ដោយៈ ហ្វីអូណា

        ភ្នំពេញៈ លោក Emmanuel MACRON ប្រធានាធិបតីនៃសាធារណរដ្ឋបារាំង បានលើកទឹកចិត្តឱ្យកម្ពុជា ធ្វើជាម្ចាស់ផ្ទះនៃកិច្ចប្រជុំកំពូលហ្វ្រង់កូហ្វូនីនៅឆ្នាំ២០២៦ ហើយបានសន្យាថាបារាំងនឹងគាំទ្របេក្ខភាពកម្ពុជា។

ការលើកឡើងបែបនេះ បានធ្វើឡើងក្នុងឱកាសនៃព្រះរាជទស្ស​នកិច្ចផ្លូវការ របស់ព្រះមហាក្សត្រខ្មែរ នៅសាធារណរដ្ឋបារាំង ពីថ្ងៃទី១២ ដល់​ថ្ងៃទី១៨ ខែវិច្ឆិកា ឆ្នាំ២០២៣ ដោយទ្រង់បានជួបព្រះរាជសវនាការជាមួយ លោក Emmanuel MACRON ប្រធានាធិបតីនៃសាធារណរដ្ឋបារាំង នៅវិមាន Élysée នៅរសៀលថ្ងៃទី១៣ ខែវិច្ឆិកា ឆ្នាំ២០២៣។ដោយបានដឹងថាកម្ពុជាមានឆន្ទៈ ក្នុងការទទួលរៀបចំព្រឹត្តិកា​រណ៍សំខាន់មួយរបស់ អង្គការហ្វ្រង់កូហ្វូនី លោកប្រធានាធិបតីបារាំង បានលើកទឹកចិត្តឱ្យកម្ពុជា ធ្វើជាម្ចាស់ផ្ទះនៃកិច្ចប្រជុំកំពូលហ្វ្រង់កូហ្វូនីនៅឆ្នាំ២០២៦ ហើយបានសន្យាថាបារាំង នឹងគាំទ្របេក្ខភាពកម្ពុជា។

ជាថ្មីម្ដងទៀត ព្រះមហាក្សត្រខ្មែរសម្តេចព្រះបរមនាថ នរោត្តម សីហមុនី បានមានព្រះបន្ទូលថា កម្ពុជាពិតជាមានមោទនភាពនឹងដាក់បេក្ខភាព រៀបចំកិច្ចប្រជុំកំពូលហ្វ្រង់កូហ្វូនី នៅឆ្នាំ២០២៦ ហើ​យព្រះអង្គ ទ្រង់មានព្រះរាជតម្រិះថា ការគាំទ្ររបស់បារាំងមានតម្លៃយ៉ាងខ្លាំង ពីព្រោះកិច្ចគាំទ្រនេះ នឹងឆ្លុះបញ្ចាំងពីឆន្ទៈ ក្នុងការពង្រឹងវត្តមានដ៏មានសារៈសំខាន់របស់បារាំងនៅអាស៊ី៕

ដោយៈ គង់ សូរិយា

ភ្នំពេញៈ ប្រធានសមាគមអ្នកអភិវឌ្ឍន៍លំនៅដ្ឋានកម្ពុជា អ្នកឧកញ៉ាលី ហួរបានសម្តែងសុទិដ្ឋិនិយមថា គោលនយោ​បាយរបស់រាជរដ្ឋាភិបាល ដែលបានដាក់ចេញនាពេលកន្លងមក និងដំណោះស្រាយរបស់រាជរដ្ឋាភិបាល នៅក្នុងវេទិការរវាងរាជរដ្ឋាភិបាល-ផ្នែកឯកជន លើកទី១៩ នឹងជួយជំរុញដល់ការអភិវឌ្ឍវិស័យអចលនទ្រព្យ និងសំណង់ឲ្យកាន់តែរីកចម្រើនឡើងថែមទៀត។

អ្នកឧកញ៉ាបានមានប្រសាសន៍បែបនេះ ក្នុងវេទិកាជជែកអំពីបរធនបាលកិច្ចកាលពីថ្ងៃទី១៤ វិច្ឆិកាកន្លងមក។អ្នកឧកញ៉ាបានបញ្ជាក់ថា បញ្ហាចំនួន៣ដែលធ្វើឲ្យវិស័យអច​លនទ្រព្យនៅកម្ពុជា បានរងផលប៉ះពាល់ខ្លាំង និងងើបមិនទាន់រួច ដោយសារបញ្ហាការរាតត្បាត ជាសកលនៃជំងឺកូវីដ១៩ បញ្ហាសង្គ្រាមរុស្ស៊ី និងអ៊ុយក្រែន និងថ្មីៗនេះ គឺការលេចចេញនៃសង្គ្រាមរវាងអ៊ីស្រាអែល និងក្រុមហាម៉ាស់។ទាក់ទងនឹងវិស័យបរធនបាលកិច្ច អ្នកឧកញ៉ា លី ហួរបានមានប្រសាសន៍ថា បរធនបាលកិច្ច គឺសំដៅដល់ការធានាជំនឿទុកចិត្តដល់វិនិយោគិនបរទេស ដើម្បីកុំឲ្យពួកគេមានការព្រួយបារម្ភ នៅពេលទិញអចលនទ្រព្យនៅកម្ពុជា ខណៈដែលជនបទេសអាចមានសិទ្ធិកាន់កាប់ អចលនទ្រព្យបានចាប់ពីជាន់ទី១ឡើង។

អ្នកឧកញ៉ាបានបន្តថា “ដូច្នេះបរធនបាលកិច្ច បានផ្តល់ភាពស្របច្បាប់ដល់ជនបទេស ក្នុងការកាន់កាប់អចលនទ្រព្យនៅកម្ពុជាក្នុងរយៈពេលយូរអង្វែង ដែលនឹងរួមចំណែកជំរុញដល់វិស័យអចលនទ្រព្យកាន់តែមានលំនឹង និងជាបណ្តើរៗនឹងងើបឡើងវិញ”៕

        ដោយៈ ជេស៊ីកា

ភ្នំពេញៈ ក្នុងរយៈពេលប៉ុន្មានខែចុងក្រោយនេះ ការចុះបញ្ជីនៃបរធនបាលកិច្ចកើនដល់៦៨៣ករណី នេះបើគិតត្រឹមសប្តាហ៍ទី២នៃខែវិច្ឆិកា ឆ្នាំនេះ ជាមួយទំហំទឹកប្រាក់វិនិយោគឡើងដល់១២២៣លានដុល្លារ។

លោក សុខ ដារ៉ា អគ្គនាយកនៃនិយ័តករបរធនបាលកិច្ច បានជជែកអំពីបរធនបាលកិច្ច យន្តការសម្រាប់វិនិយោគ លើវិស័យអច​លនទ្រព្យ ប្រកបដោយទំនុកចិត្ត ដែលសហការរៀបចំដោយ និយ័តករបរធនបាលកិច្ច និងសមាគមអ្នកអភិវឌ្ឍន៍លំនៅឋានកម្ពុជា នៅថ្ងៃទី១៤ខែវិច្ឆិកា ឆ្នាំ ២០២៣។លោកបានថ្លែងថា ការចុះបញ្ជីបរធនបាលកិច្ច នឹងបន្តកើនឡើងចំនួន៨៣ករណីបន្ថែមទៀត ជាមួយទឹកប្រាក់វិនិយោគ៣៥លានដុល្លា​រ។ តួលេខនេះ នឹងធ្វើឲ្យចំនួននៃការចុះបញ្ជីស្របច្បាប់ នៃវិស័យនេះ នឹងកើនដល់៧៦៦ករណី នៅដំណាច់ខែវិច្ឆិកានេះ។លោកបន្តថា ផ្អែកតាមទិន្នន័យការចុះបញ្ជី ស្របច្បាប់នៃវិស័យបរធនបាលកិច្ចសរុបចំនួន៦៨៣ករណី ក្នុងនោះចំនួន៦០៥ករណី ជាបរធនបាលកិច្ចវិនិយោគ ក្នុងវិស័យអចលនទ្រព្យ ហើយក្នុងនោះមាន៥៥២ករណី ត្រូវបានចុះបញ្ជីដោយជនបរទេស ដែលមានទំហំទុន៥៨០លានដុល្លារ ហើយក្នុងចំណោមការចុះបញ្ជីបរធនបាលកិច្ចរបស់ជនបរទេសទំាងនោះ គឺមាន៥៤១ករណី ជាបរធនបាលកិច្ចវិនិយោគលើវិស័យអចលនទ្រព្យ និង១១ករណីផ្សេងទៀត វិនិយោគលើប្រព័ន្ធរក្សាទុកសុវត្ថិភាព។

លោកសុខ ដារ៉ាបានពន្យល់ថា ការកើនឡើងដ៏គួរភ្ញាក់ផ្អើលនៃវិស័យបរធនបាលកិច្ចនាពេលនេះ ដោយសារវិនិយោគិន ជាពិសេសវិនិយោគិនបរទេស មានទំនុកចិត្ត និងយល់ដឹង ក៏ដូចជា មានសេចក្តីត្រូវការពីបរធនបាលកិច្ច ក្នុងការជួយគាំទ្រការវិនិយោគរបស់ពួកគាត់ ពិសេសលើវិស័យអចលនទ្រព្យ។

គិតមកដល់បច្ចុប្បន្ននេះ ធនាគារដែលទទួលបានអាជ្ញាប័ណ្ណមានចំនួន៩ និងក្រុមហ៊ុនបរធនបាលកិច្ច ដែលទទួលបានអាជ្ញាប័ណ្ណ ពីនិយ័តករបរធនបាលកិច្ចមានចំនួន ខណៈមានក្រុមហ៊ុន និងធនា​គារមួយចំនួនទៀត កំពុងដាក់ពាក្យស្នើសុំអាជ្ញាប័ណ្ណ ប្រតិបត្តិការគ្រប់​គ្រង ចាត់ចែង និងថែរក្សាសុវត្ថិភាពទ្រព្យសម្បត្តិជំនួសផងដែរ៕

ដោយៈ តែម សុខុម

បាងកកៈ ក្រុមប្រឹក្សាអភិវឌ្ឍន៍ថៃ បានដាក់គោលដៅទាក់ទាញក្រុមហ៊ុនបរទេសធំៗ យ៉ាងតិចឱ្យបាន១០០ក្រុមហ៊ុន ឱ្យមកបោះទុនវិនិយោគនៅប្រទេសថៃ ដែលនឹងជួយបង្កើតការងាជាង១០.០០០កន្លែងនៅរយៈពេល៤ឆ្នាំក្រោយ។

លោក Narit Therdsteerasukdi អគ្គលេខាធិការនៃក្រុមប្រឹក្សាភិវឌ្ឍន៍ថៃ បានទម្លាយឱ្យដឹងពីគោលដៅ ប្រកបដោយមហិច្ឆតានេះអំឡុងដំណើរទស្សនកិច្ច របស់នាយករដ្ឋមន្ត្រីថៃ លោក Srettha Thavisin ទៅកាន់ San Francisco សហរដ្ឋអាមេរិក ដើម្បីចូលរួមក្នុងកិច្ចប្រជុំកំពូលនាយកប្រតិបត្តិ APEC CEO Summit ឆ្នាំ២០២៣។ នេះបើយោងតាមកាសែត The Nation ចុះផ្សាយការពីថ្ងៃច័ន្ទ ទី១៣ ខែវិច្ឆិកា។ដំណើរទស្សនកិច្ចនេះមានពីរផ្នែក ទី១ ជាជំនួបរវាងនាយករដ្ឋមន្ត្រីថៃ លោក Srettha Thavisin និងក្រុមនាយកប្រតិបត្តិជាន់ខ្ពស់នៃក្រុមហ៊ុនគោលដៅ ក្នុងឧស្សាហកម្មអេឡិចត្រូនិច ឌីជីថល និងរថយន្តអគ្គិសនី (EV) ហើយផ្នែកទី២ ជាជំនួបជាមួយក្រុមសហគ្រិនថៃ ប្រមាណ២០រូប ដែលអមដំណើរជាមួយគណៈប្រតិភូ។

នៅក្នុងដំណើរទស្សនកិច្ចនេះ ក៏នឹងមានការរៀបចំឱ្យក្រុមសហគ្រិនថៃ បានជួបជាមួយតំណាងក្រុមហ៊ុនធំៗ របស់សហរដ្ឋអាមេរិក ដែលជាលទ្ធផល អាចនឹងឈានដល់ការសហការគ្នា នៅថ្ងៃអនាគតផងដែរ។ តំណាងអាជីវកម្មមកពីក្រុមហ៊ុន ជាង៨០របស់សហរដ្ឋអាមេរិក ត្រូវបានរំពឹងថានឹងចូលរួមក្នុងសកម្មភាពទាំងនេះ។

នាយករដ្ឋមន្ត្រីថៃ លោក Srettha Thavisin ត្រូវបានរំពឹងថានឹងជួបជាមួយតំណាង ក្រុមហ៊ុនឯកជនជាច្រើន ជាពិសេសក្រុមហ៊ុនក្នុងវិស័យឌីជីថល ដែលរួមមានក្រុមហ៊ុនធំៗដូចជា AWS, Google និង Microsoft ជាដើម។

ក្រុមហ៊ុន Amazon បានប្រកាសរួចមកហើយ នូវផែនការបោះទុនវិនិយោគ ក្នុងប្រទេសថៃនៅឆ្នាំក្រោយ ដោយការបោះទុនវិនិយោគដំបូង មានទំហំទឹកប្រាក់៥ពាន់លានដុល្លារអាមេរិក។ ការវិនិយោគនេះ នឹងរួមបញ្ចូលទាំងការសាងសង់ មជ្ឈមណ្ឌលរក្សាទុកទិន្នន័យចំនួន៣ផងដែរ៕ The Nation៕

ដោយៈ តែម សុខុម

សេអ៊ូលៈ រដ្ឋាភិបាលកូរ៉េខាងត្បូង បានប្រកាសកាលពីថ្ងៃច័ន្ទ ទី១៣ ខែវិច្ឆិកា ថា ខ្លួនមានផែនការទាក់ទាញ ភ្ញៀវទេសចរបរទេសឱ្យបាន២០លាននាក់នៅឆ្នាំក្រោយ ខណៈវប្បធម៌របស់ប្រទេសនេះកំពុ​ងទទួលបានប្រជាប្រិយភាព កាន់តែខ្លាំងឡើងទូទាំងពិភពលោក។

​លោក Yoo In-chon រដ្ឋមន្ត្រីក្រសួងវប្បធម៌ កីឡា និងទេសច​រណ៍បានលើកឡើ ងក្នុងសន្និសីទសារព័ត៌មាន នៅកណ្ដាលក្រុងសេអ៊ូល ថា “ដើម្បីអបអរគំនិតផ្ដួចផ្ដើម Visit Korea Year (ឆ្នាំដែលត្រូវមកលេងកូរ៉េ) ក្រសួងវប្បធម៌គ្រោងប្រឹងប្រែងឱ្យអស់លទ្ឌភាព ដើម្បីស្វែងរក និងអភិវឌ្ឍមាតិកាខុសៗគ្នាស្ដីពី វិស័យទេសចរណ៍ និងទាក់ទាញភ្ញៀវទេសចរបរទេស ឱ្យបាន២០លាននាក់នៅឆ្នាំក្រោយ”។

សន្និសីទសារព័ត៌មាននេះ គឺជាព្រឹត្តិការណ៍ផ្លូវការទាក់ទិននឹងវិស័យទេសចរណ៍ ដំបូងបង្អស់របស់ក្រសួង ដែលត្រូវបានរៀបចំឡើងដើម្បីអបអរគំនិតផ្ដួចផ្ដើម “2023-2024 Visit Korea Year” (២០២៣-២០២៤ ជាឆ្នាំដែលត្រូវមកលេងកូរ៉េ” ចាប់តាំងពីលោក Yoo In-chon ចូលកាន់តំណែងកាលពីខែមុន។

លោក Yoo In-chon បានគូបញ្ជាក់ថា ប្រទេសកូរ៉េ បានជួបប្រទះនូវឱនភាព ក្នុងឧស្សាហកម្មទេសចរណ៍ ខណៈភ្ញៀវទេសចរចេញក្រៅមានចំនួនច្រើន ជាងភ្ញៀវទេសចរបរទេស ដែលចូលមកលេងប្រទេសនេះ ចាប់តាំងពីការបើកព្រំដែនឡើងវិញ ក្រោយវិបត្តិកូវីដ-១៩ ក្នុងឆ្នាំនេះ។

យោងតាមទិន្នន័យរបស់អង្គការទេសចរណ៍កូរ៉េ (Korea Tourism Organization) បានបង្ហាញថា ពលរដ្ឋកូរ៉េជាង១៦,១លាននាក់ បានធ្វើដំណើរទេសចរណ៍ ទៅក្រៅប្រទេសគិតត្រឹមខែកញ្ញា ឆ្នាំនេះ ដែលខ្ពស់ជាងខ្លាំង បើធៀបនឹងចំនួនភ្ញៀវទេសចរបរទេស៧,៦៥លាននាក់ ដែលចូលមកលេងប្រទេសកូរ៉េ ក្នុងរយៈពេលដូចគ្នានេះ៕ Korea Times៕

ដោយ: គង់ លាងហួរ
អន្តរជាតិ: ទីក្រុងហាណូយបានបើកដំណើរការគម្រោងសាងសង់ “ទីក្រុងឆ្លាតវៃ” ថ្មីតម្លៃ៤,២ពាន់លានដុល្លារអាមេរិក ដែលលាតសន្ធឹងលើផ្ទៃដីទំហំ២៧០ហិកតា កាលពីថ្ងៃសៅរ៍ ទី១១ ខែវិច្ឆិកាកន្លងទៅ។

ទីក្រុងឆ្លាតវៃនេះស្ថិតនៅក្នុងស្រុក Dong Anh ទីក្រុងហាណូយ ហើយគម្រោងតម្លៃជាង៤ពាន់លានដុល្លារមួយនេះកំពុងត្រូវបានសាងសង់ឡើងដោយក្រុមហ៊ុន North Hanoi Smart City Development Investment (NHSC)។

ក្រុមហ៊ុននេះ គឺជា ការចងសម្ព័ន្ធភាពរវាង ក្រុមហ៊ុន BRG Corporation របស់ប្រទេសវៀតណាម និងក្រុមហ៊ុន Sumitomo Corporation របស់ ប្រទេសជប៉ុន។ ក្រុមហ៊ុន BRG និង Sumitomo បានចុះហត្ថលេខាលើកិច្ចព្រមព្រៀងលើកដំបូងលើគម្រោងនេះក្នុងឆ្នាំ២០១៧។
គម្រោងនេះត្រូវបានគេរំពឹងថានឹងចំណាយពេល៩ឆ្នាំ ដើម្បីបញ្ចប់ជា៥ដំណាក់កាល។ ក្នុងនោះដំណាក់កាលចំនួន៤ដំបូង ដែលត្រូវបញ្ចប់ក្នុងរយៈពេល ៧ឆ្នាំដំបូងរួមមានការដាំដើមឈើនិងការសាងសង់ផ្ទះសាលារៀន ចំណតរថយន្ត និង រចនាសម្ព័ន្ធផ្សេងទៀត។

ចំណែក ដំណាក់កាលទី៥ចុងក្រោយដែលគ្រោងនឹងបញ្ចប់ពីឆ្នាំ២០៣០ដល់ឆ្នាំ២០៣២ រួមមាន ការសាងសង់សំណង់សំខាន់ៗមួយចំនួន ដូចជាផ្សារទំនើប និងមជ្ឈមណ្ឌលហិរញ្ញវត្ថុចំនួន១០៨ជាន់។

លោក Duong Duc Tuan អនុប្រធានគណៈកម្មាធិការប្រជាជនទីក្រុងហាណូយ បានបង្ហាញក្តីសង្ឃឹមថា ទីក្រុងឆ្លាតវៃ (Smart City) នឹងជួយដោះស្រាយបញ្ហាហេដ្ឋារចនាសម្ព័ន្ធសំខាន់ៗទាក់ទងនឹងចរាចរណ៍ ថាមពល ការអប់រំ ឱសថ និងបរិស្ថាន។

ជាមួយគ្នានេះ ទីក្រុងហាណូយបានស្នើឱ្យក្រុមហ៊ុន North Hanoi Smart City Development Investment សហការជាមួយអង្គភាពពាក់ព័ន្ធនានា ដើម្បីបញ្ចប់ដំណើរការបោសសម្អាតដី ដែលបច្ចុប្បន្នសម្រេចបាន៩២% ក៏ដូចជាពន្លឿននីតិវិធីលើការប្រើប្រាស់ដី និងការអនុម័តសាងសង់៕

ដោយ: គង់ លាងហួរ

អន្តរជាតិ: យោងតាម ECA International ដែលជាស្ថាប័នផ្តល់ចំណេះដឹងខាងព័ត៌មាន និងបច្ចេកវិទ្យាឈានមុខគេ ដែលមានមូលដ្ឋាននៅទីក្រុងឡុងដ៍ បានចេញផ្សាយរបាយការណ៍មួយ ស្ដីពីការព្យាករណ៍អត្រាដំឡើងប្រាក់បៀវត្សរ៍ ក្នុងតំបន់អាស៊ីប៉ាស៊ីហ្វិក ជូនកម្មករ-និយោជិតក្នុងឆ្នាំ២០២៤ខាងមុខ។

ក្នុងនោះកម្ពុជា ប្រាក់បៀវត្សរ៍ពិតប្រាកដ បានកើនឡើង៣,២% ក្នុងឆ្នាំ២០២៣នេះ ហើយវាត្រូវបានគេរំពឹងថា នឹងកើនឡើង២,២% នៅក្នុងលក្ខខណ្ឌជាក់ស្តែង ក្នុងឆ្នាំ២០២៤ខាងមុខ។

ចំណែកបណ្តាប្រទេសជិតខាងរបស់កម្ពុជា ដូចជា នៅប្រទេសថៃ ប្រាក់បៀវត្សរ៍ពិតប្រាកដបានកើនឡើង៣,៥% ក្នុងឆ្នាំនេះនៅក្នុងលក្ខខណ្ឌជាក់ស្តែង ហើយវាត្រូវបានគេរំពឹងថា នឹងកើនឡើង៣,៤% នៅក្នុងលក្ខខណ្ឌជាក់ស្តែង ក្នុងឆ្នាំ២០២៤។

ចំណែក ប្រទេសវៀតណាមបាននាំមុខគេ ក្នុងតំបន់អាស៊ាននៅឆ្នាំ២០២៣នេះ ជាមួយនឹងកំណើនប្រាក់បៀវត្សរ៍ពិតប្រាកដ៣,៦% ហើយវាត្រូវបានគេព្យាករណ៍ថា នឹងកើនឡើង៣,៦%ដូចគ្នានៅឆ្នាំ២០២៤។

ផ្ទុយទៅវិញ កម្មករ-និយោជិតនៅប្រទេសឡាវ បានជួបប្រទះនូវការថយចុះយ៉ាងខ្លាំង នៃប្រាក់បៀវត្សរ៍ពិតប្រាកដ ក្នុងឆ្នាំ២០២៣នេះ ដោយបានធ្លាក់ចុះ២៣,១% ហើយវានឹងបន្តធ្លាក់ចុះ ក្នុងឆ្នាំ២០២៤ខាងមុខ ដែលបណ្តាលមកពីអត្រាអតិផរណាហក់ឡើងខ្ពស់។

នៅប្រទេសម៉ាឡេស៊ី ប្រាក់បៀវត្សរ៍ពិតប្រាកដបានកើនឡើង២,១% ក្នុងឆ្នាំនេះ នៅក្នុងលក្ខខណ្ឌជាក់ស្តែង ហើយវាត្រូវបានគេរំពឹងថា នឹងកើនឡើង២,៣% នៅក្នុងលក្ខខណ្ឌជាក់ស្តែង ក្នុងឆ្នាំ២០២៤ខាងមុខ។

ចំណែក នៅប្រទេសឥណ្ឌូនេស៊ី កម្មករ-និយោជិតត្រូវបានគេរំពឹងថា នឹងទទួលបានការដំឡើងប្រាក់ខែ ពិតប្រាកដ៤,៣% នៅឆ្នាំក្រោយ បើធៀបនឹង២,៩%ក្នុងឆ្នាំ២០២៣នេះ៕