ដោយៈ ម៉ាណា

    ភ្នំពេញៈ ក្រុមវិនិយោគិនពីបណ្តាប្រទេសមជ្ឈឹមបូព៌ា ចាប់អាម្មរណ៍ស្វែងយល់ពីសក្តានុពលទេសចរណ៍ម៉ូស្លីម ​(Muslim  Friendly Tourism) និងវិនិយោគរបស់ក្រុមហ៊ុន។

ក្នុងឱកាសស្នាក់នៅទីក្រុងហូជីម៉ិញ លោកហួត ហាក់ រដ្ឋមន្ត្រីក្រសួងទេសចរណ៍ បានអនុញ្ញាតជូនក្រុមវិនិយោគិន ពីបណ្តាមជ្ឈិមបូព៌ា ដែលកំពុងប្រកបអាជីវកម្ម លើគ្រប់ផ្នែកនៅទីក្រុងហូជីម៉ិញ ចូលជួបសម្តែងការគួរសម និងពិភាក្សាការងារ ដើម្បីផ្សព្វផ្សាយពីសភាពការណ៍ពិតអំពីនយោបាយ សង្គម និងសេដ្ឋកិច្ចរបស់កម្ពុជា និងកាលានុវត្តវិនិយោគនៅកម្ពុជា។

ក្នុងឱកាសនៃជំនួបនេះ លោករដ្ឋមន្រ្តី បានថ្លែងអំណរគុណដល់ក្រុមវិនិយោគិន ដែលបានចាប់អាម្មរណ៍ពីសក្តានុពល ទេសចរណ៍ ពិសេសគឺទេសចរណ៍ម៉ូស្លីម (Muslim Friendly Tourism) និងកាលានុវត្តវិនិយោគនៅកម្ពុជា។

លោកហួត ហាក់ បានគូសបញ្ជាក់ពីកត្តាសុខសន្តិភាព ស្ថិរភាពនយោបាយ សង្គម សុខសុវត្ថិភាពផ្តល់ជូនដល់វិនិយោគិន និងភ្ញៀវទេសចរអន្តរជាតិ យន្តការលើកទឹកចិត្ត និងការធានាជូនវិនិយោគិន សក្តានុពលទេសចរណ៍ ដ៏មានសន្ទុះខ្លាំងក្លា ដែលជាទីផ្សារទើបនឹងរះឡើង ព្រមទាំងមានកម្លាំងពលកម្មដែលសកម្ម និងប្រកបដោយគុណភាព ហេដ្ឋារចនាសម្ព័ន្ធបានអភិវឌ្ឍល្អប្រសើរ។

ជាមួយគ្នានេះ លោករដ្ឋមន្ត្រី បានយកឱកាសនេះបញ្ជាក់ជូនអំពីប្រទេសកម្ពុជា គឺជាគោលដៅទេសចរណ៍អន្តរជាតិ ប្រកបដោយសុវត្ថិភាព មិត្តភាព ផ្តល់ភាពកក់ក្តៅ និងទាក់ទាញ។

ក្នុងន័យនេះ កម្ពុជានៅតែប្រកាន់ជំហរយ៉ាងម៉ឺងម៉ាត់ ឥតប្រែប្រួ​ល គឺថែរក្សាសន្តិភាព មិត្ត​ភាព និងកិច្ចសហប្រតិបត្តិការល្អជាមួយគ្រប់ប្រទេសជាមិត្ត ទោះក្នុងកាលៈទេសៈណាក៏ដោយ ដើម្បីធានាដល់ការអភិវឌ្ឍលើគ្រប់វិ ស័យទាំងសេដ្ឋកិច្ច និងសង្គម ជាពិសេសគឺសុខសុវត្ថិភាព និងភាពសុខសាន្តរបស់ប្រជាពលរដ្ឋកម្ពុជា បូករួមទាំងមិត្តវៀតណាម ភ្ញៀវទេសចរវៀតណាម និងភ្ញៀវទេសចរអន្តរជាតិទាំងអស់នៅកម្ពុជា ជាពិសេសគឺបានត្រៀមខ្លួនជាស្រេច លើការទទួលបដិសណ្ឋារកិច្ច ទេសចរណ៍ម៉ូស្លីម (Muslim Friendly Tourism)៕

ដោយៈ គង់ សូរិយា

    ភ្នំពេញៈ វិស័យទេសចរណ៍កម្ពុជា និងវៀតណាម នឹងត្រូវបានពង្រឹង និងពង្រីកបន្ថែមទៀតជាមួយ នឹងការចុះអនុស្សរណៈនៃការយោគយល់គ្នាថ្មី។

ព័ត៌មាននេះត្រូវបានលើកឡើង ក្នុងដំណើរដឹកនាំគណៈប្រតិភូវិស័យទេសចរណ៍កម្ពុជា ចូលរួមពិព័រណ៌ទេសចរណ៍អន្តរជាតិទីក្រុងហូជីមិញលើកទី១៩ លោកហួត ហាក់ រដ្ឋមន្ត្រីក្រសួងទេសចរណ៍ បានជួបពិភាក្សាការងារជាមួយលោកNguyễn Văn Hùng រដ្ឋមន្រ្តីក្រសួងវប្បធម៌ កីឡា និងទេសចរណ៍វៀតណាម ដើម្បីពិនិត្យ និងវាយតម្លៃពីលទ្ធផល នៃការអនុវត្តអនុស្សរណៈនៃការយោគយល់គ្នានាពេលកន្លងមក និងលើកទិសដៅការងារថ្មីបន្តទៀត ដើម្បីពង្រឹង និងពង្រឹកកិច្ចសហប្រតិបត្តិការលើវិស័យទេសចរណ៍ កាន់តែខ្លាំងក្លា និងជាក់ស្តែងបន្ថែមទៀត។

តាមការរីកចម្រើន ជាបន្តបន្ទាប់ឥតឈប់ឈរ នៃទំនាក់ទំនងនៃប្រទេសទាំងពីរ ស្របស្មារតី “ភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងស្ថិរភាពយូរអង្វែ​ង” ដែលត្រូវបានពូនជ្រុំ ដោយថ្នាក់ដឹកនាំកំពូលគ្រប់ជំនាន់នៃប្រទេសទាំងពីរ។

ក្នុងជំនួបកម្រិតខ្ពស់ដ៏មានសារៈសំខាន់ និងប្រកបដោយផ្លែផ្កា ភាគីទាំងពីរ បានបង្ហាញនូវសេចក្តីសោមន្ស និងការពេញចិត្តលើលទ្ធផលនៃការអនុវត្តអនុស្សរណៈ នៃការយោគយល់គ្នា ដែលបានចុះកន្លងមក តាមរយៈចំនួនភ្ញៀវទេសចរជាតិ និងអន្តរជាតិ ដែលធ្វើដំណើរទៅមករវាងប្រទេសទាំងពីរ មានចំនួនកើនឡើងច្រើនជាលំដាប់។ ដើម្បីឆ្លើយតបនូវការវិវឌ្ឍនៃវិស័យទេសចរណ៍ និងទំនោរនិយមថ្មីៗ របស់ភ្ញៀវទេសចរអន្តរជាតិ ដែលចាប់អារម្មណ៍លើសក្តានុពលទេសចរណ៍ មានលក្ខណៈពិសេសប្លែកគ្នារបស់ប្រទេសកម្ពុជា និងវៀតណាម។

ភាគីទាំងពីរ តម្រូវការទេសចរណ៍របស់ប្រជាជន នៃប្រទេសទាំងពីរ ភាគីទាំងពីរ បានឯកភាពគ្នាស្នើសុំគោលការណ៍ អនុញ្ញាតដ៏ខ្ពង់ខ្ពស់ពីរដ្ឋាភិបាល ដើម្បីរៀបចំកែសម្រួល និងចុះអនុស្សរណៈនៃការយោគយល់គ្នាថ្មី ដែលឆ្លុះបញ្ចាំងពីទំនាក់ទំនងសាមគ្គីភាព និងមិត្តភាពដ៏រឹងមាំរវាងប្រទេសទាំងពីរ ព្រមទាំងការពង្រឹង និងពង្រីកលើកកម្ពស់កិច្ចសហប្រតិបត្តិការ លើវិស័យទេសចរណ៍ឱ្យកាន់តែខ្លាំងក្លា គ្រប់ជ្រុងជ្រោយ និងស៊ីជម្រៅ ដើម្បីរូមគ្នាផ្សព្វផ្សាយសក្តានុពលទេសចរណ៍ដ៏ខ្លាំងក្លា បេតិកភណ្ឌវប្បធម៌ដចំណាស់ និងមានតម្លៃមនុស្សជាតិ ប្រពៃណីទំនៀមទំលាប់ដ៏សម្បូរបែប កត្តាសុខសុវត្ថិភាពដ៏ល្អប្រសើរ និងការធ្វើបដិសណ្ឋារកិច្ច ដ៏កក់ក្តៅជូនដល់ភ្ញៀវទេសចរ ពីម្ចាស់ស្រុក និងគោលដៅទេសចរណ៍ធម្មជាតិចម្រុះប្លែកៗ និងគួរឱ្យចង់ទស្សនារបស់ប្រទេសទាំងពីរ និងសហការរួមគ្នាបង្កើតផលិតផលទេសចរណ៍ថ្មីៗ ដែលមានភាពទាក់ទាញ ប្រកួតប្រជែង និងអាចបំពេញតម្រូវការនៃភ្ញៀវទេសចរជាតិ និងអន្តរជាតិ ប្រកបដោយតម្លៃបន្ថែម បៃតង វៃឆ្លាត និរន្តភាព និងបរិយាប័ន្ន៕

ដោយៈ ចំណាន

    ភ្នំពេញៈ តើមានមូលដ្ឋានសំខាន់អ្វីដែលទំនងជានឹងបន្ត? ខណៈពេលដែលទិន្នន័យផ្លូវការឆ្នាំ2026 មិនទាន់មាននៅឡើយសម្រាប់សេដ្ឋកិច្ចកម្ពុជា។

ប៉ុន្តែប្រសិនជាយើងក្រឡេកមើល លើសូចនាករជាច្រើនបង្ហាញថា សន្ទុះនៃការវិនិយោគនឹងនៅតែមាន។

ការសិក្សាបានបង្ហាញថា កត្តាជំរុញកំណើនប្រកបដោយនិរន្តរភាព៖ ក្របខ័ណ្ឌច្បាប់អំណោយផល ការព្យាករណ៍កំណើនសេដ្ឋកិច្ច ការអភិវឌ្ឍន៍ហេដ្ឋារចនាសម្ព័ន្ធ និងនិន្នាការនគរូបនីយកម្មត្រូវបានគេរំពឹងថានឹងរក្សាការអំពាវនាវ។

លើសពីនេះ ការធ្វើពិពិធកម្មវិនិយោគិន និន្នាការនៃវិនិយោគិនលោកខាងលិច និងអឺរ៉ុប ដែលផ្លាស់ប្តូរទីតាំងដើមទុនមកកម្ពុជាកំពុងកើនឡើង។ ពួកគេត្រូវបានទាក់ទាញ ដោយគោលនយោបាយស្ថិរភាពរបស់កម្ពុជា ភាពបត់បែននៃកម្មសិទ្ធិអចលនទ្រព្យ និងទិន្នផលជួលខ្ពស់។

ជាមួយគ្នានេះ ការផ្លាស់ប្តូរពីការត្រួតត្រារបស់ចិនបានបង្ហាញថា ទោះបីជាប្រទេសចិន ធ្លាប់ជាអ្នកវិនិយោគកំពូល ក្នុងប្រវត្តិសាស្ត្រក៏ដោយ ក៏ឥទ្ធិពលរបស់វាកំពុងប្រឈមមុខ នឹងការប្រកួតប្រជែងកាន់តែខ្លាំងឡើងពីអ្នកលេងលោកខាងលិច ជប៉ុន និងក្នុងតំបន់៕