោយទាមទារឱ្យមានការប្រមូលធនធានពីប្រជាជន អ្នកធុរកិច្ចក្នុងស្រុក និងបរទេស ដើម្បីអនុវត្តន៍ផែនការរបស់ទីក្រុងហូជីមិញឱ្យដំណើរការទៅមុខ។

យោងតាមផែនការនៅឆ្នាំ២០៣០ ទីក្រុងហូជីមិញមានគោលបំណងប្រែក្លាយខ្លួនទៅជាទីក្រុងសកល ដែលមានកម្លាំងពលកម្មប្រកបដោយគុណភាពខ្ពស់ វិស័យសេវាកម្ម និងឧស្សាហកម្មទំនើប និងជាមជ្ឈមណ្ឌលឈានមុខគេផ្នែកសេដ្ឋកិច្ចបៃតង សេដ្ឋកិច្ចឌីជីថល និងនវានុវត្តន៍សង្គម។

ទីក្រុងហូជីមិញបានកំណត់គោលដៅប្រាក់ចំណូលជាមធ្យមសម្រាប់ប្រជាជនម្នាក់ៗយ៉ាងតិចចំនួន៣៨៥លានដុងក្នុងមួយឆ្នាំនៅត្រឹមឆ្នាំ២០៣០ និងបង្កើនចំនួនប្រជាជនអចិន្ត្រៃយ៍ឱ្យកើនឡើងដល់ចំនួន១១លាននាក់។

ផែនការនេះក៏បានគូសបញ្ជាក់ផងដែរអំពីការអភិវឌ្ឍន៍បណ្តាញដឹកជញ្ជូន រួមមានផ្លូវថ្នល់ ផ្លូវដែក ផ្លូវទឹក កំពង់ផែសមុទ្រ អាកាសយានដ្ឋាន ប្រព័ន្ធទិន្នន័យចរាចរណ៍ និងកំពង់ផែស្ងួត។

គម្រោងសំខាន់ៗរួមមាន ការកសាងផ្លូវតាមបណ្តោយដងទន្លេ Saigon ពីស្រុក Cu Chi ទៅកាន់តំបន់ Can Gio ជាយក្រុងហូជីមិញ និងផ្លូវឆ្នេរសមុទ្រភាគខាងត្បូង។ ផែនការនេះក៏រួមបញ្ចូលការស្ថាបនាផ្លូវដែកថ្មី និងខ្សែរថភ្លើងនៅក្នុងទីក្រុងចំនួន១២ខ្សែ។

នាយករដ្ឋមន្ត្រីវៀតណាមរូបនេះបានទទួលស្គាល់អំពីភាពជោគជ័យនៃការបើកដាក់ឱ្យប្រើប្រាស់ខ្សែរថភ្លើងក្រោមដី Ben Thanh-Suoi Tien ដែលជាប្រភេទរថភ្លើងក្រោមដីដំបូងបង្អស់ទីមួយក្នុងទីក្រុងហូជីមិញ ដោយលោកបានលើកទឹកចិត្តឱ្យទីក្រុងហូជីមិញស្វែងយល់បន្ថែមអំពីសក្តានុពលនៃទីធ្លាក្រោមដីរបស់ខ្លួន។

លោកក៏បានបង្ហើបឱ្យដឹងផងដែរពីការពិភាក្សាគ្នាជាមួយកំពូលមហាសេដ្ឋីវៀតណាមលោក Pham Nhat Vuong ប្រធានក្រុមហ៊ុនឯកជនធំបំផុតរបស់វៀតណាម Vingroup អំពីការសាងសង់ប្រព័ន្ធរថភ្លើងក្រោមដីពីទីប្រជុំជនកណ្តាលទីក្រុងហូជីមិញទៅកាន់សង្កាត់ជាយក្រុង Can Gio៕ប្រភព: Vnexpress៕

ដោយ: គង់ លាងហួរ
អន្តរជាតិ: កាសែតអង់គ្លេស Financial Times បានរាយការណ៍ថា ប្រទេសចិនកំពុងព្យាយាមដណ្តើមចំណែកនៃទីផ្សារយន្តហោះពីក្រុមហ៊ុនយក្សដូចជាក្រុមហ៊ុន Boeing របស់សហរដ្ឋអាមេរិក និងក្រុមហ៊ុន Airbus របស់តំបន់អឺរ៉ុប។

បច្ចុប្បន្ន ក្រុមហ៊ុនផលិតយន្តហោះដឹកអ្នកដំណើរដំបូងគេរបស់ប្រទេសចិន Comac កំពុងស្វែងរកអាជ្ញាបណ្ណ ដើម្បីអាចឱ្យយន្តហោះម៉ាក C919 របស់ខ្លួនអាចហោះហើរហួសពីដែនអាកាសរបស់ប្រទេសចិនជាផ្លូវការ។

លោក Yang Yang អគ្គនាយករងទទួលបន្ទុកផ្នែកទីផ្សារ និងការលក់របស់ក្រុមហ៊ុនរដ្ឋចិន Comac បានថ្លែងប្រាប់កាសែត Financial Times ថា ក្រុមហ៊ុនមានគោលបំណងធ្វើឱ្យយន្តហោះនេះមានសិទ្ធិហោះហើរនៅតំបន់អាស៊ាននៅឆ្នាំ២០២៦ និងព្យាយាមស្វែងរកវិញ្ញាបនបត្រទទួលស្គាល់ពីសហភាពអឺរ៉ុបនៅដើមឆ្នាំ២០២៥នេះ។

លោក Yang បន្តថា Comac នឹងបើកដំណើរការយន្តហោះរបស់ខ្លួនឱ្យហោះហើរកាន់តែច្រើននៅក្នុងប្រទេសចិន ដើម្បីកំណត់ឱ្យបានហ្មត់ចត់នូវបញ្ហាណាមួយដែលអាចកើតមាន មុនពេលនាំយកយន្តហោះរបស់យើងទៅកាន់តំបន់អាស៊ាន។

យន្តហោះ C919 ជាគម្រោងដ៏សំខាន់មួយក្នុងផែនការជំរុញរបស់លោកប្រធានាធិបតីចិន សុី ជីនពីង Xi ដើម្បីបង្កើនខ្សែសង្វាក់តម្លៃបច្ចេកវិទ្យារបស់ប្រទេសចិន ក្នុងគោលដៅឈានទៅរកការប្រកួតប្រជែងជាមួយក្រុមហ៊ុន Boeing និងក្រុមហ៊ុន Airbus របស់លោកខាងលិច។

បញ្ហាហិរញ្ញវត្ថុ និងការពន្យារពេលក្នុងការប្រគល់យន្តហោះរបស់ក្រុមហ៊ុន Boeing ទៅឱ្យអតិថិជន បូករួមទាំងបញ្ហាកង្វះខាតផ្នែកម៉ាស៊ីន និងគ្រឿងបន្លាស់របស់ក្រុមហ៊ុន Airbus បានជះផលប៉ះពាល់ដល់វិស័យអាកាសចរណ៍ពិភពលោក និងផ្តល់ក្តីសង្ឃឹមសម្រាប់ក្រុមហ៊ុនចិន Comac ដែលជាអ្នកចំណូលថ្មីក្នុងការប្រឡូកក្នុងឧស្សាហកម្មផលិតយន្តហោះ។

យោងតាមការព្យាករណ៍របស់ក្រុមហ៊ុន Airbus បានបង្ហាញថា ពិភពលោកនឹងត្រូវការយន្តហោះថ្មីចំនួន៤២.៤៣០គ្រឿងក្នុងរយៈពេល២ទសវត្សរ៍ខាងមុខ៕ប្រភព: Financial Times៕

ដោយ: គង់ លាងហួរ
អន្តរជាតិ: យោងតាមកាសែត South China Morning Post បានចុះផ្សាយថា គម្រោងលំនៅដ្ឋានធំៗចំនួន១០ ដែលមានផ្ទះល្វែងថ្មីយ៉ាងតិចចំនួន១០.០០០យូនីតនឹងវាយលុកចូលទីផ្សារនៃទីក្រុងហុងកុងនៅក្នុងឆ្នាំ២០២៥។

ស្របពេលជាមួយគ្នានេះ បណ្តាអ្នកអភិវឌ្ឍន៍នៅតែបន្តកាត់បន្ថយតម្លៃផ្ទះល្វែងរបស់ខ្លួន ដើម្បីលក់ចេញបង្ហើយផ្ទះដែលនៅសេសសល់ ខណៈពេលមានការកាត់បន្ថយអត្រាការប្រាក់ និងការកើនឡើងនៃទំនុកចិត្តក្នុងការទិញផ្ទះ។

បណ្តាអ្នកអភិវឌ្ឍន៍ ដែលគ្រោងបើកដំណើរការលក់គម្រោងលំនៅដ្ឋានថ្មី រួមមានក្រុមហ៊ុន CK Asset Holdings ដ៏ល្បីរបស់លោកមហាសេដ្ឋី Li Ka-shing ក្រុមហ៊ុន Sun Hung Kai Properties ក្រុមហ៊ុន Henderson Land ក្រុមហ៊ុន China Overseas Land & Investment ក្រុមហ៊ុន New World Development ក្រុមហ៊ុន Sino Land ក្រុមហ៊ុន Kerry Properties និងក្រុមហ៊ុន Wheelock Properties ។

ក្រុមអ្នកជំនាញឧស្សាហកម្មបានលើកឡើងថា “នេះជាពេលវេលាដ៏ល្អក្នុងការទិញផ្ទះសម្រាប់ប្រើប្រាស់ ឬរស់នៅដោយខ្លួនឯង។ ប៉ុន្តែ យ៉ាងណាមិញ ទីផ្សារនឹងនៅតែមិនអាចទាក់ទាញអ្នកទិញក្នុងគោលបំណងវិនិយោគបានឡើយ”។

លោក Joseph Tsang ប្រធានក្រុមហ៊ុន JLL ប្រចាំទីក្រុងហុងកុង បានអះអាងថា “ពេលនេះប្រហែលជាមិនមែនជាពេលវេលាដ៏ល្អសម្រាប់អ្នកវិនិយោគក្នុងការចូលទៅក្នុងទីផ្សារនោះទេ ដោយសារតម្លៃជួលមិនទាន់ប្រែទៅជាវិជ្ជមាន ហើយផលចំណេញមូលធននៅតែបន្តធ្លាក់ចុះ”។

យោងតាមភ្នាក់ងារអចលនទ្រព្យនានាបានឱ្យដឹងថា តំបន់ Kai Tak ដែលជាអតីតទីតាំងអាកាសយានដ្ឋានរបស់ទីក្រុងហុងកុងនឹងក្លាយជាជាសមរភូមិដ៏ក្ដៅម្តងទៀតសម្រាប់ការប្រកួតប្រជែងបើកដំណើរការគម្រោងលក់លំនៅដ្ឋានថ្មីនៅឆ្នាំនេះ៕ប្រភព: SCMP៕

ដោយៈ គង់ សូរិយា

    ភ្នំពេញៈ លោកយិន លាងគង់ សហស្ថាបនិកនិងជាអគ្គនាយកគេហទំព័រPropertyarea.asia& Cambodiafinancialtimes.com សូមផ្ញើសារលិខិត សូមគោរពជូនពរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិ តពេជ ចន្ទមុន្នី ហ៊ុនម៉ាណែត ក្នុងឱកាសខួប១៩ឆ្នាំនៃចំណងអាពាហ៍​ពិពាហ៍ ត្រូវនឹងថ្ងៃទី៧ ខែមករា ឆ្នាំ២០២៥។

ក្នុងឱកាសប្រកបដោយសិរីមង្គលប្រសើរថ្លៃថ្លា យើងខ្ញុំទាំងអស់គ្នា សូមសម្តែងនូវអំណរសាទរ និងសូមគោរពជូននូវសព្ទសាធុការពរជ័យ ដោយស្មោះអស់ពីដួងចិត្ត។ ជាការពិតណាស់ ក្នុងចំណងអាពាហ៍ពិពាហ៍ ជាអមតៈរបស់សម្តេចធិបតីនាយករដ្ឋមន្ត្រី និងលោកជំទាវបណ្ឌិត បាននឹងកំពុងបន្តនិរន្តរភាពដឹកនាំ តាមគំរូវីរភាពដ៏ខ្ពង់ខ្ពស់បំផុត របស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តាមរយៈការបន្តពូនជ្រុំថែទាំ “សន្តិភាព ស្ថិរភាពនយោបាយ និងការអភិវឌ្ឍ” ព្រមទាំងការលះបង់កម្លាំងកាយចិត្ត និងប្រាជ្ញាស្មារតីដោយមិនខ្លាចនឿយហត់ ដើម្បីសម្រេចបាននូវសមិទ្ធផល ជាបន្តបន្ទាប់ជូនជាតិមាតុភូមិ ហើយបញ្ហាអាយុជីវិត និងសុខទុក្ខរបស់ប្រជាជនកម្ពុជា នៅតែជាការងារអាទិភាពខ្ពស់បំផុត របស់រាជរដ្ឋាភិបាល នៅគ្រប់ដំណាក់កាលទាំងអស់។

នាទិវាដ៏មហាមង្គលសួស្តីប្រពៃថ្លៃថ្នានេះ យើងខ្ញុំទាំងអស់គ្នា សូមបួងសួង ដល់គុណបុណ្យព្រះរតនត្រ័យ កែវទាំងបី វត្ថុស័ក្តិសិទ្ធិទាំងឡាយក្នុងលោក ទេវតាថែរក្សាទឹកដីនៃព្រះរាជាណាចក្រកម្ពុជា សូមជួយប្រសិទ្ធពរជ័យបវរសួស្តី សិរីមង្គល វិបុលសុខ មហាប្រសើរគ្រប់ប្រការជូនសម្តេចធិបតីនាយករដ្ឋមន្ត្រី និងលោកជំទាវបណ្ឌិត ព្រមទាំងបុត្រាបុត្រី ជាទីស្រឡាញ់ សូមឱ្យចំណងអាពាហ៏ពិពាហ៍ កាន់តែមានភាពផ្អែមល្ហែមត្រជាក់ត្រជំ ដូចទឹកអម្រឹត និងសូមបានសមប្រកប នូវពុទ្ធពរទាំងបួនប្រការ គឺ អាយុ វណ្ណៈ សុខៈ ពលៈ ជានិច្ចនិរន្តរ៍កុំបីឃ្លៀងឃ្លាតឡើយ៕

ដោយ: គង់ លាងហួរ
អន្តរជាតិ: ទីក្រុងបាងកកជាមជ្ឈមណ្ឌលសេដ្ឋកិច្ចដ៏សំខាន់របស់ប្រទេសថៃ និងជាទីចាប់អារម្មណ៍របស់ជនបរទេសក្នុងការទិញផ្ទះ ឬខុនដូ ព្រោះទីក្រុងនេះមានរបៀបរស់នៅដ៏ទាន់សម័យ និងប្រព័ន្ធដឹកជញ្ជូនសាធារណៈខ្វាត់ខ្វែង។

យោងតាមកាសែតថៃ Bangkok Post បានដកស្រង់ចុះផ្សាយថា តំបន់ “Bang Na-Lat Krabang” ជាទីតាំងទិញខុនដូដ៏ទាក់ទាញ និងមានតម្រូវការខ្ពស់ជាងគេបំផុតទី១ នៅក្នុងទីក្រុងបាងកក ដោយសារតំបន់នេះមានទីតាំងនៅជិតសាកលវិទ្យាល័យ និងតំបន់ឧស្សាហកម្ម។

ខុនដូនៅក្នុងតំបន់ Bang Na-Lat Krabang មានតម្លៃលក់ជាមធ្យមចំនួន៦៩.០០០បាត(ប្រហែល១.៩៩១ដុល្លារ)ក្នុងមួយម៉ែត្រការ៉េ។នេះបើយោងតាមប្រភពពីក្រុមហ៊ុនប្រឹក្សាស្រាវជ្រាវអចលនទ្រព្យ Terra Media and Consulting។

ចំណាត់ថ្នាក់ទី២ បានទៅលើតំបន់“Ramkhamhaeng-Bang Kapi” ដោយសារតំបន់នេះមានទីតាំងនៅជិតខ្សែរថភ្លើងធំៗ។ ខុនដូនៅតំបន់នេះមានតម្លៃជាមធ្យមចំនួន១០៥.០០០បាត(ប្រហែល៣.០៣០ដុល្លារ)ក្នុងមួយម៉ែត្រការ៉េ។

ចំណាត់ថ្នាក់ទី៣ បានទៅលើតំបន់ “Rangsit-Ku Kot”ដែលមានភូមិសាស្ត្រនៅជិតសាកលវិទ្យាល័យ និងផ្លូវរថភ្លើងលើអាកាស។ តម្លៃខុនដូជាមធ្យមនៅតំបន់ Rangsit-Ku Kot មានទំហំទឹកប្រាក់ចំនួន៦៧.០០០បាត(ប្រហែល១.៩៣៤ដុល្លារ)ក្នុងមួយម៉ែត្រការ៉េ។

ចំណែកឯ ចំណាត់ថ្នាក់ទី៤ បានទៅលើតំបន់ “Kaset-Ram Intra” ដែលត្រូវបានជំរុញជាចម្បង ដោយសារមធ្យោបាយដឹកជញ្ជូនងាយស្រួលជាច្រើន។ តម្លៃខុនដូនៅតំបន់នេះត្រូវបានដាក់លក់ក្នុងតម្លៃជាមធ្យមចំនួន៨៥.០០០បាត(ប្រហែល២.៤៥៣ដុល្លារ)ក្នុងមួយម៉ែត្រការ៉េ៕ប្រភព: Bangkok Post៕

ដោយ: គង់ លាងហួរ
អន្តរជាតិ: តំបន់សេដ្ឋកិច្ចពិសេស Johor-Singapore Special Economic Zone (SEZ) រវាងរដ្ឋ Johor របស់ប្រទេសម៉ាឡេសុី និងប្រទេសសិង្ហបុរីកំពុងត្រូវបានប្រែក្លាយទៅជាតំបន់ដ៏មានសក្តានុពលសម្រាប់ការវិនិយោគ និងបំពេញបន្ថែមឱ្យគ្នាទៅវិញទៅមក។

តំបន់សេដ្ឋកិច្ចពិសេសមិនត្រឹមតែទាក់ទាញចំណាប់អារម្មណ៍ពីបណ្តាក្រុមហ៊ុននានាក្នុងប្រទេសសិង្ហបុរីប៉ុណ្ណោះទេ ប៉ុន្តែថែមទាំងទាក់ទាញការចាប់អារម្មណ៍ជាច្រើនពីអ្នកធុរកិច្ចចិនដែលគ្រោងពង្រីកប្រតិបត្តិការរបស់ពួកគេ។

រដ្ឋ Johor បានក្លាយជាទីចាប់អារម្មណ៍របស់បណ្តាក្រុមហ៊ុនចិនជាច្រើនរួចទៅហើយ ខណៈកិច្ចព្រមព្រៀងផ្លូវការដើម្បីបង្កើតតំបន់សេដ្ឋកិច្ចពិសេសមួយនេះរំពឹងថា នឹងត្រូវបានចុះហត្ថលេខានៅថ្ងៃអង្គារ ទី៧ ខែមករាស្អែកនេះ។

ការចុះហត្ថលេខារួមគ្នានេះគ្រោងនឹងធ្វើឡើងនៅក្នុងកំឡុងពេលនៃជំនួបក្រៅផ្លូវការប្រចាំឆ្នាំលើកទី១១រវាងនាយករដ្ឋមន្ត្រីម៉ាឡេសុីលោក Anwar Ibrahim និងសមភាគីសិង្ហបុរីលោក Lawrence Wong។

ជំនួបក្រៅផ្លូវការនេះ (Leaders’ Retreat) ជាវេទិកាដ៏សំខាន់មួយសម្រាប់នាយករដ្ឋមន្ត្រីម៉ាឡេសុី និងសិង្ហបុរីដើម្បីកំណត់ទិសដៅរួមសម្រាប់កិច្ចសហប្រតិបត្តិការទ្វេរភាគី និងកំណត់វិធីសាស្ដ្រថ្មីៗដើម្បីបង្កើនការតភ្ជាប់បន្ថែមទៀត សំដៅផ្តល់អត្ថប្រយោជន៍ជាក់ស្តែងដល់ប្រជាជនសិង្ហបុរី និងម៉ាឡេស៊ី។

លោក Lee Ting Han ប្រធានគណៈកម្មាធិការទទួលបន្ទុកផ្នែកវិនិយោគ ពាណិជ្ជកម្ម កិច្ចការអ្នកប្រើប្រាស់ និងធនធានមនុស្សប្រចាំរដ្ឋ Johor បានលើកឡើងថា “រដ្ឋស្ថិតនៅភាគខាងត្បូងនៃប្រទេសម៉ាឡេស៊ីមួយនេះបានក្លាយជាគោលដៅវិនិយោគរបស់បណ្តាក្រុមហ៊ុនចិន”។

បណ្តាក្រុមហ៊ុនចិនទាំងនោះសង្ឃឹមថា លំហូរអ្នកដំណើរ និងការដឹកជញ្ជូនទំនិញនឹងត្រូវបានធ្វើឱ្យប្រសើរឡើង តាមរយៈការបន្តបង្កើនការអភិវឌ្ឍន៍ស្ពាន“Causeway” ដែលតភ្ជាប់រវាងទីក្រុងសិង្ហបុរី ជាមួយរដ្ឋ Johor។

ការណ៍នេះនឹងអនុញ្ញាតឱ្យបណ្តាក្រុមហ៊ុនចិនចូលទៅកាន់ប្រព័ន្ធដឹកជញ្ជូនរបស់សិង្ហបុរីកាន់តែមានប្រសិទ្ធភាព និងជួយសម្រួលដល់ការធ្វើដំណើរកាន់តែងាយស្រួលសម្រាប់ដៃគូអាជីវកម្ម៕ប្រភព: The Business Times ៕

ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃ ក្នុងការជួញដូរនៅព្រឹកថ្ងៃច័ន្ទនេះ ខណៈមានការព្យាករណ៍នានាដែលបង្ហាញពីសុទិដ្ឋិនិយមចំពោះតម្រូវការមាស ដោយសារភាពមិនច្បាស់លាស់នៃទិដ្ឋភាពភូមិសាស្ត្រនយោបាយសកលនៅតែបន្តអូសបន្លាយ។

តួយ៉ាង តម្លៃមាស Spot Gold បានងើបឡើង០,០៣ភាគរយដល់២៦៤០ដុល្លារក្នុងមួយអោន។ យ៉ាងណាមិញ តម្លៃហាងឆេងមាសរបស់សហរដ្ឋអាមេរិក U.S. gold futures បានធ្លាក់ចុះ០,០៨ភាគរយដល់២៦៥២,៥០ដុល្លារក្នុងមួយអោនគិតត្រឹមម៉ោង១០:៤៥នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៨៨,៨ភាគរយ ដែលធនាគារកណ្តាលអាមេរិក (Fed) នឹងរក្សាទុកអត្រាការប្រាក់របស់ខ្លួនឱ្យនៅថេរដដែលក្នុងកិច្ចប្រជុំគោលនយោបាយនៅថ្ងៃទី២៩ ខែមករានេះ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានធ្លាក់ថ្លៃចុះដល់១០៨,៨៨ពិន្ទុនៅព្រឹកថ្ងៃច័ន្ទនេះបន្ទាប់ពីបិទការជួញដូរត្រឹម១០៨,៩៥ពិន្ទុកាលពីថ្ងៃសុក្រសប្តាហ៍មុន៕