ដោយៈ ស៊ីវ ម៉េង

        ភ្នំពេញៈ ទីផ្សារអចលនទ្រព្យ អាចត្រូវការរយៈពេលវែងបន្ថែមទៀត ដើម្បីជម្រុញឲ្យតម្លៃងើបឡើងវិញ ខណៈបច្ចុប្ប​ន្នអ្នកវិនិយោគនៅតែបន្តស្វែងរកដី និងអចលនទ្រព្យផ្នែកដទៃទៀត ដែលមានតម្លៃក្រោមទីផ្សារ។

លោកស្រីតាំង ហួរអគ្គនាយិកាក្រុមហ៊ុនAMATAK Property Service Co, Ltdបានមានប្រសាសន៍ឲ្យដឹងតាមបណ្តាញតេឡេក្រា​មកាលពីល្ងាចថ្ងៃទី២១ មេសាកន្លងមកថា ស្ថានភាពទីផ្សារចូលមកដល់ដើមត្រីមាសទី២នេះ មិនទាន់មានសញ្ញាប្រែប្រួលនៅឡើយទេ ដោយអ្នកទិញនៅតែស្វែងរកដី និងអចលនទ្រព្យដទៃទៀត ដែលមានតម្លៃល្អ។លោកស្រីបន្តថា “អ្វីៗស្ថិតនៅក្នុងសភាពទ្រឹង ពិសេសតម្លៃដីធ្លី មិនទាន់ងើបឡើងនៅឡើយទេ យើងត្រូវការពេលវេលាបន្ថែមទៀត”។ លោកស្រីបន្តថា “អ្នកទិញនៅតែស្វែងរកអចលនទ្រព្យ តម្លៃក្រោមទីផ្សារ ទើបពួកគេសម្រេចចិត្តទិញ ឬវិនិយោគដើម្បីយកផលចំណេ​ញសម្រាប់អនាគត”។

ជាមួយគ្នានេះ លោកប៉ូ អ៊ាវគង់អគ្គនាយកក្រុមហ៊ុនAdvance Real Estateបានមានប្រសាសន៍ឲ្យដឹងផងដែរថា ការខិតខំប្រឹងប្រែងរបស់ប្រមុខរដ្ឋាភិបាល បាននិងកំពុងធ្វើឲ្យមានសញ្ញាវិជ្ជមានសម្រាប់សេដ្ឋកិច្ច ប៉ុន្តែសម្រាប់ទីផ្សារអចលនទ្រព្យ មិនទាន់មានសញ្ញាប្រសើរនៅឡើយ ដោយការលំហូរទុនវិនិយោគផ្ទាល់ពីបរទេស​លើវិស័យយនេះនៅមានកម្រិត។លោកបន្តថា “ភាពឆ្អែតរបស់ទីផ្សារ និងស្ថានភាពសេដ្ឋកិច្ចមិនមានភាពច្បាស់លាស់នៅលើពិភពលោក និងបញ្ហាទីផ្សារអចលនទ្រព្យរបស់ចិន បាននិងកំពុងជះឥទ្ឋិពលដល់កម្ពុជាផងដែរ”។ លោក​បន្តថា “សញ្ញាប្រសើរឡើងលឿនឬយឺត អាស្រ័យលើលំហូរFDI និងអំណាចនៃការទិញកើនឡើងនៅក្នុងស្រុក”។ រាជរដ្ឋាភិបាលកម្ពុជាបានព្យាករណ៍ថា សេដ្ឋកិច្ចកម្ពុជានឹងសម្រេ​ចបានកំនើន៦,៦ភាគរយ នៅឆ្នាំ២០២៤នេះ ប៉ុន្តែទិន្នន័យនេះត្រូវបានប្រជាពលរដ្ឋរិះគន់យ៉ាងខ្លាំង ដោយសារស្ថានភាពអាជីវកម្មរបស់ពួកគេកំពុងជួបបញ្ហាជាច្រើន៕

ដោយៈ និស្ស័យ

        ភ្នំពេញៈ ប្រមុខកាទូតចិន លោកវ៉ាង យីបានថ្លែងថា ទោះបីជាអាកាសធាតុឡើងកំដៅខ្លាំងក្តី ប៉ុន្តែបញ្ហានេះមិនមែនជាឧបសគ្គសម្រាប់ទំនាក់ទំនងចិន កម្ពុជានោះទេ។

លោកបានថ្លែងបែបនេះ ក្នុងជំនួបជាមួយប្រមុខកាទូតកម្ពុជា លោកសុខ ចិន្តាសោភា ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិកាលពីល្ងាចថ្ងៃទី២១ មេសាកន្លងមកនេះ។

លោកវ៉ាង យីប្រមុខការទូតចិន បានប្រដូចន័យខាងលើនេះ ទៅលើទំនាក់ទំនងប្រទេសទាំងពីរថា មានកម្តៅខ្លាំងជាងអាកាសធាតុទៅទៀត។យ៉ាងណាមិញ ដំណើរទស្សនកិច្ចរបស់ លោកវ៉ាង យី នាពេលនេះ ធ្វើឡើងស្របពេលនឹងការប្រារព្ធឆ្នាំ នៃការផ្លាស់ប្តូរប្រជាជន និងប្រជាជនកម្ពុជា-ចិន ហើយនឹងរួមចំណែកដល់ការពង្រឹងមិត្តភាពដែកថែប និងពង្រីកបន្ថែមទៀតនូវកិច្ចសហប្រតិ បត្តិការជាដៃគូយុទ្ធសា​ស្រ្តគ្រប់ជ្រុងជ្រោយ ធ្វើឲ្យស៊ីជម្រៅនូវការកសាងសហគមន៍ វាសនារួមប្រកបដោយ គុណភាពខ្ពស់ កម្រិតខ្ពស់ និងស្តង់ដាខ្ពស់ លើកកម្ពស់ក្របខណ្ឌ កិច្ចសហប្រតិបត្តិការត្បូងពេជ្យ ព្រមទាំងជំរុញកិច្ចសហប្រតិបត្តិការនៅក្នុងវេទិកាតំបន់ និងអន្តរជាតិ ដើម្បីជាផលប្រយោជន៍ទៅវិញទៅមក សម្រាប់ប្រទេស និងប្រជាជនទាំងពីរ(កម្ពុជា-ចិន)។

ក្នុងជំនួបនោះ លោកឧបនាយករដ្ឋមន្រ្តី បានសម្តែងការអរគុណចំពោះឯកឧត្តម វ៉ាង យី ដែលបានមកបំពេញទស្សនកិច្ចនៅកម្ពុជា ដែលជាកិត្តិយសបំផុត សម្រាប់កិច្ចសហប្រតិបត្តិការរវាងប្រទេស ក្នុងពេលលោកវ៉ាង យី ឆ្លៀតពេលដ៏មមាញឹកបំពេញបេសកកម្មរបស់ខ្លួន។

លោកឧបនាយករដ្ឋមន្រ្តី បានកោតសរសើរចំពោះ លោកវ៉ាង យី ដែលតែងតែឆ្លៀតពេលវេលា ដ៏មានតម្លៃរៀបចំការបំពេញទស្សនកិច្ចមកកាន់កម្ពុជា ដែលគិតមកទល់ពេលនេះ លោកវ៉ាង យី បានបំពេញទស្សនកិច្ចផ្លូវការចំនួន៨លើកហើយ ក្នុងគោលដៅពង្រឹង និងពង្រីកកិច្ចសហប្រតិបត្តិការជាមួយកម្ពុជា ក្នុងន័យជាមិត្តភាពដែកថែបដ៏យូរអង្វែង៕

ដោយៈ គង់ សូរិយា

        ភ្នំពេញៈ ដូចការព្រាងទុក ព្រលានយន្តហោះអន្តរជាតិភ្នំពេញ បានស្វាគមន៍យន្តហោះគ្រឿងទី១ របស់ Air Asia Cambodiaដែលបានមកដល់កាលពីចុងសប្តាហ៍មុន។

យន្តហោះរបស់ក្រុមហ៊ុននេះ បានរចនារូបប្រាសាទអង្គរវត្ត​ និងអក្សរ Cambodia យ៉ាងស្រស់ស្អាត​ ដើម្បីត្រៀមហោះហើរបង្ហាញ និងហោះហើរសាកល្បង នៅថ្ងៃទី៣០ ខែមេសាខាងមុខនេះ ដើម្បីទទួលបានវិញ្ញាបនបត្រ ប្រតិបត្ដិករហោះហើរផ្លូវការ។

រីឯការហោះហើរក្នុងស្រុកជាផ្លូវការ នឹងរៀបចំដំណើរការនៅថ្ងៃទី២ ខែឧសភា ឆ្នាំ២០២៤ នាដើមខែក្រោយ ។កាលវិភាគរបស់ក្រុមហ៊ុនអាកាសចរណ៍Air Asia Cambodia នឹងធ្វើការហោះហើរទៅមករវាង ភ្នំពេញ-សៀមរាប ចំនួន៤ជើង ក្នុងមួយថ្ងៃ និងទិសដៅទៅមករវាងខេត្តព្រះសីហនុ -សៀមរាប ចំនួន៤ជើងក្នុងមួយថ្ងៃផងដែរ។ចំណែកឯការភ្ជាប់ជើងហោះហើរ ទៅកាន់ក្រៅប្រទេសនឹងចាប់ផ្តើមនាពេលខាងមុខ ៕

        ដោយៈ គង់ សូរិយា

        កំពតៈ អ្នកជំនាញមូលដ្ឋានបានអះអាងថា ទីផ្សារអចលនទ្រព្យបែបលំហែរកាយ និងបដិសណ្ឋារកិច្ចកំពុង មានសញ្ញាប្រសើរឡើងវិញ នៅក្នុងមូលដ្ឋានខេត្តកំពត។

នាយកប្រតិបត្តិក្រុមហ៊ុនHIPPO PROJECT Sale លោកគឹម សង្រ្គាម ដែលមានមូលដ្ឋានប្រចាំខេត្តកំពត បានមានប្រសាសន៍ឲ្យដឹងកាលពីថ្ងៃទី២២ មេសាថា ស្ថានភាពទីផ្សារនៅតែដំណើរការ មានតម្រូវការ ទោះបីជាតម្លៃស្ថិតនៅក្នុងទីផ្សារក្តី ក៏នៅតែមានការវិនិយោគពីអ្នកជំនួញនៅរាជធានីភ្នំពេញ។

លោកបន្តថា “ដីសម្រាប់សាងសង់សណ្ឋាគារ ផ្ទះសំណាក់ និងរមណីយដ្ឋានផ្សេងៗ ដែលមានទីតាំងល្អ នៅតែមានអ្នកទិញ ទោះបី ជាវាមានតម្លៃមិនក្រោមទីផ្សារក្តី”។ លោកបន្តទៀតថា “ភ្ញៀវទេសចរ ណ៍បានមកកាន់ខេត្តកំពតច្រើន ដែលធ្វើឲ្យអ្នកវិនិយោគទិញ និងកុំម៉ង់ទីតាំង សម្រាប់សាងសង់ការិយាល័យ និងបើកក្រុមហ៊ុនផងដែរ”។

លោកគឹម សង្រ្គាមបានបន្តថា នៅខេត្តកំពតមានសញ្ញាវិជ្ជមានច្រើន ដោយកំពង់ផែទេសចរណ៍ កំពង់ផែទឹកជ្រៅ ក្នុងខេត្តត្រៀមសម្ភោធបើកនាពេលឆាប់ៗនេះ ពិសេសរូបសំណាកសេះសមុទ្រ និងកាលពីពេលថ្មីៗនេះ អភិបាលខេត្តកំពត លោកម៉ៅ ធនិនបានសាងសង់រូបសំណាកយាយម៉ៅ ក្នុងខេត្តនេះ បាននិងកំពុងទាក់ទាញភ្ញៀវទេសចរណ៍កាន់​តែច្រើន សម្រាប់បច្ចុប្បន្ន និងតទៅអនាគត។

 ប្រធានសមាគមសហគ្រិនសារព័ត៌មានសេដ្ឋកិច្ចកម្ពុជា លោកយិន លាងគង់បានមានប្រសាសន៍ឲ្យដឹងនៅថ្ងៃដដែលថា ស្ថិតក្នុងចំណោមខេត្ត ដែលត្រូវបានសម្តេចតេជោប្រសិទ្ឋនាមថា “ជាតារារះនាទិញនារតី” ខេត្តកំពតមានសញ្ញានៃការរីកចម្រើនខ្លាំង នាពេលអនាគត ដោយសារកត្តាភូមិសាស្រ្ត ហេដ្ឋារចនាសម្ព័ន្ឋ ដែលបានវិនិយោគ និងត្រៀមវិនិយោគរបស់រដ្ឋាភិបាល។

លោកបន្តថា ការជីកព្រែកហ្វូណនតេជោ ការសាងសង់ពុទ្ឋបដិមាកំពស់១០៨ម៉ែត្រ លើភ្នំបូកគោរបស់ក្រុមហ៊ុនសុខាអូតែល ការសាងសង់ផ្លូវតភ្ជាប់ពីចំណុចកំពូលភ្នំបូកគោ ទៅកាន់ផ្លូវជាតិលេខ៤ ដែលបាននិងកំពុងចាក់បេតុងបណ្តើរៗ នឹងជាកំលាំងចលករដ៏សំខា​ន់ ជួយជម្រុញឲ្យខេត្តកំពតរីកចម្រើនលឿន នៅពេលអនាគតឆាប់ៗ​ខាងមុខនេះ។

ក្រៅពីធនធានធម្មជាតិ ដងព្រែងដ៏ខ្វាត់ខ្វែង រមណីយដ្ឋានធម្មជាតិដ៏សម្បូរបែប ខេត្តកំពត ក៏មានតំបន់កសិទេសចរណ៍ ដូចជាស្រែអំបិល ចំការម្រេច និងតំបន់ទេសចរណ៍វប្បធ៌ម ប្រវត្តិសាស្រ្តដ៏សម្បូរបែបផងដែរ៕

ដោយ: គង់ លាងហួរ
អន្តរជាតិ: រដ្ឋាភិបាលរុស្ស៊ីគ្រោងសាងសង់ច្រករបៀងដឹកជញ្ជូនថ្មីចំនួន២ ដើម្បីតភ្ជាប់តំបន់អាស៊ី និងអឺរ៉ុប ក្នុងគោលដៅកាត់បន្ថយឥទ្ធិពលនៃទណ្ឌកម្មរបស់ក្រុមប្រទេសលោកខាងលិច ខណៈភាពចលាចលនៅតំបន់មជ្ឈិមបូព៌ាកំពុងរំខានដល់ចរាចរណ៍ពាណិជ្ជកម្មពិភពលោក។

គម្រោងសាងសង់បណ្តាញដឹកជញ្ជូនតាមរយៈផ្លូវទឹក និងផ្លូវដែក របស់រុស្សុី ដោយឆ្លងកាត់តាមរយៈប្រទេសអុីរ៉ង់ និងផ្លូវកាត់សមុទ្រអាកទិក អាចពង្រឹងការនាំចេញរបស់ទីក្រុងម៉ូស្គូ ឆ្ពោះទៅកាន់ប្រទេសមហាអំណាចនៅតំបន់អាស៊ី ដូចជា ប្រទេសចិន និងឥណ្ឌា ដើម្បីធ្វើពិពិធកម្មចេញពីតំបន់អឺរ៉ុប។

ប្រទេសមហាអំណាចចិន និងឥណ្ឌា មានសក្តានុពលក្នុងការធ្វើឱ្យរុស្ស៊ីក្លាយជាចំណុចស្នូលដ៏សំខាន់នៃពាណិជ្ជកម្មអន្តរជាតិ បើទោះបីជាសហរដ្ឋអាមេរិក និង សម្ព័ន្ធមិត្តកំពុងព្យាយាមដាក់ប្រធានាធិបតីរុស្ស៊ី លោកវ្ល៉ាឌីមៀ ពូទីនឲ្យនៅឯកោយ៉ាងណាក្តី។គម្រោងផ្លូវដឹកជញ្ជូនថ្មីរបស់រុស្សុី អាចកាត់បន្ថយពេលវេលាធ្វើដំណើរចាប់ពី៣០% ទៅ៥០% បើប្រៀបធៀបទៅនឹងព្រែកជីក Suez និងជៀសវាងបញ្ហាសន្តិសុខ ដោយសារក្រុមឧទ្ទាម Houthi បានបើកការវាយប្រហារទៅលើកប៉ាល់ដឹកជញ្ជូនអន្តរជាតិនៅសមុទ្រក្រហម ក្នុងគោលដៅសងសឹកចំពោះប្រទេសអុីស្រាអែល ដែលបានធ្វើសង្គ្រាមប្រឆាំងនឹងក្រុមហាម៉ាសនៅតំបន់ហ្គាហ្សា។

ជាមួយគ្នានេះការវាយប្រហារ ដោយកាំជ្រួច និងយន្តហោះគ្មានមនុស្សបើករបស់ប្រទេសអុីរ៉ង់ សំដៅទៅលើអុីស្រាអែល បានបន្ថែមភាពចលាចល នៅក្នុង តំបន់មជ្ឈឹមបូព៌ាថែមមួយកម្រិតទៀត។

ប្រទេសរុស្ស៊ីកំពុងរៀបចំបោះទុនវិនិយោគជាង២៥ពាន់លានដុល្លារ ដើម្បីធ្វើឱ្យប្រសើរឡើងនូវផ្លូវដែកដឹកជញ្ជូនឆ្លងកាត់តាមរយៈប្រទេសអុីរ៉ង់ និងកែលម្អគ្រឿងបរិក្ខារផ្សេងៗនៅតាមបណ្តោយច្រាំងសមុទ្រអាកទិករបស់ប្រទេសរុស្ស៊ី។

កាសែត Izvestia បានរាយការណ៍ដោយដកស្រង់សម្តីមន្ត្រីក្រសួងការពារជាតិ ដែលមិនស្គាល់អត្តសញ្ញាណមួយរូបថា ប្រទេសរុស្សុីក៏មានគម្រោងល្បាតផ្លូវសមុទ្រខាងជើង (NSR) ដោយប្រើប្រាស់បណ្តាញមូលដ្ឋានយន្តហោះគ្មានមនុស្សបើករបស់ខ្លួនផងដែរ៕ប្រភព:CNBC៕

ដោយ: គង់ លាងហួរ
អន្តរជាតិ: ទីផ្សារលំនៅដ្ឋាននៅទីក្រុងគូឡាឡាំពួ ប្រទេសម៉ាឡេសុី ត្រូវបានគេរំពឹងថា នឹងជួបប្រទះការធ្លាក់ចុះនៃតម្រូវការនៅឆ្នាំនេះ ដោយសារតែកម្រិតអត្រាការប្រាក់ខ្ពស់។ នេះបើយោងតាមរបាយការណ៍សិក្សាថ្មីរបស់ក្រុមហ៊ុនប្រឹក្សាអចលនទ្រព្យ JLL។

ប្រភពរបាយការណ៍ដដែលបន្តថា តម្រូវការពីសំណាក់ពលរដ្ឋក្នុងស្រុក នឹង មិនកើនឡើងនោះទេ ដោយសារអត្រាការប្រាក់ត្រូវបានគេព្យាករណ៍ថានឹងនៅតែមានកម្រិតខ្ពស់។ ចំពោះជនបរទេស អ្នកវិភាគនៅតែមិនប្រាកដថា តើការកែសម្រួលលក្ខខណ្ឌកម្មវិធី “ម៉ាឡេសុី ផ្ទះទី២របស់ខ្ញុំ” នឹងជះឥទ្ធិពលវិជ្ជមានខ្លាំងទៅលើតម្រូវការអចលនទ្រព្យឬយ៉ាងណានោះទេ។

នៅឆ្នាំ២០២៤នេះ គម្រោងលំនៅដ្ឋានទាំងឡាយណា ដែលផ្តល់នូវរបៀបរស់នៅល្អគាប់ប្រសើរ លក្ខណៈពិសេសប្លែក និងទំហំបន្ទប់តូចជាងមុន នឹងទាក់ទាញពលរដ្ឋក្នុងស្រុក ស្របពេលដែលចំនួនគ្រួសារទោល ឬអ្នកនៅលីវកំពុងមានការកើនឡើង។

ក្រុមហ៊ុនប្រឹក្សាអចលនទ្រព្យ JLL បានផ្តល់អនុសាសន៍ថា នៅក្នុងគម្រោងអភិវឌ្ឍន៍អគារលំនៅដ្ឋានខ្ពស់ៗ ត្រូវតែដាក់បញ្ចូលការសាងសង់តំបន់រួម(Common area)ដ៏គួរឱ្យទាក់ទាញ និងកន្លែងបង្ហាញពីរបៀបរស់នៅផ្សេងៗ ឬហៅថា Lifestyle ដើម្បីទាក់ទាញអតិថិជន។

ម្យ៉ាងវិញទៀត ធនាគារកណ្តាលម៉ាឡេសុីបានរក្សាទុកអត្រាការប្រាក់របស់ខ្លួនឱ្យស្ថិតនៅថេរដដែលក្នុងរង្វង់៣ភាគរយ នៅក្នុងត្រីមាសទី៤ ឆ្នាំ២០២៣ បន្ទាប់ពីបានដំឡើងអត្រាការប្រាក់រយៈពេល៣ដងជាប់ៗគ្នា។

ការរក្សាទុកអត្រាការប្រាក់ឱ្យស្ថិតនៅកម្រិតខ្ពស់បែបនេះ អាចជះផលប៉ះពាល់ដល់តម្រូវការអចលនទ្រព្យនៅក្នុងទីផ្សារ ដោយសារកម្រិតអត្រាការប្រាក់ខ្ពស់ នឹងដាក់សម្ពាធទៅលើលទ្ធភាពរបស់ពលរដ្ឋម៉ាឡេសុី ក្នុងការទិញអចលនទ្រព្យ។

តម្រូវការនៅតែបន្តធ្លាក់ចុះ ស្របពេលដែលពលរដ្ឋក្នុងស្រុកនៅតែប្រកាន់ជំហរប្រុងប្រយ័ត្ន ដោយពួកគេវាយតម្លៃឡើងវិញជាច្រើនដង នូវការសម្រេចចិត្តលើការទិញអចលនទ្រព្យ ខណៈជនបរទេសកំពុងរង់ចាំការធ្វើបច្ចុប្បន្នភាពលើកម្មវិធី “ម៉ាឡេសុី ផ្ទះទី២របស់ខ្ញុំ” ដោយសង្ឃឹមថា រដ្ឋាភិបាលម៉ាឡេសុីនឹងបន្ធូរបន្ថយលក្ខខណ្ឌនៃការដាក់ពាក្យនៅក្នុងកម្មវិធីនេះ៕ប្រភព: Real Estate Asia៕

ដោយ: គង់ លាងហួរ
អន្តរជាតិ: យោងតាមការសិក្សាពីក្រុមហ៊ុន Goldman Sachs បានឱ្យដឹងថា ទីផ្សារលំនៅដ្ឋាននៅប្រទេសចិនអាចនឹងបន្តដាំក្បាលចុះបន្ថែមទៀត ដោយសារកិច្ចខិតខំប្រឹងប្រែងរបស់រដ្ឋាភិបាល ដើម្បីស្តារវិស័យនេះឱ្យស្ទុះងើបឡើងវិញមិនទាន់មានប្រសិទ្ធភាពគ្រប់គ្រាន់។

ក្រុមហ៊ុនខាងលើវាយតម្លៃថា រដ្ឋាភិបាលចិនត្រូវចំណាយថវិកាជាង១៥ទ្រីលានយ័ន (ប្រមាណ២,១ទ្រីលានដុល្លារ) ដើម្បីដោះស្រាយបញ្ហាជាច្រើន ដែលកំពុងញាំញីនៅក្នុងវិស័យអចលនទ្រព្យរបស់ខ្លួននាពេលបច្ចុប្បន្ននេះ។

ធនាគារវិនិយោគអាមេរិកមួយនេះបានបន្តឱ្យដឹងទៀតថា រដ្ឋាភិបាលចិនត្រូវជួយដល់អ្នកអភិវឌ្ឍន៍ ក្នុងការផ្តល់មូលនិធិ ដើម្បីបញ្ចប់ការសាងសង់គម្រោងដែលជាប់គាំង ដើម្បីជួយធានាស្ថិរភាពសង្គម និងធ្វើឱ្យបញ្ហានៃការផ្គត់ផ្គង់ផ្ទះលើសតម្រូវការ វិលទៅកាន់កម្រិតធម្មតាឡើងវិញ និងកាត់បន្ថយការចុះកិច្ចសន្យាប្រចាំឆ្នាំក្នុងការសាងសង់គម្រោងអចលនទ្រព្យថ្មី។ក្រុមអ្នកវិភាគដែលមានមូលដ្ឋាននៅទីក្រុងហុងកុង បូករួមទាំងលោក Lisheng Wang បាននាំគ្នាលើកឡើងថា ការដោះស្រាយបញ្ហាទាំងនេះ អាចជួយធានាបាននូវស្ថិរភាពសង្គម ទប់ស្កាត់ការធ្លាក់ចុះនៃតម្លៃផ្ទះ និងកសាងទំនុកចិត្តអ្នកប្រើប្រាស់ឡើងវិញ។

ក្រុមអ្នកវិភាគបានអះអាងថា “បើទោះបីជាមានការខិតខំប្រឹងប្រែងជាច្រើនរួចមកហើយយ៉ាងណាក្តី ក៏ប៉ុន្តែ សូចនាករសកម្មភាពអចលនទ្រព្យជាច្រើនបានបន្តធ្លាក់ចុះកាន់តែដុនដាបទៅៗ”។

ក្រុមអ្នកវិភាគបានបន្ថែមថា “វិស័យលំនៅដ្ឋានមិនទាន់ដាំក្បាលចុះដល់បាត តាមគន្លងរាងអក្សរ L ដូចដែលយើងរំពឹងទុកនោះទេ។រីឯ បញ្ហានឹងនៅតែកើតមានក្នុងរយៈពេលប៉ុន្មានឆ្នាំខាងមុខ ជាពិសេសសម្រាប់អ្នកអភិវឌ្ឍន៍ឯកជនដែលជួបប្រទះវិបត្តិសាច់ប្រាក់”។

វិបត្តិទីផ្សារលំនៅដ្ឋានរបស់ប្រទេសចិនបានផ្ទុះឡើង បន្ទាប់ពីទីក្រុងប៉េកាំងបានដាក់ចេញគោលនយោបាយ “បន្ទាត់ក្រហម៣”នៅក្នុងខែសីហា ឆ្នាំ២០២០ ដោយរឹតបន្តឹងមិនឱ្យអ្នកអភិវឌ្ឍន៍អចលនទ្រព្យខ្ចីប្រាក់ច្រើនលើសលប់បន្ថែមទៀត៕ប្រភព: The South China Morning Post៕