ដោយ: គង់ លាងហួរ
អន្តរជាតិ: តម្លៃហាងឆេងមាសបានធ្លាក់ថ្លៃចុះបន្តិច ឬអាចនិយាយថា“ស្ថិតនៅទ្រឹង”ក្នុងការជួញដូរនៅព្រឹកថ្ងៃពុធនេះ ខណៈបណ្តាអ្នកវិនិយោគកំពុងរង់ចាំមើលតម្រុយនានានៃគោលនយោបាយរូបិយវត្ថុពីកិច្ចប្រជុំរបស់ធនាគារកណ្តាលអាមេរិក(Fed)។

តួយ៉ាង តម្លៃមាស Spot Gold បានធ្លាក់ចុះ០,០២ភាគរយដល់២៦៤៤,៩៧ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានធ្លាក់ចុះ០,០៤ភាគរយដល់២៦៦០,៩០ដុល្លារក្នុងមួយអោន គិតត្រឹមម៉ោង១០:៣៦នាទីព្រឹក។

គិតត្រឹមពេលបិទការជួញដូរកាលពីថ្ងៃអង្គារម្សិលមិញ តម្លៃមាស Spot Gold បានបិទនៅត្រឹម២៦៤៥,៥៤ដុល្លារក្នុងមួយអោន ខណៈតម្លៃមាស U.S. gold futures បានបិទនៅត្រឹម២.៦៦២ដុល្លារក្នុងមួយអោន។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៩៦,៣ភាគរយ ដែលធនាគារកណ្តាលអាមេរិក(Fed) អាចទម្លាក់អត្រាការប្រាក់ជាលើកទី៣ ចំនួន០,២៥ភាគរយបន្ថែមទៀតក្នុងកិច្ចប្រជុំនៅថ្ងៃពុធនេះ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានធ្លាក់ថ្លៃចុះបន្តិចដល់១០៦,៩១ពិន្ទុនៅព្រឹកថ្ងៃពុធនេះ បន្ទាប់ពីបានបិទការជួញដូរក្នុងរង្វង់១០៦,៩៦ពិន្ទុកាលពីថ្ងៃអង្គារម្សិលមិញ។

តម្លៃលោហៈធាតុប្រាក់ Spot silver បានធ្លាក់ចុះ០,១៥%ដល់៣០,៨៧ដុល្លារ ក្នុងមួយអោន ខណៈតម្លៃផ្លាទីនបានធ្លាក់ចុះ០,០៦%ដល់៩៤២,៩ដុល្លារក្នុងមួយអោន ហើយតម្លៃ palladium បានធ្លាក់ចុះ០,០៧%ដល់៩៣៨,៥ដុល្លារក្នុងមួយអោនគិតត្រឹមម៉ោង១០:៣៨នាទីព្រឹក៕

ដោយ: គង់ លាងហួរ
អន្តរជាតិ: លោក ដូណាល់ត្រាំ ដែលជាប្រធានាធិបតីជាប់ឆ្នោតមកពីគណបក្សសាធារណរដ្ឋ និងជាអតីតប្រធានាធិបតី តែងតែបានអះអាងថា លោកបានបង្កើតសេដ្ឋកិច្ចដ៏អស្ចារ្យបំផុតនៅក្នុងប្រវត្តិសាស្រ្តសហរដ្ឋអាមេរិក។

ស្របពេលដែលលោកត្រាំ នឹងត្រឡប់ទៅកាន់សេតវិមានវិញនៅខែមករា ឆ្នាំ២០២៥ ក្រុមសេដ្ឋវិទូបានធ្វើការប្រៀបធៀបរវាងស្ថានភាពសេដ្ឋកិច្ចអាមេរិកបច្ចុប្បន្នក្រោមរដ្ឋបាលរបស់លោកប្រធានាធិបតី ចូ បៃដិន ជាមួយសេដ្ឋកិច្ចអាមេរិកក្រោមអាណត្តិទី១របស់លោកត្រាំ ពីឆ្នាំ២០១៧ ដល់ឆ្នាំ២០២១។

សហរដ្ឋអាមេរិកក្រោមរដ្ឋបាលដំបូងរបស់លោក ដូណាល់ត្រាំ បានជួបប្រទះវិបត្តិជំងឺកូវីដ-១៩ ដែលជាបញ្ហាប្រឈមដ៏ធំបំផុត ហើយវិបត្តិនេះបានបន្តអូសបន្លាយដល់ដើមអាណត្តិដំបូងរបស់លោក ចូបៃដិន។

ខាងក្រោមនេះជាសូចនាករសំខាន់ៗនៃសុខភាពសេដ្ឋកិច្ចអាមេរិកក្រោមការដឹកនាំរបស់ប្រធានាធិបតីទាំង២។

ទី១: កំណើនសេដ្ឋកិច្ច

ទោះបីជាផលប៉ះពាល់នៃជំងឺកូវីដបានធ្វើឱ្យការប្រៀបធៀបមានការពិបាកយ៉ាងណាក្តី ប៉ុន្តែ ប្រធានាធិបតីទាំងពីរអាចត្រូវបានចាត់ទុកថា ទទួលបានជោគជ័យផ្នែកសេដ្ឋកិច្ចគួរឱ្យកត់សម្គាល់មួយចំនួន។

បន្ទាប់ពីជំងឺរាតត្បាត សេដ្ឋកិច្ចអាមេរិកបានស្ទុះងើបឡើងវិញយ៉ាងខ្លាំងក្រោមការដឹកនាំរបស់លោក ត្រាំ ហើយបានងើបឡើងវិញល្អប្រសើរជាងបណ្តាប្រទេសលោកខាងលិចជាច្រើនទៀត។

និន្នាការនេះបានបន្តកើតមាននៅក្រោមការដឹកនាំរបស់លោក បៃដិន ដោយសេដ្ឋកិច្ចរបស់សហរដ្ឋអាមេរិកបានងើបឡើងវិញខ្លាំងបំផុតបើប្រៀបធៀបនឹងបណ្តាប្រទេសសមាជិកក្រុម G7 ផ្សេងទៀត។

នៅចន្លោះខែមករា ឆ្នាំ២០១៧ ដល់ខែមករា ឆ្នាំ២០២១ក្រោមអាណត្ដិដឹកនាំដំបូងរបស់លោកដូណាល់ត្រាំ អត្រាកំណើនសេដ្ឋកិច្ចប្រចាំឆ្នាំជាមធ្យមរបស់សហរដ្ឋអាមេរិកស្ថិតក្នុងរង្វង់២,៣%។

ដោយឡែក គិតរហូតមកដល់ពេលនេះនៅក្រោមការគ្រប់គ្រងរបស់លោកចូបៃដិន តួលេខសេដ្ឋកិច្ចអាមេរិកមានអត្រាជាមធ្យមប្រចាំឆ្នាំចំនួន២,២% ដែលជាតួលេខប្រកៀកប្រកិតគ្នា។

ទី២: អត្រាអតិផរណា

តម្លៃទំនិញនៅសហរដ្ឋអាមេរិកបានកើនឡើងយ៉ាងខ្លាំងក្នុងរយៈពេលពីរឆ្នាំដំបូងក្រោមការដឹកនាំរបស់លោក បៃដិន ដោយឈានដល់កម្រិតកំពូលចំនួន៩,១% ក្នុងខែមិថុនា ឆ្នាំ២០២២។

បច្ចុប្បន្ននេះ អត្រាអតិផរណាបានធ្លាក់ចុះដល់ក្នុងរង្វង់ប្រហែល៣%។ ប៉ុន្តែ វានៅតែមានកម្រិតខ្ពស់ជាងពេលដែលលោក ត្រាំ ចាកចេញពីតំណែង។

ជាឧទាហរណ៍ ក្នុងកំឡុងរយៈពេល១២ខែ គិតត្រឹមខែសីហា ឆ្នាំ២០២២ តម្លៃគ្រឿងទេសបានកើនឡើង១៣,៥%។ នេះជាកម្រិតខ្ពស់បំផុតនៅក្រោមការគ្រប់គ្រងរបស់លោកបៃដិន។

ចាប់តាំងពីពេលនោះមក តម្លៃគ្រឿងទេសចាប់ផ្តើមមានស្ថិរភាពឡើងវិញ ខណៈការចំណាយលើគ្រឿងទេសកើនឡើង១,១% ចាប់ពីខែកក្កដា ឆ្នាំ២០២៣ ដល់ខែកក្កដាឆ្នាំនេះ។

និន្នាការនាពេលថ្មីៗនេះអាចប្រៀបធៀបជាមួយនឹងបណ្តាប្រទេសលោកខាងលិចជាច្រើនផ្សេងទៀត ដែលបានជួបប្រទះនឹងបញ្ហាអត្រាអតិផរណាហក់ឡើងខ្ពស់ក្នុងឆ្នាំ២០២១ និងឆ្នាំ២០២២ ដោយសារបញ្ហាខ្សែសង្វាក់ផ្គត់ផ្គង់សកលដែលជំរុញដោយជំងឺកូវីដ និងសង្រ្គាមនៅប្រទេសអ៊ុយក្រែន។

ទី៣: អត្រាអ្នកមានការងារធ្វើ

ក្នុងរយៈពេល៣ឆ្នាំដំបូងនៃអាណត្តិរបស់លោកប្រធានាធិបតី ដូណាល់ត្រាំ ចំនួនការងារជិត៦,៧លានកន្លែងត្រូវបានបង្កើតបន្ថែម មុនពេលដែលវិបត្តិជំងឺឆ្លងកូវីដ-១៩ បានវាយលុកទីផ្សារការងារអាមេរិកយ៉ាងខ្លាំង។

ចំនួនការងារដែលបង្កើតថ្មីមានការកើនឡើងជិត១៦លានកន្លែងចាប់តាំងពីលោកប្រធានាធិបតី ចូបៃដិន បានចូលកាន់តំណែងក្នុងខែមករា ឆ្នាំ២០២១។

មុនពេលផ្ទុះជំងឺរាតត្បាត អត្រាគ្មានការងារធ្វើក្រោមរដ្ឋបាលលោក ត្រាំ បានស្ថិតក្នុងរង្វង់៣,៥ភាគរយ។ ដោយឡែក នៅក្រោមការគ្រប់គ្រងរបស់លោកបៃដិន អត្រាភាពអត់ការងារធ្វើបានធ្លាក់ចុះដល់ចំនួន៣,៤% ក្នុងខែមករា ឆ្នាំ២០២៣ ដែលជាអត្រាទាបបំផុតក្នុងរយៈពេលជាង៥០ឆ្នាំ។

ទី៤: ប្រាក់ឈ្នួល

ប្រាក់ឈ្នួលរបស់កម្មករអាមេរិកបានកើនឡើងយ៉ាងឆាប់រហ័សនៅដើមឆ្នាំ២០២០ក្នុងអំឡុងពេលផ្ទុះជំងឺរាតត្បាតកូវីដ-១៩។ ប៉ុន្តែ ការកើនឡើងនាពេលនោះត្រូវបានផ្សារភ្ជាប់ទៅនឹងកម្មករដែលមានប្រាក់ខែទាប។

ដោយឡែក នៅក្រោមរដ្ឋបាលរបស់លោកបៃដិន ប្រាក់ឈ្នួលប្រចាំសប្តាហ៍ជាមធ្យមរបស់កម្មករបានកើនឡើង។ ប៉ុន្តែ ប្រជាជនអាមេរិកនៅតែជួបប្រទះផលពិបាក ដោយសារការកើនឡើងនៃតម្លៃទំនិញ ដែលបណ្តាលមកពីអត្រាអតិផរណាដ៏ខ្ពស់៕ប្រភព: BBC៕

ដោយ: គង់ លាងហួរ
អន្តរជាតិ: ទីក្រុងដាណាង (Da Nang) ស្ថិតនៅភាគកណ្តាលប្រទេសវៀតណាម គ្រោងនឹងពង្រីកយកដីទំហំ៣០០ហិកតាតាមរយៈការចាក់បំពេញដីទៅក្នុងសមុទ្រ ដើម្បីសាងសង់តំបន់ពាណិជ្ជកម្មសេរីពហុបំណងដំបូងបំផុតរបស់ប្រទេសនេះ។

ទីក្រុងដាណាង ដែលជាទីក្រុងធំជាងគេទី៣ នៅប្រទេសវៀតណាម បន្ទាប់ពីទីក្រុងហាណូយ និងទីក្រុងហូជីមិញ បានដាក់សំណើទៅកាន់រដ្ឋាភិបាលថ្នាក់ជាតិដើម្បីស្នើសុំបង្កើតតំបន់ពាណិជ្ជកម្មសេរី ដោយបានព្យាករណ៍ថា តំបន់នេះនឹងចូលរួមចំណែកចំនួន២៥% នៃទំហំសេដ្ឋកិច្ចរបស់ទីក្រុងដាណាងនៅឆ្នាំ២០៥០។

តំបន់នេះនឹងលាតសន្ធឹងលើផ្ទៃដីចំនួន២.៣១៧ហិកតា ដោយបូករួមទាំងផ្ទៃដីចាក់បំពេញទៅក្នុងសមុទ្រចំនួន៣០០ហិកតា។

យ៉ាងណាមិញ ទីតាំង​សម្រាប់​ចាក់ដី​បំពេញនៅមិន​ទាន់ត្រូវ​បាន​គេ​បង្ហើប​ឱ្យ​ដឹង​ឡើយ ខណៈទីក្រុង​ដាណាងកំពុង​ធ្វើ​ការ​សិក្សា​យ៉ាង​ល្អិតល្អន់​ដើម្បី​បញ្ចប់​ផែនការ​វិនិយោគ និង​ពេលវេលា​កំណត់។

កន្លងទៅ ទីក្រុងដាណាងធ្លាប់បានចាក់បំពេញដីស្ថិតនៅសងខាងស្ពាន Thuan Phuoc សម្រាប់សាងសង់តំបន់ទីក្រុងថ្មី។

តំបន់ពាណិជ្ជកម្មសេរីក្រុងដាណាង ត្រូវបានគេរំពឹងថា នឹងក្លាយជាតំបន់ពាណិជ្ជកម្មសេរីពហុបំណងដំបូងបង្អស់របស់វៀតណាម ដែលរួមបញ្ចូលគ្នានូវមុខងារដូចជាកំពង់ផែ អាកាសយានដ្ឋាន និងសកម្មភាពឧស្សាហកម្មដែលតម្រង់ទិសលើការនាំចេញ។

រដ្ឋបាលទីក្រុងដាណាង រំពឹងថា តំបន់នេះនឹងគ្របដណ្តប់ចំណែកចាប់ពី៨%ទៅ៩% នៃទំហំសេដ្ឋកិច្ចរបស់ទីក្រុងដាណាងនៅឆ្នាំ២០៣០ និងចំណែក២៥% នៅឆ្នាំ២០៥០ និងបង្កើតឱកាសការងារចំនួន៤១.០០០កន្លែង និង១៣៧.០០០កន្លែងរៀងគ្នា។

គម្រោងបង្កើតតំបន់ពាណិជ្ជកម្មសេរី Da Nang នេះត្រូវបានគេរំពឹងថា នឹងចំណាយដើមទុនវិនិយោគអស់សរុបចំនួន៤០,៣ទ្រីលានដុង(ប្រមាណ១,៥៨ពាន់លានដុល្លារអាមេរិក)៕ប្រភព: Vnexpress៕

ដោយៈ និស្ស័យ

   ព្រះសីហនុៈ លោកបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារ ជំរុញការវិនិយោគខេត្តព្រះសីហនុ និងលោកម៉ាង ស៊ីណេត អភិបាល នៃគណៈអភិបាលខេត្ត អញ្ជើញបើកវេទិកាវិនិយោគខេត្តព្រះសីហនុ នៅសណ្ឋាគារឆ្នេរសុខា ក្រុងព្រះសីហនុនៅថ្ងៃទី១៧ ធ្នូនេះ។

វេទិកានេះ មានការចូលរួមពីអគ្គកុងស៊ុលវៀតណាម ប្រចាំខេត្តព្រះសីហនុ ប្រធានការិយាល័យកុងស៊ុលចិន ប្រចាំខេត្តព្រះសីហនុ និងវិនិយោគិនជាតិនិងអន្តរជាតិ។

លោកម៉ាង ស៊ីណេត អភិបាលខេត្តព្រះសីហនុ ថ្លែងក្នុងវេទិកាវិនិយោគ នៅខេត្តព្រះសីហនុ ដែលមានមកពីប្រទេសចិន ប្រទេសកូរ៉េ សហគមន៍អឺរ៉ុប សហរដ្ឋអាមេរិក និងប្រទេសផ្សេងៗទៀតនៅលើទឹកដី នៃខេត្តព្រះសីហនុ ដែលជាតំបន់ ឆ្នេរសមុទ្រដ៏ស្រស់បំព្រង ត្រូវបានប្រសិទ្ធនាមថាជា “តារារៈនាទិសនិរតី” និងកំណត់ជាតំបន់សេដ្ឋកិច្ចពិសេសគំរូពហុបំណង នាឱកាសដ៏វិសេសវិសាលនេះ។

វេទិកានេះ ក្នុងគោល បំណងបង្ហាញដល់វិនិយោគិន ដែលកំពុងវិនិយោគ និងវិនិយោគិនថ្មីៗទៀត ដែលចាប់អារម្មណ៍មកវិនិយោគ ក្នុងខេត្តព្រះសីហនុ លើសក្តានុពលរបស់ខេត្តព្រះសីហនុ ជាពិសេសកម្មវិធីពិសេស ជំរុញការវិនិយោគក្នុងខេត្តព្រះសីហនុឆ្នាំ២០២៤ ដាក់ចេញនៅថ្ងៃទី៣១ ខែមករា ឆ្នាំ២០២៤ ដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។

វេទិកាវិនិ យោគនៅខេត្តព្រះសីហនុ នាពេលនេះ នឹងដើរតួជាវេទិកាសម្រាប់ការសន្ទនា និងការផ្លា​ស់ប្តូរចំណេះដឹង ដែលអនុញ្ញាតឱ្យវិនិយោគិនបង្ហាញពីគុណសម្បត្តិ និងអត្ថប្រយោជន៍ពិសេសនៃការវិនិ​យោគក្នុងខេត្ត រួមគ្នាស្វែងរកវិធីសាស្រ្តថ្មីៗ ដើម្បីដោះស្រាយបញ្ហាប្រឈមនានា កំពុងជួបប្រទះ និងចាប់យកឱកាសល្អថ្មីៗបន្ថែមទៀត។

លោកម៉ាង ស៊ីណេតបានបញ្ជាក់ថា ជាក់ស្តែង រាជរដ្ឋាភិបាលដឹកនាំ ដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានដាក់ចេញនូវ “កម្មវិធីពិសេសជំរុញការវិនិយោគក្នុងខេត្តព្រះសីហនុឆ្នាំ២០២៤”  ជាលទ្ធផលក្រុមការងារជំរុញ ការវិនិយោគក្នុងខេត្ត ទទួលបានសំណើសុំលើកទឹកចិត្តចំនួន២១៦គម្រោង ក្នុងនោះគម្រោងដែលទទួលបាន “លិខិតអនុញ្ញាតជាគោលការណ៍” ចំនួន ២១៣​គម្រោង ដែលមានទុនវិនិយោគសរុបប្រមាណជាង៦ពាន់លានដុល្លារ (៦.០២៦.០០០.០០០ដុល្លារ)។ ជាមួយគ្នានេះអនុគណៈកម្មាធិការវិនិយោគខេត្ត បានចុះបញ្ជីគម្រោងវិនិយោគ មានលក្ខណៈសម្បត្តិគ្រប់គ្រាន់ បានចំនួន១០គម្រោង ដែលមានទុនវិនិយោគ សរុបប្រមាណ១៤លានដុល្លារអាមេរិក (ក្នុងនោះសម្រាប់ឆ្នាំ២០២៤ មានចំនួន៣គម្រោង មានទុនវិនិយោគសរុបប្រមាណ ៧លានដុល្លារអាមេរិក)។

លោកបណ្ឌិតសភាចារ្យ ហ៊ាន សាហ៊ីប រដ្ឋលេ​ខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារជំរុញការវិនិយោគ ខេត្តព្រះសីហនុ បានស្វាគមន៍ភ្ញៀវជាតិ អន្តរជាតិ អគុណលេខាធិការដ្ឋានក្រុមការងារជំរុញ ការវិនិយោគខេត្តព្រះសីហនុ រដ្ឋបាលខេត្តព្រះសីហនុ និងដៃគូពាក់ព័ន្ធ បានចូលរួមសហការរៀបចំវេទិកាវិនិយោគ នៅខេត្តព្រះសីហនុ ឆ្នាំ២០២៤ ក្រោមគំនិតផ្តួចផ្តើមរបស់សម្តេចមហាបវរធិបតីហ៊ុន ម៉ាណែត នាយករដ្ឋមន្ត្រីកម្ពុជា សំដៅជំរុញសកម្ម ភាពសេដ្ឋកិច្ច ក្នុងខេត្តព្រះសីហនុតាមរយៈការជំរុញវិនិយោគ ការអភិវឌ្ឋឧស្សាហកម្ម ការស្តារកំណើនសេដ្ឋកិច្ច និងបំពេញបន្ថែមលើយុទ្ធសាស្ត្រ និងគោលនយោបាយរបស់រាជរដ្ឋាភិបាល នូវវិធានការ និងយន្តការមានលក្ខណ: ជាកញ្ចប់ប្រទាក់ក្រឡាមុតស្រួច និងសាមញ្ញ គឺជាឱកាសមានតម្លៃសម្រាប់ស្វែងយល់ ពីសក្តានុពលវិនិយោគក្នុងខេត្តព្រះសីហនុ ចក្ខុវិស័យរាជរដ្ឋាភិបាល ក្នុងការកែប្រែក្លាយខេត្តព្រះសីហនុ ជាមជ្ឈមណ្ឌលវិនិយោគ និងអភិវឌ្ឍដ៏រស់រវើកក្នុងក្រខណ្ឌអាស៊ាន ខេត្តព្រះសីហនុមានការរីកចម្រើន លើវិស័យហេដ្ឋារចនាសម្ព័ន្ធ និងបច្ចេកវិទ្យាជឿនលឿន ព្រមទាំងលើកកម្ពស់ការអភិវឌ្ឍប្រកបដោយចីរភាព ដើម្បីបង្កើតបរិយាកាសអំណោយផល សម្រាប់ការធ្វើអាជីវកម្ម និងវិនិយោគ។ វេទិការនេះ ចែករំលែកនិងផ្តល់ព័ត៌មានអំពីអត្ថប្រយោជន៍ពិសេស នៃការវិនិយោគក្នុងខេត្តព្រះសីហនុ លើវិស័យយុទ្ធសាស្ត្រ សំខាន់ៗសម្រាប់របៀវារ:នៃ វេទិការវិនិយោគនៅខេត្តព្រះសីហនុ ដោយផ្តោតលើ វិស័យចំនួន៥ ១.ការផលិត ២.ទេសចរណ៍ និងបដិសណ្ឋារកិច្ច ៣.ភស្តុភារកម្ម និងដឹកជញ្ជូន ៤.ហិរញ្ញវត្ថុធនាគារ និងអចលនទ្រព្យ និង៥.កសិកម្ម និងការកែច្នៃម្ហូបអាហារ។

លោកបណ្ឌិតសភាចារ្យ ហ៊ាន សាហ៊ីប បានបន្តថា វេទិការនេះបានផ្តល់កាលានុវត្តភាព ពិសេសជូនដល់វិនិយោគគិន ដែលមានការចាប់អារម្មណ៍លើធុរកិច្ចក្នុងវិស័យចំនួន៥ តាមរយៈការស្វែងយល់ពីក្រុមហ៊ុនសំខាន់ៗ ដែលបាននឹងកំពុងវិនិយោគ និងប្រកបអាជីវកម្មដោយផ្ទាល់ ព្រមទាំងបានការទទួលឱ្យទៅទស្សនកិច្ចសិក្សា នៅទីតាំងផ្ទាល់ថែមទៀតផង ខ្ញុំសូមលើកទឹកចិត្តឱ្យលោក លោកស្រី និងអ្នកវិនិយោគទាញយកអត្ថប្រយោជន៍ ក្នុងការបង្កើតទំនាក់ទំនង ដើម្បីស្វែងទាញយកឱកាសពីសក្តានុពល នៃខេត្តព្រះសីហនុ តាមលទ្ធភាពជាក់ស្តែង៕