ដោយៈ គង់ សូរិយា

        ភ្នំពេញៈ លោកស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា អនុញ្ញាតឱ្យគណៈប្រតិភូជាយុវជន នៃកម្មវិធីអនាគតមេដឹកនាំអាស៊ាន “Future Líder ba ASEAN” របស់រដ្ឋាភិបាលទីម័រឡេស្តេ ដឹកនាំដោយលោក Ermenegildo Lopes ឯកអគ្គរដ្ឋទូត នៃសាធារណរដ្ឋប្រជាធិបតេយ្យទីម័រឡេស្តេ ប្រចាំកម្ពុជា អញ្ជើញចូលជួបសម្ដែងការគួរសម និងទទួលការចែករំលែកបទពិសោធន៍អំពីកិច្ចការងារវិនិយោគរបស់កម្ពុជា។

ស្របតាមការស្នើសុំរបស់គណៈប្រតិភូយុវជន នៃកម្មវិធីអនាគតមេដឹកនាំអាស៊ាន “Futuru Líder ba ASEAN” របស់រដ្ឋាភិបាលទីម័រឡេស្តេ លោកឧបនាយករដ្ឋមន្ត្រី បានចែករំលែកពីមាគា៍អភិវឌ្ឍន៍ជាតិរបស់កម្ពុជា ក្នុងការត្រួសត្រាយផ្លូវ ដើម្បីអភិវឌ្ឍន៍ប្រទេសពីសង្គ្រាមផ្ទៃក្នុង រហូតទទួលបានសុខសន្តិភាពពេញលេញ ឯករាជ្យភាពជាតិ និងមានរដ្ឋាភិបាលតែមួយ ក្នុងការអនុវត្តការងារ តាមរយៈការអនុវត្តគោលនយោបាយឈ្នះៗ ដែលអាចសម្រេចបានសមិទ្ធផលជាតិធំៗលើគ្រប់វិស័យ ដោយផ្អែកលើមូលដ្ឋាននៃយុទ្ធសាស្ត្រចតុកោណ ផ្ដោតសំខាន់លើកត្តា៤គឺ មនុស្ស ផ្លូវ ទឹក ភ្លើង។

ជាមួយគ្នានេះ ស្របតាមនិន្នាការនៃការអភិវឌ្ឍន៍បច្ចុប្បន្ន រាជរដ្ឋាភិបាលក្នុងនីតិកាលទី៧នេះ បានបន្ថែមឌីជីថលូបនីយកម្ម ចូលក្នុងមូលដ្ឋាន នៃផែនការអភិវឌ្ឍន៍ជាតិផងដែរ។

លោកឧបនាយករដ្ឋមន្ត្រី បានសង្កត់ធ្ងន់អំពីការរក្សាឱ្យបាននូវសុខសន្តិភាព និងស្ថិរភាពសង្គម ដើម្បីអនុញ្ញាតឱ្យសង្គមជាតិអាចគិតគូរអំពីការអភិវឌ្ឍ និងភាពរីកចម្រើន នៃគុណភាពជីវិតរបស់ប្រជាពលរដ្ឋ។

ចំពោះវិស័យវិនិយោគ លោកឧបនាយករដ្ឋមន្ត្រី បានលើកឡើងផងដែរថា កម្ពុជាបានអនុវត្តគោលនយោបាយ បើកចំហរសេដ្ឋកិច្ចដោយទទួលយកការវិនិយោគពីគ្រប់ទិសទី បន្ទាប់ពីស្ថាប័នក្រុមប្រឹ​ក្សា​អភិវឌ្ឍន៍កម្ពុជា ត្រូវបានបង្កើតឡើងកាលពីឆ្នាំ១៩៩៤ ដែលផ្ដល់តួនាទីភាកិច្ច ជាសេនាធិការរាជរដ្ឋាភិបាល និងជាច្រកចេញចូលតែមួយក្នុងកិច្ចការងារសម្របសម្រួល និងអនុម័តគម្រោងវិនិយោគ ពិសេ​សការវិនិយោគដោយផ្ទាល់ពីបរទេស និងអនុវត្តកិច្ចការងារសហ​ប្រតិបត្តិការអភិវឌ្ឍន៍ផងដែរ។

ចំពោះការបើកចំហរសេដ្ឋកិច្ចនេះ រាជរដ្ឋាភិបាលបានដាក់ចេញគោលនយោបាយជាតិជាច្រើន ពិសេសគោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ២០១៥-២០២៥ ដើម្បីតម្រង់ទិសទីផ្សារ និងបង្កើតលក្ខខណ្ឌអំណោយផល ដើម្បីជំរុញការអភិវឌ្ឍន៍វិស័យឧស្សាហកម្ម និងការវិនិយោគនៅកម្ពុជា។

ក្រោយទទួលបានការចែករំលែកអំពី បទពិសោធន៍ការងារជាច្រើនរបស់ស្ថាប័ន លោកឯកអគ្គរដ្ឋទូត បានគោរពថ្លែងអំណរគុណយ៉ាងជ្រាលជ្រៅចំពោះការគាំទ្រ ការលើកទឹកចិត្ត ការផ្ដល់បទពិសោធន៍លើកិច្ចការងារវិនិយោគ និងទស្សនទានល្អៗជូនដល់ប្រតិភូ ពិសេសដល់ប្រតិភូជាយុវជន ដែលជាអនាគតថ្នាក់ដឹកនាំ។

បន្ថែមពីនេះ ឯកអគ្គរដ្ឋទូត បានកោតសរសើរកម្ពុជាចំពោះការរៀបចំឱ្យមានតំបន់សេដ្ឋកិច្ចពិសេស ដែលអនុញ្ញាតឱ្យប្រជាពលរដ្ឋជាច្រើនទទួលបានការងារ ហើយលោកឯកអគ្គរដ្ឋទូត បានគោរពស្នើសុំការណែនាំ លើរបៀបដែលកម្ពុជាបានរៀបចំ បង្កើតតំបន់សេដ្ឋកិច្ចទាំងនេះឡើង ដើម្បីអាចឱ្យទីម័រឡេស្តេ អាចប្រើប្រាស់ជាបទពិសោ​ធន៍សម្រាប់អភិវឌ្ឍន៍ប្រទេសខ្លួនផងដែរ។

ដើម្បីជាការជំរុញទឹកចិត្តបន្ថែម លោកស៊ុន ចាន់ថុលបានជម្រាបជូននូវទស្សនទានជាច្រើន ដែលផ្ដល់គុណតម្លៃលើភាពជាអ្នកដឹកនាំ និងការយកប្រទេសជាតិជាសំខាន់ចំពោះមុខ ដើម្បីធ្វើយ៉ាងណាអាចសម្រេចបាន នូវការលើកកម្ពស់គុណភាពមនុស្ស សុខសន្តិភាព និងការអភិវឌ្ឍសេដ្ឋកិច្ចជាដើម។

លោកឧបនាយករដ្ឋមន្ត្រី ក៏បានផ្ដល់ការណែនាំដល់អង្គគណៈប្រតិភូផងដែរ លើការពិនិត្យជម្រាបជូន ថ្នាក់ដឹកនាំទីម័រឡេស្តេ ក្នុងការរៀបចំស្ថាប័នគោលមួយ ដែលទទួលបន្ទុកលើកិច្ចការងារវិនិយោ​គ ដើម្បីបើកទ្វារឱ្យវិនិយោគិន អាចចូលមកបណ្ដាក់ទុនវិនិយោគ។

បន្ថែមពីនេះ លោកឧបនាយករដ្ឋមន្ត្រី បានផ្ដល់ជូនគន្លឹះសំខាន់ដែលស្នូល សម្រាប់យុវជនទាំងអស់ ក្នុងនាមជាអនាគតថ្នាក់ដឹកនាំគួរយកទៅអនុវត្តក្នុងកិច្ចការងារ គឺ 5Es “Energy, Energize, Edge, Execution, Enthusiastic” ដែលជាអ្នកដឹកនាំប្រកបដោយថាមពល ផ្ដល់ការទឹកចិត្ត មានភាពមោះមុត ការអនុវត្តការងារ និងមានភាពសកម្ម៕

ដោយ: គង់ លាងហួរ
អន្តរជាតិ: បើប្រៀបធៀបនឹងតម្លៃក្នុងពេលបិទការជួញដូរកាលពីថ្ងៃពុធម្សិលមិញ គេសង្កេតឃើញថា តម្លៃហាងឆេងមាសបានបន្តងើបឡើងថ្លៃនៅល្ងាចថ្ងៃព្រហស្បតិ៍នេះ បន្ទាប់ពីទិន្នន័យបានបង្ហាញថា ទីផ្សារការងារនៅសហរដ្ឋអាមេរិកបានធ្លាក់ចុះក្នុងខែឧសភា ដែលការណ៍បានជួយជំរុញការរំពឹងទុកនៃការបញ្ចុះអត្រាការប្រាក់។

តួយ៉ាង តម្លៃមាស Spot Gold បានងើបឡើង០,២៦%ដល់២៣៦០,៨៤ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,២១ភាគរយដល់២៣៨០,៥០ដុល្លារ ក្នុងមួយអោន គិតត្រឹមម៉ោង៤:៣១នាទីល្ងាច។

គិតត្រឹមពេលបិទការជួញដូរកាលពីថ្ងៃពុធម្សិលមិញ តម្លៃមាស Spot Gold បានស្ថិតនៅត្រឹម២៣៥៤,៧៨ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានស្ថិតនៅត្រឹម២៣៧៥,៥០ដុល្លារ ក្នុងមួយអោន។

កំណត់សម្គាល់: តម្លៃមាសបានបន្តងើបឡើងថ្លៃនៅល្ងាចថ្ងៃព្រហស្បតិ៍នេះ បើសិនយកទៅប្រៀបធៀបនឹងតម្លៃក្នុងពេលបិទការជួញដូរកាលពីថ្ងៃពុធម្សិលមិញ៕

ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអំពាវនាវកុំឱ្យមានចលនាទិញដី ស្ថិតនៅតាមតម្រាយគម្រោងព្រែកជីកហ្វូណនតេជោ ដើម្បីទារសំណងពីរដ្ឋ។

ថ្លែងក្នុងឱកាសអញ្ជើញសម្ពោធដាក់ឱ្យប្រើប្រាស់​កំពង់ផែពហុបំណងកំពត តម្លៃ១៤០លានដុល្លារ នាព្រឹកថ្ងៃទី០៦ ខែមិថុនា ឆ្នាំ២០២៤ សម្តេចធិបតី ក៏បានអំពាវនាវប្រជាពលរដ្ឋចូលរួមទាំងអស់គ្នា ព្រោះបើគ្មានការចូលរួម គម្រោងរបស់ជាតិ មានតែនៅលើក្រដាសដដែល។ សម្តេចធិបតី បានបន្តថា បើស្រលាញ់ជាតិពិតប្រាកដ ចង់ឱ្យកម្ពុជាមានឯករាជ្យភាពក្នុងដឹកជញ្ជូន ចង់ឃើញទិសនិរតី មានការអភិវឌ្ឍសេដ្ឋកិច្ច ចង់ឱ្យទូទាំងប្រទេសរបស់យើងបានផលពីព្រែកជីកប្រវត្តិសាស្ត្រនេះ ត្រូវតែរួមគ្នាធ្វើ។សម្តេចធិបតី ហ៊ុន ម៉ាណែត បានបញ្ជាក់យ៉ាងដូច្នេះថា «ចុងក្រោយខ្ញុំសុំបងប្អូន ដែលមិនរស់នៅតំបន់ ជាពិសេសអ្នកវិនិយោគ អ្នកដែលចាប់ឱកាសលឿន ខ្ញុំសុំ ព្រោះឥលូវខ្ញុំឮល្ហៀងៗថាប្រមូលគ្នាទិញដី។ កុំ! សូមកុំប៉ះអាកន្លែង ដែលយើងធ្វើ បើយើងធ្វើព្រែកជីកមិនកើត ឬយឺត ក៏យើងខាតដែរ»។

សម្តេច បានបន្តថា «កុំ! ពេលរដ្ឋដាក់គោលនយោបាយ ស្រាប់តែឃើញដីស្រែបោះទង់ ១ការ៉េ ១ពាន់ដុល្លារ ចប់ហើយ។ កន្លែងហ្នឹងទុកទៅ។ ខ្ញុំសូមអំពាវនាវទុកមុនឱ្យហើយ ដើម្បីរួមគ្នា ជាពិសេសបងប្អូនរស់នៅតាមបណ្តោយសណ្តរព្រែក»។

បើតាមប្រសាសន៍សម្តេចធិបតី ហ៊ុន ម៉ាណែត គម្រោងព្រែកជីកហ្វូណនតេជោ នឹងបើកការដ្ឋាននៅថ្ងៃទី៥ ខែសីហា ឆ្នាំ២០២៤។ ការបើកការដ្ឋានព្រែកជីកនេះ ចំថ្ងៃខួបកំណើតរបស់សម្តេចតេជោ ហ៊ុន សែន ប្រធានព្រឹទ្ធសភានៃកម្ពុជា។

សម្តេចធិបតី ហ៊ុន ម៉ាណែត បានបញ្ជាក់ជាថ្មីថា គម្រោងព្រែកជីកហ្វូណនតេជោ មិនមែនវិនិយោគដោយក្រុមហ៊ុនបរទេស ១០០ភាគរយទៀតហើយ គឺក្រុមហ៊ុនខ្មែរជាអ្នកកាន់ទុនភាគច្រើន គឺចាប់ពី៥១ភាគរយឡើងទៅ។ សម្តេចធិបតីបញ្ជាក់ថា ក្រុមហ៊ុនខ្មែរដែលចូលរួមវិនិយោគព្រែកជីកហ្វូណនតេជោ រួមមានកំពង់ផែស្វយ័តព្រះសីហនុ កំពង់ផែស្វយ័តភ្នំពេញ និងក្រុមហ៊ុនឯកជនមួយទៀត។

សម្តេចធិបតី ហ៊ុន ម៉ាណែត បានបន្ថែមថា គម្រោងព្រែកជីកហ្វូណនតេជោ ដើម្បីផលប្រយោជន៍ជាតិ និងពលរដ្ឋខ្មែរពីបច្ចុប្បន្នទៅអនាគត មិនមែនដើម្បីប្រយោជន៍បរទេសនោះឡើយ។

សូមជម្រាបថា គម្រោងផ្លូវនាវាចរណ៍ និងប្រព័ន្ធភស្ដុភារកម្មទន្លេបាសាក់​ «ព្រែកជីកហ្វូណនតេជោ» តភ្ជាប់ផ្លូវទឹករវាងទន្លេរទៅកាន់សមុទ្រកម្ពុជា ដោយឆ្លងកាត់ខេត្តកណ្តាល តាកែវ កំពត និងខេត្តកែប ដែលមានប្រវែង១៨០គីឡូម៉ែត្រ គ្រោងចំណាយទុនសាងសង់ប្រមាណ ១,៧០០លានដុល្លារអាមេរិក។

ព្រែកជីកនេះនឹងផ្តល់អត្ថប្រយោជន៍ដ៏មហាសាលដល់ប្រទេសកម្ពុជា ជាពិសេសវិស័យដឹកជញ្ជូន ដូចជា កាត់បន្ថយតម្លៃដឹកជញ្ជូន កាត់បន្ថយពេលវេលា ចម្ងាយ ការខូចខាតផ្លូវថ្នល់ ការកកស្ទះចរាចរណ៍ គ្រោះថ្នាក់ចរាចរណ៍ ក៏ដូចជាកាត់ បន្ថយនីតិវិធីសម្រាប់នាវា និងបែបបទក្នុងការ ឆ្លងកាត់ទំនិញពីកម្ពុជាទៅសមុទ្រ ការបង្កើតតំបន់ពាណិជ្ជកម្ម តំបន់សេដ្ឋកិច្ចពិសេស ការអភិវឌ្ឍន៍ផែរណបថ្មីៗជាច្រើន ការពង្រីកតំបន់អភិវឌ្ឍន៍កសិកម្ម ធារាសាស្ត្រ វារីវប្បកម្ម ទេសចរណ៍ ជួយរំដោះទឹកជំនន់ក្នុងរដូវវស្សា ជួយបង្កើនផលត្រីទឹកសាបនៅតាមព្រែក អចលនទ្រព្យ និងការវិនិយោគផ្សេងៗ។ល។ និយាយជារួម គម្រោងព្រែកជីកហ្វូណនតេជោនេះ គឺជាគម្រោងបម្រើផល ប្រយោជន៍ជាតិដ៏ធំធេង ជាពិសេស ផ្នែកសេដ្ឋកិច្ចសង្គមនៅកម្ពុជា៕

ដោយ: គង់ លាងហួរ

អន្តរជាតិ: ធនាគារខ្នាតយក្ស HSBC Holdings plc នៅទីក្រុងហុងកុង បានទាក់ទាញអតិថិជនថ្មីជាង១៣០.០០០នាក់ ក្នុងត្រីមាសទីមួយ ឆ្នាំ២០២៤នេះ។ នេះបើយោងតាមការចុះផ្សាយដោយសារពត៌មាន Bloomberg។

ចំណែកកាលពី២០២៣កន្លងទៅ ធនាគារ Bank of China ដែលមានសាខានៅទីក្រុងហុងកុង ទទួលបានអតិថិជនឆ្លងដែនថ្មីចំនួន២០ម៉ឺននាក់ ខណៈដែលការបើកគណនីថ្មីនៅធនាគារ Hang Seng បានហក់ឡើង៣៤២ភាគរយកាលពីឆ្នាំមុន។

កំណើនដ៏ខ្ពស់នេះត្រូវបានជំរុញជាចម្បង ដោយសារប្រជាជនចិនចិនដីគោក បានសម្រុកដាក់ប្រាក់បញ្ញើ នៅតាមធនាគារក្នុងទីក្រុងហុងកុង ស្របពេលដែលតំបន់រដ្ឋបាលពិសេសមួយនេះ កំពុងខិតខំប្រឹងប្រែងស្តារសេដ្ឋកិច្ចរបស់ខ្លួនឡើងវិញ បន្ទាប់ពីជំងឺរាតត្បាត និងចលាចលនយោបាយអស់ជាច្រើនឆ្នាំ។

ជាពិសេស ធនាគារមួយចំនួននៅទីក្រុងហុងកុង បានប្រកាសផ្តល់អត្រាការប្រាក់កាន់តែខ្ពស់ ដែលការណ៍នេះបានទាក់ទាញប្រជាជនចិនជាច្រើន ឱ្យបើកគណនីធនាគារនៅហុងកុង ដើម្បីទាញយកជម្រើសវិនិយោគដ៏ច្រើន រាប់ចាប់តាំងពីការធានារ៉ាប់រងរហូតដល់ប្រាក់បញ្ញើមានកាលកំណត់។

ជាក់ស្តែង កាលពីដើមឆ្នាំ២០២៤នេះ ធនាគារ Standard Chartered plc នៅហុងកុង បាននិងកំពុងផ្តល់ជូនអត្រាការប្រាក់លើប្រាក់បញ្ញើរយៈពេលខ្លីប្រមាណ១០% ដើម្បីទាក់ទាញអតិថិជនចិនដីគោក ខណៈក្រុមនិយតករនៅទីក្រុងប៉េកាំង បានបង្ក្រាបទៅលើការវិនិយោគដែលផ្តល់ផលចំណេញខ្ពស់កប់ពពក។

លោកស្រី Maggie Ng ប្រធានផ្នែកហិរញ្ញវត្ថុនៅឯធនាគារ HSBC បានលើកឡើងថា “ចំនួនប្រជាជនចិន ដែលបានដាក់ប្រាក់បញ្ញើក្នុងធនាគារនៅក្រៅប្រទេស កំពុងកើនឡើងយ៉ាងគំហុក។ លោកបន្ថែមថា “ហុងកុងគឺជាទីផ្សារដ៏ទាក់ទាញដំបូងគេ សម្រាប់អតិ​ថិ​ជនចិនដីគោកទាំងនេះ ខណៈដែលពួកគេកំពុងស្វែងរកការវិនិយោគនៅបរទេស”។

ក្នុងអំឡុងត្រីមាសទី១ ការលក់ធានារ៉ាប់រងដល់អតិថិជនដីគោកបានកើនឡើង៦២,៦% ដល់ទំហំទឹកប្រាក់១៥,៦ពាន់លានដុល្លារហុងកុង (ប្រហែល២ពាន់លានដុល្លារអាមេរិក)។  ជាមួយគ្នានេះ ក្រុមហ៊ុន AIA Group Ltd និងក្រុមហ៊ុនព្រូដិនសល ភីអិលស៊ី ស្ថិតក្នុងចំណោមក្រុមហ៊ុននានាដទៃទៀត ដែលបានលក់ធានារ៉ាប់រងដ៏ច្រើនសន្ធឹកសន្ធាប់ទៅកាន់ប្រជាជនចិន៕ប្រភព:Bloomberg៕

ដោយ: គង់ លាងហួរ

អន្តរជាតិ: តម្លៃផ្ទះអាជីវកម្មនៅប្រទេសសិង្ហបុរី ត្រូវបានដាក់លក់ ក្នុងតម្លៃខ្ពស់ចន្លោះពី៣៩.៩៧០ ទៅ៤៧.៩៦០ដុល្លារអាមេរិកក្នុងមួយម៉ែត្រការ៉េ។ នេះបើយោងតាមប្រភពសារពត៌មាន VNexpress។

បន្ថែមពីនេះ ក្នុងករណីមួយចំនួន តម្លៃផ្ទះអាជីវកម្មនៅប្រទេសដ៏តូចមួយនេះ ក៏អាចហក់ឡើងដល់៦៣.៩៤០ដុល្លារអាមេរិក ក្នុងមួយម៉ែត្រការ៉េផងដែរ។ ចំណែក តម្លៃជាមធ្យមនៃផ្ទះអាជីវកម្ម បានកើនឡើង២៧,១% ដល់៤៤.៥០៥ដុល្លារអាមេរិក ក្នុងមួយម៉ែត្រការ៉េ ក្នុងរយៈពេល៣ខែដំបូងដើមឆ្នាំនេះ។

សារពត៌មាន CNA បានរាយការណ៍ថា តម្លៃផ្ទះទាំងនេះ អាចយកទៅធ្វើការប្រៀបធៀប ជាមួយនឹងតម្លៃអចលនទ្រព្យ ដែលមានទីតាំងនៅលើមហាវិថី Fifth Avenue ក្នុងទីក្រុងញ៉ូវយ៉ក សហរដ្ឋអាមេរិក ដែលជាតំបន់លក់រាយដ៏ថ្លៃបំផុតរបស់ពិភពលោក។

កាសែត Business Times បានរាយការណ៍ ដោយដកស្រង់របាយការណ៍របស់ក្រុមហ៊ុន Knight Frank មកចុះផ្សាយថា ការលក់ផ្ទះអាជីវកម្ម ក្នុងប្រទេសសិង្ហបុរី បានកើនឡើង៥២,២%  ដល់ទំហំទឹកប្រាក់ប្រមាណ១២៥,៤លានដុល្លារអាមេរិក នៅត្រីមាសទី១ ឆ្នាំ២០២៤ បើធៀបនឹងត្រីមាសទី៤ ឆ្នាំ២០២៣។លោកស្រី Yap Hui Yee នាយកនៅក្រុមហ៊ុនប្រឹក្សាអចលនទ្រព្យ Savills បានលើកឡើងថា “ផ្ទះអាជីវកម្មគឺជាប្រភេទទ្រព្យសកម្មតែមួយគត់ ដែលតម្លៃផ្ទះប្រភេទនេះ នៅតែបន្តកើនឡើងទោះ​បីជាស្ថិតនៅក្នុងអំឡុងពេលជំងឺរាតត្បាតយ៉ាងណាក្តី”។

សារពត៌មាន AFR បានរាយការណ៍ថា កាលពីខែឧសភាកន្លងទៅថ្មីៗនេះ លោកមហាសេដ្ឋី Ray Dalio ស្ថាបនិកក្រុមហ៊ុនវិនិយោគ Bridgewater Associates បានទិញផ្ទះអាជីវកម្ម ដែលមានតម្លៃរាប់លានដុល្លារនៅប្រទេសសិង្ហបុរី ដូចមហាសេដ្ឋីដទៃផ្សេងទៀតដែរ។

លើសពីនេះ លោកស្រី Zhang Ying ​ដែលជាភរិយា​របស់​មហាសេដ្ឋី​ចិនលោក Jack Ma បាន​ទិញ​ផ្ទះ​អាជីវកម្មចំនួន៣ខ្នងនៅសិង្ហបុរី ក្នុង​តម្លៃ៣៣,៤២លាន​ដុល្លារ​​អាមេរិក កាល​ពី​ខែ​កុម្ភៈកន្លងទៅ៕ប្រភព: Vnexpress៕

ដោយ: គង់ លាងហួរ

អន្តរជាតិ: ប្រទេសម៉ាឡេស៊ី បានប្រកាសគម្រោងសាងសង់ទីក្រុងនាពេលអនាគត(futuristic city) ដែលអាចប្រកួតប្រជែងជាមួយគម្រោងទីក្រុង Neom របស់ប្រទេសអារ៉ាប៊ីសាអូឌីត។

គម្រោងទីក្រុងនេះ នឹងលាតសន្ធឹតប្រវែង១.៨២១ហិកតា ដោយក្នុងនោះក្រុមហ៊ុន Bjarke Ingels Group(BIG) បានសហការជាមួយក្រុមហ៊ុនស្ថាបត្យកម្មចំនួន២ រួមមានក្រុមហ៊ុន Ramboll Group របស់ប្រទេសដាណឺម៉ាក និងក្រុមហ៊ុន Hijjas Architects & Planners ដើម្បីអភិវឌ្ឍន៍គម្រោងនេះឱ្យលេចជារូបរាងឡើង។

តាមរយៈគម្រោងនេះ ម៉ាឡេស៊ីគ្រោងសាងសង់បណ្តាញដឹកជញ្ជូនស្វយ័ត ដើម្បីផ្សារភ្ជាប់កោះសិប្បនិម្មិតចំនួន៣ នៅឆ្នេរសមុទ្រ Penang ដែលជាផ្នែកមួយនៃផែនការមេ Biodiversity របស់ក្រុមហ៊ុន Bjarke Ingels Group។

កោះសិប្បនិម្មិតទាំង៣នេះ ត្រូវបានរចនាឡើង ដោយយកលំនាំស្រដៀងទៅនឹងផ្កាឈូក។ នៅលើកោះទាំងនេះ នឹងមានការសាងសង់តំបន់ប្រើប្រាស់ចម្រុះ សួនឧទ្យានទំហំ២៤២ហិកតា និងឆ្នេរសាធារណៈដែលមានប្រវែង៤,៦គីឡូម៉ែត្រ។

លើសពីនេះទៀត កោះទាំងនេះនឹងត្រូវបានតភ្ជាប់គ្នា ដោយបណ្តាញដឹកជញ្ជូនស្វយ័ត តាមរយៈផ្លូវគោក ផ្លូវអាកាស និងផ្លូវសមុទ្រ ដោយផ្តល់អាទិភាព ដល់អ្នកដើរថ្មើរជើង និងអ្នកជិះកង់ និងបង្កើតបរិយាកាស ដែលគ្មានការបើកបររថយន្ត នៅក្នុងទីក្រុងដែនកោះនាពេលអនាគតមួយនេះ។

ផែនការមេ BiodiverCity ត្រូវបានបង្កើតឡើង ក្នុងគោលបំណងប្រែក្លាយកោះ Penang ទៅជា“គោលដៅសកល”ដែលនឹងលើកកម្ពស់ការអភិវឌ្ឍន៍វប្បធម៌ និងជំរុញកំណើនសេដ្ឋកិច្ចប្រកប​ដោយនិរន្តរភាព ព្រមទាំងជួយការពារជម្រកធម្មជាតិ របស់ដែនកោះនេះ និងជីវចម្រុះនៅតំបន់ឆ្នេរ៕ប្រភព: Thenews.com.pk៕

ដោយៈ ហ្វីអូណា

        ភ្នំពេញៈ រាជរដ្ឋាភិបាលកម្ពុជា បានជ្រើសរើសវិថចំនួន២ដាក់ឈ្មោះមេដឹកនាំឥណ្ឌូនេស៊ី ដើម្បីថថ្លែងអំណរគុណ និងពង្រឹងមិត្តភាព និងកិច្ចសហប្រតិបត្តិការរវាងប្រទេសទាំងពីរ។

ព័ត៌មាននេះ ត្រូវបានលើកឡើងដោយសម្តេចតេជោ ហ៊ុន សែន ប្រធានព្រឹទ្ធសភា ក្នុងឱកាសសម្តេចអនុញ្ញាតឲ្យឯកឧត្ដម សាន់តូ ដាម៉ូស៊ូម៉ាតូ(Santo Darmosumarto) ឯកអគ្គរដ្ឋទូតសាធារណរដ្ឋឥណ្ឌូណេស៊ីប្រចាំកម្ពុជា ចូលជួបសម្ដែងការគួរសម និងពិភាក្សាការងារ នៅវិមានព្រឹទ្ធសភា រាជធានីភ្នំពេញ ។

សម្តេចបន្តឲ្យដឹងថា “កម្ពុជាបានរៀបចំឱ្យមានវិថីពីរ ដែលបានដាក់ឈ្មោះថា “វិថីស៊ូកាណូ” និងវិថី “អាលី អាឡាតាស” ដែលជាឥស្សរជនឥណ្ឌូណេស៊ី បានរួមចំណែកជាមួយនឹងកម្ពុជា ជាពិសេស គឺឯកឧត្តម អាលី អាឡាតាស ដែលបានជួយជ្រោមជ្រែងរកដំណោះស្រាយសន្តិភាព ដល់ប្រទេសកម្ពុជា ។

សម្ដេចបានលើកឡើងថា “ប្រទេសយើងទាំងពីរមានទំនាក់ទំនងយូរអង្វែងហើយ ពុំដែលមានបញ្ហាអ្វីជាមួយគ្នានោះទេ” ។

សម្ដេចតេជោ ក៏បានរំលឹកផងដែរពីអនុស្សាវរីយ៍ នៅក្នុងការធ្វើការងារជាមួយថ្នាក់ដឹកនាំឥណ្ឌូណេស៊ី ក្នុងការនាំមកនូវសុខសន្តិភាព និងដំណោះស្រាយចំពោះកម្ពុជា។ ឥណ្ឌូណេស៊ី គឺតែងតែបានប្រឹងប្រែងជួយដោះស្រាយ ក្នុងឋានៈជាសហប្រធានសន្និសីទ ទីក្រុងប៉ារីស និងក៏បានរំលឹកពីកិច្ចប្រជុំ JIM 1 & 2 នៅសាធារណរដ្ឋឥណ្ឌូណេស៊ី។

ក្រោយមកសម្ដេច បានធ្វើការជាមួយប្រធានាធិបតីឥណ្ឌូណេស៊ី បន្តបន្ទាប់ រហូតដល់លោក Joko Widodo អស់រយៈពេលពីរអាណត្តិ។

ជាមួយគ្នានេះ សម្ដេចតេជោ ហ៊ុនសែន ក៏បានគូសបញ្ជាក់ថា រាជរដ្ឋាភិបាលថ្មីដឹកនាំដោយ សម្ដេចធិបតី ហ៊ុន ម៉ាណែត នាយករដ្ឋមន្ត្រី នឹងបន្តការងារជាមួយលោកឯកអគ្គរដ្ឋទូត ក្នុងការពង្រឹងកិច្ចសហប្រតិបត្តិការគ្រប់វិស័យ ។

សម្ដេចក៏បានអបអរសាទរ ចំពោះជោគជ័យនៃការបោះឆ្នោតជ្រើសរើសប្រធានាធិបតីឥណ្ឌូណេស៊ី កន្លងទៅនេះ ដែលលោក Prabowo Subianto ត្រូវចូលកាន់តំណែងជាប្រធានាធិបតី នៅខែតុលាខាងមុខនេះ ៕

ដោយ: គង់ លាងហួរ

អន្តរជាតិ: ក្រុមហ៊ុនស្ថាបត្យកម្មដ៏ល្បីឈ្មោះ Cloud Architecture បានប្រកាសផែនការសាងសង់អគារមួយ នៅទីក្រុងញ៉ូវយក សហរដ្ឋអាមេរិក ដែលព្យួរពីលើអាកាសចុះមកផែនដី របស់យើង ចាប់តាំងពីប៉ុន្មានឆ្នាំមុនមកម្ល៉េះ។

ប៉ុន្តែគិតមកទល់ឆ្នាំ២០២៤នេះ សំណួរនៅតែត្រូវបានចោទសួរឡើងថា តើអគារនេះអាចលេចរូបរាងឡើងឬយ៉ាងណា?។

ក្រុមហ៊ុនស្ថាបត្យកម្មដ៏ល្បីមួយនេះ ក៏ជាអ្នករចនាគម្រោងស្ថាបត្យកម្មបែបអនាគត (Futuristic) ដូចជាស្ថាបត្យកម្មនៅលើលំហរអាកាស ការសាងសង់ប៉មនៅលើភពព្រះអង្គារ និងអគារអណ្តែតជាដើម។

ជាក់ស្តែង គម្រោងសាងសង់អគារមួយ នៅទីក្រុងញ៉ូវយក ដែលព្យួរពីលើអាកាសចុះមកផែនដី ត្រូវបានដាក់បង្ហាញតាំងពីឆ្នាំ២០១៧ ដែលអគារនេះមានឈ្មោះថា Analemma Tower ដែលអាចបណ្តែតខ្លួននៅលើលំហរអាកាស ជុំវិញភពផែនដីបាន។

លទ្ធភាពសម្រាប់សាងសង់គម្រោងមួយនេះ ត្រូវបានក្រុមហ៊ុនស្ថាបត្យកម្ម Cloud Architecture បកស្រាយថា  ការសាងសង់អគារមួយនេះ ត្រូវបានបែងចែងទៅជាដំណាក់កាលសំខាន់ៗ ផ្សេងៗពីគ្នា។

ក្នុងនោះ ដំណាក់កាលដំបូង គេត្រូវមានដុំអាចម៍ផ្កាយមួយ ដែ​លអាចគោចរជុំវិញគន្លងផែនដី។ បន្ទាប់មកដុំអាចម៍ផ្កានេះនឹងក្លាយជាមូលដ្ឋានគ្រឹះ នៃការចាប់ផ្ដើមសាងសង់តែម្តង តាមរយៈការតភ្ជាប់ខ្សែកាបទំហំធំពីដុំអាចម៍ផ្កាយ រួចបង្ហូតចុះក្រោម។

នៅដំណាក់កាលបន្ទាប់ ក្រុមហ៊ុននឹងសាងសង់បំណែកនៃអគារនេះ នៅលើផែនដីជាមុនសិន។ បន្ទាប់មក ខ្លួននឹងដឹកជញ្ជូនបំណែកនៃអគារទាំងនោះ ទៅកាន់លំហអាកាស ដើម្បីផ្គុំចូលគ្នា ជាមួយនឹងខ្សែកាប ដែលបានភ្ជាប់ទៅនឹងដុំអាចម៍ផ្កាយនោះ។

ទោះជាយ៉ាងណាក្តី ការដឹកជញ្ជូនបំណែកអគារយកទៅផ្គុំសាងសង់ នៅលើលំហអាកាសបែបនេះ ក៏នឹងជួបផលពិបាកខ្លាំងផងដែរ។ ត្រង់ចំណុចនេះ ក្រុមហ៊ុន Cloud Architecture បានអះអាងថា ដោយសារដុំអាចម៍ផ្កាយ ដែលគោចរជុំវិញគន្លងរបស់ផែនដី នឹងមិនស្ថិតនៅស្ងៀមនោះទេ គឺវានឹងវិលជុំវិញផែនដីតែម្តង។

ដោយឡែក បើក្រឡេកទៅមើលអំពីការរចនាអគារ Analemma Tower នេះវិញ គេសង្កេតឃើញថា អគារនេះត្រូវបានបែងចែងជាជាន់ ឬជាថ្នាក់សំខាន់ៗ ទៅតាមប្រភេទមុខងារប្រើប្រាស់ ដូចជានៅជាន់ខាងក្រោម គឺជាទីតាំងសម្រាប់ហាងលក់ទំនិញ និងភោជនីយដ្ឋាន។

ចំណែក នៅជាន់បន្ទាប់ទៀត គឺជា Space សម្រាប់ទីតាំងការិយាល័យ និងនៅជាន់បន្ទាប់ទៀត គឺជាទីតាំងសួនឧទ្យាន និងកសិកម្ម ហើយនៅជាន់បន្ទាប់ទៀត គឺជាទីតាំងលំនៅដ្ឋានសម្រាប់រស់នៅតែម្តង។

យ៉ាងណាមិញ សរុបមក គេនៅមិនទាន់ដឹងច្បាស់ថា តើគម្រោងមួយនេះ នឹងអាចលេចចេញជារូបរាង បាននៅពេលណានោះទេ ខណៈបច្ចុប្បន្ន ក្រុមហ៊ុនស្ថាបត្យកម្ម Cloud Architecture កំពុងតែសិក្សាបន្ថែមទៀត ទៅលើគម្រោងមួយនេះ៕ប្រភព: New York Post៕