ដោយ: គង់ លាងហួរ

អន្តរជាតិ: សារពត៌មាន The Sydney Morning Herald មានមូលដ្ឋាននៅប្រទេសអូស្ត្រាលី បានចុះផ្សាយនូវអត្ថបទមួយដោ​យដោយចាត់ទុកកម្ពុជា ជាទីតាំងថ្មីនៅក្នុងតំបន់អាស៊ីអាគ្នេយ៍ ដែលកំពុងទាក់ទាញចិត្តភ្ញៀវទេសចរអន្តរជាតិ មកពីបណ្តាប្រទេសនៅជុំវិញពិភពលោក។

អត្ថបទនោះត្រូវបានចុះផ្សាយ ដោយដាក់ចំណងជើងជាភាសាអង់គ្លេសថា “Forget Thailand and Vietnam: South-East Asia’s enticing new travel frontier”។

អត្ថបទដដែលសរសេរបន្តថា កម្ពុជាគឺជាប្រទេសមួយ ដែលកំពុងស្គាល់ការអភិវឌ្ឍយ៉ាងឆាប់រហ័ស ស្របពេលដែលសំណង់អគារខ្ពស់ៗកប់ពពក ​​​កំពុងតែរីកដុះដាលដូចផ្សិត រួមទាំងមានអា​កាសយានដ្ឋានថ្មីៗ ក៏ដូចជាហេដ្ឋារចនាសម្ព័ន្ធជាច្រើនផ្សេងទៀតផងដែរ។

អត្ថបទទាក់ទងនឹងវិស័យទេសចរណ៍របស់សារពត៌មាន The Sydney Morning Herald ត្រូវបានចុះផ្សាយ ដោយដកស្រង់ចេញពីបទសម្ភាសន៍រវាងអ្នកនិពន្ធស្ត្រីម្នាក់ឈ្មោះ Julie Miller ជាមួយបុរសម្នាក់ឈ្មោះ ជា សារ៉ន (Sarorn Chea) ដែលជាក្រុមការងារផ្នែកបដិសណ្ឋារកិច្ច នៅរមណីយដ្ឋាន Shinta Mani Wild។

នៅក្នុងបទសម្ភាសន៍នោះ បានគូសរំលេចពីភាពសម្បូរបែបនៅក្នុងប្រទេសកម្ពុជា និងចាត់ទុកកម្ពុជា គឺជាតំបន់ទេសចរណ៍ថ្មី ដែលកំពុងមានភាពទាក់ទាញខ្លាំង នៅក្នុងតំបន់អាស៊ីអាគ្នេយ៍ នាពេលបច្ចុប្បន្ន ។

តាមរយៈបទសម្ភាសន៍នោះ លោក ជា សារ៉ន បានរៀបរាប់ថា “ក្នុងឆ្នាំ ២០០៩ ខ្ញុំធ្លាប់មកលេងរាជធានីភ្នំពេញ ប៉ុន្តែពេលនោះទីក្រុងភ្នំពេញ ស្ថិតក្នុងស្ថានភាពក្រីក្រនៅឡើយ បន្ទាប់ពីងើបចេញពីសង្គ្រាមជាច្រើនទសវត្សរ៍”។

លោកបន្តថា ប៉ុន្តែសព្វថ្ងៃនេះ កម្ពុជាពោរពេញទៅដោយយុវជនវ័យក្មេងពេញសមត្ថភាពជាច្រើន បូករួមទាំងភាពសុទិដ្ឋិនិយម និងការប្តេជ្ញាចិត្តខ្ពស់ ដែលជំរុញដោយឧស្សាហកម្មទេសចរណ៍ ហើយជាក់ស្តែង កាលពីឆ្នាំ២០២២កន្លងទៅ កម្ពុជារកបានប្រាក់ចំណូលសរុប តាមរយៈវិស័យទេសចរណ៍ចំនួន១,១៤ពាន់លានដុល្លារ និងបានបង្កើតការងារ បានប្រមាណ១២,៤ភាគរយ នៃការងារសរុបនៅក្នុងស្រុក”។

អត្ថបទដដែលសរសេរទៀតថា មជ្ឈដ្ឋាននានាជុំវិញពិភពលោក បានចាត់ទុកថា ក្រៅពីប្រទេសថៃ និងវៀតណាម កម្ពុជាគឺជាទីតាំងថ្មីបំផុតមួយ ដែលមានសក្តានុពលទាក់ទាញភ្ញៀវទេសចរ មកពីគ្រប់ទិសទី ស្របពេលដែលប្រណីតភាពនៅកម្ពុជា កាន់តែមានភាពទាក់ទាញ។

ពិសេសជាងនេះទៅទៀត អត្ថបទខាងលើ បានណែនាំកញ្ចប់សេវាកម្មទេសចរណ៍លំដាប់ Ultimate Luxury Tour of Cambodia ដែលមានទីតាំងប្រណីតៗបំផុតចំនួន៤ រួមមាន រមណីយដ្ឋាន Shinta Mani Angkor រមណីយដ្ឋាន Shinta Mani Wild សណ្ឋាគារ Rosewood Phnom Penh និងរមណីយដ្ឋាន Six Senses Krabey Island នៅក្នុងដំណើរកម្សាន្តរយៈពេល១២យប់ ជាមួយនឹងតំបន់ប៉ូលទេសចរណ៍ចំនួន៤ នៅកម្ពុជា រួមមានដូចជា ប៉ូលទី១៖ តំបន់ប្រាសាទបុរាណ ​នៅក្នុងខេត្តសៀមរាប ដែលជាគោលដៅទេសចរណ៍ដ៏លេចធ្លោ និងមានសក្ដានុពលខ្ពស់បំផុតនៅកម្ពុជា។

ប៉ូលទី២៖ ទិដ្ឋភាពរាជធានីភ្នំពេញ ដូចជា ចំណុចប្រសព្វរវាងទន្លេចតុមុខនិងទន្លេសាប សំណង់បែបប្រពៃណី ព្រះបរមរាជវាំង វត្តអារាម សំណង់អគារខ្ពស់ៗ ភោជនីយដ្ឋាន Sky Bar និងហេដ្ឋារចនាសម្ព័ន្ធជាច្រើនផ្សេងទៀត ។

ប៉ូលទី៣៖ រមណីយដ្ឋានអេកូឡូស៊ី នៅក្នុងតំបន់ព្រៃឈើអភិរក្ស ស្ថិតនៅភាគអាគ្នេយ៍នៃប្រទេសកម្ពុជា ។

រីឯ ប៉ូលទី៤គឺ៖ រមណីយដ្ឋាន Six Senses ស្ថិតលើកោះក្របី ខេត្តព្រះសីហនុ ដែលជាតំបន់រមណីយដ្ឋានអេកូឡូស៊ី តំបន់អភិរក្សបក្សីនិងមេអំបៅ តំបន់ការពារថ្មប៉ប្រះទឹក និងតំបន់គ្មានកាកសំណល់ផ្លាស្ទិក ដោយអាចគយគន់ទេសភាពខេត្តព្រះសីហនុពីចម្ងាយ៕

ដោយ: គង់ លាងហួរ

សេអ៊ូល: តំបន់ Myeong-dong ស្ថិតនៅចំកណ្តាលទីក្រុងសេអ៊ូល ត្រូវបានគេទទួលស្គាល់ និងវាយតម្លៃថា ជាតំបន់លក់រាយថ្លៃជាងគេបំផុត របស់ប្រទេសកូរ៉េខាងត្បូងជាយូរមកហើយ។

ប៉ុន្តែស្រាប់តែ ការស្ទង់មតិថ្មីៗនេះបានបង្ហាញថា កាលពីឆ្នាំមុន តំបន់ដើរទិញទំនិញដ៏ពេញនិយម សម្រាប់ភ្ញៀវទេសចរខាងលើនេះ ត្រូវបានវ៉ាដាច់ដោយតំបន់ Bukchang-dong ដែលគេមិននឹកស្មានដល់ បើគិតពីថ្លៃជួលហាង។

តំបន់ពាណិជ្ជកម្មលក់រាយ Bukchang-dong ស្ថិតនៅចន្លោះអគារ Bank of Korea ស្ថានីយ៍ City Hall និងស្ថានីយ៍ Hoehyeon ហើយតំបន់នេះ ឈរនៅលំដាប់កំពូលតារាង វិភាគទីផ្សារលក់រាយប្រចាំឆ្នាំ២០២៣ ដែលធ្វើឡើងដោយរដ្ឋបាលទីក្រុងសេអ៊ូល ខណៈ ការជួលហាងប្រចាំខែនៅទីនេះ មានតម្លៃជាមធ្យម១៨ម៉ឺនវ៉ុន (១៣៥ដុល្លារ) ក្នុងមួយម៉ែត្រការ៉េ។

ហាងដែលស្ថិតនៅលើផ្លូវដើរទិញទំនិញ ដ៏សំខាន់របស់តំបន់ Myeong-dong នៅសង្កាត់ Jung-gu មានតម្លៃជួលជាមធ្យមប្រចាំខែចំនួន១៧៣.៧០០វ៉ុនក្នុងមួយម៉ែត្រការ៉េ បន្ទាប់មកគឺតំបន់ស្ថានីយ៍ Myeong-dong ដែលមានតម្លៃជួលជាមធ្យមប្រចាំខែចំនួន១៥៣.៦០០វ៉ុនក្នុងមួយម៉ែត្រការ៉េ។

ថ្លៃជួលហាងជាមធ្យមប្រចាំខែនៅទីក្រុងសេអ៊ូល បានឈានដល់៧៤.៩០០វ៉ុន ក្នុងមួយម៉ែត្រការ៉េ កាលពីឆ្នាំ២០២៣ កើនឡើង៧,៨ភាគរយ បើធៀបនឹងតួលេខកាលពីឆ្នាំ២០២២ ដែលមានថ្លៃជួលចំនួន៦៩.៥០០វ៉ុន។

កាលពីឆ្នាំ២០២២ ហាងស្ថិតនៅតំបន់លក់រាយ Myeong-dong មានថ្លៃជួលខ្ពស់ជាងគេបំផុត ចំនួន២០៥.៥០០វ៉ុន ក្នុងមួយម៉ែត្រការ៉េ បន្ទាប់មកគឺហាងនៅតំបន់ស្ថានីយ៍ Gangnam មានថ្លៃជួលចំនួន១៤៣.៦០០វ៉ុន និងហាងនៅតំបន់ Gwanghwamun ក្នុងសង្កាត់  Jongno មានថ្លៃជួល១១២.៧០០វ៉ុន។

ទោះជាយ៉ាងណាក្តី តំបន់ Bukchang-dong មិនបានជាប់ក្នុងចំណោមចំណាត់ថ្នាក់កំពូលទាំង៥  (Top5) ក្នុងឆ្នាំ២០២២នោះទេ ដោយកត់ត្រា ថ្លៃជួលជាមធ្យមប្រចាំខែចំនួន៦៦.១០០វ៉ុន។ ប៉ុន្តែ ស្រាប់តែ ពេលនេះតំបន់ Bukchang-dong បានហក់ឡើងមកកាន់តំណែងលេខ១ ក្នុងនាមជាតំបន់លក់រាយ ដែលថ្លៃជាងគេបំផុតនៅទីក្រុងសេអ៊ូល៕

ដោយៈ គង់ សូរិយា

        ភ្នំពេញៈ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានចាត់ទុកយុវជន គឺជាតួអង្គ​ស្នូលក្នុងការរក្សាការពាររាល់សមិទ្ធផលជាតិ ដែលកសាងដោយលំបាក របស់ថ្នាក់ដឹកនាំជាតិជាន់មុន។

សម្តេចបន្ថែមថា “មិនត្រឹមតែរក្សាសមិទ្ធផលចាស់ប៉ុណ្ណោះទេ យុវជន ក៏ជាតួអង្គស្នូលក្នុងការកសាងសមិទ្ធផលថ្មីៗ បន្ថែម​ទៀត សម្រាប់ជាតិមាតុភូមិផងដែរ”។

សម្តេចធិបតីនាយករដ្ឋមន្ត្រី បានគូសរំលេចបែបនេះក្នុងពេលអញ្ជើញបិទកិច្ចប្រជុំ គណៈកម្មាធិការ​កណ្តាល​​ របស់សហភាពសហព័ន្ធយុវជនកម្ពុជា (ស.ស.យ.ក) នាព្រឹកថ្ងៃព្រហស្បតិ៍ ទី១៤ ខែមីនា ឆ្នាំ២០២៤នេះ។

សហភាពសហព័ន្ធយុវជនកម្ពុជា គឺជាអង្គការយុវជនបម្រើកិច្ចការមហាជនធំជាងគេនៅកម្ពុជា ដែលបាន​រួមចំណែកបំពេញបេស​កកម្ម និងភារកិច្ចលើកិច្ចការសង្គម មនុស្សធម៌ និងដើម្បីបុព្វហេតុជាតិ មាតុភូមិ តាមរយៈការងារស្ម័គ្រចិត្ត ដោយមិនប្រកាន់និន្នាការនយោ​បាយ វណ្ណៈ សាសនា នោះឡើយ។

ជាមួយគ្នានេះ សម្តេចធិបតី ហ៊ុន ម៉ាណែត បានរំឭកដល់គុណូបការៈ ប្រកបដោយក្តី​កតញ្ញូ​ដ៏ជ្រាល​ជ្រៅបំផុត ជូនចំពោះអតីតយុវជនកម្ពុជា ដែលបានស្ម័គ្រចិត្តតស៊ូលះបង់ជីវិត សាច់ស្រស់ ឈាមស្រស់ ដោយបានចាប់ផ្តើមចលនាតស៊ូរំដោះជាតិ ដើម្បីសង្រ្គោះប្រទេសកម្ពុជាឱ្យផុតពីជ្រោះ​មរណៈ ហើយបានបន្តការពារ ស្តារ និងអភិវឌ្ឍប្រទេសរហូតមកដល់ពេលបច្ចុប្បន្ន។

សម្តេចធិបតីបញ្ជាក់ថា “យុវជនបាន និងកំពុងដើរតួនាទីស្នូល និងចូលរួមក្នុង​បុ​ព្វ​ហេតុជាតិ​មាតុភូមិ ដើម្បីអភិវឌ្ឍប្រទេសជាតិឱ្យរីកចម្រើនលើគ្រប់វិស័យ តាមរយៈការបន្តថែរក្សាសមិទ្ធ​ផល​​យុវជនជំនាន់​មុនបន្សល់ទុក កសាងសមិទ្ធផលវិជ្ជមានបន្ថែម ព្រមទាំងរៀ​ប​ចំ​មូលដ្ឋានរឹងមាំ សម្រាប់​ជំនាន់ក្រោយទៀត”។

សម្តេចបានរម្លឹកថា “សហភាពសហព័ន្ធយុវជនកម្ពុជា មានភារកិច្ចចម្បងក្នុងការបង្កើតវិធីសាស្ត្រ ទាក់ទាញសមានចិត្ត ភាព​ច្នៃ​ប្រឌិត និងបត់បែន ដើម្បីអាចបំផុសយុវជនឱ្យចូលរួម ក្នុងបុព្វហេតុជាតិ ដោយកាន់ដៃគ្នាដើរលើ​វិថីនៃ​សន្តិ​ភាព ឆ្ពោះទៅរកការអភិវឌ្ឍរីកចម្រើន ក្នុងស្មារតីសាមគ្គីភាពរឹងមាំ នៃមហាគ្រួសារយុវជនកម្ពុជា ព្រម​ទាំងកសាងសង្គមទំនើបមួយដ៏រឹងមាំ មានឯករាជ្យ សន្តិភាព សេរីភាព សមភាព ប្រជាធិបតេយ្យ និងមាន​ផលិតភាពការងារខ្ពស់ ដែលជាគន្លឹះក្នុងការពង្រឹងខឿនសេដ្ឋកិច្ចជាតិ”។

សម្តេចធិបតីប្រធានកិត្តិយស សហភាពសហព័ន្ធយុវជនកម្ពុជា ក៏បានណែនាំដល់ សហភាពសហព័ន្ធ​យុវ​ជន​កម្ពុជា ត្រូវបន្តស្មារតី ឆន្ទៈ និងសកម្ម​ភាព​​ ដែលជាមូលដ្ឋានប្រកបដោយឥទ្ធិពល ជាវិជ្ជមាន ក្នុងការ​អប់រំផ្នត់គំនិត និងឥរិយាបថ​របស់យុវជននៅគ្រប់មជ្ឈដ្ឋានឱ្យចូលរួមបន្តពូនជ្រំ និងកសាងប្រទេសជាតិ ស្រឡាញ់ទឹកដី និងមាតុ​ភូមិ តាមរយៈការចូលរួមជាមួយរាជរដ្ឋាភិបាល ក្នុងការអនុវត្តយុទ្ធសាស្រ្តបញ្ច​កោណ‐ដំណាក់កាលទី១ ដោយរួមបញ្ចូលនូវ “កម្មវិធីគោលនយោបាយ” និង “វិធានការគន្លឹះ” សំខាន់ៗ ដែលបានកំណត់ទិសដៅ និងជាអាទិភាព ក្នុងការដឹកនាំ សំដៅឈានឆ្ពោះទៅដល់ការ​សម្រេច​ចក្ខុវិស័យកម្ពុជាឆ្នាំ២០៥០ ជាប្រទេសចំណូលខ្ពស់។

សម្តេចមហាបវរធិបតី ក៏បានកោតសរសើរ ចំពោះកិច្ចខិតខំប្រឹងប្រែង យកអស់ពីកម្លាំងកាយចិត្ត បញ្ញា​ស្មា​រ​តី និងធនធានរបស់ថ្នាក់ដឹកនាំ ស.ស.យ.ក. គ្រប់លំដាប់ថ្នាក់ ព្រមទាំងសមាជិក សមាជិកាគ្រប់រូប ចាប់តាំងពីថ្នាក់កណ្ដាលរហូតដល់ថ្នាក់មូលដ្ឋាន ដែលបានចូលរួមអនុវត្តន៍ បានយ៉ាងពេញ​លេញ ប្រកប​ដោយប្រសិទ្ធភាពនូវ”ផែនការយុទ្ធសាស្ត្រយុវជន ក្នុងបុព្វហេតុជាតិមាតុភូមិឆ្នាំ ២០២៣-២០២៨”។

សម្តេចនាយករដ្ឋមន្ត្រី ចាត់ទុកសកម្មភាពនេះ ពិតជាបានឆ្លុះបញ្ចាំងនូវស្មារតីសាមគ្គីឯកភាពគ្នាដ៏រឹងមាំ ប្រកបដោយភាតរភាព រួមគិត រួមធ្វើ រួមទទួលខុសត្រូវ និងមានការបេ្តជ្ញាចិត្តខ្ពស់ ក្នុងការបន្តជ្រោង​ខ្ពស់​ទង់​ចលនាយុវជន ក្នុងបុព្វហេតុជាតិ មាតុភូមិ និងប្រជាជន៕

ដោយ: គង់ លាងហួរ

បាងកក: អាជ្ញាធរអចលនទ្រព្យឧស្សាហកម្មថៃ (IEAT) គ្រោងនឹងបញ្ចប់ការសិក្សា លទ្ធភាពសាងសង់គម្រោងអចលនទ្រព្យ បែបឧស្សាហកម្ម បញ្ចូលទៅក្នុងគម្រោងខ្នាតយក្ស Land Bridge នៅចុងឆ្នាំ២០២៤នេះ។

គម្រោង​អចលនទ្រព្យ​បែបឧស្សាហកម្ម ​នឹង​ក្លាយ​ជា​ផ្នែក​មួយ​នៃ​គម្រោង​​ Land Bridge របស់​រដ្ឋាភិបាល ដែលមានទីតាំងស្ថិតនៅ​ភាគ​ខាង​ត្បូង​ប្រទេស​ថៃ ដែលមានតម្លៃ១ទ្រីលាន​បាត​​(ជាង២៨ពាន់លានដុល្លារ)។

គម្រោងខ្នាតធំនេះ មានគោលបំណងសាងសង់ ផ្លូវដឹកជញ្ជូនតភ្ជាប់ពីឆ្នេរសមុទ្រ Andaman ទៅកាន់ឈូងសមុទ្រថៃ ដែលនឹងបង្កើតផ្លូវកាត់រវាងមហាសមុទ្រឥណ្ឌា និងមហាសមុទ្រប៉ាស៊ីហ្វិក បង្កើនប្រសិទ្ធភាព នៃការដឹកជញ្ជូនទំនិញសកល និងកាត់បន្ថយការពឹងផ្អែកលើច្រកសមុទ្រម៉ាឡាកា។

លោក Veeris Ammarapala ប្រធានអាជ្ញាធរអចលនទ្រព្យឧស្សាហកម្មថៃ (IEAT) បានលើកឡើងថា “យើងកំពុងសិក្សាពីការបង្កើតតំបន់អចលនទ្រព្យឧស្សាហកម្ម នៅក្នុងគម្រោងនេះ ដើម្បីសម្រួលដល់ឧស្សាហកម្មដែលពាក់ព័ន្ធ ខណៈរដ្ឋាភិបាលកំពុងទាក់ទាញអ្នកវិនិយោគទាំងក្នុង និងក្រៅប្រទេសឱ្យចូលរួមវិនិយោគ ក្នុងគម្រោងនេះ”។

លោកបានបញ្ជាក់ថា ការសិក្សារបស់អាជ្ញាធរ IEAT ក៏នឹងរួមបញ្ចូលផងដែរ នូវគម្រោងហេដ្ឋារចនាសម្ព័ន្ធផ្សេងទៀត នៅក្នុងតំបន់គម្រោង Land Bridge ដូចជា កំពង់ផែសមុទ្រ ផ្លូវហាយវេ ផ្លូវរថភ្លើង និងស្ថានីយ៍ជាដើម។

គម្រោង​ Land Bridge ត្រូវបាន​​អនុម័ត ដោយសភា​ថៃ កាលពីថ្ងៃ​ទី​១៥ ខែ​កុម្ភៈ បន្ទាប់​ពី​មានការពិភាក្សា​ដេញដោលគ្នា យ៉ាងក្តៅគគុកនៅក្នុងសភា។  ទោះជាយ៉ាងនេះក្តី គម្រោងនេះបន្តប្រឈមមុខនឹងមតិប្រឆាំង ដោយសារការព្រួយបារម្ភអំពីផលចំណេញ និងផលប៉ះពាល់បរិស្ថាន៕

ដោយ: គង់ លាងហួរ

អន្តរជាតិ: អត្រាស្ទុះងើបឡើងវិញ នៃវិស័យទេសចរណ៍របស់កម្ពុជា មានកម្រិតខ្ពស់ជាងគេបំផុតនៅក្នុងតំបន់អាស៊ាន។ នេះបើយោងតាមរបាយការណ៍ របស់ក្រុមហ៊ុនស្រាវជ្រាវទេសចរណ៍ Outbox Consulting ។

របាយការណ៍បង្ហាញថា ក្នុងឆ្នាំ២០២៣ វិស័យទេសចរណ៍នៅកម្ពុជា បានស្ទុះងើបឡើងវិញដល់អត្រា៨២,៥ភាគរយ នៃកម្រិតមុនផ្ទុះជំងឺរាតត្បាតកូវីដ-១៩ តាមពីក្រោយប្រទេសម៉ាឡេស៊ី ជាមួយនឹងអត្រា៧៧,២ភាគរយ នៃកម្រិតមុនផ្ទុះជំងឺរាតត្បាត។

របាយការណ៍របស់ក្រុមហ៊ុនស្រាវជ្រាវទេសចរណ៍ Outbox Consulting បានបន្តថា ឥណ្ឌូណេស៊ីជាប់ចំណាត់ថ្នាក់លេខ៣ ដែលមានអត្រានៃការស្ទុះងើបឡើងវិញចំនួន៧១,៧% បន្ទាប់មកគឺសិង្ហបុរី ដែលមានអត្រា នៃការស្ទុះងើបឡើងវិញចំនួន៧១,៣% និងប្រទេសថៃ ដែលមានអត្រានៃការស្ទុះងើបឡើងវិញចំនួន៧០,៤% ។

ប្រភពដដែលបាន​បង្ហាញ​ទៀតថា ប្រទេស​វៀតណាម​ជាប់ចំណាត់ថ្នាក់លេខ៦ ដោយសម្រេច​បាន​អត្រា​ស្ទុះ​ងើប​ឡើង​វិញចំនួន៧០% ខ្ពស់​ជាង​ប្រទេស​ហ្វីលីពីន ដែលសម្រេចបានចំនួន៦៦%។

កាលពីឆ្នាំមុន ប្រទេសម៉ាឡេស៊ី បានក្លាយជាជើងឯកទេសចរ​ណ៍ក្នុងតំបន់ ដោយទាក់ទាញបានការមកដល់របស់ភ្ញៀវទេសចរអន្តរជាតិចំនួន២៩លាននាក់  តាមពីក្រោយដោយប្រទេស​ថៃ​ ដែល​មាន​ភ្ញៀវទេសចរបរទេស២៨​លាន​នាក់​ ​សិង្ហបុរី​ទទួលបាន១៣,៦​លាន​នាក់ និង​វៀតណាមទទួលបាន១២,៦​លាន​នាក់។

ជាមួយគ្នានេះ ប្រទេសថៃ និងម៉ាឡេស៊ីបានលើកលែងទិដ្ឋាការសម្រាប់ភ្ញៀវទេសចរ មកពីបណ្តាប្រទេសសេដ្ឋកិច្ចធំៗ ដូចជាប្រទេ​សចិន និងឥណ្ឌាចាប់តាំងពីចុងឆ្នាំមុនមកម្ល៉េះ។

ស្របពេលមានការប្រកួតប្រជែងយ៉ាងខ្លាំងក្លាក្នុងតំបន់ នាយករដ្ឋមន្ត្រីវៀតណាម លោក Pham Minh Chinh បានបញ្ជាឱ្យក្រសួងនានាពិចារណា លើការលើកលែងទិដ្ឋាការ សម្រាប់ពលរដ្ឋមកពីប្រទេសមួយចំនួន ស្របតាមសកម្មភាពសហប្រតិបត្តិការទ្វេរភាគី៕

        ដោយៈ គង់ សូរិយា

        ភ្នំពេញៈ ពិព័ណ៌គ្រឿងអលង្ការ និងត្បូងមានតម្លៃអន្តរជាតិដ៏ធំ មិនធ្លាប់មាន បាននិងកំពុងត្រៀមចាប់ផ្តើម ជាមួយព្រឹត្តិការណ៍ជាច្រើន និងមានការចូលរួមពីបណ្តារដ្ឋមន្រ្តី មកពីក្រសួងជាច្រើន នឹងចូលរួមញាំងឲ្យព្រឹត្តិការណ៍នេះកាន់តែអធិកអធម។

សមាគមពាណិជ្ជករគ្រឿងអលង្ការ និងត្បូងមានតម្លៃកម្ពុជា មានកិត្តិយសសូមជំរាបជូនដំណឹង ដល់សាធារណៈជនទូរទៅអោយបានជ្រាបថា ដោយមានការគាំទ្រពី ក្រសួងពាណិជ្ជកម្ម និងក្រសួងពាក់ព័ន្ធជាច្រើនទៀត សមាគមពាណិជ្ជករគ្រឿងអលង្ការ និងត្បូងមានតម្លៃកម្ពុជា និងរៀបចំពិព័រណ៍ គ្រឿងអលង្ការ និងត្បូងកម្ពុជា អន្តរជាតិ លើកទី១៥ ឆ្នាំ២០២៤ ដែលនឹងប្រព្រឹត្តិទៅចាប់ពីថ្ងៃទី២១ ដល់ថ្ងៃទី២៥ ខែមីនា ឆ្នាំ២០២៤ នៅសាលសន្និបាតនិងពិព័រណ៍កោះពេជ្រ រាជធានីភ្នំពេញ។ សូមចុចតំណភ្ជាប់នេះ www.CIGJF.org ដើម្បីទទួលបានព័ត៌មានបន្ថែម។
នៅក្នុងព្រឹត្តិការណ៍ដ៏អស្ចារ្យនេះ នឹងមានកម្មវិធីដ៏សំខាន់ៗ ដូចជា៖ ការតាំងបង្ហាញគ្រឿងអលង្ការប្រណិតៗ នាឡិកាដៃ ម៉ាស៊ីនកែច្នៃគ្រឿងអលង្ការ ត្បូង ពេជ្រជាច្រើនប្រភេតមកពីក្រុមហ៊ុនជាតិ និងអន្តរជាតិ ដោយមានការបញ្ចុះតម្លៃរហូតដល់៥០% ការដើរបង្ហាញម៉ូតគ្រឿងអលង្ការ កម្មវិធីប្រកួតនារីឯកគ្រឿងអលង្ការ និងត្បូងអន្តរជាតិ ពិធីដេញថ្លៃធ្វើម្កុដនារីឯកតម្លៃ២០ម៉ឺនដុល្លារ កម្មវិធីចាប់រង្វាន់យកចិញ្ចៀនពេជ្រ តម្លៃចាប់ពី១០០០ដុល្លារ ដែលបានឧបត្ថម្ភដោយក្រុមហ៊ុន Signare Jewellery (Hong Kong) រហូតដល់ចិញ្ចៀនពេជ្រតម្លៃ៥០០០ដុល្លារ ដែលបានឧត្ថម្ភដោយក្រុមហ៊ុន Star Asia (Thailand)។

កម្មវិធីអមផ្សេងៗទៀតមានដូចជា ការប្រកួតប្រណាំងអុំទូកកាយ៉ាក់ ការប្រកួតប្រណាំងកង់យឺតឆ្លងឧបសគ្គ ការប្រកួតញ៉ាំម្ទេស ការប្រកួតស្ទូចត្រី និងការប្រកួតលេងគ្រ័រ ដែលអ្នកឈ្នះនឹងទទួលបានទឹកប្រាក់ចំនួន១០០០ដុល្លារជារៀងរាល់ថ្ងៃ (ពីថ្ងៃទី២១ដល់ថ្ងៃទី២៥ ខែមីនា ឆ្នាំ២០២៤ នៅទីក្រុងកោះពេជ្រ)។

សូមចុះឈ្មោះតាមតំណភ្ជាប់នេះ ពិព័រណ៍ គ្រឿងអលង្ការ និងត្បូងកម្ពុជា អន្តរជាតិ លើកទី១៥ ឆ្នាំ២០២៤ (cigjf.org) ។

ជាពិសេសថែមទៀតនោះ សូមកុំភ្លេចចូលរួមទស្សនាកម្មវិធីជួបជុំកញ្ញាឯកគ្រឿងអលង្ការ និងត្បូងអន្តរជាតិឆ្នាំ២០២៤ នៅថ្ងៃទី១៥ ខែមីនា ឆ្នាំ២០២៤ វេលាម៉ោង៥ល្ងាច នៅមុខអគារ ឌឹអេលីហ្សេ (The Elysee) កោះពេជ្រ ដោយមានការចូលរួមពីកញ្ញា មាន សូនីតា (ហៅ កញ្ញា ក្រមា) និងសូមរង់ចាំតាមដានទស្សនាការផ្សាយផ្ទាល់តាមរយៈតំណភ្ជាប់ហ្វេសបុកផេក https://www.facebook.com/CIGJF/ ។

អាស្រ័យដូចបានជំរាបជូនខាងលើ សូមគោរពអញ្ជើញសាធារណៈជន ដែលស្រលាញ់វិស័យគ្រឿងអលង្ការ អញ្ជើញចូលរួមទស្សនាអោយបានច្រើនកុះករ ។ ជួបគ្នាទាំង៥ថ្ងៃ ចាប់ពីថ្ងៃទី២១ ដល់ថ្ងៃ២៥ ខែមីនា ឆ្នាំ២០២៤ នៅ ទីក្រុងកោះពេជ្រ អាគារ A B C រាជធានីភ្នំពេញ៕