ដោយ: គង់ លាងហួរ

អន្តរជាតិ: ប្រទេសម៉ាឡេស៊ី និងថៃកំពុងពិចារណាលើការតភ្ជាប់ផ្លូវដែករវាងទីក្រុង Sungai Kolok នៃខេត្តណារ៉ាធីវ៉ាត់ (Narathiwat) និងឆ្នេរសមុទ្រភាគខាងកើត នៃប្រទេសម៉ាឡេស៊ី ដើម្បីលើកកម្ពស់វិស័យពាណិជ្ជកម្ម និងទេសចរណ៍។

ទីភ្នាក់ងារផ្លូវដែកនៃប្រទេសទាំង២ កំពុងធ្វើការលើសំណើសុំតភ្ជាប់ខ្សែរថភ្លើង រវាងទីក្រុង Sungai Kolok ដែលជាទីក្រុងជាប់ព្រំដែនជាមួយម៉ាឡេស៊ី ស្ថិតក្នុងខេត្ត Narathiwat និងទីក្រុង Rantau Panjang របស់ប្រទេសម៉ាឡេស៊ី។

កាលពីពេលកន្លងមក នាយករដ្ឋមន្ត្រីថៃ គឺលោក សេដ្ឋា ថាវីស៊ីន និងនាយករដ្ឋមន្ត្រីម៉ាឡេស៊ី លោក Anwar Ibrahim បានប្តេជ្ញាបង្កើនកិច្ចសហប្រតិបត្តិការ រវាងប្រទេសជិតខាងទាំង២ ឱ្យកាន់តែជិតស្និទ្ធក្នុងវិស័យដឹកជញ្ជូន និងវិស័យផ្សេងៗទៀត។

ទាក់ទិននឹងសំណើនេះ ក្រុមមន្ត្រី​ថៃ​បាន​លើកឡើងថា ការ​តភ្ជាប់​ខ្សែ​ផ្លូវដែករវាងប្រទេសថៃ​ និង​ម៉ាឡេស៊ី​ នឹង​ជំរុញ​ឲ្យ​មាន​ការ​ធ្វើ​ពាណិជ្ជកម្ម ការ​ឆ្លង​ព្រំដែន ទេសចរណ៍ និង​ការ​វិនិយោគ​រវាង​ប្រទេសទាំង​ពីរបន្ថែមទៀត។

បច្ចុប្បន្ន ប្រទេសម៉ាឡេស៊ី និងថៃ មានខ្សែរថភ្លើងតែមួយគត់ ដែលតភ្ជាប់រវាងគ្នា ចាប់ពីទីក្រុង Padang Besar ក្នុងស្រុក Sadao នៃខេត្ត Songkhla ទៅដល់ទីក្រុងនៅក្នុងប្រទេសម៉ាឡេស៊ី ដែលមានឈ្មោះថា Padang Besar ដូចគ្នា។

ទន្ទឹមគ្នានេះ រដ្ឋាភិបាលម៉ាឡេស៊ី ក៏កំពុងសាងសង់គម្រោងផ្លូវរថភ្លើង East Coast Rail Link ផងដែរ ដែលខ្សែរថភ្លើងថ្មីនេះ នឹងបញ្ចប់នៅត្រឹមទីក្រុង Kota Bharu ដែលមានចម្ងាយប្រហែល៣៥គីឡូម៉ែត្រប៉ុណ្ណោះ ពីទីក្រុង Sungai Kolok របស់ប្រទេសថៃ។

គម្រោង​ផ្លូវរថភ្លើង East Coast Rail Link បាន​ឆ្លងកាត់​ឧបសគ្គជា​ច្រើន​ ដោយសារ​ការ​ផ្លាស់ប្តូរ​រដ្ឋាភិបាល ហើយ​បច្ចុប្បន្ន​ គម្រោងខ្នាតយក្សនេះត្រូវ​បាន​គេ​រំពឹង​ថា​ នឹង​បញ្ចប់​ការសាង់សង់រួចរាល់ជាស្ថាពរនៅ​ត្រឹមឆ្នាំ២០២៧ខាងមុខ៕ប្រភព៖Bangkok Post៕

ដោយ: គង់ លាងហួរ
អន្តរជាតិ: ក្រុមហ៊ុនស្ថាបត្យកម្មអន្តរជាតិ Gerkan, Marg & Partners(gmp) ដែលមានមូលដ្ឋាននៅទីក្រុង Hamburg ប្រទេសអាល្លឺម៉ង់ កំពុងរចនាអគារខ្ពស់កប់ពពកជាច្រើនសម្រាប់ទីក្រុងណានជីងនៃប្រទេសចិន។

គម្រោងអគារ ដែលក្រុមហ៊ុននេះកំពុងរចនា មានឈ្មោះថា Nanjing Financial City ដែលការសាងសង់បានចែកចេញជា៣ដំណាក់កាល។

ដំណាក់កាលទី១: Nanjing Financial City I
ក្រុមហ៊ុន gmp បានរចនាមជ្ឈមណ្ឌលសហគ្រាសហិរញ្ញវត្ថុនៅលើទីតាំងដីទំហំប្រហែល៨០.០០០ម៉ែត្រការ៉េនៅក្នុងទីក្រុងដ៏ធំនៅភាគខាងកើតប្រទេសចិនមួយនេះ។

ដំណាក់កាលទី១ រួមមានការសាងសង់អគារចំនួន១០ ដែលមានកំពស់ចាប់ពី១០០ម៉ែត្រ ទៅដល់២០០ម៉ែត្រ ហើយប្លុកអគារខ្ពស់ៗទាំង១០នេះមានទំហំផ្ទៃអគារទាំងមូលសរុបចូលគ្នាប្រមាណ៥០មុឺនម៉ែត្រការ៉េ បើគិតពីផ្ទៃដី។ដំណាក់កាលទី២: Nanjing Financial City ll
សម្រាប់គម្រោង “Nanjing Financial City” ក្នុងដំណាក់កាលទី២ ក្រុមហ៊ុនស្ថាបត្យកម្ម Gerkan, Marg និង Partners កំពុងរចនាអគារខ្ពស់ៗចំនួន៥ ដើម្បីបង្កើតទៅជាតំបន់ពាណិជ្ជកម្ម ដែលមានទំហំផ្ទៃក្រឡាសរុបចំនួន៧៩៨.០០០ម៉ែត្រការ៉េ។

គម្រោងនេះត្រូវបានរចនាឡើងជាស្ថាបត្យកម្ម ដែលរួមមានទាំងការិយាល័យ បដិសណ្ឋារកិច្ច លំនៅដ្ឋាន និងកន្លែងពាណិជ្ជកម្ម។ នៅលើទីតាំងទំហំ៦៥.០០០ម៉ែត្រការ៉េ រួមមានការិយាល័យ បូកផ្សំជាមួយនឹងហេដ្ឋារចនាសម្ព័ន្ធទំនើបសម្រាប់រៀបចំសន្និសីទ និងកន្លែងប្រជុំ ព្រមទាំងអាផាតមុិន និងហាងលក់ទំនិញផងដែរ។

ដំណាក់កាលទី៣: Nanjing Financial City lll 
ដំណាក់កាលនេះរួមមាន ការសាងសង់ប្លុកអគារការិយាល័យ និងអាផាតមុិននៅលើទីតាំងចំនួន២ ដែលខណ្ឌចែកពីគ្នាដោយផ្លូវមួយ។ អគារការិយាល័យ ដែលមានកម្ពស់ចាប់ពី១៣០ ទៅ២០០ម៉ែត្រ ស្ថិតក្នុងទម្រង់ស្របៗគ្នា នៅតាមបណ្តោយសរសៃឈាមចរាចរណ៍សំខាន់ៗ និងបង្កើតជាតំបន់ខាងក្នុងដ៏ស្ងប់ស្ងាត់ ដែលមិនសូវមានចរាចរណ៍ច្រើន និងមានទីធ្លាពណ៌បៃតង។លើសពីនេះទៅទៀត ខ្សែអ័ក្ស ឬទីធ្លាពណ៌បៃតងត្រូវបានតំរៀបជាជួរនៅខាងមុខអគារពាណិជ្ជកម្មខ្នាតតូច ហើយអគារទាំង២ជួរដែលនៅទល់មុខគ្នានឹងត្រូវបានតភ្ជាប់តាមរយៈស្ពានថ្មើរជើង ឬហៅថា Skywalk៕

ដើម្បីចូលរួមលើកកម្ពស់សុខុមាលភាពផ្លូវចិត្តក្នុងសហគមន៍ដែលជាចំណែកមួយនៃកម្មវិធីទំនួលខុសត្រូវសង្គម (CSR) និងដើម្បីបង្កើនទំនាក់ទំនងក្នុងសហគមន៍ឱ្យកាន់តែល្អប្រសើរ  ក្រុមហ៊ុន ប៉េង ហួត គ្រុប បានរៀបចំកម្មវិធី “ការពង្រឹងថាមពលផ្លូវចិត្តក្នុងសហគមន៍ បុរី ប៉េង ហួត” ដោយមានការចូលរួមពី ភិក្ខុវជិរប្បញ្ញោ គូ សុភាព និង លោក នឹម ឈុន្នី ជាស្ថាបនិក និងជានាយកប្រតិបត្តិនៃក្រុមហ៊ុនបណ្ដុះបណ្តាល  វិបស្សា (VIPASSA) ជូនដល់បងប្អូនរស់នៅក្នុងគម្រោងបុរី ប៉េង ហួត និងសាធារណជន ចូលរួមដោយសេរី ដែលរៀបចំឡើងស្ថិតក្នុងទីតាំង  សួន អេកូ ផាក គម្រោង ហ្រ្គេនស្តា ផ្លាទីនីម អេកូ ខូលិកសិន   នារល្ងាចថ្ងៃទី១៨ ខែមករា ឆ្នាំ២០២៤។

អង្គការសុខភាពពិភពលោក (WHO) បានលើកឡើងថា សុខភាពផ្លូវចិត្តល្អមានសារៈសំខាន់ចំពោះសុខុមាលភាពទូទៅ។ បច្ចុប្បន្នមនុស្សម្នាក់ក្នុងចំណោមប្រាំបីនាក់នៅទូទាំងពិភពលោកកំពុងរស់នៅជាមួយនឹងស្ថានភាពប៉ះទង្គិចសុខភាពផ្លូវចិត្ត ដែលអាចប៉ះពាល់ដល់សុខភាពផ្លូវកាយ សុខុមាលភាពនៃការរស់នៅរបស់ពួកគេ។ ស្ថានភាពសុខភាពផ្លូវចិត្តក៏កំពុងជះឥទ្ធិពលខ្លាំង និងមានអត្រាកំណើនខ្ពស់ទៅលើកុមារ និងមនុស្សវ័យជំទង់ផងដែរ។

ការធ្វើសមាធិជាមាគ៌ារបស់ព្រះពុទ្ធ និងជាសិល្ប៍វិធីមួយជួយសម្អាតចិត្ត ធ្វើឱ្យយើងមានចិត្តជ្រះថ្លា មានសេចក្តីសុខ និងសុភមង្គលក្នុងជីវិត។ ព្រឹត្តិការណ៍ដែលបានរៀបចំឡើងនេះគឺជាការយកចិត្តទុកដាក់លើការងារទំនួលខុសត្រូវសង្គម របស់ក្រុមហ៊ុន ប៉េង ហួត គ្រុប ដែលស្របតាមសសរស្តម្ភទាំង៣ របស់ខ្លួន ពោលគឺ “ការអប់រំ បរិស្ថាន និងសង្គម”៕

        ដោយៈ គង់ សូរិយា

        ប៉ារីសៈ លោកអេម៉ានូអែល ម៉ាក្រុង ប្រធានាធិបតីបារាំង បានថ្លែងកោតសរសើរកម្ពុជា ចំពោះការបញ្ជូនកងកម្លាំង ក្នុងបេសកកម្មរក្សាសន្តិភាព ជាមួយអង្គការសហប្រជាជាតិនិងបានចាត់ ទុកការបញ្ជូនកងកម្លាំងរបស់កម្ពុជា ជាវិភាគទានធំជាងគេនៅអាស៊ី។

លោកបានថ្លែងបែបនេះ ក្នុងសន្និសីទព័ត៌មានរួមជុំវិញដំណើរ បំពេញទស្សនកិច្ចជាផ្លូវការរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅរសៀលថ្ងៃព្រហស្បតិ៍ ទី១៨ ខែមករា ឆ្នាំ២០២៤។ប្រធានាធិបតីបារាំងបានថ្លែងបញ្ជាក់ថា “ខ្ញុំនៅទីនេះ សូមកោតសរសើរនូវវិភាគទានរបស់កម្ពុជា ជាមួយកងកម្លាំងរក្សាសន្តិភាពរបស់អង្គការសហប្រជាជាតិ ជាវិភាគទានធំជាងគេនៅអាស៊ី។ ការចូលរួម ចំណែកជាប្រវត្តិសាស្ត្រនោះ”។សម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា បានសម្រេ​ចបញ្ជូនកងកម្លាំង ចូលរួមក្នុងបេសកកម្មរក្សាសន្តិភាព ក្រោមឆ័ត្ររបស់អង្គការសហប្រជាជាតិ កាលពីឆ្នាំ២០០៦។ ចាប់តាំង ពីឆ្នាំ២០០៦ រហូតមកដល់បច្ចុប្បន្ន កម្ពុជាបានរួមចំណែកបញ្ជូនកងកម្លាំងទៅបំពេញបេសកកម្ម រក្សាសន្តិភាពចំនួន៩,២០៥នាក់ ក្នុងនោះនារី៧២៦នាក់ ទៅកាន់បេសកកម្មចំនួន១២ ក្នុងប្រទេសចំនួន១០៕

ដោយ: គង់ លាងហួរ
អន្តរជាតិ: តម្លៃអចលនទ្រព្យលំនៅដ្ឋាននៅទូទាំងទីក្រុងសំខាន់ៗចំនួន១៣ ដូចជាទីក្រុង Delhi ទីក្រុង Mumbai និងទីក្រុង Bengaluru បានកើនឡើង១៨,៨% ក្នុងអំឡុងខែតុលាដល់ខែធ្នូ ឆ្នាំ២០២៣ បើធៀបនឹងរយៈពេលដូចគ្នាក្នុងឆ្នាំ២០២២។

យោងតាមរបាយការណ៍របស់ក្រុមហ៊ុនអចលនទ្រព្យ Magicbricks បង្ហាញថា នៅត្រីមាសទី៤ តម្លៃអចលនទ្រព្យលំនៅដ្ឋាននៅទីក្រុង Gurugram កើនឡើង៣២,១% នៅទីក្រុង Greater Noida កើន៣១% នៅទីក្រុង Noida កើន២៦,១% និង នៅទីក្រុង Hyderabad កើនឡើង១៥,៨% ។របាយការណ៍នេះបានទាញយកទិន្នន័យរបស់អតិថិជន ដែលប្រើប្រាស់វេទិកាអចលនទ្រព្យ។ ការស្វែងរកអចលនទ្រព្យនៅលើវេទិកា បានកើនឡើង២% ក្នុងត្រីមាសទី៤ ខណៈដែលការផ្គត់ផ្គង់លំនៅដ្ឋានបានធ្លាក់ចុះ១៦,៩%បើធៀបនឹងរយៈពេលដូចគ្នាក្នុងឆ្នាំ២០២២ លើកលែងតែការផ្គត់ផ្គង់នៅទីក្រុងបុមបៃ និងទីក្រុង Hyderabad ដែលមានការកើនឡើង។

ទោះជាយ៉ាងណាក្តី បើផ្អែកលើមូលដ្ឋានប្រចាំត្រីមាស តម្រូវការបានធ្លាក់ចុះ១៦,៩% ដោយសារតែការកើនឡើងតម្លៃអចលនទ្រព្យ។ នេះបើយោងតាមរបាយការណ៍របស់ក្រុមហ៊ុនខាងលើ។

របាយការណ៍បានបង្ហាញទៀតថា ប្រជាជនឥណ្ឌានិយមចូលចិត្តទិញផ្ទះ ដែលមានទំហំធំទូលាយជាងមុន ហើយផ្ទះដែលមានតម្រូវការខ្ពស់បំផុត គឺផ្ទះដែលមានទំហំចន្លោះពី៧០ ទៅ១១៦ ម៉ែត្រការ៉េ។

របាយការណ៍នេះបានសន្និដ្ឋានថា ទីផ្សារលំនៅដ្ឋានតម្លៃសមរម្យបានរីកដុះដាលនៅទីក្រុង Ahmedabad និងទីក្រុង Kolkata ខណៈដែលប្រភេទអចលនទ្រព្យប្រណីតថ្លៃៗត្រូវបានគេស្វែងរកច្រើនបំផុតនៅក្នុងតំបន់ទីក្រុង Mumbai ទីក្រុងNew Delhi និងទីក្រុង Gurugram ជាដើម៕ប្រភព៖The Times of India៕

ដោយ: គង់ លាងហួរ
អន្តរជាតិ: នៅក្នុងរបាយការណ៍បច្ចុប្បន្នភាពប្រចាំត្រីមាស ដែលចេញផ្សាយក្នុងខែមករា ឆ្នាំ២០២៤ ស្ថាប័នវាយតម្លៃសេដ្ឋកិច្ចអាស៊ាន AMRO បានរក្សាការព្យាករណ៍ថា សេដ្ឋកិច្ចកម្ពុជានឹងសម្រេចបានកំណើនក្នុងរង្វង់៦,២ភាគរយ នៅឆ្នាំនេះ។

ស្ថាប័នខាងលើអះអាងថា កំណើនសេដ្ឋកិច្ចកម្ពុជា ដែលត្រូវបានព្យាករណ៍ក្នុងរង្វង់៦,២% គឺជាអត្រាខ្ពស់ជាងទី២ ក្នុងតំបន់អាស៊ាន បន្ទាប់ពីកំណើនសេដ្ឋកិច្ចហ្វីលីពីន ដែលត្រូវបានព្យាករណ៍ក្នុងរង្វង់៦,៣ភាគរយសម្រាប់ឆ្នាំ២០២៤ដូចគ្នា។

ស្ថាប័នវាយតម្លៃសេដ្ឋកិច្ចអាស៊ាន បន្តថា អត្រាអតិផរណានៅប្រទេសកម្ពុជា ក៏ត្រូវបានគេរំពឹងទុកផងដែរថា នឹងស្ថិតក្នុងកម្រិតស្ថិរភាពត្រឹម៣,១% នៅឆ្នាំ២០២៤នេះ។ទោះជាយ៉ាងនេះក្តី ស្ថាប័ន AMRO បានក្រើនរំលឹកថា ការនាំចេញសេវាកម្មនៅទូទាំងតំបន់អាស៊ាន+៣ (ចិន ជប៉ុន និងកូរ៉េខាងត្បូង) បានកើនលើសពីតម្លៃនៅចុងឆ្នាំ២០១៩ រួចទៅហើយ លើកលែងតែប្រទេសមួយចំនួន ដូចជាថៃ និងកម្ពុជាប៉ុណ្ណោះ ដោយសារប្រទេសទាំង២ ពឹងផ្អែកខ្លាំងលើវិស័យទេសចរណ៍។

របាយការណ៍បានបន្ថែមថា “ការស្ទុះងើបឡើងវិញយ៉ាងពេញលេញនៃវិស័យទេសចរណ៍ដល់កម្រិតមុនជំងឺកូវីដ-១៩ ត្រូវបានគេរំពឹងថា នឹងលេចចេញជារូបរាងឡើងក្នុងឆ្នាំ២០២៤នេះ”។លោក Hoe Ee Khor ប្រធានសេដ្ឋវិទូរបស់ស្ថាប័ន AMRO បានលើកឡើងថា “ការងើបឡើងវិញនៃវដ្តបច្ចេកវិទ្យាសកលកំពុងចាប់ផ្តើមជះឥទ្ធិពលទៅក្នុងដំណើរការនាំចេញក្នុងតំបន់ ជាពិសេសសម្រាប់ការនាំចេញគ្រឿងអេឡិចត្រូនិក”។

ប៉ុន្តែ លោកបន្ថែមថា “ការនាំចេញដែលពុំមែនជាផ្នែកបច្ចេកវិទ្យា មានការងើបឡើងវិញយឺតយ៉ាវ ដែលនេះជាមូលហេតុនាំឱ្យការស្ទង់មតិផ្នែកផលិតកម្មនាពេលថ្មីៗនេះស្ថិតក្នុងភាពមិនច្បាស់លាស់”៕ប្រភព៖AMRO៕

ដោយ: គង់ លាងហួរ
ប៉េកាំង: លោកស្រី Kristalina Georgieva នាយកគ្រប់គ្រងនៃមូលនិធិរូបិយវត្ថុអន្តរជាតិ (IMF) បានអះអាងកាលពីថ្ងៃពុធ ទី១៧ ខែមករា ថា កំណើនសេដ្ឋកិច្ចចិននៅឆ្នាំ២០២៣ គឺជាដំណឹងល្អសម្រាប់ប្រទេសចិន និងពិភពលោក។

លោកស្រី Kristalina Georgieva បានថ្លែងប្រាប់សារពត៌មាន Xinhua នៅខាងក្រៅកិច្ចប្រជុំប្រចាំឆ្នាំលើកទី៥៤ នៃវេទិកាសេដ្ឋកិច្ចពិភពលោក នៅទីក្រុង Davos ថា “សេដ្ឋកិច្ចចិនសម្រេចបានកំំណើនស្របតាមគោលដៅ ដែលបានកំណត់ក្នុងរង្វង់ប្រហែល៥ភាគរយ ហើយលើសពីគោលដៅទៅទៀត”។លោកស្រីបន្តថា “នោះគឺជាដំណឹងដ៏ល្អសម្រាប់ប្រទេសចិនហើយក៏ជាដំណឹងល្អសម្រាប់តំបន់អាស៊ី និង ពិភពលោក ផង ដែរ ព្រោះ ប្រទេស ចិន គ្របដណ្តប់ មួយ ភាគ បី នៃ កំណើនសេដ្ឋកិច្ចពិភពលោក”។

ការិយាល័យស្ថិតិជាតិរបស់ប្រទេសចិនបានប្រកាសថា កាលពីឆ្នាំ២០២៣ សេដ្ឋកិច្ចរបស់ប្រទេសនេះ បានកើនឡើង៥,២ភាគរយ ដល់ទំហំទឹកប្រាក់១២៦,០៦ទ្រីលានយ័ន (ប្រហែល១៧,៧១ទ្រីលានដុល្លារ)។

លោកស្រី Georgieva បានកត់សម្គាល់ថា រដ្ឋាភិបាលចិនកំពុងផ្តោតលើការផ្លាស់ប្តូរឆ្ពោះទៅរកកំណើនដែលមានគុណភាពខ្ពស់ និងផ្លាស់ប្តូរគំរូកំណើន ពីគំរូតម្រង់ទិសជាចម្បងលើការនាំចេញ ទៅជាគំរូថ្មី ដែលការប្រើប្រាស់ដើរតួនាទីកាន់តែធំ។លោកស្រីបានមានប្រសាសន៍ថា “យើងគឺជាដៃគូដ៏ល្អជាមួយប្រទេសចិន។ ប្រទេសចិនមានសក្តានុពលដ៏អស្ចារ្យក្នុងការបញ្ចេញផលិតភាពកាន់តែច្រើន និងបង្កើតកម្លាំងពលកម្មដែលមានផលិតភាពកាន់តែច្រើន”។

យោងតាមនាយកគ្រប់គ្រងនៃមូលនិធិរូបិយវត្ថុអន្តរជាតិរូបនេះ បានឱ្យដឹងថា “កំណែទម្រង់ ការបើកចំហ និងសមាហរណកម្មនៅក្នុងសេដ្ឋកិច្ចពិភពលោក គឺជាផ្លូវដ៏ត្រឹមត្រូវសម្រាប់ប្រទេសចិនដើរទៅមុខបន្ត”។

កាលពីខែវិច្ឆិកា ឆ្នាំមុន មូលនិធិ IMF បានបង្កើនការព្យាករណ៍សម្រាប់កំណើនសេដ្ឋកិច្ចចិន កើនឡើងដល់៤,៦ភាគរយក្នុងឆ្នាំ២០២៤ បើធៀបនឹងការព្យាករណ៍ក្នុងរង្វង់៤,២ភាគរយ កាលពីខែតុលា ឆ្នាំមុនដូចគ្នា៕ប្រភព៖Xinhua៕