ដោយៈ គង់ សូរិយា

ភ្នំពេញៈ ស្របពេលស្ថានភាពទីផ្សារ ហាក់នៅតែមានភាពអ៊ួរអ័ព្ទ ការទស្សន៍ទាយអំពីស្ថានភាពវិស័យនេះ នឹងវិវត្តន៍យ៉ាងណាហាក់ដូចជាលឿនពេក។

ប៉ុន្តែតាមរយៈការសង្កេត និងនិន្នាការសេដ្ឋកិច្ច និងលំហូរទុនវិនិយោគផ្ទាល់ពីបរទេស បានបង្ហាញនូវសញ្ញាមួយចំនួន ដែលអ្នកជំនា​ញនៅក្នុងវិស័យនេះ មានសុទិដ្ឋិនិយមថា ផ្នែកខ្លះក្នុងវិស័យនេះនឹងមានឱកាសរីកចម្រើនឡើងវិញ។

ទីផ្សារដីធ្លីជាយក្រុង
អ្នកវិភាគឯករាជ្យ និងតាមដានដំណើរវិវត្តន៍នៅក្នុងវិស័យនេះ លោកយិន លាងគង់ អគ្គនាយកគេហទំព័រPropertyarea.asia បានផ្តល់ការវិភាគមួយចំនួនថា ដោយសារតំបន់ជាយក្រុង មានស្ថានភាពភូមិ​សាស្រ្តកៀកនឹងរាជធានី មានលំហូរចរាចរណ៍ច្រើន និងកំនើនប្រជាសាស្រ្ត ចរន្តនៃការទិញ លក់ដី និងលំនៅដ្ឋាននឹងមានភាពកំរើកឡើងវិញខ្លះ ដោយ​សារសកម្មភាពសេដ្ឋកិច្ច នៅតែមានសម្រាប់តំបន់ ដែ​លមានមនុស្សរស់នៅច្រើន ប៉ុន្តែតម្លៃដីធ្លីទំនងមិនទាន់កើនឡើងនៅឡើយទេ។

ជាមួយគ្នានេះ ការរើរោងចក្រ សហគ្រាស ចេញពីរាជធានីភ្នំពេ​ញ និងកំណើនវិនិយោគក្នុងវិស័យឧស្សាហកម្ម និងអនុវិស័យកម្មន្តសាល ក៏នឹងជម្រុញការទិញ លក់កំរើកឡើងវិញខ្លះៗផងដែរ។

តម្រូវការដីកសិកម្ម
ក្រុមហ៊ុនពហុជាតិសាសន៍ ចិន កូរ៉េ វៀតណាមជាដើម បាននិងកំពុងសម្លឹងរកឱកាសវិ​និយោគនៅកម្ពុជា លើវិស័យកសិកម្ម និងកសិឧស្សាហកម្ម ដោយសារវិស័យនេះ នៅតែជាអាទិភាពចម្បងនៃការបំពេញតមម្រូវការ របស់ប្រជាពលរដ្ឋនៅទូទាំងពិភពលោក ពិសេសការនាំចេញពីកម្ពុជា ទៅកាន់ប្រទេសចិន ជប៉ុន កូរ៉េជាដើមកាន់តែមានភាពទូលំទូលាយ។ ហេតុនេះតម្រូវការដីក្នុងវិស័យកសិកម្ម នឹងមានសភាពកំរើកឡើងបណ្តើរៗនាពេលខាងមុខ។

ដីឧស្សាហកម្ម
វិស័យឧស្សាហកម្ម និងអនុវិស័យកម្មន្តសាល បាននិងកំពុងមានសញ្ញានៃការងើបឡើងវិញឆាប់រហ័ស ស្របពេលការវិនិយោគពី​បរទេសបាននិងកំពុងកើនឡើង ដោយសារអ្នកធុរកិច្ចឬអ្នកវិនិយោគនានានៅតែសម្លឹងឃើញកម្ពុជា មានប្រជាជនវ័យក្មេងច្រើន កំលាំងពលកម្មថោក ស្របពេលរាជរដ្ឋាភិបាលបាន និងកំពុងចាប់ផ្តើមបណ្តុះបណ្តាលយុវជនក្រីក្រ និងងាយរងគ្រោះប្រមាណ១,៥នាក់ ដើ​ម្បីបំពេញតម្រូវការកំលាំងពលកម្ម ដែលមានជំនាញជាងមុន និងអាច​ទាញយកតម្លៃបន្ថែមពីការរីកចម្រើនក្នុងវិស័យនេះ៕

        ដោយៈ ជេស៊ីកា

        ភ្នំពេញៈ គម្រោងសាងសង់ស្ពានព្រែកប្រា-ចាក់អង្រែ ដែលមានតម្លៃប្រមាណ៦០លានដុល្លារអាមេរិក ត្រៀមរៀបចំសម្ពោធបើកការដ្ឋាសាងសង់នៅថ្ងៃទី១៩ កុម្ភៈ ឆ្នាំ២០២៤ខាងមុខនេះហើយ។

អ្នកនាំពាក្យក្រសួងក្រសួងសាធារណការ និងដឹកជញ្ជូន លោកផន រឹម បានមានប្រសាសន៍ឲ្យដឹងថា ស្ពានព្រែកប្រា-ចាក់អង្រែអាចជួយកាត់បន្ថយការកកស្ទះចរាចរណ៍ លើស្ពានព្រះមុនីវង្សឆ្លងកាត់ទន្លេបាសាក់ ភ្ជាប់ផ្លូវជាតិលេខ១ នៅខណ្ឌច្បារអំពៅ និងជួយពង្រឹងដល់ទំនាក់ទំនងសេដ្ឋកិច្ច សង្គម រវាងរាជធានីភ្នំពេញប៉ែកខាងត្បូង និងព្រលានយន្តហោះអន្តរជាតិ តេជោក្រុងតាខ្មៅ។ ជាពិសេសស្ពាននេះ នឹងធ្វើឱ្យប្រសើ​រ​ឡើង ដល់ប្រសិទ្ធភាពនៃការដឹកជញ្ជូន និងភស្តុភារកម្មនៅក្នុងតំបន់រាជ ធានីភ្នំពេញ ក៏ដូចជា កាត់បន្ថយការកកស្ទះចរាចរណ៍ នៅតាមដងទន្លេបាសាក់ និងជួយពន្លឿនការអភិវឌ្ឍតំបន់។គម្រោងសាងសង់ស្ពានឆ្លងទន្លេតភ្ជាប់ពី ព្រែកប្រា-ចាក់អង្រែប្រើឥណទានសម្បទានពីប្រទេសចិន ដែលមានទឹកប្រាក់ប្រមាណ៦០លានដុល្លារអាម៉េរិក និងប្រើរយៈពេលសាងសង់៤២ខែ ឬ៣ឆ្នាំកន្លះ។ ស្ពាននេះស្ថាបនាមួយខ្សែ(ដូចស្ពានកោះនរា ឬស្ពានឫស្សីកែវ) ទទឹង២៧ម៉ែត្រ មានផ្លូវរថយន្តចំនួន៤គន្លងទៅមក និង២គន្លងសម្រាប់ថ្មើជើង៕​

ដោយ: គង់ លាងហួរ

ឥណ្ឌា: ក្រុមហ៊ុនសំណង់កូរ៉េ Daewoo Engineering & Construction បានបញ្ជាក់ថា ខ្លួនបានបញ្ចប់គម្រោងសាងសង់ស្ពានឆ្លងកាត់សមុទ្រដ៏វែងបំផុតមួយ នៅក្នុងប្រទេសឥណ្ឌា ដែលបានសហការរួមគ្នាជាមួយក្រុមហ៊ុនឥណ្ឌា Tata Group។

នេះបើយោងតាមការចុះផ្សាយ ដោយសារពត៌មានកូរ៉េខាងត្បូង Yonhap កាលពីថ្ងៃអង្គារ ទី២៣ ខែមករា។
ក្រុមហ៊ុនបាននិយាយថា ខ្លួនបានបញ្ចប់ការសាងសង់ស្ពាន Mumbai Trans Harbor Link ប្រវែង២១,៨គីឡូម៉ែត្រ បន្ទាប់ពីបានចាប់ផ្តើមស្ថាបនានៅឆ្នាំ២០១៨ ក្នុងភាពជាដៃគូជាមួយក្រុមហ៊ុនសំំណង់ Tata Projects ។ យោងតាមក្រុមហ៊ុនសំណង់កូរ៉េខាងត្បូង Daewoo E&C បានបញ្ជាក់ឱ្យដឹងថា Mumbai Trans Harbor Link គឺជាស្ពានដែលវែងបំផុតនៅក្នុងប្រទេសឥណ្ឌា គិតរហូតមកទល់ពេលបច្ចុប្បន្ននេះ។

ក្រុមហ៊ុននេះ បានមើលការខុសត្រូវលើការសាងសង់ ការរចនា លទ្ធកម្ម និងការគ្រប់គ្រងគម្រោងកំណាត់ ស្ពានឆ្លងកាត់សមុទ្រប្រវែង៧,៨គីឡូម៉ែត្រនៃប្រវែងស្ពានសរុប និងផ្លូវបំបែកចំនួនមួយ។គម្រោងនេះចំណាយថវិកាសរុប ប្រមាណ២,២ពាន់លានដុល្លារអាមេរិក។  ស្ពាន​នេះ​មាន​សមត្ថភាព ​ផ្ទុក​យានជំនិះ​បាន៧០.០០០គ្រឿង​ក្នុង​មួយថ្ងៃ  ហើយត្រូវបានបើកសម្ពោធ ក្រោមអធិបតីភាពនាយករដ្ឋមន្ត្រីឥណ្ឌា លោក Narendra Modi នៅថ្ងៃទី១២ ខែមករា ឆ្នាំ២០២៤។

ក្រុមហ៊ុនបានអះអាងថា ជាមួយនឹងការបើកដំណើរការស្ពាននេះ ពេលវេលាធ្វើដំណើរ រវាងទីក្រុងបុមបៃ(Mumbai) និងទីក្រុងរណបក្បែរនោះ គឺទីក្រុង Navi Mumbai ត្រូវបានគេរំពឹងថា នឹងជួយកាត់បន្ថយយ៉ាងខ្លាំងពី២ម៉ោង មកនៅសល់ប្រហែល៣០នាទីប៉ុណ្ណោះ៕

ដោយ: គង់ លាងហួរ

អន្តរជាតិ: យោងតាមការព្យាករណ៍របស់រដ្ឋាភិបាល បានបង្ហាញកាលពីពេលថ្មីៗនេះថា ចំនួនប្រជាជននៅក្នុងខេត្តទាំង៤៧របស់ប្រទេសជប៉ុន លើកលែងតែទីក្រុងតូក្យូ ត្រូវបានគេព្យាករណ៍ថា នឹងធ្លាក់ចុះនៅឆ្នាំ២០៥០ បើធៀបនឹងកម្រិតឆ្នាំ២០២០។

ចំនួនប្រជាជននៅក្នុងខេត្តចំនួន១១ នឹងធ្លាក់ចុះជាង៣០ភាគរយដូចៗគ្នា ខណៈដែលចំនួនប្រជាជនរស់នៅក្នុង ២០%នៃទីក្រុងទាំងអស់ ត្រូវបានគេរំពឹងថា នឹងដាំក្បាលចុះជាងពាក់កណ្តាល។ នេះ​បើ​តាម​វិទ្យាស្ថាន​ជាតិ​ស្រាវជ្រាវ​ប្រជាជន និង​សន្តិសុខ​សង្គមនៃប្រទេសជប៉ុន។

ស្ថាប័នស្រាវជ្រាវខាងលើក៏បានអះអាងផងដែរថា ចំនួនប្រជាជនរបស់ប្រទេសជប៉ុន ត្រូវបានគេរំពឹងថា នឹងធ្លាក់ចុះ១៧ភាគរយមកនៅត្រឹម១០៤,៦៩លាននាក់ប៉ុណ្ណោះ នៅឆ្នាំ២០៥០ខាងមុខ។ចំពោះតំបន់មួយចំនួន ដែលមានការថយចុះនៃចំនួនប្រជាជនយ៉ាងគំហុក អាចប្រឈមមុខនឹងការលំបាក ក្នុងការថែរក្សាហេដ្ឋារចនាសម្ព័ន្ធ និងរដ្ឋបាលក្នុងតំបន់ ដោយសារតែការថយចុះនៃប្រាក់ចំណូលពន្ធ និងការធ្លាក់ចុះនៃសេដ្ឋកិច្ច ខណៈការដោះស្រាយការថយចុះនៃអត្រាកំណើត និងការប្រមូលផ្តុំប្រជាជន នៅទីក្រុងតូក្យូបានក្លាយជាបញ្ហាបន្ទាន់។

ជាមួយគ្នានេះ គេសង្កេតឃើញថា មានតែទីក្រុងតូក្យូមួយគត់ ដែលចំនួនប្រជាជនត្រូវបានគេព្យាករណ៍ថា នឹងកើនឡើងចាប់ពីឆ្នាំ២០២០ ដោយកើនឡើង២,៥% ដល់ចំនួន១៤,៤០លាននាក់។

ដោយឡែក ចំនួនប្រជាជនដែលមានអាយុ១៤ឆ្នាំ និងក្រោមនេះ ត្រូវបានគេរំពឹងថា នឹងធ្លាក់ចុះ៣០,៨% នៅទូទាំងប្រទេស ខណៈចំនួនមនុស្ស ដែលមានអាយុលើសពី៦៥ឆ្នាំ នៅក្នុង២៥ខេត្ត ត្រូវបានគេព្យាករណ៍ថា នឹងគ្របដណ្តប់លើសពី៤០% នៃចំនួនប្រជាជនសរុបរបស់ខេត្តនីមួយៗនៅត្រឹមឆ្នាំ២០៥០៕

ដោយ: គង់ លាងហួរ

អន្តរជាតិ: អត្រាអគារការិយាល័យ ដែលទុកនៅទំនេរចោលគ្មានអ្នកជួលនៅសហរដ្ឋអាមេរិក បានកើនឡើងដល់១៩,៦ភាគរយក្នុងត្រីមាសទី៤ ឆ្នាំ២០២៣ ដែលជាអត្រាខ្ពស់បំផុត មិនធ្លាប់មានគិតចាប់តាំងពីឆ្នាំ១៩៧៩មកម្ល៉េះ។

ក្នុងរយៈពេលជាង៤០ឆ្នាំកន្លងមក អត្រាអគារការិយាល័យទំនេរប្រចាំត្រីមាសដែលខ្ពស់បំផុត ស្ថិតក្នុងរង្វង់ត្រឹម១៩,៣ភាគរយ​។ ជាមធ្យម មុនផ្ទុះវិបត្តិជំងឺកូវីដ-១៩ អត្រាអគារការិយាល័យទុកទំនេរចោល ស្ថិតក្នុងរង្វង់ប្រហែល១៦,៨ភាគរយ។

ប៉ុន្តែបន្ទាប់ពីនោះមក វិបត្តិជំងឺកូវីដ-១៩ បានបង្កើនអត្រាការិ​យាល័យទំនេរ ដោយអាជីវកម្មជាច្រើន ត្រូវការបន្ទប់ការិយាល័យតិចជាងមុន ខណៈបុគ្គលិកអាចធ្វើការពីចម្ងាយបាន។ទោះបីជាវិបត្តិជំងឺកូវីដ-១៩ បានធូរស្រាលទៅវិញយ៉ាងណាក្តី ក៏ការជួលបន្ទប់ការិយាល័យ ហាក់មិនសូវចាំបាច់ទៀតឡើយ ដោយ​សា​របុគ្គលិកបានស៊ាំ ទៅនឹងរបៀបនៃការធ្វើការងារពីចម្ងាយ។

ចំពោះបុគ្គលិកភាគច្រើន ដែលបំពេញការងារ ក្នុងការិយាល័យ ចាប់ពីម៉ោង៩ព្រឹក រហូតដល់ម៉ោង៥ល្ងាចចំនួន៥ថ្ងៃ ក្នុងមួយសប្តាហ៍ ត្រូវបានជំនួសមកវិញដោយការធ្វើការងារពីផ្ទះ។

យោងតាម​ទីភ្នាក់ងារវាយតម្លៃ Moody’s បានឱ្យដឹងថា និន្នាការខាងលើនេះ បានធ្វើឱ្យការផ្គត់ផ្គង់អគារការិយាល័យ កើនលើសតម្រូវការ។

ការកើនឡើងនៃអត្រា​​ការិយាល័យ​ទំនេរ ក្លាយជា​សញ្ញាអវិជ្ជ​មានសម្រាប់​ម្ចាស់​ដី ​និង​ក្រុមហ៊ុនអភិវឌ្ឍ​ន៍អចលនទ្រព្យ​ ព្រម​ទាំង​ភោជនីយដ្ឋាន ហាងលក់​រាយ និង​អាជីវកម្ម​តូចៗ​ផ្សេង​ទៀត​ ដែល​​អាស្រ័យ​លើ​បុគ្គលិក​ការិយាល័យ។

ជាមួយគ្នានេះ ការដាំក្បាលចុះនៃតម្រូវការជួល ​ការិយាល័យ បានធ្វើឱ្យសកម្មភាពសាងសង់ អគារការិយាល័យថ្មីៗ កើនឡើងក្នុងកម្រិតតិចតួចបំផុត គិតចាប់តាំងពីឆ្នាំ២០១២មកម្ល៉េះ៕ប្រភព៖CNN៕

ដោយៈ ហ្វីអូណា

        ភ្នំពេញៈ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានប្រកាសនៅព្រឹកថ្ងៃទី២៤ ខែមករា ឆ្នាំ២០២៤នេះថា ការអភិវឌ្ឍផែកងទ័ពសមុទ្ររាម និងប្រភេទទ័ពផ្សេងទៀត គឺដើម្បីពង្រឹងសមត្ថភាពការពារជាតិរបស់កម្ពុជា ហើយគ្មានចេតនាដើម្បីគំរាមកំហែង ឬបង្កើតសង្គ្រាមជាមួយអ្នកណានោះទេ។

ក្នុងឱកាសអញ្ជើញជាអធិបតីភាព ពិធីអបអរសាទរខួបលើកទី២៥ឆ្នាំ ថ្ងៃបង្កើតបញ្ជាការដ្ឋានកងទ័ពជើងគោក នាព្រឹកថ្ងៃទី២៤ មករានេះ សម្ដេចធិបតី ហ៊ុន ម៉ាណែត ក៏បានអះអាងថា មូលដ្ឋានកងទ័ពសមុទ្ររាម ដែលកំពុងធ្វើការអភិវឌ្ឍនេះ ក៏មិនអនុញ្ញាតឲ្យមានមូលដ្ឋានកងទ័ពបរទេសណា មកបោះទីតាំងនោះដែរ និយាយដោយឡែក ហើយនិយាយជារួម នៅលើទឹកដីកម្ពុជា គ្មានមូលដ្ឋានកងទ័ពបរទេសឡើយ។សម្ដេចធិបតី ហ៊ុន ម៉ាណែតបានបញ្ជាក់ថា “ក្នុងរដ្ឋធម្មនុញ្ញ ត្រង់មាត្រា៥៣ ក៏បានកំណត់យ៉ាងច្បាស់ថា កម្ពុជាមិនអនុញ្ញាតឲ្យមានមូលដ្ឋានកងទ័ពបរទេសលើទឹកដីរបស់ខ្លួន ហើយកងទ័ពកម្ពុជា ក៏មិនមានមូលដ្ឋាន នៅលើទឹកដីប្រទេសផ្សេងនោះទេ”។ សម្តេចបន្ថែមថា “ការងារនេះខ្ញុំសូមបញ្ជាក់ម្ដងទៀត ការលើកឡើងនៅក្នុងកាសែតជាញឹកញយ រឿងសមុទ្ររាម”។

សម្តេចបន្តថា កម្ពុជា រដ្ឋធម្មនុញ្ញរបស់យើងមាត្រា៥៣ បានបញ្ជាក់ច្បាស់ណាស់ កម្ពុជាមិនអនុញ្ញាតឲ្យមានមូលដ្ឋានកងទ័ពបរទេសនៅលើទឹកដីខ្លួន ហើយកងទ័ពកម្ពុជា ក៏មិនមានមូលដ្ឋានរបស់ខ្លួននៅលើទឹកដីផ្សេងទៀត លើកលែងតែនៅក្រោមឆ័ត្រអង្គការសហប្រជាជាតិ។

សម្តេចហ៊ុន ម៉ានែតបានបន្តថា “ខ្ញុំបានបញ្ជាក់ករណីនេះ នៅអង្គការសហប្រជាជាតិរួចទៅហើយ, សម្ដេចតេជោ សម្ដេចពិជ័យសេនា ថ្នាក់ដឹកនាំជាតិរបស់យើង ក៏បានបញ្ជាក់ជាប្រចាំទៅហើយ ហើយខ្ញុំសូមបញ្ជាក់ជាថ្មី កសាងសមត្ថភាពរបស់កងទ័ពជើងទឹក ជើងគោក ជើងអាកាសរបស់កម្ពុជា គឺដើម្បីការពារជាតិកម្ពុជាតែប៉ុណ្ណោះ មិនមែនសម្រាប់បង្កើតសង្គ្រាមជាមួយអ្នកណានោះទេ”។

សម្ដេចធិបតី ប្រមុខនៃរាជរដ្ឋាភិបាលកម្ពុជា បានអះអាងទៀតថា នៅលើពិភពលោក គ្មានច្បាប់កំណត់ហាមឃាត់ ការធ្វើទំនើបកម្មការពារជាតិរបស់ប្រទេសនីមួយៗនោះទេ ពោលការពង្រឹងសមត្ថភាពរបស់កងទ័ព គឺដើម្បីចូលរួមនៅក្នុងការថែរក្សាស្ថេរភាព សុខសន្ដិភាព ទាំងក្នុងក្របខ័ណ្ឌកម្ពុជាផ្ទាល់ និងក្របខ័ណ្ឌតំបន់។ ប្រសិនមានស្ថានភាពអ្វីមួយកើតឡើង ដូចជា ឧក្រិដ្ឋកម្ម ភេរវកម្ម ជាដើម ហើយត្រូវការចូលរួមរបស់កម្ពុជា នោះកម្ពុជានឹងចូលរួមភ្លាម។

សម្ដេចធិបតី ហ៊ុន ម៉ាណែត បានបន្ថែមទៀតថា កងកម្លាំងរបស់កម្ពុជា បានបញ្ជូនទៅបំពេញការងារ ក្រោមឆ័ត្ររបស់អង្គការសហប្រជាជាតិ បើមិនបង្កើនសមត្ថភាពទេ ម្ល៉េះមិនអាចធ្វើសមាហរណកម្មជាមួយបណ្ដាប្រទេសផ្សេងៗបាននោះទេ ដូច្នេះទាល់តែមានសមត្ថភាព ទើបអាចចូលរួមជាមួយបណ្ដាប្រទេសផ្សេងៗ។

ក្នុងន័យនេះ សម្ដេចធិបតីនាយករដ្ឋមន្ដ្រី បានគូសបញ្ជាក់ដែរថា រាជរដ្ឋាភិបាលនីតិកាលថ្មី ដាក់ចេញកំណែទម្រង់ជាច្រើន ដើម្បីពង្រឹងសមត្ថភាពកងទ័ព។ ប៉ុន្តែការកែទម្រង់ ធ្វើទំនើបកម្មកងទ័ព គឺមិនត្រូវឱ្យបាត់ស្មារតីការពារជាតិ ស្មោះត្រង់នឹងជាតិ និងប្រជាជន, ស្មារតីការពារជាតិ សាសនា និងព្រះមហាក្សត្រ និងការថែរក្សាសុខសន្តិភាពឡើយ៕

ដោយ: គង់ លាងហួរ

អន្តរជាតិ: អាកាសយានដ្ឋាន​ គឺជា​ច្រក​ចេញចូល​ដ៏​សំខាន់​ ដែល​តភ្ជាប់​មនុស្សទៅ​កាន់​ពិភពលោក។ មជ្ឈមណ្ឌលអាកាសចរណ៍ទាំងនេះ ផ្តល់នូវគ្រឿងបរិក្ខារចាំបាច់សម្រាប់យន្តហោះ គ្រប់គ្រងការដឹកជញ្ជូនទំនិញ និងបំពេញតម្រូវការអ្នកធ្វើដំណើរ រាប់រយលាននាក់ក្នុងមួយឆ្នាំៗ។

ដោយសារចំនួនអ្នកដំណើរ បន្តកើនឡើងនៅឆ្នាំ២០២៤ អាកា​សយានដ្ឋាននានានៅលើពិភពលោក ប្រឈមនឹងការកកកុញ។  ដើម្បីដោះស្រាយបញ្ហានេះ ប្រទេសមួយចំនួនកំពុងពង្រីក មជ្ឈមណ្ឌ​លអាកាសចរណ៍របស់ពួកគេ ដោយសាងសង់ស្ថានីយ និងផ្លូវរត់ថ្មី ដើម្បីសម្រួលដល់ចំនួនអ្នកធ្វើដំណើរ និងចំនួនយន្តហោះដែលកំពុងកើនឡើង។

ខាងក្រោមនេះ គឺជាព្រលានយន្តហោះធំជាងគេបំផុតចំនួន៥ នៅលើពិភពលោក គិតត្រឹមឆ្នាំ២០២៤នេះ។
ទី១: ព្រលានយន្តហោះ King Fahd International Airport
អាកាសយានដ្ឋានដ៏ធំបំផុត របស់ពិភពលោកមួយនេះ លាតសន្ធឹងនៅលើផ្ទៃដីទំហំ៧៧៤គីឡូម៉ែត្រការ៉េ។ អាកាសយានដ្ឋានអន្តរជាតិ King Fahd ត្រូវបានគេស្គាល់ម្យ៉ាងទៀតថា ជាអាកាសយានដ្ឋាន Dammam ដែលមានមូលដ្ឋាន នៅប្រទេសអារ៉ាប៊ីសាអូឌីត និងបានចាប់ផ្តើមប្រតិបត្តិការនៅឆ្នាំ១៩៩៩។

ទី២: ព្រលានយន្តហោះ Denver International Airport
អាកាសយានដ្ឋានអន្តរជាតិ Denver លាតសន្ធឹងលើដីទំហំ១៣៧គីឡូម៉ែត្រការ៉េ ដែលមានទីតាំងនៅរដ្ឋ Colorado និងបានបើកដំណើរការចាប់តាំងពីឆ្នាំ១៩៩៥។ Denver International Airport ជាប់ចំណាត់ថ្នាក់ ជាអាកាសយានដ្ឋានធំជាងគេទីពីរ នៅទូទាំងពិភពលោក និងធំជាងគេទី១នៅសហរដ្ឋអាមេរិក។

ទី៣: ព្រលានយន្តហោះ Istanbul Airport
ចាប់តាំងពីបានបើកដំណើរការ នៅឆ្នាំ២០១៩ អាកាសយានដ្ឋានអ៊ីស្តង់ប៊ុល ដែលលាតសន្ធឹងលើដីទំហំ៧៦គីឡូម៉ែត្រការ៉េ បានក្លាយជាមជ្ឈមណ្ឌលពិភពលោកដ៏សំខាន់ សម្រាប់ក្រុមហ៊ុនអាកាសចរណ៍ Turkish Airlines។  អាកាសយានដ្ឋាននេះ មានស្ថានីយតែមួយប៉ុណ្ណោះ ដែលបម្រើទាំងជើងហោះហើរក្នុងស្រុក និងអន្តរជាតិ។

ទី៤: ព្រលានយន្តហោះ Dallas/Fort Worth International Airport
ចាប់តាំងពីបើកដំណើរការនៅឆ្នាំ១៩៧៣មក អាកាសយានដ្ឋានអន្តរជាតិ Dallas/Fort Worth ដែលមានមូលដ្ឋាននៅរដ្ឋតិចសាស់ បានដើរតួនាទី ជាមជ្ឈមណ្ឌលអាកាសចរណ៍ដ៏សំខាន់ សម្រាប់ក្រុមហ៊ុនអាកាសចរណ៍នានា ដូចជា ក្រុមហ៊ុន American Airlines ក្រុមហ៊ុន Ameriflight ក្រុមហ៊ុន Southern Airways Express និងក្រុមហ៊ុន UPS Airlines ។អាកាសយានដ្ឋានមួយនេះ លាតសន្ធឹងនៅលើដីទំហំ៦៧គីឡូម៉ែត្រការ៉េ។

ទី៥: ព្រលានយន្តហោះ Orlando International Airport
ដោយបានបើកដំណើរការតាំងពីឆ្នាំ១៩៤០ អាកាសយានដ្ឋានអន្តរជាតិ Orlando គឺជាមូលដ្ឋានប្រតិបត្តិការដ៏សំខាន់ សម្រាប់ក្រុមហ៊ុនអាកាសចរណ៍ដ៏លេចធ្លោមួយចំនួន រួមមានក្រុមហ៊ុន Frontier Airlines ក្រុមហ៊ុនAvelo Airlines ក្រុមហ៊ុន Southwest Airlines និងក្រុមហ៊ុន Spirit Airlines ។ អាកាសយានដ្ឋាននេះ មានមូលដ្ឋាននៅក្នុងទីក្រុង Orlando រដ្ឋផ្លរីដា សហរដ្ឋអាមេរិក ដែលលាតសន្ធឹងលើដីទំហំ៥២គីឡូម៉ែត្រការ៉េ៕ប្រភព៖AEROTIME Hub៕