ដោយៈ គង់ សូរិយា

        ភ្នំពេញៈ ថ្នាក់ដឹកនាំក្រុមហ៊ុនលំដាប់យក្សSJ Groupបានបង្ហាញពីបំណង ក្នុងការវិនិយោគលើវិស័យកសិកម្ម ថាមពលបៃតង ការដឹកជញ្ជូន និងភស្តុភារកម្មនៅកម្ពុជា។

ព័ត៌មានដ៏ល្អនេះ ត្រូវបានលើកឡើងដោយ លោក Hong Kian Lim នាយកប្រតិបត្តិក្រុមហ៊ុន SJ Group របស់ប្រទេសសិង្ហបុរី ក្នុងពេលលោក និងលោកClement Yang អគ្គនាយកតំបន់សេដ្ឋកិច្ចពិសេស Manhattan  ចួលជួបពិភាក្សាការងារជាមួយលោកឧប​នាយករដ្ឋមន្រ្តីស៊ុន ចាន់ថុល អនុប្រធានទី១នៃក្រុមប្រឹក្សាអភិវឌ្ឍន៍កម្ពុជាកាលពីថ្ងៃទី៩ មេសា។

ក្នុងឱកាសជំនួបនេះ ក្រុមហ៊ុនបានបង្ហាញអំពីគម្រោងផែនការក្នុងការពង្រីកអាជីវកម្មរបស់ខ្លួន នៅក្នុងប្រទេសកម្ពុជា ដោយគ្រោងសិក្សា និងសហការជាមួយក្រុមហ៊ុនធំៗ តួយ៉ាងដូចជាក្រុមហ៊ុន SJ Group ដែលជាក្រុមហ៊ុនមានបទពិសោធន៍ចាស់ទុំ ក្នុងការអភិវឌ្ឍតំបន់សេដ្ឋកិច្ចពិសេស និងទីក្រុងមួយចំនួននៅលើពិភពលោក ដូចជាតំបន់សេដ្ឋកិច្ចពិសេស Suzhou Industrial Park នៅទីក្រុងជាងស៊ូ ប្រទេសចិន។

ជាការឆ្លើយតប លោកឧបនាយករដ្ឋមន្ត្រីស៊ុន ចាន់ថុលក្នុងនាមក្រុមប្រឹក្សាអភិវឌ្ឍន៍កម្ពុជា បានស្វាគមន៍រាល់ការស្នើសុំសម្របសម្រួ​លលើគម្រោងវិនិយោគនានា ដែលគ្រោងនឹងដាក់ទុនមកកម្ពុជា  សំដៅធ្វើយ៉ាងណា ឱ្យគម្រោងវិនិយោគរបស់វិនិយោគិន ទទួលបានជោគជ័យ អនុលោមទៅតាមច្បាប់ និងលិខិតបទដ្ឋានគតិយុត្តិជាធរមានរបស់កម្ពុជា៕

ដោយៈ គង់ ហ្វីអូណា

        ភ្នំពេញៈ មន្រ្តីជាន់ខ្ពស់ក្រសួងសាធារណៈការ បានជួបពិភាក្សាការងារជាមួយគណៈប្រតិភូក្រុមហ៊ុន MANHATTAN INTERNATIONAL CO., LTD និងក្រុមហ៊ុន Surbana Jurong Group (SJ​ Singapore) លើកិច្ចសហប្រតិបត្តិការវិនិយោគ ក្នុងវិស័យដឹកជញ្ជូន និងភស្តុភារកម្ម។

កិច្ចប្រជុំកាលពីល្ងាចថ្ងៃទី៩ ខែមេសា ឆ្នាំ២០២៤ បានដឹកនាំដោយលោកជំទាវ កុយ សុដានី រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន បានទទួលជួបពិភាក្សាការងារជាមួយ គណៈប្រតិភូក្រុមហ៊ុន MANHATTAN INTERNATIONAL CO., LTD (MSEZ) ដឹកនាំដោយលោក Uknhar YANG Clement ជាប្រធានក្រុមប្រឹក្សាភិបាល និងលោក LIM Hong Kian ជានាយកប្រតិបត្តិក្រុមហ៊ុន SJ ដោយមានការអញ្ជើញចូលរួមពីថ្នាក់ដឹកនាំក្រសួង និងមន្ត្រីជំនាញពាក់ព័ន្ធ។

ជំនួបនេះធ្វើឡើងក្នុងគោលបំណង សិក្សាពិនិត្យឱកាសវិនិយោ​គលើវិស័យហេដ្ឋារចនាសម្ព័ន្ធ ដឹកជញ្ជូនដោយក្រុមហ៊ុន MANHATTAN INTERNATIONAL CO., LTD ដើម្បីតភ្ជាប់តំបន់សេដ្ឋកិច្ចពិសេស មេនហាតធេន ទៅបណ្តាញនៃដឹកជញ្ជូនក្នុងប្រទេសកម្ពុជា និងតំបន់ ក្នុងគោលដៅទាក់ទាញអ្នកវិនិយោគបន្ថែមទៀតលើការផលិតយានយន្ត ពិសេសការផលិតយានយន្តអគ្គីសនី។

គណៈប្រតិភូក្រុមហ៊ុន បានស្នើសុំការគាំទ្រពីក្រសួងសាធារណការ និងដឹកជញ្ជូន ក្នុងគម្រោងវិនិយោគលើវិស័យដឹកជញ្ជូន តាមផ្លូវគោក និងភស្តុភារកម្មនេះ៕

ដោយ: គង់់ លាងហួរ

ម៉ានីល: ប្រទេសហ្វីលីពីន អាចនឹងវ៉ាដាច់ប្រទេសសិង្ហបុរី នៅឆ្នាំ២០២៥ខាងមុខ ឆ្ពោះទៅក្លាយជាគោលដៅលេងល្បែងស៊ីសងដ៏ធំបំផុតទី២ របស់តំបន់អាស៊ី បន្ទាប់ពីទីក្រុងម៉ាកាវរបស់ប្រទេសចិន។នេះបើយោងតាមការចុះផ្សាយដោយសារពត៌មាន Bloomberg។

លោក Alejandro Tengco ប្រធាន និងជានាយកប្រតិបត្តិក្រុមហ៊ុន Pagcor ដែលជានិយតករ កំពុងប្រតិបត្តិការកាស៊ីណូរដ្ឋ បានអះអាងថា  រមណីយដ្ឋានកាស៊ីណូថ្មី ឈ្មោះ Bloombery Resorts Corp របស់មហាសេដ្ឋីហ្វីលីពីនលោក Enrique Razon គ្រោងនឹងបើកដំណើរការ នៅទីក្រុងម៉ានីលនៅឆ្នាំនេះ ខណៈដែលគម្រោងកាស៊ីណូចំនួន៨ទៀតកំពុងត្រូវបានគ្រោងទុក។

លោក Tengco បានមានប្រសាសន៍ឱ្យដឹងបន្តទៀតថា ក្រុមនិយតករ ក៏មានគម្រោងប្រកាសដាក់លក់កាស៊ីណូ ដែលគ្រប់គ្រងដោយរដ្ឋ មិនយូរជាងដើមឆ្នាំ២០២៦ផងដែរ។

លោក Tengco បានបញ្ជាក់ថា “ប្រសិនបើសិង្ហបុរីមិនពង្រីកខ្លួនទេ នោះពួកគេនឹងស្ថិតនៅទ្រឹង ហើយកុំភ្ញាក់ផ្អើល ប្រសិនបើឆ្នាំក្រោយ យើងនឹងវ៉ាដាច់ពួកគេ”។ លោក Tengco បានប៉ាន់ប្រមាណថា ប្រាក់ចំណូលសរុបពីការលេងល្បែងស៊ីសង ប្រចាំឆ្នាំរបស់សិង្ហបុរីនឹងមានទំហំប្រហែល៦ពាន់លានដុល្លារ។

ចំណែកឯប្រទេសហ្វីលីពីនរំពឹងថា ខ្លួននឹងអាចរកប្រាក់ចំណូលបានពីវិស័យល្បែងស៊ីសង សរុបចំនួន៣៣៦ពាន់លានប៉េសូ (ប្រហែ​ល៦,១ពាន់លានដុល្លារ) នៅឆ្នាំ២០២៤នេះ ដោយកើនឡើងពីកំណត់ត្រាកាលពីឆ្នាំមុនចំនួន២៨៥ពាន់លានប៉េសូ។

ទាក់ទិនទៅនឹងការលើកឡើងបែបនេះ របស់លោក Tengco អាជ្ញាធរនិយតកម្មល្បែងស៊ីសង របស់ប្រទេសសិង្ហបុរីបានឆ្លើយតបថា ខ្លួនមិនមានយោបល់ទេ នៅពេលដែលត្រូវបានសារពត៌មាន Bloomberg News សាកសួរទាក់ទងនឹងរឿងនេះ។

ទីក្រុងម៉ានីលកំពុងពឹងផ្អែក ទៅលើរមណីយដ្ឋានកាស៊ីណូរបស់ខ្លួន ដើម្បីជួយជំរុញការមកដល់របស់ភ្ញៀវទេសចរ។  នៅឆ្នាំនេះ ប្រ​ទេ​​សហ្វីលីពីន បានកំណត់គោលដៅទាក់ទាញ ភ្ញៀវទេសចរបរទេសចំនួន៧,៧លាននាក់ បន្ទាប់ពីទទួលបានចំនួន៥,៤៥លាននាក់ក្នុងឆ្នាំ២០២៣ ប៉ុន្តែគោលដៅនេះនៅតែទាប ជាងកម្រិតក្នុងឆ្នាំ២០១៩ ដែលមានភ្ញៀវទេសចរបរទេសចំនួន៨,២៦លាននាក់៕

ដោយ: គង់ លាងហួរ

បាងកក: យោងតាមប្រភព​សារព័ត៌មាន​The Nation បាន​រាយការណ៍ឱ្យដឹងថា ក្រសួងហិរញ្ញវត្ថុនៃប្រទេសថៃ គ្រោងស្នើដាក់ចេញវិធានការ ដើម្បីជំរុញវិស័យអចលនទ្រព្យ ទៅកាន់គណៈរដ្ឋមន្ត្រីរបស់ខ្លួននៅសប្តាហ៍នេះ។

ក្រសួងហិរញ្ញវត្ថុថៃ បង្ហាញសុទិដ្ឋនិយមថា វិធានការនោះ នឹងជំរុញឱ្យការលក់អចលនទ្រព្យ កើនឡើងក្នុងទំហំទឹកប្រាក់ជិត៨០០ពាន់លានបាត(ប្រហែល២១,៨៤ពាន់លានដុល្លារ) និងចូលរួមចំណែ កពង្រីកផលទុនជាតិសរុប(GDP)ក្នុងរង្វង់១,៥៨%។

ប្រភពដដែលបានបន្តថា ក្រសួងនឹងស្នើវិធានការពង្រីកលក្ខណៈវិនិច្ឆ័យ នៃការលើកទឹកចិត្តរបស់រដ្ឋាភិបាល ក្នុងការកាត់បន្ថយថ្លៃផ្ទេរអចលនទ្រព្យពី២% មកនៅត្រឹម១% និងថ្លៃបញ្ចាំ(mortgage fee)ពី១% មកនៅត្រឹម០,០១% ដោយវិធានការនេះគ្របដណ្តប់ទៅលើអចលនទ្រព្យ ដែលមានតម្លៃដល់៧លានបាត។

បច្ចុប្បន្ន​ វិធានការ​ខាងលើនេះ ​ត្រូវ​បានអនុវត្ត​ន៍ចំពោះ​តែអចល នទ្រព្យ​ទាំងឡាយណា ដែល​មាន​តម្លៃ​មិន​លើស​ពី៣លាន​បាត​ប៉ុណ្ណោះ​។

ប្រភពដដែលបានឱ្យដឹងទៀតថា ការកែសម្រួលវិធានការនេះនឹងជួយជំរុញការលក់ នៅក្នុងវិស័យអចលនទ្រព្យ និងជួយដល់អ្នកអភិវឌ្ឍន៍ ក្នុងការលក់ស្តុកអចលនទ្រព្យ ដែលមានតម្លៃចាប់ពី៣ លាន  ទៅ៧លានបាត ខណៈអចលនទ្រព្យទាំងនេះ គ្របដណ្តប់ប្រមាណ៨៦% នៃអចលនទ្រព្យ ដែលជាប់គាំងលក់មិនទាន់ចេញសរុបទាំងអស់នៅលើទីផ្សារ។

ប៉ុន្តែទោះបីជាយ៉ាងណាក្តី វិធានការលើកទឹកចិត្តនេះ អាចអនុវត្តន៍ចំពោះតែជនជាតិថៃប៉ុណ្ណោះ ដោយរំពឹងថា នឹងមានប្រសិទ្ធភាពរហូតដល់ដំណាច់ឆ្នាំ២០២៤នេះ។

ប្រភពដដែលបានបន្ថែមថា ក្រសួងហិរញ្ញវត្ថុក៏បានសម្របសម្រួ លជាមួយក្រសួងមហាផ្ទៃ ដើម្បីស្នើធ្វើវិសោធនកម្មបទប្បញ្ញត្តិមួយចំនួនទាក់ទងនឹងការទិញអចលនទ្រព្យ ដោយបុគ្គលក្នុងក្រុមងាយរងគ្រោះ ស្ថិតក្រោមគម្រោងដែលត្រូវទទួលបាន អត្ថប្រយោជន៍ពីរដ្ឋ ដោយអនុញ្ញាតឱ្យពួកគេ មានសិទ្ធិទទួលបានការកាត់បន្ថយថ្លៃផ្ទេរ និងថ្លៃកម្ចីទិញផ្ទះផងដែរ៕

ដោយៈ គង់ សូរិយា
ភ្នំពេញៈ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានលើកទឹកចិត្តដល់គូស្វាមីភរិយា ដែលមានលទ្ធភាពខាងសេដ្ឋកិច្ច គួរមានកូនច្រើន ដើម្បីចៀសវាងនូវហានិភ័យនាកង្វះកម្លាំង នាពេលអនាគត។

សម្តេចធិបតី ហ៊ុន ម៉ាណែត បានមានប្រសាសន៍បែបនេះ ក្នុងឱកាសដែលសម្តេចអញ្ជើញបិទ សន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងផែនការ នៅព្រឹកថ្ងៃទី៩ ខែមេសា ឆ្នាំ២០២៤។

ក្នុងឱកាសនោះសម្តេចធិបតី ហ៊ុន ម៉ាណែត បានថ្លែងថា គោលនយោបាយជាតិប្រជាជន២០១៦ -២០៣០ គឺឈរលើគោលការណ៍ ទទួលស្គាល់ និងគាំទ្រ ចំពោះសិទ្ធិរបស់គូស្វាមីភរិយា និងបុគ្គលទាំងអស់ ឱ្យមានសិទ្ធិជាមូលដ្ឋានក្នុងការសម្រេចចិត្តដោយសេរី និងដោយទទួលខុសត្រូវ លើចំនួនកូន និងការពន្យារកំណើត ហើយឱ្យមានលទ្ធភាពទទួលបាននូវព័ត៌មាន ការអប់រំ សេវា និង មធ្យោបាយ ដើម្បីធ្វើការសម្រេចចិត្តនេះ។
គ្រួសារប្រជាពលរដ្ឋកម្ពុជា មានកូនជាមធ្យម១,២ភាគរយ ដែលចំនួននេះ មានអត្រាស្មើគ្នានឹងប្រទេសឡាវ ប៉ុន្តែកម្ពុជាមានសក្តានុពល ក្នុងការបង្កើនកំនើនប្រជាសាស្រ្តជាង ដោយសារកម្ពុជាមានប្រជាជនច្រើនជាងប្រទេសឡាវ និងភាគច្រើនជាប្រជាជនវ័យក្មេង៕

        ដោយៈ គង់ សូរិយា

        ភ្នំពេញៈ សម្តេចតេជោ​ហ៊ុន សែនប្រធានព្រឹទ្ឋសភា និងជាប្រធា​នគណបក្សប្រជាជនកម្ពុជា បានឆ្លើយតប៦ចំណុច ទៅអ្នកដែលលើកឡើងទាំងល្ងិតល្ងង់ថា “ព្រែកជីកហ្វូណនតេជោ នឹងសម្រួលដល់​កងទ័ពជើងទឹកចិន ជិតព្រំដែនវៀតណាម”។

ការចេញមកឆ្លើយតបរបស់សម្តេចនាព្រឹកថ្ងៃទី៩ មេសានេះ បន្ទាប់ពីសម្ដេច បានឃើញការចុះផ្សាយ មួលបង្កាច់ជាបន្តបន្ទាប់អំពីវត្តមានកងទ័ពចិន នៅមូលដ្ឋានកងទ័ពជើងទឹករាម និងជាពិសេសថ្មីៗនេះ មានការប្រឌិតរឿង ព្រែកជីកតេជោហ្វូណនដែលលើកឡើងទាំងល្ងិតល្ងង់ថា ព្រែកជីកនេះនឹងសម្រួល ដល់កងទ័ពជើងទឹកចិន ជិតព្រំដែនវៀតណាមបន្ថែមទៀត ក្នុងពេលដែលព្រែកជីក កំពុងស្ថិតនៅក្នុងគំរោងនៅឡើយ។

ជុំវិញការចុះផ្សាយបែបប្រឌិតទាំងនេះ ត្រូវបានសម្ដេចតេជោ ឆ្លើយតបដោយការដាស់តឿន “ដល់មិត្តភក្ដិ ឬមិនមែនមិត្តភក្ដិរបស់សម្ដេចតេជោ លើចំណុចមួយចំនួន ក្នុងនោះសម្ដេចចោទសួរទៅកាន់អ្នកប្រឌិតព័ត៌មានទាំងនោះថា តើកម្ពុជាត្រូវការកងទ័ពចិន មកធ្វើអ្វី? និងដើម្បីអ្វី?”។

ក្រៅពីការចោទសួរ សម្ដេចតេជោហ៊ុន សែនបានរម្លឹកថា កម្ពុជា និងវៀតណាម ជាប្រទេសជិតខាងប្រកបដោយមិត្តភាព និងសហប្រតិបត្តិការល្អលើគ្រប់វិស័យ ហើយសម្ដេចក៏បញ្ជាក់ពីទំនាក់ទំនង ចិន និងវៀតណាម  ដែលមានទំនាក់ទំនងល្អ និងជាដៃគូយុទ្ធសាស្ត្រគ្រប់ជ្រុងជ្រោយ។

សម្ដេចតេជោ បានបន្ថែមការចោទសួរយ៉ាងដូច្នេះថា “តើកម្ពុជាឆោតល្ងង់ រហូតដល់យកកងទ័ពចិន មកនៅក្នុងប្រទេសរបស់ខ្លួន ដែលវាផ្ទុយជាមួយរដ្ឋធម្មនុញ្ញរបស់ខ្លួនឬ? និងតើចិនឆោតល្ងង់រហូតយកកងទ័ពខ្លួនមកនៅកម្ពុជា ដែលវាផ្ទុយជាមួយគោលការគោរពឯករាជ្យភាពកម្ពុជា ពីសំណាក់ចិនឬ?”។

មាត្រា៥៣ នៃរដ្ឋធម្មនុញ្ញ ហាមឃាត់មិនឲ្យកម្ពុជា មានមូលដ្ឋានយោធាបរទេស លើទឹកដីរបស់ខ្លួន។ នៅមានមាត្រាទី៥៥ បានចែងយ៉ាងច្បាស់ថា (សិន្ធិសញ្ញា និងកិច្ចព្រមព្រៀងទាំងឡាយណា ដែលមិនស្របនឹងឯករាជ្យ អធិបតេយ្យបូរណភាពទឹកដី អព្យាក្រឹតភាព និងឯកភាពជាតិរបស់ព្រះរាជាណាចក្រកម្ពុជា ត្រូវលុបចោល)។ ចំណុចនេះបានបញ្ជាក់ច្បាស់ថា គ្មានកិច្ចព្រមព្រៀងណាមួយអនុវត្តន៍បានទេ ប្រសិនវាមិនស្របជាមួយឯករាជ្យ អធិបតេយ្យភាពកម្ពុជា ព្រោះរដ្ឋធម្មនុញ្ញបានលុបចោលរួចទៅហើយ។ នេះជាការបន្ថែមរបស់សម្ដេចតេជោ។

សម្ដេចតេជោគូសបញ្ជាក់ទៀតថា “ព្រែកជីក តេជោហ្វូណន គឺជាផលប្រយោជន៍ សេដ្ឋកិច្ចសង្គមសុទ្ធសាធ ដែលព្រែកជីកនេះ នឹងជួយឲ្យកម្ពជាទិសនិរតី មានផ្លូវទឹកដឹកជញ្ជូន ទៅកាន់សមុទ្របន្ថែមលើផ្លូវដឹកជញ្ជូនតាមដងទន្លេរមេគង្គដែលមានស្រាប់”។សម្តេចបន្ថែមថា “ព្រែកជីកនេះ នឹងជួយឲ្យប្រជាជននៅតាមព្រែកនេះ មានទឹកប្រើប្រាស់សម្រាប់បង្កបង្កើនផល ជួយរំដោះទឹកជំនន់ក្នុងរដូវវស្សា ជួយបង្កើននៅផលត្រីទឹកសាប នៅតាមព្រែកនេះ។ល។”

សម្ដេចប្រធានព្រឹទ្ធសភាបានអះអាងបន្តថា ព្រែកជីកនេះមិនប៉ះពាល់ ដល់លំហូរទឹកនៃទន្លេមេគង្គនោះឡើយ ព្រោះម្យ៉ាងព្រែកនេះមិនតភ្ជាប់ពីទន្លេមេគង្គនោះទេ តែចេញពីទន្លេបាសាក់ និងម្យ៉ាងទៀតយើងមានទ្វារទឹកមិនឲ្យទឹកសាប ធ្លាក់ចូលទៅក្នុងសមុទ្រនោះឡើយ”។ សម្ដេចបានបញ្ជាក់ថា “កម្ពុជាអនុវត្តតាមកិច្ចព្រមព្រៀងមេគង្គ១៩៩៥”។

សម្ដេចបានប្រាប់ក្រុមប្រឌិតព័ត៌មាន គួរនាំគ្នាសួរទៅគណៈកម្មការទន្លេមេគង្គ ព្រោះកម្ពុជាបានជូនដំណឹង តាមកិច្ចព្រមព្រៀងនេះ ទៅគណៈកម្មការទន្លេមេគង្គរួចហើយ។

សម្ដេចតេជោក៏បានអំពាវនាវ កុំមួលបង្កាច់កម្ពុជា ក្នុងគោលបំ​ណ​ងប្រឆាំងចិន តាមយុទ្ធសាស្រ្តនៃភូមិសាស្ត្រនយោបាយ​។  សម្ដេ​ច​តេជោអះអាងថា កម្ពុជាក៏ចេះគិតពីប្រយោជន៍ជាតិរបស់ខ្លួន ដូចពួកអ្នកប្រឆាំង។

សម្ដេចតេជោ បានចំអកទៅកាន់ក្រុមប្រឆាំងល្ងិតល្ងង់ថា “ខួរក្បាលរបស់ពួកអ្នកឯងក៏មិនប្រាកដថា ពូកែជាងពួកខ្ញុំនោះទេ សំណា​ងត្រង់ពួកអ្នកឯង កើតក្នុងប្រទេសអ្នកមាន។ ឯពួកខ្ញុំកើតក្នុងប្រទេសក្រីក្រ ទើបពួកអ្នកឯងមើលងាយពួកខ្ញុំ”៕

ដោយ: គង់ លាងហួរ

តូក្យូ: នាយករដ្ឋមន្ត្រីជប៉ុន លោក Fumio Kishida បានថ្លែងប្រាប់សារពត៌មាន CNN ថា ភាពតានតឹងផ្នែកភូមិសាស្ត្រនយោបាយដែលកំពុងរីករាលដាល បានជំរុញពិភពលោក ឈានទៅដល់ចំណុចរបត់ប្រវត្តិសាស្ត្រ និងកំពុងបង្ខំឱ្យប្រទេសជប៉ុន ផ្លាស់ប្តូរឥរិយាបថការពារជាតិរបស់ខ្លួន។

លោក Kishida បានថ្លែងនៅក្នុងបទសម្ភាសន៍មួយនៅឯគេ​ហដ្ឋានឯកជនរបស់លោក នៅក្នុងទីក្រុងតូក្យូ ថា “ស្របពេលដែលយើងកំពុងមើលឃើញការឈ្លានពាន របស់ប្រទេសរុស្ស៊ីទៅលើអ៊ុយក្រែន ស្ថានភាពនៅតំបន់មជ្ឈិមបូព៌ា ក៏ដូចជា ស្ថានភាពនៅតំបន់អាស៊ីបូព៌ា យើងត្រូវប្រឈមមុខ នឹងចំណុចរបត់ប្រវត្តិសាស្ត្រមួយ”។

លោកបានបន្តថា នោះហើយជាមូលហេតុ ដែលជប៉ុនបានធ្វើការសម្រេចចិត្តពង្រឹង សមត្ថភាពការពារជាមូលដ្ឋានរបស់ខ្លួន ហើយយើងបានផ្លាស់ប្តូរ គោលនយោបាយយ៉ាងខ្លាំងក្លា ដើម្បីពង្រឹងសន្តិសុខរបស់ប្រទេសជប៉ុន។នៅចំពោះមុខបញ្ហាប្រឈមផ្នែកសន្តិសុខ លោកនាយករដ្ឋមន្ត្រីបានសង្កត់ធ្ងន់ថា “សម្ព័ន្ធភាពជប៉ុន- សហរដ្ឋអាមេរិកកាន់តែមានសារៈសំខាន់ ដោយខ្ញុំសង្ឃឹមថា យើងនឹងទទួលបាននូវការគាំទ្រទ្វេរភាគីពីទីក្រុងវ៉ាស៊ីនតោន”។

លោក Kishida បានធ្វើការកត់សម្គាល់បែបនេះ ក្នុងរយៈពេលត្រឹមតែប៉ុន្មានថ្ងៃប៉ុណ្ណោះ មុនពេលបើកកិច្ចប្រជុំជាមួយ លោកប្រធា​នាធិបតីអាមេរិក ចូ បៃដិន នៅថ្ងៃពុធសប្តាហ៍នេះ ក្នុងទីក្រុងវ៉ាស៊ីនតោន។

ជាមួយគ្នានេះ លោកគ្រោងនឹងថ្លែងសុន្ទរកថា នៅក្នុងសម័យប្រជុំរួមនៃសភា និងចូលរួមក្នុងកិច្ចប្រជុំកំពូលត្រីភាគី លើកដំបូងរវាងប្រទេសជប៉ុន សហរដ្ឋអាមេរិក និងប្រទេសហ្វីលីពីន។កិច្ចប្រជុំកំពូលរវាងលោក Kishida និងលោក បៃដិន ត្រូវបានទីក្រុងវ៉ាស៊ីនតោន ចាត់ទុកជាឱកាសជាប្រវត្តិសាស្ត្រ សម្រាប់ប្រទេសទាំង២ ដើម្បីធ្វើទំនើបកម្មសម្ព័ន្ធភាពទ្វេរភាគី ខណៈសម្ព័ន្ធមិត្តទាំង២ កំពុងប្រឈមមុខ នឹងការគំរាមកំហែងនៅក្នុងតំបន់ រាប់ចាប់ពីការសាកល្បងអាវុធនុយក្លេអ៊ែរ របស់ប្រទេសកូរ៉េខាងជើង ទំនាក់ទំនងដ៏តានតឹងជាមួយរុស្ស៊ី និងការវាតទីរបស់ប្រទេសចិន នៅសមុទ្រចិនខាងត្បូង និងការគំរាមកំហែងចំពោះកោះតៃវ៉ាន់។ភាពជាដៃគូជាមួយប្រទេសជប៉ុន គឺជាចំណុចកណ្តាលនៃយុទ្ធសាស្រ្តរបស់សហរដ្ឋអាមេរិក នៅក្នុងតំបន់ឥណ្ឌូប៉ាស៊ីហ្វិកជាណាស់យូរមកហើយ ប៉ុន្តែទំនាក់ទំនងការពារជាតិ រវាងប្រទេសមហាអំណាចទាំង២នេះ ទើបតែត្រូវបានពង្រីក នៅក្រោមអាណត្តិដឹកនាំរបស់លោកនាយករដ្ឋមន្ត្រី Fumio Kishida ប៉ុណ្ណោះ៕ប្រភព:CNN៕

        ដោយៈ គង់ ម៉ាលីនណា

        ភ្នំពេញៈ ថ្នាក់ដឹកនាំវិទ្យាស្ថានយុទ្ធសាស្រ្ត KSI គ្រោងរៀបចំកម្មវិធី កិច្ចប្រជុំកំពូលសាកលស្តីពីបច្ចេកវិទ្យា និងសេដ្ឋកិច្ចចិន និងកិច្ចប្រជុំកំពូលស្តីពីសហគ្រិនភាព និងសេដ្ឋកិច្ចអាស៊ី​ ឆ្នាំ​២០២៤នៅកម្ពុជា។​

ព័ត៌មាននេះ ត្រូវបានលើកឡើងក្នុងពេលសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានអនុញ្ញាតឱ្យលោក តាន់ ស្រ៊ី មីសែល យ៉ាវ (Tan Sri Michael Yeoh) ប្រធានវិទ្យាស្ថានយុទ្ធសាស្រ្ត KSI ប្រចាំតំបន់អាស៊ីប៉ាស៊ីហ្វិក ចូលជួបសម្តែងការគួរសម និងពិភាក្សាការងារ។

ក្នុងឱកាសនៃជំនួប លោកប្រធានវិទ្យាស្ថាន បានថ្លែងអំណរគុណយ៉ាងជ្រាលជ្រៅចំពោះ សម្តេចធិបតី ដោយបានកោតសរសើរ និងវាយតម្លៃខ្ពស់ចំពោះការអភិវឌ្ឍរីកចម្រើន លើគ្រប់វិស័យរបស់កម្ពុជារហូតដល់ពេលបច្ចុប្បន្ននេះ ហើយលោកមានជំនឿជាក់ថា ក្រោមការដឹកនាំរបស់សម្តេចធិបតី កម្ពុជា នឹងមានការអភិវឌ្ឍ និងរីកចម្រើនខ្លាំងក្លាបន្ថែមទៀត។

លោកប្រធានវិទ្យាស្ថាន ក៏បានគោរពជម្រាបជូនសម្តេចធិបតី អំពីការពិនិត្យលទ្ធភាព ក្នុងការពង្រីកការវិនិយោគនៅកម្ពុជា ជាពិសេសលើវិស័យកសិកម្ម ថាមពលជីវម៉ាស បច្ចេកវិទ្យាហិរញ្ញវត្ថុ និងឌីជីថល ព្រមទាំងការបង្កើតនូវ “World Digital Chamber” ។ បន្ថែមលើនេះ លោកប្រធានវិទ្យាស្ថាន បានគោរពជម្រាបជូនសម្តេចធីបតី អំពីការបង្កើត ASEAN Economic Club នៅកម្ពុជា ហើយក្នុងឆ្នាំនេះ វិទ្យាស្ថានយុទ្ធសាស្រ្ត KSI បានផ្តួចផ្តើមគំនិតស្នើសុំឱ្យព្រះរាជាណាចក្រកម្ពុជាធ្វើជាម្ចាស់ផ្ទះ ក្នុងការរៀបចំព្រឹត្តការណ៍ចំនួន២។

កិច្ចប្រជុំទាំងពីររួមមាន កិច្ចប្រជុំកំពូលសាកលស្តីពីបច្ចេកវិទ្យា និងសេដ្ឋកិច្ចចិន (Global Chinese Economic & Technology Summit-GCET) 2024 និង កិច្ចប្រជុំកំពូលស្តីពីសហគ្រិនភាព និង សេដ្ឋកិច្ចអាស៊ី (Asia Economic & Entrepreneurship Summit -AEES) 2024 ។ កម្មវិធីទាំង២នេះ គឺជាឱកាសក្នុងការទាក់ទាញវិនិយោគិនក្នុងតំបន់អាស៊ាន និងជុំវិញពិភពលោក អំពីឱកាសវិនិយោគនៅកម្ពុជា។ ជាមួយគ្នានេះ លោកប្រធានវិទ្យាស្ថាន ក៏បានគោរពអញ្ជើញសម្តេចនាយករដ្ឋមន្ត្រី ធ្វើជាអធិបតី និងថ្លែងសុន្ទរកថាគន្លឹះ ក្នុងកម្មវិធីទាំង២នេះផងដែរ។

ជាការឆ្លើយតប សម្តេចធិបតីហ៊ុន ម៉ាណែតបានស្វាគមន៍ ប្រកបដោយក្តីរីករាយ ដែលបានជួបពិភាក្សាការងារជាមួយលោកប្រធានវិទ្យាស្ថាន និងសហការី ព្រមទាំងបានសម្តែងក្ដីសោមនស្ស អំពីការរៀបចំកម្មវិធីទាំងពីរនេះ ដោយសម្តេចធិបតី បានណែនាំឱ្យវិទ្យាស្ថានយុទ្ធសាស្រ្ត KSI ធ្វើការពិភាក្សាជាមួយក្រសួង-ស្ថាប័នពាក់ព័ន្ធរបស់កម្ពុជាបន្ថែមទៀត។

សម្តេចធិបតី បានទទួលយកការអញ្ជើញ របស់លោកប្រធានវិទ្យាស្ថាន ក្នុងការចូលរួមជាអធិបតី និងថ្លែងសុន្ទរកថាគន្លឹះ ក្នុងកម្មវិធីទាំងពីរនេះ។ ពាក់ព័ន្ធនឹងការជំរុញការវិនិយោគ លើបច្ចេកវិទ្យាហិរញ្ញវត្ថុ និងវិស័យឌីជីថល សម្តេចធិបតី បានគូសបញ្ជាក់ផងដែរថា រាជរដ្ឋាភិបាលកម្ពុជា ដែលមានធនាគារជាតិនៃកម្ពុជា ក្រសួងប្រៃស​ណីយ៍និងទូរគមនាគមន៍ និងក្រសួង-ស្ថាប័នពាក់ព័ន្ធ បាននិងកំពុងខិតខំជំរុញការអភិវឌ្ឍបច្ចេកវិទ្យា ដើម្បីធ្វើសមាហរណកម្មសេដ្ឋកិច្ចកម្ពុជាទៅជាសេដ្ឋកិច្ចឌីជីថល។

បន្ថែមលើនេះ សម្តេចធិបតី ក៏បានបញ្ជាក់ផងដែរថា រាជរដ្ឋាភិបាលអាណត្តិទី៧ នឹងបន្តការអភិវឌ្ឍគោលនយោបាយ ដោយឈរលើស្មារតីសង្គតិភាព និងនិរន្តរភាព ដើម្បីសម្រេចបាននូវចក្ខុវិស័យឆ្នាំ២០៥០ ក្លាយជាប្រទេសមានចំណូលខ្ពស់ ដោយផ្តោតលើការអភិវឌ្ឍមូលធនមនុស្ស ដែលជាលក្ខខណ្ឌចាំបាច់មិនអាចខ្វះបានសម្រាប់ជំរុញពិពិធកម្ម និងកំណើនសេដ្ឋកិច្ចប្រកបដោយភាពធន់ ចីរភាព និងបរិយាប័ន្ន៕