អន្តរជាតិ: ​តម្លៃហាងឆេងមាសបានងើបឡើងថ្លៃនៅព្រឹកថ្ងៃអង្គារនេះ ខណៈក្រុមអ្នកវិនិយោគកំពុងរង់ចាំអ៊ុតមើលការចេញផ្សាយទិន្នន័យអតិផរណារបស់សហរដ្ឋអាមេរិក ដែលអាចជះឥទ្ធិពលដល់គោលនយោបាយអត្រាការប្រាក់នាពេលខាងមុខ។

តួយ៉ាង តម្លៃមាស Spot Gold បានងើបឡើង០,០៣%ដល់២៣៩៨,៣១ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,១៣%ដល់២៣៩៧,៨០ដុល្លារក្នុងមួយអោន គិតត្រឹមម៉ោង១០:២៨នាទីព្រឹក។

នៅសប្តាហ៍នេះ ក្រុមអ្នកវិនិយោគនឹងរង់ចាំអ៊ុតមើលទិន្នន័យកំណើនសេដ្ឋកិច្ចអាមេរិកនៅត្រីមាសទី២ដែលគ្រោងចេញផ្សាយនៅថ្ងៃព្រហស្បតិ៍ និងសន្ទស្សន៍ថ្លៃចំណាយលើការប្រើប្រាស់ផ្ទាល់ខ្លួន(PCE)របស់សហរដ្ឋអាមេរិក ដែលគ្រោងចេញផ្សាយនៅថ្ងៃសុក្រ។ ទិន្នន័យទាំង២នេះអាចផ្តល់តម្រុយបន្ថែមទៀតអំពីពេលវេលានៃការកាត់បន្ថយអត្រាការប្រាក់របស់ធនាគារកណ្តាលអាមេរិក។

បន្ថែមលើនោះ ប្រាក់ដុល្លារអាមេរិកបានធ្លាក់ថ្លៃចុះ ដែលការណ៍នេះបានធ្វើឱ្យតម្លៃមាសងើបឡើងថ្លៃ បន្ទាប់ពីប្រធានាធិបតី​អាមេរិកលោក ចូ បៃដិន បាន​ប្រកាសដកខ្លួន​ចេញពី​ការ​ប្រកួតប្រជែង​តំណែង​ប្រធានាធិបតីនាខែវិច្ឆិកាខាងមុខ។

ជាមួយគ្នានេះ ក្រុមអ្នកវិនិយោគក៏គ្រោងនឹងផ្តោតលើការថ្លែងសុន្ទរកថារបស់លោក Jerome Powell ប្រធានធនាគារ Fed  នៅចុងបញ្ចប់កិច្ចប្រជុំគោលនយោបាយរបស់ធនាគារ Fed ចាប់ពីថ្ងៃទី៣០ ដល់ថ្ងៃទី៣១ ខែកក្កដានេះ។

នាពេលនេះ ទីផ្សារមើលឃើញឱកាសចំនួន៩៤ភាគរយ ដែលធនាគារកណ្តាលអាមេរិក(Fed) អាចនឹងបញ្ចុះអត្រាការប្រាក់លើកដំបូងនៅក្នុងខែកញ្ញាខាងមុខ។ នេះបើយោងតាមឧបករណ៍ CME FedWatch ដែលត្រូវបានដកស្រង់ចុះផ្សាយដោយសារពត៌មាន Reuters។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណដុល្លារអាមេរិក ធៀបទៅនឹងរូបិយប័ណ្ណដៃគូប្រជែងធំៗចំនួន៦ ដូចជាប្រាក់យ៉េន និងប្រាក់អឺរ៉ូជាដើម បានធ្លាក់ថ្លៃចុះដល់១០៤,២២ពិន្ទុនៅព្រឹកថ្ងៃអង្គារនេះ បន្ទាប់ពីបានបិទការជួញដូរត្រឹម១០៤,៣១ពិន្ទុកាលពីថ្ងៃច័ន្ទម្សិលមិញ។

តម្លៃលោហៈធាតុប្រាក់ Spot silver បានធ្លាក់ចុះ០,៤៥%ដល់២៩,១៩ដុល្លារ ក្នុងមួយអោន ខណៈតម្លៃផ្លាទីន បានងើបឡើង០,៣៤%ដល់៩៥៩,៩០ដុល្លារក្នុងមួយអោន ហើយតម្លៃ palladium បានងើបឡើង០,២៥%ដល់៨៩៥ដុល្លារក្នុងមួយអោន គិតត្រឹមម៉ោង១០:៣១នាទីព្រឹកថ្ងៃអង្គារនេះ។

ចំណែកឯ ផ្សារហ៊ុននៅតំបន់អាស៊ីក៏បានងើបឡើងថ្លៃផងដែរនៅព្រឹកថ្ងៃអង្គារនេះ បន្ទាប់ពីបានធ្លាក់ថ្លៃចុះដល់កម្រិតទាបបំផុតក្នុងរយៈពេល១ខែ ខណៈភាគហ៊ុនរបស់បណ្តាក្រុមហ៊ុនផលិតបន្ទះឈីបតៃវ៉ាន់ និងអាមេរិក បានបង្ហាញសញ្ញាវិជ្ជមានឡើងវិញ។

តាមរយៈការជួញដូរនៅព្រឹកថ្ងៃអង្គារនេះ សន្ទស្សន៍​ផ្សារហ៊ុន​នៅតំបន់អាស៊ី​​របស់ក្រុមហ៊ុនអាមេរិក MSCI នៅ​ក្រៅ​ប្រទេស​ជប៉ុន​ បានងើបឡើងថ្លៃប្រមាណ០,៦០ភាគរយ គិតត្រឹមម៉ោង១០:៣៥នាទីព្រឹក។

ជាមួយគ្នានេះដែរ ផ្សារហ៊ុន Nikkei របស់ប្រទេសជប៉ុនបានងើបឡើងថ្លៃ០,២០ភាគរយ ខណៈពេលដែលសន្ទស្សន៍ផ្សារហ៊ុន Hang Seng របស់ទីក្រុងហុងកុងបានធ្លាក់ថ្លៃចុះប្រមាណ០,១១ភាគរយ។

ដោយឡែក សន្ទស្សន៍ផ្សារហ៊ុនបន្ទះឈីបពណ៌ខៀវ CSI300 របស់ប្រទេសចិន បានធ្លាក់ថ្លៃចុះ១,០៥ភាគរយ ខណៈដែលសន្ទស្សន៍ផ្សារហ៊ុន shanghai Composite បានធ្លាក់ថ្លៃចុះ០,៥៩ភាគរយ។

រីឯ ផ្សារហ៊ុនរបស់ប្រទេសអូស្ត្រាលី S&P /ASX 200 បានងើបឡើងថ្លៃ០,៦៤ភាគរយ ខណៈពេលដែលសន្ទស្សន៍ផ្សារហ៊ុន KOSPI របស់ប្រទេសកូរ៉េខាងត្បូងបានងើបឡើងថ្លៃ០,២៦ភាគរយ៕

អន្តរជាតិ: ក្រុមហ៊ុនស្ថាបត្យកម្មដ៏ល្បីល្បាញ Büro Ole Scheeren របស់អាល្លឺម៉ង់បានបង្ហាញផែនការឌីហ្សាញបែប Scenic City សម្រាប់អគារទីស្នាក់ការកណ្តាលរបស់ក្រុមហ៊ុនខ្នាតយក្សចិន JD.com ដោយក្នុងនោះ អគារផ្នែកខាងមុខនឹងត្រូវបានរចនាឡើងឱ្យស្រដៀងទៅនឹងទឹកជ្រោះដែលកំពុងហូរធ្លាក់ចុះពីលើកំពូលអគារ។

គម្រោងនេះមានទីតាំងស្ថិតនៅសង្កាត់ Nanshan ក្នុងទីក្រុង Shenzhen ប្រទេសចិន ដែលជាមជ្ឈមណ្ឌលពាណិជ្ជកម្ម និងហិរញ្ញវត្ថុដែលទើបបង្កើតថ្មី និងជាអគារទីស្នាក់ការថ្មីរបស់ក្រុមហ៊ុនបច្ចេកវិទ្យាយក្សរបស់ចិនជាច្រើន។

អគារមួយគូរ ដែលផុសត្រដែតឡើងក្បែរគ្នានេះ នឹងរួមមានការិយាល័យ សណ្ឋាគារ ហាងលក់រាយ និងមជ្ឈមណ្ឌលវប្បធម៌សរុបទំហំ១៨៦.០០០ម៉ែត្រការ៉េ និងមានកន្លែងតាំងពិព័រណ៍នៅជាប់គ្នា ដែលមានរោងកុនចំនួន១៥០កៅអី។

ក្នុងចំណោមអគារទាំង២នោះ អគារមួយមានកម្ពស់១៨៨ម៉ែត្រ ដែលនឹងក្លាយជាទីស្នាក់ការកណ្តាលរបស់ក្រុមហ៊ុន JD.com ខណៈដែលផ្នែកលយទៅខាងមុខនៃអគារដដែលនេះនឹងត្រូវដាក់ឱ្យប្រើប្រាស់សម្រាប់រៀបចំព្រឹត្តិការណ៍វប្បធម៌ផ្សេងៗ។

ចំណែកឯ អគារមួយទៀតដែលស្ថិតនៅទិសខាងលិចមានកម្ពស់១៣១ម៉ែត្រ ដែលនឹងរួមមានសេវាកកម្មមួយចំនួនដូចជា សណ្ឋាគារសម្រាប់ទទួលភ្ញៀវស្នាក់នៅ និងការិយាល័យសម្រាប់ជួលឱ្យក្រុមហ៊ុនបច្ចេកវិទ្យាធំៗ

ផែនការឌីហ្សាញបែប Scenic City ក្រុមហ៊ុនស្ថាបត្យកម្ម Büro Ole Scheeren បង្កប់នូវគំនិតក្នុងរួមបញ្ចូលនូវសម្រស់បែបធម្មជាតិជុំវិញអគារ ដោយមានរចនាបថស្រដៀងនឹងទឹកជ្រោះដែលកំពុងហូរធ្លាក់ចុះមកក្រោម ដើម្បីបង្កើតឡើងនូវជីវិតសាធារណៈ និងជីវិតសង្គមទាំងនៅក្នុងអគារ ក៏ដូចជាបរិយាកាសទីក្រុងខាងក្រៅ។

ចំណែកឯ អគារតូចៗដែល លយមកកាន់ផ្នែកខាងមុខនៃអគារមេទាំង២ អាចជួយស្រូបខ្យល់ចេញ-ចូលបែបធម្មជាតិ និងគ្រប់គ្រងឥទ្ធិពលលើចំណាំងផ្លាតពន្លឺកញ្ចក់អគារ ដើម្បីសម្របទៅនឹងបរិយាកាសខាងក្រៅដែលមានកំដៅសីតុណ្ហភាពក្តៅខ្លាំង និងមានភ្លៀងធ្លាក់ខ្លាំងក្នុងតំបន់ដោយប្រែប្រួលទៅតាមរដូវកាល៕ប្រភព: Dezeen៕

បាងកក: កាល​ពី​៤០​ឆ្នាំ​មុន ក្រុមអ្នកស្រាវជ្រាវបានប្រទះឃើញឧស្ម័ន​ធម្មជាតិ​នៅ​ឈូង​សមុទ្រ​ថៃ ដែលនាំឱ្យមានការផ្តួចផ្តើមគម្រោងអភិវឌ្ឍន៍តំបន់ឆ្នេរសមុទ្រនៅភាគខាងកើតនៃប្រទេសថៃ និងបានទាក់ទាញការ​វិនិយោគ​បរទេស​យ៉ាងច្រើនសន្ធឹកសន្ធាប់ រហូតធ្វើ​ឱ្យ​​ប្រទេស​ថៃ​សង្ឃឹមថា ខ្លួននឹង​អាចក្លាយ​ជា​ខ្លា​សេដ្ឋកិច្ចទី​៥របស់​តំបន់អាស៊ី។

ប៉ុន្តែ ក្តីសុបិននេះបានរលាយបាត់ទៅវិញដោយសារថៃជួបប្រទះអស្ថិរភាពនយោបាយផ្ទៃក្នុងប្រទេស និងការគ្រប់គ្រងគោលនយោបាយសេដ្ឋកិច្ចមិនបានល្អប្រសើរ បូករួមទាំងការផ្ទុះឡើងនូវវិបត្តិហិរញ្ញវត្ថុនៅឆ្នាំ១៩៩៧។

វិបត្តិនេះត្រូវបានបង្កឡើងដោយសារតែស្ថាប័នហិរញ្ញវត្ថុថៃបានផ្តល់ប្រាក់កម្ចីយ៉ាងច្រើនលើសលប់ជ្រុល និងការធ្វើសេរីភាវូបនីយកម្មទីផ្សារហិរញ្ញវត្ថុ ដែលអនុញ្ញាតឱ្យធនាគារពាណិជ្ជអាចខ្ចីប្រាក់ពីស្ថាប័នហិរញ្ញវត្ថុបរទេស ដើម្បីផ្តល់ប្រាក់កម្ចីដល់អ្នកប្រកបអាជីវកម្ម។

លោក Pornchai Thiraveja អគ្គនាយកនៃការិយាល័យគោលនយោបាយសារពើពន្ធចំណុះក្រោមក្រសួងហិរញ្ញវត្ថុថៃ បានលើកឡើងថា “ចាប់តាំងពីមានវិបត្តិហិរញ្ញវត្ថុកាលពីឆ្នាំ១៩៩៧-១៩៩៨ ទំហំវិនិយោ គសរុបរបស់វិស័យសាធារណៈ និងឯកជនបានធ្លាក់ចុះក្រោម២៥% នៃផលទុនជាតិសរុប”។

ផលធៀបរវាងទំហំទុនវិនិយោគឯកជន និងទំហំផលទុនជាតិសរុប(GDP) បានហក់ឡើងដល់កម្រិតកំពូល៤១% ក្នុងឆ្នាំ១៩៩៥ និងបានធ្លាក់ចុះមកត្រឹម១៨% នៅឆ្នាំ២០២៣។

ចំណែក ផលធៀបរវាងទំហំទុនវិនិយោគសាធារណៈ និងទំហំ GDP បានកើនឡើងដល់១៣% ក្នុងឆ្នាំ១៩៩៧ ប៉ុន្តែចាប់តាំងពីពេលនោះមក អត្រានេះបានធ្លាក់ចុះជាលំដាប់មកនៅត្រឹម៦%ប៉ុណ្ណោះ នៅឆ្នាំ២០២៣។

ក្នុងន័យនេះ លោក Pornchai បានសង្កត់ធ្ងន់ថា ប្រទេសថៃត្រូវតែពន្លឿនការជំរុញលំហូរទុនវិនិយោគដើម្បីស្តារសេដ្ឋកិច្ច និងដោះស្រាយបញ្ហារចនាសម្ព័ន្ធសេដ្ឋកិច្ច ដែលបានអូសបន្លាយអស់រយៈពេលយូរជាច្រើនទសវត្សរ៍កន្លងមកនេះ។

បើយោងតាមលោក Pornchai បានឱ្យដឹងថា ក្បាលម៉ាស៊ីនសេដ្ឋកិច្ចនាពេលបច្ចុប្បន្នរបស់ប្រទេសថៃ ពឹងផ្អែកលើ ការប្រើប្រាស់ឯកជនដែលមានចំណែក៥៩%នៃផលទុនជាតិសរុប ខណៈការវិនិយោគទាំងវិស័យឯកជន និងវិស័យសាធារណៈក្តោបបានចំណែក២៤%នៃផលទុនជាតិសរុប។

លោក​បាន​ឱ្យដឹងបន្ត​ថា​ “យើងចាំបាច់​ត្រូវ​ធ្វើពិពិធកម្ម​ការ​វិនិយោគ​របស់​យើង​ឆ្ពោះ​ទៅ​រក​ម៉ាស៊ីន​កំណើនសេដ្ឋកិច្ចថ្មី​ដែល​រួម​មាន​វិស័យ​មួយចំនួន ដូចជា​វិស័យកសិកម្ម អាហារ និង​ជីវបច្ចេកវិទ្យា ការថែទាំ​សុខភាព ព្រមទាំងវិស័យរថយន្ត និង​គ្រឿងចក្រជាដើម”។

លោក Pornchai បានបញ្ជាក់បន្ថែមថា កាលពីអតីតកាល និងរហូតមកដល់បច្ចុប្បន្នកាល ប្រទេសថៃបានបោះទុនវិនិយោគលើគម្រោងធំៗជាច្រើន។

គម្រោងសំខាន់ៗរួមមាន អាកាសយានដ្ឋានអន្តរជាតិសុវណ្ណភូមិ ដែលបានចាប់ផ្តើមសាងសង់ក្នុងឆ្នាំ១៩៦០ និងបានបើកដំណើរការក្នុងឆ្នាំ២០០៥ ព្រមទាំងការបង្កើតកម្មវិធីអភិវឌ្ឍន៍តំបន់ឆ្នេរសមុទ្រភាគខាងកើតប្រទេសក្នុងឆ្នាំ១៩៨២ គម្រោងរថភ្លើងអគ្គិសនីនៅទីក្រុងបាងកក និងបណ្តាខេត្តជុំវិញ ដែលចាប់ផ្តើមសាងសង់ក្នុងឆ្នាំ១៩៩០ និងបានបន្តរហូតមកដល់ពេលបច្ចុប្បន្ន។

ជាមួយគ្នានេះ គម្រោងដឹកជញ្ជូនល្បឿនលឿនរហ័ស(Mass Rapid Transit) បានចាប់ផ្តើមស្ថាបនាដំបូងនៅឆ្នាំ១៩៩៧ និងបាននិងកំពុងបន្តដំណើរការហូតដល់សព្វថ្ងៃ។

ចំណែក គម្រោងច្រករបៀងសេដ្ឋកិច្ចភាគខាងកើត (EEC) បានចាប់ផ្តើមនៅឆ្នាំ២០១៨ ក្រោមទុនវិនិយោគលើហេដ្ឋារចនាសម្ព័ន្ធសរុបចំនួន៦៥០ពាន់លានបាត និងគម្រោង Land Bridge ដែលត្រូវការទុនវិនិយោគប្រហែល១ទ្រីលានបាត៕ប្រភព: Bangkok Post៕