ដោយៈជេស៊ីកា
ភ្នំពេញៈ ក្រុមអ្នកជំនាញអន្តរជាតិបានអះអាងថា យុគមាសនឹងកើតមានជាថ្មីនៅកម្ពុជា ក្នុងរយៈពេល១០ឆ្នាំខាងមុខ ដោយសារកត្តាមួយចំនួន។

លោកDato Dr Albert Tanប្រធាននៃវេទិកាAPC ប្រចាំប្រទេសម៉ាឡេស៊ី និងអាស៊ីប៉ាស៊ីហ្វិកបានលើកឡើងក្នុងវេទិកាមួយ ដែលប្រារពធ្វើនៅរាជធានីភ្នំពេញ ដោយមានការចូលរួមពីអ្នកវិនិយោគ មកពីទីក្រុងហុងកុង ម៉ាឡេស៊ី និងប្រទេសចិន កាលពីចុងសប្តាហ៍មុនថា កម្ពុជាមានសក្តានុពល សម្រាប់ការរីកចម្រើនរយៈពេលវែងបន្តទៀតលើវិស័យអចលនទ្រព្យ ប៉ុន្តែការផ្សព្វផ្សាយព័ត៌មានមិនល្អពីបណ្តាប្រទេសមួយចំនួន បានធ្វើឲ្យជនបរទេស និងអ្នកធុរកិច្ចអន្តរជាតិជាច្រើនខ្លាចរអា មិនហ៊ានមកកាន់កម្ពុជា។
លោកបន្តថា “បន្តិចម្តងៗ នៅពេលអ្នកវិនិយោគបានដឹងពីព័ត៌មាន និងឱកាសវិនិយោគល្អៗនៅទីនេះ ពួកគេនឹងមកកាន់តែច្រើន”។
លោកDato Dr Albert Tanបានបន្តថា មានកត្តាអំណោយផលជាច្រើន ដែលនឹងធ្វើឲ្យកម្ពុជាកើតមានយុគមាសម្តងទៀត ទី១ ព័ត៌មានល្អៗកាន់តែច្រើនពីកម្ពុជា ត្រូវបានផ្សព្វផ្សាយទៅកាន់អន្តរជាតិ ការ ទី២ ការមកដល់របស់អ្នកវិនិយោគអន្តរជាតិ និងអ្នកជំនាញ ដែលពួកគេ គឺជាធនធានដ៏សំខាន់សម្រាប់ប្រទេសនេះ ទី៣ សេដ្ឋកិច្ចកម្ពុជានឹងងើបឡើងវិញលឿន ទី៤ ការខិតខំរបស់រដ្ឋាភិបាលកម្ពុជា ដែលបានផ្សព្វផ្សាយ និងទាក់ទាញការវិនិយោគលើឆាកអន្តរជាតិ។លោកបន្តថា “អ្នកវិនិយោគជាច្រើន ដែលខ្ញុំបាននាំមកទីនេះ ពួកគេបានចាប់អារម្មណ៍ និងកំពុងស្វែងរកឱកាសវិនិយោគនៅកម្ពុជា”។

លោកDato Dr Albert Tan បានរៀបចំវេទិកាជំនួបអ្នកធុរកិច្ចអន្តរជាតិ២ដងក្នុងមួយឆ្នាំ ទៅទីក្រុងកូឡាឡាំពួរ ប្រទេសម៉ាឡេស៊ី ដោយមានការចូលរួមពីអ្នកវិនិយោគចិន កូរ៉េ ជប៉ុន និងបណ្តាអ្នកធុរកិច្ចមកពីបណ្តាប្រទេសក្នុងតំបន់អាស៊ាន។លោកបាននាំនិងគៀងគរ អ្នកធុរកិច្ចអន្តរជាតិជាច្រើ់នមកទស្សនា និងស្វែងរកឱកាសវិនិយោគ នៅកម្ពុជារៀងរាល់មួយខែម្តង។
អ្នកធុរកិច្ចមកពីទីក្រុងហុងកុង តៃវ៉ាន់ ម៉ាឡេស៊ីជាច្រើនបានសម្តែងការភ្ញាក់ផ្អើល នៅពេលពួកគេមកដល់កម្ពុជា ដែលអ្វីពួកគេឃើញគឺខុសពីការផ្សព្វផ្សាយព័ត៌មានជាច្រើន ដែលបាននិយាយអាក្រក់ពីប្រទេសនេះ។
ក្រុមអ្នកធុរកិច្ចទាំងនោះពួកគេសន្យា នឹងមកកាន់កម្ពុជាម្តងទៀត ហើយនឹងស្វែងរកឱកាស និងចាប់យកសក្តានុពលដើម្បីវិនិយោគនៅកម្ពុជា។

លោកDr Ben Li អគ្គនាយកក្រុមហ៊ុនUrban Land ជាអ្នកវិនិយោគដ៏ធំមកពីទីក្រុងហុងកុង ដែលបានចំណាយទុនរាប់រយលានដុល្លារនៅកម្ពុជា បានមានប្រសាសន៍ និងជម្រុញអ្នកវិនិយោគអន្តរជាតិ ចាប់យកឱកាសវិនិយោគនៅកម្ពុជា ដោយសារប្រទេសនេះ មានសក្តានុពលជាច្រើន និងជាប្រទេសមានភាពលេចធ្លោ បើធៀបនឹងបណ្តាប្រទេសក្នុងតំបន់ ដោយសារការងើបឡើងវិញនៃសេដ្ឋកិច្ច កត្តាប្រជាសាស្រ្ត ស្ថេរភាពសង្គម នយោបាយជាដើម៕

ដោយ: គង់ លាងហួរ
អន្តរជាតិ: បណ្តាសហគ្រាសជាច្រើន ដែលស្ថិតក្នុងវិស័យពឹងផ្អែកខ្លាំងលើដើមទុន ដូចជាការសាងសង់ហេដ្ឋារចនាសម្ព័ន្ធកំពុងប្រឈមមុខនឹងស្ថានភាពលំបាក ដោយសារធនធានសាច់ប្រាក់នៅមានកម្រិត។

សាច់ប្រាក់ និងសមមូលសាច់ប្រាក់ ដែលរួមបញ្ចូលសាច់ប្រាក់ក្នុងដៃ ប្រាក់បញ្ញើចរន្តនៅធនាគារ សាច់ប្រាក់មិនទាន់ទទួលបាន និងការវិនិយោគរយៈពេលខ្លីដែលមានកាលកំណត់រហូតដល់៣ខែ ដើរតួនាទីយ៉ាងសំខាន់ជាសូចនាករហិរញ្ញវត្ថុ។សូចនាករហិរញ្ញវត្ថុទាំងនេះឆ្លុះបញ្ចាំងពីសមត្ថភាពរបស់ក្រុមហ៊ុនក្នុងការបំពេញកាតព្វកិច្ចរយៈពេលខ្លី និងបម្រើជាទុនបម្រុងសម្រាប់ភាពចាំបាច់ដូចជាការជួសជុល និងការជំនួសឧបករណ៍ ឬកាលៈទេសៈដែលមិនបានមើលឃើញទុកជាមុន។ជាក់ស្តែង គិតត្រឹមដំណាច់ត្រីមាសទី៣ ឆ្នាំ២០២៣នេះ សាច់ប្រាក់ និងសមមូលសាច់ប្រាក់របស់ក្រុមហ៊ុនវៀតណាម Hồ Chí Minh City Infrastructure Investment Joint Stock Company (CII) មានចំនួន៣០៧,៧ពាន់លានដុង(ប្រហែល១២,៧លានដុល្លារ) ពោលគឺកើនឡើង១១,៦ភាគរយបើធៀបនឹងរយៈពេលដូចគ្នាកាលពីឆ្នាំមុន។ទោះជាយ៉ាងណាក្តី តួលេខនេះហាក់បីដូចជាតិចតួចខ្លាំង បើប្រៀបធៀបទៅនឹងទ្រព្យសកម្មសរុបចំនួន២៦ពាន់ពាន់លានដុង និងបំណុលរបស់ក្រុមហ៊ុនចំនួន១៨ពាន់ពាន់លានដុង។

ស្របពេលដែលបំណុលរយៈពេលខ្លីមានចំនួនដល់ទៅ៨ពាន់ពាន់លានដុង នៅចុងត្រីមាសទី៣ ឆ្នាំនេះ សមាមាត្រសាច់ប្រាក់របស់ក្រុមហ៊ុន CII មានចំនួន០,០៤ដង ដោយបានបន្តស្ថិតក្រោម០,១ដង ចាប់ពីឆ្នាំ២០១៨ រហូតដល់ពេលបច្ចុប្បន្ន៕

ដោយ: គង់ លាងហួរ
អន្តរជាតិ: មូលនិធិរូបិយវត្ថុអន្តរជាតិ (IMF) គឺជាស្ថាប័នអន្តរជាតិមួយ ដែលជួយជំរុញកំណើនសេដ្ឋកិច្ចពិភពលោក ស្ថិរភាពហិរញ្ញវត្ថុ ពាណិជ្ជកម្មអន្តរជាតិ និងកាត់បន្ថយភាពក្រីក្រ។

មូលនិធិរូបិយវត្ថុអន្តរជាតិបានចាប់បដិសន្ឋិឡើង កាលពីឆ្នាំ១៩៤៤ ក្រោយពី វិបត្តិសេដ្ឋកិច្ចឆ្នាំ១៩៣០ ហើយកម្ពុជាបានចូលជាសមាជិករបស់មូលនិធិរូបិយវត្ថុអន្តរជាតិ កាលពីថ្ងៃទី៣១ ខែធ្នូឆ្នាំ១៩៦៩។

សព្វថ្ងៃនេះ ប្រទេស ដែលជាសមាជិកភាពរបស់មូលនិធិរូបិយវត្ថុអន្តរជាតិ(IMF)មានចំនួន១៩០ប្រទេស ដោយមានបុគ្គលិកមកពី១៥០ប្រទេស។ ស្ថាប័នដ៏ធំមួយនេះមានទីស្នាក់ការកណ្តាលរបស់ខ្លួននៅទីក្រុងវ៉ាសុីនតោន ឌីសុី នៃសហរដ្ឋអាមេរិក។

មូលនិធិ IMF ត្រូវបានគ្រប់គ្រង និងទទួលខុសត្រូវចំពោះប្រទេសទាំង១៩០ ដែលជាសមាជិកភាពនៅទូទាំងពិភពលោក។ ក្បាលម៉ាស៊ីននៃរចនាសម្ព័ន្ធរៀបចំរបស់មូលនិធិរូបិយវត្ថុអន្តរជាតិ គឺក្រុមប្រឹក្សាភិបាល។

ការងារប្រចាំថ្ងៃរបស់មូលនិធិ IMF ត្រូវបានត្រួតពិនិត្យ ដោយក្រុមប្រឹក្សាប្រតិបត្តិ ដែលមានសមាជិក២៤រូប ដែលតំណាងឱ្យសមាជិកភាពទាំងអស់ និងគាំទ្រដោយបុគ្គលិករបស់ IMF ។ នាយកគ្រប់គ្រងគឺជាប្រធានបុគ្គលិក IMF និងជាប្រធានក្រុមប្រឹក្សាភិបាលប្រតិបត្តិ ដោយមានអនុប្រធានគ្រប់គ្រងចំនួន៤រូប។

ធនធាន ឬដើមទុនភាគច្រើនរបស់មូលនិធិ IMF ទទួលបានមកពីប្រាក់ ដែលប្រទេសនានាបង់ជាដើមទុន ឬកូតា នៅពេលពួកគេក្លាយជាសមាជិក។

ធនធានសរុបបច្ចុប្បន្នរបស់មូលនិធិ IMF មានទំហំទឹកប្រាក់ប្រហែល៩៨២ពាន់លាន SDR និងប្រែក្លាយទៅជាសមត្ថភាពសម្រាប់ការផ្តល់ប្រាក់កម្ចីប្រហែល៦៩៥ពាន់លាន SDR (ប្រហែល៩៣២ពាន់លានដុល្លារ) គិតត្រឹមពាក់កណ្តាលខែធ្នូ ឆ្នាំនេះ។

សហរដ្ឋអាមេរិក ដែលមានសិទ្ធិវ៉េតូលើការសម្រេចចិត្តរចនាសម្ព័ន្ធសំខាន់ៗរបស់ IMF គឺជាម្ចាស់ភាគហ៊ុនធំជាងគេ ដោយកាន់កាប់ចំណែក១៦,៥% នៃអំណាចបោះឆ្នោតរបស់មូលនិធិ IMF តាមពីក្រោយដោយជប៉ុន (៦,១៤%) ចិន(៦,០៨%) និងអាល្លឺម៉ង់(៥,៣១%)។

បំណុលសរុបជាសកល(outstanding debt) ដែលគេជំពាក់ IMF មានចំនួន១៥៥ពាន់លានដុល្លារគិតត្រឹមថ្ងៃទី៣១ ខែមីនា ឆ្នាំ២០២៣ ដោយសារតែផលប័ត្រប្រាក់កម្ចីរបស់ IMF បានពង្រីក បន្ទាប់ពីស្ថាប័ននេះ បានព្រមព្រៀងផ្តល់ថវិកាសង្គ្រោះនាពេលថ្មីៗនេះ ដើម្បីជួយដល់ប្រទេសកំពុងអភិវឌ្ឍន៍ ដែលកំពុងជួបបញ្ហា។

ប្រទេសអាហ្សង់ទីនជាប់ចំណាត់ថ្នាក់លេខ១ជាកូនបំណុលធំជាងគេរបស់IMF ពោលគឺជំពាក់៤៦ពាន់លានដុល្លារ អេហ្ស៊ីបឈរនៅលេខ២ ជំពាក់១៨ពាន់លានដុល្លារ អ៊ុយក្រែនជាប់លេខ ៣ ជំពាក់១២,២ ពាន់លានដុល្លារ អេក្វាឌ័រ ជាប់លេខ៤ ជំពាក់៨,២ពាន់លានដុល្លារ ហើយប៉ាគីស្ថានឈរនៅលេខ៥ ជំពាក់៧,៤ពាន់លានដុល្លារ។

មូលនិធិរូបិយវត្ថុអន្តរជាតិផ្តល់ប្រាក់កម្ចី រួមទាំងប្រាក់កម្ចីសង្គ្រោះបន្ទាន់ដល់ប្រទេសជាសមាជិក ដែលជួបប្រទះបញ្ហាសមតុល្យនៃជញ្ជីងពាណិជ្ជកម្ម ក្នុងគោលបំណង ដើម្បីជួយដល់ប្រទេសជាសមាជិក ក្នុងការបង្កើតទុនបម្រុងអន្តរជាតិ រក្សាស្ថិរភាពរូបិយប័ណ្ណក្នុងស្រុក មានប្រាក់សម្រាប់បង់លើការនាំចូល និងស្តារលក្ខខណ្ឌសម្រាប់កំណើនសេដ្ឋកិច្ចឱ្យបានរឹងមាំ។

មូលនិធិរូបិយវត្ថុអន្តរជាតិធ្វើការត្រួតពិនិត្យប្រព័ន្ធរូបិយវត្ថុអន្តរជាតិ និងការវិវត្តនៃសេដ្ឋកិច្ចពិភពលោកដើម្បីកំណត់ហានិភ័យ និងណែនាំគោលនយោបាយសម្រាប់កំណើន និងស្ថិរភាពហិរញ្ញវត្ថុពិភពលោក។ មូលនិធិ IMF ក៏ត្រួតពិនិត្យស្ថានភាពជាប្រចាំលើគោលនយោបាយសេដ្ឋកិច្ច និងហិរញ្ញវត្ថុនៅក្នុងប្រទេសជាសមាជិកទាំង១៩០ របស់ខ្លួនផងដែរ។

លើសពីនេះ IMF ជួយកំណត់ហានិភ័យ ដែលអាចកើតមានចំពោះស្ថិរភាពសេដ្ឋកិច្ចនៃប្រទេសជាសមាជិករបស់ខ្លួន និងផ្តល់ជូនជាយោបល់ដល់រដ្ឋាភិបាលនៃប្រទេសសមាជិកអំពីការកែសម្រួលគោលនយោបាយឱ្យស្របតាមកាលៈទេសៈ។

ជាមួយគ្នានេះ IMF ផ្តល់ជំនួយបច្ចេកទេស និងការបណ្តុះបណ្តាលដល់រដ្ឋាភិបាលនៃប្រទេសសមាជិក រួមមានធនាគារកណ្តាល ក្រសួងហិរញ្ញវត្ថុ រដ្ឋបាលចំណូល និងទីភ្នាក់ងារត្រួតពិនិត្យវិស័យហិរញ្ញវត្ថុ។  ការបណ្តុះបណ្តាលនេះក៏ជួយដល់ប្រទេសជាសមាជិក ក្នុងការដោះស្រាយបញ្ហាឆ្លងដែន ដូចជាវិសមភាពប្រាក់ចំណូល សមភាពយេនឌ័រ អំពើពុករលួយ និងការប្រែប្រួលអាកាសធាតុផងដែរ៕

ដោយ: គង់ លាងហួរ
អន្តរជាតិ: គេហទំព័រ Numbeo បានចុះផ្សាយទិន្នន័យពីការស្ទង់មតិ និងតារាងចំណាត់ថ្នាក់ស្តីពីតម្លៃអចលនទ្រព្យ ក្នុងទីក្រុងចំនួន៩នៅតំបន់អាស៊ាន ដោយប្រៀបធៀបតម្លៃអាផាតមុិនទៅនឹងប្រាក់ចំណូលរបស់ប្រជាជនទូទៅនៅតាមទីក្រុងនីមួយៗ។

ក្នុងនោះ រាជធានីភ្នំពេញរបស់យើងបានជាប់ចំណាត់ថ្នាក់លេខ៤ ដោយសមាមាត្រតម្លៃអាផាតមុិនធៀបនឹងចំណូលប្រជាជនទូទៅស្ថិតនៅត្រឹម២៩ដង ដែលមានន័យថា តម្លៃអាផាតមុិននៅទីក្រុងភ្នំពេញ ខ្ពស់ជាងចំណូលប្រជាជនទូទៅចំនួន២៩ដង។

ចំណែក ទីក្រុងហូជីមិញរបស់ប្រទេសវៀតណាម ជាប់ចំណាត់ថ្នាក់លេខ១ ក្នុងចំណោមទីក្រុងចំនួន៩នៅតំបន់អាស៊ាន ដោយអាផាតមុិនក្នុងទីក្រុងហូជីមិញ មានតម្លៃថ្លៃបំផុត បើប្រៀបធៀបនឹងប្រាក់ចំណូលរបស់ប្រជាជនទូទៅក្នុងទីក្រុងមួយនេះ។តួយ៉ាង សមាមាត្រតម្លៃអាផាតមុិនធៀបនឹងចំណូលប្រជាជនទូទៅនៅទីក្រុងហូជីមិញ ស្ថិតក្នុងរង្វង់៣៦ដង ដែលមានន័យថា តម្លៃអាផាតមុិននៅទីក្រុងហូជីមិញខ្ពស់ជាងចំណូលប្រជាជនទូទៅ រហូតដល់ទៅ៣៦ដង។

ទីក្រុងម៉ានីលរបស់ប្រទេសហ្វីលីពីនជាប់ចំណាត់ថ្នាក់លេខ២ ដោយសមាមាត្រតម្លៃអាផាតមុិន ធៀបនឹងចំណូលប្រជាជនទូទៅ ស្ថិតនៅត្រឹម៣៥,៧ដង ដែលមានន័យថា តម្លៃអាផាតមុិននៅទីក្រុងម៉ានីលខ្ពស់ជាងចំណូលប្រជាជនទូទៅចំនួន៣៥,៧ដង។

ចំណាត់ថ្នាក់លេខ៣បានទៅលើទីក្រុងបាងកករបស់ប្រទេសថៃ ដោយសមាមាត្រតម្លៃអាផាតមុិនធៀបនឹងចំណូលប្រជាជនទូទៅ ស្ថិតនៅត្រឹម៣១,៨ដង ដែលមានន័យថា តម្លៃអាផាតមុិននៅទីក្រុងបាងកកខ្ពស់ជាងចំណូលប្រជាជនទូទៅ ចំនួន៣១,៨ដង។

ចំណាត់ថ្នាក់លេខ៥បានទៅលើទីក្រុងហ្សាការតារបស់ប្រទេសឥណ្ឌូនេសុី ដោយសមាមាត្រតម្លៃអាផាតមុិនធៀបនឹងចំណូលប្រជាជនទូទៅ ស្ថិតនៅត្រឹម២០ដង  ដែលមានន័យថា តម្លៃអាផាតមុិននៅទីក្រុងហ្សាការតា ខ្ពស់ជាងចំណូលប្រជាជនទូទៅ ចំនួន២០ដង។

ទីក្រុងហាណូយជាប់ចំណាត់ថ្នាក់លេខ៦ ទីក្រុងBandungនៅប្រទេសឥណ្ឌូនេសុី ជាប់ចំណាត់ថ្នាក់លេខ៧ ទីក្រុងសិង្ហបុរី ជាប់លេខ៨ ហើយទីក្រុងកូឡាឡាំពួនៅប្រទេសម៉ាឡេសុីជាប់ចំណាត់ថ្នាក់លេខ៩៕VNexpress៕

ដោយ: គង់ លាងហួរ

អន្តរជាតិ: នៅឆ្នាំ២០២៣នេះ វិស័យអចលនទ្រព្យលំនៅដ្ឋាននៅប្រទេសមួយចំនួនក្នុងតំបន់អាស៊ាន ហាក់ដូចជាបានកម្រើកឡើងវិញ និងបង្ហាញសញ្ញាវិជ្ជមាន ក្រោយពីដាំក្បាលចុះជាខ្លាំងក្នុងអំឡុងវិបត្តិជំងឺកូវីដ-១៩។

ខាងក្រោមនេះគឺជាទិន្នន័យ និងស្ថានភាពពិតនៃវិស័យអចលនទ្រព្យលំនៅដ្ឋាននៅក្នុងប្រទេសសិង្ហបុរី ឥណ្ឌូនេស៊ី និងប្រទេសម៉ាឡេស៊ី គិតត្រឹមត្រីមាសទី៣ ឆ្នាំនេះ។

ទី១: ប្រទេសសិង្ហបុរី
ផ្អែកលើការប៉ាន់ស្មានបឋមរបស់អាជ្ញាធរ អភិវឌ្ឍន៍ទីក្រុង (URA​) បានបង្ហាញថា សន្ទស្សន៍តម្លៃផ្ទះឯកជនប្រភេទnon-landed នៅប្រទេសសិង្ហបុរី បានកើនឡើង២,១% នៅក្នុងត្រីមាសទី៣ ឆ្នាំនេះ បន្ទាប់ពីធ្លាក់ចុះ០,៦%នៅក្នុងត្រីមាសទី២។

នៅក្នុងរយៈពេល៩ខែដំបូង ដើមឆ្នាំ២០២៣នេះ តម្លៃផ្ទះប្រភេទ non-landed បានកើនឡើងក្នុងរង្វង់៤,៤ភាគរយ បើធៀបនឹងរយៈពេលដូចគ្នាកាលពីឆ្នាំ២០២២។

ចំណែក ប្រតិបត្តិការលក់ផ្ទះសរុបក្នុងត្រីមាសទី៣ ឆ្នាំ២០២៣​នេះ បានធ្លាក់ចុះ១៧,៤ភាគរយ មកនៅត្រឹម៤.២១៥ប្រតិបត្តិការ បើប្រៀបធៀបនឹងប្រតិបត្តិការលក់ផ្ទះ ចំនួន៥.១០៤ប្រតិបត្តិការ នៅត្រីមាសទី២។

ទី២: ប្រទេសឥណ្ឌូនេស៊ី
ទីផ្សារលំនៅដ្ឋានក្នុងប្រទេសឥណ្ឌូនេស៊ី នៅតែបន្តស្ថិតក្រោមសម្ពាធ ខណៈដែលការបោះឆ្នោតសកលនៅឆ្នាំ២០២៤ កំពុងក្លាយជាបញ្ហាដែលបណ្តាល ឱ្យមានការធ្លាក់ចុះនៃទីផ្សារអាផាតម៉ិន។

គិតរហូតដល់ដំណាច់ខែកញ្ញា ឆ្នាំ២០២៣នេះ ទីផ្សារអាផាតម៉ិន​នៅក្នុងប្រទេសឥណ្ឌូនេស៊ី មិនបានបង្ហាញពីសញ្ញាណាមួយនៃកំណើននោះទេ។

ការថយចុះនៃតម្រូវការ ក៏អាចបណ្តាលមកពីកង្វះនៃជម្រើស ដែលអាចរកបាន ពីគម្រោងដែលមានស្រាប់ គួបផ្សំនឹងអវត្តមាននៃគម្រោងដែលទើបនឹងចាប់ផ្តើមដំណើរការថ្មី។

ទី៣: ប្រទេសម៉ាឡេស៊ី
ទីផ្សារអចលនទ្រព្យរបស់ប្រទេសម៉ាឡេស៊ី បានបង្ហាញពីកំនើន​វិជ្ជមាន នៅក្នុងត្រីមាសទី៣ ឆ្នាំ២០២៣នេះ ជាមួយនឹងការកើនឡើង៣,៧% នៅក្នុងបរិមាណ និង២២,៦%នៅក្នុងតម្លៃ បើធៀបនឹងត្រីមាសទី៣ ឆ្នាំ២០២២។

ជាមួយគ្នានេះ វិស័យលំនៅដ្ឋានបានបន្តគាំទ្រ និងជំរុញសកម្ម​ភាពទីផ្សារអចលនទ្រព្យទាំងមូល ដោយវិស័យលំនៅដ្ឋានបានកាន់កាប់ចំណែក៦២,៩% នៃបរិមាណប្រតិបត្តិការសរុបជាង១០០.០០០ប្រតិបត្តិការនៅត្រីមាសទី៣។

នៅក្នុងត្រីមាសទី៣ ឆ្នាំ២០២៣នេះ សន្ទស្សន៍តម្លៃផ្ទះនៅប្រទេ​សម៉ាឡេស៊ី (MHPI) បានឈរនៅកម្រិត២១២,៦ពិន្ទុ ឬប្រហែលជាង៩៨.០០០ដុល្លារ ក្នុងមួយយូនីត រួមជាមួយនឹងកំណើនប្រចាំឆ្នាំតិចតួចបំផុតក្នុងរង្វង់០,១%ប៉ុណ្ណោះ៕

ដោយ: គង់ លាងហួរ

អន្តរជាតិ: ធនាគារពិភពលោក គឺជាស្ថាប័នអន្តរជាតិមួយ ដែលមានសមាជិក១៨៩ប្រទេស។តួនាទីរបស់ធនាគារពិភពលោក គឺកាត់​បន្ថយ​ភាពក្រីក្រ តាមរយៈការផ្តល់ហិរញ្ញប្បទានជាប្រាក់កម្ចី ដល់រដ្ឋាភិបាលជាសមាជិកនៃប្រទេសក្រីក្រ ដើម្បីជួយអភិវឌ្ឍសេដ្ឋកិច្ច និងបង្កើនគុណភាព​កម្រិត​ជីវភាពប្រជាជន។

គិតត្រឹមដំណាច់ខែកញ្ញា ឆ្នាំ២០២៣នេះ ធនាគារពិភពលោកមានទ្រព្យសកម្មសរុប ចំនួន៣៣៦,៦៣ពាន់លានដុល្លារអាមេរិក។

នៅក្នុងឆ្នាំសារពើពន្ធ២០២៣ ធនាគារពិភពលោកបានអនុម័តប្រាក់កម្ចីចំនួន១១,៣ពាន់លានដុល្លារ សម្រាប់ប្រតិបត្តិការចំនួន៥០ នៅតំបន់អឺរ៉ុប និងអាស៊ីកណ្តាល ដែលជាការកើនឡើងគួរឱ្យកត់សម្គាល់បើប្រៀបធៀបទៅនឹងឆ្នាំមុនៗ។
នៅក្នុងឆ្នាំសារពើពន្ធ២០២៣ដដែល ធនាគារពិភពលោកបានអនុម័តផ្តល់ប្រាក់កម្ចីចំនួន១២ពាន់លានដុល្លារ ដល់អាហ្វ្រិកខាងលិច និងអាហ្វ្រិកកណ្តាលសម្រាប់ប្រតិបត្តិការចំនួន៧៣។
ឆ្នាំសារពើពន្ធ២០២៣ ធនាគារពិភពលោក (IBRD/IDA) បានសន្យាផ្តល់ប្រាក់ចំនួន៧២,៨ពាន់លានដុល្លារ ដល់បណ្តាប្រទេសជាដៃគូ ដោយចែកចាយជាឥណទាន កម្ចី និងជំនួយឥតសំណង។

ធនាគារពិភពលោក ត្រូវបានបង្កើតឡើងនៅឆ្នាំ១៩៤៤ និងមានទីស្នាក់ការកណ្តាលនៅវ៉ាស៊ីនតោន ឌីស៊ី សហរដ្ឋអាមេរិក។ ការបង្កើតធនាគារនេះឡើង ក្នុងគោលដៅដើម្បីជួយកសាង ទ្វីបអឺរ៉ុប​ និងជប៉ុន បន្ទាប់ពីរង​ការខូតខាត ក្នុង​សង្គ្រាមលោកលើកទី២ ដែលមានឈ្មោះផ្លូវការជា ធនាគារអន្តរជាតិសម្រាប់ការកសាងឡើងវិញ និងអភិវឌ្ឍន៍ (International Bank for Reconstruction and Development ឬ IBRD) ។ នៅពេលចាប់ផ្តើមប្រតិបត្តិការដំបូងនៅឆ្នាំ១៩៤៦។

ធនាគារពិភពលោកបានបង្កើតអង្គការថ្មីៗ ដែលមានជំនាញក្នុងសកម្មភាពផ្សេងៗគ្នា។ អង្គការទាំងអស់នេះរួមគ្នា ត្រូវបានគេហៅថាក្រុមធនាគារ​ពិភពលោក​ (World Bank Group) ដែលរួមមាន៖
-ធនាគារអន្តរជាតិសម្រាប់ការកសាងឡើងវិញ និងអភិវឌ្ឍន៍ (IBRD) ផ្តល់ប្រាក់កម្ចីដល់ប្រទេសដែលមានចំណូលទាប​​ និងមធ្យម។
-សមាគមអភិវឌ្ឍន៍អន្តរជាតិ (IDA) ផ្តល់ប្រាក់កម្ចីដល់ប្រទេសដែលមានចំណូលទាប។
-សាជីវកម្មហិរញ្ញវត្ថុអន្តរជាតិ (IFC) ផ្តល់ប្រាក់កម្ចីដល់វិស័យឯកជន។
-ទីភ្នាក់ងារធានាការវិនិយោគពហុភាគី (MIGA) លើកទឹកចិត្តឱ្យក្រុមហ៊ុនឯកជនវិនិយោគនៅបរទេស។
-មជ្ឈមណ្ឌលអន្តរជាតិ ដើម្បីដោះស្រាយវិវាទវិនិយោគ(ICSID​) ជួយវិនិយោគិនឯកជន និងប្រទេសនៅពេលមានការមិនឯកភាពគ្នា។

ធនាគារពិភពលោកមានដំណើរការ ដូចស្ថាប័នសហប្រតិបតិ្តការដ៏ធំមួយ ដែលសមាជិករបស់ខ្លួនគឺជាម្ចាស់ភាគហ៊ុន។ ចំនួនភាគហ៊ុន ដែលប្រទេសនីមួយៗមានគឺផ្អែក លើទំហំសេដ្ឋកិច្ច​នៃ​ប្រទេសនោះ។ តួយ៉ាងសហរដ្ឋ​អាមេរិក គឺជាម្ចាស់ភាគហ៊ុនធំជាងគេ តាមពីក្រោយដោយប្រទេសជប៉ុន អាល្លឺម៉ង់ អង់គ្លេស និងបារាំង។ រីឯ ភាគហ៊ុនដែលនៅសល់ ត្រូវបានបែង​ចែកក្នុង​ចំណោម ប្រទេសសមាជិកដទៃផ្សេងទៀត។

ជាក់ស្តែង សហរដ្ឋអាមេរិកផ្តល់ការគាំទ្រ ផ្នែកហិរញ្ញវត្ថុច្រើនបំផុតចំពោះធនាគារ IBRD ដែលស្មើនឹង១៦,៦៩% នៃធនធានសរុបរបស់ធនាគារនេះ។  ដើមទុនដែលអាមេរិកបានបង់ជម្រះ មានចំនួន៣,៥ពាន់លានដុល្លារ ហើយដើមទុន ដែលអាមេរិកមិនទាន់បង់ចូលមានចំនួន៤៧,៨ពាន់លានដុល្លារ។

ចំណែកឯប្រទេសដែលខ្ចីប្រាក់ច្រើនជាងគេ ពីធនាគារពិភពលោក រួមមានដូចជា ប្រទេសឥណ្ឌា តួកគី ឥណ្ឌូនេស៊ី អ៊ុយក្រែន និងហ្វីលីពីន។

ធនាគារពិភពលោក ឬ World bank គឺជាស្ថាប័នហិរញ្ញវត្ថុដ៏មានឥទ្ធពល ព្រោះធនាគារនេះតែងតែផ្ដល់កម្ចី ដល់ប្រទេសនានាជុំវិញពិភពលោក ជាពិសេសបណ្ដាប្រទេសកំពុងអភិវឌ្ឍន៍ ដោយគិតអត្រាការប្រាក់ទាប និងបានផ្ដល់ជំនួយឥតសំណង ព្រមទាំងជំនួយមនុស្សធម៌ផងដែរ៕

អ្នក​ដឹក​នាំ​និងផ្តួចផ្តើមគំនិតក្នុងឧស្សាហកម្ម​ទូទាំងពិភពលោកបានចូលរួម​កិច្ច​ប្រជុំ​កំពូល​ឆ្នាំ​នេះ​ ដើម្បី​ដោះស្រាយ​បញ្ហាអនាគត​នៃ​ទី​ក្រុង

ទីក្រុងបាងកក ប្រទេសថៃ– PropertyGuru Group (NYSE: PGRU) ដែលជាក្រុមហ៊ុនបច្ចេកវិទ្យាអចលនទ្រព្យឈានមុខគេនៅអាស៊ីអាគ្នេយ៍បានត្រលប់មកកាន់វេទិកាភាពជាអ្នកដឹកនាំរបស់ខ្លួន ដែលជាវេទិកាអចលនទ្រព្យ PropertyGuru Asia Real Estate Summit (ARES) លើក​ទី​៩ នៅ​ថ្ងៃ​ទី​១៥ ខែ​ធ្នូ ជាមួយនឹងការផ្តោតទៅលើប្រធានបទ «​ការលើក​កម្ពស់​សហគមន៍» និងវិធីដែលអ្នកដឹកនាំអាចកសាងនិងកែលម្អ​ទីក្រុង​នា​ថ្ងៃ​ស្អែក​។

កិច្ចប្រជុំកំពូល​អចលនទ្រព្យ​ ARES ប្រចាំ​ឆ្នាំ​ ២០២៣ បានប្រមូលផ្តុំអ្នក​ដឹក​នាំ​អាជីវកម្ម​ថ្នាក់​កំពូលជាង ៤០០នាក់ មកជួបជុំគ្នាក្នុងសន្និសីទ និង​ព្រឹត្តិការណ៍បែបចម្រុះ(hybrid) ដែលពោរ​ពេញ​ទៅ​ដោយ​ការយល់ដឹង​និងការ​បំផុស​គំនិត។ វាគ្មិន​ជាង ៤០ នាក់ បានផ្តួចផ្តើម​កិច្ចសន្ទនា​បំំផុស​គំនិត​ដែល​ចាំ​បាច់បំផុត​ អំពី​អនាគត​នៃសហគមន៍ ធុរកិច្ច ការកម្សាន្ត និង នវានុវត្តន៍។ប្រធានបទ​នា​ឆ្នាំ​នេះគឺស្រប​ទៅ​តាម​ចក្ខុវិស័យ​របស់​ ​PropertyGuru ក្នុងការលើក​កម្ពស់​សហគមន៍​ក្នុង​ការ រស់នៅ ធ្វើការ និងរីក​ចម្រើននៅ​ទី​ក្រុង​នា​ថ្ងៃ​អនាគត។ នាយកប្រតិបត្តិ និងនាយកគ្រប់គ្រង PropertyGuru Group លោក Hari V. Krishnan ដែលបានលើកឡើងថាវេទិកា​​អចលនទ្រព្យ ARES 2023 ត្រូវបានប្រារព្ធឡើងនៅមុនថ្ងៃគម្រប់ខួប ១៦ ឆ្នាំនៃការបង្កើតក្រុមហ៊ុន PropertyGuru Group។

លោកបានថ្លែងថា៖ « ក្នុងនាមជាអ្នកដឹកនាំក្នុងឧស្សាហកម្ម​ដែលមានទំនួលខុសត្រូវ​ខ្ពស់​ ពួក​យើង​ធ្វើ​ការ​ខិតខំ​ឆ្ពោះ​ទៅ​រ​ក​ការ​ផ្តល់​សិទ្ធិអំណាចដល់​មនុស្ស​គ្រប់​រូប​​ក្នុង​ការ​សម្រេច​ចិត្ត​លើអចលនទ្រព្យ​ប្រកប​ដោយ​ទំនុកចិត្ត​តាម​រយៈ​ ខ្លឹមសារ​ពាក់ព័ន្ធ ការយល់​ដឹង និង​សាវាកម្ម​លំដាប់​ពិភពលោក។ ចាប់តាំង​​ពី​​ការ​ជួយ​​អ្នក​​ទិញ​ផ្ទះ​ស្វែង​រ​ក និង​ផ្តល់​ហិរញ្ញប្បទាន​ដល់​ផ្ទះ​ក្នុង​ក្តី​ស្រមៃ​របស់​ពួក​គេ​ ការ​​ជួយ​​ជនបរទេស​ស្វែង​រ​កកន្លែង​ស្នាក់​នៅ​សមរម្យ ក៏​ដូច​ជា​ការ​គាំទ្រ​ដល់​អតិថិជន​សហគ្រាសរបស់​យើង​ធ្វើ​ឱ្យ​កា​រវិនិយោគ​ត្រឹមត្រូវ​  និង​ការ​ចែក​រំលែក​ទិន្នន័យ​ភាគី​ទីមួយ​ពិត​ប្រាកដ​ជា​មួយ​ធនាគារ​ អ្នកវាយ​តម្លៃ​ និង​ការ​ផ្តល់​នូវ​ព័ត៌មាន​ដ៏​មាន​អត្ថន័យ​ដល់​អ្នក​បង្កើត​គោល​នយោបាយ​ ពួក​យើង​នៅ​ទីនោះ​ជាមួយ​ភាគី​ពាក់ព័ន្ធ​នីមួយៗ  និងណែនាំ​ពួកគេ​នៅ​គ្រប់​ជំហាន។ »វគ្គ​ទី​មួយ​នៃ​កិច្ច​ប្រជុំ​កំពូលឆ្នាំ ២០២៣ « Live: Future of Communities » ​នេះ​បន្ត​ដោយ​សុន្ទរកថា​គន្លឹះ​ស្តី​ពី​កត្តា​ជំរុញ​សេដ្ឋកិច្ច​ថ្មី​ និង​ទស្សន​វិស័យ​សម្រាប់​អាស៊ី​ក្នុង​ឆ្នាំ​ ២០២៤ ពីលោក Sumana Rajarethnam នាយក​បណ្តាញ​សាជីវកម្ម​ស៊ើបការណ៍​សេដ្ឋកិច្ច​ប្រចាំ​​អាស៊ី​​អាគ្នេយ៍។ ផ្នែក​នេះ​ក៏​មាន​សុន្ទរកថា​គន្លឹះ​ពី​លោក​បណ្ឌិត Edlam Abera Yemeru ប្រធានផ្នែក​ចំណេះដឹង​ និង​នវា​នុវត្តន៍​នៅ​ UN-Habitat ស្តី​ពី​សហគមន៍​ និង​ការ​បង្កើត​ទី​ក្រុង​ស្រប​អភិវឌ្ឍន៍ប្រកបដោយចីរភាព។ លោក David Gissen អ្នក​និពន្ធ​ អ្នក​រចនា អ្នក​អប់រំ ទីប្រឹក្សា/សាស្រ្តាចារ្យ​ផ្នែក​ស្ថាបត្យកម្ម និង​ប្រវត្តិសាស្រ្ត​ទីក្រុងនៃ​សាលា Parsons of Design បន្ទាប់​មក​បាន​ថ្លែង​សុន្ទរកថាលក្ខណៈ​អន្តរជាតិ​​ស្តី​ពី​​ការ​គិត​ឡើង​វិញ​នូវ​អគារ និង​គំនិត​នៃ​ទី​ក្រុង​មួយ​ជាន់​។

វគ្គ​ទី​ពីរ​នៃកិច្ច​​ប្រជុំ​​ «ការងារ៖ អនាគតនៃអាជីវកម្ម» បាន​ចាប់​ផ្តើម​ជាមួយ​នឹង​ការ​ថ្លែង​សុន្ទរកថា​របស់​លោក​ Chelsea Perino នាយកគ្រប់គ្រង ទីផ្សារ និងទំនាក់ទំនងសកល មជ្ឈមណ្ឌលប្រតិបត្តិ ពី​ការវិ​វត្តប្រកប​ដោយ​ភាព​ច្នៃប្រឌិត​នៃ​កន្លែង​ធ្វើការ និង​ការ​រៀប​ចំកន្លែង​​ការងារ​បែប​កូន​កាត់​( Hybrid)។កិច្ចពិភាក្សា​ដំបូង​គេ​ត្រូវ​បាន​ដឹកនាំ​ដោយ​លោក Manav Kamboj ប្រធាន​ផ្នែក​បច្ចេកវិទ្យា​ និង​ជា​នាយកគ្រប់​គ្រង​ Fintech នៅ PropertyGuru Group។ កិច្ច​ពិភាក្សា​បច្ចេកវិទ្យា​នេះ​បានផ្តោត​លើ​ការ​ប្រើប្រាស់ A.I. នៅ​ក្នុង​ការ​រចនាទិន្នន័យ ឌីជីថល​ភ្លោះ និង​បច្ចេកវិទ្យា​ blockchain metaverse ជា​មួយ​វាគ្មិ​នលោក Jirayut “Topp” Srupsrisopa ស្ថាបនិក និងនាយកប្រតិបត្តិក្រុម Bitkub Capital Group Holdings Co., Ltd.; លោក​សាស្រ្តាចារ្យ Jason Pomeroy នាយកស្ថាបនិក, Pomeroy Studio & Pomeroy Academy/Fellow សាកលវិទ្យាល័យ Cambridge Institute for Sustainability Leadership; និង​អ្នក​នាង Wenhui Lim នាយក​ក្រុមហ៊ុន SPARK Architects ។

បិទ​បញ្ចប់​វគ្គ​ទី​ពីរ និង​វគ្គពេល​ព្រឹក​គឺ​ប​ទបង្ហាញ​ពី PropertyGuru For Business ដែល​បង្ហាញ​ពី​ការ​វិនិយោគ​ចុង​ក្រោយ​បង្អស់​ក្នុងវិទ្យាសាស្ត្រ​ទិន្នន័យ​ ដើម្បី​បង្កើត​ផលិតផល​ និង​ដំណោះ​ស្រាយ​សម្រាប់​អតិថិជន​សហគ្រាស និង​ដៃគូ​ក្នុង​តំបន់​អាស៊ី​អាគ្នេយ៍។ ប្រធាន​ផ្នែក​គ្រប់គ្រង​ទីផ្សារ​នៃ​ ក្រុមហ៊ុន PropertyGuru Group លោក Jeremy William និងលោក​ស្រី Shyn Yee Ho-Strangas ប្រធាន​ផ្នែក​គ្រប់​គ្រងដំណោះស្រាយ​ទិន្នន័យ​និងកម្មវិធី បានចាប់​ផ្តើម​កិច្ចប្រជុំ​ និង​ពិភាក្សា​អំពីគុណតម្លៃ​សម្រាប់​អាជីវកម្ម និង​ត្រូវ​បានបន្ត​ដោយ​លោកបណ្ឌិត​ Nai Jia Lee  ប្រធានផ្នែកអចលនទ្រព្យឆ្លាតវៃ ដំណោះស្រាយឌីជីថល និងសូហ្វវែរ ដែលនិយាយអំពីភាពជាទីក្រុង និងសន្ទស្សន៍លទ្ធភាពការរស់នៅ។ បទបង្ហាញបានបញ្ចប់ដោយលោក Bob Koppes នាយកផ្នែកយុទ្ធសាស្រ្ត ដែល​បានធ្វើ​បទ​​បង្ហាញ​ដោយប្រើ​ការវិភាគទិន្នន័យការបង់ប្រាក់ និងចល័ត។កិច្ចប្រជុំកំពូល​អចលនទ្រព្យពេលរសៀលបានចាប់ផ្តើមជាមួយនឹងវគ្គទី៣ដែលមានប្រធានបទ « Thrive: Future of Leisure» ដោយមានការធ្វើបទបង្ហាញពីការកសាងលទ្ធភាពក្នុងទីក្រុងធំដោយលោក David Chong នាយក​ប្រតិបត្តិ​នៃវិទ្យាស្ថាន​ REHDA មកពីប្រទេស​ម៉ាឡេស៊ី។ វគ្គនេះបានបន្តជាមួយនឹងការពិភាក្សាជាក្រុមលើការទទួលទានអាហារ ការកើនឡើងនៃវប្បធម៌សត្វចិញ្ចឹមនៅក្នុងទីក្រុង និងការផ្លាស់ប្តូរប្រជាសាស្រ្តកែប្រែទីផ្សារអចលនទ្រព្យ។ វាគ្មិនរួមមាន លោកបណ្ឌិត Aladdin D. Rillo ទីប្រឹក្សាសេដ្ឋកិច្ចជាន់ខ្ពស់ វិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា (ERIA); អ្នកនាង Amy Sawitta Lefevre អតីតអ្នកកាសែតអន្តរជាតិ (អតីត Reuters); អ្នកនាង Christine Li ប្រធានផ្នែកស្រាវជ្រាវអាស៊ីប៉ាស៊ីហ្វិក Knight Frank; លោក Colin Chee, អ្នកបង្កើត និងនាយកច្នៃប្រឌិត នៃ Never too Small; អ្នកនាង Didi Almeyda អ្នកនិពន្ធ អតីតអ្នកកាសែត និង Animal Whisperer នៃឥណ្ឌូនេស៊ី; អ្ននាង Jessica Zafra, អ្នកនិពន្ធដែលទទួលបានពានរង្វាន់, អ្នកកាសែត, អ្នកតស៊ូមតិសុខុមាលភាពសត្វ; លោក Keiran Gibb ស្ថាបនិក និងជានាយក Monogic; មីសែល ម៉ាទីន ពិធីករកម្មវិធីផ្សាយ និងនិយាយកម្មវិធី Money FM 89.3; Pippa Woodhead, ប្រធានផតខាស់, Tigerhall; និងដៃគូ Tanjira “Fay” Tragoolvongse, ម្ចាស់និងអ្នកគ្រប់គ្រងនៃ Cadence ដោយ Dan Bark / Caper  ដែលបានទទួលរង្វាន់ Michelin Star for Cadence បន្ទាប់ពីការបើកដំណើរការរយៈពេលប្រាំមួយខែ។អ្នកនាង Andrea Savage សហនាយកប្រតិបត្តិនៃ A Life B Design ដែលជាអ្នករចនាផ្នែកខាងក្នុងដ៏ល្បីល្បាញ និងជាអតីតពិធីករ HGTV Asia បានរួមគ្នាថ្លែងសុន្ទរកថារចនាលើភាសាសកលនៃលំហ និងបទពិសោធន៍ផ្លាស់ប្តូរជាមួយ Cameron Richards ស្ថាបនិក និងនាយកប្រតិបត្តិ CPR Vision Management ។

ក្នុងនាមជាប្រធាននៃកិច្ចប្រជុំកំពូលអចលនទ្រព្យ លោក Stephen Oehme អ្នកឯកទេសផ្នែកគ្រប់គ្រងតម្លៃ និងនិរន្តរភាពតស៊ូមតិ/នាយកគ្រប់គ្រង Quantum បានចូលរួមតាមរយៈវីដេអូពី COP28 នៅទីក្រុងឌូបៃ ដើម្បីនិយាយអំពីគោលដៅអភិវឌ្ឍន៍ប្រកបដោយចីរភាព វិធីសាស្រ្តរួមបញ្ចូលក្នុងការអភិវឌ្ឍន៍ និងវិមជ្ឈការនៃទីក្រុង។ កិច្ចប្រជុំកំពូលអចលនទ្រព្យបន្តជាព្រឹត្តិការណ៍រួមបញ្ចូល និងចម្រុះដែលពាក់កណ្តាលនៃក្រុមអ្នកជំនាញដែលរួមមានស្ត្រី និង/ឬសមាជិកនៃសហគមន៍ LGBTQ+ ។ នៅឆ្នាំនេះអ្នកស្រី Shane Bhatla នាយករងនៃ Equal Asia Foundation បានផ្តល់ការពិភាក្សាអំពីអ្នកជំនាញលើភាសារួមបញ្ចូលនៅក្នុងអចលនទ្រព្យសម្រាប់ជនជាតិភាគតិច និងជនពិការ ដោយវគ្គទីបី។

វគ្គចុងក្រោយនៃកិច្ចប្រជុំកំពូល “Thrive: The Future of Innovation” បានបើកដោយសុន្ទរកថាពីលោក Vinu Daniel ដែលជាស្ថាបនិក Wallmakers របស់ប្រទេសឥណ្ឌា។ ស្ថាបត្យករដែលឆ្លើយតបនឹងអាកាសធាតុ ដែលថ្មីៗនេះត្រូវបានគេដាក់ឈ្មោះថាជាមនុស្សម្នាក់ក្នុងចំណោម TIME100 Next និងបានថ្លែងសុន្ទរកថា TED2023 ដែលទទួលបានយ៉ាងល្អកាលពីខែមេសាកន្លងទៅនោះ ត្រូវបានបង្ហាញពានរង្វាន់ PropertyGuru Visionary Award នៅ ARES ២០២៣ សម្រាប់ការរចនាប្រកបដោយចីរភាពរបស់គាត់ដោយប្រើភក់ និងកំទេចកំទី។Ar. Daniel បានប្រាប់ Property Report ដោយ PropertyGuru ដែលជាទស្សនាវដ្តីផ្លូវការរបស់ កិច្ចប្រជុំកំពូលអចលនទ្រព្យ ២០២៣ ថា «ការសាងសង់កំពុងកើតឡើងនៅគ្រប់ទីកន្លែងគ្រប់ពេលវេលា។ វា​ជា​ការ​ល្អ​ប្រសិន​បើ​យើង​អាច​ចែក​រំលែក​ចំណេះ​ដឹង​របស់​យើង។»

លោក Colin Chee ដែលជាអ្នកបង្កើត និងជាស្ថាបនិកនៃបណ្តាញបណ្តាញដ៏ពេញនិយម Never Too Small ដែលបានឈ្នះពានរង្វាន់ Visionary Award កាលពីឆ្នាំមុន បានត្រលប់ទៅដំណាក់កាល ARES ដើម្បីបង្ហាញករណីសិក្សាលើការរចនាខាងក្នុងដែលយកកាកសំណល់ចេញពីកន្លែងសំណង់ និងការរុះរើឡើងវិញ។ ករណីសិក្សារួមបញ្ចូលឈុតមើលជាមុនពីស៊េរីមានកំណត់ “Wonderful Waste” របស់គាត់។

វគ្គទី ៤ រួមមានការពិភាក្សារបស់ Leaders Panel លើអចលនទ្រព្យពហុវិស័យ ភាពធន់នៃឧស្សាហកម្ម និងបញ្ហាប្រឈមក្នុងការអភិវឌ្ឍន៍ប្រកបដោយនិរន្តរភាពជាមួយ Cyndy Tan Jarabata ប្រធានក្រុមហ៊ុន TAJARA Leisure and Hospitality Group; លោក Hang Dang នាយកគ្រប់គ្រង CBRE Vietnam; Rita Chow ស្ថាបនិក និងជានាយកប្រតិបត្តិអាជីវកម្ម Sunshine PR (ប្រទេសចិន); Stephen Pimbley ដៃគូស្ថាបនិក និងជានាយក SPARK Architects; និងអ្នកសម្របសម្រួល Marco Lobregat, Asia Editor, Bridges / International Director, Synergy Media Specialists ។

អ្នកនាង Ornpaka (Tong) Vudhikosit អ្នកគ្រប់គ្រងឧស្សាហកម្មជាន់ខ្ពស់ (ទេសចរណ៍ អចលនទ្រព្យ និងពាណិជ្ជកម្មអេឡិចត្រូនិក) Google Thailand បានបញ្ចប់ផ្នែកទីបួនជាមួយនឹងការពិភាក្សាអ្នកជំនាញស្តីពីអនាគតនៃការច្នៃប្រឌិតឌីជីថល។បន្ទាប់ពីកិច្ចប្រជុំកំពូល អ្នកចូលរួម និងភ្ញៀវកិត្តិយសបានចូលរួមក្នុងពិធីជប់លៀង ARES VIP Cocktail Party: ការប្រារព្ធពិធីរបស់ស្ត្រី ផ្តល់កិត្តិយសដល់អ្នកដឹកនាំក្នុងឧស្សាហកម្មដែលបញ្ចូលស្មារតីនៃ «រស់នៅ ធ្វើការ និងរីកចម្រើន។» ស្ត្រីដ៏មានឥទ្ធីពលរបស់ ARES ឆ្នាំ ២០២៣ គឺ៖ Andrea Savage, សហ CEO, A Life By Design; Chelsea Perino នាយកគ្រប់គ្រង ទីផ្សារសកល និងទំនាក់ទំនង មជ្ឈមណ្ឌលប្រតិបត្តិ; Coco Liu ប្រធានមន្ត្រីប្រចាំតំបន់អាស៊ីប៉ាស៊ីហ្វិក HLB International; Esther An, ប្រធានផ្នែកនិរន្តរភាព, City Developments Limited / ប្រធានក្រុមប្រឹក្សាសាជីវកម្ម, ក្រុមប្រឹក្សាអគារបៃតងពិភពលោក; លោក Hang Dang នាយកគ្រប់គ្រងក្រុមហ៊ុន CBRE (Vietnam) Co., Ltd.; និង Joanne Kua នាយកប្រតិបត្តិក្រុមហ៊ុន KSK Group ។

កិច្ចប្រជុំកំពូល​អចលនទ្រព្យប្រចាំឆ្នាំ២០២៣ គឺជាព្រឹត្តិការណ៍យុថ្កាមួយនៃ PropertyGuru Week ដែលចូលរួមដោយនាយកប្រតិបត្តិកំពូល និងអ្នកដឹកនាំឧស្សាហកម្មក្នុងតំបន់។ សប្តាហ៍នេះបានចាប់ផ្តើមជាមួយនឹងតារាងតុមូលរបស់អ្នកដឹកនាំអចលនទ្រព្យនៅថ្ងៃទី ៦ ខែធ្នូ ដែលរៀបចំដោយ PropertyGuru សម្រាប់អាជីវកម្ម និងបន្តដោយ ARES 2023 និង ARES VIP Cocktail Party នៅថ្ងៃទី ៧ ខែធ្នូ និងការប្រារព្ធពិធីផ្តាច់មុខពីរនៅថ្ងៃទី ៨ ខែធ្នូ: អាហារថ្ងៃត្រង់អន្តរជាតិដើម្បីបង្ហាញពានរង្វាន់ប្រទេសសម្រាប់ប្រទេសចិន Greater Niseko និងឥណ្ឌា និងកម្មវិធី PropertyGuru Asia Property Awards Grand Final លើកទី ១៨ ដែលបានទាក់ទាញអ្នកឈ្នះប្រទេស និងតំបន់មកពីអាស៊ីអាគ្នេយ៍ ចិន ជប៉ុន ឥណ្ឌា។ និងអូស្ត្រាលី។ សប្តាហ៍នេះបានបិទជាមួយនឹងការបញ្ចាំងឯកជននៅ Cinema Oasis Bangkok សម្រាប់ “Wonderful Waste” ដោយ Never Too Small ។

កិច្ចប្រជុំកំពូលអចលនទ្រព្យអាស៊ី Property Guru លើកទី ៩ ប្រចាំឆ្នាំ ២០២៣ ត្រូវបានគាំទ្រដោយដៃគូវិបផតថលផ្លូវការ PropertyGuru; ទស្សនាវដ្តីផ្លូវការ Property Report ដោយ PropertyGuru; ដៃគូផ្សព្វផ្សាយផ្លូវការ Artemis Associates; ដៃគូប្រព័ន្ធផ្សព្វផ្សាយ Bridges, d+a Magazine, Hot Magazine, Manila Bulletin, Powderlife, REm, និង Techsauce; និងគាំទ្រសមាគម IFC – ឧត្តមភាពក្នុងការរចនាសម្រាប់ប្រសិទ្ធភាពកាន់តែច្រើន និងវិទ្យាស្ថាន REHDA ។ កម្មវិធី ARES VIP Cocktail Party ត្រូវបានឧបត្ថម្ភដោយ PropertyGuru For Business និងដៃគូ Dao Ethical Gifts (Women Empowerment Project) និង Fah Mai Holdings Inc.

សម្រាប់ព័ត៌មានបន្ថែម សូមចូលទៅកាន់ AsiaRealEstateSummit.com ឬអ៊ីមែល [email protected]។​