មកហើយ!  ជារៀងរាល់ឆ្នាំបុរី ប៉េង ហួត តែងតែនាំមកនូវកម្មវិធីសប្បាយៗជាច្រើនដល់សាធារណៈជនដើម្បីមកលេងកម្សាន្តឥតគិតថ្លៃ ហើយនៅថ្ងៃទី 27-28-29 ខែតុលា​ ឆ្នាំ​ 2023 ខាងមុខនេះបងប្អូននឹងរីករាយសប្បាយផង ជួបការតែងខ្លួនខ្មោចប្លែកៗផង ហើយមានអាហារ និងភេសជ្ជៈសម្រាប់ទិញញ៉ាំឆ្អែតៗនៅព្រឹត្តិការណ៍ Halloween Town ដែលនឹងមានកម្មវិធីសប្បាយៗ ក្រុមតន្រ្តី ការតែងខ្លួនជាខ្មោចគ្រប់ជាតិសាសន៍ ​ជាមួយស្តង់អាហារ​ ទំនិញ និងកន្លែងក្មេងលេងកម្សាន្តជាច្រើន ដែលនឹងរៀបចំឡើងនៅក្នុងបរិវេណ សួនអឺរ៉ុប ភីអេច យូរ៉ូផាក ស្ថិតនៅគម្រោងបុរី ប៉េង ហួត ហ្រ្គេនស្តាផ្លាទីនីម (បឹងស្នោ) តាមបណ្តោយផ្លូវជាតិលេខ ១ ។
FB Link : https://www.facebook.com/pheuropark/បងប្អូនអាចមកកម្សាន្តនូវកម្មវិធីដូចជា៖
– ការប្រគុំតន្រ្តីពីតារាចម្រៀង ក្រុមក្មេងខ្មែរ-Khmeng Khmer, Vin Vitou ក៏ដូចជាក្រុមតន្រ្តី Acoustic ប្រគុំកំដរបរិយាកាសជាមួយការតែងខ្លួនបែបខ្មោចនៅឆាកប្រគុំតន្រ្តីទាំង 3ថ្ងៃចាប់ពីម៉ោង 5:30ល្ងាច ដល់ម៉ោង 9:00យប់។
– ការសម្តែង Halloween Custom Show : ការតែងខ្លួនគូរមុខខ្មោចចម្រុះជាតិសាសន៍ហើយដើរជុំវិញបរិវេណកម្មវិធីដូចជា នាងនាថ ខ្មោច Joker The Nun និងជាច្រើនទៀត។
– មានស្តង់អាហារ ការតាំងពិព័រណ៌ ទំនិញ និងកន្លែងកម្សាន្តសម្រាប់ក្មេងៗជាច្រើនក្នុងបរិវេណ កម្មវិធីរហូតដល់ទៅជាង១០០ស្តង់ និងបើកលក់ទាំង3ថ្ងៃចាប់ពីម៉ោង 4:00ល្ងាច ដល់ម៉ោង 9:00យប់។
– ការប្រកួតថតរូបឈ្នះរង្វាន់: អ្នកចូលរួមគ្រាន់តែថតរូបតុបតែខ្លួននៅ Halloween Town ភីអេច យូរ៉ូផាក នឹងមានឱកាសឈ្នះសំបុត្រយន្តហោះទៅ ប្រទេសវៀតណាម រហូត 4រង្វាន់ ជាមួយលក្ខខណ្ឌងាយៗ ខាងក្រោម ​៖
– ចុច Like PH Euro Park
– ថតរូប និងបង្ហោះខ្លួនឯងជាសាធារណៈ
– តុបតែងបែប Halloween នៅ ភីអេច យូរ៉ូផាក
រួចដាក់​ Hastag #HalloweenTown #PHEuroPark
ហើយជាពិសេសក៏មានការចូលរួមសហការពីបណ្តារក្រុមហ៊ុនធំៗផងដែរដូចជា Smart Axiata ចូលរួមនាំមកជូន និង TADA Cambodia, Cambodia Airways, Ashley Furniture Homestore Cambodia ចូលរួមសហការកម្មវិធីទាំង 3ថ្ងៃ។
សម្រាប់ព័ត៌មានជួលទីតាំងបើកអាជីវកម្មផ្សេងៗសូមទំនាក់ទំនង៖ 011 666 098 / 098 666 824
#PHEuropark #PHInvestment #BoreyPengHuoth#HalloweenTown
ពង្រីកអាជីវកម្មលោកអ្នកជាមួយបុរី ប៉េង ហួត

ដោយ: គង់ លាងហួរ

អន្តរជាតិ: សេដ្ឋកិច្ចអាមេរិក បានកើនឡើងក្នុងល្បឿនដ៏លឿនបំផុតមិនធ្លាប់មាន ក្នុងរយៈពេលជិត២ឆ្នាំ ក្នុងត្រីមាសទី៣ ដោយ សារការកើនឡើង នៃប្រាក់ឈ្នួលបានជួយជំរុញ ដល់ការចំណាយរបស់អ្នកប្រើប្រាស់។

ការិយាល័យវិភាគសេដ្ឋកិច្ច របស់នាយកដ្ឋានពាណិជ្ជកម្មអាមេរិកបានរាយការណ៍ថា ផលិតផលក្នុងស្រុកសរុប(GDP) របស់សហរដ្ឋអាមេរិក បានកើនឡើងក្នុងអត្រាប្រចាំឆ្នាំ៤,៩% កាលពីត្រីមាសទី៣ ដែលជាល្បឿនលឿនបំផុតមិនធ្លាប់មាន គិតចាប់តាំងពីត្រីមាសទី៤ ឆ្នាំ២០២១។

កំណើនសេដ្ឋកិច្ចអាមេរិកក្នុងរង្វង់៤,៩% នៅត្រីមាសទី៣ បានវ៉ាដាច់ការព្យាករណ៍ សម្រាប់កំណើន៤,៣% របស់ក្រុមសេដ្ឋវិទូ ដែលត្រូវបានស្ទង់មតិដោយសារពត៌មាន Reuters។អត្រាកំណើនសេដ្ឋកិច្ចដ៏ខ្ពស់នេះ បានឆ្លុះបញ្ចាំងឱ្យឃើញថា ការព្រមានរបស់ក្រុមអ្នកវិភាគ អំពីហានិភ័យធ្ងន់ធ្ងរ នៃវិបត្តិសេដ្ឋកិច្ចអាមេរិក ចាប់តាំងពីឆ្នាំ២០២២មកនោះ មិនទាន់ក្លាយជាការពិតនៅឡើយ។

ការចំណាយរបស់អ្នកប្រើប្រាស់ ដែលគ្របដណ្តប់ជាងពីរភាគបីនៃសកម្មភាពសេដ្ឋកិច្ចរបស់សហរដ្ឋអាមេរិក គឺជាកត្តាជំរុញដ៏សំខាន់សម្រាប់កំណើនសេដ្ឋកិច្ចអាមេរិកនៅពេលនេះ។

លើសពីនេះ ទីផ្សារការងារដ៏រឹងមាំ កំពុងផ្តល់ការគាំទ្រជាមូលដ្ឋានដល់ការចំណាយរបស់ពលរដ្ឋអាមេរិក។  ទោះបីជាកំណើនប្រាក់ឈ្នួលបានដើរយឺតយ៉ាងណាក្តី ក៏វាកំពុងកើនឡើងលឿនជាងអតិផរណាបន្តិច ដែលការណ៍នេះ បានជួយបង្កើនអំណាចនៃការទិញក្នុងគ្រួសារអាមេរិក។

ជាមួយគ្នានេះ កាលពីត្រីមាសទី២កន្លងទៅ សេដ្ឋកិច្ចអាមេរិកក៏បានកើនឡើង លឿនជាងការរំពឹងទុកផងដែរ ដែលជំរុញដោយការវិនិយោគរបស់ក្រុមហ៊ុនអាជីវកម្ម និងការចំណាយរបស់អ្នកប្រើប្រាស់ដែលមានភាពធន់។

GDP របស់ប្រទេសដែលមានសេដ្ឋកិច្ចធំបំផុតទី១ នៅលើពិភពលោកមួយនេះ បានកើនឡើងក្នុងអត្រាប្រចាំឆ្នាំ២,១ភាគរយ កាលពីត្រីមាសទី២ បើទោះជានៅពេលនោះ អ្នកវិភាគរំពឹងថា នឹងមានអត្រាយឺតជាងនេះយ៉ាងណាក្តី៕

ដោយៈ តែម សុខុម

ហាណូយៈ វិស័យអចលនទ្រព្យ នៅប្រទេសវៀតណាម ក្នុងឆ្នាំនេះ បានធ្លាក់ចូលក្នុងវិបត្តិកាន់តែជ្រៅ ខណៈក្រុមហ៊ុនអភិវឌ្ឍន៍នានាបានខកខានបង់ការប្រាក់លើបំណុល។

ការខកខានបង់ការប្រាក់លើបំណុលនេះ បានកើតមានឡើងស្របពេលមានវិបត្តិឥណទាន ដែលកើតឡើងដោយសាររដ្ឋាភិបាលវៀតណាម ដាក់ចេញវិធានការមិនបានទាន់ពេលវេលា។

ក្រុមហ៊ុន Dragon Capital ដែលជាអ្នកវិនិយោគដ៏ធំនៅវៀតណាម បានទម្លាយឱ្យដឹងថា វិស័យអចលនទ្រព្យវៀតណាម បានដាំក្បាលចុះធ្ងន់ធ្ងរបំផុតកាលពីខែមុន ខណៈផ្សារហ៊ុនក្រុងហូជីមិញ បានដាំក្បាលចុះជិត១៦%នៅក្នុងខែដដែល។ក្រុមហ៊ុន No Va Land គឺជាក្រុមហ៊ុនអភិវឌ្ឍន៍អចលនទ្រព្យចុះបញ្ជីធំបំផុត ដែលកំពុងប្រឈមនឹងបញ្ហា ដោយភាគហ៊ុនរបស់ខ្លួនបានធ្លាក់ចុះជាង៨០%ក្នុងរយៈពេលមួយឆ្នាំ។

ការធ្លាក់ចុះភាគហ៊ុនយ៉ាងគំហុក របស់ក្រុមហ៊ុននេះកើតមានឡើងបន្ទាប់ពីក្រុមហ៊ុននេះ បានខកខានបង់ការប្រាក់លើមូលបត្របំណុលក្នុងស្រុក និងក្រៅស្រុកដែលបានបណ្ដាល ឱ្យជាប់គាំងជាមួយម្ចាស់បំណុលអន្តរជាតិមួយចំនួន៕ Bangkok Post៕

ដោយ: គង់ លាងហួរ
អន្តរជាតិ: ក្រុមហ៊ុនគមនាគមន៍ និងសំណង់ចិន China Communications Construction Company Limited (CCCC) គឺជាសហគ្រាសមួយរបស់រដ្ឋាភិបាលចិន ដែលមានក្រុមហ៊ុនបុត្រសម្ព័ន្ធជាង៥០។

ក្នុងនោះ ក្រុមហ៊ុនសាជីវកម្មស្ពានថ្នល់ចិន CRBC (China Road and Bridge Corporation) ក៏ជាក្រុមហ៊ុនបុត្រសម្ព័ន្ធមួយផងដែរ ដែលក្រុមហ៊ុននេះ បានធ្វើកិច្ចសហប្រតិបត្តិការលើគម្រោងជាច្រើនជាមួយក្រសួងសាធារណការ និងដឹកជញ្ជូនរបស់កម្ពុជា ដូចជាគម្រោងសាងសង់ផ្លូវល្បឿនលឿនភ្នំពេញ -ក្រុងព្រះសីហនុ គម្រោងសាងសង់ផ្លូវល្បឿនលឿនភ្នំពេញ-បាវិត និងគម្រោងព្រែកជីកហ្វូណនតេជោផងដែរ។

ជាក់ស្តែង គម្រោងសាងសង់ផ្លូវល្បឿនលឿន តភ្ជាប់ពីរាជធានីភ្នំពេញ ទៅក្រុងបាវិត ខេត្តស្វាយរៀង ត្រូវបានប្រកាសបើកការដ្ឋានសាងសង់ជាផ្លូវការ កាលពីព្រឹកថ្ងៃទី០៧ ខែមិថុនា ឆ្នាំ២០២៣។ គម្រោងសាងសង់ផ្លូវល្បឿនលឿនភ្នំពេញ បាវិត មានប្រវែងសរុប ១៣៥,១០គីឡូម៉ែត្រ ដោយមានចំណុចចាប់ផ្តើមពីឃុំថ្មគរ ស្រុកល្វាឯម ខេត្តកណ្តាល ទៅដល់សង្កាត់ច្រកម្ទេស ក្រុងបាវិត ខេត្តស្វាយរៀង។
ផ្លូវល្បឿនលឿនខ្សែទីពីរ ភ្នំពេញ-ក្រុងបាវិតនេះ គ្រោងចំណាយថវិកាវិនិយោគសរុបប្រមាណ១,៣៥ពាន់លានដុល្លារអាមេរិក ក្រោមទម្រង់វិនិយោគ សាងសង់-ប្រតិបត្តិការ-ផ្ទេរ(BOT) ដែលមានរយៈពេលប្រតិបត្តិការចំនួន៥០ឆ្នាំ ដោយក្នុងនោះ២០ភាគរយ ជាទុនវិនិយោគរបស់ក្រុមហ៊ុនសាជីវកម្មស្ពាន និងថ្នល់ចិន(CRBC) និង៨០ភាគរយ ជាប្រាក់កម្ចីរបស់ក្រុមហ៊ុន។

ជាមួយគ្នានេះ កាលពីថ្ងៃទី១៧ ខែតុលាកន្លងទៅ  ក្រុមហ៊ុនសាជីវកម្មស្ពាន និងថ្នល់ចិន (CRBC) និងភាគីកម្ពុជា ក៏បានចុះហត្ថលេខាលើកិច្ចព្រមព្រៀងក្របខណ្ឌ នៃគម្រោង “ព្រែកជីកហ្វូណនតេជា”ផងដែរ។

តាមរយៈការចុះហត្ថលេខានេះ វាបានអនុញ្ញាតឱ្យក្រុមហ៊ុន CRBC អាចសិក្សាយ៉ាងលម្អិត លើគ្រប់ទិដ្ឋភាពទាំងអស់ពាក់ព័ន្ធនឹងគម្រោងនេះ ក្នុងរយៈពេល៨ខែ ហើយការចុះហត្ថលេខានាពេលនេះ គឺជាការបោះជំហាន ទៅរកភាពជោគជ័យមួយកម្រិតទៀត លើគម្រោងដឹកជញ្ជូនតាមផ្លូវដឹកដ៏ធំរបស់កម្ពុជា។យោងតាមការសិក្សាបានបង្ហាញថា គម្រោងផ្លូវទឹកដ៏ធំនេះមានប្រវែង១៨០គីឡូម៉ែត្រ ដោយចាប់ផ្ដើមពីព្រែកតាកែវ នៃទន្លេមេគង្គ ឆ្លងកាត់តាមព្រែកតាឯក នៃទន្លេបាសាក់ រួចតាមព្រែកតាហ៊ីងនៃទន្លេបាសាក់ ស្រុកកោះធំ និងបន្ដរហូតដល់សមុទ្រខេត្ដកែប ដោយឆ្លងកាត់ខេត្ដចំនួន៤ រួមមាន៖ ខេត្ដកណ្ដាល ខេត្ដតាកែវ ខេត្ដកំពត និងខេត្ដកែប ដោយគម្រោងនេះនឹងត្រូវចំណាយថវិកាសាងសង់ប្រមាណ១.៧០០លានដុល្លារ។

លើសពីនេះ ក្រុមហ៊ុន CCCC គឺជាអ្នកម៉ៅការសម្រាប់គម្រោង Belt and Road Initiative ជាច្រើន ហើយវាត្រូវបានដាក់បញ្ចូលទៅក្នុងបញ្ជីFortune Global 500 កាលពីឆ្នាំ២០១៦។ក្រុមហ៊ុន CCCC ផ្តោតជាសំខាន់លើឧស្សាហកម្មវិស្វកម្ម និងសំណង់ ដោយគណៈកម្មការត្រួតពិនិត្យ និងគ្រប់គ្រងទ្រព្យសម្បត្តិរដ្ឋនៃក្រុមប្រឹក្សាកិច្ចការរដ្ឋចិន កាន់កាប់ភាគហ៊ុនចំនួន៦៣,៨% នៅក្នុងក្រុមហ៊ុននេះ។ក្រុមហ៊ុន CCCC ត្រូវបានបង្កើតឡើងជាផ្លូវការ ក្នុងឆ្នាំ២០០៥ តាមរយៈការរួមបញ្ចូលគ្នា នៃសាជីវកម្មស្ពានថ្នល់ចិន China Road and Bridge Corporation (CRBC) និងក្រុមហ៊ុនChina Harbor Engineering Company (CHEC) ដែលផ្តោតលើការអភិវឌ្ឍន៍ហេដ្ឋារចនាសម្ព័ន្ធដឹកជញ្ជូន និងហេដ្ឋារចនាសម្ព័ន្ធផ្លូវសមុទ្ររៀងៗគ្នា។ កាលពីឆ្នាំ២០០៦ ក្រុមហ៊ុននេះបានចុះបញ្ជីភាគហ៊ុន នៅលើផ្សារហ៊ុនហុងកុង និងបានចុះបញ្ជីភាគហ៊ុន នៅលើផ្សារហ៊ុនសៀងហៃក្នុងឆ្នាំ២០១២។

ទន្ទឹមគ្នានេះ ក្រុមហ៊ុនCCCC ក៏បានចូលរួមពាក់ព័ន្ធក្នុងគម្រោងជាច្រើន ដូចជា ការបូមខ្សាច់នៅតំបន់ជម្លោះ ក្នុងសមុទ្រចិនខាងត្បូង ការសាងសង់ផ្លូវហាយវេ នៅតំបន់ស៊ីនជាំង និងការសាងសង់ការដំឡើងភស្តុភារកងទ័ពជើងទឹកនៅកំពង់ផែ Gwadar៕

ដោយ: គង់ លាងហួរ

ភ្នំពេញ: ក្នុងបទសម្ភាសន៍មួយជាមួយទូរទស្សន៍រដ្ឋចិន CCTV សម្តេចធិបតីហ៊ុន ម៉ាណែត នាយករដ្ឋមន្ត្រីនៃកម្ពុជា ថ្លែងថា “នេះជាលើកទី១ ដែលខ្ញុំចូលរួមវេទិកាខ្សែក្រវ៉ាត់ និងផ្លូវ ហើយខ្ញុំសូមអបអរសាទរ ចំពោះប្រធានាធិបតីលោក ស៊ីជីនពីង និងរដ្ឋាភិបាលចិនសម្រាប់ការរៀបចំវេទិកាមួយនេះដោយជោគជ័យ”។

សម្តេចបន្តថា “កម្ពុជាបានទទួលអត្ថប្រយោជន៍ជាច្រើន ពីគំនិតផ្តួចផ្តើមខ្សែក្រវ៉ាត់ និងផ្លូវតាមរយៈយុទ្ធសាស្ត្រ អភិវឌ្ឍន៍របស់យើង ដែលផ្សាភ្ជាប់ជាមួយការគាំទ្រ ដែលបានផ្តល់ពីគម្រោង BRI”។

សម្តេចធិបតី ហ៊ុន ម៉ាណែត លើកឡើងថា “BRI ត្រូវបានបង្កើតឡើង ដើម្បីជួយដល់ប្រទេសដទៃទៀត ក្នុងការអភិវឌ្ឍ និងផ្តល់លទ្ធភាព ព្រមទាំងឱកាសសម្រាប់ប្រទេស ដែលមានការអភិវឌ្ឍតិចតួច ជាពិសេសតាមរយៈការផ្តល់ហិរញ្ញប្បទាន ការផ្ទេរបច្ចេកវិទ្យា និងលទ្ធភាពទទួលបានសមត្ថភាព កាន់តែលឿនក្នុងការកសាងហេដ្ឋារចនាសម្ព័ន្ធ ដែលត្រូវការដើម្បីគាំទ្រដល់ការអភិវឌ្ឍន៍ និងកំណើនសេដ្ឋកិច្ច”។សម្តេចធិបតីហ៊ុន ម៉ាណែតបានអះអាងថា នៅក្នុងក្របខណ្ឌនៃគំនិតផ្តួចផ្តើមនេះ ប្រទេសកម្ពុជាបានទទួល ផលប្រយោជន៍យ៉ាងធំធេងពីគម្រោងBRI ដូចទៅនឹងបណ្តាប្រទេសជាច្រើនផ្សេងទៀតដែរ”។ ជាក់ស្តែង ក្នុងវេទិកាខ្សែក្រវ៉ាត់ និងផ្លូវ វាគ្មិន ប្រមុខរដ្ឋ និងប្រមុខរដ្ឋាភិបាលមកពីបណ្តាប្រទេសជាច្រើន បានឡើងថ្លែងសុន្ទរកថាអំពីអត្ថប្រយោជន៍ ដែលប្រទេសរបស់ពួកគេ បានទទួលពីគម្រោងBRI ដូច្នេះ កម្ពុជាក៏បានចែករំលែកទស្សនៈ និងបទពិសោធន៍ទាំងនោះផងដែរ។

សម្តេចបញ្ជាក់ថា “ជាឧទាហរណ៍ ផ្លូវល្បឿនលឿនភ្នំពេញ-ក្រុងព្រះសីហនុ ដែលជាសមិទ្ធិផលផ្លែផ្លា កើតចេញពីគំនិតផ្តួចផ្តើម BRI បានផ្តល់អត្ថប្រយោជន៍ មិនត្រឹមតែដល់ក្រុមមនុស្សមួយចំនួនប៉ុណ្ណោះទេ ប៉ុន្តែថែមទាំងផ្តល់អត្ថប្រយោជន៍ ដល់មនុស្សគ្រប់គ្នាផងដែរ”។ សម្តេចបន្ថែមថា “នៅក្រោមគំនិតផ្តួចផ្តើមនេះ កម្ពុជាអាចចាប់ផ្តើមទទួលបានអ្នកធ្វើដំណើរ ពីអាកាសយានដ្ឋានអន្តរជាតិសៀម​រាប-អង្គរថ្មីរបស់យើង ដែលជាគម្រោងដ៏សំខាន់មួយ ស្ថិតក្រោមគំនិតផ្តួចផ្តើមBRI”។

សម្តេចបានមានប្រសាសន៍ទៀតថា “យើងគាំទ្រគំនិតផ្តួចផ្តើមBRI ដូច្នេះ វឌ្ឍនភាព​ទាំងនេះ​ នឹង​ផ្តល់ផលប្រយោជន៍ដល់​ជីវភាព​រស់នៅ​របស់​ប្រជាជន និង​ប្រទេស​ទាំងនោះ រួម​ទាំង​ប្រទេស​កម្ពុជា​ផង​ដែរ ហើយនេះគឺជាអ្វីដែលកម្ពុជាយើងឱ្យតម្លៃ” ។

ទន្ទឹមគ្នានេះ នាយករដ្ឋមន្ត្រីចិនលោក Li Qiang កាលពីថ្ងៃទី ១៧ តុលា បានប្រកាសគាំទ្រពន្លឿន ការសាងសង់ហេដ្ឋារចនាសម្ព័ន្ធដូចជាផ្លូវដែក ដែលអាចបើកបររថភ្លើងល្បឿនលឿន នៅក្នុងប្រទេសកម្ពុជាជាលើកដំបូង​។

ការប្រកាសយ៉ាងដូចនេះ បានធ្វើឡើងក្នុងពេលសម្តេចធិបតី ហ៊ុន ម៉ាណែត បំពេញទស្សនកិច្ចផ្លូវការ នៅក្នុងប្រទេសចិន និង បានជួបពិភាក្សាការងារជាមួយលោក Li Qiang នាយករដ្ឋមន្ត្រីចិន។

អំឡុងពេលនោះ លោក Li Qiang បានថ្លែងប្រាប់សម្តេចធិបតី ហ៊ុន ម៉ាណែតថា ឆ្នាំនេះជាខួបលើកទី៦៥ នៃការបង្កើតទំនាក់ទំនងការទូតរវាងចិន និង កម្ពុជា ហើយវាគឺជាឱកាសមួយ ដើម្បីពន្លឿនការផ្គូរផ្គងគំនិតផ្តួចផ្តើម “ផ្លូវមួយខ្សែក្រវ៉ាត់មួយ” និង “យុទ្ធសាស្ត្របញ្ចកោណ” ដើម្បីពង្រឹងរចនាសម្ព័ន្ធកិច្ចសហប្រតិបត្តិការ “ឆកោនត្បូងពេជ្រចិន-កម្ពុជា” និង ជំរុញការកសាងសហគមន៍វាសនារួមកម្ពុជា-ចិន ក្នុងយុគសម័យថ្មី។

បើតាមលោក Li Qiang កិច្ចសហប្រតិបត្តិការដ៏ល្អរវាងកម្ពុជា និងចិន បានទទួលផ្លែផ្កាជាច្រើន ដើម្បីលើកកម្ពស់ការសាងសង់ “ច្រ​ករបៀងអភិវឌ្ឍន៍ឧស្សាហកម្ម” និង“ច្រករបៀងត្រី និងស្រូវ” ហើយចិនបានប្រកាសគាំទ្រពន្លឿន ការសាងសង់ហេដ្ឋារចនាសម្ព័ន្ធដូចជាផ្លូវដែក ដែលអាចបើកបររថភ្លើងល្បឿនលឿន នៅក្នុងប្រទេសកម្ពុជាជាលើកដំបូង​ និងការដោះស្រាយបញ្ហាទឹកកខ្វក់ និងខ្សែកាបអុបទិក និងហេដ្ឋារចនាសម្ព័ន្ធផ្សេងៗទៀត។

ផ្លូវដែកល្បឿនលឿន គឺជាក្តីសុបិនរបស់រាជរដ្ឋាភិបាលកម្ពុជា ជាពិសេសអតីតនាយករដ្ឋមន្ត្រីនៃកម្ពុជា គឺសម្តេចតេជោ ហ៊ុន សែន ដែលសម្តេច ធ្លាប់បានស្នើឱ្យគ្រប់នាយកដ្ឋានសហការគ្នា ពន្លឿនការសម្រេចឲ្យបាននូវ “ក្តីសុបិនផ្លូវដែកល្បឿនលឿន” នេះឱ្យកាន់តែឆាប់តាមតែអាចធ្វើទៅបាន។

កាលពីថ្ងៃទី១០ ខែកុម្ភៈ ឆ្នាំ២០២៣ សម្តេចតេជោ ហ៊ុន សែន បានជួបពិភាក្សាជាមួយ លោក ស៊ី ជីនពីង ក្នុងដំណើរទស្សនកិច្ចនៅប្រទេសចិន ដោយប្រទេសចិនបានប្រកាសគាំទ្រ ការ សាងសង់ផ្លូវរថភ្លើងល្បឿនលឿននៅកម្ពុជា និងការគាំទ្រដល់ការតភ្ជាប់ផ្លូវរថភ្លើងល្បឿនលឿនរបស់កម្ពុជា និងផ្លូវដែកចិន-ឡាវ-ថៃ។

ជាមួយគ្នានេះ ដើម្បីជួយកម្ពុជាឱ្យសម្រេចបាននូវ “ក្តីសុបិនផ្លូវដែកល្បឿនលឿន” លោក ស៊ី ជីនពីង បានប្រកាសផ្តល់ជំនួយចំនួន៣០០លានយ័ន (ប្រហែល៤៥លានដុល្លារអាមេរិក) ដល់កម្ពុជាដើម្បីអនុវត្តផែនការនេះផងដែរ។

បន្ថែមលើពីនេះ សម្តេចធិបតី ហ៊ុន ម៉ាណែត  កាលពីថ្ងៃទី១៧ ខែតុលា បានជួបជាមួយក្រុមហ៊ុនយក្ស របស់ចិនមួយឈ្មោះថា China Railway Construction Corporation ដោយក្រុមហ៊ុននេះបានប្រកាស គម្រោងផ្លូវដែកតភ្ជាប់ភ្នំពេញ-សៀមរាប និងភ្នំពេញ-ប៉ោយប៉ែត ដែលគេដឹងថាជាផ្លូវដែក ដែលអាចបើកបររថភ្លើងល្បឿនលឿនបានដែលជាសេចក្តីប្រាថ្នារបស់កម្ពុជា៕

ដោយ: គង់ លាងហួរ

ក្រុងតៃប៉ិៈ លោក Lai Ching-te អនុប្រធានាធិបតីតៃវ៉ាន់បានព្រមានកាលពីថ្ងៃអង្គារកន្លងទៅថា ក្រុមហ៊ុនតៃវ៉ាន់ដែលមានមូលដ្ឋាននៅប្រទេសចិន អាចនឹងបង្ខំចិត្តចាកចេញ ប្រសិនបើក្រុមហ៊ុនទាំងនោះមានអារម្មណ៍ថា ពួកគេរងសម្ពាធដោយអយុត្តិធម៌។

ការព្រមាននេះបានធ្វើឡើង បន្ទាប់ពីអាជ្ញាធរចិនបានបើកការស៊ើបអង្កេត ទៅលើក្រុមហ៊ុនបច្ចេកវិទ្យាខ្នាតយក្ស Foxconn របស់តៃវ៉ាន់។

លោក Lai Ching-te បានថ្លែងនៅក្នុងសន្និសីទសារព័ត៌មានមួយថា “ប្រសិនបើក្រុមហ៊ុនតៃវ៉ាន់ បង្កើនការប្រុងប្រយ័ត្ន និងភ័យខ្លាច ហើយបាត់បង់ទំនុកចិត្តនៅក្នុងប្រទេសចិន នោះពួកគេអាចនឹងផ្លាស់ប្តូរមូលដ្ឋានរបស់ពួកគេបន្តិចម្តងៗ ទៅកាន់ប្រទេសផ្សេងទៀត”។លោក Lai បាន​បញ្ជាក់ថា “នោះ​នឹង​ក្លាយជា​ការ​ខាត​បង់​ដ៏​ធំមួយសម្រាប់​ប្រទេស​ចិន”។លោក​បាន​ជំរុញ​ឱ្យ​ប្រទេស​ចិនស្រឡាញ់ ​និង​ឱ្យ​តម្លៃ​ ក្រុមហ៊ុនអាជីវកម្ម​តៃវ៉ាន់ ដែលរកស៊ីនៅក្នុងប្រទេសចិន ហើយ​កុំ​ដាក់​សម្ពាធ​លើ​ពួកគេរាល់​ពេល ​មាន​ការ​បោះឆ្នោតម្តងៗនៅកោះតៃវ៉ាន់។

កាសែតរដ្ឋចិន Global Times បានរាយការណ៍ថា Foxconn ដែលជាក្រុមហ៊ុនផលិតគ្រឿងអេឡិចត្រូនិច ដ៏ធំបំផុតមួយរបស់ពិភពលោក និងជាអ្នកផ្គត់ផ្គង់ដ៏សំខាន់សម្រាប់ទូរសព្ទiPhones របស់ Apple កំពុងស្ថិតនៅក្រោមការស៊ើបអង្កេតពន្ធ និងដីធ្លីនៅក្នុងខេត្តមួយចំនួនរបស់ប្រទេសចិន។ទោះជាយ៉ាងនេះក្តី កាសែត Global Times មិនបានបញ្ជាក់អំពីអ្វីដែលអាជ្ញាធរចិន កំពុងពិនិត្យមើល ឬបទល្មើសណាមួយដែលក្រុមហ៊ុន Foxconn បានប្រព្រឹត្តនោះទេ។

ទន្ទឹមគ្នានេះ ក្រុមហ៊ុន Foxconn បានអះអាងកាលពីថ្ងៃអាទិត្យថា ខ្លួននឹងសហការជាមួយអាជ្ញាធរពាក់ព័ន្ធ សម្រាប់ប្រតិបត្តិការដែលពាក់ព័ន្ធ ដោយមិនបានផ្តល់ព័ត៌មាន លម្អិតបន្ថែមទៀតនោះទេ។

ការស៊ើបអង្កេតនេះបានធ្វើឡើង ស្របពេលដែលកោះតៃវ៉ាន់ ដែលទីក្រុងប៉េកាំងអះអាងថា ជាទឹកដីរបស់ខ្លួន ហើយបានប្តេជ្ញាដណ្តើមយកមកគ្រប់គ្រងនៅថ្ងៃណាមួយ កំពុងរៀបចំសម្រាប់ការបោះឆ្នោតជ្រើសរើស ប្រធានាធិបតីក្នុងខែមករា ឆ្នាំ២០២៤ខាងមុខ៕

ដោយ: គង់ លាងហួរ

អន្តរជាតិ: អ្នកវិភាគជាន់ខ្ពស់របស់ទីភ្នាក់ងារវាយតម្លៃ Fitch Ratings បានលើកឡើងថា សេដ្ឋកិច្ចកូរ៉េខាងត្បូង ត្រូវបានគេព្យាករ​ណ៍ថា នឹងស្ថិតនៅលើផ្លូវឆ្ពោះទៅរកការស្ទុះងើបឡើងវិញ នៅឆ្នាំ២០២៤ ប៉ុន្តែការងើបឡើងវិញនេះ នឹងមានល្បឿនសន្សឹមៗប៉ុណ្ណោះ ។

អ្នកវិភាគរូបនោះបញ្ជាក់ថា “ការស្ទុះងើបឡើងវិញក្នុងល្បឿនដ៏យឺតនេះ អាចបណ្តាលមកពីការធ្លាក់ចុះ នៃសេដ្ឋកិច្ចរបស់ប្រទេសចិន និងសេដ្ឋកិច្ចអាមេរិក ដែលបានរារាំងដល់កំណើន នៃការនាំចេញរបស់ប្រទេសកូរ៉េខាងត្បូង”។

លោក Jeremy Zook នាយកផ្នែកវាយតម្លៃប្រចាំនៅស្ថាប័នវាយតម្លៃហានិភ័យ Fitch បានធ្វើការវាយតម្លៃយ៉ាងដូច្នេះ នៅក្នុងបទសម្ភាសន៍ ជាមួយទីភ្នាក់ងារសារព័ត៌មាន Yonhap ក្នុងទីក្រុងសេអ៊ូល ខណៈស្ថាប័ននេះ បានបន្ទាបការព្យាករកំណើនសេដ្ឋកិច្ចកូរ៉េ សម្រាប់ឆ្នាំនេះ ចំនួន០,២ភាគរយ មកនៅសល់ត្រឹម១,០ភាគរយវិញ និងបានបន្ទាបការព្យាករកំណើនសេដ្ឋកិច្ចកូរ៉េ សម្រាប់ឆ្នាំ២០២៤ ពី២,៥ភាគរយ មកនៅសល់ត្រឹម២,១ភាគរយវិញ។លោកបន្តថា ប្រទេសកូរ៉េពឹងផ្អែកយ៉ាងខ្លាំង លើការនាំចេញទៅកាន់ប្រទេសចិន ហើយការធ្លាក់ចុះសេដ្ឋកិច្ច នៅក្នុងប្រទេសចិននឹងជះឥទ្ធិពល ដល់អត្រាកំណើនសេដ្ឋកិច្ចរបស់កូរ៉េខាងត្បូង ក្នុងរយៈពេលដ៏ខ្លីខាងមុខនេះ។

យោងតាមអ្នកវិភាគរូបនេះបានឱ្យដឹងទៀតថា សេដ្ឋកិច្ចរបស់សហរដ្ឋអាមេរិក មានភាពធន់ជាងមុននៅឆ្នាំនេះ ប៉ុន្តែវាត្រូវបានគេរំពឹងថា នឹងធ្លាក់ចុះយ៉ាងខ្លាំង រហូតដល់ជួបប្រទះនឹងវិបត្តិសេដ្ឋកិច្ចនៅឆ្នាំ២០២៤។ កូរ៉េខាងត្បូងគឺជាប្រទេស ដែលមានសេដ្ឋកិច្ចពឹងផ្អែកយ៉ាងខ្លាំងលើការនាំចេញ ហើយប្រទេសចិន គឺជាដៃគូពាណិជ្ជកម្មលេខ១ របស់ប្រទេសនេះ បន្ទាប់ពីសហរដ្ឋអាមេរិក។

អ្នកវិភាគក៏បានចាត់ទុកជម្លោះ ដែលកំពុងបន្តរវាងអ៊ីស្រាអែល និងក្រុមសកម្មប្រយុទ្ធហាម៉ាសថា ជាបញ្ហាប្រឈមមួយទៀតសម្រាប់កូរ៉េខាងត្បូងផងដែរ ដោយសារការប៉ះទង្គិចគ្នានេះ អាចជះផលប៉ះពាល់ដល់អត្រាអតិផរណា និងតុល្យភាពពាណិជ្ជកម្ម។

លោក Jeremy Zook បន្ថែមថា “ហានិភ័យដ៏ធំបំផុតសម្រាប់ប្រទេសកូរ៉េ គឺជាអ្វីដែលអាចកើតឡើងចំពោះតម្លៃទំនិញ ដូចជា ប្រេង និងទំនិញថាមពលផ្សេងទៀត ហើយតម្លៃ​ប្រេង​ដ៏ខ្ពស់​នឹង​បន្ថែ​ម​សម្ពាធ​ដល់​អតិផរណា និង​ការ​នាំ​ចូល​របស់​កូរ៉េ ដូច​ជា​ករណី​ក្នុង​ពេលផ្ទុះសង្គ្រាមរវាង​រុស្ស៊ី និង​អ៊ុយក្រែន”៕

ដោយៈ តែម សុខុម

ញូវយ៉កៈ ពាក្យស្នើសុំកម្ចីទិញផ្ទះ បានធ្លាក់ចុះដល់កម្រិតទាបបំផុត មិនធ្លាប់មានចាប់តាំងពីឆ្នាំ១៩៩៥ ខណៈអត្រាប្រាក់កម្ចីទិញផ្ទះបានហក់ឡើងជិតដល់៨% ដែលធ្វើឱ្យតម្រូវការលំនៅឋានដាំក្បាលចុះខ្លាំង។

សន្ទស្សន៍នៃពាក្យស្នើសុំទិញផ្ទះ របស់សមាគមធនាគារផ្ដល់ប្រាក់កម្ចីទិញផ្ទះ (Mortgage Bankers Association) បានធ្លាក់ចុះ២,២%ក្នុងសប្តាហ៍ ដែលបានបញ្ចប់ត្រឹមថ្ងៃទី២០  ខែតុលា មកនៅត្រឹម១២៧ពាក្យស្នើសុំ ដែលជាអត្រាទាបបំផុត មិនធ្លាប់មានចាប់តាំងពីឆ្នាំ១៩៩៥។

ទិន្នន័យបានបង្ហាញកាលពីថ្ងៃពុធ ទី២៥ ខែតុលា ថា អត្រាកិច្ចសន្យាកម្ចីទិញផ្ទះថេរ រយៈពេល៣០ឆ្នាំ បានហក់ឡើង៧សប្តាហ៍ជាប់គ្នាឈានដល់៧,៩%។ នេះបើយោងតាមការចុះផ្សាររបស់សារព័ត៌មាន The Edge Markets។បើគិតពីថ្លៃសេវាទាក់ទងនឹងកម្ចីទិញផ្ទះ និងអត្រាការប្រាក់សរបង្ហាញថា អត្រាការប្រាក់បានហក់ឡើង លើសពី៨%ជាលើកដំបូងក្នុងរយៈពេល២៣ឆ្នាំមកនេះ។

អត្រាការប្រាក់កម្ចីទិញផ្ទះ ដែលអាចកែតម្រូវបានរយៈពេល៥ឆ្នាំ បានហក់ឡើងជិតកន្លះ% ដែលជាចំនួនច្រើនបំផុតចាប់តាំងពីដើមខែមិថុនា ឈានជិតដល់៧%។ លោក Ryan Marshall នាយកប្រតិបត្តិក្រុមហ៊ុន PulteGroup Inc បាននិយាយកាលពីថ្ងៃអង្គារ ទី២៤ ខែតុលា ថា ប្រាក់ចំណូលរបស់បណ្ដាក្រុមហ៊្ននសាងសង់ផ្ទះបានធ្លាក់ចុះ ដោយសារតម្រូវការលំនៅឋានបានធ្លាក់ចុះបន្តិចនៅដើមខែតុលា។

លោកបានបន្ថែមទៀតថា “ខ្ញុំប្រាកដណាស់ថា សម្រាប់អ្នកទិញមួយចំនួន អត្រាការប្រាក់ខ្ពស់ជាងមុន បានជំរុញឱ្យពលរដ្ឋកាន់តែខ្វះលទ្ធភាពទិញផ្ទះ ខណៈអ្នកផ្សេងទៀតប្រហែលជាព្រួយបារម្ភ អំពីការបាត់បង់ការងាររបស់ពួកគេ”៕ The Edge Markets៕