ដោយៈ ស៊ីវ ម៉េង

        ភ្នំពេញៈ ជាដំណឹងដ៏ល្អមួយ សម្រាប់បងប្អូនប្រជាពលរដ្ឋរស់នៅតាមទីរួមខេត្ត និងរាជធានីទាំង២៥ ដែលពួកគាត់អាចប្តូរដីជាមួយបុរីខេអេស រ៉េស៊ីដេន(KS Resident) របស់លោកឧកញ៉ាបណ្ឌិតគីម ហ៊ាង ដែលជាអ្នកភិវឌ្ឈន៍បុរីខាងលើនេះ។

លោកឧកញ៉ាបានសរសេរលើបណ្តាញទំនាក់ទំនងសង្គមនាព្រឹកថ្ងៃទី១៧ ឧសភានេះថា លោក អ្នកមានដីនៅភ្នំពេញ តែមិនទាន់មានផ្ទះស្នាក់នៅ អាចអញ្ជើញមកដូរដី ជាមួយផ្ទះនៅក្នុងបុរី ខេអេស រ៉េស៊ីដេន បាន។  ចំណែកលោក អ្នកមានដីនៅតាមទីរួមខេត្ត ឬទីរួមស្រុក ឬទីប្រជុំជន ហើយចង់បានផ្ទះមួយ នៅជាយក្រុងភ្នំពេញ ដើម្បីអោយកូន ឬស្នាក់នៅខ្លួនឯង។

លោកឧកញ៉ាបានបន្តថា ផ្ទះនៅបុរី ខេអេស រ៉េសដេន បានសង់ចប់១០០% មានប្លង់រឹងLMAP ស្រាប់ ហើយមានប្រជាជនជាច្រើន កំពុងស្នាក់នៅស្រាប់ នៅកៀនស្វាយ ខាងកើតផ្សារច្បារអំពៅ៨គម ឬ១០គម ពីទីក្រុងកោះនរា។

លោកឧកញ៉ាបានបន្តទៀតថា ការដោះដូរនេះ នឹងធ្វើឡើងតាមរយៈការវាយតម្លៃដីធ្លីជាក់ស្តែង ធៀបជាមួយតម្លៃផ្ទះនៅបុរីខេអេស រ៉េស៊ីដេន (KS Resident) ជាមួយនឹងការចចារជាក់ស្តែង ដែលលោកនឹងសម្រួល ដល់ការដោះដូរនេះជូនប្រជាពលរដ្ឋ ដោយឈរលើគោលការណ៍ឈ្នះ ឈ្នះទាំងអស់គ្នា។

ប្រជាពលរដ្ឋចាប់អារម្មណ៍ អាចទំនាក់ទំនងតាមរយៈលេខទូរស័ព្ទ069 96 2000 និង 077 96 2000
ស្ថាបនិកបុរី ខេអេស រ៉េស៊ីដេន៕

        ដោយៈ ជេស៊ីកា

        ប្រទេសកូរ៉េៈ លោកហាន់ ដុកស៊ូ (Han Duck-soo) នាយករដ្ឋមន្រ្តីនៃសាធារណរដ្ឋកូរ៉េបានថ្លែងថា កម្ពុជាគឺជាទិសដៅនៃការវិនិ​យោគ និងជាទីផ្សារដ៏មានសក្ដានុពល សម្រាប់វិស័យឧស្សាហកម្មកូរ៉េ ជាពិសេសឧស្សាហកម្មយានយន្ត។

លោកបានលើកឡើងបែបនេះ ក្នុងជំនួបជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ក្នុង ឱកាសនៃដំណើរទស្សនកិច្ចផ្លូវការ នៅទីក្រុងសេអ៊ូល សាធារណរដ្ឋកូរ៉េ ចាប់ពីថ្ងៃទី១៥-១៨ ខែឧសភា ឆ្នាំ២០២៤។

ក្នុងជំនួបនេះ លោកហាន់ ដុកស៊ូ បានសម្តែងនូវកិច្ចស្វាគមន៍យ៉ាងកក់ក្តៅ ចំពោះការអញ្ជើញបំពេញទស្សនកិច្ចផ្លូវការរបស់ សម្តេ​ចធិបតី ហ៊ុន ម៉ាណែត និងគណៈប្រតិភូជាន់ខ្ពស់ នៃរាជរដ្ឋាភិបាលកម្ពុជា នៅក្នុងសាធារណរដ្ឋកូរ៉េ និងបានរំលេចអំពីការឯកភាពដំឡើ​ងនូវកម្រិតទំនាក់ទំនងកូរ៉េ -កម្ពុជាឈានដល់កម្រិត “ភាពជាដៃគូយុទ្ធសាស្រ្ត” ហើយទំនាក់ទំនងនេះ នឹងចូលរួមចំណែកក្នុងការពង្រឹងនូវទំនាក់ទំនង និងកិច្ចសហប្រតិបត្តិការ លើវិស័យនានារវាងប្រទេសទាំងពីរ។

លោកក៏បានសម្តែងនូវការគាំទ្រ និងពេញចិត្ត ចំពោះគំនិតផ្តួចផ្តើមរបស់សម្តេចធិបតី ក្នុងការបង្កើតតំបន់សេដ្ឋកិច្ចពិសេសសម្រាប់ក្រុមហ៊ុនកូរ៉េ និងការជំរុញឱ្យមានយន្តការ នៃការជួបពិគ្រោះយោបល់ជាទៀងទាត់ រវាងសមាគមធុរកិច្ចកូរ៉េនៅកម្ពុជា និងបានបង្ហាញនូវក្តីរីករាយ ក្នុងការបង្កើនជំនួយអភិវឌ្ឍន៍ផ្លូវការបន្ថែម តាមរយៈហិរញ្ញប្បទានឥតសំណង របស់ទីភ្នាក់ងារសហប្រតិបត្តការអន្តរជាតិកូរ៉េ (KOICA)  និងឥណទានសម្បទាន តាមរយៈមូលនិធិសហប្រតិបត្តិការអភិវឌ្ឍន៍សេដ្ឋកិច្ច (EDCF Loan)។

ជាការឆ្លើយតប សម្តេចធិបតី បានសម្តែងនូវក្តីសោមនស្សរីករាយ ដែលបានជួបពិភាក្សាការងារជាមួយ លោកនាយករដ្ឋមន្រ្តីកូរ៉េ ព្រមទាំងបានវាយតម្លៃខ្ពស់ ចំពោះទំនាក់ទំនងនិងកិច្ចសហប្រតិ​បត្តិការរវាងកម្ពុជា-កូរ៉េ ដែលបានឈានដល់កម្រិត “ភាពជាដៃគូយុទ្ធសាស្រ្ត” ដែលជាទំនាក់ទំនងដ៏ល្អប្រសើរ។

សម្តេចធិបតីបានកោតសរសើរ ចំពោះការចូលរួមចំណែកយ៉ាងសកម្មរបស់រដ្ឋាភិបាលកូរ៉េ ក្នុងការកសាង និងអភិវឌ្ឍន៍សង្គម-សេដ្ឋកិច្ចកម្ពុជានាពេលកន្លងមក។ ទន្ទឹមនោះ សម្តេចធិបតីក៏បានជម្រាបជូនឯកឧត្តមនាយករដ្ឋមន្រ្តីកូរ៉េថា វិស័យឯកជនមានសារៈសំខាន់ណាស់ ក្នុងការអភិវឌ្ឍប្រទេសកម្ពុជា ដោយការពង្រឹងតួនាទីរបស់វិស័យឯកជន នឹងធ្វើឱ្យការអភិវឌ្ឍសង្គម -សេដ្ឋកិច្ចកម្ពុជា កាន់តែរីកចម្រើនបន្ថែមទៀត៕

        ដោយៈ គង់ សូរិយា

        ភ្នំពេញៈ ផ្សារទំនើបធំៗរបស់ថៃចំនួន២ នឹងមកបើកសាខាបន្ថែ​មទៀតនៅកម្ពុជា ខណៈនៅក្នុងនោះផ្សារទំនើបMakro នឹងមកបើកសាខា៣បន្ថែមកម្ពុជា។ ចំណែកផ្សារទំនើបBig C វិញនាពេលបច្ចុប្បន្ននេះ កំពុងតែចាប់ផ្តើមសាងសង់ ទីតាំងថ្មី១កន្លែងទៀតផងដែរ។

ផ្សារទំនើបខ្នាតយក្ស១របស់ថៃ គឺMakro បានបង្ហើបពីគោលបំណងដែលខ្លួន គ្រោងនឹងមកពង្រីក ផ្សារទំនើបចំនួន៣កន្លែងបន្ថែមទៀតនៅប្រទេសកម្ពុជា ក្រោយពីផ្សារទំនើបមួយនេះ ធ្លាប់បានបើកសាខាចំនួន៣កន្លែង កន្លងមកហៅនៅទីផ្សារស្រុកខ្មែរ។ នេះបើយោង​តាមការចុះផ្សាយដោយភ្នាក់ងារសារព័ត៌មានរបស់ថៃ The National Thailand។

ប្រភពដដែលបានបន្តឱ្យដឹងទៀតថា បច្ចុប្បន្ននេះផ្សារទំនើបខ្នាតយក្សម៉ាក្រូ មានសាខាចំនួន៣កន្លែងហើយនៅកម្ពុជា ដោយសាខាទី១ នៅក្នុងខេត្តសៀមរាប ចំណែកពីរសាខាទៀត គឺនៅរាជធានីភ្នំពេញ (នៅខណ្ឌសែនសុខ និងខណ្ឌជ្រោយចង្វារ) ហើយនៅឆ្នាំ ២០២៦ ខាងមុខនេះ ផ្សារម៉ាក្រូនឹងបើក ៣ទីតាំងបន្ថែមទៀតនៅកម្ពុជា។

ចំណែកផ្សារទំនើប Big C កាលពីចុងឆ្នាំ២០២៣ កន្លងទៅ ក្រុមហ៊ុន វិនិយោគទុនអនិកជនកម្ពុជា ហៅកាត់ (OCIC) និងក្រុមហ៊ុន BJC របស់ថៃ បានចុះហត្ថលេខាលើកិច្ចព្រមព្រៀងការអភិវឌ្ឍន៍ផ្សារទំនើប Big C ទំហំ២.៧ហិកតា ដែលមានទីតាំងស្ថិតនៅរង្វង់មូលសុវណ្ណមច្ឆា ក្នុងទីក្រុងរណបជ្រោយចង្វារ រាជធានីភ្នំពេញ។

សម្រាប់គម្រោងផ្សារទំនើបថ្មីនេះដែរ ក្រុមហ៊ុន BJC បានដាក់ទុនវិនិយោគ ក្នុងទំហំទឹកប្រាក់សរុ​បរហូតដល់៥០លានដុល្លារ។ បើតាមការគ្រោងទុកផ្សារទំនើប Big C នេះត្រូវបានគេរំពឹងថា នឹងបើកដំណើរការក្នុងចន្លោះរយៈពេលពី១៨ ទៅ២៤ខែ គិតចាប់ពីពេលចាប់ផ្តើមសាងសង់។

កន្លងមកនេះ Big C បានដំណើរការផ្សារទំនើបទី១ របស់ខ្លួននៅក្រុងប៉ោយប៉ែតរួចមកហើយ។ ដោយក្នុងនោះក៏មាន Big C Mini ចំនួន២០ នៅរាជធានីភ្នំពេញ និងខេត្ដកំពត ហើយBig C ក៏គ្រោងនាំយកយីហោរបស់ខ្លួន ទៅខេត្តបាត់ដំបងផងដែរ៕​

ដោយ: គង់ លាងហួរ

អន្តរជាតិ: ទុនបម្រុងប្តូរប្រាក់បរទេស(foreign exchange reserves) ត្រូវបានគេប្រើប្រាស់សំដៅទៅលើទ្រព្យសកម្ម ឬរូបិយប័ណ្ណបរទេស ដែលរក្សាទុកដោយធនាគារកណ្តាល របស់បណ្តាប្រទេ​សនីមួយៗនៅលើពិភពលោក។

ទុនបម្រុងទាំងនេះមានសារៈសំខាន់ណាស់ ក្នុងការទូទាត់ពា​ណិជ្ជកម្មអន្តរជាតិ ហើយថែមទាំងការពារហានិភ័យ នៃអត្រាប្តូរប្រាក់ផងដែរ ខណៈប្រទេសភាគច្រើន នៅលើពិភពលោកមានទុនបម្រុងជាប្រាក់ដុល្លារអាមេរិក និងមាសផងដែរ។

ខាងក្រោមនេះ គឺជាបណ្តាប្រទេសធំៗទាំង៥ ដែលមានប្រាក់បម្រុងបរទេសសរុបច្រើនជាងគេ បង្អស់នៅលើពិភពលោក គិតត្រឹមត្រីមាសទី១ ឆ្នាំ២០២៤៖

ចំណាត់ថ្នាក់ទី១: ប្រទេសចិន
ប្រទេសចិននាំមុខគេក្នុងបញ្ជីប្រទេសកំពូលទាំង៥ ដែលមានទុនបម្រុងរូបិយប័ណ្ណបរទេសច្រើនបំផុត រួមទាំងមាសផងដែរ។ នៅក្នុងត្រីមាស១ ប្រទេសចិនមានទុនបម្រុង រូបិយប័ណ្ណបរទេសសរុបចំនួន៣,៤៧ទ្រីលានដុល្លារ ដោយក្នុងនោះមានទុនបម្រុងមាស គិតជាទឹកប្រាក់ចំនួន១៦១,០៧ពាន់លានដុល្លារ។ នេះបើយោងតាមទិន្នន័យរបស់ក្រុមប្រឹក្សាមាសពិភពលោក។

ចំណាត់ថ្នាក់ទី២: ប្រទេសជប៉ុន
ប្រទេសជប៉ុននាំមុខគេលំដាប់ទី២ ក្នុងបញ្ជីប្រទេសកំពូលទាំង៥ ដែលមានទុនបម្រុងរូបិយប័ណ្ណបរទេសច្រើនបំផុត។ នៅក្នុងត្រីមាស១ ប្រទេសនេះមានទុនបម្រុងរូបិយប័ណ្ណបរទេស សរុបចំនួន១,២៩ទ្រីលានដុល្លារ ក្នុងនោះមានទុនបម្រុងមាស គិតជាទឹកប្រាក់ចំនួន៦០,២២ពាន់លានដុល្លារ។ នេះបើយោងតាមទិន្នន័យរបស់ក្រុមប្រឹក្សាមាសពិភពលោក។

ចំណាត់ថ្នាក់ទី៣: ប្រទេសស្វីស
ប្រទេសស្វីសនាំមុខគេលំដាប់ទី៣ ក្នុងបញ្ជីប្រទេសកំពូលទាំង៥ ដែលមានទុនបម្រុងរូបិយប័ណ្ណបរទេសច្រើនបំផុត។ នៅក្នុងត្រីមាស១ ប្រទេសនេះមានទុនបម្រុង រូបិយប័ណ្ណបរទេសសរុបចំនួន៨៦៤,៤២ពាន់លានដុល្លារ ដោយក្នុងនោះមានទុនបម្រុងមាសគិតជាទឹកប្រាក់ចំនួន៦៩,៤៩ពាន់លានដុល្លារ។ នេះបើយោងតាមទិន្ន​ន័យរបស់ក្រុមប្រឹក្សាមាសពិភពលោក។

ចំណាត់ថ្នាក់ទី៤: សហរដ្ឋអាមេរិក
សហរដ្ឋអាមេរិកនាំមុខគេលំដាប់ទី៤ ក្នុងបញ្ជីប្រទេសកំពូលទាំង៥ ដែលមានទុនបម្រុងរូបិយប័ណ្ណបរទេសច្រើនបំផុត។ នៅក្នុងត្រីមាស១ ប្រទេសនេះមានទុនបម្រុងរូបិយប័ណ្ណ បរទេសសរុបចំនួន៨១១,៨១ពាន់លានដុល្លារ ដោយក្នុងនោះមានទុនបម្រុងមាសគិតជាទឹកប្រាក់ចំនួន៥៧៩,០៥ពាន់លានដុល្លារ។ នេះបើយោងតាមទិន្ន​ន័យរបស់ក្រុមប្រឹក្សាមាសពិភពលោក។

ចំណាត់ថ្នាក់ទី៥: ប្រទេសឥណ្ឌា
ប្រទេសឥណ្ឌាឈរនៅលេខរៀងទី៥ ក្នុងបញ្ជីប្រទេសកំពូលទាំង៥ ដែលមានទុនបម្រុងរូបិយប័ណ្ណបរទេសច្រើនបំផុត។ នៅក្នុងត្រីមាស១ ប្រទេសនេះ មានទុនបម្រុងរូបិយប័ណ្ណបរទេសសរុបចំនួន៦៥១,៩៥ពាន់លានដុល្លារ ដោយក្នុងនោះមានទុនបម្រុងមាសគិតជាទឹកប្រាក់ចំនួន៥៨,៥២ពាន់លានដុល្លារ។ នេះបើយោងតាមទិន្នន័យរបស់ក្រុមប្រឹក្សាមាសពិភពលោក៕ប្រភព:Times of India៕

        ដោយៈ គង់ សូរិយា

        ប្រទេសចិនៈ លោកGuo Xingfu អនុប្រធានគណៈកម្មាធិការអចិន្ត្រៃយ៍ នៃសភាប្រជាជនខេត្តចេជាង និងប្រធានក្រុមហ៊ុនធំៗ នៃខេត្តចេជាង បានស្នើសុំបង្កើតទីក្រុងរណបមួយនៅខេត្តកោះកុង។

ភាគីចិន ក៏បានស្នើសុំការគាំទ្រកំពង់ផែ Ningbo ដែលជាកំពង់ផែធំរបស់ខេត្តចេជាង និងជាកំពង់ផែធំទី៣នៃប្រទេសចិន ដែលជាប្រព័ន្ធដឹកជញ្ជូនផ្លូវទឹកដ៏សំខាន់ សម្រាប់ប្រទេសចិន និងឆ្លងកាត់ផ្លូវទឹកប្រទេ​សកម្ពុជា ពិសេសអាចរកដៃគូរវិនិយោគគិនចិន កសាងកំពង់ផែទឹកជ្រៅ នៅខេត្តកោះកុង ព្រោះបច្ចុប្បន្នការដឹកជញ្ជូនតាមផ្លូវទឹកឆ្លងកាត់ប្រទេសសិង្ហបុរីមានតម្លៃថ្លៃខ្លាំងពេក។

សំណើរទាំងពីរនេះ ត្រូវបានលើកឡើងក្នុងពេលលោកបណ្ឌិ អ៊ុក ភ័ក្ត្រា អភិបាលរងនៃគណៈអភិបាលខេត្តកោះកុង បានអញ្ជើញដឹកនាំគណៈប្រតិភូខេត្ត ចូលជួបសំដែងការគួរសមជាមួយ លោកGuo Xingfu អនុប្រធានគណៈកម្មាធិការអចិន្ត្រៃយ៍ នៃសភាប្រជាជនខេត្តចេជាង និងប្រធានក្រុមហ៊ុនធំៗ នៃខេត្តចេជាង សាធារណៈរដ្ឋប្រជាមានិតចិន នៅអគារពាណិជ្ជកម្ម Zhejiang World Trade Centត។

ក្នុងជំនួបរវាងប្រតិភូខេត្តទាំង២ លោកបណ្ឌិត អ៊ុក ភ័ក្ត្រា អភិ​បាលរងខេត្តកោះកុង បានបង្ហាញពីគោលបំណង ក្នុងកិច្ចសហប្រតិបត្តិការ និងស្នើសូមការគាំទ្រលើការវិនិយោគ នៅខេត្តកោះកុង ដោយបង្ហាញពីភូមិសាស្រ្តសក្តានុពលខេត្ត ប្រព័ន្ធអនុគ្រោះនៃច្បាប់វិនិយោគកម្ពុជា។

លោកបញ្ជាក់ថា បច្ចុប្បន្នក្រុមប្រឹក្សាអភិវឌ្ឍកម្ពុជា (CDC) តាមរយៈកម្មវិធី One Stop Service ធ្វើឱ្យការដាក់ពាក្យស្នើសូមវិនិយោគមានភាពរហ័ស មានប្រសិទ្ធភាព ដើម្បីជំរុញការវិនិយោគបរទេសកាន់តែច្រើន ក្នុងនោះរាជរដ្ឋាភិបាលកម្ពុជា តែងគាំទ្រយ៉ាងពេញទំហឹងលើគោលនយោបាយខ្សែក្រវ៉ាត់ និងផ្លូវ (Belt and Road) និងកសាងមិត្តភាពដែកថែប អនាគតតែមួយកម្ពុជា-ចិន។

លោកGuo  Xingfu មានប្រសាសន៍ថា ប្រទេសកម្ពុជា មានភូមិសាស្រ្តល្អ សំបូរទៅដោយធនធានធម្មជាតិ កម្លាំងពលកម្ម ដែលជាយុវជនច្រើន និងមានប្រព័ន្ធសន្តិសុខល្អ ស្ថេរភាពនយោបាយល្អ ដែលធ្វើឱ្យវិនិយោគទុនចិន បានសម្លឹងឃើញឱកាសវិនិយោគជាច្រើននៅប្រទេសកម្ពុជា។

ក្រុមហ៊ុន KASEN GROUP នៃខេត្តចេជាង បានបង្កើតតំបន់សេដ្ឋកិច្ចពិសេស នៅខេត្តព្រះសីហនុ ក្នុងដំណាក់កាលទី១ និងកំពុងបង្កើតតំបន់សេដ្ចកិច្ចពិសេស ដំណាក់កាលទី២ នៅខេត្តកោះ​កុង ហើយតំបន់សេដ្ឋកិច្ចពិសេសចេជាង ខេត្តកោះកុង មានផ្ទៃដីធំទូលា​យទំហំរហូតដល់៧០៧ហិកតា ដែលនឹងអាចដំណើការរោងចក្រ និងក្រុមហ៊ុនជាច្រើន ក្នុងនោះរោងចក្រ និងក្រុមហ៊ុន ដែលជាបុត្រសម្ព័ន្ធរបស់ក្រុមហ៊ុន KASEN GROUP ក៏នឹងទៅតម្លើងនៅក្នុងតំបន់សេដ្ឋកិច្ចពិសេសចេជាង ខេត្តកោះកុង ដែលអាចទាញស្របកម្លាំងពលកម្មប្រមាណ១ម៉ឺននាក់ សម្រាប់ជំហានទី១ និងកើនដល់៥ម៉ឺននាក់សម្រាប់ ពេលអនាគត។

ក្នុងជំនួប លោកGuo Xingfu បានស្នើសុំ២ចំណុចទៅកាន់អភិបាលររងខេត្តកោះកុង រួមមានទី១ ស្នើសូមឱ្យមានការបង្កើតទីក្រុងរណបមួយ ក្បែរតំបន់សេដ្ចកិច្ចពិសេសចេជាងកោះកុង ដើម្បីអាចឱ្យបុគ្គលិក កម្មករ និងអ្នកវិនិយោគងាយស្រួល ក្នុងការស្នាក់នៅ និងសេវារដ្ឋបាលផ្សេងៗ ក្នុងនោះ ក្រុមហ៊ុន KASEN GROUP ក៏មានជំនាញអភិវឌ្ឍន៍ទីក្រុងផងដែរ។

បណ្ឌិត អ៊ុក ភ័ក្រ្តា អភិបាលរងខេត្តកោះកុង  មានប្រសាសន៍ថា សំណូមពរទាំង២នេះ គឺរដ្ឋបាលខេត្តកោះកុង នឹងរៀបចំជារបាយការណ៍ ដាក់ជូនក្រសួងមហាផ្ទៃ នឹងស្នើសូមគោលការណ៍ឯកភាពពីរាជរដ្ឋាភិបាល ពិនិត្យ និងសម្រេច ក្នុងនោះលោកបណ្ឌិតក៏បានស្នើសុំ២ចំណុច ពីភាគីខេត្តចេជាងផងដែរ ទី១ ស្នើសូមចងសម្ព័ន្ធមេត្រីភាពរវាងខេត្តកោះកុង នៃព្រះរាជាណាចក្រកម្ពុជា និងខេត្តចេជាង នៃសាធារណៈរដ្ឋប្រជាមានិតចិន។

ទី២. ស្នើសូមថ្នាក់ដឹកនាំខេត្តចេជាង ជួយផ្សព្វផ្សាយ និងនាំយកវិនិយោគទុនចិន ទៅបណ្តាក់ទុន រកស៊ីក្នុងប្រទេសកម្ពុជា ពិសេសខេត្តកោះកុងតែម្តង ព្រោះខេត្តកោះកុង មានសក្តានុពលល្អ លើវិស័យកំពង់ផែ វិស័យថាមពល និងតំបន់សេដ្ឋកិច្ចពិសេស ដែលស្រដៀងគ្នានឹងខេត្តចេជាង៕

ដោយៈ ជេស៊ីកា

        សេអ៊ូលៈ សម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជាបានថ្លែងគូសរំលេចពីគំរោងនិមិត្តរូប នៃស្ពានមិត្តភាពកម្ពុជា កូរ៉េ ដែលគ្រោង នឹងបើកការដ្ឋានសាងសង់នាពេលខាងមុខ។

សម្តេចបានថ្លែងបែបនេះ ក្នុងជំនួបជាមួយលោកដុកស៊ូ (Han Duck-soo) នាយករដ្ឋមន្រ្តី នៃសាធារណរដ្ឋកូរ៉េ នាឱកាសនៃដំណើរទស្សនកិច្ចផ្លូវការ នៅទីក្រុងសេអ៊ូល សាធារណរដ្ឋកូរ៉េ ពីថ្ងៃទី១៥-១៨ ខែឧសភា ឆ្នាំ២០២៤។

ក្នុងជំនួបនោះ សម្តេចធិបតី ក៏បានគូសរំលេចជូនលោកនាយ​ករដ្ឋមន្រ្តីអំពីគម្រោង និមិត្តរូបនៃស្ពានមិត្តភាពកម្ពុជា-កូរ៉េ ដែលគ្រោងនឹងបើកការដ្ឋានសាងសង់នាពេលខាងមុខ។

សម្តេចធិបតីហ៊ុន ម៉ាណែតបានបញ្ជាក់ថា “ស្ពានមិត្តភាពនេះតំណា​​ងឱ្យមិត្តភាពយូរអង្វែង រវាងប្រទេសទាំងពីរ ហើយសម្តេចធិបតី ក៏បានថ្លែងអំណរគុណ និងវាយតម្លៃខ្ពស់ចំពោះការចូលរួមចំណែកដ៏ថ្លៃថ្លា របស់រដ្ឋាភិបាលកូរ៉េក្នុងគម្រោងនេះផងដែរ”៕

        ដោយៈ គង់ សូរិយា

        ភ្នំពេញៈ ឆ្លៀតក្នុងឱកាសអមដំណើរ សម្ដេចមហាបវរធិបតីបំពេញទស្សនកិច្ចផ្លូវការ នៅសាធារណរដ្ឋកូរ៉េ លោកឧបនាយករដ្ឋមន្ត្រីស៊ុន ចាន់ថុល បានទទួលជួបពិភាក្សាការងារ ជាមួយក្រុមហ៊ុនចំនួន០៩ ដើម្បីជំរុញការវិនិយោគនៅកម្ពុជា។

នៅថ្ងៃទី១៦ ឧសភានេះ ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ក្នុងឱកាសអមដំណើរសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បំពេញទស្សនកិច្ចផ្លូវការ នៅសាធារណរដ្ឋកូរ៉េពីថ្ងៃទី១៥-១៩ ខែឧសភា ឆ្នាំ២០២៤នេះ បានឆ្លៀតពេលវេលា ទទួលជួបជាមួយថ្នាក់ដឹកនាំក្រុមហ៊ុនចំនួន៩ ដើម្បីពិភាក្សាការងារ ជំរុញការវិនិយោគនៅកម្ពុជា។

ក្រុមហ៊ុនដែលឧបនាយករដ្ឋមន្ត្រី ទទួលជួបនាឱកាសនេះរួមមាន ក្រុមហ៊ុន Mastern Partners Corporation, ក្រុមហ៊ុន Daewoo E&C, ក្រុមហ៊ុន WorldBridge, ក្រុមហ៊ុន LG Electronics, ក្រុមហ៊ុន Emart, ក្រុមហ៊ុន LX International, ក្រុមហ៊ុន Hanshin Engineering Construction, ក្រុមហ៊ុន Camko Motor & Camko Infracore, និងក្រុមហ៊ុនសារព័ត៌មាន Maekyung Media News ផងដែរ។

មានប្រសាសន៍លើកឡើងក្នុងជំនួបខាងលើ លោកឧបនាយករដ្ឋមន្ត្រី បានបង្ហាញអំពីគោលបំណង យ៉ាងមុតមាំរបស់រាជរដ្ឋាភិបាលកម្ពុជា ក្នុងការបន្ថែមការយកចិត្តទុកដាក់ បន្តទាក់ទាញ និងផ្សារភ្ជាប់វិនិយោគិនរវាងប្រទេសទាំងពីរ កម្ពុជា-កូរ៉េឱ្យបានកាន់តែល្អប្រ​សើរឡើងមួយកម្រិតបន្ថែមទៀត។

បន្ថែមពីនោះ លោកឧបនាយករដ្ឋមន្ត្រី បានជម្រាបជូនអំពីបរិយាកាសវិនិយោគ នៅកម្ពុជានាពេលបច្ចុប្បន្ន ក្រោមកិច្ចសម្របសម្រួលវិនិយោគ របស់ក្រុមប្រឹក្សាអភិវឌ្ឍន៍កម្ពុជា ដែលមានច្រកចេញចូលតែមួយ និងការរៀបចំរចនាសម្ព័ន្ធរបស់ស្ថាប័ន ក្នុងការគាំទ្រវិនិយោគិន។

លើសពីនេះ លោកឧបនាយករដ្ឋមន្ត្រី បានជម្រាបជូនអំពីសក្ដានុពលនានារបស់កម្ពុជា រាប់ចេញពីភាពបើកចំហរនៃច្បាប់វិនិយោគរបស់កម្ពុជា ដែលអនុញ្ញាតឱ្យវិនិយោគិនបរទេស មានសិទ្ធជាម្ចាស់ទាំងស្រុងលើមុខជំនួញ ដែលខ្លួនវិនិយោគនៅកម្ពុជា, ហេដ្ឋារចនាសម្ព័ន្ធតំបន់សេដ្ឋកិច្ចពិសេស ដែលផ្ដល់ភាពងាយស្រួលដល់វិនិយោគិនក្នុងការវិនិយោគ, ពិសេសការយកចិត្តទុកដាក់របស់រដ្ឋាភិបាល លើការសម្របសម្រួល ដោះស្រាយបញ្ហាដល់វិនិយោគិន តាមរយៈកម្មវិធីរាជរដ្ឋាភិបាល និងផ្នែកឯកជនជាដើម។

បន្ថែមពីនេះផងដែរ កម្ពុជាបានដាក់ចេញផែនការមេគ្រប់ជ្រុងជ្រោយស្ដីពី ប្រព័ន្ធដឹកជញ្ជូនអន្តរមធ្យោបាយ និងភស្ដុភារកម្មកម្ពុជា ដែលបានបើកឱកាសឱ្យវិនិយោគិន អាចពិនិត្យលទ្ធភាពដាក់ទុនវិនិយោគលើគម្រោងចំនួនប្រមាណ១៧៤គម្រោង លើវិស័យហេដ្ឋារចនាសម្ព័ន្ធនិងភស្ដុភារកម្ម។

ជាមួយគ្នាក្នុងឱកាស នៃកិច្ចទាក់ទាញវិនិយោគិននេះ លោកឧបនាយករដ្ឋមន្ត្រី ក៏បានអញ្ជើញជាអធិបតី ក្នុងពិធីចុះហត្ថលេខាលើអនុស្សារណៈនៃការយោគយល់គ្នា រវាងក្រុមហ៊ុន WorldBridge និងក្រុមហ៊ុនDaewoo E&C លើកិច្ចសហប្រតិបត្តិការអភិវឌ្ឍន៍វិស័យអចលនទ្រព្យផងដែរ៕

(ភ្នំពេញ)៖ សម្តេចតេជោ ហ៊ុន សែន ប្រធានព្រឹទ្ធសភា និងជាអតីតនាយករដ្ឋមន្ត្រីកម្ពុជា បានណែនាំឱ្យកត់ត្រាទុកថ្ងៃទី១៦ ខែឧសភា ឆ្នាំ២០២៤ ជាពេលវេលាដែលសម្តេចតេជោ ប្រកាសថា ព្រែកជីកហ្វូណនតេជោ ជាការពង្រឹងឯករាជ្យនយោបាយដឹកជញ្ជូនរបស់កម្ពុជា។

ក្នុងឱកាសថ្លែងសារពិសេស ពាក់ព័ន្ធព្រែកជីក ហ្វូណនតេជោ សម្តេចតេជោ ហ៊ុន សែន បានបន្តថា កម្ពុជា និងវៀតណាម គឺជាប្រទេសក្បែរខាងគ្នា ត្រូវការកសាងទំនាក់ទំនងល្អជាមួយគ្នា តែប្រៀបដូចជាអណ្តាត និងធ្មេញ ជាមិនផុតពីការប៉ះទង្គិចគ្នានោះឡើយ។ សម្តេចតេជោ បានបង្ហាញការជឿជាក់ថា មេដឹកនាំវៀតណាម ចង់ឱ្យកម្ពុជាមានឯករាជ្យភាពលើការដឹកជញ្ជូនតាមផ្លូវទឹក ខណៈកម្ពុជាមានទំនាក់ទំនងល្អជាមួយវៀតណាម វៀតណាមមានទំនាក់ទំនងល្អជាមួយចិន ដូច្នេះគ្មានហេតុផលអី ដែលត្រូវធ្វើសង្គ្រាមប្រឆាំងគ្នានោះឡើយ។

សម្តេចតេជោ ហ៊ុន សែន បានបញ្ជាក់យ៉ាងដូច្នេះថា «ឥលូវនេះកត់ត្រាទុកទៅ ថាថ្ងៃនេះទី១៦ ខែឧសភា ឆ្នាំ២០២៤ លោក ហ៊ុន សែន បាននិយាយដល់ឯករាជ្យភាពខាងនយោបាយ លើបញ្ហាដឹកជញ្ជូនផ្លូវទឹក ដោយមិនត្រូវឱ្យមិត្តភក្តិ ជួបការលំបាកដោយសារយើង ឬយើងជួបការលំបាកដោយសារមិត្តភក្តិ»។

ជាមួយគ្នានេះ សម្តេចតេជោ ហ៊ុន សែន​ កង្វល់របស់វៀតណាមពាក់ព័ន្ធព្រែកជីកហ្វូណន-តេជោ មិនមានភាពចាំបាច់នោះឡើយ។ សម្តេចតេជោ ក៏បានអរគុណអ្នកបរិស្ថានវៀតណាម ដែលចេញមកអះអាងថា ទឹកហូរតាមព្រែកជីកហ្វូណនតេជោ អស់បរិមាណតិចតួចបំផុត បើធៀបបរិមាណទឹកកំពុងហូរតាមប្រទេសវៀតណាម នាពេលបច្ចុប្បន្ន។បើតាមប្រសាសន៍សម្តេចតេជោ គម្រោងព្រែកជីកហ្វូណនតេជោ គឺជាព្រែកជីកផ្តួចផ្តើមគំនិតទាំងស្រុងដោយកម្ពុជា ហើយចិនមិនបានដឹងលើរឿងនេះឡើយ។ សម្តេចតេជោ ហ៊ុន សែន បានថ្លែងថា ជារឿងឆោតល្ងង់ចំពោះការចោទថាគម្រោងនេះ ផ្តើមចេញពីប្រទេសចិន ខណៈគម្រោងព្រែកជីកហ្វូណនតេជោ មិនស្ថិតក្នុងគម្រោងខ្សែក្រវាត់ និងផ្លូវរបស់ចិននោះឡើយ។

សម្តេចតេជោ ហ៊ុន សែន បានថ្លែងបន្តថា ព្រែកជីកហ្វូណនតេជោ ជាផលប្រយោជន៍ខាងសេដ្ឋកិច្ច និងឯករាជ្យផ្នែកនយោបាយដឹកជញ្ជូនរបស់កម្ពុជា និងបន្ថែមថា ជារឿងខ្មាសអៀនណាស់ ចំពោះជនដែលលើកឡើងថា គម្រោងព្រែកជីកប្រើសម្រាប់ការចល័តនាវាទ័ព។សម្តេចតេជោ ហ៊ុន សែន បានស្នើទៅរាជរដ្ឋាភិបាលរបស់សម្តេចធិបតី ហ៊ុន ម៉ាណែត បើកការដ្ឋានបានឆាប់ជារឿងល្អ មិនមានអ្វីត្រូវរង់ចាំទៀតនោះទេ។ សម្តេចតេជោ បានថ្លែងដែរថា កម្ពុជាត្រូវតែប្រឹងប្រែងពង្រឹងឯករាជ្យភាពផ្នែកសេដ្ឋកិច្ច និងនយោបាយ តែជាប្រទេសក្រីក្រ គឺលំបាកណាស់ ដូច្នេះអ្វីដែលអាចធ្វើបានដើម្បីឯករាជ្យភាពត្រូវតែប្រឹងធ្វើ៕