ដោយៈ គង់ ហ្វីអូណា

        ភ្នំពេញៈ អនុរដ្ឋលេខាធិការ និងអ្នកនាំពាក្យអាកាសចរណ៍ស៊ីវិល លោកស៊ីន ចាន់សិរីវុត្ថា បានមានប្រសាសន៍ថា  រយៈពេល៣ឆ្នាំទៅមុខទៀត ពោលនៅក្នុងឆ្នាំ២០២៧ ទើបវិស័យដឹកជញ្ជូនតាមផ្លូវអាកាសរបស់កម្ពុជា អាចនឹងងើបឡើងវិញដូចទៅនឹងឆ្នាំ២០១៩។

ការបញ្ជាក់ឲ្យដឹងបែបនេះ ធ្វើឡើងក្នុងឱកាសដែល លោក ស៊ីន ចាន់សិរីវុត្ថា អញ្ជើញចូលរួម ក្នុងកិច្ចពិភាក្សានៅកម្មវិធីរបស់សារព័ត៌មានធំមួយនៅកម្ពុជាកាលពីចុងសប្តាហ៍មុន។

លោក ស៊ីន ចាន់សិរីវុត្ថា បានបញ្ជាក់ថា សម្រាប់ប្រទេសកម្ពុជា ពីមុនធ្លាប់ធ្វើការព្យាករណ៍ និងធ្វើការសន្និដ្ឋានថា ការងើបឡើងវិញ បន្ទាប់ពីកូវីដ១០០ភាគរយ គឺនៅក្នុងឆ្នាំ២០២៤ ឬដើមឆ្នាំ២០២៥ ប៉ុន្ដែបន្ទាប់ពីធ្វើការពិនិត្យឡើងវិញ ដោយសារមានវិបត្ដិផ្សេងៗកើតឡើងផ្ទួនគ្នាៗ នៅក្នុងពិភពលោក គឺមិនដូចការរំពឹងទុកទេ។

លោកបញ្ជាក់ថា “តាមការព្យាករណ៍ថ្មី របស់សមាគមដឹកជញ្ជូនអន្ដរជាតិ កំណើនប្រទេសកម្ពុជានឹងងើបឡើងវិញ ស្មើឆ្នាំ២០១៩ នៅក្នុងឆ្នាំ២០២៧”។

លោក ស៊ីន ចាន់សិរីវុត្ថា បានលើកឡើងថា សព្វថ្ងៃនេះ វិស័យដឹកជញ្ជូនតាមផ្លូវអាកាសនៅកម្ពុជា មានការងើបឡើងវិញប្រមា​​ណ៦៣ភាគរយ នៅក្នុងឆ្នាំ២០២៤។ ដូច្នេះទាន់តែដល់ឆ្នាំ២០២៧ ទើបវិស័យដឹកជញ្ជូនតាមអាកាសនៅកម្ពុជា ងើបឡើងវិញបាន១០០ភាគរយ ស្មើនឹងឆ្នាំ២០១៩។

កាលពីឆ្នាំ២០១៩ ចំនួនអ្នកដំណើរ ដែលឆ្លងកាត់អាកាសយានដ្ឋានអន្តរជាតិរបស់កម្ពុជា មានចំនួនជិត១២លាននាក់។ អាកាសយានដ្ឋានអន្តរជាតិភ្នំពេញ ទទួលអ្នកដំណើរបាន៦.០២លាននាក់ អាកាសយានដ្ឋានអន្តរជាតិសៀមរាប ទទួលអ្នកដំណើរបាន ៣.៩២លាននាក់។

លោក ស៊ីន ចាន់សិរីវុត្ថាបានបង្ហើបប្រាប់អំពីមូលហេតុ ដែលរាជរដ្ឋាភិបាល ឲ្យឯកជនវិនិយោគព្រលានយន្តហោះ ខណៈការអភិវឌ្ឍព្រលានយន្តហោះ ជួយជំរុញសកម្មភាពសេដ្ឋកិច្ច ជាពិសេសតំបន់ជុំវិញព្រលានយន្តហោះ។

លោកបានបញ្ជាក់ថា តាមការសិក្សាគេឃើញថា ការផ្ដល់សេវាកម្មរដ្ឋ មានប្រសិទ្ធភាពទាបជាង ការផ្ដល់សេវាដោយឯកជន ព្រោះថាឯកជនមានលទ្ធភាពទាំងហិរញ្ញវត្ថុ ទាំងផ្នែកគ្រប់គ្រង ធនធានមនុស្ស ហើយប្រសិទ្ធភាព ក្នុងការអនុវត្ដអាចអស់ថវិកាតិចជាង ហើ​យប្រសិទ្ធភាពខ្ពស់ជាង។ ដូច្នេះបន្ទាប់ពីសិក្សានេះរួចមក ប្រទេសមួយចំនួនលើពិភពលោក បានប្រែខ្លួនពីការផ្ដល់សេវាដោយរដ្ឋ ទៅជាសេវាឯកជន។

លោកបានឲ្យដឹងថា ការចូលរួមអភិវឌ្ឍន៍សេដ្ឋកិច្ច តាមរយៈការកសាងអាកាសយានដ្ឋានអន្ដរជាតិ ទី១ ការទាក់ទាញវិនិយោគិន ឲ្យចូលមកអភិវឌ្ឍន៍ប្រទេសកម្ពុជា និងទី២ បង្កើតការងារដោយផ្ទាល់រាប់ពាន់ការងារ និងបង្កើតការងារដោយប្រយោលជាច្រើន ជាពិសេ​សតំបន់ជុំវិញ អាកាសយានដ្ឋានក៏មានការរីកចម្រើន ដូចជាតំបន់ឧស្សាហកម្ម តំបន់សេដ្ឋកិច្ច និងតំបន់បុរីផ្សេងៗជាដើម៕

ដោយ: គង់ លាងហួរ

អន្តរជាតិ: យោងតាមទិន្នន័យដែលចងក្រងឡើង ដោយក្រុមហ៊ុនប្រឹក្សាអចលនទ្រព្យ Savills Research បានឱ្យដឹងថា ថ្លៃជួលខុនដូនៅប្រទេសសិង្ហបុរី ក្នុងត្រីមាសទី១ ឆ្នាំ២០២៤ បានធ្លាក់ចុះ បើប្រៀបធៀបនឹងឆ្នាំមុន។

នៅក្នុងត្រីមាសទី១ ឆ្នាំនេះ ថ្លៃជួលខុនដូជាមធ្យមបានធ្លាក់ចុះ១,៣ភាគរយ ដែលខុសគ្នាផ្ទុយស្រឡះ ពីការកើនឡើង៤,៨ភាគរយ នៅក្នុងត្រីមាសទី១ ឆ្នាំ២០២៣។ ប៉ុន្តែប្រសិនបើគិតលើមូលដ្ឋានប្រចាំត្រីមាស ថ្លៃជួលខុនដូបានធ្លាក់ចុះ១,៨% បើធៀបនឹងការធ្លាក់ចុះ១,៥% នៅក្នុងត្រីមាសទី៤ ឆ្នាំមុន។

ក្រុមហ៊ុន Savills បញ្ជាក់ថា ថ្លៃជួលខុនដូ ដែលមានបន្ទប់គេងចំនួន៣ នៅសង្កាត់ District 2 ដែលគ្របដណ្តប់តំបន់ Chinatown និងតំបន់ Tanjong Pagar បានធ្លាក់ចុះ១២,៣% បើប្រៀបធៀបទៅនឹងត្រីមាសទី៤ ឆ្នាំមុន មកនៅត្រឹម៦.៨០០ដុល្លារក្នុង​មួយ​ខែ។

ថ្លៃជួលខុនដូនៅសង្កាត់ District 5 ដែលលាតសន្ធឹងលើតំបន់ Buona Vista តំបន់ West Coast និងតំបន់ Clementi បានធ្លាក់ចុះក្នុងអត្រាប្រចាំត្រីមាស៨,៦% មកនៅត្រឹម៥.៣០០ដុល្លារក្នុងមួយខែ។ បន្ទាប់មកគឺ ថ្លៃជួលខុនដូនៅសង្កាត់ District 3 ដែលគ្របដណ្តប់តំបន់ Alexandra និងតំបន់Commonwealth បានធ្លាក់ចុះ៦,១% មកនៅត្រឹម៦.២០០ដុល្លារក្នុងមួយខែ។

នៅទីតាំងផ្សេងទៀត ក្រុមហ៊ុន Savills កត់សម្គាល់ថា ថ្លៃជួលខុនដូនៅក្នុងសង្កាត់District1 ដែលគ្របដណ្តប់តំបន់ Boat Quay តំបន់Marina Bay និងតំបន់ Raffles Place បានធ្លាក់ចុះពី៩.០០០ដុល្លារក្នុងត្រីមាសទី៤ឆ្នាំមុន មកនៅត្រឹម៨.៥០០ដុល្លារក្នុងត្រីមាសទី១ ឆ្នាំនេះ។

ផ្ទុយទៅវិញ ថ្លៃជួលខុនដូនៅសង្កាត់District 7 បានកើនឡើង៩,៨% ដល់៧.២៥០ដុល្លារក្នុងមួយខែ ខណៈថ្លៃ​ជួល​នៅ​ក្នុង​សង្កាត់ District 26 បាន​កើន​ឡើង៨,៥% ដល់៤.៤៥០ដុល្លារ​ក្នុង​មួយ​ខែ ហើយថ្លៃជួលនៅសង្កាត់District 11 បានកើនឡើង៨,២% ដល់៦.៦០០ដុល្លារក្នុងមួយខែ៕ប្រភព: Edgeprop៕

ដោយ: គង់ លាងហួរ

អន្តរជាតិ: យោងតាមនាយកដ្ឋានធនធានធម្មជាតិ និងបរិស្ថាន បានឱ្យដឹងថា ចំនួនប្រតិបត្តិការអចលនទ្រព្យ នៅក្នុងទីក្រុងហូជីមិញ បានកើនឡើង ក្នុងអត្រាប្រចាំឆ្នាំ១៣ភាគរយ ដល់ជាង១២០.០០០ប្រតិបត្តិការ នៅក្នុងរយៈពេល៤ខែដំបូងដើមឆ្នាំនេះ។

ប្រតិបត្តិការភាគច្រើនបានធ្វើឡើង នៅក្នុងតំបន់ចំនួន៤ ដែលមិនស្ថិតនៅជិតទីប្រជុំជន ដូចជា តំបន់ Thu Duc និងតំបន់ Districts 12 ព្រមទាំងតំបន់ Binh Tan និងតំបន់ Cu Chi។នេះបើយោងតាមការចុះផ្សាយដោយសារពត៌មាន Vnexpress។

លោក Nguyen Toan Thang ប្រធាននាយកដ្ឋានធនធានធម្មជាតិ និងបរិស្ថាន បានលើកឡើងថា “និន្នាការនេះប្រហែលជាបណ្តាល មកពីការអភិវឌ្ឍហេដ្ឋារចនាសម្ព័ន្ធ នៅក្នុងតំបន់ទាំង៤ខាងលើ ដែលបានទាក់ទាញការវិនិយោគ កាន់តែច្រើននាពេលថ្មីៗនេះ”។ ប្រតិបត្តិការទាំងនេះ បានជួយរួមចំណែកបង្កើនប្រាក់ចំណូលរបស់ទីក្រុងហូជីមិញ។

ក្នុងរយៈពេល៤ខែដើមឆ្នាំនេះ ទីក្រុងហូជីមិញបានទទួលថ្លៃសេវាជាង២,៥ទ្រីលានដុង (ប្រមាណ៩៨,៤លានដុល្លារអាមេរិក) ពីការចុះបញ្ជីដីធ្លី និងការចេញលិខិតបញ្ជាក់សិទ្ធិប្រើប្រាស់ដីធ្លី កើនឡើង៥២% បើធៀបនឹងរយៈពេលដូចគ្នាកាលពីឆ្នាំមុន។

លោក Thang បានបន្តថា ចំនួនប្រតិបត្តិការអចលនទ្រព្យអាចនឹងស្ថិតនៅត្រឹមចំនួន១០០.០០០ប្រតិបត្តិការ នៅក្នុងត្រីមាសទីពីរ។ យោងតាមការិយាល័យស្ថិតិបានឱ្យដឹងថា វិស័យសេវាកម្មអចលនទ្រព្យបានដំណើរការយ៉ាងល្អ ដោយសម្រេចបានទំហំប្រាក់ចំណូលចំនួន៨០,៨ទ្រីលានដុង កើនឡើង១០ភាគរយ។

ជាមួយគ្នានេះ ការវិនិយោគក៏កំពុងហូរចូល ទៅក្នុងវិស័យអចល​នទ្រព្យបន្ថែមទៀតផងដែរ ដោយដើមទុនចុះបញ្ជីរបស់អាជីវកម្មអច​លនទ្រព្យថ្មីបានកើនឡើង១៤៦% ដល់ទំហំទឹកប្រាក់២៤ទ្រីលានដុងនៅក្នុងរយៈពេល៤ខែដើមឆ្នាំនេះ។

យោងតាម​នាយកដ្ឋាន​សំណង់​ទីក្រុង​ហូជីមិញ បាន​ឲ្យ​ដឹង​ថា ការ​ស្ទុះ​ងើប​ឡើង​វិញ ​នៃទីផ្សារអចលនទ្រព្យ ក៏បាន​ជំរុញ​ឲ្យ​តម្រូវ​ការ​សំណង់​កើន​ឡើងផងដែរ។

គិតត្រឹមចុងខែមេសា នាយកដ្ឋានបានចេញលិខិតអនុញ្ញាតសាងសង់ជាង៥.៧០០លិខិត ដែលកើនឡើង៨% បើធៀបនឹងឆ្នាំមុន សម្រាប់ផ្ទៃដីសរុបចំនួន១,៣លានម៉ែត្រការ៉េ៕ប្រភព: Vnexpress៕

        ដោយៈ គង់ សូរិយា

        ភ្នំពេញៈ ក្រុមហ៊ុន Hainan Litree Purifying Technology Co., Ltdបានបង្ហាញបំណងវិនិយោគលើវិស័យទឹកស្អាតនៅកម្ពុជា។

ព័ត៌មាននេះ ត្រូវបានលើកឡើងក្នុងជំនួបរវាង លោកហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដែលបានទទួលជួបតំណាងក្រុមហ៊ុន Hainan Litree Purifying Technology Co., Ltd. និងបានពិភាក្សាការងារដោយផ្តោតលើគម្រោងរបស់ក្រុមហ៊ុន ក្នុងការពង្រីកការវិនិយោគរបស់ខ្លួនក្នុងវិស័យទឹកស្អាតនៅកម្ពុជា។

លោកបណ្ឌិត Cai Yunlong នាយកប្រតិបត្តិក្រុមហ៊ុនHainan Litree Purifying Technology Co., Ltd បានមានប្រសាសន៍ឲ្យដឹងថា ក្រុមហ៊ុន Hainan Litree Purifying Technology ត្រូវបានបង្កើតឡើងក្នុងឆ្នាំ១៩៩២ និងបានកសាងកេរ្តិ៍ឈ្មោះខាងបច្ចេកវិទ្យា UF Membrane ដោយសារក្រុមហ៊ុន បានបង្កើតលទ្ធផលជោគជ័យជាសកល និងមានភ្នាក់ងារផ្តល់បច្ចេកវិទ្យានេះ នៅក្នុងប្រទេសជាច្រើន។

លោកបន្តថា ឧបករណ៍ចម្រោះទឹកម៉ាក Litree របស់ក្រុមហ៊ុន ត្រូវបានទទួលស្គាល់ យ៉ាងទូលំទូលាយចំពោះប្រសិទ្ធភាព ក្នុងការផ្គត់ផ្គង់ទឹក សម្រាប់តំបន់ប្រជុំជន សម្រាប់តម្រូវការ ឧស្សាហកម្ម និងបច្ចេកវិទ្យាចម្រោះទឹក សម្រាប់ប្រើប្រាស់ក្នុងគ្រួសារ ដែលបាន និងកំពុង ផ្តល់អត្ថ ប្រយោជន៍ដល់មនុស្សជាង៣លានគ្រួសារ នៅទូទាំងពិភពលោក។

នៅក្នុងប្រទេសកម្ពុជា បច្ចុប្បន្ន ផលិតផលដែលប្រើបច្ចេកវិទ្យា UF membrane របស់ក្រុមហ៊ុន ត្រូវ បានប្រើប្រាស់នៅក្នុងខេត្ត-ក្រុងជាច្រើនដោយបានរួមចំណែក ដល់ការពង្រឹងស្តង់ដារទឹកស្អាត ក្នុងបរិមាណ១១.០០០ម៉ែត្រគូប/ថ្ងៃ។

លោកបណ្ឌិត Cai Yunlong បានលើកឡើងថា ក្នុងរយៈពេល ៣-៥ ឆ្នាំខាងមុខនេះ ក្រុមហ៊ុនគ្រោង នឹងវិនិយោគទឹកប្រាក់ប្រមាណ ៥០-១០០លានដុល្លារ ទៅក្នុងវិស័យទឹកស្អាតនៅកម្ពុជា។

លោកហែម វណ្ណឌី បានស្វាគមន៍ចំពោះគម្រោងរបស់ក្រុមហ៊ុន ក្នុងការពង្រីកការវិនិយោគ ក្នុងវិស័យទឹកស្អាតនៅកម្ពុជា ជាពិសេសនៅក្នុងតំបន់ ដែលមិនទាន់មានសេវាគ្របដណ្តប់។

ដោយសង្កត់ធ្ងន់ លើសារៈសំខាន់នៃការចាប់យកបច្ចេកវិទ្យា ទាំងនៅក្នុងវិស័យសាធារណៈ និងឯកជនលោករដ្ឋមន្ត្រី បានលើក ទឹកចិត្ត ឱ្យក្រុមហ៊ុនសិក្សាលទ្ធភាពវិនិយោគនេះ និងស្វែងរកឱកាសបន្ថែមក្នុងការលក់ទឹកដុំ សម្រាប់ប្រតិបត្តិករទឹកឯកជន ដោយប្រើប្រាស់ឧត្តមភាពបច្ចេកវិទ្យា និងបទពិសោធន៍ជោគជ័យរបស់ខ្លួនកន្លង មក។

តាមរយៈជំនួបនេះ ក្រុមហ៊ុនបានបញ្ជាក់ពីការប្តេជ្ញាចិត្ត និងការរួមចំណែករបស់ខ្លួន ក្នុងការដោះ ស្រាយ បញ្ហាផ្គត់ផ្គង់ទឹកស្អាត និងថែរក្សាធនធានទឹក តាមរយៈការប្រើប្រាស់បច្ចេកវិទ្យាmembraine ប្រកបដោយនវានុវត្តន៍ ដំណោះស្រាយធុងចម្រោះទឹក និងសេវាសុវត្ថិភាពទឹកសាធារណៈ ស្របតាមគោលដៅអភិវឌ្ឍន៍ប្រកបដោយចីរភាព និងការគ្រប់គ្រងបរិស្ថានរបស់កម្ពុជា៕

ដោយៈ ហ្វីអូណា

ភ្នំពេញៈ ក្រុមហ៊ុន NOA Land Co., Ltd. (Hinoya Curry Chain) បានស្វែងរកដៃគូសហការ ដើម្បីពង្រីកអាជីវកម្មនៅកម្ពុជា។

ក្រុមហ៊ុននេះបានបង្កើតឡើងនៅខែសីហា ឆ្នាំ២០០៤ ដែលមកដល់ឆ្នាំ២០១៩ មានហាងចំនួន៦០នៅប្រទេសជប៉ុន និងសាខាចំនួនសរុប១០១ ដែលមានក្នុងប្រទេសថៃ អាមេរិក និងបណ្តាលប្រទេសដទៃទៀត។ក្រុមហ៊ុនខាងលើនេះ មានគោលបំណងស្វែងរកដៃគូសហការ ដើម្បីបើកហាងសាខា Hinoya Curry នៅប្រទេសកម្ពុជា។

ព័ត៌មាននេះ ត្រូវបានលើកឡើងក្នុងជំនួបសម្តែងការគួរសម និងពិភាក្សាការងារ រវាងគណៈប្រតិភូសភាពាណិជ្ជកម្មកម្ពុជា និងក្រុមហ៊ុន NOA Land Co., Ltd. (Hinoya Curry Chain) និងលោកបណ្ឌិត តាន់ មុនីវណ្ណ អនុប្រធានសភាពាណិជ្ជកម្មកម្ពុជា។ កិច្ចពិភាក្សានេះធ្វើឡើងក្នុងពេលលោកតាន់ មុនីវណ្ណ អញ្ជើញអមដំណើរ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា ដែលបានទស្សនកិច្ចនិងគោះទ្វារអ្នកវិនិយោគនៅប្រទេសជប៉ុន។

លោកតាន់ មុនីវណ្ណ បានសម្តែងសេចក្តីសោមន្សរីករាយ ដែលបានជួបជាមួយនឹងក្រុមហ៊ុនជប៉ុន ដែលជាឱកាសដើម្បីការបង្ហាញនូវចុក្ខវិស័យរបស់វិស័យឯកជន នៃសភាពាណិជ្ជកម្មកម្ពុជា ព្រមទាំងសក្តានុពលសេដ្ឋកិច្ចរបស់ប្រទេសកម្ពុជា ជូនដល់ធុរជនជប៉ុននេះពេលនេះ៕

        ដោយៈ គង់ ហ្វីអួណា

        ភ្នំពេញៈ ក្រសួងការងារ និងបណ្ដុះបណ្ដាលវិជ្ជាជីវៈ អង្គការអន្តរជាតិខាងការងារ (ILO) តំណាងអង្គការវិជ្ជាជីវៈរបស់កម្មករ និយោជិត បានចុះអនុស្សរណៈនៃការយោគយល់គ្នា លើគម្រោងកម្មវិធីការងារសមរម្យនៅកម្ពុជា ដំណាក់កាលទី៦ ឆ្នាំ២០២៤-២០២៨។

កម្មវិធីដែលប្រារព្ឋនៅទីស្តីការក្រសួងការងារ និងបណ្តុះបណ្តាលវិជ្ជាជីវៈនេះ ធ្វើឡើងក្រោមអធិបតីភាពរបស់លោកហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងលោកស្រី Chihoko Asada-Miyakawa ឧបការរីអគ្គនាយកអង្គការអន្តរជាតិខាងការងារ និងជានាយិកាប្រចាំតំបន់អាស៊ី និងប៉ាស៊ីហ្វិក នៃអង្គការ ILO រួមទាំងតំណាងកម្មករនិយោជិត និងតំណាងសមាគមនិយោជកផងដែរ។

លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការក្រសួងការងារ និងបណ្តុះបណ្តាលវិជ្ជាជីវៈ បានគូសបញ្ជាក់ថា ការអនុវត្តកម្មវិធីការងារសមរម្យជាច្រើនដំណាក់កាល កន្លងមកនេះ ពិតជាបានចូលរួមចំណែកយ៉ាងសំខាន់ ក្នុងការអភិវឌ្ឍវិស័យការងារនៅកម្ពុជា ជាពិសេស ការលើកកម្ពស់លក្ខខណ្ឌការងារ ការពង្រីករបបសន្តិសុខសង្គម និងការលើកកម្ពស់ផលិតភាពការងារ តាមរយៈកិច្ចសន្ទនាសង្គម និងយន្តការត្រីភាគី។

លោកជំទាវបន្ថែមថា ក្នុងនាមជាសេនាធិការ របស់រាជរដ្ឋាភិបាលកម្ពុជាក្រសួងការងារ តែងតែពង្រឹងកិច្ចសហប្រតិបត្តិការយ៉ាងល្អជាមួយដៃគូសង្គម និងដៃគូអភិវឌ្ឍនានា ជាពិសេសអង្គការអន្តរជាតិខាងការងារ ក្នុងការអភិវឌ្ឍវិស័យការងារនៅកម្ពុជា។ តាមរយៈកិច្ចខិតខំប្រឹងប្រែងទាំងនេះ កម្ពុជាអាចបន្តរក្សាបាននូវស្ថិរភាពទីផ្សារការងារ ការលើកកម្ពស់ជំនាញនិងផលិតភាពការងារ លក្ខខណ្ឌការ​ងារល្អប្រសើរ កំណើនប្រាក់ឈ្នួលអប្បបរមា ការពង្រីករបបសន្តិសុខសង្គម, ការពង្រឹងយន្តការដោះស្រាយវិវាទ ការងារក្រៅប្រព័ន្ធតុលា​ការ ការលើកកម្ពស់សេរីភាពអង្គការវិជ្ជាជីវៈ និងការធានាបាននូវភាពសុខដុមនីយកម្មក្នុងទំនាក់ទំនងវិជ្ជាជីវៈ ដែលសុទ្ធសឹងជាកត្តាគន្លឹះក្នុងការចូលរួមសម្រេចឱ្យបាន នូវការងារសមរម្យស្របតាមតម្រូវការរបស់ប្រជាជនកម្ពុជា។

លើសពីនេះ រាជរដ្ឋាភិបាលកម្ពុជាតែងតែចាត់ទុក វិស័យឯកជន(ដែលជានិយោជក) និងកម្មករ និយោជិត(ដែលជាប្រភពកម្លាំងពលកម្ម) គឺជាដៃគូសង្គម ដែលមិនអាចខ្វះបាន ក្នុងការចូលរួមជំរុញកំណើនសេដ្ឋកិច្ចជាតិ។

ទន្ទឹមនឹងនេះ ឧកញ៉ា សុខ ពិសិដ្ឋ ប្រធានសហព័ន្ធនិយោជក និងសមាគមពាណិជ្ជកម្មកម្ពុជា បានគូសបញ្ជាក់ថា គម្រោងកម្មវិធីការងារសមរម្យសម្រាប់កម្ពុជា បានដើរតួរនាទីជាក្របខណ្ឌកិច្ចសហប្រតិបត្តិការ និងផែនការសកម្មភាព ដើម្បីជួយឱ្យកម្ពុជាសម្រេចបាននូវកំណើនការងារ និងការអភិវឌ្ឍន៍ប្រកបដោយចីរភាព និងបរិយាប័ន្ន។

លើសពីនេះ គម្រោងកម្មវិធីនេះក៏បានឆ្លុះ បញ្ចាំងពីការប្តេជ្ញាចិត្តរបស់រដ្ឋាភិបាល និងដៃគូសង្គមក្នុងការដោះស្រាយបញ្ហា ប្រឈមលើផ្នែកទីផ្សារការងារ ទំនាក់ទំនងវិជ្ជាជីវៈ នៅក្នុងប្រទេសកម្ពុជា និងជំរុ​ញឲ្យប្រជាជនកម្ពុជាទាំងអស់ ទទួលបាននូវការងារសមរម្យកាន់​តែច្រើន។

ដោយឡែកតំណាងអង្គការវិជ្ជាជីវៈរបស់កម្មករនិយោជិត លោក សំ សឿន ប្រធានសហភាពពលកម្មកជាតិកម្ពុជា (NLC)វិញ បានវាយតម្លៃខ្ពស់ចំពោះវឌ្ឍនភាព និងជឿជាក់ថា កម្មវិធីការងារសមរម្យប្រចាំប្រទេសកម្ពុជា ឆ្នាំ២០២៤-២០២៨ នឹងទទួលបានលទ្ធផលល្អប្រសើរ ហើយភាគីសហជីព នឹងបន្តចូលរួមសហការកាន់តែជិតស្និតជាមួយក្រសួងការងារ អង្គការILO និងគ្រប់ភាគីពាក់ព័ន្ឋបន្តទៀត ដើម្បីផ្ដល់ឱ្យវិស័យការងារនៅកម្ពុជា កាន់តែមានភាពរីកចម្រើន ជាពិសេសផ្តល់នូវវឌ្ឍនភាព លើការងារសមរម្យ សម្រាប់កម្មករនិយោ​ជិតលើគ្រប់វិស័យនិងប្រជាពលរដ្ឋកម្ពុជា។

កម្ពុជា គឺជាប្រទេសឈានមុខគេមួយ ក្នុងនាមជាសមាជិករបស់អង្គការអន្តរជាតិខាងការងារ ដែលបានអនុវត្តប្រកបដោយជោគជ័យនូវកម្មវិធីការងារសមរម្យសម្រាប់ប្រទេសកម្ពុជា ចំនួន៥ដំណាក់កាលរួចមកហើយតាំងពីឆ្នាំ២០០៥មក៕

        ដោយៈ គង់ សូរិយា

        កំពតៈ  ប្រសិនជាគ្មានការប្រែប្រួលទេនោះ កំពង់ផែទឹកជ្រៅធំនិងថ្លៃបំផុតនៅខេត្តកំពត និងជាផែទឹកជ្រៅដំបូងបង្អស់របស់កម្ពុជា នឹងបើកដំណើរការជាផ្លូវការនៅថ្ងៃទី៦ ខែមិថុនា ឆ្នាំ២០២៤នេះ។

អ្នកនាំពាក្យក្រសួងសាធារណការ និងដឹកជញ្ជូន លោកផន រឹមបានមានប្រសាសន៍ឲ្យដឹងកាលពីចុងសប្តាហ៍មុនថា កំពង់ផែនេះ ត្រូវបានគេឲ្យឈ្មោះថា “មជ្ឈមណ្ឌលភស្តុភារកម្ម និង កំពង់ផែពហុបំណងកំពត”។លោកបន្តថា ពហុបំណងដោយសារតែផែនេះ មានទីលានកុងតឺន័រ តំបន់សេដ្ឋកិច្ចពិសេស តំបន់ពាណិជ្ជកម្មសេរី មជ្ឍមណ្ឌលភស្តុភារកម្ម ឃ្លាំងស្តុកទំនិញគ្រប់ប្រភេទ ឃ្លាំងភណ្ឌាគារគយ រោងចក្រចម្រាញ់ប្រេងឥន្ធនៈ ចំណតនាវាដឹកទំនិញ និងអ្នកដំណើរ និងមានតំបន់លំនៅដ្ឋានផងដែរ៕

ដោយ: គង់ លាងហួរ
អន្តរជាតិ: សេដ្ឋកិច្ចរបស់ប្រទេសឥណ្ឌូនេស៊ី បានកើនឡើងក្នុងអត្រាប្រចាំឆ្នាំចំនួន៥,១១ភាគរយ នៅត្រីមាសទី១ ឆ្នាំនេះ ដែលលើសពីការព្យាករណ៍ក្នុងរង្វង់៥% ដែលជំរុញដោយកំណើននៃការប្រើប្រាស់របស់ប្រជាជនឥណ្ឌូនេសុី។

ទីផ្សារលំនៅដ្ឋានជាប់ដី(landed housing) បានបង្ហាញនិន្នាការវិជ្ជមាននៅត្រីមាសទី១ ខណៈដែលតម្រូវការផ្ទះថ្មីបន្តកើនឡើង។ ទន្ទឹមនឹងនេះ គម្រោងលំនៅដ្ឋាន ដែលមានតម្លៃសមរម្យ និងមានមធ្យោបាយធ្វើដំណើរដ៏ល្អទៅកាន់ស្ថានីយ៍រថភ្លើង ផ្លូវបង់ប្រាក់ និងការដឹកជញ្ជូនសាធារណៈ ក៏មានតម្រូវការខ្ពស់ផងដែរ។

ជាក់ស្តែង គេសង្កេតឃើញថា គម្រោងលំនៅដ្ឋាន ដែលមានតម្លៃក្រោម៦០០លានរូពៀ(៣៧.៣០៨ដុល្លារ)ក្នុងមួយយូនីត នៅតែមានតម្រូវការខ្ពស់ខ្លាំងក្នុងចំណោមអតិថិជន។ នេះបើយោងតាមក្រុមហ៊ុនប្រឹក្សាអចលនទ្រព្យ Savills។ចំណែក ទីផ្សារអាផាតមុិននៅតែបន្តស្ថិតក្រោមសម្ពាធ ខណៈតម្រូវការនៅមានកម្រិត និងកម្រិតតម្លៃស្ថិតក្នុងសភាពទ្រឹង។ លើសពីនេះ គេពុំសង្កេតឃើញមានគម្រោង ដែលទើបបើកដំណើរការថ្មីនោះទេ ដោយសារអ្នកអភិវឌ្ឍន៍កំពុងផ្តោតលើការលក់អាផាតមុិន ដែលមានស្រាប់។

តម្រូវការអាផាតមុិនភាគច្រើន ត្រូវជំរុញដោយអតិថិជនធម្មតា ដែលទិញសម្រាប់រស់នៅ ខណៈអ្នកវិនិយោគភាគច្រើននៅតែបន្តមានភាពស្ទាក់ស្ទើរក្នុងការទិញអាផាតមុិន។

ការបញ្ចប់ការសាងសង់អគារការិយាល័យថ្មីៗ បានបណ្តាលឱ្យអត្រាការិយាល័យទំនេរ នៅក្នុងតំបន់អភិវឌ្ឍន៍ពាណិជ្ជកម្មកណ្តាល(CBD) នៅទីក្រុងហ្សាកាតា មានការកើនឡើងនៅក្នុងកំឡុងត្រីមាសទី១។ ប៉ុន្តែ ការស៊ើបសួរ និងសកម្មភាពជួលបានកើនឡើង ដែលជំរុញដោយវិស័យបច្ចេកវិទ្យា ថាមពល និងហិរញ្ញវត្ថុ។។

ចំណែកឯ អត្រាស្នាក់នៅក្នុងសណ្ឋាគារបានធ្លាក់ចុះនៅដើមឆ្នាំនេះ ដោយសារសកម្មភាព MICE ទាំងផ្នែករដ្ឋាភិបាល និងវិស័យឯកជនបានផ្អាក ដោយសារការបោះឆ្នោត។ អត្រាស្នាក់នៅសណ្ឋាគារជាមធ្យមស្ថិតនៅចន្លោះពី៥០% ទៅ៦០% ក្នុងអំឡុងត្រីមាសទី១៕ប្រភព: Savill៕