ដោយ: គង់ លាងហួរ

អន្តរជាតិ: ក្រុមពាណិជ្ជករមាសក្នុងប្រទេសថៃ បានអះអាងថា ការកើនឡើងភាពតានតឹង នៅតំបន់មជ្ឈិមបូព៌ាអាចជំរុញឱ្យតម្លៃហាងឆេងមាស ហក់ឡើងលើសពី២.០០០ដុល្លារក្នុងមួយអោន ខណៈតម្លៃមាស ក្នុងប្រទេសថៃអាចហក់ឡើង ដល់៣៤.៧០០បាតក្នុង១៥,២ក្រាម។

ជាទូទៅនៅពេលស្រុកទេសមានវិបត្តិ ឬសង្គ្រាម មនុស្សតែងតែសម្រុកទិញមាសទុក ឬវិនិយោគលើមាស ព្រោះមាសត្រូវបានគេចាត់ទុកជា លោហធាតុមានតម្លៃ និងជាទ្រព្យដ៏មានសុវត្ថិភាពសម្រាប់ប្រើប្រាស់ ក្នុងការដោះដូរជាមួយទំនិញផ្សេងៗ នៅពេលមានវិបត្តិ ឬរូបិយប័ណ្ណគេលែងត្រូវការ។

លោក Varut Rungkhum ប្រធានផ្នែកស្រាវជ្រាវនៅក្រុមហ៊ុន YLG Bullion & Futures បានលើកឡើងថា “ការប្តេជ្ញារបស់មេដឹកនាំអ៊ីស្រាអែល ក្នុងការបើកការឈ្លានពាន ដើម្បីរុញប្រជាជនប៉ាឡេស្ទីនចេញពីតំបន់ហ្គាហ្សាស្ទ្រីប បានធ្វើឱ្យអ្នកវិនិយោគមានការព្រួយបារម្ភថា ជម្លោះនេះអាចក្លាយទៅជាសង្រ្គាមលោកលើកទី៣”។

លោកបានបន្តថា ទន្ទឹមនឹងនេះ ទីភ្នាក់ងារសំខាន់របស់អង្គការសហប្រជាជាតិនៅតំបន់ហ្គាហ្សា បានបញ្ឈប់ប្រតិបត្តិការផ្តល់ជំនួយ ហើយត្រូវបានគេរាយការណ៍មកថា បានដកក្រុមរបស់ខ្លួនមួយផ្នែក ដែលជាសញ្ញាបង្ហាញថា សង្រ្គាមអាចនឹងកើនឡើងកំដៅ។

លោក Varut បានមានប្រសាសន៍ថា “យើងព្យាករថា តម្លៃមាសពិភពលោក នឹងហក់ឡើងដល់ដល់២.០០៣ដុល្លារ ក្នុងមួយអោន ខណៈតម្លៃមាសក្នុងស្រុករបស់ប្រទេសថៃ អាចស្ថិតនៅក្នុងចន្លោះពី៣៤.៤០០ ទៅ៣៤.៧០០បាតក្នុង១៥,២ក្រាម” ។

ចំណែកឯ អ្នកវិភាគផ្សេងទៀតរំពឹងថា តម្លៃមាសនៅទីបំផុតអាចហក់ឡើងដល់២.១០០ដុល្លារ ក្នុងមួយអោនក្នុងអំឡុងពេលមានភាពតានតឹងបច្ចុប្បន្ននៅតំបន់មជ្ឈឹមបូព៌ា។

ក្រៅពីជម្លោះនៅតំបន់មជ្ឈិមបូព៌ា ការកើនឡើងនៃតម្រូវការមាសនៅក្នុងប្រទេសចិន ក៏បានជំរុញឱ្យតម្លៃមាសហក់ឡើងខ្ពស់ផងដែរ។  តម្រូវការមាសនៅចិនដីគោក បានកើនឡើង៧,៣% ក្នុងរយៈពេល៩ខែដំបូង ឆ្នាំ២០២៣នេះ បើធៀបនឹងរយៈពេលដូចគ្នាកាលពីឆ្នាំមុន។

ទោះបីជាយ៉ាងនេះក្តី ក្នុងរយៈពេលដ៏ខ្លី តម្លៃហាងឆេងមាសអាចរងឥទ្ធិពល ដោយសារទស្សនវិស័យ នៃការបន្តដំឡើងអត្រាការប្រាក់នៅសហរដ្ឋអាមេរិក ដែលមានន័យថា កាលណាអត្រាការប្រាក់កើនឡើង នោះតម្លៃមាសនឹងធ្លាក់ចុះ។

លោក Varut បានគូសបញ្ជាក់ថា “ស្របពេលដែលផលប័ត្រសញ្ញាប័ណ្ណ (Bond yields) របស់សហរដ្ឋអាមេរិក បានកើនឡើងជាថ្មីម្តងទៀត ឥឡូវនេះ អ្នកវិភាគកំពុងព្យាករថា ធនាគារកណ្តាលអាមេរិក (Fed) អាចនឹងដំឡើងអត្រាការប្រាក់គោល របស់ខ្លួនម្តងទៀតនៅឆ្នាំនេះ”៕

ដោយៈ គង់ សូរិយា

        ភ្នំពេញៈ សេដ្ឋកិច្ចកម្ពុជានឹងបន្តនិន្នាការកើនឡើង ដោយរំពឹងថាសម្រេចបានកំណើនក្នុងរង្វង់៦.៦% ដែលធ្វើឲ្យផលិតក្នុងស្រុកសរុប (ផ.ស.ស) ថ្លៃបច្ចុប្បន្នស្ថិតក្នុងរង្វង់១៤២,៩៥៧ ប៊ីលានរៀល សមមូលនឹងប្រមាណ៣៥,១៦៨ លានដុល្លារ។

នេះបើយោងតាម​ខ្លឹមសារសង្ខេប នៃសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៤ ដែលផ្សព្វផ្សាយដោយក្រសួងសេដ្ឋកិច្ច និងហិរញ្ញវត្ថុកាលពីសប្តាហ៍មុន។ឯកសារខ្លឹមសារសង្ខេប នៃសេចក្តីព្រាងច្បាប់បានបញ្ជាក់ទៀតថា ប្រាក់ចំណូលសរុបប្រចាំឆ្នាំរបស់ប្រជាជនម្នាក់ ត្រូវបានរំពឹងថានឹងកើនឡើងដល់២,០៧១ ដុល្លារបើធៀបនឹងប្រមាណ១៩១៧ ដុល្លារ ក្នុងឆ្នាំ២០២៣។

ការរំពឹងទុកនូវកំណើន៦.៦%នេះ ត្រូវបានគាំទ្រដោយវិស័យសេដ្ឋកិច្ចសំខាន់ៗ ដូចជា ទី១ វិស័យឧស្សាហកម្មត្រូវបាន ព្យាករថានឹងបន្តនិន្នាការ កើនឡើងក្នុងរង្វង់៨.៥% ក្នុងឆ្នាំ២០២៤ ពីប្រមាណ ៥.០% ក្នុងឆ្នាំ២០២៣ ដោយសារការរំពឹងទុក ការងើបឡើងវិញនៃអនុវិស័យកាត់ដេរ ស្របពេលដែលអនុវិស័យកម្មន្តសាល មិនមែនកាត់ដេរនៅបន្តរក្សាបានកំណើនរឹងមាំ ខណៈដែលអនុវិស័យសំណង់នៅបន្តមានកំណើនទាប។

ទី២ វិស័យសេវាកម្ម ត្រូវបានព្យាករថា នឹងបន្តនិន្នាការល្អ ក្នុងអត្រាកំណើន៦.៩% ក្នុងឆ្នាំ២០២៤ ពីមូលដ្ឋានល្អក្នុងរង្វង់៨.១% ក្នុងឆ្នាំ២០២៣ ដោយសារការបន្តងើបឡើងវិញ នៃសកម្មភាពសេដ្ឋកិច្ច ក្នុងស្រុក ជាពិសេសអនុវិស័យសណ្ឋាគារ និងភោជនីយដ្ឋាន ដែលក៏នឹងមានផលជះជាវិជ្ជមាន ដល់វិស័យ-អនុវិស័យគាំទ្រផ្សេងៗទៀត រួមមាន អនុវិស័យលក់ដុំ-រាយ និងដឹកជញ្ជូន ជាដើម។

ទី៣ វិស័យកសិកម្មរំពឹងថា នឹងបន្តសម្រេចបានកំណើនល្អ ក្នុងរង្វង់១,១% ក្នុងឆ្នាំ២០២៤ ធៀបនឹង០,៩% ក្នុងឆ្នាំ២០២៣ ដោយសា​រការបន្តនិន្នាការល្អនៃអនុវិស័យដំណាំ និងការបន្តងើបឡើងវិញនៃអនុវិស័យនេសាទ ខណៈដែលអនុវិស័យចិញ្ចឹមសត្វ នៅបន្តមានស្ថិរភាព។

បើទោះបីជាសេដ្ឋកិច្ចកម្ពុជាក្នុងឆ្នាំ២០២៤ ត្រូវបានរំពឹងថា នឹងបន្តងើបឡើងវិញ ក្នុងអត្រាកំណើន៦.៦% យ៉ាងណាក្តី កម្ពុជាក៏នឹងនៅបន្តជួបប្រទះនឹងហានិភ័យ និងបញ្ហាប្រឈមចម្បងៗ ជាពិសេសពីកត្តាខាងក្រៅ ដែលអាចធ្វើឲ្យកំណើនខាងលើនេះ មិនអាចសម្រេចបានតាមការគ្រោងទុក ក៏ដូចជាអាចទាញពន្យឺតដល់កំណើនសេដ្ឋកិច្ចកម្ពុជា ជារួមក្នុងរយៈពេលមធ្យមខាងមុខ ដែលក្នុងនោះរួមមាន ១ ការកើនឡើងនូវភាពតានតឹង ភូមិសាស្រ្តនយោបាយតំបន់ និងសកល ២ ការថមថយសេដ្ឋកិច្ចសកល ជាពិសេសបណ្តាប្រទេសដែលជាដៃគូពាណិជ្ជកម្មកម្ពុជា។

៣ ការបន្តរឹតបន្តឹងយូរជាងការរំពឹងទុក នៃគោលនយោបាយរូបិយវត្ថុ ជាពិសេសសហរដ្ឋអាមេរិក និងការបន្តកើនឡើងថ្លៃរូបិយប័ណ្ណដុល្លារអាមេរិក ដែលអាចប៉ះពាល់ដល់រំហូរទុនវិនិយោគ និងពាណិជ្ជកម្ម ៤ ការបន្តឡើងថ្លៃ ឬកម្រិតខ្ពស់នៃថ្លៃថាមពល និងទំនិញជារួមលើទីផ្សារអន្តរជាតិ ៥ ការបែកខ្ញែកភូមិសាស្ត្រសេដ្ឋកិច្ចកំពុងកាត់បន្ថយនូវការចូលរួម ក្នុងចរន្តសកលភាវូបនីយកម្ម ស្របជាមួយនឹងការកើនឡើងនៃនិន្នាការពហុប៉ូល និងការបែងចែកប្លុកសេដ្ឋកិច្ច និងពាណិជ្ជកម្ម និង៦ ការកើនឡើងនូវផលប៉ះពាល់ជាអវិជ្ជមាន កាន់តែធ្ងន់ធ្ងរនៃការប្រែប្រួលអាកាសធាតុ។

ចំណែកកត្តាខាងក្នុង កម្ពុជានៅបន្តប្រឈមនឹងបញ្ហាជារចនាសម្ព័ន្ធមួយចំនួន ដូចជា ភាពប្រកួតប្រជែងនៅមានកម្រិត និងល្បឿនទាបនៃការធ្វើពិពិធកម្មសេដ្ឋកិច្ច ព្រមទាំងការបន្តពឹងផ្អែកខ្លាំង លើតម្រូវការខាងក្រៅ៕

        ដោយៈ ស៊ីវ ម៉េង

        ភ្នំពេញៈ ម្ចាស់អាជីវកម្មជាច្រើន បាននិងកំពុងប្រឈមមុខនឹងវិបត្តិសេដ្ឋកិច្ច និងម្ចាស់អាជីវកម្មនានាបានិងកំពុងរងផលប៉ះពាល់ពីភាពមិនច្បាស់លាស់នៃសេដ្ឋកិច្ចពិភពលោក។

លោកឧកញ៉ាបណ្ឌិត គីម ហ៊ាងប្រធានKW Cambodia និងជាអ្នកអភិវឌ្ឍន៍បុរីវិមានសំណាងកាលពីសប្តាហ៍មុន បានចែករំលែកអំពីបទពិសោធន៍ ក្នុងការដឹកនាំអាជីវកម្មរបស់លោក ក្នុងរយៈពេលប៉ុន្នានឆ្នាំចុងក្រោយនេះ ​អំឡុងពេលដែលសេដ្ឋកិច្ចកម្ពុជា ប្រឈមនឹងបញ្ហាជាច្រើន។លោកបានជំរុញដល់ម្ចាស់អាជីវកម្ម ត្រូវបន្តអភិវឌ្ឍសមត្ថភាពផ្ទាល់ខ្លួន ពង្រឹងប្រព័ន្ធគ្រប់គ្រងអាជីវកម្ម កាត់បន្ថយចំណាយមិនចាំបាច់ ពង្រឹងការលក់ ពិសេសគឺត្រូវតែរវល់នឹងការលក់ មិនគួររវល់នឹងរឿងផ្សេងឡើយ។

លោកបានណែនាំពីគោលការណ៍សំខាន់ចំនួន៤ ក្នុងការដំណើរការអាជីវកម្មក្នុងស្ថានភាពសេដ្ឋកិច្ចមានវិបត្តិ ដែលរួមមាន លើកទឹកចិត្តបុគ្គលិក យល់ដឹងពីការគ្រប់គ្រងសាច់ប្រាក់ យល់ពីវដ្ដនៃសេដ្ឋកិច្ច និងវដ្តនៃអាជីវកម្ម។

លោកឧកញ៉ាបណ្ឌិត​ថែមទាំងបានបង្ហាញ អំពីយុទ្ធសាស្ត្រ ម៉ូម៉ាឡែត ដោយត្រូវចេះធ្វើយ៉ាងណា ឱ្យអាជីវកម្មអាចឆ្លងផុតវិបត្តិ ជាពិសេស ការគ្រប់គ្រងចំណាយ។ កម្មវិធីចែករំលែកគំនិត និងបទពិសោធន៍ ​ទាក់ទងនឹងការស្វែងយល់ និងត្រៀមខ្លួនប្រឈមនឹងវិបត្តិ បានធ្វើឡើងកាលពីថ្ងៃទី២១ ខែតុលា ឆ្នាំ ២០២៣​៕

តែម សុខុម

គ័ងចូវៈ សេដ្ឋកិច្ចពិភពលោកនឹងបង្អង់ល្បឿនជាមួយនឹងកំណើន៣,១%ក្នុងឆ្នាំ២០២៣ ខណៈការរឹតបន្តឹងគោលនយោបាយរូបិយវត្ថុ វិបត្តិសង្គ្រាមនៅអ៊ុយក្រែន និងផលប៉ះពាល់នៃវិបត្តិកូវីដ-១៩ បន្តជះផលប៉ះពាល់ដល់កំណើនសកល។

យោងតាមរបាយការណ៍ស្ដីពីហិរញ្ញវត្ថុ និងការអភិវឌ្ឍន៍សកលឆ្នាំ២០២៣ របស់ក្រុមហ៊ុនសាជីវកម្មអាមេរិក IFF ដែលត្រូវបានបញ្ចេញអំឡុងកិច្ចប្រជុំប្រចាំឆ្នាំកាលពីថ្ងៃសៅរ៍ ទី២៨ ខែតុលា បង្ហាញថា ផលទុនជាតិសរុប (GDP) របស់ប្រទេសចិន ត្រូវបានព្យាករថានឹងសម្រេចបានកំណើន៥,២%ក្នុងឆ្នាំ២០២៣ និង៥%ក្នុងឆ្នាំ២០២៤ ខណៈប្រទេសចិន បានដាក់ចេញកញ្ចប់ជំរុញសេដ្ឋកិច្ចជាបន្តបន្ទាប់។

ពេលនេះរបាយការណ៍នេះព្យាករថា សេដ្ឋកិច្ចពិភពលោកនឹងនៅតែចុះខ្សោយក្នុងឆ្នាំ២០២៤ ជាមួយនឹង GDP ពិភពលោកនឹងសម្រេចបានកំណើន៣,១%។

តម្លៃទំនិញប្រើប្រាស់ទូទាំងពិភពលោកនឹងធ្លាក់ចុះមកនៅត្រឹម៧%ក្នុងឆ្នាំនេះពី៩,២%ក្នុងឆ្នាំ២០២២ ហើយអតិផរណានឹងធ្លាក់ចុះបន្ថែមទៀតមកនៅត្រឹម៥,៨%ក្នុងឆ្នាំ២០២៤។

សេដ្ឋកិច្ចរបស់សហរដ្ឋអាមេរិក ត្រូវបានព្យាករថានឹងសម្រេចបានកំណើន៣%ក្នុងឆ្នាំ២០២៣ ខណៈ GDP របស់សហភាពអឺរ៉ុប ត្រូវបានរំពឹងថានឹងសម្រេចបានកំណើន០,៨ក្នុងឆ្នាំនេះ និង១,៥%ក្នុងឆ្នាំ២០២៤៕ Yahoo News៕

ដោយ: គង់ លាងហួរ
ភ្នំពេញ: យើងសាកស្រមៃមើលពិភពលោកមួយ ដែលការច្នៃប្រឌិត ជួបជាមួយនឹងការរចនាឌីហ្សាញ ប្រកបដោយភាពស្និទ្ធស្នាលនឹងបរិស្ថាន ដោយរាល់គ្រប់បរិក្ខារទាំងអស់ ដែលអ្នកស្រមៃចង់បានគឺស្ថិតនៅជិតដៃរបស់លោកអ្នកបំផុត។

នេះពុំមែនត្រឹមជាចក្ខុវិស័យ សម្រាប់ថ្ងៃស្អែកនោះឡើយ ប៉ុន្តែវាជាការពិត ដែលក្រុមហ៊ុនStrategic Realty Investment(SRI) កំពុងសាងសង់គម្រោង ប្រើប្រាស់ចម្រុះខ្នាតយក្សមួយ ដែលមានឈ្មោះថា Banteay Srey Eco City ដើម្បីបំពេញក្តីស្រមៃទាំងនេះរបស់មនុស្សគ្រប់រូបឱ្យក្លាយជាការពិត។
ប្រសិនបើអ្នកចំណាយពេលមួយភ្លែត ដើម្បីសាកស្រមៃមើលជីវិត ដែលអាចរស់នៅក្នុងបរិស្ថានដ៏ស្រស់បំព្រង នៅក្នុងគម្រោង Banteay Srey Eco City នោះអ្នកប្រាកដជាស្រមៃឃើញ ព្រះអាទិត្យរះចែងចាំង នៅលើវីឡាដ៏អស្ចារ្យ ដែលបានរចនាយ៉ាងល្អិតល្អន់ស្របតាមស្តង់ដារអន្តរជាតិដ៏ខ្ពស់បំផុត។
អ្នកអាចពិសាកាហ្វេពេលព្រឹក ដែលទើបនឹងឆុងហើយថ្មីៗនៅក្នុងផ្ទះបាយដ៏ប្រណីត ហើយអ្នកក៏អាចបញ្ជូនកូនៗ ទៅកាន់សាលារៀនលំដាប់ថ្នាក់ពិភពលោក ក្នុងគម្រោង Banteay Srey Eco City ដែលមានទីតាំងស្ថិតនៅចំបេះដូង នៃទីក្រុងសៀមរាបផងដែរ។
លើសពីនេះ អ្នកអាចនឹងអញ្ជើញ ទៅកាន់ផ្ទះអាជីវកម្មមួយ ក្នុងចំណោមផ្ទះអាជីវកម្មជាច្រើន ប្រកបដោយភាពច្នៃប្រឌិតរបស់គម្រោង Banteay Srey Eco City ហើយអ្នកក៏អាចទៅលេងនៅទីលានកីឡាដ៏ធំទូលាយក្នុងគម្រោង ដែលស្មារតីនៃការប្រកួតប្រជែង និងមិត្តភាពតែងតែនៅរស់រវើកជានិច្ច។

ជម្រើសដែលផ្តល់ជូនដោយគម្រោង Banteay Srey Eco City គឺគ្មានទីបញ្ចប់។ អ្នកអាចចំណាយពេលវេលា នៅពេលរសៀល នៅក្នុងសួនផ្កាពណ៌ខៀវស្រងាត់របស់យើង និងស្រស់ស្រូបអាហារនៅហាងលក់អាហាររហ័សក្នុងផ្សារទំនើប ឬភោជនីយដ្ឋានលំដាប់កំពូល ៗក្នុងគម្រោងនេះផងដែរ។
នៅពេលល្ងាចចូលមកដល់ ផ្សារទំនើប និងមជ្ឈមណ្ឌលកម្សាន្តរបស់យើងមានភាពរស់រវើក ដោយផ្តល់នូវភាពសប្បាយរីករាយ និងការសម្រាកលំហែគ្មានទីបញ្ចប់។
គម្រោង Banteay Srey Eco City ពុំមែនបង្កើតឡើងសម្រាប់តែការរស់នៅប៉ុណ្ណោះទេ ប៉ុន្តែវាជាការប្តេជ្ញាចិត្ត ចំពោះអនាគតប្រកបដោយនិរន្តរភាព។
ជាមួយនឹងតំបន់កសិកម្មដ៏ធំទូលាយ ក្រុមហ៊ុនSRI ម្ចាស់អភិវឌ្ឍគម្រោង Banteay Srey Eco City កំពុងជំរុញការកសាងសហគមន៍មួយ ដែលមិនត្រឹមតែអាចផ្តល់ផលប្រយោជន៍ សម្រាប់មនុស្សទូទៅប៉ុណ្ណោះទេ ប៉ុន្តែថែមទាំងរួមចំណែក ដល់កំណើនសេដ្ឋកិច្ចកម្ពុជាផងដែរ។
លើសពីនេះ សម្រាប់ឱកាសពិសេសៗ ដូចជា ពិធីរៀបមង្គលការ មជ្ឈមណ្ឌលអាពាហ៍ពិពាហ៍ និងសន្និបាតរបស់គម្រោង Banteay Srey Eco City គឺជាកន្លែងដ៏ល្អឥតខ្ចោះសម្រាប់ប្រារព្ធពិធីទាំងនេះរបស់លោកអ្នក ដែលហ៊ុព័ទ្ធទៅដោយសម្រស់ធម្មជាតិនៃវាលស្មៅដ៏ស្រស់ឆើតឆាយ។

សម្រាប់អ្នកវិនិយោគដែលយល់ច្បាស់ គម្រោង Banteay Srey Eco City បានតំណាងឱ្យឱកាសដ៏អស្ចារ្យមួយ ដែលមិនដូចទៅនឹងគម្រោងផ្សេងទៀតឡើយ។ នៅទីនេះ ការវិនិយោគមិនមែនគ្រាន់តែជាឱកាសស្វែងរកកំណើន ផ្នែកហិរញ្ញវត្ថុប៉ុណ្ណោះទេ ប៉ុន្តែក៏ជាការរួមចំណែកដល់អនាគត ប្រកបដោយនិរន្តរភាពផងដែរ។
ក្រុមហ៊ុន SRI អះអាងថា “យើងមិនត្រឹមតែបង្កើតទីក្រុងនោះទេ យើងក៏កំពុងបង្កើតសហគមន៍ របៀបរស់នៅ និងអនាគតផងដែរ ហើយយើងកំពុងអញ្ជើញ អ្នករាល់គ្នាឱ្យចូលរួមជាផ្នែកមួយ នៃដំណើរនេះ ដើម្បីចូលរួមជាមួយយើង ក្នុងការរៀបចំផ្លូវជីវិតថ្មី និងការរួមរស់ជាមួយគ្នា ប្រកបដោយនិរន្តរភាព និងប្រណីតភាព”។

លោកបណ្ឌិត Alexander Evengroen ដៃគូសហការ និងជានាយកផ្នែកអភិវឌ្ឍន៍គំរោងនៃក្រុមហ៊ុន Strategic Realty Investment បានមានប្រសាសន៍ថា ក្រុមហ៊ុនបាននិងកំពុងអភិវឌ្ឍមួយជំហានម្តងៗ ហើយរហូតមកដល់ពេលនេះ យើងបាននិងកំពុងអភិវឌ្ឍជាច្រើនជំហាន នៅក្នុងគម្រោងរបស់យើង ប៉ុន្តែយើងនឹងបន្តការយកចិត្តទុកដាក់ ទៅលើការបង្កើតតម្លៃបន្ថែមសម្រាប់តំបន់ ប្រជាជន សេដ្ឋកិច្ចកម្ពុជា ការបង្កើតរបៀបរស់នៅថ្មី ផ្សាភ្ជាប់មនុស្សជាមួយនឹងធម្មជាតិជុំវិញ ប្រកបដោយភាពច្នៃប្រឌិត ការអភិវឌ្ឍដែលមិនប៉ះពាល់ដល់បរិស្ថាន និងការកម្សាន្ត ដ៏គួរឱ្យចាប់អារម្មណ៍ជាច្រើនសម្រាប់កុមារ និងមនុស្សចាស់។

លោកបណ្ឌិត Alexander Evengroen បានលើកឡើងថា យើងកំពុងអភិវឌ្ឍគម្រោងនេះឡើង ដើម្បីបង្កើត និងផ្តល់ឱកាសដល់យុវជនជំនាន់ក្រោយ ដូចជាអ្នករចនាឌីហ្សាញ អ្នកម៉ៅការ និងស្ថាបត្យករ ព្រោះយើងគិតគូរអំពីអនាគត របស់មនុស្សជំនាន់ថ្មី។
លោកបណ្ឌិត Alexander បានបន្ថែមថា ជាមួយនឹងចក្ខុវិស័យច្បាស់លាស់ បេសកកម្ម និងមូលដ្ឋានដ៏រឹងមាំ យើងកំពុងផ្តល់ឱកាស សម្រាប់អ្នកវិនិយោគក្នុងស្រុក និងអន្តរជាតិ ព្រមទាំងសាធារណជនទូទៅ ដើម្បីចូលរួមជាមួយយើង ក្នុងឱកាសវិនិយោគឈ្នះ-ឈ្នះ និងឈ្នះ-ឈ្នះសម្រាប់ក្រុមហ៊ុន ប្រជាជន និងសេដ្ឋកិច្ច ដើម្បីជំរុញការអភិវឌ្ឍសង្គម-សេដ្ឋកិច្ច-នវានុវត្តន៍៕

តែម សុខុម

គូឡាឡាំពួៈ ក្រុមហ៊ុនបច្ចេកវិទ្យាយក្សទាំង៧ (Magnificent Seven) ដែលបានជួយឱ្យភាគហ៊ុនអាមេរិក ក្នុងឆ្នាំនេះហក់ឡើងខ្ពស់ បានបាត់បង់តម្លៃទីផ្សារចំនួន៣៨៦ពាន់លានដុល្លារ។ នេះបើយោងតាមសារព័ត៌មាន The Edge Markets ចុះផ្សាយកាលពីថ្ងៃសុក្រ ទី២៧ ខែតុលា។

ក្រុមហ៊ុន Alphabet Inc ដែលជាក្រុមហ៊ុនមេរបស់ Google ក្រុមហ៊ុន Tesla Inc ក្រុមហ៊ុន Meta Platforms Inc ដែលជាក្រុមហ៊ុនមេរបស់ Facebook និងក្រុមហ៊ុន Microsoft Corp សុទ្ធតែបានដាំក្បាលចុះជាប់តាំងពីបញ្ចេញរបាយការណ៍ប្រាក់ចំណេញរបស់ខ្លួនមក។ភាគហ៊ុនរបស់ក្រុមហ៊ុន Amazon.com Inc ក៏បានដាំក្បាលចុះនៅក្នុងការជួញដូរ បន្ទាប់ពីបញ្ចេញលទ្ធផលប្រាក់ចំណូលរបស់ខ្លួន ខណៈក្រុមហ៊ុនបច្ចេកវិទ្យាយក្សពីរទៀតគឺក្រុមហ៊ុន Apple Inc និងក្រុមហ៊ុន Nvidia Corp នឹងត្រូវដល់ពេលបញ្ចេញរបាយការណ៍ប្រាក់ចំណូលរបស់ខ្លួននៅខែក្រោយ។ក្រុមហ៊ុនបច្ចេកវិទ្យាយក្សទាំង៧នេះបានក្លាយជាចំណុចលេចធ្លោប្រចាំឆ្នាំនៅក្នុងផ្សារហ៊ុន ដោយការចាប់អារម្មណ៍យ៉ាងពុះកញ្ជ្រោលទៅលើបច្ចេកវិទ្យាបញ្ញាសិប្បនិម្មិត AI បានធ្វើឱ្យក្រុមហ៊ុនទាំងនេះចំណេញកប់ក្ដោង។

ទោះជាយ៉ាងណា សុទិដ្ឋិនិយមបានសាបរលាភទៅវិញដោយសារតែអត្រាការប្រាក់ហក់ឡើងកាន់តែខ្ពស់ និងវិបត្តិសង្គ្រាមនៅតំបន់មជ្ឈិមបូព៌ា ដោយធ្វើឱ្យផ្សារហ៊ុនអាមេរិក S&P 500 ធ្លាក់ចុះ៩,៨%ពីកម្រិតកំពូលរបស់ខ្លួនក្នុងឆ្នាំ២០២៣៕ The Edge Market៕

ដោយ: គង់ លាងហួរ
ភ្នំពេញ: អាជ្ញាធរជាតិអប្សរា បានដាក់ឱ្យដំណើរការខ្សែទស្សនាថ្មីនៅប្រាសាទចៅសាយទេវតា និងប្រាសាទធម្មនន្ទ ក្នុងឧទ្យានបុរាណវិទ្យាអង្គរ ដែលស្ថិតនៅភាគពាយ័ព្យនៃខេត្តសៀមរាប។

នេះបើយោងតាមសារពត៌មាន Xinhua ចុះផ្សាយកាលពីថ្ងៃសុក្រ ទី២៧ ខែតុលា ឆ្នាំ២០២៣។
លោក ខឿន កុសល់ ប្រធានភ្នាក់ងារទេសចរណ៍ប្រចាំប្រាសាទចៅសាយទេវតា ធម្មនន្ទ និងខ្លោងទ្វារជ័យ បានអះអាងថា ខ្សែទស្សនាថ្មីនេះអាជ្ញាធរជាតិអប្សរាបានរៀបចំជាពីរខ្សែ ដោយខ្សែទី១ គឺមានចម្ងាយខ្លី ដែលភ្ញៀវអាចឈប់យានជំនិះនៅផ្នែកខាងជើង និងដើរចូលតាមច្រកខាងកើត ប្រាសាទចៅសាយទេវតា ហើយចេញតាមច្រកខាងជើងដដែល។ ចំណែកខ្សែទី២ ជាខ្សែទស្សនាវែង ដែលភ្ញៀវចាប់ផ្តើមចូលទស្សនានៅប្រាសាទធម្មនន្ទ ដើរចូលតាមសួនបណ្ដុះកូនឈើប្រាសាទតាកែវ និងចូលតាមច្រកខាងកើតប្រាសាទចៅសាយទេវតា។យោងតាមការបញ្ជាក់ពីលោក ខឿន កុសល់ បានឱ្យដឹងថា ការរៀបចំនេះគឺដើម្បីសម្រួលដល់ការទស្សនារបស់ភ្ញៀវទេសចរ ឱ្យកាន់តែងាយស្រួល ពិសេសធ្វើឱ្យការទស្សនាមានភាពលម្អិត និងគ្រប់ជ្រុងជ្រោយ ខណៈដែលកន្លងមក ភ្ញៀវចូលទស្សនារបៀបសេរី មិនមានគោលដៅចាប់ផ្តើម និងបញ្ចប់ត្រឹមត្រូវនោះទេ។ បច្ចុប្បន្នវង់ទស្សនានេះបានដាក់ឱ្យដំណើរការហើយ ចំណែកភ្នាក់ងារទេសចរណ៍ប្រចាំប្រាសាទនេះ កំពុងរៀបចំ និងកែលម្អ ចាក់ដីបំពេញជង្ហុគខ្លះ ដើម្បីឱ្យការដើររបស់ភ្ញៀវមានភាពងាយស្រួល។ប្រាសាទចៅសាយទេវតា ត្រូវបានកសាងឡើងនៅចុងសតវត្សទី១១ ក្នុងរាជ្យព្រះបាទសូរ្យវរ្ម័នទី២។ ដ្បិតជាប្រាសាទតូច តែប្រាសាទចៅសាយទេវតាមានក្បួនក្បាច់ចម្លាក់ជាច្រើនមិនចាញ់ប្រាសាទធំប៉ុន្មាននោះទេ និងមានស្ពានហាលដ៏ទាក់ទាញនៅច្រកចូលខាងកើត ដែលភ្ញៀវទេសចរអាចផ្ដិតរូបភាពនៅទីនោះបាន។

ប្រាសាទចៅសាយទេវតា គឺជាប្រាសាទមួយក្នុងចំណោមប្រាសាទដែលបាក់បែកក្នុងសម័យអង្គរ ហើយត្រូវបានជួសជុលដោយក្រុមបុរាណវិទ្យាចិនចាប់ពីឆ្នាំ១៩៩៧ ដល់ឆ្នាំ២០០៨។ ឧទ្យានបុរាណវិទ្យាអង្គរទំហំ៤០១គីឡូម៉ែត្រការ៉េ ដែលបានចុះក្នុងបញ្ជីបេតិកភណ្ឌពិភពលោករបស់អង្គការអប់រំ វិទ្យាសាស្ត្រ និងវប្បធម៌របស់អង្គការសហប្រជាជាតិ (យូណេស្កូ) ក្នុងឆ្នាំ១៩៩២ គឺជាគោលដៅទេសចរណ៍ពេញនិយមបំផុតនៅកម្ពុជា៕

តែម សុខុម

រីយ៉ាដៈ បច្ចេកវិទ្យាបញ្ញាសិប្បនិម្មិត AI នឹងរួមចំណែកជិត១៦០ពាន់លានដុល្លារ ដល់សេដ្ឋកិច្ចនៃប្រទេសអារ៉ាប៊ីសាអូឌីត នៅឆ្នាំ២០៣០។ នេះបើយោងតាមការចុះផ្សាយរបស់សារព័ត៌មាន Arab News កាលពីថ្ងៃសុក្រ ទី២៧ ខែតុលា។

នាយកប្រតិបត្តិក្រុមហ៊ុនប្រព័ន្ធផ្សព្វផ្សាយ Saudi Research and Media Group លោកស្រី Jomana Al-Rashid បានសង្កត់ធ្ងន់ពីសារៈសំខាន់នៃការយល់ដឹងអំពីសេដ្ឋកិច្ចនៃបច្ចេកវិទ្យា AI និងផលប៉ះពាល់ដែលអាចកើតមានរបស់វាមកលើប្រព័ន្ធហិរញ្ញវត្ថុ។

ក្រុមថ្នាក់ដឹកនាំ និងក្រុមអ្នកជំនាញក្នុងឧស្សាហកម្មបានជួបប្រជុំគ្នានៅឯវេទិកាគំនិតផ្ដួចផ្ដើមការវិនិយោគថ្ងៃអនាគត (Future Investment Initiative) ក្នុងទីក្រុងរីយ៉ាដ (Riyadh) ដើម្បីពិភាក្សាអំពីឥទ្ធិពលដ៏ខ្លាំងក្លានៃបច្ចេកវិទ្យា AI ដែលមានមកលើសេដ្ឋកិច្ច និងស្ថាប័នប្រព័ន្ធផ្សព្វផ្សាយទូទាំងពិភពលោក។

លោកស្រី Jomana Al-Rashid បានលើកឡើងថា “របាយការណ៍មួយកាលពីពេលថ្មីៗនេះរបស់ក្រុមហ៊ុនសវនកម្មអន្តរជាតិ PwC បានបង្ហាញថា បច្ចេកវិទ្យា AI នឹងរួមចំណែកជិត១៦ទ្រីលានដុល្លារ ដល់សេដ្ឋកិច្ចពិភពលោកនៅឆ្នាំ២០៣០ ហើយក្នុងនោះមាន១៦០ពាន់លានដុល្លារ នឹងរួមចំណែកដល់សេដ្ឋកិច្ចនៃប្រទេសអារ៉ាប៊ីសាអូឌីត”។

លោកស្រីបានបន្តថា “ក្នុងនាមជាស្ថាប័នប្រព័ន្ធផ្សព្វផ្សាយ យើងព្យាយាមស្វែងយល់ថា តើបច្ចេកវិទ្យា AI ជាអ្វីឱ្យប្រាកដ។ យើងព្យាយាមស្វែងយល់ថា តើបច្ចេកវិទ្យា AI អាចកែលម្អរំហូរការងារ ប្រសិទ្ធភាពការងារ និងបង្កើនភាពច្នៃប្រឌិតបានតាមវិធីណា”៕ Arab News៕

តែម សុខុម

ហាណូយៈ ទិន្នន័យផ្លូវការបានបង្ហាញកាលពីថ្ងៃសុក្រ ទី២៧ ខែតុលា ថា ការវិនិយោគរបស់បរទេសនៅប្រទេសវៀតណាម មានសន្ទុះកើនឡើងខ្លាំងក្នុងខែតុលា កន្លងទៅ។

សន្ទុះកើនឡើងយ៉ាងគំហុកនេះកើតមានឡើង ខណៈប្រទេសវៀតណាម ដែលជាមជ្ឈមណ្ឌលផលិតកម្មទាក់ទាញការសន្យាបោះទុនវិនិយោគបានជាងទ្វេដងបើធៀបនឹងអត្រាប្រចាំខែដែលខ្លួនទទួលបានក្នុងឆ្នាំនេះ ស្របពេលក្រុមហ៊ុនធំៗមានផែនការបើករោងចក្រថ្មីៗជាច្រើន។

នៅក្នុងខែតុលា ប្រទេសវៀតណាម ទទួលបានការប្ដេជ្ញាបោះទុនវិនិយោគរបស់បរទេសក្នុងទំហំ៥,៣ពាន់លានដុល្លារ បើធៀបនឹងអត្រាជាមធ្យមប្រចាំខែ២,២ពាន់លានដុល្លារ ដែលខ្លួនទទួលបាននៅក្នុងឆ្នាំ២០២៣។យោងតាមទិន្នន័យពីក្រសួងវិនិយោគនៃប្រទេសវៀតណាម បង្ហាញថា ប្រមាណ៩០%នៃរំហូរវិនិយោគក្នុងខែតុលា គឺជំរុញដោយផែនការសាងសង់រោងចក្រថ្មីៗ។

ចាប់តាំងពីដើមឆ្នាំ២០២៣ មក ប្រទេសវៀតណាម ទទួលបានការប្ដេជ្ញាបោះទុនវិនិយោគរបស់បរទេសក្នុងទំហំ២៥,៧៦ពាន់លានដុល្លារ ដោយកើនឡើង១៤,៧%បើធៀបនឹងរយៈពេលដូចគ្នាក្នុងឆ្នាំ២០២២។៣ភាគ៤នៃការប្ដេជ្ញាបោះទុនវិនិយោគរបស់បរទេសទាំងនោះនឹងបានទៅលើឧស្សាហកម្មផលិតកម្ម និងកែច្នៃ។

ការសន្យាបោះទុនវិនិយោគពីប្រទេសចិន និងក្រុងហុងកុង រួមបញ្ចូលគ្នាគឺមានចំនួនច្រើនបំផុតគិតរហូតមកទល់ពេលនេះ បន្ទាប់មកគឺប្រទេសសិង្ហបុរី និងកូរ៉េខាងត្បូង។ការវិនិយោគជាក់ស្ដែងនៅក្នុងរយៈពេល១០ខែដើមឆ្នាំ២០២៣ បានកើនឡើង២,៤%ពីរយៈពេលដូចគ្នាក្នុងឆ្នាំ២០២២ ឈានដល់១៨ពាន់លានដុល្លារ៕ Reuters ៕