ដោយ: គង់ លាងហួរ

អន្តរជាតិ: ប្រទេសឥណ្ឌាបានត្រៀមខ្លួនរួចជាស្រេច ដើម្បីឈានទៅក្លាយជាមហាអំណាចសេដ្ឋកិច្ចទី៣ របស់ពិភពលោកក្នុងរយៈពេលប៉ុន្មានឆ្នាំខាងមុខនេះ។

ប៉ុន្តែតើ​ផលទុនជាតិសរុប (GDP) ប្រទេស​ឥណ្ឌា​ឈរនៅលំដា​ប់ណា ​ក្នុង​បណ្តាប្រទេស​មហាអំណាចសេដ្ឋកិច្ច ​កំពូល​ទាំង​១០​របស់​ពិភពលោក​នាបច្ចប្បន្ន?។

កាលពីឆ្នាំ២០២៣កន្លងទៅ សហរដ្ឋអាមេរិក និងប្រទេសចិននៅតែជាមហាអំណាចសេដ្ឋកិច្ចលេខ១ និងលេខ២នៅលើពិភពលោក ខណៈជប៉ុនបានបាត់បង់តំណែង ជាមហាអំណាចសេដ្ឋកិច្ចទី៣ទៅឱ្យអាល្លឺម៉ង់ ហើយឥណ្ឌាឈរនៅលេខរៀងទី៥។

ចំណែក ខាងក្រោមនេះគឺជាបណ្តាប្រទេសទាំង១០ ដែលនឹងមានទំហំសេដ្ឋកិច្ចធំជាងគេ នៅលើពិភពលោក ដោយផ្អែកលើការព្យាករណ៍របស់មូលនិធិរូបិយវត្ថុអន្តរជាតិ(IMF)។

មហាអំណាចទី១
ផលទុនជាតិសរុប(GDP) របស់សហរដ្ឋអាមេរិក មានទំហំទឹកប្រាក់ចំនួនជាង២៧,៣៦ទ្រីលានដុល្លារក្នុងឆ្នាំ២០២៣ ហើយនៅឆ្នាំ២០២៤GDP របស់ប្រទេសនេះ នឹងកើនឡើងដល់ទំហំជាង២៨,៧៨​ទ្រីលានដុល្លារ។

មហាអំណាចទី២
ចំណែកផលទុនជាតិសរុប(GDP) របស់ប្រទេសចិន មានទំហំទឹកប្រាក់ចំនួនជាង១៧,៦៦ទ្រីលានដុល្លារ ក្នុងឆ្នាំ២០២៣ ហើយនៅឆ្នាំ២០២៤ GDP របស់ប្រទេសនេះ នឹងកើនឡើងដល់ទំហំជាង១៨,៥៣ទ្រីលានដុល្លារ។

មហាអំណាចទី៣
រីឯផលទុនជាតិសរុប(GDP) របស់ប្រទេសអាល្លឺម៉ង់ មានទំហំទឹកប្រាក់ចំនួនជាង៤,៤៦ទ្រីលានដុល្លារក្នុងឆ្នាំ២០២៣ ហើយនៅឆ្នាំ២០២៤ GDP របស់ប្រទេសនេះ នឹងកើនឡើងដល់ទំហំជាង៤,៥៩ទ្រីលានដុល្លារ។

មហាអំណាចទី៤
ងាកមកកាន់ប្រទេសជប៉ុន(GDP) របស់ប្រប្រទេសនេះមានទំហំទឹកប្រាក់ចំនួន ជាង៤,២១ទ្រីលានដុល្លារក្នុងឆ្នាំ២០២៣ ហើយនៅឆ្នាំ២០២៤ GDP របស់ប្រទេសនេះ នឹងធ្លាក់ចុះមកនៅត្រឹមទំហំជាង៤,១១ទ្រីលានដុល្លារ។

មហាអំណាចទី៥
ផលទុនជាតិសរុប(GDP) របស់ប្រទេសឥណ្ឌា មានទំហំទឹកប្រាក់ចំនួនជាង៣,៥៧ទ្រីលានដុល្លារ ក្នុងឆ្នាំ២០២៣ ហើយនៅឆ្នាំ២០២៤ GDP របស់ប្រទេសនេះ នឹងកើនឡើងដល់ទំហំជាង៣,៩៤ទ្រីលានដុល្លារ។

មហាអំណាចទី៦
ចំណែកផលទុនជាតិសរុប(GDP) របស់ប្រទេសអង់គ្លេសមានទំហំទឹកប្រាក់ ចំនួនជាង៣,៣៤ទ្រីលានដុល្លារក្នុងឆ្នាំ២០២៣ ហើយនៅឆ្នាំ២០២៤GDP របស់ប្រទេសនេះ នឹងកើនឡើងដល់ទំហំជាង៣,៤៩ទ្រីលានដុល្លារ។

មហាអំណាចទី៧
ចំណែកផលទុនជាតិសរុប(GDP) របស់ប្រទេសបារាំង មានទំហំទឹកប្រាក់ ចំនួនជាង៣,០៣ទ្រីលានដុល្លារក្នុងឆ្នាំ២០២៣ ហើយនៅឆ្នាំ២០២៤ GDP របស់ប្រទេសនេះ នឹងកើនឡើងដល់ទំហំជាង៣,១៣ទ្រីលានដុល្លារ។

មហាអំណាចទី៨
ចំណែកប្រទេសនៅតំបន់អឺរ៉ុប (GDP) របស់ប្រទេសអ៊ីតាលី មានទំហំទឹកប្រាក់ ចំនួនជាង២,២៥ទ្រីលានដុល្លារ ក្នុងឆ្នាំ២០២៣ ហើយនៅឆ្នាំ២០២៤ GDP របស់ប្រទេសនេះ នឹងកើនឡើងដល់ទំហំជាង២,៣២ទ្រីលានដុល្លារ។

មហាអំណាចទី៩
GDP របស់ប្រទេសប្រេស៊ីល មានទំហំទឹកប្រាក់ចំនួនជាង២,១៧ទ្រីលានដុល្លារក្នុងឆ្នាំ២០២៣ ហើយនៅឆ្នាំ២០២៤ GDP រប​ស់ប្រទេសនេះ នឹងកើនឡើងដល់ទំហំជាង២,៣៣ទ្រីលានដុល្លារ។

មហាអំណាចទី១០
រីឯផលទុនជាតិសរុប(GDP) របស់ប្រទេសកាណាដាមានទំហំទឹកប្រាក់ចំនួន ជាង២,១៤ទ្រីលានដុល្លារក្នុងឆ្នាំ២០២៣ ហើយនៅឆ្នាំ២០២៤GDP របស់ប្រទេសនេះ នឹងកើនឡើងដល់ទំហំជាង២,២៤​ទ្រីលានដុល្លារ៕ប្រភព: Times of India៕

ដោយ: គង់ លាងហួរ

អន្តរជាតិ: សហរដ្ឋអាមេរិកកំពុងខិតខំប្រកួតប្រជែង និងព្យាយា មតាមឱ្យទាន់ បណ្តាប្រទេសជាច្រើននៅលើពិភពលោក ជាពិសេសប្រទេសចិន ក្នុងការសាងសង់ផ្លូវរថភ្លើងល្បឿនលឿន។ ប៉ុន្តែ បរិបទរវាងប្រទេសមហាអំណាចទាំង២ មានភាពខុសគ្នាយ៉ាងខ្លាំង។

តួយ៉ាង កាលពីខែមេសាកន្លងទៅ គម្រោងខ្សែរថភ្លើងល្បឿនលឿនដំបូងគេរបស់អាមេរិក បានបើកការដ្ឋានសាងសង់ ដែលនឹងដឹកជញ្ជូនអ្នកដំណើរ រវាងទីក្រុង Las Vegas និងទីក្រុង Los Angelesភាគខាងត្បូងនៃរដ្ឋ California តាមបណ្តោយផ្លូវដែកប្រវែង៣៥០,៨៤គីឡូម៉ែត្រ។

លើសពីនេះ គម្រោងរថភ្លើងមួយចំនួនផ្សេងទៀត ត្រូវបានស្នើឡើង រួមទាំង ផែនការសាងសង់ ខ្សែរថភ្លើងល្បឿនលឿន ដែលតភ្ជាប់ទីក្រុង Dallas ទៅកាន់ទីក្រុង Houston និងទីក្រុង Fort Worth ក្នុងរដ្ឋតិចសាស់។

ប៉ុន្តែទោះជាយ៉ាងណាក្តី បណ្តាញផ្លូវរថភ្លើងល្បឿនលឿនរបស់សហរដ្ឋអាមេរិក មានប្រវែងខ្លីណាស់ បើប្រៀបធៀបទៅនឹងប្រទេសចិន ដែលជាដៃគូប្រកួតប្រជែង ផ្នែកភូមិសាស្ត្រនយោបាយដ៏សំខាន់បំផុតរបស់ខ្លួននាពេលបច្ចុប្បន្ន។

យោងតាមគេហទំព័រ ​​Statista បានឱ្យដឹងថា គិតមកទល់នឹងឆ្នាំ២០២១ បណ្តាញផ្លូវដែកល្បឿនលឿន របស់ប្រទេសចិនបានលាតសន្ធឹងប្រវែង ប្រមាណ៤០,២៣៤គីឡូម៉ែត្រទូទាំងប្រទេស។

ផ្ទុយទៅវិញ សហរដ្ឋអាមេរិក មិនទាន់បានបើកដំណើការផ្លូវរថភ្លើងល្បឿនលឿនរបស់ខ្លួន សូម្បីតែ១ខ្សែនៅឡើយទេ។ ជាទូទៅ ផ្លូវរថភ្លើង ដែលដឹកអ្នកដំណើរក្នុងល្បឿនចាប់ពី២០០ ទៅ៣៥៤គីឡូ ម៉ែត្រក្នុងមួយម៉ោង ទើបអាចហៅថាជា ផ្លូវរថភ្លើងល្បឿនលឿនបាន។

ការសាងសង់ផ្លូវរថភ្លើងល្បឿនលឿន ដំបូងគេបង្អស់ទី១របស់សហរដ្ឋអាមេរិក ត្រូវបានគេរំពឹងទុកថា នឹងបញ្ចប់នៅឆ្នាំ២០២៨ខាងមុខ គឺជាពេលដែលទីក្រុង Los Angeles នឹងត្រូវធ្វើជាម្ចាស់ផ្ទះប្រកួតកីឡាអូឡាំពិក។

ម្យ៉ាងទៀត ក្រុមហ៊ុនឧស្សាហកម្មឯកជន មានតួនាទីសំខាន់ក្នុងការសាងសង់ និងគ្រប់គ្រងផ្លូវដែកនៅសហរដ្ឋអាមេរិក។ ប៉ុន្តែនៅក្នុងប្រទេសចិន បណ្តាញផ្លូវដែកស្ទើរតែទាំងស្រុង ត្រូវបានគ្រប់គ្រងដោយក្រុមហ៊ុនរដ្ឋចិន China State Railway Group។ នៅក្នុងឆ្នាំ២០២១ ក្រុមហ៊ុននេះរកបានប្រាក់ចំណេញ សុទ្ធចំនួន៤,៨ពាន់លានយ័ន (ប្រហែល៦៦៤លានដុល្លារ)។

បន្ថែមពីលើនោះ គម្រោងខ្សែរថភ្លើងល្បឿនលឿនជាច្រើន ដែ​លត្រូវបានស្នើសាងសង់ឡើង នៅក្នុងសហរដ្ឋអាមេរិកកំពុងស្ថិតក្នុងដំណាក់កាលដំបូងនៃការអភិវឌ្ឍន៍ ហើយមិនទាន់សម្រេចបានការអនុម័តចុងក្រោយនៅឡើយទេ ដោយក្នុងនោះ ព័ត៌មានលម្អិតសំខាន់​ៗមួយចំនួនមានភាពមិនច្បាស់លាស់៕ប្រភព: Newsweek៕

ដោយៈ ស៊ីវ ម៉េង

        ភ្នំពេញៈ អ្នកជំនាញបានលើកឡើងថា កង្វះបទបញ្ញត្តិមួយចំនួន បានធ្វើឲ្យម្ចាស់អាគារមួយចំនួន មិនអាចលក់ចេញទីឲៅអ្នកវិនិយោគទី២បាន បន្ទាប់ពីពួកគេបានសាងសង់បញ្ចប់។

អ្នកជំនាញ និងវិភាគអចលនទ្រព្យ លោកប៉ូ អ៊ាវគង់អគ្គនាយកក្រុមហ៊ុនAdvance Real Estateបានមានប្រសាសន៍ឲ្យដឹងកាលពី​សប្តាហ៍មុនថា ដោយសារបញ្ហាវិបត្តិក្នុងវិស័យនេះ បានធ្វើឲ្យម្ចាស់គំរោងមួយចំនួន បានដាក់លក់អាគាររបស់ខ្លួននៅក្នុងទីផ្សារ ដែលម្ចា​ស់អាគារខ្លះ បានដាក់លក់ក្នុងតម្លៃល្អ ប៉ុន្តែនៅពេលយើងសិក្សាសម្រា​ប់ការទិញពីអ្នកវិនិយោគទី២ បានរកឃើញថា គំរោងទិញលើអាគា​រ​មួយចំនួនបានជាប់គាំង ដោយសារកង្វះបទបញ្ញត្តិ​មួយចំនួន។

លោកបញ្ជាក់ថា “ម្ចាស់អាគារធំៗមួយចំនួន បានបញ្ចុះតម្លៃលក់ ប៉ុន្តែឯកសារផ្លូវច្បាប់របស់ពួកគេមិនគ្រប់គ្រាន់ ដូចជាទាក់ទងនឹងឯកសារផ្លូវច្បាប់ និងការងារពាក់ព័ន្ឋពន្ឋដា”។ លោកបន្តថា “មានអ្នកអភិវឌ្ឍន៍មួយចំនួន ដែលគំរោងរបស់ពួកគេមួយចំនួន មានតម្លៃរាប់រយលានដុល្លារ ប៉ុន្តែនៅពេលយើងសិក្សារួចបានរកឃើញថា ពួកគេខ្វះឯកសារប្រកាសពន្ឋ និងឯកសារច្បាប់មួយចំនួនទៀតមិនមានគ្រប់គ្រាន់”។

លោកប៉ូ អ៊ាវគង់បានបន្តថា ការមិនអនុវត្តកាតព្វកិច្ចមួយ ដែលមិនមានឯកសារគ្រប់គ្រាន់ បានធ្វើឲ្យការទិញ លក់ជាប់គាំង ឬធ្វើឲ្យអ្នកវិនិយោគដទៃទៀតបាត់បង់ទំនុកចិត្ត ហើយគំរោងទាំងនោះភាគច្រើនជាគំរោងរបស់អ្នកវិនិយោគចិន។

លោកបានលើកទឹកចិត្តអ្នកអភិវឌ្ឍន៍មួយចំនួន ដែលមានបញ្ហាខាងលើនេះ គួររៀបចំឯកសារផ្លូវច្បាប់ឲ្យបានគ្រប់គ្រាន់ ទាំងច្បាប់សំណង់ ​និងច្បាប់ពន្ឋដា ដើម្បីឲ្យពួកគេអាចដំណើរការគំរោងរបស់ពួកគេដំណើរការបានរលូន និងបើមានបញ្ហាហើយចង់លក់ចេញ ពួកគេអាចលក់បានដោយជោគជ័យ។

នៅរាជធានីភ្នំពេញ មានគំរោងអាគារមួយចំនួនបានជាប់គាំងដូចជា Gold Tower 42 , Sino Plaza, អាគារខុនដូមួយនៅតំបន់ជ្រោយចង្វារ និងគំរោងមួយចំនួនទៀត ដែលបានសាងសង់បញ្ចប់តែមិនអាចដំណើរការបាន ពិសេសក្រុងព្រះសីហនុ មានអាគាររាប់រយបានជាប់គាំងនៅទីក្រុងមួយនេះ៕

បាងកក៖ តុលាការធម្មនុញ្ញរបស់ប្រទេសថៃអាចនឹងពិចារណាដកតំណែងលោកស្រេថា ថាវីស៊ីជានាយករដ្ឋមន្រ្តីថៃបន្ទាប់ពីក្រុមសភាថៃបានធ្វើការប្តឹងផ្តល់ទៅតុលាការកំពូលថៃចោទលោក ស្រេថា ថាវីស៊ីន ពីបទតែងតាំងមន្រ្តីថ្មីដែលធ្លាប់ជាប់ពន្ធនាគារកាលពីកន្លងទៅពីបទសូបប៉ាន់ក្នុងទំហំទឹកប្រាក់ប្រមាណជាង ៥ម៉ឺនដុល្លារ។ ការសម្រេចនេះ ធ្វើឡើងក្រោមសំឡេងគាំទ្រពីសមាជិកតុលាការចំនួន៥ លើ៩ ដោយតុលាការបានទាមទារឱ្យលោកស្រេថា ដាក់ឯកសារការពារក្នុងរយៈពេល ១៥ថ្ងៃបន្ទាប់។

តុលាការធម្មនុញ្ញនៃប្រទេសថៃនៅថ្ងៃសុក្រនេះបានទទួលយកពាក្យបណ្តឹងពីសមាជិកព្រឹទ្ធសភាថៃជុំវិញការចោទប្រកាន់លោកស្រេថា ថាវីស៊ីនដែលបានតែងតាំងមន្រ្តីធ្លាប់ជាពន្ធនាគារ។ ក្នុងពាក្យបណ្តឹងនោះក៏បានទាមទារឱ្យដកតំណែងលោក Pichit Chuenban ពីតំណែងរដ្ឋមន្រ្តីទទួលបន្ទុកការិយាល័យនាយករដ្ឋមន្រ្តី។ ភ្លាមៗលោក Pichit Chuenban ក៏បានលាលែងពីតំណែងជារដ្ឋមន្រ្តីទទួលបន្ទុកការិយាល័យនាយករដ្ឋមន្រ្តី។

សមាជិកព្រឹទ្ធសភាទាំង ៤០រូប បានអះអាងលោក ស្រេថា បានតែងតាំងលោក Pichit Chuenban រដ្ឋមន្រ្តីទទួលបន្ទុកការិយាល័យនាយករដ្ឋមន្រ្តី បើទោះបីជាលោកបានដឹងថា តុលាការកាលពីឆ្នាំ ២០០៨ បានកាត់ទោសឲ្យលោកឱ្យជាប់ពន្ធនាគាររយៈពេល ៦ ខែ ពីបទប៉ុនប៉ងសូកប៉ាន់មន្ត្រីតុលាការកំពូលក្នុងទឹកប្រាក់ចំនួន ២ លានបាត (ប្រហែល ៦១,៥០០ ដុល្លារ) ការសូកប៉ាន់នេះធ្វើឡើងនៅពេលដែលលោកកំពុងបម្រើការជាមេធាវីរបស់អតីតនាយករដ្ឋមន្ត្រីថាក់ស៊ីន ស៊ីណាវ៉ាត្រា៕

ដោយៈ និស្ស័យ

ភ្នំពេញៈ រដ្ឋមន្រ្តី​ក្រសួង​បរិស្ថាន លោកអ៊ាង សុផល្លែត បាន​ប្រកាស​នឹង​ចូលរួម​ សហការ​ជាមួយ​អាជ្ញាធរ​ដែនដី បើ​សិនមានការ​ស្នើ​សុំផ្តល់​កូនត្នោត​ ដើម្បី​យកទៅ​ដាំ​លម្អនៅ​លើ​ដង​មហាវិថី​ថ្មី​ ទៅ​កាន់​ព្រលាន​យន្តហោះ​តេជោ​តាខ្មៅ ​ដែលកំពុង​ដំណើរការ​សាងសង់បានជាង៧០ភាគរយ។

ឆ្លើយតបសំនួរ​របស់​អ្នកសារព័ត៌មាន ​ក្នុង​សន្និសីទ “ពិព័រណ៍​ផ្សព្វផ្សាយ​និង​ចែក​កូនឈើ​” កាល​ថ្ងៃ ២០ ឧសភា លោក អ៊ាង សុផល្លែត​បាន​ឲ្យ​ដឹង​ថា ក្រសួង​បរិស្ថាន​រីករាយ សហការផ្តល់ជូនកូន​ត្នោតដល់មន្រ្តីមូលដ្ឋាន ​ដើម្បី​​យកទៅ​ដាំ​នៅ​តាម​ដង​មហាវិថី​ថ្មី​ កំពុង​សាងសង់​ទៅ​ព្រលាន​យន្តហោះ​តេជោ​តាខ្មៅ​។

លោករដ្ឋមន្រ្តី​បានលើកឡើង​ថា លោក​​ជំរុញនិងលើកទឹកចិត្តដល់ប្រជាពលរដ្ឋកម្ពុជា ឱ្យដាំដើមរុក្ខជាតិ​របស់ជាតិ​គឺដើមត្នោត តាមរយៈការចែកជូន កូនត្នោតជាង៣០ម៉ឺនក្នុង១ឆ្នាំ ដោយឥតគិតថ្លៃ បន្ថែមការចែកជូនកូនឈើជាង១​លាន​ដើមទៀត ​ជូនប្រជាពលរដ្ឋកម្ពុជា ដើម្បីដាំនិងស្តារព្រៃឈើឡើងវិញឱ្យបានជាង៦០% នៅឆ្នាំ២០៥០​។

លោកបន្ត​ថា ដើម​ត្នោត​ជា​អត្តសញ្ញាណ​ជាតិ​ ដែល​បាន​ផ្សារ​ភ្ជាប់​ទៅ​វប្បធម៌​ របស់​ជនជាតិ​ខ្មែរ​តាំង​ពី​កកើត​ទឹកដី​មក។ ​ការ​ដាំ​ដើមត្នោត​ប្រយោជន៍ ​​ជួយផ្សព្វផ្សាយ​តម្លៃវប្បធម៌ជាតិខ្មែរ និង​បង្កើន​​ការ​​ចាប់អារម្មណ៍​​ ដល់ទេសចរ​​​បរទេស​ បាន​ស្គាល់​ពី​រុក្ខជាតិ​ជា​អត្តសញ្ញាណ​របស់​ដូនតាខ្មែរ​ នៅ​ពេល​ធ្វើ​ដំណើរ​មក​​ប្រទេស​កម្ពុជា។

អនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកា​សចរណ៍ស៊ីវិល លោក ស៊ីន ចាន់សិរីវុត្ថា បានមានប្រសាសន៍ឲ្យដឹងថា ការ​ដាំ​រុក្ខជាតិ​ណាមួយ​ ក្នុង​បរិវេណ​ព្រលានយន្តហោះ ​ត្រូវ​មាន​ការ​សិក្សា​ច្បាស់លាស់ ដើម្បី​កុំ​ឲ្យ​ប៉ះពាល់​ដល់​សុវត្ថិភាព​នៃ​ការ​ហោះហើរ។

ទាក់ទង​ការ​បំផុស​គំនិត​យក​ដើម​ត្នោត​ មក​ដាំ​លម្អ​នៅ​តាម​ដង​មហាវិថី​ថ្មី ​ទៅ​ព្រលាន​យន្តហោះ​នៅ​ក្រុង​តាខ្មៅ​ បើតាមមន្រ្តីអាកាសចរស៊ីវិលបានបញ្ជាក់ថា “កិច្ចការ​នេះ​ពាក់ព័ន្ធ​អាជ្ញាធរ​ដែនដី មិន​ស្ថិត​នៅ​ក្នុង​ការ​គ្រប់គ្រង​​របស់​អាជ្ញាធរ​ព្រលាន​នោះ​ទេ”។

ក្នុង​គម្រោង​អភិវឌ្ឍ​​ព្រលាន​យន្តហោះ​តេជោ​តាខ្មៅ​ ​មាន​ការ​ស្ថាបនា​មហាវិថី​ថ្មី ​ត​ភ្ជាប់​ពី​មហាវិថី​សម្តេច​តេជោ ហ៊ុន សែន ឬ​ផ្លូវ ​៦០ ​ម៉ែត្រ​ ឆ្ពោះ​ទៅ​ព្រលាន​យន្តហោះ​តេជោ​តាខ្មៅ ដែល​មាន​ប្រវែង​ជាង ​១៣គីឡូម៉ែត្រ។ មហាវិថី​ថ្មី​នេះសាងសង់​ កាត់ភូមិសាស្រ្ត​ខេត្តកណ្តាល ​តភ្ជាប់​​ពីព្រលានយន្តហោះ​តេជោតាខ្មៅ ​​ឆ្លង​កាត់​ផ្លូវ​ក្រវាត់​ក្រុង​ទី ៣ និង​ផ្លូវ​ជាតិ​លេខ២ ភ្ជាប់​មក​មហាវិថី​សម្តេច​តេជោ (​ឬ​ផ្លូវ ៦០ ម៉ែត្រ)។

លោក ឌឹម បូរ៉ា មន្រ្តីអ្នកនាំពាក្យរដ្ឋបាលខេត្តកណ្តាល​បាន​ឲ្យកម្ពុជាថ្មី​ដឹង​ថា ចំពោះការដាំដើម​ត្នោត នៅ​លើ​មហាវិថី​ថ្មី​ក្នុង​ភូមិសា​ស្រ្ត​ខេត្តកណ្តាល​តភ្ជាប់ ទៅព្រលានយន្តហោះតេជោតាខ្មៅ​ រដ្ឋបាល​ខេត្ត ​ពុំទាន់ទទួលបាន​ព័ត៌មានជាក់លាក់នៅ​ឡើយ​​ទេ។

លោកបញ្ជាក់ថា “ចំពោះការដាំដើមត្នោតតាមមហាវិថី ទៅព្រលានយន្តហោះតេជោក្រុងតាខ្មៅ អាចថាគ្រោងនឹងដាំពីថ្នាក់ជាតិ សហការជាមួយក្រុមហ៊ុនធ្វើព្រលាន បើតាមការឲ្យដឹងពីមន្ទីរបរិស្ថានខេត្តកណ្តាល”។

យ៉ាងណាមិញ បើតាម​មន្រ្តីអ្នកនាំពាក្យ​រូបនេះ រដ្ឋបាល​ខេត្ត​បានបំផុសឲ្យរដ្ឋបាលក្រុង ស្រុក ដាំឈើក្នុងទីតាំងដីរបស់ក្រុងស្រុក ១ ម៉ឺនដើមក្នុង១ឆ្នាំ។ បច្ចុប្បន្ន រដ្ឋបាលខេត្តកណ្តាល ក៏កំពុង​រៀបចំ​ឲ្យ​មានឧទ្យានតាម​បបណ្តាក្រុងស្រុក​ទាំង១៣ ក្នុង​ខេត្ត។

ព្រលាន​យន្តហោះ​តេជោ​តាខ្មៅ​ គិតវឌ្ឍនភាព​មក​ដល់​ពេល​នេះ​សម្រេច​បាន​ជាង៧០ភាគរយ ដែល​គ្រោង​បញ្ចប់​ការ​សាងសង់​ដំណាក់​កាល​ទី១ និង​សម្ពោធ​ដាក់​ឲ្យ​ប្រើប្រាស់​​នៅ​ដើម​ឆ្នាំ២០២៥​៕

ដោយៈ គង់ សូរិយា

        ព្រះសីហនុៈ ពុទ្ឋបដិមាថ្មីមួយកំពស់រហូតដល់៨៨ម៉ែត្រ បានស្ថិតនៅក្នុងផែនការសាងសង់ នៅទីក្រុងBay of Light នៃក្រុងព្រះសីហនុ។

Buddha Park នឹងសាងសង់នាពេលខាងមុខ នៅក្នុងទីក្រុងBay of Light ដែលបាននិងកំពុងសាងសង់ តាមដំណាក់កាលលើផ្ទៃដីទំហំជាង៨០០ហិកតា និងគ្រោងចំណាយទុនវិនិយោគ រហូតដល់១៦ពាន់លានដុល្លារអាមេរិក។

រូបសំណាកពុទ្ឋបដិមាទ្រង់ឈរ និងទីតាំងសម្រាប់Buddha Parkត្រូវបានរចនា និងរៀបចំរួចហើយ ប៉ុន្តែការសាងសង់នាពេលណាមិនទាន់ កំណត់ពេលវេលាជាក់លាក់នៅឡើយទេ។ នេះប្រភពពីបុគ្គលិកជាន់ខ្ពស់ក្រុមហ៊ុនPrince Real Estate ដែលមានក្រុមហ៊ុនជាបុត្រសម្ព័ន្ឋរបស់ខ្លួន កំពុងអភិវឌ្ឍន៍អភិវឌ្ឍន៍គំរោងដ៏ធំនេះ។

ក្រុមហ៊ុនអភិវឌ្ឍន៍ទីក្រុងរាម ក៏បាននាំមកនូវAIM Congress Asia ដែលជាក្រុមហ៊ុនរៀបចំ ព្រឹត្តិការណ៍ធុរកិច្ចលំដាប់ពិភពលោក មកកាន់កម្ពុជាផងដែរ ដើម្បីទាក់ទាញការវិនិយោគពីអន្តរជាតិមកកាន់កម្ពុជា និងមកកាន់គំរោងទីក្រុងរាមនាពេលអនាគត។

Bay of Lightបាននិងកំពុងសាងសង់ហេដ្ឋារចនាសម្ព័ន្ឋជាច្រើន ពិសេសក្នុងដំណាក់កាលទី១ ដែលបាននិងកំពុងធ្វើឡើងលើផ្ទៃដីប្រមាណ៥០ហិកតា បាននិងកំពុងបើកដំណើរការគំរោងកម្សាន្តបណ្តើរៗហើយ សម្រាប់ភ្ញៀវទេសចរណ៍ជាតិ អន្តរជាតិ ដែលចង់ទៅសំរាក​លំហែរនៅទីក្រុងជាប់ឆ្នេរសមុទ្រ ស្ថិតនៅក្បែរព្រលានយន្តហោះអន្តរជាតិកងកេង ខេត្តព្រះសីហនុ៕

        ដោយៈ គង់ សូរិយា

        អន្តរជាតិៈ អនុប្រធានទី១នៃក្រុមប្រឹក្សាអភិវឌ្ឍន៍កម្ពុជា លោក ស៊ុន ចាន់ថុលបាននិងកំពុងទាក់ទាញក្រុមហ៊ុនជប៉ុនមកកាន់កម្ពុជា ដោយប្រទេសនេះ កំពុងងាកចេញពីការប្រើប្រាស់អតិពលកម្ម ទៅជាពលកម្ម ដែលមានជំនាញខ្ពស់។

លោកឧបនាយករដ្ឋមន្ត្រីបានថ្លែងបែបនេះ ក្នុងជំនួបជាមួយលោក Tsuyosi Hasabe ប្រធានក្រុមហ៊ុន Nikkei Incកាលពីថ្ងៃទី២៣ ឧសភាកន្លងមកនេះ។

ក្នុងជំនួបនោះ លោកឧបនាយករដ្ឋមន្ត្រី បានជម្រាបជូនអំពីគោលនយោបាយថ្មី ដែលដឹកនាំដោយសម្តេចធិបតី ហ៊ុន ម៉ាណែត ក្នុងការអភិវឌ្ឍប្រទេសឱ្យកាន់តែរីកចម្រើន ដើម្បីសម្រេចបានគោលដៅប្រែក្លាយកម្ពុជា ទៅជាប្រទេសមានចំណូលមធ្យមកម្រិតខ្ពស់ នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០ ក៏ដូចជាកត្តាអំណោយផលផ្សេងៗ ក្នុងការបណ្តាក់ទុនវិនិយោគនៅប្រទេសកម្ពុជា។

លោកឧបនាយករដ្ឋមន្ត្រី ក៏បានគូសបញ្ជាក់ពីការអភិវឌ្ឍហេដ្ឋារចនាសម្ព័ន្ធថ្មីៗ ដែលរាជរដ្ឋាភិបាលសម្រេចបាន និងផែនការថ្មីៗទៀតជាច្រើន រួមមាន គម្រោងសាងសង់ចំណតផែកុងតឺន័រទឹកជ្រៅថ្មីជំហានទី១ ប្រវែង៣៥០ម៉ែត្រ គម្រោងផ្លូវល្បឿនលឿនភ្នំពេញ-ក្រុងព្រះសីហនុ ការលើកកម្រិតផ្លូវជាតិលេខ៥ ពី២គន្លង ទៅ៤គន្លង គម្រោងសាងសង់ ផ្លូវល្បឿនលឿនភ្នំពេញ-បាវិត គម្រោងផែនការកសាងផ្លូវល្បឿនលឿនភ្នំពេញ -សៀមរាប- ប៉ោយប៉ែត និងគម្រោងព្រែកជីកហ្វូណនតេជោផងដែរ។

 បន្ថែមពីនេះ លោកឧបនាយករដ្ឋមន្ត្រី ក៏បានជម្រាបលោកប្រធានក្រុមហ៊ុនអំពីតួនាទី របស់ក្រុមប្រឹក្សាអភិវឌ្ឍន៍កម្ពុជា ក្នុងការផ្តល់កិច្ចសម្របសម្រួល ជូនដល់វិនិយោគិនដែលមកបណ្តាក់ទុនវិនិយោគនៅកម្ពុជា និងស្នើសុំឱ្យក្រុមហ៊ុនជប៉ុន មកបណ្តាក់ទុនរួមមាន វិស័យអេឡិចត្រូនិក វិស័យយានយន្ត និងបច្ចេកវិទ្យាជាដើម ដើម្បីជំរុញការប្រែក្លាយប្រទេសកម្ពុជា ពីការប្រើប្រាស់អតិពលកម្ម ទៅការប្រើប្រាស់ជំនាញបច្ចេកទេស សម្រាប់វិស័យឧស្សាហកម្ម។

លោកប្រធានក្រុមហ៊ុន បានបង្ហាញនូវចំណាប់អារម្មណ៍លើការអភិវឌ្ឍន៍យ៉ាងឆាប់រហ័ស របស់ព្រះរាជាណាចក្រកម្ពុជា និងបានប្តេជ្ញាចិត្តជួយផ្សព្វផ្សាយ និងណែនាំក្រុមហ៊ុនជប៉ុន ឱ្យបណ្តាក់ទុនវិនិយោគនៅប្រទេសកម្ពុជាផងដែរ៕

ដោយ: គង់ លាងហួរ

អន្តរជាតិ: យោងតាមសេចក្តីប្រកាសព័ត៌មានរបស់ការិយាល័យស្រាវជ្រាវម៉ាក្រូសេដ្ឋកិច្ចអាស៊ាន+៣ (AMRO) ចេញផ្សាយនៅថ្ងៃព្រហស្បតិ៍ ទី២៣ ខែឧសភា បានបង្ហាញថា សេដ្ឋកិច្ចកម្ពុជានឹងកើនឡើងយ៉ាងរឹងមាំនៅឆ្នាំ២០២៤ ដែលជំរុញដោយការកើនឡើងនៃការនាំចេញ និងការបន្តស្ទុះងើបឡើងវិញនៃវិស័យទេសចរណ៍។

លោក Jinho Choi សេដ្ឋវិទូជាន់ខ្ពស់របស់ស្ថាប័ន AMRO បានបញ្ជាក់នៅក្នុងសេចក្តីប្រកាសព័ត៌មានថា ​សេដ្ឋកិច្ចកម្ពុជាត្រូវបានព្យា​ករណ៍ថា នឹងកើនឡើង៥,៦% នៅឆ្នាំ២០២៤ និង៥,៩% នៅឆ្នាំ២០២៥ ដែលកើនឡើងពី៥% ក្នុងឆ្នាំ២០២៣។

លោកបានបន្ថែមថា “ការងើបឡើងវិញនៃវិស័យកាត់ដេរ កំនើនប្រកបដោយនិរន្តរភាព នៃការនាំចេញផលិតកម្មផ្សេងទៀត និងការបន្តស្ទុះងើបឡើងវិញនៃវិស័យទេសចរណ៍ នឹងគាំទ្រដល់ការងើបឡើងវិញនៃសេដ្ឋកិច្ចរបស់កម្ពុជា”។

ទោះជាយ៉ាងណាក្តី ដំណើរនៃការងើបឡើងវិញអាចរងផលប៉ះពាល់ពីហានិភ័យខាងក្រៅ និងភាពងាយរងគ្រោះក្នុងស្រុក ជាពិសេ​សការដាំក្បាលចុះ នៃវិស័យអចលនទ្រព្យ និងការធ្លាក់ចុះនៃគុណភាពឥណទាន។

ជាមួយគ្នានេះ លោក Hoe Ee Khor ប្រធានសេដ្ឋវិទូរបស់ការិយាល័យ AMRO បានមានប្រសាសន៍ឱ្យដឹងថា កម្ពុជាស្ថិតក្នុងចំណោមប្រទេស ដែលមានកំណើនសេដ្ឋកិច្ចលឿនបំផុត នៅក្នុងតំបន់អាស៊ាន។

លោកបានប្រាប់សារពត៌មាន Xinhua តាមរយៈសារអ៊ីមែល ថា “កំណើនក្នុងវិស័យកាត់ដេរនៅកម្ពុជា ត្រូវបានព្យាករណ៍ថា នឹងស្ទុះងើបឡើងវិញជាលំដាប់នៅឆ្នាំនេះ ដោយសារតម្រូវការដ៏រឹងមាំសម្រាប់ទំនិញប្រើប្រាស់ នៅក្នុងទីផ្សារជឿនលឿនធំៗ”។ លោកបន្ថែមថា “ដូចគ្នានេះដែរ វិស័យមិនមែនកាត់ដេរត្រូវបានព្យាករណ៍ថា នឹងរក្សាបាន នូវសន្ទុះកំណើនដ៏រឹងមាំរបស់ខ្លួន ដែលគាំទ្រដោយស្ថិរភាពនៃលំហូរវិនិយោគផ្ទាល់ពីបរទេស(FDI)”។

សេដ្ឋវិទូរូបនេះបានបន្តថា “ការស្ទុះងើបឡើងវិញនៃវិស័យទេស​ចរណ៍ ដែលជំរុញដោយការបង្កើនលទ្ធភាពជើងហោះហើរ និងការត្រឡប់មកវិញបន្តិចម្តងៗ នៃភ្ញៀវទេសចរណ៍បរទេស គួបផ្សំនឹងការប្រើប្រាស់ក្នុងស្រុក នឹងជំរុញឱ្យវិស័យសេវាកម្ម បង្ហាញសញ្ញាប្រសើរឡើងវិញជាបន្តបន្ទាប់”។

យ៉ាងណាមិញ លោក Hoe Ee Khor បានគូសបញ្ជាក់ថា វិស័យសំណង់អាចស្ទុះងើបឡើងវិញយឺតសន្សឹមៗ ដោយក្នុងនោះ អត្រាកំណើនមិនទាន់អាចវិលត្រឡប់ ទៅកាន់កម្រិតមុនផ្ទុះជំងឺរាតត្បាតនៅឡើយ ដោយសារការបន្តធ្លាក់ចុះនៃទីផ្សារអចលនទ្រព្យ។

លោក​បន្ថែមថា​ “ការ​ជំរុញ​ការ​វិនិយោគ​ហេដ្ឋារចនាសម្ព័ន្ធ​នឹង​ជួយប៉ះប៉ូវ​មួយ​ផ្នែក ​ដល់ការដាំក្បាលចុះក្នុង​វិស័យ​អចលនទ្រព្យ​”។

ចំណែកឯ អតិផរណាសន្ទស្សន៍តម្លៃទំនិញប្រើប្រាស់ (CPI) នៅកម្ពុជាត្រូវបានព្យាករណ៍ថា នឹងស្ថិតក្នុងរង្វង់ត្រឹម២,៥ភាគរយនៅឆ្នាំ២០២៤ និង២,៦ភាគរយនៅឆ្នាំ២០២៥ខាងមុខ៕ប្រភព: Xinhua៕