ដោយ: គង់ លាងហួរ
អន្តរជាតិ: សារពត៌មាន The Nation បានចុះផ្សាយថា សហគ្រាសធុនតូច និងមធ្យម (SMEs) កាន់តែច្រើននៅប្រទេសថៃ កំពុងបង្ខំចិត្តបញ្ឈប់ប្រតិបត្តិការអាជីវកម្មរបស់ពួកគេ ស្របពេលមានការកើនឡើងនៃបំណុល។

លោក Apichit Prasoprat អនុប្រធានសហព័ន្ធឧស្សាហកម្មថៃ (FTI) បានមានប្រសាសន៍ឱ្យដឹងថា FTI បច្ចុប្បន្នកំពុងពិភាក្សាជាមួយក្រសួងហិរញ្ញវត្ថុ ដើម្បីសម្របសម្រួលជាមួយធនាគារពាណិជ្ជ និងទីភ្នាក់ងាររដ្ឋ ដើម្បីពន្លឿនការដោះស្រាយបំណុលសម្រាប់អាជីវកម្មខ្នាតតូច និងមធ្យម ដោយបានប្រឈមមុខនឹងបញ្ហាសាច់ប្រាក់ងាយស្រួលដោយសារផលប៉ះពាល់នៃជំងឺកូវីដ ដែលបណ្តាលឱ្យមានបំណុលហួសកាលកំណត់ទូទាត់សងលើសពី៩០ថ្ងៃ។

បំណុលសរុបរបស់សហគ្រាសធុនតូច និងមធ្យម (SMEs) មានចំនួនជាង៦១ពាន់លានបាត (ប្រហែល១,៧៣ពាន់លានដុល្លារ) ដោយ៣៦ពាន់លានបាតជំពាក់ធនាគារពាណិជ្ជ និង២៥ពាន់លានបាតទៀតជំពាក់ស្ថាប័នហិរញ្ញវត្ថុរដ្ឋ។

បំណុលរបស់សហគ្រាសអាជីវកម្មថៃជាច្រើនអាចនឹងត្រូវបានចាត់ថ្នាក់ជាប្រាក់កម្ចីមិនដំណើរការ (NPLs) ហើយប្រសិនបើស្ថានភាពនេះមិនត្រូវបានដោះស្រាយ នោះសហគ្រាសថៃជាច្រើនប្រហែលជាត្រូវបិទទ្វារនៅចុងឆ្នាំនេះ ដែលការណ៍នេះអាចនឹងជះផលប៉ះពាល់យ៉ាងធ្ងន់ធ្ងរដល់ការងារ និងសេដ្ឋកិច្ចថៃទាំងមូល។

លោក Apichit បន្តថា “ខណៈពេលដែលរដ្ឋាភិបាលត្រូវតែពន្លឿនវិធានការបន្ធូរបន្ថយបំណុលសម្រាប់សហគ្រាសធុនតូច និងមធ្យម ការពន្យារពេលការទូទាត់ការប្រាក់តែមួយ ប្រហែលជាមិនអាចដោះស្រាយបញ្ហាបានទាំងស្រុងនោះទេ។ លោក Apichit បានសង្កត់ធ្ងន់ថា ផ្ទុយទៅវិញ ចាំបាច់ត្រូវកំណត់វិធានការដើម្បីធានាទាំងការសងប្រាក់ដើម និងអត្រាការប្រាក់វិញ ។

លោក Apichit បានបន្ថែមថា សហគ្រាសធុនតូច និងមធ្យមទាំងមូលបច្ចុប្បន្នកំពុងប្រឈមមុខនឹងការកើនឡើងនៃការចំណាយហិរញ្ញវត្ថុ ដោយសារតែការកើនឡើងនៃអត្រាការប្រាក់លើប្រាក់កម្ចី។

លើសពីនេះ អំណាចនៃការទិញក្នុងស្រុករបស់ប្រជាជនថៃបានថយចុះ គួបផ្សំនឹងការធ្លាក់ចុះនៃការនាំចេញ បាននាំឱ្យមានការខ្វះខាតសាច់ប្រាក់ងាយស្រួលសម្រាប់សហគ្រាសមួយចំនួន ដែលកត្តាទាំងនេះបានរួមចំណែកដល់ភាពតានតឹងផ្នែកហិរញ្ញវត្ថុរបស់ពួកគេ៕

ខេត្តព្រះសីហនុ: នាព្រឹកថ្ងៃទី២២ ខែវិច្ឆិកា ឆ្នាំ២០២៣ លោក ឡុង ឌីម៉ង់ អភិបាលរងខេត្តព្រះសីហនុ បានអញ្ជើញជាតំណាងឯកឧត្តមអភិបាល ទទួលជួបសំដែងការគួរសម និងពិភាក្សាការងារជាមួយគណៈប្រតិភូសមាគមហឺហួយ (Hehui) ដែលមានសមាសភាព សរុបប្រមាណ ៩ រូប ដឹកនាំដោយលោកប្រធាន វ៉ាង ឈុនហួយ នៅសាលប្រជុំក្រុមប្រឹក្សាខេត្ត។

គោលបំណងនៃការអញ្ជើញរបស់គណៈប្រតិភូហឺហួយ មកកាន់ខេត្តព្រះសីហនុនាពេលនេះ គឺដើម្បីស្វែងយល់បន្ថែមអំពី ការអភិវឌ្ឍកំពង់ផែ និងជាពិសេសការអភិវឌ្ឍសេដ្ឋកិច្ចរបស់ខេត្ត។ ដំណើរទស្សនៈកិច្ចនេះជាការអញ្ជើញមកសិក្សាបន្ថែមលើកទី២ បន្ទាប់ពីដំណើរទស្សនៈស្វែងយល់បឋមដែលបានធ្វើឡើងកាលពីខែមីនា ឆ្នាំ២០២៣ កន្លងទៅ។លោក ឡុង ឌីម៉ង់ អភិបាលរងខេត្តព្រះសីហនុ បានធ្វើគារវកិច្ចស្វាគមន៍ ប្រកបដោយក្តីសោមនស្សរីករាយ ទទួលគណៈប្រតិភូដែលបានអញ្ជើញមកសាជាថ្មី និងបានគូសបញ្ជាក់ថា ខេត្តព្រះសីហនុ ជាខេត្តដែលមានសក្តានុពលភូមិសាស្ត្រ ហេដ្ឋារចនាសម្ព័ន្ធ និងបរិយាកាសរស់ប្រកបដោយសុខុដុមរមនា ដែលមានប្រជាពលរដ្ឋចម្រុះជាតិសាសន៍ ប្រកបរបរគ្រប់ប្រភេទ ដែលក្នុងនោះមានជនជាតិចិនដែលលេចធ្លោជាងគេ។ឆ្លៀតក្នុងឱកាសនេះ លោកអភិបាលរងបានជម្រាបជូនគណៈប្រតិភូអំពីស្ថានភាពភូមិសាស្ត្រ សក្តានុពល ស្ថានភាពសេដ្ឋកិច្ច ដំណើរការអភិវឌ្ឍ និងចក្ខុវិស័យរបស់កំពង់ផែទឹកជ្រៅ ផែនការអភិវឌ្ឍផ្លូវដែក និងជាពិសេសផែនការមេប្រែក្លាយខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណង។
លោកបានបញ្ជាក់ថា ខេត្តព្រះសីហនុបាននឹងកំពុងធ្វើពិពិធកម្មសេដ្ឋកិច្ច ពោលគឺខេត្តនឹងបង្កើនប្រភពចំណូលផ្សេងៗបន្ថែមទៀត ក្រៅពីការពឹងផ្អែកទៅលើវិស័តទេសចរណ៍តែមួយមុខ។ ខេត្តព្រះសីហនុនឹងប្រែក្លាយជាតំបន់មជ្ឈមណ្ឌលពាណិជ្ជកម្ម និងភស្តុភារកម្មអន្តរជាតិ មជ្ឈមណ្ឌលដឹកជញ្ជូនទំនិញ ពហុមធ្យោបាយអន្តរជាតិ មជ្ឈមណ្ឌលហិរញ្ញវត្ថុអន្តរជាតិ តំបន់ទេសចរណ៍ប្រណិត ជាពិសេសជាទីក្រុងវៃឆ្លាតនាំមុខ។
បន្ថែមពីលើនេះ លោកអភិបាលរងបានលើកឡើងពីក្របខ័ណ្ឌអនុគ្រោះពន្ធ និងសន្ធិសញ្ញាពាណិជ្ជកម្មផ្សេងៗ ដែលកម្ពុជាជាសមាជិក ដែលមានភាពអំណោយផលដល់វិនិយោគិននៅកម្ពុជា។

សមាជិក នៃប្រតិភូបានលើកឡើងថា ពេលនេះជាពេលដែលសមរម្យបំផុតសម្រាប់ការវិនិយោគនៅក្នុងខេត្តព្រះសីហនុ ដែលខេត្តនេះបានបំពេញគ្រប់លក្ខខ័ណ្ឌវិនិយោគទាំង៣របស់ជនជាតិចិនជាអាទិ៍៖
១. កាលានុវត្តភាព
២.យុទ្ធសាស្ត្រទីផ្សារ
៣.មនុស្ស។
ជាមួយគ្នានេះ ប្រតិភូបានបង្ហាញគោលបំណងនៃការវិនិយោគទៅលើវិស័យអាទិភាពផ្សេងៗដូចជា វិស័យហិរញ្ញវត្ថុ, កសិឧស្សាហកម្ម, ភស្តុភារកម្មសមុទ្រ, និង ជលយានដ្ឋានផងដែរ។

ដោយ:ហ្វី អូណា
ភ្នំពេញ :អ្នកវិនិយោគគិនមកពីប្រទេសជប៉ុន និងកម្ពុជាប្រមាណ៦០ក្រុមហ៊ុន នៅថ្ងៃទី ២០ ខែវិច្ឆិកា ម្សិលមិញបានរៀបចំវេទិកា«ធុរកិច្ចរភាពជាដៃគូពាណិជ្ជកម្មកម្ពុជា និងវិនិយោគិនជប៉ុន» ដើម្បីសិក្សាស្វែងយល់ដោយផ្ទាល់ពីឱកាស និងសក្តានុពលវិនិយោគ នៅក្នុងព្រះរាជាណាចក្រកម្ពុជា ក៏ដូចជាការស្វែងរកដៃគូនិងកិច្ចសហប្រតិបត្តិការអាជីវកម្មរបស់ខ្លួន។វេទិកានេះផ្តូចផ្តើមឡើងដោយធនាគារ អេស៊ីលីដា និងសហការដោយសមាគមជប៉ុន-កម្ពុជា។

កិច្ចជំនួបធុរកិច្ចរវាងដៃគូពាណិជ្ជកម្មកម្ពុជា និង វិនិយោគិនជប៉ុននៅឆ្នាំ២០២៣នេះរៀបចំឡើងនៅស្នាក់ការកណ្តាលរបស់ធនាគារ អេស៊ីលីដា ដោយមានការចូលរួមពីអ្នកវិនិយោគគិនជប៉ុនចំនួន ២៨ក្រុមហ៊ុន និង អ្នកវិនិយោគគិនកម្ពុជាប្រមាណជាង ៣០ក្រុមហ៊ុន ដើម្បីជួបជជែកគ្នាសិក្សាស្វែងយល់ពីឱកាសនៃការវិនិយោគនៅកម្ពុជាគ្រាដែលវិបត្តិជំងឺកូវីដ-១៩បានធូរស្បើយនៅលើពិភពលោក។

លោកបណ្ឌិត អ៉ិន ចាន់នី ប្រធាននាយកប្រតិបត្តិធនាគារអេស៊ីលីដា បានគូសបញ្ជាក់ថាជំនួបធុរកិច្ច រវាងដៃគូពាណិជ្ជកម្មកម្ពុជា និង វិនិយោគិនជប៉ុននេះ ទោះបីមានរយៈពេលខ្លីតែវាជាឱកាសសម្រាប់ឱ្យអ្នកវិនិយោគកម្ពុជា-ជប៉ុនជួបគ្នា ដើម្បីធ្វើការប្រាស្រ័យទាក់ទងគ្នានិងសិក្សាស្វែងរកអត្ថប្រយោជន៍រួមនៃការវិនិយោគដ៏មានសក្តានុពលនៅកម្ពុជា។សម្រាប់លោកបណ្ឌិត ការៀបចំនេះមិនមែនដើម្បីផលប្រយោជន៍របស់ធនាគារ អេស៊ីលីដា នោះទេ តែដើម្បីផលប្រយោជន៍រួម មិនថាតែអ្នកវិយោគជប៉ុននោះទេ គឺស្វាគមន៍ទាំងអស់។

បើតាមលោកបណ្ឌិត អ៉ិន ចាន់នី អ្នកវិនិយោគិនជប៉ុនបានធ្វើការសម្រេចចិត្តដ៏ត្រឹមត្រូវក្នុងការវិនិយោគ នៅលើទឹកដីកម្ពុជា ដែលជាទីកន្លែងផ្តល់នូវសុខសន្តិភាពពេញលេញ និងសម្បូរបែប។ ទាំងនេះជាជម្រើសដ៏ត្រឹមត្រូវ ដែលប្រទេសកម្ពុជាផ្តល់នូវលក្ខខណ្ឌវិនិយោគដ៏ល្អបំផុត ដើម្បីបំពេញតម្រូវការជូនវិនិយោគិនរួមមាន ៖កត្តានយោបាយ សេដ្ឋកិច្ច និង សេ្ថរភាពសង្គម ។

គួរបញ្ជាក់ថា នេះជាលើកទី៣ហើយដែលធនាគារ អេស៊ីលីដា សហការជាមួយសមាគម ជប៉ុន-កម្ពុជា រួមគ្នារៀបចំវេទិកា« ធុរកិច្ចរវាងដៃគូពាណិជ្ជកម្មកម្ពុជា និង វិនិយោគិនជប៉ុន» ។វេទិកានេះ ត្រូវបានគេរំពឹងថានឹងក្លាយជាជំនួបដ៏វិសេសវិសាល ដើម្បីពង្រឹងនិងបំពេញតម្រូវការជូនធុរជន ក្នុងការស្វែងយល់ពីវិស័យធុរកិច្ចមួយចំនួនដូចជា វិស័យសំណង់ ទេសចរណ៍ វិទ្យាសាស្ត្រ និង បច្ចេកវិទ្យាព័ត៌មាន សុខាភិបាល កសិកម្ម ហិរញ្ញវត្ថុ សណ្ឋាគារ និង បដិសណ្ឋារកិច្ចជាដើម៕

តែម សុខុម

បាងកក: ប្រទេសថៃ បានជាប់ចំណាត់ថ្នាក់លេខ៥ ប្រចាំតំបន់អាស៊ាន ក្នុងសន្ទស្សន៍សកលប្រចាំឆ្នាំចុងក្រោយនៃហានិភ័យលាងលុយកខ្វក់។ នេះបើយោងតាមកាសែត The Nation ចុះផ្សាយនៅថ្ងៃអង្គារ ទី២១ ខែវិច្ឆិកា នេះ។

សន្ទស្សន៍ Basel AML បានដាក់ចំណាត់ថ្នាក់ប្រទេសថៃ លេខ៤៥ ក្នុងចំណោម១៥២ប្រទេសទូទាំងពិភពលោកសម្រាប់ហានិភ័យលាងលុយកខ្វក់ជាមួយនឹង៥,៨២ពិន្ទុ ដោយមានហានិភ័យខ្ពស់ជាងឆ្នាំមុន០,០២ពិន្ទុ។

ទោះជាយ៉ាងណា ចំណាត់ថ្នាក់សកលរបស់ប្រទេសថៃ បានប្រសើរឡើង៥ចំណាត់ថ្នាក់។ ពិន្ទុកាន់តែទាបបង្ហាញថា ប្រទេសមួយកាន់តែមានស្ថានភាពល្អប្រសើរឡើងនៅក្នុងការដោះស្រាយបញ្ហាលាងលុយកខ្វក់ និងហិរញ្ញប្បទានភេរវកម្ម។

ប្រទេសសិង្ហបុរី ទទួលបានលទ្ធផលល្អដាច់គេក្នុងតំបន់អាស៊ាន នៅឆ្នាំនេះជាមួយនឹង៤,៣០ពិន្ទុ ដោយទទួលបានចំណាត់ថ្នាក់១១៨ទូទាំងពិភពលោក។ ចំណែកឯប្រទេសមីយ៉ាន់ម៉ា ទទួលបានលទ្ធផលអន់ជាងគេបំផុតជាមួយ៨,១៣ពិន្ទុ បន្ទាប់ពីប្រទេសឡាវ ដែលទទួលបាន៧,៤៤ពិន្ទុ ប្រទេសវៀតណាម ទទួលបាន៦,៩៦ពិន្ទុ ហើយប្រទេសកម្ពុជា ទទួលបាន៦,៧៨ពិន្ទុ។

ការដាក់ពិន្ទុនេះធ្វើឡើងដោយផ្អែកលើសូចនាករចំនួន១៨នៃការលាងលុយកខ្វក់ និងហិរញ្ញប្បទានភេរវកម្មក្នុងផ្នែកចំនួន៥។

ហានិភ័យបានកើនឡើងក្នុងក្នុង៤នៃផ្នែកទាំង៥ដែលត្រូវបានវាស់ស្ទង់រួមមានទី១ អំពើពុករលួយ និងការសូកប៉ាន់ ទី២ តម្លាភាពហិរញ្ញវត្ថុ និងស្តង់ដារ ទី៣ តម្លាភាពសាធារណៈ និងទី៤ គណនេយ្យភាព និងហានិភ័យនយោបាយ/ ផ្នែកច្បាប់៕ The Nation៕

មហាព្រឹត្តិការណ៍ទំនាក់ទំនងជាមួយថ្នាក់ដឹកនាំ រាជរដ្ឋាភិបាល និងម្ចាស់អាជីវកម្ម១០០០នាក់ ក្នុងប្រវត្តិសាស្រ្តដ៏អស្ចារ្យ លើកទី៧ របស់វិទ្យាស្ថានស៊ីអ៊ីអូ “សិក្ខាសាលាស្តីអំពី វិធីសាស្រ្តទប់ទល់យកឈ្នះវិបត្តិសេដ្ឋកិច្ចសកល និងកម្មវិធីរាត្រីសមោរសរជួបជុំម្ចាស់អាជីវកម្មកម្ពុជា CEO AWARD 2023”។

មហាព្រឹត្តិការណ៍ប្រវត្តិសាស្រ្ដ បានចូលរួមចំណែកដ៏ធំធេងក្នុងការលើកមុខមាត់សហគ្រិនកម្ពុជា លើឆាកអន្តរជាតិ ទាក់ទាញការវិនិយោគពីក្រៅប្រទេស បណ្តុះស្មារតីសហគ្រិនភាព កសាងកម្លាំងទ័ពសេដ្ឋកិច្ចជាតិ និងជម្រុញចលនាដោះដូរពាណិជ្ជកម្មក្នុងស្រុកឱ្យកាន់តែរីកចម្រើន ធ្វើឱ្យកម្ពុជាក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងក្លាយជាប្រទេសអ្នកមាននៅឆ្នាំ២០៥០។កម្មវិធីសិក្ខាសាលាស្តីអំពី វិធីសាស្រ្តទប់ទល់យកឈ្នះវិបត្តិសេដ្ឋកិច្ចសកល និងកម្មវិធីរាត្រីសមោរសរជួបជុំម្ចាស់អាជីវកម្មកម្ពុជា CEO AWARD របស់CEO Master Club នៃវិទ្យាស្ថានស៊ីអ៊ីអូ ពិតជាមហាព្រឹត្តិការណ៍ធុរ:កិច្ចដ៏អស្ចារ្យ មានការគាំទ្រ និងឱ្យតម្លៃខ្ពស់ ពីប្រមុខថ្នាក់ដឹកនាំជាន់ខ្ពស់រាជរដ្ឋាភិបាលកម្ពុជា, បណ្ដាញសហគ្រិនជាតិនិងអន្តរជាតិ, អ្នកវិនិយោគធំៗ, ប្រធានសមាគមធុរកិច្ច និងសមាជិកគ្រួសារពេញមួយជីវិតរបស់ CEO Master Club។

ចូលរួមមហាព្រឹត្តិការណ៍ដ៏អស្ចារ្យនេះ នឹងទទួលបាន៖

• សិក្ខាសាលាស្តីអំពីវិធីសាស្រ្តទប់ទល់យកឈ្នះវិបត្តិសេដ្ឋកិច្ចសកលសម្រាប់ម្ចាស់អាជីវកម្ម
• កម្មវិធីផ្គូផ្គងផ្តល់ឱកាសអាជីវកម្ម និង ពង្រីកបណ្តាញអាជីវកម្ម
• កម្មវិធីប្រគល់ពានកិត្តិយសជូនសហគ្រិនឆ្នើមកម្ពុជា
• ការដាក់ស្តង់ពិព័ណ៌ពាណិជ្ជកម្មទិញ-លក់ដុំក្នុងតម្លៃពិសេស
• ការបង្កើតទំនាក់ទំនងជាមួយថ្នាក់ដឹកនាំនៅក្នុងរាជរដ្ឋាភិបាល
• កម្មវិធីពិសារភោជនីយាហារធុរកិច្ច និង រាត្រីសមោសររីករាយកំសាន្ត។

ជួបគ្នាឆាប់នេះៗ! ធ្វើនៅថ្ងៃអាទិត្យ ទី១៤ ខែធ្នូ ឆ្នាំ២០២៣ នៅដឺព្រេមៀសេនធ័រ សែនសុខ ចាប់ពីម៉ោង១រសៀលដល់ម៉ោង៩យប់។
ទំនាក់ទំនងទិញសំបុត្រចូលរួមតាមលេខទូរស័ព្ទ 023 6666 999,085 331 183,010 333 041ចូលទៅកាន់link ខាងក្រោម ដើម្បីទទួលបានព័ត៌មានថ្មីៗ
Facebook Page CEO I: https://www.facebook.com/ceoinstitute2014

YouTube CEO Master Club:  https://www.youtube.com/@CEOTV

Facebook Page CEO Master Club: https://www.facebook.com/ceomasterclub\

អត្ថបទដោយ: អ៊ឹម ភ័ស

តែម សុខុម

Bloomberg: សញ្ញាប័ណ្ណ និងភាគហ៊ុនរបស់បណ្ដាក្រុមហ៊ុនអភិវឌ្ឍន៍អចលនទ្រព្យចិន បានហក់ឡើងខ្លាំងស្រឺតៗ បន្ទាប់ពីក្រុងប៉េកាំង ចាប់ផ្ដើមធ្វើសេចក្ដីព្រាងបញ្ជីឈ្មោះក្រុមហ៊ុនអចលនទ្រព្យចំនួន៥០ដើម្បីផ្ដល់ហិរញ្ញប្បទាន។

ដំណឹងវិជ្ជមានដ៏គួរឱ្យអបអរសាទរនេះកើតមានឡើង ខណៈក្រុងប៉េកាំង ខិតខំប្រឹងប្រែងជួយគាំទ្រដល់វិស័យអចលនទ្រព្យចិន ដែលកំពុងដាំក្បាលចុះខ្លាំង។ នេះបើយោងតាមសារព័ត៌មានដ៏ល្បីល្បាញ Bloomberg ចុះផ្សាយនៅថ្ងៃអង្គារ ទី២១ ខែវិច្ឆិកា នេះ។

ផ្អែកតាមការវាស់ស្ទង់របស់សារព័ត៌មានខាងលើនេះបង្ហាញថា ភាគហ៊ុនអចលនទ្រព្យចិន បានហក់ឡើង៧,៦% ដែលជាការហក់ឡើងខ្លាំងបំផុតចាប់តាំងពីខែកញ្ញា ឆ្នាំនេះ។តួយ៉ាងភាគហ៊ុនរបស់ក្រុមហ៊ុន Sunac China Holdings Ltd ជាក្រុមហ៊ុនសាងសង់ខ្នាតយក្សទី១ របស់ចិន ដែលបានឈានដល់កិច្ចព្រមព្រៀងរៀបចំឥណទានឡើងវិញ បានហក់ឡើងដល់២៧%ដែលឈានមុខគេក្នុងវិស័យអចលនទ្រព្យចិន។ ទន្ទឹមនេះ ភាគហ៊ុនរបស់ក្រុមហ៊ុន Seazen Group Ltd និងក្រុមហ៊ុន Agile Group Holdings Ltd ក៏បានហក់ឡើងដែរ។

សេចក្ដីព្រាងបញ្ជីឈ្មោះក្រុមហ៊ុនអចលនទ្រព្យដែលមានគោលដៅចេញសេចក្ដីណែនាំដល់បណ្ដាធនាគារ ខណៈផ្ដល់ការគាំទ្រដល់ឧស្សាហកម្មអចលនទ្រព្យតាមរយៈកម្ចីធនាគារ បំណុល និងហិរញ្ញប្បទាននេះ ប្រហែលជាអាចជួយកាត់បន្ថយការភ័យខ្លាចចំពោះការធ្លាក់ចុះបន្ថែមទៀតនៅក្នុងវិស័យអចលនទ្រព្យរបស់ប្រទេសចិន។ក្រុមហ៊ុនអភិវឌ្ឍន៍អចលនទ្រព្យធំបំផុតទី២ របស់ប្រទេសចិន China Vanke Co ទទួលបានលទ្ធផលល្អជាងគេផ្នែកសញ្ញាប័ណ្ណអចលនទ្រព្យ ដោយបានហក់ឡើង២,៧សេនឈានដល់៦១សេននៅផ្សារហ៊ុនក្រុងហុងកុង។ ទន្ទឹមនេះ សញ្ញាប័ណ្ណរបស់ក្រុមហ៊ុន Longfor និងក្រុមហ៊ុន Seazen ក៏បានហក់ឡើងដែរ។

ប្រភពអនាមិកបានទម្លាយឱ្យដឹងដោយមិនលម្អិតថា ក្រុមហ៊ុន China Vanke ក្រុមហ៊ុន Seazen និងក្រុមហ៊ុន Longfor បានស្ថិតក្នុងចំណោមក្រុមហ៊ុនដែលត្រូវបានរាយនាមក្នុងបញ្ជីឈ្មោះក្រុមហ៊ុនត្រូវទទួលបានហិរញ្ញប្បទាន។

លោក Karl Chan អ្នកវិភាគនៅក្រុមហ៊ុនហិរញ្ញវត្ថុអាមេរិក JPMorgan Chase & Co បានលើកឡើងថា ខណៈវិធានការនេះប្រហែលជាអាចបង្កើនការជឿទុកចិត្ត វាទំនងជាមិនអាចបញ្ចប់ការខកខានទូទាត់បំណុលរបស់បណ្ដាក្រុមហ៊ុនអភិវឌ្ឍន៍ចិន បានឡើយ។

អ្នកវិភាគរូបនេះបានបន្ថែមថា “នេះជាសញ្ញាវិជ្ជមាន ខណៈវាបង្កើនការជឿទុកចិត្តទាំងពីសំណាក់អ្នកទិញផ្ទះ និងធនាគារ។ ប៉ុន្តែប្រសិនបើការលក់អចលនទ្រព្យនៅតែធ្លាក់ចុះខ្លាំង យើងជឿថា ធនាគារភាគច្រើនប្រហែលជាស្ទាក់ស្ទើរក្នុងការពង្រីកការជួយគាំទ្រដល់វិស័យអចលនទ្រព្យចិន”៕ Bloomberg៕

តែម សុខុម

ហាណូយ: ប្រទេសវៀតណាម ត្រូវបានទទួលស្គាល់ថាមានអត្រាកំណើនសេដ្ឋកិច្ចឌីជីថលលឿនបំផុតប្រចាំតំបន់អាស៊ីអាគ្នេយ៍ រយៈពេល២ឆ្នាំជាប់គ្នា។

ព័ត៌មានខាងលើនេះត្រូវបានបង្ហាញដោយលោក Nguyen Sinh Nhat Tan អនុរដ្ឋមន្ត្រីក្រសួងឧស្សាហកម្ម និងពាណិជ្ជកម្មក្នុងកិច្ចប្រជុំកំពូលស្ដីពីឧស្សាហកម្មឌីជីថល និងពាណិជ្ជកម្មឆ្នាំ២០២៣ នៅទីក្រុងហាណូយ ប្រទេសវៀតណាម កាលពីថ្ងៃអង្គារ ទី២១ ខែវិច្ឆិកា។

អនុរដ្ឋមន្ត្រីរូបនេះបានគូសបញ្ជាក់ថា “សេដ្ឋកិច្ច E-commerce និងឌីជីថលស្ថិតក្នុងចំណោមកម្លាំងចលករដ៏រឹងមាំនៅក្នុងការអភិវឌ្ឍសេដ្ឋកិច្ចសង្គមរបស់ប្រទេសវៀតណាម”។លោកបានលើកឡើងពីរបាយការណ៍ថ្មីៗនេះពីក្រុមហ៊ុនបច្ចេកវិទ្យាយក្សអាមេរិក Google ក្រុមហ៊ុនវិនិយោគអន្តរជាតិ Temasek ដែលមានទីស្នាក់ការកណ្ដាលនៅប្រទេសសិង្ហបុរី និងក្រុមហ៊ុនប្រឹក្សាយោបល់ស្ដីពីការគ្រប់គ្រងអាមេរិក Bain & Company ដែលបង្ហាញថា វៀតណាម គឺជាប្រទេសដែលមានអត្រាកំណើនសេដ្ឋកិច្ចឌីជីថលលឿនបំផុតនៅអាស៊ីអាគ្នេយ៍ រយៈពេល២ឆ្នាំជាប់គ្នាគឺឆ្នាំ២០២២ និងឆ្នាំ២០២៣។

លោករំពឹងថា ប្រទេសវៀតណាម នឹងបន្តរក្សាបានតំណែងនេះរហូតដល់ឆ្នាំ២០២៥ រួមជាមួយប្រទេសហ្វីលីពីន។សេដ្ឋកិច្ចឌីជីថលរបស់ប្រទេសវៀតណាម ត្រូវបានរំពឹងថានឹងឈានដល់អត្រាកំណើនប្រចាំឆ្នាំ២០% ដោយកើនឡើងពីទំហំ៣០ពាន់លានដុល្លារអាមេរិក ក្នុងឆ្នាំនេះឈានដល់ជិត៤៥ពាន់លានដុល្លារអាមេរិក នៅត្រឹមឆ្នាំ២០២៥៕ Vietnam News៕