ដោយៈ ម៉ាណា

    ភ្នំពេញៈ តើលោក អ្នកបានកំណត់គោលដៅឬនៅ? ប្រសិនបើគោលដៅរបស់អ្នក គឺដើម្បីបង្កើនឱកាសនៃផលចំណេញល្អ រវាងឆ្នាំ ២០២៦ និង ២០៣០ នៅកម្ពុជា អ្នកជំនាញបានចង្អុលបង្ហាញលើផ្នែកមួយចំនួន។

១. ដីលំនៅឋាន (សក្តានុពលខ្ពស់បំផុត)

អ្នកជំនាញបានចង្អុលបង្ហាញថា ដីនៅជិតទីក្រុងដែលកំពុងពង្រីក ផ្លូវរង្វង់ តំបន់ឧស្សាហកម្ម និងហេដ្ឋារចនាសម្ព័ន្ធថ្មីៗ។ អត្ថប្រយោជន៍ពីនគរូបនីយកម្ម និងកំណើនប្រជាជនរបស់ប្រទេសកម្ពុជា។ ថ្លៃថែរទាំទាបជាងអគារ។ ល្អបំផុតសម្រាប់វិនិយោគិន ដែលមានរយៈពេលចន្លោះពី៣ ទៅ១០ឆ្នាំ។

តំបន់ល្អៗដែលគួរវិនិយោគរួមមានតំបន់ជុំវិញ រួមមានជាយក្រុងភ្នំពេញ ក្រុងតាខ្មៅ ច្រករបៀងកំណើនខេត្តព្រះសីហនុ។ តំបន់តាមបណ្តោយផ្លូវជាតិសំខាន់ៗ និងផ្លូវល្បឿនលឿន។

២. អចលនទ្រព្យឧស្សាហកម្ម

• ឃ្លាំង
• មជ្ឈមណ្ឌលភស្តុភារកម្ម
• ដីរោងចក្រ
• លំនៅដ្ឋានកម្មករនៅជិតសួនឧស្សាហកម្ម

វិស័យនេះ ត្រូវបានគាំទ្រដោយកំណើនផលិតកម្ម ការនាំចេញ និងការវិនិយោគខ្សែសង្វាក់ផ្គត់ផ្គង់។

អ្នកវិភាគមកពីធនាគារពិភពលោក និងធនាគារអភិវឌ្ឍន៍អាស៊ីរំពឹងថា សកម្មភាពឧស្សាហកម្ម នឹងនៅតែជាកម្លាំងចលករដ៏សំខាន់នៃសេដ្ឋកិច្ចកម្ពុជា។

៣. លំនៅឋានមានតម្លៃសមរម្យ

តម្រូវការនៅតែមានភាពធន់ ពីព្រោះគ្រួសារកម្ពុជាជាច្រើននៅតែស្វែងរកផ្ទះដំបូងជាជាងអចលនទ្រព្យប្រណីត។

៤. អចលនទ្រព្យលក់រាយនៅក្នុងតំបន់ដែលកំពុងរីកចម្រើន

ការសិក្សាបានបង្ហាញងា ការលក់រាយក្នុងសង្កាត់ ដែលបម្រើប្រជាជន ក្នុងតំបន់មានប្រជាប្រិយភាព ជាទូទៅមានទស្សនវិស័យរយៈពេលវែងខ្លាំង ជាងមជ្ឈមណ្ឌលផ្សារទំនើបប្រណីត។

៥. ដីកសិកម្មជិតដល់ការអភិវឌ្ឍនាពេលអនាគត

ដីនៅជិតផ្លូវហាយវេនាពេលអនាគត សួនឧស្សាហកម្ម ឬទីក្រុងដែលកំពុងពង្រីកអាចនឹងកើនឡើង ប្រសិនបើការអភិវឌ្ឍទៅដល់តំបន់ទាំងនោះ។

៦. ខុនដូ

ទោះជាមានការផ្គត់ផ្គង់លើសតម្រូវការខ្លះ ប៉ុន្តែខុនដូនៅតែមានឱកាសកាន់តែប្រសើរ អាចមាននៅក្នុងទីតាំងសំខាន់ៗ ដែលបានជ្រើសរើស ដូចជា ទី១ ទីផ្សារនៅតែប្រឈមមុខ នឹងការផ្គត់ផ្គង់ខ្ពស់នៅក្នុងផ្នែកមួយចំនួន។ ទី២ ការអនុវត្តការជួលអាស្រ័យយ៉ាងខ្លាំង ទៅលើទីតាំង និងការគ្រប់គ្រង។

៧. អគារការិយាល័យ

តម្រូវការកំពុងប្រសើរឡើងបន្តិចម្តងៗ ប៉ុន្តែនៅតែទាបជាងការរំពឹងទុកមុនជំងឺរាតត្បាតខ្លាំងបំផុតនៅក្នុងទីផ្សារជាច្រើន។

យោងតាមទិន្នន័យបានបង្ហាញថា កម្ពុជាបានផ្គត់ផ្គង់ការិយាល័យទាំងបីកម្រិត ចំនួនជាង១,៤លានម៉ែត្រការ៉េរួចហើយ នៅក្នុងទីផ្សារ ដែលចំនួននេះ បានបង្ហាញពីការផ្គត់ផ្គង់លើសតម្រូវការ៕

ដោយៈ ចំណាន

    ភ្នំពេញៈ ស្របពេលទីផ្សារស្ថិតនៅមិនច្បាស់លាស់ និងភាពប្រ​កួតប្រជែងកើនឡើង អ្នកជំនាញអន្តរជាតិបានចង្អុលបង្ហាញនូវទស្សនទាននៃការអភិវឌ្ឍបែបថ្មីមួយនៅកម្ពុជា។

លោកKarl Diederich ប្រធានផ្នែកអភិវឌ្ឍន៍នៃគំរោង Urban Hub & Factory Phnom Penh បានមានប្រសាសន៍ឲ្យដឹងកាលពី សប្តាហ៍មុន ក្នុងកម្មវិធីដែលរៀបចំដោយ សមាគមសហគ្រិនសារព័ត៌មានសេដ្ឋកិច្ចកម្ពុជាថា កម្ពុជាមានការអភិវឌ្ឍយ៉ាងលឿនលើវិស័យអចលនទ្រព្យក្នុងរយៈពេលប៉ុន្មានឆ្នាំចុងក្រោយនេះ។

លោកបញ្ជាក់ថា “ទីផ្សារនៅតែមានឱកាសរីកចម្រើន ប៉ុន្តែក្នុងស្ថានភាពបែបនេះ អ្នកអភិវឌ្ឍន៍គួរផ្តោត លើគំរោងប្រើប្រាស់ចម្រុះ ដែលអាចមានខុនដូ ផ្សារទំនើប ហាងកាហ្វេ ការិយាល័យជាដើម”។ លោកបន្តថា “ការផ្តល់បរិយាកាសរស់នៅបែបសហគមន៍ មានភាពទាក់ទាញការរស់នៅ និងការវិនិយោគ”។

លោកKarl Diederichបានបន្តថា កម្ពុជាមិនអាចធៀបជាមួយប្រទេសក្នុងតំបន់បានទេ បើធៀបនឹងល្បឿននៃការអភិវឌ្ឍ និងទំហំសេដ្ឋកិច្ចជាមួយវៀតណាម ឬប្រទេសថៃ ប៉ុន្តែរយៈពេល២ទសវត្សរ៍មកនេះ វិស័យសេដ្ឋកិច្ចកម្ពុជាបានរីកចម្រើនយ៉ាងលឿន ពិសេសវិស័យសំណង់ និងអចលនទ្រព្យ ដែលផ្តល់នូវមូលធនយ៉ាងច្រើនដើម្បីអភិវឌ្ឈជាតិ។

លោកបន្តថា “អ្វីដែលគួរនិយាយនាពេលនេះ មិនគួរផ្តោតលើអ្វីដែលជាការផ្គត់ផ្គង់លើសតម្រូវការទេ តែគួរផ្តោតលើយុទ្ធសាស្រ្តធ្វើបែបណាឲ្យទីផ្សារកាន់តែមានភាពទាក់ទាញ”៕

ដោយ: សហសេវិក
អន្តរជាតិ: ការសិក្សាថ្មីមួយបានបង្ហាញថា ទីក្រុងហុងកុងសម្រេចបានអត្រាកំណើនលឿនបំផុតនៃចំនួនប្រជាជនដែលមានទ្រព្យសម្បត្តិស្តុកស្តម្ភ ក្នុងចំណោមទីក្រុងទាំង១០ ដែលមានជាងគេបំផុត ដោយវ៉ាដាច់ទីក្រុងឡុងដ៍ ញូវយ៉ក និងតូក្យូ។

យោងតាមក្រុមហ៊ុនទិន្នន័យ Altrata ដែលមានទីស្នាក់ការកណ្តាលនៅទីក្រុងញូវយ៉ក ចំនួនមនុស្សដែលមានទ្រព្យសម្បត្តិចំនួន៣០លានដុល្លារ ឬខ្ពស់ជាងនេះបានកើនឡើង២៦,៤ភាគរយក្នុងឆ្នាំ២០២៥ ដល់ចំនួន១៨.២៩០នាក់។

អត្រាកំណើននេះជាកម្រិតខ្ពស់បំផុតក្នុងចំណោមទីក្រុងកំពូលទាំង១០ លើពិភពលោកដែលត្រូវបានចាត់ថ្នាក់ដោយចំនួនប្រជាជនដែលមានទ្រព្យសម្បត្តិស្តុកស្តម្ភ។ ចំណែក ទីក្រុងឡុងដ៍បានកើនឡើង១៨,៣ភាគរយ ទីក្រុងញូវយ៉ក (១៦,៩ភាគរយ) និងទីក្រុងតូក្យូ (១៥,៨ភាគរយ)។

ប៉ុន្តែ បើគិតជាចំនួនជាក់ស្តែង ទីក្រុងហុងកុងបានជាប់ចំណាត់ថ្នាក់លេខពីរទូទាំងពិភពលោក ខណៈទីក្រុងញូវយ៉ជាប់ចំណាត់ថ្នាក់លេខ១ ដែលមានប្រជាជនដែលមានទ្រព្យសម្បត្តិស្តុកស្តម្ភចំនួន២៣.៧៨៥នាក់។

ទីក្រុង Los Angeles ជាប់ចំណាត់ថ្នាក់លេខ៣ ដោយមានប្រជាជនមានទ្រព្យសម្បត្តិស្តុកស្តម្ភចំនួន ១២.៩៩៥ នាក់ ខណៈដែលទីក្រុងសាន់ហ្វ្រាន់ស៊ីស្កូមួយទៀតរបស់សហរដ្ឋអាមេរិក ទទួលបានចំណាត់ថ្នាក់លេខ៤ ដោយមានចំនួន ៩.២១០ នាក់។

ក្រុមហ៊ុន Altrata បានបញ្ជាក់នៅក្នុងរបាយការណ៍របស់ខ្លួនថា ទីក្រុងហុងកុងបានស្រូបយកការកើនឡើងនៃលំហូរទ្រព្យសម្បត្តិឆ្លងដែននាពេលថ្មីៗនេះ។

ដោយមានប្រជាជនសរុបជាង ៧,៥ លាននាក់ ទីក្រុងហុងកុងមានបុគ្គលដែលមានទ្រព្យសម្បត្តិស្តុកស្តម្ភប្រហែលម្នាក់ក្នុងចំណោមប្រជាជន ៤១២ នាក់ ដោយផ្អែកលើការគណនារបស់កាសែត South China Morning Post៕ប្រភព: Vnexpress៕

ដោយ: សហសេវិក
អន្តរជាតិ: ទីផ្សារជួលលំនៅឋានរបស់ទីក្រុងឌូបៃនៃប្រទេសអេមីរ៉ាតអារ៉ាប់រួមកំពុងធ្លាក់ចុះ ដោយទិន្នន័យបង្ហាញថា តម្លៃជួលបានថយចុះគ្រប់ប្រភេទលំនៅឋានទាំងអស់ ខណៈការផ្គត់ផ្គង់កើនឡើង និងភាពមិនប្រាកដប្រជាខាងភូមិសាស្ត្រនយោបាយបានផ្លាស់ប្តូរអំណាចចរចាពីម្ចាស់ផ្ទះទៅអ្នកជួល។

តម្លៃជួលលំនៅឋានបានធ្លាក់ចុះជាមធ្យម១,១ភាគរយក្នុងរយៈពេល៣ខែគិតត្រឹមខែឧសភា ឆ្នាំ២០២៦ ដោយតម្លៃជួលអាផាតមុិនបានធ្លាក់ចុះ០,៩ភាគរយ និងតម្លៃជួលផ្ទះវីឡា និង townhouses បានធ្លាក់ចុះ២,១ភាគរយ។

លោក Ali Siddiqui អ្នកគ្រប់គ្រងផ្នែកស្រាវជ្រាវនៅក្រុមហ៊ុន Cavendish Maxwell បានអះអាងថា «អ្នកជួលមានជម្រើសច្រើនជាងមុន និងអំណាចចរចាខ្ពស់ជាងមុន ហើយការដំឡើងតម្លៃជួលប្រចាំឆ្នាំកំពុងខិតជិតដល់ទីបញ្ចប់»។

និន្នាការប្រែប្រួលនេះកំពុងត្រូវបានជំរុញមួយផ្នែកធំដោយការផ្គត់ផ្គង់ថ្មី។ នៅឆ្នាំ២០២៦ លំនៅឋានថ្មីចំនួនជិត ១៨.២០០យូនីតត្រូវបានចាក់បញ្ចូលទៅក្នុងទីផ្សាររហូតមកដល់ពេលនេះ កើនឡើង១៣,១ភាគរយធៀបនឹងរយៈពេលដូចគ្នាក្នុងឆ្នាំ២០២៥។

ដោយឡែក លោក Rahim Latif ស្ថាបនិកក្រុមហ៊ុនអចលនទ្រព្យ Revan Luay ដែលមានមូលដ្ឋាននៅ Downtown Dubai បានពន្យល់ថា ទោះបីជាជម្លោះក្នុងតំបន់ធ្វើឱ្យអ្នកទិញ និងអ្នកជួលមួយចំនួនមានការប្រុងប្រយ័ត្នក៏ដោយ កំណើនតម្លៃជួលបានថយចុះរួចទៅហើយ ដោយសារតែផ្ទះកាន់តែច្រើនកំពុងត្រូវបានដាក់លក់៕

ដោយៈ ចំណាន

    ភ្នំពេញៈ លោកជូ វណ្ណៈ អគ្គនាយកនៃនិយ័តករអាជីវកម្មអចលនវត្ថុ និងបញ្ចាំ (ន.អ.ប.) និងលោកហេង បូមករា ប្រធានអង្គភាពស៊ើបការណ៍ហិរញ្ញវត្ថុកម្ពុជា បានអញ្ជើញដឹកនាំកិច្ចប្រជុំពិភាក្សាជាមួ​យតំណាងសមាគម អ្នកអភិវឌ្ឍន៍លំនៅឋានកម្ពុជា និងសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា។

កិច្ចប្រជុំនេះ ត្រូវបានរៀបចំឡើងក្នុងគោលបំណង ពិភាក្សាអំពី ការចូលរួមអនុវត្តច្បាប់ និងលិខិតបទដ្ឋានគតិយុត្ត ពាក់ព័ន្ធនឹងការប្រឆាំងការសម្អាតប្រាក់ និងហិរញ្ញប្បទានភេរវកម្ម (AML/CFT) និងហិរញ្ញប្បទាន ដល់ការរីកសាយភាយអាវុធមហាប្រល័យ (PF)។

ជាមួយគ្នានេះ ធនាគារជាតិនៃកម្ពុជាបានបើកិច្ចប្រជុំ ដើម្បីបន្តពង្រឹងគុណភាពទិន្នន័យសន្ទស្សន៍ថ្លៃលំនៅឋាន ធនាគារជាតិនៃកម្ពុជាបានរៀបចំ សិក្ខាសាលាផ្សព្វផ្សាយពីការប្រមូល កំហុសឆ្គងទិន្នន័យ លទ្ធផលវិភាគ និងទិសដៅក្នុងការលើកកម្ពស់ ការតាមដាននិងវាយតម្លៃស្ថានភាពចលនទ្រព្យ នាថ្ងៃទី២៩ ខែមិថុនា ឆ្នាំ២០២៦ នៅធនាគារជាតិនៃកម្ពុជា។

លោកបណ្ឌិត ឃូ វុឍ្ឍី ឧបការីទេសាភិបាល និងជាអគ្គនាយកគោលនយោបាយ និងសហប្រតិបត្តិការអន្តរជាតិ នៃធនាគារជាតិនៃកម្ពុជា បានថ្លែងអំណរគុណ ចំពោះការរួមចំណែកសហការរបស់គ្រឹះ​ស្ថានធនាគារនិងហិរញ្ញវត្ថុ ព្រមទាំងបានរំលេចពីសារៈសំខាន់ នៃការផ្សព្វផ្សាយសន្ទស្សន៍ថ្លៃលំនៅឋាន ជាពិសេសសម្រាប់ អ្នករៀបចំគោលនយោបាយ ទាំងវិស័យសាធារណៈនិងឯកជន និងអ្នកស្រា​វជ្រាវអំពីស្ថានភាពទីផ្សារអចលនទ្រព្យ កាលានុវត្តភាពនិងហានិភ័យ និងរួមចំណែក ពង្រឹងការវិភាគអំពីស្ថិរភាពរូបិយវត្ថុ និងស្ថិរភាពហិរញ្ញវត្ថុ ជាដើម៕