ដោយ: គង់ លាងហួរ

អន្តរជាតិ: មហាសេដ្ឋីមួយរូប ដែលជាម្ចាស់ហាងលក់រាយដ៏ល្បីល្បាញមួយ នៅប្រទេសសិង្ហបុរី បានប្រកាសដាក់លក់វិមានដ៏ធំមួយរបស់ខ្លួន ក្នុងតម្លៃ៦២លានដុល្លារ ស្របពេលដែលមានការកើនឡើងនៃប្រតិបត្តិការទិញ -លក់អចលនទ្រព្យប្រណីត ក្នុងប្រទេសកោះមួយនេះ។

ក្រុមហ៊ុន​ប្រឹក្សាអចលនទ្រព្យ Knight Frank បានដាក់បញ្ចូលវិមាននេះ ទៅក្នុងបញ្ជីសម្រាប់​ដាក់លក់​ កាល​ពី​សប្តាហ៍មុន។ វិមាននេះ មានទីតាំងនៅក្នុងគម្រោង Victoria Park ដែលជាតំបន់រស់នៅរបស់ក្រុមអ្នកមាន និងមានទីតាំងនៅជិតសួន Botanic Gardens ហើយមានកន្លែងចតឡាន បន្ទប់ទឹកចំនួន៨ និងអាងហែលទឹកដ៏ធំចំនួន១។

វិមាននេះជាកម្មសិទ្ធិរបស់លោក Tang Wee Kit ។នេះបើយោងតាមឯកសារ ដែលដកស្រង់ដោយសារពត៌មាន Bloomberg News ។ មហាសេដ្ឋី​ ដែលមានដើមកំណើតមកពីប្រទេស​ចិន​រូបនេះ បាន​បង្កើត​ហាង​លក់ទំនិញ​ដ៏​ល្បី​មួយ ​នៅ​ប្រទេស​សិង្ហបុរី​ ដែលដាក់ឈ្មោះឈ្មោះថា “Orchard Road” ហើយហាងនេះនៅ​តែ​បន្តបើកដំណើរការ​រហូតដល់សព្វថ្ងៃ។

យោងតាមឯកសារអាជីវកម្មបានឱ្យដឹងថា បច្ចុប្បន្ននេះ លោក Tang Wee Kit  គឺជានាយកគ្រប់គ្រងក្រុមហ៊ុន Tang Holdings Pte ដែលជាក្រុមហ៊ុនវិនិយោគ លើអចលនទ្រព្យនៅប្រទេសសិង្ហបុរី និងជាម្ចាស់ភាគហ៊ុនដ៏ធំនៃក្រុមហ៊ុន C.K.  Tang Ltd. ដែលគ្រប់គ្រងហាងលក់រាយជាច្រើននៅសិង្ហបុរី។

ការប្រកាសដាក់លក់វិមាន ឬភូមិគ្រឹះថ្លៃៗនៅប្រទេសសិង្ហបុរី បានកើនឡើងនាពេលថ្មីៗនេះ បន្ទាប់ពីមានវិបត្តិ ដែលបង្កឡើងដោយការដំឡើងអត្រាការប្រាក់ និងការស៊ើបអង្កេតលើការលាងលុយកខ្វក់។

ផ្ទុយទៅវិញ អតិថិជនថ្មីៗ ដែលបានទិញយកភូមិគ្រឹះទាំងនោះ រួមមាន ភរិយារបស់លោកមហាសេដ្ឋី Forrest Li ដែលជាស្ថាបនិកក្រុមហ៊ុនយក្ស Sea Ltd.  និងជាអ្នកស្នងមរតករបស់មហាសេដ្ឋីចិនលោក Xiang Guangda និងជាអ្នកជំនួញផ្នែកធនាគារដ៏ធំបំផុតនៅប្រទេសសិង្ហបុរី៕ប្រភព:Bloomberg៕

ដោយ: គង់ លាងហួរ

អន្តរជាតិ: ការ​ខូច​ខាត ការទាមទារតម្លៃ​ខ្ពស់ ​មិន​សម​ហេតុផល និង​ពេល​វេលា​មិន​អំណោយផល គឺ​ជា​មូលហេតុ​ ដែល​ធ្វើ​ឱ្យ​អចលនទ្រព្យ​មិនស្ថិត​ក្នុង​ក្រសែ​ភ្នែក ​របស់អ្នក​ទិញ​ដែលមាន​សក្ដានុពល។

ការលក់ផ្ទះ ដែលមើលទៅហាក់ដូចជារឿងសាមញ្ញ ប៉ុន្តែវាអាចប្រែក្លាយជាបញ្ហាដ៏គួរឱ្យឈឺក្បាល ប្រសិនបើទ្រព្យសម្បត្តិ ឬផ្ទះដែលត្រូវបានចុះបញ្ជីប្រកាសដាក់លក់ នៅតែបន្តគ្មានអតិថិជនមកទិញ។

ទាក់ទិននឹងរឿងនេះ ក្រុមហ៊ុនអចលនទ្រព្យ HomeLight បានទម្លាយឱ្យដឹង នូវហេតុផលទូទៅចំនួន៤យ៉ាង នៅពីក្រោយបញ្ហាទាំងនេះ៖

ទី១៖ការកំណត់តម្លៃខ្ពស់ហួសហេតុ

លោក Alex Adabashi អ្នកជំនាញអចលនទ្រព្យ ព្រមានថា ការទាមទារតម្លៃអចលនទ្រព្យខ្ពស់ពេក អាចរារាំងអ្នកទិញ ទោះបីទីផ្សារមានសកម្មភាពរស់រវើកយ៉ាងណាក្តី។

លោក​បាន​មានប្រសាសន៍បន្ត​ថា​ “​អ្នកលក់​ភាគច្រើន​តែងតែ​ចូល​ចិត្ត​ទាមទារតម្លៃខ្ពស់ ​ដើម្បី​ទុក​ឱកាសឱ្យអ្នកទិញ​ធ្វើ​ការ​ចរចា។ ប៉ុន្តែ​ ការណ៍នេះ​ក៏​អាច​ធ្វើឱ្យ​ចំណាប់អារម្មណ៍ ​អ្នក​ទិញ​ធ្លាក់ចុះផង​ដែរ​”។ ហេតុនេះ ម្ចាស់អចលនទ្រព្យ គួរតែមកពិគ្រោះយោបល់ជាមួយភ្នាក់ងារអចលនវត្ថុ ឬអ្នកជំនាញ ដើម្បីកំណត់តម្លៃផ្ទះឱ្យសមហេតុផល ដើម្បីបង្កលក្ខណៈកាន់តែងាយស្រួលសម្រាប់អ្នកទិញ។

ទី២: លក្ខណៈសម្បត្តិផ្ទះកាន់តែទ្រុឌទ្រោម

ចំពោះផ្ទះ ដែលមានការបាក់ខូចខាត លក្ខណៈពិសេសដ៏ហួសសម័យ ឬខ្វះខាតគ្រឿងបរិក្ខារគ្រប់គ្រាន់ អាចធ្វើឱ្យអ្នកទិញដើរចេញតែម្តង ទោះបីជាផ្ទះនោះប្រកាសដាក់លក់ ក្នុងតម្លៃថោកយ៉ាងណាក្តី។

យោងតាមលោក Adabashi ចំណាប់អារម្មណ៍ដំបូង ពិតជាមានសារៈសំខាន់ណាស់។ ដូច្នេះ ការតុបតែងផ្ទះឱ្យមានសោភ័ណភាព តាមរយៈការធ្វើបច្ចុប្បន្នភាពជាយុទ្ធសាស្រ្ត ដូចជាការលាបថ្នាំពណ៌ ឬការជួសជុល អាចជួយរក្សាតម្លៃផ្ទះ និងទាក់ទាញអ្នកទិញ។ ការរៀបចំទីធ្លាពណ៌បៃតង ការកែលម្អភ្លើងបំភ្លឺ និងការរៀបចំបន្ទប់ទទួលភ្ញៀវឡើងវិញ ក៏ជាដំណោះស្រាយរហ័ស និងមានប្រសិទ្ធភាពផងដែរ។

ទី៣: ទីតាំងមិនអំណោយផល

ទីតាំងដើរតួនាទីយ៉ាងសំខាន់ ក្នុងការកំណត់តម្លៃអចលនទ្រព្យ។ ជាក់ស្តែង ផ្ទះនៅតំបន់ដាច់ស្រយាល ដែលមិនសូវមានចរាចរ ណ៍មមាញឹកច្រើន ឬខ្វះខាតគ្រឿងបរិក្ខារគ្រប់គ្រាន់ គឺពិតជាពិបាកលក់ចេញណាស់។

ទោះបីជាផ្ទះនោះ មានភាពទាក់ទាញយ៉ាងណាក៏ដោយ ប៉ុន្តែបើផ្ទះនោះមានទីតាំងនៅឆ្ងាយ ពីមធ្យោបាយធ្វើដំណើរសាធារណៈ សា លារៀន មន្ទីរពេទ្យ ឬទីផ្សារអាចជាគុណវិបត្តិដ៏ធំមួយ។

ទី៤: ពេលវេលាមិនអំណោយផល

ការ​លក់​ផ្ទះ​ចេញអាច​ក្លាយជា​បញ្ហា​ប្រឈម​ ប្រសិនបើទីផ្សារអចលនទ្រព្យកំពុងដាំក្បាលចុះ​ ឬ​ទីផ្សារស្ថិតក្នុងសភាពអសកម្ម។ ការជ្រើសរើសពេលវេលាត្រឹមត្រូវ ក្នុងការសម្រេចចិត្តប្រកាសដាក់លក់ គឺរឿងចាំបាច់ ព្រោះវាអាចបង្កើនប្រសិទ្ធភាពតម្លៃ និងពេលវេ លាប្រតិបត្តិការ។

ការជ្រើសរើសពេលវេលា អាចប្រែប្រួលតាមប្រភេទអចលនទ្រព្យ។ តួយ៉ាង ផ្ទះ និងអាផាតម៉ិន ភាគច្រើនលក់ដាច់បំផុតនៅចុងឆ្នាំ ឬមុនរដូវកាលចូលរៀន  ខណៈដែលដីធ្លី និងផ្ទះវីឡា អាចលក់ដាច់ខ្លាំងនៅរដូវក្តៅ និងនិទាឃរដូវ៕ប្រភព:Vnexpress៕

        ដោយៈ គង់ សូរិយា

        សឹង្ហបុរីៈ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា បានអញ្ជើញជួបជាមួយលោក Lawrence Wong នាយករដ្ឋមន្ត្រី នៃសាធារណរដ្ឋសិង្ហបុរី នាឱកាសនៃដំណើរទស្សនកិច្ចផ្លូវការនៅសាធារណរដ្ឋសិង្ហបុរី ពីថ្ងៃទី១៨-១៩ ខែមិថុនា ឆ្នាំ២០២៤។

ក្នុងជំនួបនេះ លោកនាយករដ្ឋមន្ត្រី បានសម្តែងនូវកិច្ចស្វាគមន៍ចំពោះការអញ្ជើញ បំពេញទស្សនកិច្ចផ្លូវការជាលើកទី១ ក្នុងនាមជានាយករដ្ឋមន្ត្រីរបស់សម្តេចធិបតី និងគណៈប្រតិភូជាន់ខ្ពស់កម្ពុជា នៅសាធារណរដ្ឋសិង្ហបុរី។

លោកនាយករដ្ឋមន្ត្រីសិង្ហបុរី បានគូសរំលេចអំពីទំនាក់ទំនងដ៏យូរអង្វែងរវាងសិង្ហបុរី-កម្ពុជា ដោយនៅឆ្នាំ២០២៥ខាងមុខនេះ គឺជាខួបលើកទី ៦០ នៃទំនាក់ទំនងការទូតរវាងប្រទេសទាំងពីរ ហើយទស្សនកិច្ចផ្លូវការរបស់សម្តេចធិបតី នាពេលនេះជាចលករ នៃការពង្រឹង និងពង្រីកទំនាក់ទំនង និងកិច្ចសហប្រតិបត្តិការឱ្យកាន់តែរីកចម្រើន និង រឹងមាំបន្ថែមទៀត។

ជាការឆ្លើយតប សម្ដេចធិបតីបានថ្លែងអំណរគុណ ចំពោះបដិសណ្ឋារកិច្ចដ៏កក់ក្តៅពីសំណាក់ ឯកឧត្តមនាយករដ្ឋមន្ត្រី និងរដ្ឋាភិបាលសិង្ហបុរី ព្រមទាំងបានអបអរសាទរចំពោះលោក ដែលត្រូវបានតែងតាំងជានាយករដ្ឋមន្រ្តី នៃសាធារណរដ្ឋសិង្ហបុរី។ សម្តេចធិបតី ក៏បានគូសបញ្ជាក់អំពីភាពរីកចម្រើន នៃទំនាក់ទំនងការទូតនៃប្រទេសទាំងពីរ ក៏ដូចជាការពង្រឹង និងពង្រីកកិច្ចសហប្រតិបត្តិការលើវិស័យជាច្រើន ហើយទស្សនកិច្ចផ្លូវការនេះ នឹងកាន់តែធ្វើឱ្យប្រសើរឡើងនូវកិច្ចសហប្រតិបត្តិការរវាងប្រទេសទាំងពីរ ។

ក្នុងឱកាសនៃជំនួបទ្វេភាគីនេះ សមភាគីទាំងពីរក៏បានឯកភាពក្នុងការបន្តពង្រឹង និងពង្រីកកិច្ចសហប្រតិបត្តិការរួម ជាមួយនឹងការគាំទ្រ និងចែករំលែកនូវបទពិសោធន៍លើវិស័យសំខាន់ៗ រួមមាន៖ (១) ក្នុងក្របខណ្ឌនៃកិច្ចសហប្រតិបត្តិការ លើវិស័យនយោបាយ សមភាគីទាំងពីរ បានឯកភាពគ្នាក្នុងការបន្តនូវកិច្ច ពិគ្រោះយោបល់នយោបាយជាទៀងទាត់ រវាងក្រសួងការបរទេសនៃប្រទេសទាំងពីរ ដើម្បីពង្រីកនូវកិច្ចសហប្រតិបត្តិការ ឱ្យកាន់តែទូលំទូលាយបន្ថែមទៀត។

(២) កិច្ចសហប្រតិបត្តិការជំរុញវិស័យពាណិជ្ជកម្ម និងការវិនិ​យោគ សមភាគីទាំងពីរបានឯកភាពគ្នាក្នុងការរៀបចំ ក្រុមការងាររួមដើម្បីពិភាក្សាអំពីមធ្យោបាយ និងផែនការសកម្មភាព ដើម្បីធ្វើឱ្យកាន់​តែប្រសើរឡើង នូវកិច្ចសហប្រតិបត្តិការលើវិស័យពាណិជ្ជកម្ម និងការវិនិយោគនៃប្រទេសទាំងពីរ (៣) ការបន្តកិច្ចសហប្រតិបត្តិការក្នុងការផ្លាស់ប្តូរប្រជាជន និងប្រជាជន ដែលរួមការកសាងនូវមូលធនមនុស្ស ការបណ្តុះបណ្តាលវិជ្ជាជីវៈ ការជំរុញវិស័យទេសចរណ៍ តាមរយៈការពង្រីកជើងហោះហើរផ្ទាល់ បន្ថែមទៀតកម្ពុជា-សិង្ហបុរី ជាមួយនឹងការខិតខំទាក់ទាញភ្ញៀវទេសចរ ពីបណ្ដាប្រទេសផ្សងទៀតមកទស្សនាប្រទេសទាំងពីរ។

(៤) ចំពោះកិច្ចសហប្រតិបត្តិការ លើវិស័យសន្តិសុខថាមពល សមភាគីទាំងពីរ បានអបអរសាទរចំពោះលទ្ធផល នៃកិច្ចប្រជុំថ្នាក់រដ្ឋមន្រ្តីរវាងប្រទេសកម្ពុជា-ឡាវ-សិង្ហបុរី ការបង្កើតនូវក្រុមការងារថ្នាក់រដ្ឋមន្រ្តីនៃប្រទេសទាំងបី និងលើកទឹកចិត្តឱ្យមានការចូលរួម ពីភាគីពាក់ព័ន្ធបន្ថែមទៀត និង (៥) កិច្ចសហប្រតិបត្តិការលើវិស័យការពារជាតិ និងសន្តិសុខ សមភាគីទាំងពីរបានពិភាក្សាអំពីការផ្លាស់ប្តូរទស្ស​នកិច្ចនៃមន្ត្រីជាន់ខ្ពស់ និងវគ្គបណ្តុះបណ្តាល ព្រមទាំងបានពិភាក្សាអំពីកិច្ចសហប្រតិបត្តិការ លើការប្រយុទ្ធប្រឆាំង នឹងឧក្រិដ្ឋកម្មឆ្លងដែន ការជួញដូរមនុស្ស ការជួញដូរគ្រឿងញៀន បទល្មើសបច្ចេកវិទ្យា និងការឆបោកតាមប្រព័ន្ធអនឡាញ។

ក្រៅពីនេះ សមភាគីទាំងពីរបានបន្តពិភាក្សាគ្នា លើបញ្ហាក្នុងតំបន់ និងអន្តរជាតិមួយចំនួន ដើម្បីចូលរួមក្នុងការកសាងសន្តិភាព ស្ថិរភាព សាមគ្គីភាព និងវិបុលភាពនៅក្នុងតំបន់ និងពិភពលោក ក៏ដូចជាផ្ដល់នូវអត្ថប្រយោជន៍ទៅវិញ ទៅមករវាងប្រទេសទាំងពីរ។ សមភាគីទាំងពីរ ក៏បានឯកភាពក្នុងការបន្ត កិច្ចសហប្រតិបត្តិការលើវិស័យធនាគារ និងហិរញ្ញវត្ថុ និងវិស័យឌីជីថល និងបានចូលរួមជាអធិបតីជាមួយ ក្នុងពិធីប្រកាសដាក់ឱ្យដំណើរការជាផ្លូវការនូវគម្រោងថ្នាលច្រករបៀងតម្លាភាពហិរញ្ញវត្ថុ (Financial Transparency Corrido r) និងចុះហត្ថលេខាលើ អនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការលើរដ្ឋាភិបាលឌីជីថល៕

ដោយ: គង់ លាងហួរ
អន្តរជាតិ: បើយកប្រៀបធៀបនឹងតម្លៃក្នុងពេលបិទការជួញដូរកាលពីថ្ងៃច័ន្ទម្សិលមិញ គេសង្កេតឃើញថា តម្លៃហាងឆេងមាសបានធ្លាក់ថ្លៃចុះវិញនៅល្ងាចថ្ងៃអង្គារនេះ បន្ទាប់ពីងើបឡើងថ្លៃកាលពីព្រឹកមិញ។

តួយ៉ាង តម្លៃមាស Spot Gold បានធ្លាក់ចុះ០,៤៤%ដល់២៣០៨,៥៨ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានធ្លាក់ចុះ០,២៣ភាគរយដល់២៣២៣,៧០ដុល្លារ ក្នុងមួយអោន គិតត្រឹមម៉ោង៥:៤២នាទីល្ងាច។

គិតត្រឹមពេលបិទការជួញដូរកាលពីថ្ងៃច័ន្ទម្សិលមិញ តម្លៃមាស Spot Gold បានស្ថិតនៅត្រឹម២៣១៨,៨៧ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold future បានស្ថិតនៅត្រឹម២.៣២៩ដុល្លារ ក្នុងមួយអោន៕

ដោយ: គង់ លាងហួរ

ម៉ានីល: អាជ្ញាធរហ្វីលីពីនបានបើកការបង្រ្កាប ទៅលើប្រតិបត្តិករល្បែងស៊ីសងខុសច្បាប់ ដែលភាគច្រើនគ្រប់គ្រងដោយក្រុមហ៊ុនចិន និងហាមឃាត់សកម្មភាពទាំងនេះជាបន្ទាន់ ក្រោយពីមានការចោទប្រកាន់ថា ក្រុមហ៊ុនទាំងនោះ បានជាប់ពាក់ព័ន្ធនឹងក្រុមឧក្រិដ្ឋជន។

យោងតាមប្រធានអាជ្ញាធរនិយតករ ល្បែងស៊ីសងរបស់ប្រទេសហ្វីលីពីនបានឱ្យដឹងថា បច្ចុប្បន្ន ក្រុមហ៊ុនល្បែងស៊ីសងបរទេសប្រមាណ២៥០ក្រុមហ៊ុន ទៅ៣០០ក្រុមហ៊ុន កំពុងបើកដំណើរការនៅក្នុងប្រទេសហ្វីលីពីន ដោយគ្មានអាជ្ញាប័ណ្ណ”។

លោក Alejandro Tengco ប្រធានសាជីវកម្មកម្សាន្ត និងល្បែងហ្វីលីពីន បានថ្លែងប្រាប់សារពត៌មាន Reuters  ថា “ យើងបានសហការរួមគ្នាជាមួយប៉ូលីស ដើម្បីចុះវែកមុខប្រតិបត្តិករខុសច្បាប់ទាំងនេះ ដើម្បីធ្វើការវាយឆ្មក់ និងបិទអាជីវកម្ម”។

លោក Tengco បានបញ្ជាក់បន្ថែមថា “អាជ្ញាធរនិយតករនឹងគោរពតាមការសម្រេចចិត្តចុងក្រោយ របស់រដ្ឋាភិបាលលើចំណាត់ការ ចំពោះក្រុមហ៊ុនល្បែងស៊ីសងបរទេស (POGOs) ដែលអាចរួមបញ្ចូលការហាមឃាត់ឧស្សាហកម្មទាំងមូល”។

ឧស្សាហកម្មហ្គេមអនឡាញ នៅក្នុងប្រទេសហ្វីលីពីនបានលេចឡើងក្នុងឆ្នាំ២០១៦។ ឧស្សាហកម្មនេះ បានស្គាល់នូវការរីកចម្រើនយ៉ាងខ្លាំង ក្រោយពីរដ្ឋាភិបាលបានអនុម័តច្បាប់ អនុញ្ញាតឱ្យមានការប្រកបអាជីវកម្មល្បែងស៊ីសងដោយសេរី ដើម្បីទាក់ទាញគោលដៅអតិថិជនមកពីប្រទេសចិន។

ការបង្រ្កាបនេះត្រូវបានធ្វើឡើង ក្រោយពីមានការចោទប្រកាន់ថា ក្រុមហ៊ុនល្បែងស៊ីសងបរទេសទាំងនោះ មានជាប់ពាក់ព័ន្ធនឹងសកម្មភាពឧក្រិដ្ឋកម្ម ដូចជាការជួញដូរមនុស្ស ការធ្វើទារុណកម្ម ការចាប់ជំរិត និងសកម្មភាពក្លែងបន្លំ ដូចជាកាតឥណទាន ការវិនិយោគគ្រីបតូ និងការបោកប្រាស់ស្នេហា។ ឧក្រិដ្ឋជនបានបង្កើត អត្តសញ្ញាណក្លែងក្លាយតាមអ៊ីនធឺណេតដើម្បីបញ្ចុះបញ្ចូលជនរងគ្រោះ ឱ្យផ្តល់ប្រាក់ដល់ពួកគេ។

ប្រព័ន្ធផ្សព្វផ្សាយក្នុងស្រុកបានរាយការណ៍ថា កាលពីខែមីនា ក្រុមអ្នកអនុវត្តន៍ច្បាប់ បានឆ្មក់ចូលទីតាំងល្បែងស៊ីសង របស់ក្រុមហ៊ុនបរទេស ក្នុងខេត្ត Pampanga ដែលនាំទៅដល់ការជួយសង្គ្រោះកម្មករជាង៦០០នាក់ ដែលរួមមានទាំងជនជាតិហ្វីលីពីន និងជនជាតិចិនផងដែរ៕ប្រភព: Reuter៕

ដោយ: គង់ លាងហួរ

អន្តរជាតិ: ការនាំចេញទំនិញសរុប របស់បណ្តាប្រទេសសមាគ​មប្រជាជាតិអាស៊ីអាគ្នេយ៍ ឬអាស៊ានទៅកាន់សហរដ្ឋអាមេរិក បានកើនឡើងលើសពីការនាំចេញ ទៅកាន់ប្រទេសចិនជាលើកដំបូង ក្នុងរយៈពេល៦ត្រីមាសកន្លងមកនេះ។

និន្នាការនេះឆ្លុះបញ្ចាំងឱ្យឃើញ ពីបម្រែបម្រួលខ្សែសង្វាក់ផ្គត់ផ្គង់ពិភពលោក និងបង្ហាញពីសារៈសំខាន់ កាន់តែខ្លាំងរបស់ទីផ្សារសហរដ្ឋអាមេរិក សម្រាប់បណ្តាប្រទេសសមាជិកអាស៊ាន ស្របពេលមានភាពតានតឹងពាណិជ្ជកម្ម និងការផ្លាស់ប្តូរសេដ្ឋកិច្ច។

យោងតាមទិន្នន័យ ដែលប្រមូលចងក្រងដោយកាសែត Nikkei Asia ពីលេខាធិការដ្ឋានអាស៊ាន រដ្ឋាភិបាលនៃប្រទេសនីមួយៗ និងប្រព័ន្ធផ្សព្វផ្សាយក្នុងស្រុក បានបង្ហាញថា ការនាំចេញរបស់តំបន់អាស៊ានទាំងមូល ទៅកាន់សហរដ្ឋអាមេរិក មានទំហំទឹកប្រាក់សរុបចំនួន៦៧,២ពាន់លានដុល្លារ ក្នុងខែមករាដល់ខែមីនា ឆ្នាំ២០២៤។

តួលេខ​ខាងលើនេះ​ បាន​វ៉ាដាច់​ការនាំ​ចេញ​របស់តំបន់អាស៊ានទាំងមូលទៅកាន់ប្រទេសចិន ដែលមានទំហំទឹកប្រាក់ត្រឹមតែ៥៧ពាន់​លាន​ដុល្លារ​​ក្នុង​អំឡុង​ពេល​ដូច​គ្នា។

ក្រុមអ្នកជំនាញបានវាយតម្លៃថា និន្នាការនេះបណ្តាលមកពីការកើនឡើង នៃតម្រូវការរបស់សហរដ្ឋអាមេរិក សម្រាប់គ្រឿងអេឡិចត្រូនិក និងគ្រឿងអគ្គិសនីពីតំបន់អាស៊ាន ដែលការណ៍នេះខុសផ្ទុយស្រឡះទៅនឹងស្ថានភាពសេដ្ឋកិច្ចចិន ដែលកំពុងតែធ្លាក់ចុះ។

ម្យ៉ាងទៀត តំបន់អាស៊ានកំពុងសម្រេច បានកំណើនយ៉ាងឆាប់រហ័សនៃការវិនិយោគពីបរទេស ស្របពេលក្រុមហ៊ុនសហរដ្ឋអាមេរិក និងចិន បានងាកមកបណ្តាក់ទុននៅតំបន់នេះ ដោយសារមើលឃើញពីស្ថិរភាពនយោបាយក្នុងតំបន់ និងការពង្រីកទីផ្សារកាន់តែធំ។

នៅចន្លោះឆ្នាំ២០១៧ និងឆ្នាំ២០២២ លំហូរវិនិយោគផ្ទាល់ពីបរទេស(FDI) ចូលទៅក្នុងបណ្តាប្រទេសអាស៊ានទាំង១១(រាប់ទាំងទីម័រខាងកើត) បានកើនឡើង៤០% ដោយបានវ៉ាដាច់កំណើននៃការវិនិយោគពីបរទេសនៅក្នុងប្រទេសចិន អាមេរិកឡាទីន និងអាហ្វ្រិក។

នៅខែកញ្ញា ឆ្នាំ២០២៣ បន្ទាប់ពីប្រធានាធិបតីអាមេរិកលោក ចូ បៃដិន  បានបំពេញទស្សនកិច្ច នៅប្រទេសវៀតណាមរួចមក ក្រសួងការបរទេសអាមេរិក បានសង្កត់ធ្ងន់លើសក្តានុពល របស់វៀតណាមក្នុងនាមជាដៃគូរបស់អាមេរិក ក្នុងការធានាខ្សែសង្វាក់ផ្គត់ផ្គង់ឧប​ករណ៍ Semiconductor ដែលមានភាពចម្រុះ និងមានភាពធន់។

ក្រុមហ៊ុន Amkor Technology ដែលមានមូលដ្ឋាននៅសហរដ្ឋអាមេរិក បានបើករោងចក្រផលិតឧបករណ៍ semiconductor ក្រោមទុនវិនិយោគ១,៦ពាន់លានដុល្លារ នៅខេត្ត Bac Ninh កាលពីខែតុលា ឆ្នាំ២០២៣។ រោងចក្រនេះត្រូវបានគេរំពឹងថា នឹងក្លាយជាមូលដ្ឋានផលិតកម្ម ដ៏ធំបំផុតរបស់ក្រុមហ៊ុន និងបង្កើតការងារប្រហែល១ម៉ឺនកន្លែង។

ម្យ៉ាងវិញទៀត នៅខែកក្កដា ឆ្នាំ២០២៣ ប្រទេសម៉ាឡេស៊ីបានប្រកាសថា ក្រុមហ៊ុនផលិតរថយន្តដ៏ធំរបស់ចិន Zhejiang Geely Holding Group គ្រោងបោះទុនវិនិយោគ១០ពាន់ លានដុល្លារនៅរដ្ឋ Perak ដើម្បីបង្កើតមូលដ្ឋានផលិតកម្មរថយន្ត ហើយគម្រោង​បង្កើតរោងចក្រផលិត​រថ​យន្ត​អគ្គិសនី ​នៅ​ប្រទេស​ថៃ​ ក៏​កំពុង​ត្រូវ​បាន​ពិចារ​ណា​ផង​ដែរ​៕ប្រភព: Nikkei asia៕