ដោយ: គង់ លាងហួរ

ប៉េកាំង: កាលពីឆ្នាំ២០១៥ ប្រទេសចិនបានដាក់ចេញនូវផែន ការរយៈពេល១០ឆ្នាំ ប្រកបដោយមហិច្ឆតារបស់ខ្លួន ដែលមានឈ្មោះថា “Made in China ឆ្នាំ២០២៥” ដើម្បីសម្រេចបាននូវការពឹងផ្អែកលើខ្លួនឯង ការច្នៃប្រឌិត និងភាពរឹងមាំ នៅក្នុងឧស្សាហកម្មផលិតកម្ម។

នៅពេលដែលផែនការនេះ ទើបតែត្រូវបានដាក់ចេញដំបូងៗ គេសង្កេតឃើញថា រថយន្តភាគច្រើន ដែលបើកបរនៅលើដងផ្លូវរបស់ប្រទេសចិន មានប្រភពមកពីក្រុមហ៊ុនផលិតរថយន្ត លោកខាងលិច ហើយលំហផ្ទៃអាកាសរបស់ចិន ត្រូវបានគ្របដណ្តប់ទាំងស្រុងដោយយន្តហោះ ដែលផលិតដោយក្រុមហ៊ុនអាមេរិក Boeing ឬក្រុមហ៊ុនអឺរ៉ុប Airbus ។

ម្យ៉ាងទៀត នៅពេលនោះ រោងចក្រជាច្រើននៅក្នុងប្រទេសចិន មិនអាចដំណើរការបានឡើយ ប្រសិនបើគ្មានការនាំចូលឧបករណ៍ម៉ាស៊ីនពីបរទេស។  បន្ទះឈីប ប្រព័ន្ធប្រតិបត្តិការ និងសូហ្វវែរនៅក្នុងកុំព្យូទ័រ និងទូរសព្ទចល័តភាគច្រើន មានប្រភពមកពីសហរដ្ឋអាមេរិក ហើយសូម្បីតែ មូលដ្ឋានទិន្នន័យ ដែលប្រើប្រាស់ដោយធនាគារ ក៏ចិនត្រូវពឹងផ្អែក លើក្រុមហ៊ុនសាជីវកម្មពហុជាតិ សម្រាប់ការសរសេរកូដ និងការជួសជុលថែទាំ។

កាលនោះ ប្រទេសចិនឈរនៅចំណាត់ថ្នាក់ទាបប៉ុណ្ណោះ បើគិតពីខ្សែសង្វាក់តម្លៃឧស្សាហកម្មសកល ដោយពេលនោះ ប្រទេសចិនត្រឹមតែអាចផលិតផលិតផល ដែលមានតម្លៃថោក និងបច្ចេកទេសដើរក្រោយគេ។

ហេតុនេះ នៅឆ្នាំ២០១៥ រដ្ឋាភិបាលចិន បានដាក់ចេញផែនការយុទ្ធសាស្ត្រ  “Made in China ឆ្នាំ២០២៥” ដើម្បីផ្លាស់ប្តូរស្ថានភាពបែបនេះ តាមរយៈការរីកចម្រើនផ្នែកវិទ្យាសាស្ត្រ និងបច្ចេកវិទ្យា ដើម្បីផលិតផលិតផល ដែលមានគុណភាពខ្ពស់ បច្ចេកវិទ្យាទំនើប និងមានតម្លៃខ្ពស់។

នៅក្នុង​ឆ្នាំ២០១៨ អតីតប្រធានាធិបតី​អាមេរិក​លោក Donald Trump បាន​ព្យាយាម​រារាំង​ផែនការ​របស់​ចិន​ ដោយ​ការ​ចាប់ផ្តើម​សង្រ្គាម​ពាណិជ្ជកម្ម។ រដ្ឋាភិបាលអាមេរិក បានដាក់ទណ្ឌកម្មលើក្រុមហ៊ុនបច្ចេកវិទ្យារបស់ចិន ព្រមទាំងដំឡើងពន្ធ និងធ្វើការស៊ើបអង្កេតទូទាំងប្រទេស ដើម្បីវែករកអ្នកវិទ្យាសាស្ត្រ ដែលសហការជាមួយប្រទេសចិន។

បន្ទាប់ពីលោកប្រធានាធិបតី ចូ បៃដិន បានឡើងកាន់តំណែងនៅឆ្នាំ២០២១ លោកបានឈានទៅមុខមួយជំហានទៀត ដោយដាក់វិធានការ ដូចជា ការហាមឃាត់មិនឱ្យសម្ព័ន្ធមិត្តរបស់អាមេរិកលក់ ឬផលិតបន្ទះឈីបនៅប្រទេសចិន។

ជាក់ស្តែង ចាប់តាំងពីការផ្ទុះឡើង នៃសង្រ្គាមពាណិជ្ជកម្មមក រដ្ឋាភិបាលចិន បានបដិសេធសុំមិនពិភាក្សា ជាសាធារណៈអំពីផែន​ការ “Made in China ឆ្នាំ២០២៥”របស់ខ្លួនតទៅទៀតឡើយ។

ប៉ុន្តែបើផ្អែកលើសៀវភៅផ្លូវការ ដែលបានបោះពុម្ពផ្សាយ កាលពី១ទសវត្សរ៍មុន និងប្រភពផ្សេងទៀត កាសែត South China Morning Post បានដកស្រង់ចងក្រង បានជាង២៦០គោលដៅ ដែលបានស្នើឡើងពីមុននៅក្រោមផែនការនេះ។

ជាមួយគ្នានេះ យោងតាមការវិភាគបានបញ្ជាក់ឱ្យឃើញថា ចំនួនជាង៨៦ភាគរយ នៃគោលដៅទាំងនេះត្រូវបានសម្រេច ដោយខ្លះទៀត ទំនងជានឹងត្រូវបញ្ចប់នៅចុងឆ្នាំនេះ ឬឆ្នាំក្រោយ។  ទន្ទឹមនឹងនោះ គោលដៅមួយចំនួនដូចជា រថយន្តអគ្គិសនី (EV) និង ការផលិតថាមពលកកើតឡើងវិញ ត្រូវបានសម្រេចដោយជោគជ័យ៕ប្រភព:SCMP៕

ដោយ: គង់ លាងហួរ

អន្តរជាតិ: ផ្សារ​ទំនើប​តូចៗ​នៅប្រទេស​ឥណ្ឌា ​កំពុង​ប្រែក្លាយជាទីផ្សារខ្មោច ព្រោះមានសភាពស្ងាត់ជ្រងំ ខណៈ​អ្នក​ប្រើ​ប្រាស់ងាក​ទៅ​ទិញ​ទំនិញតាម​អ៊ីនធឺណិត និង​មជ្ឈមណ្ឌល​លក់​ទំនិញ​ធំ​ៗ ដើម្បីទទួ លបានបទ​ពិសោធ​ដ៏​ល្អ​ប្រសើរ។

ផ្សារទំនើបទាំងឡាយណា ដែលមានអត្រាទីតាំងលក់រាយ ដែ លគេទុកទំនេរចោលលើសពី៤០ភាគរយ ត្រូវបានគេហៅថាជា ផ្សារទំនើបខ្មោច“Ghost malls”។

យោងតាមរបាយការណ៍ថ្មីចុងក្រោយ ពីក្រុមហ៊ុនប្រឹក្សាអចលនទ្រព្យ Knight Frank India បានបង្ហាញថា ចំនួនផ្សារទំនើបខ្មោចនៅប្រទេស ដែលមានប្រជាជនច្រើនជាងគេ នៅលើពិភពលោកមួយនេះ បានកើនឡើងដល់៦៤ទីតាំង ក្នុងឆ្នាំ២០២៣ បើធៀបនឹង៥៧ទីតាំងក្នុងឆ្នាំ២០២២។

ស្របពេលជាមួយគ្នានេះ ផ្ទៃក្រឡាសម្រាប់ជួល(Gross Leasable Area) នៅផ្សារទំនើបទាំងអស់ នៅក្នុងប្រទេសឥណ្ឌាក្នុងឆ្នាំ២០២៣ បានកើនឡើងក្នុងអត្រា២៣៨ភាគរយ បើប្រៀបធៀបនឹងឆ្នាំ២០២២។

ក្រុមអ្នកវិភាគឧស្សាហកម្មបានលើកឡើងថា ការណ៍នេះឆ្លុះបញ្ចាំងពីការថយចុះ នៃតម្រូវការអ្នកប្រើប្រាស់ ហើយអាចនាំឱ្យមានការបាត់បង់ការងារ និងផលវិបាកផ្នែកសេដ្ឋកិច្ច ជាពិសេសសម្រាប់អ្នកលក់រាយខ្នាតតូច និងអ្នកផ្តល់សេវាកម្ម។

ការប្រើប្រាស់ឯកជន ដែលមានចំណែកស្មើនឹង៦០% នៃផលទុនជាតិសរុប (GDP) របស់ប្រទេសឥណ្ឌា នៅតែមានកម្រិតទាប ដោយកើនឡើងត្រឹមតែ៣,៥%ប៉ុណ្ណោះ ក្នុងត្រីមាសទី៤ ឆ្នាំមុន បើធៀបនឹងរយៈពេលដូចគ្នាឆ្នាំ២០២២ ខណៈដែលសេដ្ឋកិច្ចបានកើនឡើង៨,៤%។

បន្ទាប់ពីចេញផ្សាយរបាយការណ៍ “Think India Think Retail ” ឆ្នាំ២០២៤ ដោយផ្អែកលើការស្ទង់មតិ លើទីក្រុងកំពូលចំនួន២៩ លោក Gulam Zia នាយកក្រុមហ៊ុន Knight Frank ប្រចាំប្រទេសឥណ្ឌា បានលើកឡើងថា ផ្សារទំនើបតូចៗជាច្រើន កំពុងប្រឈមមុខនឹងការបិទទ្វារ៕ប្រភព: Reuters៕

        ដោយៈ គង់ ហ្វីអូណា

        ព្រះសីហនុៈ លោកសាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូប​នីយកម្ម និងសំណង់ បានចាត់ទុកខេត្តព្រះសីហនុ កំពុងឈានមុខគេ ក្នុងការ​ទ្រទ្រង់​ការ​អភិវឌ្ឍ​សេដ្ឋកិច្ច​នៅ​ក្នុងតំបន់ និងរបៀងសេដ្ឋកិច្ចតំបន់ឆ្នេរកម្ពុជា។

ខេត្តនេះបាននិងកំពុងអនុវត្តន៍យ៉ាងខ្ជាប់ខ្ជួន នូវ​យុទ្ធសាស្រ្តបញ្ចកោណដំណាក់កាលទី១ លើគោលនយោបាយជាអាទិភាពចំនួន៦ចំណុច និង​វិធានការ​គន្លឹះទាំង៥ របស់រាជរដ្ឋាភិបាល។

ក្នុងកិច្ចប្រជុំបូកសរុបលទ្ធផលការងារ ប្រចាំត្រីមាសទី១ ឆ្នាំ២០២៤ ក្រុមការងារ​រាជរដ្ឋាភិបាល​ចុះ​មូល​ដ្ឋាន​ខេត្ត និងជំរុញការងារចុះបញ្ជីដីធ្លី ក្នុងភូមិសាស្រ្តខេត្តព្រះសីហនុ កាលពីថ្ងៃទី៧ ខែ​ឧសភា ឆ្នាំ២០២៤ លោកឧបនាយករដ្ឋមន្ត្រី មានប្រសាសន៍ថា ក្នុងនាម​ជា​ខេត្ត​កំពុង​ឈាន​មុខ​លើ​វិស័យសេដ្ឋកិច្ច នៃតំបន់ឆ្នេរនេះ ខេត្តព្រះសីហនុគួររៀបចំក្រុង ឱ្យមាន​លក្ខណៈ​ស្តង់ដា​រួម​មួយ ដោយគិតគូរអំពីលំហសាធារណៈ ដោយមានផ្លូវថ្មើរជើង សម្រាប់​ប្រជាព​លរដ្ឋ​ហាត់​ប្រាណ​ ដើម្បី​សុខភាព មានដើមឈើ មានភាពបៃតងនោះ នាពេលខាងមុខ​ ទីក្រុង​នឹង​មាន​សោភ័ណ​ភាព​កាន់​តែ​ស្រស់ស្អាត ទាក់ទាញ ផ្តល់នូវផាសុកភាព និងងាយស្រួលក្នុងការរស់នៅ។

លោកសាយ សំអាល់ ក៏បានជំរុញអាជ្ញាធរខេត្ត ឱ្យគិតគូរយកចិត្តទុកដាក់ ក្នុងការ​ថែ​រក្សា​សន្តិសុខ និងសុវត្ថិភាពឱ្យកាន់តែប្រសើរឡើង សម្រាប់ប្រជាពលរដ្ឋ ក៏ដូចជាភ្ញៀវទេសចរជាតិ និង​អន្តរជាតិដែលមកកំសាន្ត ឬមកបណ្ដាក់ទុនវិនិយោគ ក្នុងខេត្តព្រះសីហនុ ជាមួ​យ​នឹង​ការ​ខិតខំ​ពន្លឿន​ការ​ចុះបញ្ជីដីធ្លីជាប្រព័ន្ធ។

គោលនយោបាយអាទិភាព៦ចំណុច របស់រាជរដ្ឋាភិបាលរួមមានទី១ ការពង្រីក​សេវា​ថែ​ទាំ​សុខភាព ទី២ ការបណ្តុះបណ្តាលជំនា​ញវិជ្ជាជីវៈ និងបច្ចេកទេស ទី៣ ការធ្វើ​ស្ថាបនូបនីយកម្ម​កម្មវិធីជាតិជំនួយសង្គម, ទី៤ ការដាក់ចេញយុទ្ធសាស្ត្រស្តីពី ការអភិវឌ្ឍ​សេដ្ឋកិច្ច​​ក្រៅប្រព័ន្ធ, ទី៥ ការដាក់ចេញនូវយន្តការសម្របសម្រួល និងកម្មវិធីហិរញ្ញប្បទាន សំដៅ​លើកស្ទួយផលិតកម្ម រកទីផ្សារ និងរក្សាលំនឹងថ្លៃកសិផលសំខាន់ៗ ក្នុងកម្រិតសមរម្យ; និងទី៦ ការដាក់ពង្រាយមន្ត្រីបច្ចេកទេសកសិកម្ម ទៅគ្រប់ឃុំ-សង្កាត់ ដែលមាន​សកម្ម​ភាព​កសិ​កម្ម​នៅទូទាំងប្រទេស និងការរៀបចំឱ្យមានសមាគមកសិករ នៅតាមទីជនបទ៕

        ដោយៈ គង់ សូរិយា

        ភ្នំពេញៈ ​អ្នកនាំពាក្យក្រសួងក្រសួងសាធារណការ និងដឹកជញ្ជូន លោកផន រឹមបានបង្ហើបឲ្យដឹងថា គម្រោងសាងសង់ស្ពានមិត្តភាពកម្ពុជា-កូរ៉េ​ តភ្ជាប់​ពី​ចំណុច​ផ្សាររាត្រី ​ឆ្ពោះទៅ​តំបន់​អរិយក្ស​ត្រ​​ កំពុងស្ថិតក្នុង​ដំណាក់​កាល​ជ្រើសរើស ក្រុមហ៊ុនទីប្រឹក្សាបច្ចេក​ទេ​ស ដែល​បានជាប់ក្នុងដំណាក់កាលជម្រុះ​កាលពីពេល​កន្លង​ទៅ។

អ្នកនាំពាក្យដដែលបានបញ្ជាក់ថា នៅមានដំណាក់កាលនីតិវិធីផ្សេងៗទៀត មុននឹងអាចឈាន​ទៅដល់​ការ​កំណត់​កាលបរិច្ឆេទ បើកការដ្ឋានសាងសង់ ដោយពុំទាន់អាចកំណត់ ពេលវេលាជាក់​លាក់បាន​នៅ​ឡើយនោះទេ។​

គម្រោងសាងសង់ស្ពានថ្មីនេះ ទទួលបានប្រាក់កម្ចីពីប្រទេសកូរ៉េ និងបានចុះហត្ថលេខា ក្នុងទំហំទឹកប្រាក់ជិត២៤៦លានដុល្លារ កាលថ្ងៃទី៩ ខែធ្នូ ឆ្នាំ២០២២។

លោក ផាក ជុងវ៉ុក ឯកអគ្គរដ្ឋទូតកូរ៉េប្រចាំកម្ពុជាបានឱ្យដឹងកាលពីពេលកន្លងមកថា គម្រោងសាងសង់ស្ពានមិត្តភាពកម្ពុជា-សាធារណរដ្ឋកូរ៉េ រំពឹងថា នឹងបើកការដ្ឋាននៅ​ដើម​ឆ្នាំ២០២៥ ខាងមុខ​។

តាមគម្រោងស្ពានមិត្ដភាពកម្ពុជា-កូរ៉េ នឹងត្រូវសាងសង់ចំនួន ២ ខ្សែ ដោយខ្សែទី១​តភ្ជាប់ពីខាង​មុខ​ផ្សាររាត្រី ឆ្លងកាត់ទន្លេសាបទៅកាន់តំបន់ជ្រោយចង្វារ និងខ្សែទី២ តភ្ជាប់ពីជ្រោយចង្វារឆ្លង​កាត់ទន្លេ​មេគង្គទៅអរិយក្សត្រ។

រាជរដ្ឋាភិបាលកម្ពុជា និងប្រទេសកូរ៉េបានដាក់ក្តីសង្ឃឹមថា ស្ពា​ន​នេះ នឹងជួយរួមចំណែកដល់​ការ​អភិវឌ្ឍរបស់កម្ពុជា និងជានិមិត្តរូបនៃមិត្តភាពកម្ពុជា-កូរ៉េ ហើយប្រទេសទាំងពីរ នឹង​បន្តពង្រីកកិច្ច​សហប្រតិបតិ្តការឱ្យកាន់តែរឹងមាំ ដើម្បីទាក់​ទាញ​​ក្រុមហ៊ុនកូរ៉េមកវិនិយោគនៅកម្ពុជា និងបន្តពង្រីក​លើវិស័យនានាបន្ថែមទៀត ហើយកិច្ចសហប្រតិបតិ្តការដ៏រឹងមាំរវាងប្រទេសទាំងពីរ នឹងរួមចំណែក​ដល់សន្តិភាព ស្ថិរភាព និងអភិវឌ្ឍនៅតំបន់អាស៊ាន ក៏ដូចជាតំបន់មេគង្គ៕

        ដោយៈ គង់ ម៉ាលីនណា

        ភ្នំពេញៈ មូលនិធិអន្តរជាតិសម្រាប់អភិវឌ្ឍន៍កសិកម្ម IFAD ផ្តល់កិច្ចសហប្រតិបត្តិការគាំទ្រកម្ពុជា ក្នុងដំណើរការអភិវឌ្ឍវិស័យកសិ​កម្ម មានទំហំហិរញ្ញប្បទានកើន ដល់ប្រមាណ៥៩៣លានដុល្លារអាម៉េរិក ដើម្បីរួមចំណែកក្នុងការជំរុញកំណើនសេដ្ឋកិច្ច និងការកាត់ បន្ថយភាពក្រីក្រនៅកម្ពុជា។

ក្នុងជំនួបពិភាក្សាអំពីកិច្ចសហប្រតិបត្តិការរវាងកម្ពុជា និង IFAD ជាមួយលោកដូណាល់ ប្រោន អនុប្រធានរងមូលនិធិអន្តរជាតិ សម្រាប់ អភិវឌ្ឍន៍កសិកម្ម (IFAD) លោកបណ្ឌិតអូន ព័ន្ឋមុនីរ័ត្នបានស្វាគមន៍លោក ដូណាល់ ប្រោន និងសហការី ដែលបានអញ្ជើញមកបំពេញបេសកកម្មនៅកម្ពុជា និងបានវាយតម្លៃខ្ពស់ ចំពោះការ ចូលរួមចំណែកដ៏សំខាន់របស់ IFAD ដែលបានផ្តល់កិច្ចសហប្រតិបត្តិការយ៉ាងល្អ ក្នុងការគាំទ្រកម្ពុជា ក្នុងដំណើរការអភិវឌ្ឍវិស័យ កសិកម្ម ចាប់ពីឆ្នាំ ១៩៩៣ រហូតមក ទាំងផ្នែកហិរញ្ញវត្ថុ និងបច្ចេកទេស ។

លោកឧបនាយករដ្ឋមន្រ្តី ក៏បានធ្វើការកត់សម្គាល់អំពីការកើនឡើងខ្លាំងនៃទំហំហិរញ្ញប្បទាន សហប្រតិបត្តិការ ដែលកាលពីឆ្នាំ ២០១៣-២០១៨ មានត្រឹមប្រមាណ៩៧លានដុល្លារអាមេរិក និងបានកើនរហូតដល់ប្រមាណ៥៩៣ លានដុល្លារអាមេរិក សម្រាប់ឆ្នាំ ២០២២-២០២៧ ។

ការណ៍នេះបង្ហាញនូវទំនាក់ទំនងដ៏ល្អ និងរឹងមាំ ព្រមទាំងមាន លក្ខណៈជាយុទ្ធសាស្រ្ត រវាងកម្ពុជា និងIFAD និងបានថ្លែងអំណរគុណIFAD ចំពោះជំហរបន្តគាំទ្រ និងពង្រឹងកិច្ចសហប្រតិបត្តិការជាមួយរាជរដ្ឋាភិបាល ជាពិសេសក្នុងវិស័យកសិកម្ម ដែលជាវិស័យអាទិភាពរបស់រាជរដ្ឋាភិបាល ដូចមានចែងនៅក្នុង យុទ្ធសាស្រ្តបញ្ចកោណ-ដំណាក់កាលទី១ ដើម្បីរួមចំណែកក្នុងការជំរុញកំណើនសេដ្ឋកិច្ច និងការកាត់បន្ថយ ភាពក្រីក្រនៅកម្ពុជា ។

លោកដូណាល់ ប្រោន បានកោតសរសើរ និងបានវាយតម្លៃខ្ពស់ចំពោះកិច្ចប្រឹងប្រែង របស់រាជរដ្ឋាភិបាលកម្ពុជា រហូតសម្រេចបាននូវការអភិវឌ្ឍយ៉ាងរហ័សលើគ្រប់វិស័យ ។

លោកបានគូសបញ្ជាក់ឡើងវិញ អំពីជំហរច្បាស់លាស់របស់ IFAD ក្នុងការពង្រឹងភាពជាដៃគូយុទ្ធសាស្រ្ត ជាមួយរាជរដ្ឋាភិបាលកម្ពុជា និងការប្តេជ្ញាចិត្តខ្ពស់ ក្នុងការបន្តគាំទ្រការ អនុវត្តយុទ្ធសាស្រ្តអភិវឌ្ឍន៍ជាតិរបស់រាជរដ្ឋាភិបាលកម្ពុជា៕

ដោយ: គង់ លាងហួរ

ភ្នំពេញ: យោងតាមក្រុមប្រឹក្សាអភិវឌ្ឍន៍កម្ពុជា (CDC) បានឱ្យដឹងនៅក្នុងសេចក្តីប្រកាសព័ត៌មាន នៅថ្ងៃអង្គារសប្តាហ៍នេះថា ប្រទេ​សកម្ពុជា បានទាក់ទាញលំហូរវិនិយោគផ្ទាល់ពីបរទេស(FDI) ក្នុងទំហំទឹកប្រាក់ចំនួន៣០៩លានដុល្លារអាមេរិកនៅក្នុងខែមេសា។

ក្រុមប្រឹក្សាអភិវឌ្ឍន៍កម្ពុជា (CDC) បាន បញ្ជាក់ឱ្យដឹងថា ខ្លួនបា​នអនុម័តគម្រោងវិនិយោគចំនួន២២គម្រោង នៅក្នុងខែមេសា ដែលអាចបង្កើតការងារ បានប្រហែល២៣.០០០កន្លែងជូនប្រជាជន។

ប្រភពខាងលើបានបន្តថា គម្រោងវិនិយោគថ្មីទាំងនោះ ផ្តោតលើជាសំខាន់ទៅលើ វិស័យកាត់ដេរ ស្បែកជើង និងផលិតផលធ្វើដំណើរ ព្រមទាំងការផលិតសំបកកង់រថយន្ត និងគ្រឿងបន្លាស់រថយន្ត ក្នុងចំណោមគម្រោងជាច្រើនផ្សេងៗទៀត។CDC បានគូសបញ្ជាក់ថា “ចំនួនប្រមាណ៩៨,០២ភាគរយ នៃលំហូរដើមទុនវិនិយោគសរុប នៅក្នុងខែមេសា ឆ្នាំ២០២៤ គឺមានប្រភពមកពីប្រទេសចិន។ ចំនួន១,០៣% មកពីប្រភពក្នុងស្រុក និងចំនួន០,៩៥% មកពីប្រទេសឥណ្ឌា”។

យោងតាមក្រុមប្រឹក្សាអភិវឌ្ឍន៍កម្ពុជា(CDC) ដដែលបានឱ្យដឹងទៀតថា ក្នុងអំឡុងខែមករា រហូតដល់ខែមេសា ប្រទេសកម្ពុជាបានទាក់ទាញការវិនិយោគ ទ្រព្យសកម្មថេរសរុប ក្នុងទំហំទឹកប្រាក់ប្រហែ​ល២,៥ពាន់លានដុល្លារអាមេរិក។

លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មកម្ពុជា បានមានប្រសាសន៍ឱ្យដឹងថា “កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) កិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA) និងច្បាប់ថ្មីរបស់កម្ពុជាស្តីពីការវិនិយោគ គឺជាកត្តាគន្លឹះក្នុងការទាក់ទាញ លំហូរវិនិយោគផ្ទាល់ពីបរទេស (FDI) ចូលមកកាន់ប្រទេសកម្ពុជា”។

លោកបានប្រាប់សារពត៌មាន Xinhua ថា “ទាំងកិច្ចព្រមព្រៀង RCEP និងកិច្ចព្រមព្រៀង CCFTA គឺជាមេដែកស្រូបទាញអ្នកវិនិយោ​គបរទេសចូលមកកាន់កម្ពុជា”។

មន្ត្រីជាន់ខ្ពស់រូបនេះបានបន្ថែមថា “លំហូរ FDI ជាពិសេសមកពីប្រទេសចិន ពិតជាមានសារៈសំខាន់ណាស់ ក្នុងការជំរុញកំណើនសេដ្ឋកិច្ច និងពាណិជ្ជកម្មរបស់ប្រទេសកម្ពុជា”៕ប្រភព: Xinhua៕

ដោយ: គង់ លាងហួរ

អន្តរជាតិ: ក្រុមហ៊ុនប្រឹក្សាអចលនទ្រព្យ Colliers Thailand បានធ្វើការព្រមានថា អ្នកអភិវឌ្ឍន៍ត្រូវគិតគូរដោយប្រុងប្រយ័ត្ន មុនពេលចាប់ផ្តើមគម្រោងខុនដូថ្មី នៅទីក្រុងប៉ាតាយ៉ា ដើម្បីជៀសវាងការផ្គត់ផ្គង់លើសតម្រូវការ។

ការព្រមាននេះធ្វើឡើង ខណៈការបើកដំណើរការលក់ខុនដូថ្មីៗនៅលើទីផ្សារត្រូវបានគេព្យាករណ៍ថា នឹងកើនឡើង៥០% ដល់៥.០០០យូនីត នៅឆ្នាំ២០២៤។ នេះបើយោងតាមក្រុមហ៊ុនប្រឹក្សាអចលនទ្រព្យខាងលើ។

លោក Phattarachai Taweewong ប្រធាននាយកដ្ឋានស្រាវជ្រាវនៅក្រុមហ៊ុន Colliers បានលើកឡើងថា តួលេខនៃការព្យាករណ៍ខាងលើនេះ គឺជាកម្រិតខ្ពស់បំផុត សម្រាប់ការបើកដំណើរការខុនដូនៅប៉ាតាយ៉ា ដែលលើសពីកំណត់ត្រាចំនួន៣.៣០២យូនីតកាលពីឆ្នាំមុន។យោងតាមក្រុមហ៊ុន Colliers បានឱ្យដឹងថា ទីតាំងដ៏ពេញនិយមបំផុត សម្រាប់ការផ្គត់ផ្គង់ខុនដូថ្មី ដែលបានបើកដំណើរការកាលពីឆ្នាំមុន គឺស្ថិតនៅតំបន់ឆ្នេរ Jomtien ដែលមានចំណែកនៃការផ្គត់ផ្គង់ចំនួន៤៣% បន្ទាប់មកគឺតំបន់ភ្នំ Phra Tamnak ដែលមានចំណែកនៃការផ្គត់ផ្គង់ចំនួន២៨% និងទីក្រុង Pattaya  City ដែលមានចំណែកនៃការផ្គត់ផ្គង់ចំនួន១៦% ។

យោងតាមក្រុមហ៊ុនប្រឹក្សាអចលនទ្រព្យ Colliers បានកត់សម្គាល់ថា តម្លៃខុនដូជាមធ្យម ដែលដាក់លក់នៅទីក្រុងប៉ាតាយ៉ានៅតែមានស្ថិរភាព ដោយសារតែខុនដូដែលលក់មិនទាន់ដាច់ នៅតែមានចំនួនច្រើននៅក្នុងស្តុក។ជាក់ស្តែង តម្លៃខុនដូនៅតំបន់ឆ្នេរ Wong Amat បានហក់ឡើងខ្ពស់កប់ពពក ដោយខុនដូនៅក្នុងគម្រោងមួយចំនួន មានតម្លៃ១៨៨.០០០បាត (៥.១១០ដុល្លារ)ក្នុងមួយម៉ែត្រការ៉េ។ ចំណែកឯ តម្លៃខុនដូ នៅតាមទីតាំង​មាត់​ឆ្នេរ​ផ្សេង​ទៀត ​ក៏​មានកម្រិតខ្ពស់​លើស​ពី១៣៥.០០០បាត​(៣.៦៧០ដុល្លារ)ក្នុង​មួយ​ម៉ែត្រ​ការ៉េ។ផ្ទុយទៅវិញ ខុនដូនៅតំបន់ឆ្នេរ Jomtien ជាពិសេសនៅតាមបណ្តោយផ្លូវ Jomtien Sai 2 មានតម្លៃតិចជាង៦០.០០០បាត(១.៦៣២ដុល្លារ)ក្នុងមួយម៉ែត្រការ៉េ។៕ប្រភព: Bangkok Post៕

ដោយ: គង់ លាងហួរ

អន្តរជាតិ: ការកក់ជើងហោះហើរ នៅតំបន់អាស៊ីប៉ាស៊ីហ្វិកត្រូវបានគេរំពឹងថា នឹងសម្រេចបានកំណើនលឿនបំផុត នៅលើពិភពលោក ស្របពេលដែលទីផ្សារមានស្ថិរភាព។ នេះបើយោងតាមភ្នាក់ ងារទេសចរណ៍អនឡាញ Booking.com។

លោកស្រី Laura Houldsworth នាយកគ្រប់គ្រងនៅភ្នាក់ងារ Booking.com ប្រចាំតំបន់អាស៊ីប៉ាស៊ីហ្វិក បានលើកឡើងថា ការកក់ជើងហោះហើរ នឹងមិនកើនឡើងលឿន ដូចកាលពីប៉ុន្មានឆ្នាំថ្មីៗនេះទេ ប៉ុន្តែល្បឿនគួរតែមានស្ថេរភាពជាងមុន។

យោងតាមគេហទំព័រ Booking.com បានឱ្យដឹងថា តំបន់អាស៊ីប៉ាស៊ីហ្វិក បានកត់ត្រាកំណើននៃការកក់ជើងហោះហើរ ក្នុងអត្រាប្រចាំឆ្នាំពី១៥ ទៅ១៦% កាលពីឆ្នាំមុន ដែលត្រូវបានជំរុញដោយ សារទីផ្សាររបស់ប្រទេសចិន។លោកស្រី Houldsworth បានមានប្រសាសន៍ឱ្យដឹងបន្តថា តំបន់អឺរ៉ុបបានរាយការណ៍ពីកំណើន នៃការកក់ជើងហោះហើរចំនួន១០% ខណៈទីផ្សារអាមេរិក នៅតែបន្តស្ថិតក្នុងសភាពទ្រឹង ហើយនិន្នាការបែបនេះ នឹងបន្តកើតឡើងនៅឆ្នាំ២០២៤នេះ។

ប្រទេសថៃបានក្លាយជាគោលដៅទេសចរណ៍ ដែលពេញនិយមបំផុត ក្នុងចំណោមអ្នកធ្វើដំណើរចិន ដែលកក់ជើងហោះហើរនៅលើវេទិការបស់គេហទំព័រ Booking.com បន្ទាប់ពីប្រទេសថៃ និងចិនបានអនុវត្តន៍ គោលនយោបាយលើកលែងទិដ្ឋាការទៅវិញទៅមក។

ទោះបីជាយ៉ាងណាក្តី លោក​ស្រី​បានគូសបញ្ជាក់ថា ទីផ្សារ​ទេស ចរណ៍មួយចំនួនដូច​ជា​ ប្រទេសកម្ពុជា និង​ប្រទេសឡាវជាដើម នៅ​តែ​មិនសូវទទួលបានភ្ញៀវ​ទេសចរណ៍ចិន ក្នុងចំនួនដ៏ច្រើននៅឡើយទេ។

លោកស្រី Houldsworth បានបន្ថែមថា “ល្បឿនក្នុងការស្ទុះងើបឡើងវិញ នៃទីផ្សារទេសចរណ៍ទាំងក្នុងប្រទេស និងក្រៅប្រទេសរបស់ប្រទេសចិន នឹងអាស្រ័យទៅលើការបើកជើងហោះហើរ អន្តរជាតិឡើងវិញ និងការធ្លាក់ចុះនៃសេដ្ឋកិច្ចចិន ដែលអាចរារាំងដល់វិស័យទេសចរណ៍ក្រៅប្រទេស”៕ប្រភព: Bangkok Post៕

ដោយ: គង់ លាងហួរ

ភ្នំពេញ: លោកសុខ សូកេន រដ្ឋមន្ត្រីក្រសួងទេសចរណ៍ បានស្វែងរកកិច្ចសហការពីក្រុមហ៊ុន Huawei Technologies ដើម្បីជំរុញគំនិតផ្តួចផ្តើម វិស័យទេសចរណ៍ឌីជីថលនៅកម្ពុជា។ នេះបើយោងតាមសេចក្តីប្រកាសព័ត៌មានរបស់ក្រសួង។

លោករដ្ឋមន្ត្រីបានជួបជាមួយលោក Tao Guangyao នាយកប្រតិបត្តិក្រុមហ៊ុន Huawei Technologies (Cambodia) Co., Ltd. នៅថ្ងៃច័ន្ទ ទី៦ ខែឧសភា ដោយលោកបានបង្ហាញពីចក្ខុវិស័យ ក្នុងការពង្រឹងកិច្ចខិតខំប្រឹងប្រែង សហការគ្នារវាងក្រសួង និងក្រុមហ៊ុន Huawei ជាពិសេសក្នុងការជំរុញ គំនិតផ្តួចផ្តើមទេសចរណ៍ឌីជីថល។

ជាការឆ្លើយតប លោក Tao Guangyao បានកោតសរសើរចំពោះការចូលរួមយ៉ាងសកម្ម របស់ក្រសួងទេសចរណ៍ និងបានប្តេជ្ញាចិត្តចូលរួមគាំទ្រយ៉ាងពេញទំហឹង ក្នុងការអភិវឌ្ឍន៍វិស័យទេសចរណ៍កម្ពុជាឱ្យកាន់តែរីកចម្រើនបន្ថែមទៀត។

វិស័យទេសចរណ៍ គឺជាសសរស្តម្ភមួយក្នុងចំណោមសសរស្តម្ភសំខាន់ៗទាំង៤ ដែលជួយទ្រទ្រង់ដល់កំណើនសេដ្ឋកិច្ច របស់ប្រទេ សកម្ពុជា។

យោងតាមរបាយការណ៍ថ្មី ចុងក្រោយរបស់ក្រសួងទេសចរណ៍បានឱ្យដឹងថា កម្ពុជាបានទាក់ទាញភ្ញៀវទេសចរណ៍ អន្តរជាតិសរុបចំនួន១,៥៨លាននាក់នៅក្នុងត្រីមាសទី១ ឆ្នាំ២០២៤ កើនឡើង២២,៥ភាគរយ បើធៀបនឹងចំនួន១,២៩លាននាក់ ក្នុងរយៈពេលដូចគ្នា កាលពីឆ្នាំ២០២៣។

ប្រទេសកម្ពុជាមានភាពល្បីល្បាញខ្លាំង ដោយសារតំបន់បេតិក ភណ្ឌពិភពលោកចំនួន៤ រួមមាន ឧទ្យានបុរាណវិទ្យាអង្គរនៅភាគពាយព្យខេត្តសៀមរាប តំបន់ប្រាសាទសំបូរព្រៃគុក នៅខេត្តកំពង់ធំ ព្រមទាំងប្រាសាទព្រះវិហារ និងឧទ្យានបុរាណវត្ថុកោះកេរ នៅភាគពាយ័ព្យនៃខេត្តព្រះវិហារ។

ក្រៅ​ពី​នេះ​ ប្រទេសកម្ពុជាមាន​ឆ្នេរ​សមុទ្រ ដ៏​ស្រស់ស្អាត​មួយ​ ដែល​លាតសន្ធឹង​ ប្រវែង​ប្រហែល៤៥០គីឡូម៉ែត្រ​ ក្នុង​ខេត្ត​ភាគ​និរតី​ចំនួន៤ គឺ​ខេត្ត​ព្រះសីហនុ ខេត្តកំពត ខេត្តកែប និង​ខេត្តកោះកុង៕ប្រភព: Xinhua៕