ដោយ: គង់ លាងហួរ

អន្តរជាតិ: ដើម្បីដោះស្រាយការហូរចេញ នៃអ្នកមានទេពកោសល្យ តំបន់រដ្ឋបាលពិសេសហុងកុង (HKSAR) បានប្រកាសវិធានការជាបន្តបន្ទាប់ ដើម្បីបន្ធូរបន្ថយគោលនយោបាយទិដ្ឋាការ ក្នុងគោលបំណងទាក់ទាញកម្មករ មកពីប្រទេសឡាវ វៀតណាម និងនេប៉ាល់។

សំណើនេះត្រូវបានគូសបញ្ជាក់ ដោយនាយកប្រតិបត្តិទីក្រុងហុងកុង  លោក John Lee នៅក្នុងការថ្លែងសុន្ទរកថា គោលនយោ បាយទី២របស់លោក ទៅកាន់ក្រុមប្រឹក្សានីតិបញ្ញត្តិ របស់រដ្ឋាភិបាល ដែលនេះ បង្ហាញពីការផ្លាស់ប្តូរជាយុទ្ធសាស្ត្រ ដើម្បីស្រូបទាញអ្នកមានទេពកោសល្យ ចូលមកកាន់ទីក្រុងហុងកុងឡើងវិញ។

ទីក្រុងហុងកុងបានប្រឈមមុខ នឹងបញ្ហាកាន់តែខ្លាំងឡើងក្នុងការរក្សា និងទាក់ទាញអ្នកជំនាញ និងនិស្សិតដែលមានជំនាញក្នុងរយៈពេលប៉ុន្មានឆ្នាំថ្មីៗនេះ។  ជាការឆ្លើយតប ទៅនឹងការព្រួយបារម្ភមួយនេះ លោក Lee បានដាក់បង្ហាញនូវគោលនយោបាយថ្មី។រដ្ឋបាលតំបន់ពិសេសហុងកុង គ្រោងនឹងបន្ធូរបន្ថយនូវលក្ខណៈវិនិច្ឆ័យទិដ្ឋាការការងារ សម្រាប់អ្នកជំនាញវៀតណាម ដែលធ្វើឱ្យវាកាន់តែងាយស្រួល សម្រាប់ពួកគេក្នុងការស្វែងរកឱកាស នៅក្នុងតំបន់។

លើសពីនេះ ទីក្រុងហុងកុង នឹងកែសម្រួលលក្ខណៈវិនិច្ឆ័យសម្រាប់ជនជាតិវៀតណាម ដែលដាក់ពាក្យស្នើសុំទិដ្ឋាការចូលបានច្រើនលើក(Multiple-entry visas) សម្រាប់គោលបំណងអាជីវកម្ម និងការធ្វើដំណើរ។

ការផ្លាស់ប្តូរទាំងនេះត្រូវបានរំពឹងថា នឹងជួយសម្របសម្រួលដល់ការបង្កើនការចូលរួម និងកិច្ចសហប្រតិបត្តិការ រវាងប្រទេសវៀតណាម និងតំបន់រដ្ឋបាលពិសេសហុងកុង។

យោងតាមប្រភពរបស់រដ្ឋាភិបាលបានបង្ហើបថា ទិដ្ឋាការចូលបានច្រើនលើកនេះ នឹងអនុញ្ញាតឲ្យអ្នកធ្វើដំណើរ ពីប្រទេសវៀតណាមអាចទៅទស្សនា ទីក្រុងហុងកុងក្នុងរយៈពេលអតិបរមា១៤ថ្ងៃ ជារៀងរាល់លើក ក្នុងរយៈពេលពីរឆ្នាំ។ទន្ទឹមគ្នានេះ ទីក្រុងហុងកុង ក៏​កំពុង​ពង្រីក​សិទ្ធិ​ស្រដៀង​គ្នា​នេះ​ទៅ​កាន់ប្រទេស​ឡាវ និង​នេប៉ាល់ផងដែរ។ គោលនយោបាយទិដ្ឋាការ សម្រាប់អ្នកមានទេពកោសល្យមកពីប្រទេសឡាវ និងនេប៉ាល់ នឹងត្រូវបានបន្ធូរបន្ថយឱ្យមានភាពងាយស្រួលសម្រាប់ការងារ ការបណ្តុះបណ្តាល និងឱកាសសិក្សា។ ចំណាត់ការនេះ បើកទ្វារសម្រាប់សិស្សនិស្សិត អ្នកសិក្សា និងអ្នកជំនាញវ័យក្មេង ដើម្បីចូលរួមជាមួយទេសភាព ការងាររបស់ទីក្រុងហុងកុង។

ដើម្បីមានលក្ខណៈគ្រប់គ្រាន់ អ្នកធ្វើដំណើរត្រូវតែបំពេញតាមលក្ខណៈវិនិច្ឆ័យមួយចំនួន ដូចជា ការបានទៅលេងប្រទេសចំនួនពីរ ឬច្រើនជាងនេះ យ៉ាងតិច៣ដងក្នុងរយៈពេល៣ឆ្នាំចុងក្រោយនេះ ឬបានបន្តការសិក្សា ឬកិច្ចខិតខំប្រឹងប្រែង ប្រកបដោយវិជ្ជាជីវៈនៅក្នុងទីក្រុងហុងកុង ក្នុងរយៈពេល២ឆ្នាំកន្លងមកនេះ៕

ដោយ: គង់ លាងហួរ

ភ្នំពេញ: យោងតាមរបាយការណ៍របស់ក្រសួងពាណិជ្ជកម្ម ដែលបានចេញផ្សាយកាលពីថ្ងៃព្រហស្បតិ៍បានឱ្យដឹងថា កម្ពុជាបាននាំចេញទំនិញ មានតម្លៃ៥,៨១ពាន់លានដុល្លារ ទៅកាន់បណ្តាប្រទេសសមាជិកភាព ជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP)។

ទំហំទឹកប្រាក់នាំចេញនេះ គិតត្រឹមរយៈពេល៩ខែ ឆ្នាំនេះ ហក់ឡើង២៣,៦% ធៀបនឹងរយៈពេលដូចគ្នាកាលពីឆ្នាំមុន។

របាយ​ការណ៍​បាន​បន្ត​ថា​ ក្នុង​អំឡុង​ខែ​មករា​រហូតដល់​ខែ​កញ្ញា​ ឆ្នាំ​នេះ គោលដៅ​នាំ​ចេញ​កំពូល​ទាំង​៣របស់​កម្ពុជា ​ក្រោម​កិច្ច​ព្រម​ព្រៀង RCEP រួមមាន ប្រទេស​វៀតណាម ប្រទេសចិន និង​ប្រទេសជប៉ុន។

តួយ៉ាង កម្ពុជាបាននាំចេញផលិតផល ដែលមានតម្លៃ២,០៣ពាន់លានដុល្លារ ទៅកាន់ប្រទេសវៀតណាម កើនឡើង៣០,៦ភាគរយ ១,០៦ពាន់លានដុល្លារទៅកាន់ប្រទេសចិន កើនឡើង១៨,២ភាគរយ និង៨៨៥,៧លានដុល្លារ ទៅកាន់ប្រទេសជប៉ុន ធ្លាក់ចុះ១,៣ភាគរយ។

កិច្ចព្រមព្រៀងពាណិជ្ជកម្មសេរី RCEP មានសមាជិកចំនួន១៥ប្រទេស ដែលក្នុងនោះ មានប្រទេសសមាជិកអាស៊ានចំនួន១០ ដូចជា ប្រ៊ុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និងវៀតណាម និងដៃគូពាណិជ្ជកម្មចំនួន៥ គឺប្រទេសចិន ជប៉ុន កូរ៉េខាងត្បូង អូស្ត្រាលី និងនូវែលសេឡង់។

រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មកម្ពុជា លោក ប៉ែន សុវិជាតិ បានមានប្រសាសន៍ថា កិច្ចព្រមព្រៀង RCEP ដែលបានចូលជាធរមាន នៅឆ្នាំ២០២២ គឺជាកត្តាជំរុញកំណើនការនាំចេញរបស់កម្ពុជា ហើយបានក្លាយជាមេដែក ស្រូបទាញលំហូរវិនិយោគផ្ទាល់ពីបរទេស កាន់តែច្រើនចូលមកកាន់កម្ពុជា។

លោក​បាន​ប្រាប់​សារពត៌មាន Xinhua ថា​ “កំណើន​នៃការ​នាំ​ចេញ​នេះបាន​បង្ហាញ​ថា​ បណ្តាប្រទេស​ជាសមាជិកកិច្ច ព្រមព្រៀង RCEP ជា​ទីផ្សារ​ដ៏​មាន​សក្តានុពល ​សម្រាប់​ផលិតផល​ ដែលផលិត​នៅ​កម្ពុជា”។

លោកបានបន្ថែមថា “ជាមួយនឹងការអនុគ្រោះពន្ធ ដែលផ្តល់ក្រោមកិច្ចព្រមព្រៀង RCEP ដូច្នេះ គ្មានអ្វីគួរឱ្យសង្ស័យទេដែលថា ការនាំចេញរបស់កម្ពុជា ទៅកាន់ប្រទេសសមាជិកRCEP ផ្សេងទៀតនឹងបន្តកើនឡើងពេញមួយឆ្នាំនេះ និងឆ្នាំក្រោយ”៕

ដោយៈ គង់ សូរិយា

        ភ្នំពេញៈ ដោយយល់ និងធ្លាប់បានសិក្សាលើជំនាញផ្នែកវិស្វកម្ម នៅសាកលវិទ្យាល័យ លោកថាន់ ចាន់ណាបានយល់ពីតម្រូវការ និងបញ្ហាប្រឈមរបស់អ្នកអភិវឌ្ឍន៍ ក៏ដូចជាប្រជាពលរដ្ឋ ដែកតែងតែចង់បានលំនៅដ្ឋានមានគុណភាព សោភ័ណភាព និងមិនលិចទឹកនៅពេលភ្លៀងធ្លាក់មក។

លោកថាន់ ចាន់ណា បានចាប់ផ្តើមសាងសង់បុរី និងផ្តោតលើចំណុចសំខាន់ៗ ក៏ដូចជា គុណតម្លៃរបស់បុរីចំនួន១០ ដែលអតិថិជនទទួលបានទំនុកចិត្ត ដូចជា ទី១ ផ្លូវច្បាប់ គឺក្រុមហ៊ុនបានចុះបញ្ជីនៅក្រសួងពាក់ព័ន្ធត្រឹមត្រូវ ទី២ ប្លង់កម្មសិទ្ធិ  គឺអតិថិជនទទូលបានប្លង់រឹងកាត់ឈ្មោះពីម្ចាស់បុរីផ្ទាល់។ ទី៣ គុណភាពសំណង់  ផ្តោតលើសំណង់រឹងមាំ មានគុណភាពល្អ មានការត្រួតពិនិត្យដោយវិស្វករជំនាញ។

ចំណុចសំខាន់ទី៤ សោភ័ណ្ឌភាព ដេគ័រ អ្នកអភិវឌ្ឍន៍ផ្តោតរចនាបថសម័យទំនើប មានប្លង់ស្ថាបត្យកម្ម សិក្សារមុនចេញប្លង់។ ទី៥ សក្តានុពលគម្រោង គឺបុរីចាន់ណាលែន ជាគំរោងស្ថិតនៅទីប្រជុំជន មានផ្លូវរដ្ឋព័តជុំវិញ នឹងជាទិសដៅអភិវឌ្ឍន៍របស់រាជរដ្ឋាភិបាល ទី6 ទីតាំងបុរី ភូមិព្រៃចាស់ ឃុំវិហារសួគ៌ ស្រុកខ្សាច់កណ្កាល ខេត្តកណ្តាល។គុណតម្លៃទី៧ គឺលក្ខខណ្ឌបង់ប្រាក់ អតិថិជនមានលទ្ធភាពចូល រួមមុន20ភាគរយ អាចស្នើបុរីកាត់ប្លង់បង់ជាមួយធនាគាបាន និងផ្ទះមានតម្លៃផ្ទះចាប់ពី39,000$ ឡើងទៅ ទី៩ ហេដ្ឋារចនាសម្ព័ន្ធ ផ្លូវបេតុង 8ម៉ែត្រ ប្រព័ន្ធទឹករដ្ឋ ភ្លើងរដ្ឋ ប្រព័ន្ធលូ បង្គោលភ្លើងបំភ្លឺផ្លូវ និងចំណុចទី១០ ធនាគាផ្តល់ប្រាក់កម្ចៃ បានខ្ពស់រហូតដល់85ភាគរយ នៃតម្លៃផ្ទះ៕

        ដោយៈ គង់ សូរិយា

        ភ្នំពេញៈ ក្រុមអ្នកអភិវឌ្ឍន៍លំនៅដ្ឋានកម្ពុជា បាននិង​កំពុងស្នើ​ឲ្យរដ្ឋាភិបាលពិចារណា និងសិក្សាលើទិដ្ឋភាពច្បាប់មួយចំនួន ដើម្បី​អនុញ្ញាត្តឲ្យជនបរទេស មានសិទ្ឋស្របច្បាប់ក្នុងការទិញផ្ទះ និងដី​នៅក្នុងបុរីបាន។

គំនិតនេះ ត្រូវបានលើកឡើងក្នុងចំណោម ប្រធានបទសំខាន់ៗ​ចំនួន​៣ ដែលបានពិភាក្សាគ្នារវាង ថ្នាក់ដឹកនាំ សមាគមអ្នកអភិវឌ្ឍន៍លំនៅដ្ឋានកម្ពុជា ជាមួយលោកឧបនាយករដ្ឋមន្រ្តីសាយ សំអាល់​រដ្ឋមន្រ្តីក្រសួង រៀបចំដែនដី នគរូបនីយកម្ម និងសំណង់។កិច្ចប្រជុំ ដែលបានធ្វើឡើងកាលពីដើមសប្តាហ៍នេះ បានពិភា​ក្សា​” អំពីស្ថានភាព វិស័យសំណង់នៅកម្ពុជា” ដែលកំពុងមានបញ្ហាធ្លា​ក់ចុះ​នៅ​ក្នុងទីផ្សារ ស្របពេលស្ថានភាព​សេដ្ឋកិច្ចសកល កំពុងមានភាព​មិន​ច្បាស់លាស់។អ្នកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជា បានប្រាប់បណ្តាញព័ត៌មានកាលពីម្សិលម៉ិញថា ការលើកឡើងនេះ គ្រាន់តែជាសំណើ ដើម្បីរិះរកវិធីក្នុងការដោះស្រាយបញ្ហា ដែលអ្នកអភិវឌ្ឍន៍លំនៅឋានបានជួបប្រទះ។ តែយ៉ាងយើងត្រូវសិក្សាពីច្បាប់ និងរដ្ឋធម្មនុញ្ញរបស់កម្ពុជា ក៏ដូចជា សិក្សាពីប្រទេសជិតខាង និងប្រទេសដទៃទៀត ដែលគេអាចធ្វើបាន។អ្នកឧកញ៉ាបន្ថែមថា “ករណីនេះគឺពាក់ព័ន្ធ នឹងទិដ្ឋភាពផ្លូវច្បាប់ជាច្រើន ដូច្នេះយើងមិនអាចនិយាយមុនបានទេ ទាល់តែយើងធ្វើការសិក្សាឱ្យបានស្រួលបួលសិន”។

ជាមួយនឹងសំណើរនេះ គេក៏បានសិក្សានៅប្រទេសជិតខាងកម្ពុជា គឺប្រទេសថៃ ដែលអនុញ្ញាត្តឲ្យជនបរទេសមានសិទ្ឋទិញ និងកាន់កាប់ដី នៅតំបន់សេដ្ឋកិច្ចពិសេសរបស់ខ្លួនភាគខាងកើតផងដែរ។ កម្ពុជាបានអនុម័តច្បាប់ស្ដីពី ការផ្ដល់សិទ្ធិកម្មសិទ្ធិលើចំណែកឯកជន នៃអគារសហកម្មសិទ្ធិ (ខុនដូ) ដល់ជនបរទេស ចុះថ្ងៃទី២៤ ខែឧសភា ឆ្នាំ២០១០។ ច្បាប់នេះត្រូវបានបង្កើតឡើង ដែលផ្ដល់លក្ខខណ្ឌពិសេស ដល់ជនបរទេសទាំងឡាយ ក្នុងការទទួលបានសិទ្ធិ ក្លាយជាកម្មសិទ្ធិករស្របច្បាប់ លើចំណែកឯកជននៃអគារសហកម្មសិទ្ធិ។ ច្បាប់នេះ ក៏មានគោលបំណង បង្កលក្ខណៈងាយស្រួលដល់ជនបរទេស ក្នុងការមកវិនិយោគទុននៅប្រទេសកម្ពុជា ក៏ដូចជា ជួយគាំទ្រដល់ការរីកដុះដាល នៃវិស័យអចលនទ្រព្យ និងវិស័យសំណង់នៅក្នុងប្រទេសផងដែរ។

បញ្ហាដដែលនេះ ធ្លាប់ត្រូវបានលើកឡើង ដោយលោកឧកញ៉ាបណ្ឌិតគីម ហ៊ាង ប្រធានKW Cambodia និងជាអ្នកអភិវឌ្ឍន៍បុរីវិមានសំណាងផងដែរ។លោកឧកញ៉ាបានមានប្រសាសន៍ថា កម្ពុជាគួរតែកំណត់តំបន់ណាមួយ ដែលអនុញ្ញាត្តឲ្យជនបរទេស អាចមានសិទ្ឋទិញដីបាន ដែលវាជាឱកាសដ៏ល្អសម្រាប់អភិវឌ្ឍន៍កម្ពុជា ពិសេសតំបន់ដែលកំណត់បែបនេះ នឹងមានការរីកចម្រើន និងទាក់ទាញការវិនិយោគ។

ទាក់ទងនឹងកិច្ចប្រជុំ កាលពីដើមសប្តាហ៍នេះ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់បានពិភាក្សាលើចំណុចសំខាន់ៗជាច្រើនផងដែរ។

កិច្ចប្រជុំនោះ បានពិភាក្សាលើខ្លឹមសារ ប្រធានបទសំខាន់ៗមួយចំនួនដូចជា ទី១ ពិភាក្សាលើស្ថានភាពវិស័យសំណង់រួម នៅកម្ពុជា ដែលកំពុងជួបបញ្ហាប្រឈមបច្ចុប្បន្ន។ ទី២ ពិភាក្សាលើស្ថានភាពហិរញ្ញវត្ថុ ដើម្បីជួយគាំទ្រ និងទ្រទ្រង់ដល់វិស័យសំណង់នៅកម្ពុជា។ទី៣. ពិភាក្សារលើទិដ្ឋភាពច្បាប់ ដើម្បីអនុញ្ញាតឱ្យជនបរទេសមានសិទ្ធិស្របច្បាប់ក្នុងការទិញលំនៅឋាន និងដីនៅក្នុងគម្រោងបុរី។

ជាមួយគ្នានេះ លោកហ៊ុយ វណ្ណា អគ្គលេខាធិការសមាគមអ្នកអភិវឌ្ឈន៍លំនៅដ្ឋានកម្ពុជា បានមានប្រសាសន៍ឲ្យដឹងផងដែរថា អ្នកអភិវឌ្ឍន៍ក្នុងវិស័យនេះ បាននិងកំពុងទទូចឲ្យរដ្ឋាភិបាល ដោះស្រា​យ​បញ្ហានេះ ពិសេសពិចារណាលើទិដ្ឋភាពច្បាប់នានា ដែលអនុញ្ញាត្តឲ្យជនបរទេសទិញដី និងលំនៅដ្ឋានជាលក្ខណៈបុរីបាន។លោកបន្តថា​ “ការអន្តរាគមន៍ណាមួយពីរដ្ឋាភិបាល ក្នុងការទម្លា​ក់កញ្ចប់ថវិកា ដើម្បីជួយដល់វិស័យឯកជន ក្នុងការអភិវឌ្ឍលំនៅដ្ឋានពិតជាមានសារៈសំខាន់ណាស់ ដើម្បីស្តារវិស័យនេះឡើងវិញ”។

អតីតប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម បានមានប្រសាសន៍ឲ្យដឹង កាលពីពេលថ្មីៗនេះថា ស្ថានភាពទីផ្សារអចលនវត្ថុ និងសំណង់ពិតជាមានភាពតាន​តឹងខ្លាំង ដែលទាមទារឲ្យរដ្ឋាភិបាលអន្តរាគមន៍ ដោយទម្លាក់ទុនឬកញ្ចប់ថវិកាណាមួយ ដើម្បីជួយស្តារវិស័យនេះឡើងវិញ។លោកបន្តថា “វាជាដំណោះស្រាយឈ្នះ ឈ្នះទាំងរដ្ឋ និងវិស័យឯកជន ព្រោះវិស័យនេះជាកំលាំងចលករធំមួយ ក្នុងការរួមចំណែកអភិវឌ្ឍន៍សេដ្ឋកិច្ចជាតិ”៕

ដោយ: គង់ លាងហួរ

អន្តរជាតិ: ប្រធានាធិបតីចិនលោក ស៊ី ជីនពីង បានថ្លែងថា ប្រទេសចិនមានឆន្ទៈ ក្នុងការសហការគ្នាជាមួយសហរដ្ឋអាមេរិក ខណៈដែលភាគីទាំង២ គ្រប់គ្រងការខ្វែងគំនិតគ្នារបស់ពួកគេ និងធ្វើការរួមគ្នា ដើម្បីឆ្លើយតបទៅនឹងបញ្ហាប្រឈមជាសកល។ នេះបើយោងតាមប្រព័ន្ធផ្សព្វផ្សាយរដ្ឋចិន។

លោកស៊ី ជីនពីង បានគូសបញ្ជាក់នៅក្នុងលិខិតមួយស្តីពីទំនាក់ទំនងអាមេរិក-ចិន ដែលត្រូវបានប្រគល់ជូន ក្នុងពិធីជប់លៀងអាហារពេលល្ងាចប្រចាំឆ្នាំ របស់គណៈកម្មាធិការជាតិ ដែលមានទីស្នាក់ការកណ្តាលនៅទីក្រុងញូវយ៉កថា “ប្រសិនបើសហរដ្ឋអាមេរិក និងចិនអាចបង្កើតវិធីត្រឹមត្រូវ នៃការចុះសម្រុងគ្នាបាន នោះវានឹងមានសារៈសំខាន់ណាស់ចំពោះពិភពលោក”។

លោកស៊ី ជីនពីង បានអំពាវនាវឱ្យទំនាក់ទំនងទ្វេរភាគី កាន់តែមានស្ថិរភាពបន្ថែមទៀត ដែលលោកបញ្ជាក់ថា ទំនាក់ទំនងនេះគួរតែត្រូវបានស្ថាបនាឡើង ដោយឈរលើគោលការណ៍នៃ “ការគោរពគ្នាទៅវិញទៅមក ការរួមរស់ដោយសន្តិភាព និងកិច្ចសហប្រតិបត្តិការឈ្នះ-ឈ្នះ”។ ការអំពាវនាវនេះ បានធ្វើឡើង មុនពេលរដ្ឋមន្ត្រីការបរទេសចិន លោក Wang Yi បំពេញដំណើរទស្សនកិច្ចទៅកាន់ទីក្រុងវ៉ាស៊ីនតោន នៅចុងសប្តាហ៍នេះ។

ការបំពេញទស្សនកិច្ច ចាប់ពីថ្ងៃព្រហស្បតិ៍ ដល់ថ្ងៃសៅរ៍ សប្តាហ៍នេះ របស់ប្រមុខការទូតចិនលោកWang Yi នឹងក្លាយជាការចូលរួមដោយផ្ទាល់កម្រិតខ្ពស់បំផុត នៅមុនពេលដែលមានកិច្ចប្រជុំរវាងប្រធានាធិបតីអាមេរិក លោក ចូ បៃដិន និងលោកស៊ី ជីនពីង នៅទីក្រុង San Francisco ក្នុងកិច្ចប្រជុំកំពូល កិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកក្នុងខែវិច្ឆិកាខាងមុខ។

ដោយឡែក អភិបាលរដ្ឋកាលីហ្វ័រញ៉ា លោក Gavin Newsom បានជួបជាមួយលោកស៊ី កាលពីថ្ងៃពុធ សប្តាហ៍នេះ ដើម្បីពិភាក្សាអំពីការប្រែប្រួលអាកាសធាតុ និងបញ្ហាផ្សេងៗទៀត។

លោក Newsom បានបញ្ជាក់ថា លោកមានឱកាសផ្តោតការយកចិត្តទុកដាក់បន្ថែមទៀត លើការប្រែប្រួលអាកាសធាតុ នៅក្នុងកិច្ចប្រជុំជាមួយលោកស៊ី ប៉ុន្តែលោកក៏បានពិភាក្សាគ្នាអំពីជម្លោះនៅអ៊ីស្រាអែល ក៏ដូចជាបញ្ហាគ្រឿងញៀន fentanyl ដ៏សាហាវផងដែរ។

អ្នកសង្កេតការណ៍ចិនជឿជាក់ថា ដំណើរទស្សនកិច្ចរបស់លោក Wang Yi នឹងត្រួសត្រាយផ្លូវសម្រាប់កិច្ចប្រជុំ ដែលអាចធ្វើទៅបានរវាងប្រមុខរដ្ឋនៃប្រទេសទាំងពីរ ប៉ុន្តែបានបន្ថែមថា ទីក្រុងវ៉ាស៊ីនតោន ត្រូវតែខិតខំប្រឹងប្រែងជាក់ស្តែង ដើម្បីដោះស្រាយកង្វល់របស់ទីក្រុងប៉េកាំង និងបង្ហាញពីភាពស្មោះត្រង់របស់ខ្លួន៕

ដោយៈ តែម សុខុម

រីយ៉ាដៈ គម្រោងទីក្រុងឆ្លាតវៃនាពេលអនាគតNEOM នៃប្រទេសអារ៉ាប៊ីសាអូឌីត បានចុះកិច្ចព្រមព្រៀង លើការវិនិយោគរួមគ្នាមួយផ្នែកភ័ស្ដុភារកម្ម ដែលមានតម្លៃ១០ពាន់លានដុល្លារ ជាមួយក្រុមហ៊ុនដាណឺម៉ាកDSV ដើម្បីគាំទ្រដល់ប្រតិបត្តិការខ្សែសង្វាក់ផ្គត់ផ្គង់។ការចាប់ដៃគូសហការគ្នានេះ នឹងផ្ដោតជាសំខាន់លើការផ្ដល់សេវាកម្មភ័ស្តុភារកម្ម សម្រាប់គម្រោងទីក្រុងឆ្លាតវៃ នាថ្ងៃអនាគតតម្លៃ៥០០ពាន់លានដុល្លារ NEOM នៅប៉ុន្មានឆ្នាំខាងមុខ។ នេះបើយោងតាមសារព័ត៌មាន Arab News ចុះផ្សាយកាលពីថ្ងៃអង្គារ ទី២៤ ខែតុលា។ទន្ទឹមនេះ ការវិនិយោគរួមគ្នានេះ ក៏មានគោលដៅជំរុញកំណើនសេដ្ឋកិច្ច នៃប្រទេសអារ៉ាប៊ីសាអូឌីត ធ្វើឱ្យប្រសើរឡើងនូវការអភិវឌ្ឍហេដ្ឋារចនាសម្ព័ន្ធ និងបង្កើតឱកាសការងារជាង២០.០០០កន្លែងផងដែរ។ក្រោមកិច្ចព្រមព្រៀង ការចាប់ដៃគូសហការគ្នានេះ ក៏នឹងមានការបោះទុនវិនិយោគ លើទ្រព្យសកម្មផ្នែកភ័ស្ដុភារកម្ម ហេដ្ឋារចនាសម្ព័ន្ធ និងការដឹកជញ្ជូនទំនិញ និងវត្ថុធាតុដើមនៅក្នុងទីក្រុងនៅថ្ងៃអនា​គតនេះផងដែរ។

យោងតាមសេចក្ដីថ្លែងការណ៍រួម របស់ក្រុមហ៊ុនឱ្យដឹងថា គម្រោងទីក្រុងឆ្លាតវៃ នាពេលអនាគត NEOM នឹងកាន់កាប់ភាគហ៊ុន៥១នៃការវិនិយោគរួមគ្នានេះ ខណៈក្រុមហ៊ុនដាណឺម៉ាក DSV កាន់កាប់ភាគហ៊ុន៤៩%៕ Arab News៕

        ដោយៈ ហ្វីអូណា

        ភ្នំពេញៈ ក្រុមប្រឹក្សាអភិវឌ្ឍន៍កម្ពុជា(CDC)បានអនុម័តគំរោងវិនិយោគចំនួន៤ ដែលមានទុនវិនិយោគសរុប ប្រមាណ១៣លានដុល្លារអាមេរិក។

យោងតាមការបង្ហោះលើបណ្តាញទំនាក់ទំនងសង្គមរបស់CDC​បានឲ្យដឹងថា តាមសំណើសុំវិនិយោគរបស់ក្រុមហ៊ុន ក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជី គម្រោងវិនិយោគ ជូនដល់ក្រុមហ៊ុនដូចខាងក្រោម ទី១- “ក្រុមហ៊ុន JIANMIN FILTER (CAMBODIA) CO., LTD.” បង្កើតរោងចក្រផលិតគ្រឿងបន្សំម៉ាស៊ីនបូមធូលី ម៉ាស៊ីនត្រជាក់ និងតម្រងម៉ាស៊ីនបន្សុទ្ធខ្សល់ និងទឹក ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស តាយសេង បាវិត នៅខេត្តស្វាយរៀង ក្នុងទុនវិនិយោគប្រមាណ ៥,៧ លានដុល្លារអាមេរិក និងអាចបង្កើតការងារបានចំនួន ៣១៣កន្លែង។ទី២- “ក្រុមហ៊ុន METENDA METAL (CAMBODIA) CO., LTD.” បង្កើតរោងចក្រស្ល និងកែច្នៃលោហៈធាតុ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ខេមបូឌាន-ស៊ីណូ មេធលលីក មេធៀរៀល នៅខេត្តព្រះសីហនុ ក្នុងទុនវិនិយោគ ៥លានដុល្លារអាមេរិក និងអាចបង្កើតការងារបានចំនួន ៣២៣កន្លែង។ទី៣- “ក្រុមហ៊ុន HUANDA COCOA FOOD CO., LTD.” គម្រោងវិនិយោគ បង្កើតរោងចក្រផលិតផលិត ផលិតផលធ្វើអំពីកាកាវ ដែលមានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុ ខេត្តព្រះសីហនុ ក្នុងទុនវិនិយោគប្រមាណ១,៣លានដុល្លារអាមេរិក និងអាចបង្កើតការងារបានចំនួន ៤២កន្លែង។ទី៤- “ក្រុមហ៊ុន HAINING NUOHE NEW MATERIAL CO., LTD.” គម្រោងវិនិយោគបង្កើតរោងចក្រ ផលិតសម្ភារៈវេចខ្ចប់ ដែលមានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេស ខេមបូឌាន ចេជាង ហ្គ័រជី ខេត្តព្រះសីហនុ ក្នុងទុនវិនិយោគ១លានដុល្លារអាមេរិក និងអាចបង្កើតការងារបានចំនួន១០៤កន្លែង៕

ដោយ: គង់ លាងហួរ

ភ្នំពេញ: យោងតាមសេចក្តីប្រកាសពត៌មានបានបង្ហាញថា ក្រសួ​ងសេដ្ឋកិច្ច និងហិរញ្ញវត្ថុ គ្រោងរៀបចំកម្មវិធីសិក្ខាសាលាផ្សព្វផ្សាយស្តីពីវិធានការដោះស្រាយ គម្រោងវិនិយោគជាប់គាំង ក្នុងខេត្តព្រះសីហនុ នៅថ្ងៃទី៣១ ខែតុលាខាងមុខនេះ។

កម្មវិធីសិក្ខាសាលាដ៏សំខាន់នេះ គ្រោងនឹងរៀបចំធ្វើឡើងនៅសាលប្រជុំ សណ្ឋាគារ Sea Breeze Hotel & Villa ក្នុងខេត្តព្រះសីហនុ។ជាមួយគ្នានេះ សមាសភាពចូលរួម មានដូចជា ឯកឧត្តម លោកជំទាវ លោកប្រធាន អនុប្រធាន និងសមាជិកក្រុមការងារដោះស្រាយគម្រោងវិនិយោគជាប់គាំង ក្នុងខេត្តព្រះសីហនុចំនួន២០រូប។តំណាងរដ្ឋបាលខេត្តព្រះសីហនុ និងក្រុមការងារមន្ទីរពាក់ព័ន្ធថ្នាក់ក្រោមជាតិ ចំនួន៤០រូប និងវិនិយោគិនវិស័យឯកជនចំនួន១២០រូប។

លោក ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារដោះស្រាយ គម្រោងវិនិយោគជាប់គាំងក្នុងខេត្តព្រះសីហនុ នឹងអញ្ជើញជាអធិបតីក្នុងសិក្ខាសាលានេះ។

ចំណែកលោក អ៊ឹម សុខធី ប្រធានលេខាធិការដ្ឋាននៃក្រុមការងារដោះស្រាយគម្រោងវិនិយោគ ជាប់គាំងក្នុងខេត្តព្រះសីហនុ នឹងធ្វើបទបង្ហាញស្តីពី “វិធានការជាកញ្ចប់” ដោះស្រាយគម្រោងវិនិយោគជាប់គាំងក្នុងខេត្តព្រះសីហនុ៕